SIJÉ POU LÉTID 40
‘Édé An Pil Moun Pou Fè Sa Ki Dwètʼ
‘Sé moun-lan ki ka édé an pil moun pou fè sa ki dwèt, kay kléwé menm kon sé étwal-la pou tout tan.ʼ—DANN. 12:3.
CHANSON 151 Yo Kay Viv Ankò!
SA NOU KAY DISKITÉ AN ATIK SALA a
1. Ki bèl bagay nou ka èspéwé diwan Mil (1,000) Lanné-a?
SÉ PA dé bèl jou sala kay bèl, lè wézèwèksyon-an koumansé asou latè-a diwan Mil (1,000) Lanné-a! Pa dé anvi nou anvi pou wè moun nou enmen ki mò. Èvèk Jéhova ka santi konsa osi. (Jòb 14:15) Imajiné djèwté-a tout moun asou latè-a kay ni lè yo wè fanmi yo èk jan yo ki wésisité. Kon nou té wè an atik-la avan, Jéhova kay ékwi non sé moun-lan ki “bon” an liv lavi étonnèl-la. (Twav. 24:15; Jan 5:29) Alò i posib ki, moun nou enmen ki mò pé wésisité touswit apwé Anmagèdonn. b Osi, moun ki té fè sa ki “mové” kay wésisité èk “yo kay jwenn kondannasyon”. Sa sé moun tèl kon, moun ki pa té twapé chans-lan pou konnèt Jéhova èk sèviʼy avan yo mò.
2-3. (a) Silon Izaya 11:9, 10, kisa ki kay pli gwo pwogwanm endikasyon-an an listwa lézòm? (b) Kisa nou kay konsidiwé an atik sala?
2 Tout moun ki wésisité kay bizwen apwann bagay nèf. (Izay. 26:9; 61:11) Alò, pli gwo pwogwanm endikasyon-an an listwa lézòm kay ni pou fèt. (Li Izaya 11:9, 10.) Pouki? Sé paski, sé moun-lan ki pa té dwèt-la ki wésisité kay ni pou apwann konsèné Jézi Kwi, Wéyòm-lan, wanson-an, non Jéhova èk wézon-an Jéhova tousèl ni dwa-a pou kondwi tout kwiyasyon. Jis sé bon moun-lan ki wésisité-a ki kay ni pou apwann bagay nèf, paski Jéhova ka kontiné enstwi pèp li mizi an mizi. Adan sé moun sala té ja mò avan Bib-la té fini ékwi. Alò, ni moun ki mové ni moun ki bon, kay ni an chay bagay pou apwann.
3 An atik sala nou kay konsidiwé sé kwèsyon sala: Ki mannyè gwo pwogwanm endikasyon-an kay fèt? Ès moun kay aksèpté enstwiksyon sala? Èk ki mannyè aksyon yo kay afèkté si yo kay twapé lavi opa? Sé wépons-lan pou sé kwèsyon sala byen enpòtan pou nou jòdi jou. Konsa, nou kay diskité déotwa bèl pwofèsi an liv Dannyèl èk Wévélasyon, ki kay édé nou konpwann kisa ki kay fèt lè moun ki mò wésisité. Mé pwèmyéman, annou konsidiwé bèl pwofèsi-a an Dannyèl 12:1, 2.
‘MOUN KI KA DÒMI ANBA TÈ-A KAY LÉVÉʼ
4-5. Kisa Dannyèl 12:1 di ki kay fèt diwan dènyé tan-an?
4 Li Dannyèl 12:1. Liv Dannyèl ka di nou konsèné bagay èstòdinè ki kay fèt yonn apwé lòt diwan dènyé tan-an. Pou ègzanp, Dannyèl 12:1 di, Michèl sa vlé di Jézi Kwi, ‘ka doubout pou pèp [Bondyé]ʼ. Pa sala an pwofèsi-a té koumansé akonpli an lanné mil nèf san katòz (1914) lè Jézi vini Wa an Wéyòm Bondyé an syèl.
5 Mé pwofèt Dannyèl té osi di Jézi té kay ‘douboutʼ diwan ‘an tan ki kay ni an chay twakasman, an tan ki pʼòkò janmen ègzisté dépi moun asou latè-aʼ. Tan sala ki kay ‘ni an chay twakasman-anʼ, sé “gwo soufwans-lan” èben ‘gwo twibilasyon-anʼ Jézi té palé konsèné an Mafyou 24:21(NWT). Jézi kay doubout, èben nou sa di Jézi kay pwan aksyon pou fè défans pèp Bondyé an finisman tan twakasman sala. Sa vlé di diwan Anmagèdonn. Liv Wévélasyon ka kwiyé sé moun-lan Jézi kay doubout pou-a, “an gwan popilas moun . . . ki ja pasé anba gwo soufwans-lan”.—Wév. 7:9, 14.
