1. E ‵tusa mo te Malaki 3:16, se a te tusi telā ko oti ne tusi ne Ieova, kae ne a mea e aofia i ei?

 I TE fia o tausaga, ko oti ne tusi ne Ieova se tusi fakapito. E aofia i te tusi tenei a te fakasologa o igoa telā e kamata mai i te igoa o te molimau fakamaoni muamua, ko Apelu. * (Luka 11:50, 51) Kae mai tua ifo o te fia o senitenali, ko oti ne fakaopoopo atu ne Ieova a igoa ki te tusi tenā, kae i aso nei e aofia te fia miliona o igoa o tino. I te Tusi Tapu, a te tusi tenā e taku ki “se tusi o fakamasauaga,” “te tusi o te ola,” mo “te peluga tusi o te ola.” I te mataupu tenei, ka fakasino atu tatou ki ei e pelā me ko “te tusi o te ola.”—Faitau te Malaki 3:16; Faka. 3:5; 17:8.

2. I oi a igoa e tusi i te tusi o te ola, kae e mafai pefea o aofia ‵tou igoa i te tusi tenā?

² E aofia i te tusi fakapito tenei a igoa o latou kolā e tapuaki atu ki a Ieova mo te ma‵taku io me ko te āva, kae fakatāua ne latou tena igoa. E fetaui ‵lei latou ke maua te ola se-gata-mai. I aso nei, e mafai o tusi ‵tou igoa i te tusi tenā, māfai e ati aka ne tatou se va fakataugasoa ‵pili mo Ieova telā e fakavae ki te taulaga togiola a tena Tama, ko Iesu Keliso. (Ioa. 3:16, 36) E ma‵nako tatou katoa ke maua ‵tou igoa i te tusi tenā—faitalia me e fakamoe‵moe tatou ke ola i te lagi io me ko te lalolagi!

3-4. (a) E mata, ka ola eiloa tatou ki te se-gata-mai māfai ko maua ‵tou igoa i te tusi o te ola? Fakamatala mai. (e) Ne a mea ka sau‵tala ki ei i te mataupu tenei mo te mataupu mai tua ifo?

 ³ E mata, e fakauiga i ei me i tino katoa kolā e maua olotou igoa i te tusi tenei ka ola ki te se-gata-mai? E maua ne tatou te tali ki te fesili tenā i pati a Ieova ki a Mose telā ne siki mai i te Esoto 32:33. Muna a Ieova: “So se tino ne agasala mai ki a au ka ‵solo kea‵tea ne au a tena igoa mai taku tusi.” Tela la, a igoa kolā e maua nei i te tusi tenā e mafai o ‵solo keatea, e pelā eiloa me ne tusi ne Ieova a igoa konā ki se penitala. (Faka. 3:5) E ‵tau o fakamautinoa aka ne tatou me e tumau ‵tou igoa i te tusi tenā ke oko ki te taimi e tusi faka‵lei ei ki se peni.

⁴ Kae e mafai o ‵sae aka a nisi fesili. E pelā mo te mea tenei, ne a pati i te Tusi Tapu e uiga ki igoa o tino kolā e tusi i te tusi o te ola mo igoa kolā e se maua i ei? Ko te taimi fea ka maua i ei a te ola se-gata-mai ne latou kolā e tumau olotou igoa i te tusi tenā? Kae e a latou kolā ko oti ne ‵mate e aunoa mo se avanoaga ke iloa ‵lei ne latou a Ieova? E mata, e mafai o maua olotou igoa i te tusi tenā? Ka tali aka a fesili konei i te mataupu tenei mo te mataupu mai tua.

I OI A IGOA E AOFIA I TE TUSI?

5-6. (a) E pelā mo te mea e fakaasi mai i te Filipi 4:3, i oi a igoa e aofia i te tusi o te ola? (e) Ko te taimi fea ka mafai ei o fakatumau olotou igoa i te tusi o te ola?

⁵ I oi a igoa e tusi i te tusi fakatusa tenei? Ke tali aka te fesili tenā, ka mafau‵fau tatou ki potukau kese‵kese e lima o tino. E aofia i potukau konei, a igoa o nisi tino kolā ka tusi i te tusi o te ola, kae e se penā loa a nisi tino.

