CACEKIWEN LALAKAW 40
‘Mikerid to ˈAlomanay Tamdaw Malo Moecelay’
‘Oya mikeriday to ˈalomanay tamdaw malo moecelay i, tatahadaˈoc matiya o foˈis a matedi.’—TANIIL 12:3.
RADIW 111 O Mamiowaw Cingra Mipalal
KALIMLAAN NO LALAKAW a
1. Itini Pikowan ni Kristo to Comaˈol Miheca, mamifekad ko maanan kalipahakan a demak hani?
ITINI Pikowan ni Kristo to Comaˈol Miheca, misatapang patikol maˈorip ko mapatayay tamdaw i fafekang no sera i, wa hakowa ko kahemek no mita! O polong na malahdaway ko salawina a tamdaw makalimay sapiliyawaw maˈaraw koniya salawina, mahaenay ko harateng ni Yihofa. (Yopu 14:15) Haratengen hena, oya itini cowacowa pala no hekal, miliyaw malalitemoh ko tamdaw to patikolay maˈorip a tamdaw hakowa ko kalipahak! Itini fafekangay lalakaw mananamay ita, o ngangan no ‘moecelay tamdaw’ matilidayto i sakaˈorip a cudad, ‘patikol maˈorip milifok to ˈorip’ cangra. (Dmak 24:15; Yohani 5:29) O adihayay salawina ita o sasalakat patikol maˈorip i fafekang no sera alatek. b Roma i, o roma tamdaw ˈayaw no mapatay awaay ko toki mafanaˈ ci Yihofaan anca cowa pidoko Cingranan, oniya ‘cowa ka moecel a tamdaw’ wa ‘patikol maˈorip micada to sasawkit.’
2-3. (1) Itini Isaya 11:9, 10 paihkalay, o manan ko sataˈangayay pasifanaˈay a limasmas? (2) Onini a lalakaw mamilengo to maanan?
2 Polong patikolay maˈorip a tamdaw o mamicada to sapasifanaˈ. (Isaya 26:9; 61:11) Mihaenay, itini paro no kakarayan wa ira ko sataˈangayay pasifanaˈay a limasmas i likisi no tamdaw. (ˈOsien ko Isaya 11:9, 10.) Patikol maˈorip ko cowa ka moecel a tamdaw misaaliay to sakafanaˈaw ci Yis Kristoan, cipinang to Hongti Kitakit no Kawas, patafangan ni Yis a sapatefoc, ato milingatay to fangcalay ngangan ni Yihofa ato sapikowan a fadangalan Ningra. Ano moecelayto a tamdaw o maminanam to faelohay a sifanaˈ, samanen ci Yihofa itini ikor no mapatay cangra, padadotocay patalahkal to araaw Ningra to cikiw. Ilalomaˈ nangra roma tamdaw, itini ˈayaw no malahci mitilid ko Fangcalay Cudad halafinay mihecaan mapatayayto, maedeng adihayayho ko nananamen nangra. Mihaenay, o cowa ka moecel ato moecelay a tamdaw, adihayay ko nananamen a sifanaˈ.
3 Onini lalakaw papacaˈof to laenoay salicay: Onini taˈangayay pasifanaˈay a limasmas sasamaan misatapang? O ngangan ita wa ngaˈay tahadaˈoc matilid i sakaˈorip a cudad hokira, samanay milingat tonini pasifanaˈay a limasmas? O caˈof nonini a salicay tada kalimlaan kitaanan anini. O lalakaw mamitadtad to Taniil ato Paˈarawan kasemeran a sapairasol, o papadama konini kitaanan matatodong ko kacipinang ikor no patikol maˈorip ko mapatayay tamdaw wa ira ko manan a demak mifekad. Salakat nengnengen ita ko paˈayawan no Taniil 12:1, 2 noikor mamifekad a pakalalokay to falocoˈ no tamdaw a demak.
MAFOTIˈAY I APED A TAMDAW O MAMAPALAL MAEMIN
4-5. Pakayni salikoray lintad, patalahkalay ko Taniil 12:1 to maanan?
4 ˈOsien ko Taniil 12:1. Patalahkalay ko Taniil itini salikoray lintad masakenaay taˈangayay demak mamitoor to maanan a kadadoedo a mifekad. Tinakoen, patalahkalay ko Taniil 12:1, ci Mikail ci Yis Kristo ‘padotocay tomireng paˈading’ to finawlan no Kawas. 1914 miheca, mala Hongtiay ci Yis i kakarayan, mala Hongti no Hongti Kitakit no Kawas. Mikitiya misatapang, padadotocay matatodong konini a sapairasol.