6. Silon Dannyèl 12:2 kisa ki kay fèt apwé Anmagèdonn? Èspliké. (Gadé atik-la ki anba “Questions From Readers” konsèné wézèwèksyon-an pou lavi asou latè-a.)
6 Li Dannyèl 12:2. An tan pasé nou té kwè Dannyèl 12:2 té ka palé konsèné wézèwèksyon-an pou syèl, èben konsèné aktivité Témwen Jéhova ki té pwèskè doubout an lanné mil nèf san dizwit (1918). c Mé apwézan, nou konpwann ki, Dannyèl 12:12 ka palé konsèné wézèwèksyon lé mò ki kay pwan kou an latè nèf-la. Pouki nou sa di sa? Sé paski lévanjil-la sèvi èspwèsyon-an ‘anba tè-aʼ, èk Moziz té sèvi menm èspwèsyon sala an liv Jòb 17:16 lèʼy té ka palé konsèné ‘Tonbo-aʼ. Alò, sa ka moutwé, Dannyèl 12:2 ka palé konsèné wézèwèksyon-an ki kay pwan kou an latè nèf-la apwé Anmagèdonn.
7. (a) Silon Dannyèl 12:2 adan sé moun-lan ki wésisité-a kay twapé ‘lavi étonnèlʼ. Kisa sa vlé di? (b) An ki mannyè sé moun sala “kay wésisité pou an pli bon lavi”?
7 Dannyèl 12:2 di, adan sé moun-lan ki wésisité-a kay twapé ‘lavi étonnèlʼ. Sa vlé di, moun ki apwann èben kontiné apwann konsèné Jéhova épi Jézi Kwi, èk ki obéyi yo diwan mil (1,000) lanné-a, kay twapé lavi étonnèl. (Jan 17:3) An tan pasé, moun ki té wésisité mò ankò paski yo té enpawfé. Mé moun ki wésisité an latè nèf-la èk ki obéyisan, kay vini pawfé èvèk yo kay viv pou tout tan. Alò nou sa di, yo “kay wésisité pou an pli bon lavi”.—Hib. 11:35.
8. Dannyèl 12:2 di, adan moun ki wésisité kay ‘èspéyansé honté épi yo kay dézonnowé yo pou tout tanʼ. Kisa sa vlé di?
8 Kanmenm sé pa tout moun ki wésisité, ki kay aksèpté enstwiksyon Jéhova. Pwofèsi Dannyèl ka di nou ki, adan moun ki wésisité kay ‘èspéyansé honté épi yo kay dézonnowé yo pou tout tanʼ. Konsa paski yo kay wébèl kont Jéhova, i pa kay ékwi non yo an liv lavi étonnèl-la, èk yo pa kay twapé lavi étonnèl. Pito sa, yo kay ‘dézonnowé yo pou tout tanʼ. Sa vlé di Bondyé kay détwi yo. Alò Dannyèl 12:2 ka palé konsèné sa ki kay wivé tout moun ki wésisité asou latè-a, silon sa yo fè apwé yo wésisité. d (Wév. 20:12) Adan di yo kay twapé lavi étonnèl adan di yo kay mò.
‘ÉDÉ AN PIL MOUN POU FÈ SA KI DWÈTʼ
9-10. Ki lòt bagay ki kay fèt apwé gwan twibilasyon-an, èk ki moun ki ‘kay kléwé bwiyan kon syèl-laʼ?
9 Li Dannyèl 12:3. Ki lòt bagay ki kay fèt apwé ‘gwan twibilasyon-anʼ? Dannyèl 12:3 ka osi palé konsèné an lòt bagay ki kay fèt apwé gwan twibilasyon-an.
10 Ki moun ki ‘kay kléwé bwiyan kon syèl-laʼ? Sa Jézi di an Mafyou 13:43 ka édé nou twapé wépons-lan pou kwèsyon sala. I di: “Sé moun Bondyé-a kay kléwé menm kon sòlèy-la anba kondwit Papa yo.” Lè Jézi té di sé pawòl sala, i té ka palé konsèné sé moun-lan ki té kay kondwi épiʼy an Wéyòm-lan. (Maf. 13:38) Konsa, Dannyèl 12:3 ka palé konsèné sé moun-lan ki kay kondwi épi Jézi an syèl, épi twavay-la yo kay fè diwan Mil (1,000) Lanné-a.
Sé moun-lan ki kay kondwi épi Jézi, kay twavay ansanm épiʼy pou diwèkté pwogwanm endikasyon-an ki kay fèt oliwon latè-a diwan mil (1,000) lanné-a (Gadé pawagwaf 11)
11-12. Diwan mil (1,000) lanné-a, ki mannyè sé moun-lan ki kay kondwi épi Jézi kay ‘édé an pil moun pou fè sa ki dwètʼ?
