1. Lembe mir anyong’a ma kani m’ubekurowa i the bimobim mi oro elufu acel pa Kristu?

 SAA ma dhanu bicaku cer iwi ng’om kakeni i the bimobim mi oro elufu acel pa Kristu, ebibedo lembe mir anyong’a ma lee dit! Ju ceke ma wedi migi utho, gibekuro kud ava ninenogi kendo. Yehova de ubekurogi kud ava. (Yob 14:15) Kepar pir anyong’a ma jubibedo ko iwi ng’om saa maeno! Calu ma waponjo i thiwiwec m’ukadhu, “weg bedopwe” ma nying’gi ukiewere i buku mi kwo, gibicer “cer mi kwo.” (Tic. 24:15; Yoh. 5:29) Saa moko nyo wedi mwa dupa ma wamaru bibedo i kind dhanu ma bilar caku cer ndhundhu i ng’ey Armagedon. * M’umedo maeno, “weg bedopwe ngo” ma con ginwang’u ngo kaka ma ging’ey ko Yehova man ma gitim ko ire i wang’ tho migi, gibicer i “cer mi pokolembe.”

2-3. (a) Calu ma junyutho i Isaya 11:9, 10, program mi ponji ma kani ma dit ma bitimere iwi ng’om nisagu mi wang’e? (b) Wabiweco iwi lembang’o i thiwiwec maeni?

² Bikwayu juponj dhanu maeno ceke m’ucer. (Isa. 26:9; 61:11) Pieno, jubiketho program ma dit mi ponjo dhanu nisagu m’ular ubino i wang’e. (Som Isaya 11:9, 10.) Pirang’o? Pilembe weg bedopwe ngo ma bicer gibibedo  ku yeny mi ponjo lembe iwi Yesu Kristu, iwi Ker, iwi jamgony, iwi nying’ Yehova man ning’eyo nia Yehova kende re m’utie ku twero mi bimo wi ng’om. Kadok weg bedopwe de gibibedo ku yeny ma ging’ey ko lembe ma Yehova ubed utimo nok nok pi nipong’o lembakeca pare iwi ng’om. Jumoko m’i kindgi gilar githo con i wang’e ma nwang’u fodi kiewo Biblia uthum ungo. Weg bedopwe ngo ku weg bedopwe ceke gibibedo ku yeny m’ukwayu juponj kogi.

³ I thiwiwec maeni, wabidwoko wang’ penji m’ulubo e: Tic ma dit mi ponji maeno bitimere nenedi? Ticne bibedo kud adwogi makani iwi dhanu ma nying’gi ukiewere mi magwei i buku mi kwo ku m’ukiewere ngo i bukune? Nwang’u dwokowang’ penji maeno pire tie tek iwa tin. Calu ma wabineno, lembila ma jukiewo i buku pa Daniel man i Lembanyutha bikonyowa ninyang’ cuu i gin ma bitimere saa ma ju m’utho bicer i iye. Wakecak nineno lembila ma ber ma jular juewo i buku pa Daniel 12:1, 2.

4-5. Daniel 12:1 unyutho lembang’o pi nindo ma tokceni?

⁴ Som Daniel 12:1. Buku pa Daniel ukoro lembe ma ber ma nyayu anyong’a ma bitimere i nindo mi kajik ceng’. Ku lapor, Daniel 12:1 unyutho nia Mikael, m’utie Yesu Kristu ‘ucungo i kum [dhanu pa Mungu].’ Theng lembila maeni ucaku pong’o niai oro 1914 saa ma Yesu udoko ubimo iwi Ker pa Mungu i polo.

⁵ Ento Daniel uyero bende nia Yesu “bicungo” i “nindo mi masendi . . . ma fokuwok ungo ugambre i thekri mi thek cil i nindo nino m’ubino.” “Nindo mi masendi” eno utie “masendi ma dit” ma jukiewo pire i Matayo 24:21. Yesu ucungo, kunoke ebecero bang’ dhanu pa Mungu i nindo ma tokcen mi masendi, niwacu i Armagedon. Buku mi Lembanyutha ulwong’o dhanu maeno nia “udul ma dit . . . ma giai kud i masendi ma dit.”​—Nyu. 7:9, 14.

6. Ang’o m’utimere i ng’ey m’udul ma dit giboth kud i masendi ma diti? Kekor. (Nen bende “Penji mi jusom” m’uweco pi cer iwi ng’om i gazeti maeni.)

⁶ Som Daniel 12:2. Ang’o m’utimere i ng’ey m’udul ma dit giboth kud i masendi maeno? Lembila eni ubeweco ngo iwi cer mi lapor, niwacu i ayi ma dhanu pa Mungu gidoko tek kendo i thenge mi tipo i nindo mi kajik ceng’, calu ma walar wanyang’ i wang’e. * Ento ebeweco pi cer mi ju m’utho ma bitimere i nindo m’ubino i ng’om ma nyen. Pirang’o wabeyero kumeno? Wec ma nia “utur” jutiyo ko bende i Yob 17:16 ma ceke juweco pigi pi ninyutho “liel.” Lembuno ubenyutho nia Daniel 12:2 ubeweco ngo iwi cer mi tipo ento iwi cer mandha ma bitimere i ng’ey kajik ceng’ man i ng’ey lwiny mi Armagedon.