5 Kawra, patalahkalayho ko sapairasol ni Taniil, ‘wa ira ko kapadesan a laliyadan masadak, mikitini kaira no kitakit tahanini, awaayho mifekad ko mahaenay a pades,’ toniya tatokian wa ‘lomowad’ ci Yis. Toniya ‘kapadesan a laliyadan’ o misowalan no Matay 24:21 a ‘taˈangayay padiing.’ Itini kahererekan nonini kapadesan a tatokian, wa itini Armakiton, lalomowad ci Yis midipot to finawlan no Kawas. Onini micadaay to sadipot ni Yis a tamdaw oyaan masowalay no Paˈarawan ‘mikitiniay taˈangayay padiing masadak’ taˈangayay ˈopo a tamdaw.—Paˈarawan 7:9, 14.
6. Milakowit ko taˈangayay ˈopo a tamdaw to taˈangayay padiing ikor, mamifekad ko maanan a demak hani? Tadtaden. (Nengnengen konini a casi milengo to patikol maˈorip “Salicay no Miˈosiay Tamdaw.”)
6 ˈOsien ko Taniil 12:2. Milakowit ko taˈangayay ˈopo a tamdaw to taˈangayay padiing ikor, mamifekad ko maanan a demak hani? Cato kalecad to salakatay kacipinang ita, pinengneng ita tonini a paˈayawan no sinael a patikolay maˈorip cowa ko sapatinako, mitoroˈan i cowa ko piliyaw a tomireng ko finawlan no Kawas i salikoray romiˈad, ao itiniay faelohay hekal papatikol maˈorip ko mapatayay tamdaw. c Hano mihaen ko sowal hani? ‘Aped’ oniya sowal masadakay i Yopu 17:16, hanaca itini toniya sinael a ‘aped,’ malecaday to ‘Tadem’ ko tatodong. Paihkalay konini o mitoroˈan no Taniil 12:2 i papatikol maˈorip ko mapatayay tamdaw i fafekang no sera, onini a demak wa itini kahererekan no salikoray romiˈad, itini ikor no Armakiton a mifekad.
7. (1) O romaroma tamdaw patikol maˈorip hano ‘milifok to midaˈocay ˈorip’? (2) Hano o ‘ikakaay ko kangaˈay a patikol maˈorip’ konini han ko sowal?
7 Sowal no Taniil 12:2 o roma patikolay maˈorip a tamdaw ‘mamilifok to midaˈocay ˈorip,’ o maanan ko tatodong hani? O patikolay maˈorip a tamdaw itini Pikowan to Comaˈol Miheca padadotoc mitongal to kafanaˈ ci Yihofaan aci Yisan hanaca midofdof Cangranan, o mamilifok to tahadaˈocay a ˈorip. (Yohani 17:3 ato roma pihongyak.) Palinien to malifaay no roma tamdaw a patikol maˈorip i salakat, o ‘ikakaay ko kangaˈay a patikol maˈorip’ konini, samanen oya na patikolay maˈorip tamdaw ikor kamayan mapatay.—Hipray 11:35.
8. O romaroma tamdaw patikol maˈorip ikor hano ‘micada to pipakangodo, tahadaˈoc masakahmaw’?
8 Kawra o kahacecay patikolay maˈorip a tamdaw cowa ka sahto saan makahi micada to sapasifanaˈ ni Yihofa. Sowal no sapairasol no Taniil, o roma patikolay maˈorip a tamdaw wa ‘micada to pipakangodo, tahadaˈoc masakahmaw.’ Samanen paihkalay cangra to mitowakangay a waywayan, mansa cowa ko mamatilid ko ngangan nangra i sakaˈorip a cudad, tatodong nonini i, cowa ko mamilifok cangra to midaˈocay a ˈorip. Wa ‘tatahadaˈoc masakahmaw’ cangra, o tatahadaˈoc mapalaˈafo. Mihaenay, o misowalan no Taniil 12:2 o kahacecay tamdaw wa pakayni ikor no patikol maˈorip a waywayan, salikor mamilifok to cowa kalecad a teloc. d (Paˈarawan 20:12) O roma tamdaw mamilifok to midaˈocay ˈorip, o roma tamdaw cowa ko mamahaen.
‘MIKERID TO ˈALOMANAY TAMDAW MALO MOECELAY’
9-10. (1) Ikor no taˈangayay padiing mamifekadho ko manan a demak? (2) O cima ko ‘mamisadak to tedi, malecad o kakarayan a taengad’ hani?
9 ˈOsien ko Taniil 12:3. Ikor no ‘kapadesan a lintad’ mamifekadho ko maanan a demak hani? Cowa ka itini aca Taniil 12:2, itini saka 3 sinael somowalayho to ikor no taˈangayay padiing mamifekad a demak.