⁶ A te potukau muamua e aofia i ei a latou kolā ne filifili ke pule fakatasi mo Iesu i te lagi.  E mata, e maua nei olotou igoa i te tusi o te ola? Ao. E ‵tusa mo pati a te apositolo ko Paulo ki tino kolā ne “ga‵lue fakatasi” mo ia i Filipi, a igoa o te kau fakaekegina, kolā ne ‵kami ke pule fakatasi mo Iesu, ko ‵tu nei i te tusi o te ola. (Faitau te Filipi 4:3.) Kae ke tumau olotou igoa i te tusi fakatusa tenā, e ‵tau o tumau latou i te fakamaoni. Tenā, kafai ko maua ne latou te ‵toe fakamailogaga, faitalia me mai mua faeloa o ‵mate latou io me mai mua malie o te fakalavelave lasi, ko mafai ei o tumau olotou igoa i te tusi tenei.—Faka. 7:3.

7. Se a te mea e fakaasi mai i te Fakaasiga 7:16, 17 e uiga ki te taimi ka fakatumau ei te tusiga o igoa o te vaitino tokouke o nisi mamoe i te tusi o te ola?

⁷ A te lua o potukau e aofia i ei a te vaitino tokouke o nisi mamoe. E mata, e maua olotou igoa i te tusi o te ola? Ao. E mata, ka tumau olotou igoa i te tusi o te ola māfai ko oti ne ‵sao atu latou i Amaketo? Ao. (Faka. 7:14) Ne fai mai a Iesu me i tino kolā e fai pelā me ne mamoe, ka olo atu “ki te ola se-gata-mai.” (Mata. 25:46) Kae ko latou kolā e ‵sao atu i Amaketo, ka se maua fakavave ne latou te ola se-gata-mai. Ka tumau eiloa olotou igoa i te tusi i te ola kolā ne tusi i se auala fakatusa ki se penitala. I te taimi o te Pulega i te Afe Tausaga, “ka takitaki ne [Iesu] a latou ki vaipuna o vai o te ola.” A latou kolā e ‵saga atu i se auala ‵lei ki te takitakiga a Keliso kae fakamasino fakamuli aka me e fakamaoni ki a Ieova, ka fakatumau olotou igoa i te tusi o te ola.—Faitau te Fakaasiga 7:16, 17.

8. I oi a igoa kolā ka se maua i te tusi o te ola, kae se a te mea ka tupu ki a latou?

⁸ A te tolu o potukau, ko kouti kolā ka fakaseai atu i Amaketo. E se maua a igoa o latou i te tusi o te ola. E fai mai a Iesu me ka olo atu latou “ki te fakaseaiga se-gata-mai.” (Mata. 25:46) Mai lalo i te takitakiga a te agaga tapu, e fai mai a Paulo me “ka maua ne latou [konei] te fakasalaga ko te fakaseaiga ki te se-gata-mai.” (2 Tesa. 1:9; 2 Pe. 2:9) E mafai o fai atu tatou me e aofia i ei a latou kolā ne agasala faeloa mo te iloa tonu ki te agaga tapu mai tua ifo i ei. Ka maua foki ne latou te fakaseaiga se-gata-mai, kae e se ko te ola se-gata-mai. E manino ‵lei, me ka se toe‵tu mai latou. (Mata. 12:32; Male. 3:28, 29; Epe. 6:4-6) Ke na mafaufau faka‵lei tatou ki potukau e lua o tino kolā ka toe‵tu mai ki te lalolagi.

TINO KOLĀ KA TOE‵TU MAI

9. E ‵tusa mo te Galuega 24:15, ne a potukau e lua o tino kolā ka toe‵tu mai ki te lalolagi, kae se a te ‵kese o te avā potukau konei?