11 Ki mannyè sé moun-lan ki kay kondwi épi Jézi kay ‘édé an pil moun pou fè sa ki dwètʼ? Sé moun-lan ki kay kondwi épi Jézi, kay twavay ansanm épiʼy pou diwèkté pwogwanm endikasyon-an ki kay fèt oliwon latè-a diwan mil (1,000) lanné-a. Chonjé, sé moun-lan ki kay kondwi épi Jézi pa kay sèlman kondwi kon wa, mé osi yo kay wann sèvis kon pwèt. (Wév. 1:6; 5:10; 20:6) Konsa yo kay édé Jézi “djéwi sé nasyon-an”, èk mizi an mizi tout moun kay vini pawfé. (Wév. 22:1, 2; Izik. 47:12) Pa dé kontan sé moun-lan ki kay kondwi épi Jézi kay kontan!
12 Sé moun-lan ki kay kondwi épi Jézi kay édé ‘an pil mounʼ pou fè sa ki dwèt. ‘An pil mounʼ sala, ki moun yo yé? La ni twa (3) gwoup: (1) sé moun-lan ki wésisité-a, (2) sé moun-lan ki chapé ladjè Anmagèdonn-lan, èk (3) manmay ki fèt an latè nèf-la. Lè mil (1,000) lanné-a fini, tout moun ki ka viv asou latè-a kay pawfé. Mé ki lè Jéhova kay ékwi non yo an liv lavi étonnèl-la pou tout tan?
DÈNYÉ TÈS-LA
13-14. Kisa tout moun ki pawfé kay ni pou fè avan yo wisouvwè lavi étonnèl?
13 Nou ni pou chonjé menm si an moun pawfé sa pa vlé di i kay viv pou tout tan. Pou ègzanp, Adanm épi Èv té pawfé mé avan Jéhova té sa ba yo lavi étonnèl yo té ni pou moutwé yo té fidèl pou li. Èk malèwèzman yo pa té wèsté fidèl. Yo dézobéyi Jéhova.—Ronm 5:12.
14 An bout mil (1,000) lanné-a tout moun asou latè-a kay pawfé. Ès tout sé moun pawfé sala kay dakò pou Jéhova kondwi yo pou tout tan? Èben ès adan di yo kay fè menm kon Adanm épi Èv ki té dézobéyi Jéhova magwé yo té pawfé? Nou bizwen konnèt wépons-lan pou sé kwèsyon sala. Mé ki mannyè nou kay twapé sé wépons-lan?
15-16. (a) Ki lè tout moun kay ni chans-lan pou moutwé si yo fidèl pou Jéhova? (b) Kisa ki kay fèt apwé dènyé tès-la?
15 Silon liv Wévélasyon Satan kay an pwizon pou yon mil (1,000) lanné. Diwan tan sala i pa kay sa kwennen pyèsonn. Mé lè mil (1,000) lanné-a fini yo kay ladjé Satan hòd pwizonʼy. Èk a lè sala i kay éséyé pou kwennen lézòm ki ja pawfé. Diwan dènyé tès sala tout moun ki pawfé asou latè-a kay ni chans-lan pou moutwé a klè si yo kay onnowé non Bondyé èpi sipòté dwa-a i ni pou kondwi. (Wév. 20:7-10) Silon sa chak moun fè lè Satan mété yo anba tès, sa kay détèminé si Jéhova kay ékwi non yo an liv lavi étonnèl-la opa.
16 La ni moun ki pa kay aksèpté kondwit Jéhova menm kon Adanm épi Èv. Mé kisa ki kay wivé sé moun sala? Wévélasyon 20:15 di nou: “Népòt moun ki pa ni nonʼy ékwi an liv lavi étonnèl-la, yo pwanʼy èk yo jétéʼy an létan difé-a.” Wi, Jéhova kay détwi sé moun sala pou tout tan. Mé majòwité moun asou latè-a kay wèsté fidèl diwan dènyé tès-la. Èk a lè sala, Jéhova kay ékwi non yo an liv lavi étonnèl-la pou tout tan.