10 O cima ko ‘mamisadak to tedi, malecad o kakarayan a taengad’ hani? Wa ngaˈay kita mikitini i sowal ni Yis i Matay 13:43 mahela ko caˈof, sanay cingra: ‘Maraod ko toki, o moecelay tamdaw wa itini Hongti Kitakit no Wama nangra taengad a patedi, malecad o cidal.’ Mikitini fafekangay ato ilaenoay lalakaw, o misowalan ni Yis itini oya ‘wawa no Hongti Kitakit,’ oyaan minilnilan no fangcalay saocor a salikaka ningra, wa malacafay cangra ci Yisan itini kakarayan a Hongti Kitakit a mikowan. (Matay 13:38) Mihaenay o misowalan no Taniil 12:3 maedeng oya manilnilay no fangcalay saocor a Krisciyang, ato hademak nangra i Pikowan to Comaˈol Miheca a tayal.
Itini Pikowan to Comaˈol Miheca, o 144,000 tamdaw wa makelec a malacafay ci Yis Kristoan, mikayat to pasifanaˈay a tayal i polong no kakarayan (Nengnengen ko saka 11 fatac)
11-12. Itini Pikowan to Comaˈol Miheca, o manilnilay no fangcalay saocor a Krisciyang mamidemak to maanan a tayal?
11 O manilnilay no fangcalay saocor a Krisciyang sasamaan ‘mikerid to ˈalomanay tamdaw malo moecelay’ hani? Itini Pikowan to Comaˈol Miheca, o mamakelec a malacecay cangra ci Yis Kristoan, mikayat to pasifanaˈay a tayal i polong no cikiw. Onini 144,000 tamdaw cowa ko mala hongti aca, mamalo saysiho. (Paˈarawan 1:6; 5:10; 20:6) O ‘mamiadah to kalo kitakit a tamdaw’ cangra, padama toniya tamdaw palidlid saan patikol malo malefotay. (Paˈarawan 22:1, 2; Icikil 47:12) Manilnilay no fangcalay saocor a Krisciyang maedeng o tataˈangay ko kalipahak!
12 O mikeridan malo moecelay ‘ˈalomanay tamdaw’ o cimacima hani? Iraay ko patikolay maˈorip a tamdaw, milakowitay to Armakiton a tamdaw, ato mihofocan i faelohay hekal a wawa. Itini kahererekan no Pikowan to Comaˈol Miheca i, polong a tamdaw i fafekang no sera malo malefotayto a tamdaw. Mihaenay, ihacowa tatokian misatapang, o ngangan nangra tahadaˈoc matilid i sakaˈorip a cudad, malecad tano ˈekeng a impic a tiliden ao cowa ko tano impican mitilid hani?
SALIKORAY A SAPALIFET
13-14. Polong malefotay a tamdaw sasamaan ko pidemak ngaˈ milifok to midaˈocay a ˈorip?
13 Haharatengen ita, o malefotay tamdaw cowa ko fahal sanay malifok ko midaˈocay a ˈorip. Haratengen ko tinakoan ni Atam aci Ifa, o malefotay a tamdaw cangra, kawra kamayan o mamidofdof cangra to Kawas ci Yihofaan, ngaˈ ngaˈay milifok to midaˈocay a ˈorip. Kaadayayan i, cowa pidofdof cangra ci Yihofaan.—Loma 5:12.
14 Tahinito kahererekan no Pikowan to Comaˈol Miheca i, o pakayraan no tamdaw i fafekang no sera samaanayto hani? Polong a tamdaw patikolayto a malefot, kawra o polong a tamdaw wa tahadaˈoc midama to pikowan ni Yihofa han? O roma tamdaw mamalecad ci Ataman aci Ifaan, soˈlin o malefotay, kamayanho mitowakang to Kawas hokira? Onini a salicay misaaliay to papacaˈofen, samaan ngaˈ mafanaˈ to caˈof hani?
15-16. (1) Hacowa a tatokian polong a tamdaw ira ko toki paihkal to madimadiay ko niyah ci Yihofaan? (2) Toniya sapalifet o manan ko salikoray a teloc hani?
15 Wa paliten ci Satan to 1,000 miheca, toya laliyadan, cowa ko ngangaˈay cingra miapoh to tamdaw. Kawra mahererek ko 1,000 miheca i, papasadaken ci Satan, mamisaˈicel cingra mikayhid to malefotay tamdaw mihakelong cingranan. Toya pipalifetan, polong malefotay tamdaw i fafekang no sera iraay ko toki paihkal to mikangodoay ko niyah to fangcalay ngangan no Kawas, midopo to saˈakawangay fadangalan Ningra mikowan. (Paˈarawan 20:7-10) Toya tatokian o mipiliˈan no kahacecay tamdaw, mamisaˈosi to tatahadaˈoc materek ko ngangan ningra i sakaˈorip a cudad hokira.