⁹ E faipati mai te Tusi Tapu e uiga ki potukau e lua o tino kolā ka toe‵tu mai mo te fakamoemoega ke ola ki te se-gata-mai i te lalolagi, ko “tino amio‵tonu” mo “tino sē amio‵tonu.” (Faitau te Galuega 24:15.) A “tino amio‵tonu” ko latou kolā ne tavini atu mo te fakamaoni ki a Ieova i te taimi koi ola ei latou. I te suā feitu, a “tino sē amio‵tonu” ne seki tavini atu mo te fakamaoni ki a Ieova. A te ‵tonuga loa, e se amio‵tonu a amioga a te tokoukega o latou. Ona ko te mea e toe‵tu mai a potukau e lua konei, e mata, e mafai o fai atu tatou me e tusi olotou igoa i te tusi o te ola? Ke tali te fesili tenā, ke mafau‵fau tatou ki potukau takitasi konei.

10. Kaia ka toe‵tu mai a “tino amio‵tonu,” kae se a te tauliaga ka maua ne nisi tino i a latou? (Onoono ki te mataupu tenei “Fesili Mai te Kau Fai‵tau” e uiga ki te toe‵tuga ki te lalolagi.)

¹⁰ A “tino amio‵tonu” ko te fa o potukau. A koi tuai o ‵mate, ne maua olotou igoa i te tusi o te ola. E mata, ne tapale olotou igoa mai te tusi tenā i te taimi ne ‵mate ei latou? Ikai, me koi “ola” latou i te mafaufau o Ieova. A Ieova “e se ko te Atua o tino ‵mate, kae ko te Atua o tino ola, me i a latou e ola katoa i tena kilokiloga.” (Luka 20:38) E fakauiga i ei, me kafai  ko toe‵tu mai a tino amio‵tonu ki te lalolagi, ka maua eiloa olotou igoa i te tusi o te ola faitalia me koi tusi eiloa i “se penitala.” (Luka 14:14) E sē se fakalotolotolua, me ka maua ne nisi tino kolā ka toe‵tu mai, a te tauliaga ke tavini atu e pelā me ne “pelenise i te lalolagi kātoa.”—Sala. 45:16.

11. Ne a mea e ‵tau o tauloto ne “tino sē amiotonu” a koi tuai o tusi olotou igoa i te tusi o te ola?

¹¹ A te ‵toe mea, mafaufau ki te lima o potukau ko “tino sē amio‵tonu.” Kāti ona ko te mea e seki iloa ne latou a mea ne manako a Ieova ke fai ne latou, e seki ola latou i se olaga amiotonu a koi tuai o ‵mate atu. Tela la, ne seki maua olotou igoa i te tusi o te ola. Kae i te ‵toe fakatumaiga o latou, e tuku atu ne te Atua se avanoaga ke mafai o tusi fakamuli olotou igoa i te tusi tenā. Ka ma‵nako malosi a “tino sē amiotonu” konei ki se fesoasoani. I olotou olaga mua, ne fai ne nisi tino i a latou a mea mataga. Tela la, e manakogina ke akoako latou ki te auala ke ola e ‵tusa mo tulaga amio‵tonu o Ieova. Ke fakataunu te manakoga tenā, ka fai ne te Malo o te Atua a te ‵toe polokalame sili o akoakoga i tala mua o tino.

12. (a) Ko oi ka akoako ne latou a tino sē amio‵tonu? (e) Ne a mea ka ‵tupu ki tino kolā e ita fitifiti ma fakagalue aka a mea ne tauloto ne latou?

¹² Ko oi ka akoako ne latou a tino sē amio‵tonu? Ko te vaitino tokouke mo tino amio‵tonu kolā e toe‵tu mai. Ko te mea ke maua a igoa o tino sē amio‵tonu i te tusi o te ola, e ‵tau mo latou o ati aka se fesokotakiga mo Ieova kae fai te lotou tukuatuga ki a ia. Ka tausi eiloa mo te fia‵fia ne Iesu Keliso mo ana taina famasino a te gasolo atu o tino sē amio‵tonu katoa konei. (Faka. 20:4) So se tino telā e ita fitifiti ke talia mo te fiafia a te fesoasoani tenā, ka fakaseai atu—faitalia me ko oko atu latou ki te 100 tausaga. (Isa. 65:20) E mafai ne Ieova mo Iesu o iloa a mea i loto o tino kae ka fakamautinoa aka ne lāua me e seai se mea ka fakamasei atu i te lalolagi fou.—Isa. 11:9; 60:18; 65:25; Ioa. 2:25.