7. (a) Wec ma nia jumoko bicer pi “kwo ma rondo ku rondo” ubenyutho ang’o? (b) Pirang’o cer eno tie “cer ma ber m’usagu”?

⁷ Dong’ Daniel 12:2 m’uwacu nia jumoko bicer pi “kwo ma rondo ku rondo” ubenyutho ang’o? Ebenyutho nia dhanu ma gicer man ma ging’eyo, kunoke ma gibemediri ning’eyo, man ma  gibeworo Yehova ku Yesu i kind oro 1 000, gibinwang’u kwo ma rondo ku rondo. (Yoh. 17:3) Eno bibedo “cer ma ber m’usagu” mi rundi ma con m’ugam uketho dhanu moko udoko kwo kendo. (Ebr. 11:35) Pirang’o? Pilembe dhanu ma gicerne gidok githo kendo.

8. Pirang’o jumoko bicer cer “mi lewic ku cac ma rondo ku rondo”?

⁸ Re dhanu ceke ngo ma biyiyo nia juponjgi ning’eyo Yehova. Lembila pa Daniel uwacu nia jumoko bicer cer “mi lewic ku cac ma rondo ku rondo.” Calu ma gibibedo ku pidoic mi jai, nying’gi bikiewere ngo i buku mi kwo man gibinwang’u ngo kwo ma rondo ku rondo; ento “cac ma rondo ku rondo,” niwacu nyoth. Pieno, Daniel 12:2 ubeweco iwi lembe ma bitimere ni dhanu ceke ma bicer, ke nimakere ku gin ma gibitimo i ng’ey cer migi. * (Nyu. 20:12) Jumoko binwang’u kwo ma rondo ku rondo, jumange ke binwang’u ngo.

9-10. Lembang’o ma bitimere i ng’ey masendi ma dit, man jukani ma “gibirieny calu der mir apokapiny”?

⁹ Som Daniel 12:3. Ang’o ma bitimere i ng’ey “nindo mi masendi”? M’uweko Daniel 12:2, verse mir 3 udok uweco pi lembe ma bitimere i ng’ey masendi ma dit.

¹⁰ Jukani ma “gibirieny calu der mir apokapiny”? Gin m’ukonyowa ninyang’ utie wec ma Yesu uyero i Matayo 13:43 m’uwacu: “I saa maeca, weg bedopwe gibirieny calu ceng’ i Ker pa Weggi.” Saa ma Yesu ubino yero lembuno, eweco pi “wot mi Ker,” niwacu umego ma juwiro ku tipo ma gibitimo tic karacelo kude i Ker mi polo. (Mat. 13:38) Pieno, Daniel 12:3 ucikere niweco pi ju ma juwiro ku tipo man pi tic ma gibitimo i saa mi Bimobim mi oro elufu acel.

11-12. Dhanu ma juwiro 144 000, bitimo tic ma kani i saa mi bimobim mi oro 1 000?

¹¹ Ju ma juwiro ku tipo biloko “dhanu dupa ba bedopwe” nenedi? Gibitimo tic karacelo ku Yesu pi nitelo wi tic mi ponji ma bitimere iwi ng’om i saa mi bimobim mi oro 1 000. Dhanu ma juwiro 144 000 bibedo ngo kende kende ni jubim, ento bende ni julam. (Nyu. 1:6; 5:10; 20:6) Gibidikiri i tic mi “keyo kum thek” man nok nok gibikonyo dhanu nidoko ku kum ma leng’ m’umbe dubo. (Nyu. 22:1, 2; Eze. 47:12) Eno bibedo anyong’a mi tuko ngo ni ju ma juwiro!

¹² “Dhanu dupa” ma jubikelo i ba bedopwe ke bibedo jukani? Bibedo dhanu ma bicer, ju m’uboth kud i Armagedon man awiya ceke ma nyo jubinyolo i ng’om ma nyen. I thum mi oro 1 000, dhanu ceke m’ubekwo iwi ng’om bibedo ku kum m’umbe dubo. Dong’ saa ma kani ma nying’gi bikiewere mi magwei i buku mi kwo ku kalamu mi vino, ento ungo ku kalamu mi yeni?

13-14. I wang’ ninwang’u kwo ma rondo ku rondo, bikwayu dhanu ceke ma gimbe ku kum mi dubo gitim ang’o?

¹³ Ukwayu wang’ey nia, nibedo ku kum m’umbe dubo nyutho ngo nia  dong’ jubinwang’u kwo ma rondo ku rondo de wang’ acel. Poy i kum Adamu giku Eva. Gibino ku kum m’umbe dubo, re ugam ukwayere nia ginyuth woro migi ni Yehova Mungu i wang’ ninwang’u kwo ma rondo ku rondo. Ento ku lembe ma rac, giwore ngo.​—Rum. 5:12.