DIWAN “DÈNYÉ TAN-AN”
17. Kisa an nanj té di Dannyèl konsèné sa ki té kay fèt diwan tan nou? (Dannyèl 12:4, 8-10)
17 Sé pa dé kontan nou ka kontan lè nou katjilé asou sé bagay-la ki kay fèt an tan ki ka vini! Kanmenm, an nanj té osi bay Dannyèl enfòmasyon enpòtan konsèné sa ki té kay fèt an tan nou, sa vlé di an “dènyé tan-an”. (Li Dannyèl 12:4, 8-10; 2 Tim. 3:1-5) Nanj-lan té di Dannyèl ‘la kay ni nòlaj ki vwé alabondansʼ. Konsa, diwan dènyé tan-an, pèp Bondyé té kay konpwann sa ki ékwi an liv Dannyèl pli mèyè. Nanj-lan osi di diwan tan sala, ‘moun ki méchan té kay kontiné fè sa ki pa bon èk yo pa té kay konpwannʼ.
18. Touswit, kisa ki kay wivé moun ki méchan?
18 Jòdi jou i pé sanm akwèdi moun ki méchan pa ka twapé pinisyon pou sé mové bagay-la yo ka fè-a. (Mala. 3:14, 15) Mé touswit Jézi kay jijé moun ki kon kabwit èvèk i kay sépawé yo hòd moun ki kon mouton. (Maf. 25:31-33) Sé moun méchan-an pa kay chapé anba gwan twibilasyon-an, èk yo pa kay wésisité pou viv an latè nèf-la non plis. Jéhova pa kay ékwi non yo an ‘livʼ li-a ki mansyonnen an Malakay 3:16.
19. Apwézan sé lè pou nou fè kisa? Èk pouki i enpòtan pou nou fè sa? (Malakay 3:16-18)
19 Apwézan sé lè pou nou moutwé nou pa moun ki méchan. (Li Malakay 3:16-18.) Jéhova ka sanblé moun i ka konsidiwé kon ‘on byen spésyalʼ. Sa vlé di, moun ki ni an pil valè an zyéʼy. Asiwé, nou vlé anpami sé moun-lan ki spésyal pou Jéhova.
Pa dé kontan nou kay kontan pou wè Dannyèl èk moun nou enmen ki mò ‘lévéʼ pou twapé lavi an latè nèf-la! (Gadé pawagwaf 20)
20. Ki dènyé bagay Bondyé té pwonmèt Dannyèl, èk pouki ou anvi wè pwonmèt sala akonpli?
20 Vwéman nou ka viv adan an tan ki èstòdinè. Mé la ni bagay ki pli èstòdinè ki kay fèt touswit. Pou ègzanp, talè nou kay wè tout méchansté fini èk apwé sa nou kay wè Jéhova akonpli pwonmèt-la i té bay Dannyèl. I té di Dannyèl: ‘Ou kay pozé mé ou kay lévé pou jwenn pòsyonʼw an bout sé jou-a.ʼ (Dann. 12:13) Ès ou anvi wè Dannyèl épi lòt moun ou enmen ki ja mò ‘lévéʼ? Konsa, siʼw té kay kontan wè sa, fè tout saʼw pé pou wèsté fidèl pou Jéhova. Èk ou sa asiwé, Jéhova kay ékwi nonʼw an liv lavi étonnèl li pou tout tan.
CHANSON 80 “Gouté Èk Wè Jéhova Bon”
a An atik sala nou kay apwann an chanjman an lakonpwann nou konsèné gwan pwogwanm endikasyon-an Dannyèl 12:2, 3 mansyonnen. Nou kay ègzanminé lè pwogwanm sala kay fèt, èk ki moun ki kay patisipé adanʼy. Nou kay osi apwann, mannyè pwogwanm endikasyon sala kay édé moun asou latè-a pwépawé pou dènyé tès-la ki kay fèt an bout Mil (1,000) Lanné Kondwit Jézi Kwi.
b Wézèwèksyon-an pé koumansé épi sèvant fidèl Jéhova ki mò diwan dènyé tan-an. Èk apwé sa, mizi an mizi moun ki mò kay wésisité, jennéwasyon pa jennéwasyon. Si sé kon sa wézèwèksyon-an kay pwan kou, sa vlé di moun kay ni òpòtyounité-a pou wisivwè moun yo té ja konnèt ki mò. Bib-la di, sé moun-lan ki ka alé an syèl kay wésisité adan an mannyè ki annòd. Konsa, népòt mannyè wézéwèksyon-an pwan kou asou latè-a, nou ni asiwans-lan ki, i kay fèt adan an mannyè ki annòd osi.—1 Kòr. 14:33; 15:23.
c Sa sé an chanjman an lakonpwann-lan nou té ni ki ékwi an liv-la Pay Attention To Danielʼs Prophecy! chapit 17 èk an Gad-la li 1 Jwiyèt, 1987 paj 21-25.
d Sé èspwèsyon-an “ni bon” èvèk “ni mové” an Twavay 24:15 èk sé mo pawòl-la “sa ki ja fè bon” èk “sa ki ja fè mové” an Jan 5:29 ka fiksé asou sa moun té fè avan yo mò.