 TOE‵TUGA KI TE OLA MO TE FAKAMASINOGA

13-14. (a) I aso mua, se a te malamalama o tatou i pati a Iesu i te Ioane 5:29? (e) Kae se a te mea e ‵tau o masaua ne tatou e uiga ki pati konā?

¹³ Ne faipati foki a Iesu e uiga ki a latou kolā ka toe‵tu aka i te lalolagi. E pelā mo ana pati: “Ka oko mai eiloa te itula e lagona ei ne tino katoa kolā e i loto i tanuga a tena leo ko ulu mai ei ki tua. Ko latou kolā ne fai mea ‵lei ka toe‵tu mai ki te ola, kae ko latou kolā ne fai mea ma‵sei ka toe‵tu mai ki te fakamasinoga.” (Ioa. 5:28, 29) Se a te mea ne fakauiga ki ei a Iesu?

¹⁴ I aso mua, ne malamalama tatou i pati a Iesu me e fakasino atu ki faifaiga a tino kolā ka toe‵tu mai, mai tua o te lotou toe‵tuga; ko tena uiga, ka ‵tu aka a nisi tino ki te ola kae fai mea a mea ‵lei, kae ko nisi tino ka toe‵tu ki te ola kae fai a mea ma‵sei. Kae onoono me ne seki fai atu a Iesu me i tino kolā ka o‵mai ki tua mai tanuga ka fai ne latou a mea ‵lei io me ka fai ne latou a mea ma‵sei. Ne fakaaoga ne ia se pati telā e fakauiga ki mea ne fai i aso ko ‵teka. Ne faipati a ia ki a latou kolā “ne fai mea ‵lei” mo latou kolā “ne fai mea ma‵sei.” E fakaasi mai i te mea tenei me ko olotou faifaiga ne fai a koi tuai o ‵mate latou. Kae e tai ‵tagi tonu atu te mea tenā, ne? A te ‵tonuga loa, ka seai se tino e talia ke fai ne ia a mea ma‵sei i te lalolagi fou. A tino sē amio‵tonu ne fai ne latou a mea ma‵sei konei a koi tuai o ‵mate. Se a la te ‵tou malamalama nei i pati a Iesu e uiga ki a latou kolā “ka toe‵tu mai ki te ola” mo latou kolā ka “toe‵tu mai ki te fakamasinoga”?

15. Ko oi ka “toe‵tu mai ki te ola,” kae kaia?

¹⁵ A tino amio‵tonu kolā ne fai ne latou a mea ‵lei a koi tuai o ‵mate, ka “toe‵tu mai ki te ola” me ko oti ne tusi olotou igoa i te tusi o te ola. E fakauiga i ei me i te toe‵tuga o latou kolā ne fai mea ‵lei telā ne fakamatala mai i te Ioane 5:29 e ‵pau mo te toetuga “o tino amio‵tonu” i te Galuega 24:15. E fetaui ‵lei a te malamalama tenei mo te fakamatalaga i te Loma 6:7, telā e fai mai: “Te tino telā ko oti ne mate ko fakasaoloto mai i tena agasala.” A agasala kolā ne fai ne tino amio‵tonu konei ne fakaseai atu i te mate, kae tumau loa a tala e uiga ki te lotou fakamaoni. (Epe. 6:10) E tonu, a tino amio‵tonu kolā ka toe‵tu mai e ‵tau o tumau i te fakamaoni ko te mea ke tumau olotou igoa i te tusi o te ola.