¹⁴ Lembe bibedo nenedi ni dhanu ma bikwo i thum mi oro 1 000? Gin ceke gibibedo ku kum ma leng’ m’umbe dubo. Nyo dhanu maeno ceke gibidiko cing’gi i kum bimobim pa Yehova rondo ku rondo? Kunoke nyo jumoko bibedo calu Adamu giku Eva, ma kadok gibino ku kum m’umbe dubo de re asu gidubo? Penji maeno bikwayu judwok wang’e. Nenedi?

15-16. (a) Saa ma kani ma dhanu ceke bibedo ku kaka mi nyutho gwoko bedoleng’ migi ni Yehova? (b) Adwogi mir amulaic maeno ma tokcen bibedo ang’o?

¹⁵ Jubitwiyo Sitani pi oro 1 000. Saa maeno ebibedo mbe ku copo mi wingo ng’atu moko. Ento i thum mi oro 1 000 jubigonye. Ebitimo tego niwingo dhanu m’umbe ku kum mi dubo. Saa maeno mir amulaic, dhanu ceke iwi ng’om bibedo ku kaka mi nyutho kamaleng’ ka nyo gibeworo nying’ Mungu man gibediko cing’gi i kum bimobim  pare kunoke ngo. (Nyu. 20:7-10) Gin ma ng’atuman bitimo saa maeno, re ma binyutho kamaleng’ nia nyinge ucikere nikiewere mi magwei i buku mi kwo kunoke ngo.

¹⁶ Jumoko binyutho ngbeng’ nia gitie ve Adamu giku Eva, gibikwero bimobim pa Yehova. Dong’ ang’o ma binwang’ugi? Lembanyutha 20:15 uwacu nia, “ng’atu moko ci ma junwang’u nyinge ugorere ngo i buku mi kwo jubole i nammac.” Eyo, jubinyotho jujai maeno mi magwei, ke pi nja. Ento wend dhanu ma dupa bikadhu ma ber kud i amulaic maeno ma tokcen. E nying’gi bidong’ kiewere mi magwei i buku mi kwo.

17. Malaika uyero ni Daniel nia lembang’o ma bitimere i rundi mwa eni? (Daniel 12:4, 8-10)

¹⁷ Etie lembe mir anyong’a niparu pi lembe ma bitimere i nindo m’ubino! Ento malaika moko unyutho ni Daniel lembe moko ma pire tek m’uweco pi rundi mwa eni, m’utie ‘nindo mi kajik.’ (Som Daniel 12:4, 8-10; 2 Tim. 3:1-5) Malaikane uwacu ni Daniel nia “ng’eyong’ec [mandha] bimedre.” Eno ubenyutho nia dhanu pa Mungu bidonyang’  cuu mandha i lembila m’i buku pa Daniel. Malaikane udok umedo nia i rundi maeno “judubo gibitimo dubo; man ng’atu moko mbe ma kind judubo ma bing’eyo thelembe.”

18. Lembang’o ma binwang’u jutimrac ceng’ini eni?

¹⁸ Tin fodi ubenen ve judubo gibenwang’u ngo matira pi timo migi ma reco. (Mal. 3:14, 15) Ento ceng’ini eni, Yesu bipoko lembe iwi ju ma juporogi ku diegi, man ebipoko kindgi ku ju ma juporo ku rombe. (Mat. 25:31-33) Jutimrac biboth ungo kud i masendi ma dit, kadok acera de gibicer ungo pi nikwo i ng’om ma nyen. Nying’gi bibedo mbe i “kitabu mi poi” ma jukiewo pire i Malaki 3:16.

19. Kawoni utie iwa saa mi timo ang’o, man ke pirang’o? (Malaki 3:16-18)

¹⁹ Kawoni utie saa ma wacikara ninyutho nia wambe i kind jutimrac. (Som Malaki 3:16-18.) Yehova ubecoko dhu ‘piny pare ma dhe,’ niwacu dhanu ma pigi tek i iye. M’umbe jiji, wan de wabemito wabed i kind dhanune.

20. Yehova utimo lembang’ola ma kani ma tokcen ni Daniel, man pirang’o ibekuro kud ava nineno pong’o mi lembang’olane?

²⁰ Andha wabekwo i nindo ma ber. Ento lembe ma ber m’usagu fodi ubebino abina ceng’ini. Kago eni wabineno kite ma jubikabu ko lembe ma reco ceke. I ng’eye wabineno kite ma lembe ma Yehova ung’olo ni Daniel nia “ibicungo, i makapiny peri, i kajik mi ceng’” bipong’o ko kakare. (Dan. 12:13) Nyo ibekuro kud ava nindo ma Daniel karacelo ku wedi peri ‘gibicungo’ kendo? Ka eyo, tim kero igwok bedoleng’ peri niai kawoni, e ibibedo ma cwinyi tek nia nyingi bibedo asu i buku mi kwo pa Yehova.