16. Se a te mea e fakauiga ki ei a te “toe‵tu mai ki te fakamasinoga”?

¹⁶ Kae e a latou kolā ne fai ne latou a mea ma‵sei a koi tuai o ‵mate? E tiga eiloa ne fakaseai atu olotou agasala i te mate, kae e seai ne olotou tala e uiga ki te lotou fakamaoni. E se maua olotou igoa i te tusi o te ola. Tela la, a te toe‵tuga o “latou kolā ne fai mea ma‵sei” e ‵pau mo te toe‵tuga o “tino sē amio‵tonu” i te Galuega 24:15. Ka “toe‵tu mai ki te fakamasinoga.” * Ka fakamasino aka a tino sē amio‵tonu me ka iloilo faka‵lei aka latou. (Luka 22:30) Ka manakogina se taimi ke fakaiku aka me e mata e ‵tau o maua olotou igoa i te tusi o te ola. Kafai fua e ‵teke atu a tino sē amio‵tonu ki olotou olaga ma‵sei mua kae tuku atu latou ki a Ieova, e mafai ei o tusi olotou igoa i te tusi o te ola.

17-18. Ne a mea e ‵tau o fai ne tino katoa kolā ka toe‵tu mai ki te ola i te lalolagi, kae ne a “faifaiga” e fakasino atu ki ei i te Fakaasiga 20:12, 13?

¹⁷ Faitalia me ne amio‵tonu io me ne seki amio‵tonu a tino kolā ka toe‵tu mai, e ‵tau mo latou o faka‵logo ki tulafono i peluga tusi kolā  ka ‵tala mai i te 1,000 tausaga. E fakamatala mai ne te apositolo ko Ioane a te mea ne lavea ne ia i te fakaasiga: “Ne matea ne au a tino ‵mate, ko tino ma‵luga mo tino ma‵lalo, e ‵tu i mua o te nofogaaliki, kae ne ‵tala a peluga tusi. Kae ne ‵tala mai foki te suā peluga tusi; ko te peluga tusi o te ola. Ne fakamasino a tino ‵mate i mea kolā e tusi i peluga tusi e ‵tusa mo olotou faifaiga.”—Faka. 20:12, 13.

¹⁸ Ne a “faifaiga” ka fakavae ki ei te fakamasinoga o tino kolā ka toe‵tu mai? E mata, ka fakasino atu ki olotou faifaiga a koi tuai o ‵mate? Ikai! Masaua me ko oti ne fakaseai atu olotou agasala mua i te mate. Kae e se mafai o fakasino atu “olotou faifaiga” ki olotou faifaiga i olotou olaga mua. I lō te fai pena, e ‵tau o fakasino atu ki olotou faifaiga e ‵tusa mo te lotou akoakoga i te lalolagi fou. Ke oko ki tāgata fakamaoni e pelā mo Noa, Samuelu, Tavita, mo Tanielu, e ‵tau o tauloto latou e uiga ki a Iesu Keliso kae fakaasi atu te fakatuanaki ki tena taulaga. Ko tena uiga, e ‵tau o uke atu a mea e ‵tau o tauloto ne tino sē amio‵tonu!

19. Se a te ikuga fakaoti mō latou kolā e ‵teke ki te avanoaga gali tenei?

¹⁹ Se a te ikuga fakaoti mō latou kolā e ‵teke atu ki te avanoaga gali tenei? E fai mai te Fakaasiga 20:15: “So se tino e se tusi tena igoa i te tusi o te ola e ‵pei ki te lase ‵ka ulaula.” Ao, ka fakaseai katoatoa atu latou ki te se-gata-mai. Tela la, se mea tāua ‵ki ke fakamautinoa aka ne tatou me e maua ‵tou igoa i te tusi o te ola kae tumau i ei!

20. Se a te galuega fakafiafia telā ka fai i te taimi o te Pulega i te Afe Tausaga? (Onoono ki te ata i te ‵kava.)

²⁰ Ko tafaga la te gali o te galuega ka fai i te pulega i te Afe Tausaga! Ka fai i ei a te ‵toe polokalame sili o akoakoga i te lalolagi. Kae ko te taimi foki tenā ka iloilo faka‵lei aka i ei a amioga a tino amio‵tonu mo tino sē amio‵tonu. (Isa. 26:9; Galu. 17:31) Ka fai pefea a te polokalame o akoakoga tenei? Ka fesoasoani mai te suā mataupu ke malamalama kae fakatāua ne tatou a te fakatokaga gali tenei.