16 O cowa ka saˈosi ko ˈaloman a tamdaw mamalecad ci Ataman aci Ifaan manaˈay to pikowan ni Yihofa. Sasamaan ko teloc nangra hani? Itini Paˈarawan 20:15 sanay: ‘O cima cowa ka tilid ko ngangan i sakaˈorip a cudad, o mamafahkol i marengrengay ko namal a fanaw.’ Onini a mitowakangay tamdaw mamasongilaˈ a malaˈafo. Kawra ˈalomanay malefotay a tamdaw mamilakowit tonini salikoray a sapalifet, o ngangan nangra tatahadaˈoc materek i sakaˈorip a cudad.
‘KAHEREREKAN A LALIYADAN’
17. Pasowalan no coyoh ci Taniil itini lintad no mita mamifekad ko maanan a demak hani? (Taniil 12:4, 8-10)
17 Maharateng ko mamifekad a taˈangayay demak noikor, tada palipahakay kitaanan! Kawra, pakayni i lintad ita, oniya ‘kahererekan a laliyadan,’ pasowalanho no coyoh ci Taniil to pina kalimlaan a demak. (ˈOsien ko Taniil 12:4, 8-10; 2 Timoti 3:1-5) Pasowalan no coyoh ci Taniil ‘o soˈlinay a sifanaˈ’ wa ‘kadofahay.’ Sowal ningra paihkalay, o mamatongal ko kacipinang no finawlan no Kawas to mitilidan ni Taniil a sapairasol. Somowalayho ko coyoh toniya laliyadan, ‘o tatiihay tamdaw wa tatiih ko midemakan,’ hanaca ‘o tatiihay tamdaw cowa ko cacipinang tonini a sowal.’
18. O tatiihay a tamdaw kakalikito ira ko maanan a teloc hani?
18 Anini, o tatiihay tamdaw ngaˈayay patelas saan ko demak ano nengnengen, hanaca cowa picada to sasayfang. (Malaki 3:14, 15) Kawra wa kalikito ci Yis misawkit tonini sano lotokay a siri, hanaca pafafidaˈ cangranan to lopayˈay siri. (Matay 25:31-33) O tatiihay tamdaw cowa ko mamilakowit to taˈangayay padiing, cowa ko papatikol maˈorip i faelohay hekal. O ngangan nangra cowa ko mamatilid i masowalay no Malaki 3:16 a ‘piharatengan a cudad.’
19. Nohatiniho sasamaan ko pidemak ita hani? Misamaanay? (Malaki 3:16-18)
19 Nohatiniho tano waywayan paihkal to cowa ko tatiihay a tamdaw kita. (ˈOsien ko Malaki 3:16-18.) Misaˈopoan ni Yihofa nohatini ko kaolahan Ningra a tamdaw, padama cangranan malo ‘kalimlaan a hafay.’ Maedeng makalimay kita masalalomaˈ nonini a tamdaw.
Itini faelohay a hekal, wa lipahak kita pakaˈaraw ci Taniilan, kaolahan ita a salawina ato romaroma tamdaw a ‘lomowad,’ milifok to sapalemed nangra! (Nengnengen ko saka 20 fatac)
20. Salikor pafelian ni Yihofa ci Taniil to maanan a sakiˈok hani? Hano halamhamay kiso palaˈosien ni Yihofa konini a sakiˈok?
20 Anini, itiniay kita i mikiriwiˈay a lintad maˈorip, kawra itini kaˈayaw iraayho ko hahalamhamen a taˈangayay demak mamifekad. Kalikito mamaˈarawto ita masongilaˈ malaˈafo ko tatiihay tamdaw. Ikor mamaˈaraw ita palaˈosi ci Yihofa to mikiˈokan Ningra ci Taniilan, sanay ko sowal Ningra ci Taniilan: ‘Mahererek koya romiˈad i, o lalomowad kiso, milifok to sapalemed iso.’ (Taniil 12:13) Halamhamay kiso maˈaraw ci Taniil ato mapatayay salawina ‘lomowad,’ miliyaw milifok to ˈorip han? Ano mahaenay i, nohatiniho misarocod a madimadi ci Yihofaan, mihaen o papakasoˈlin kiso o mamaterek ko ngangan iso itini sakaˈorip a cudad ni Yihofa.
RADIW 95 Lifeten Mihapinang ko Nika Ngaˈay ni Yihofa
a Itini Taniil 12:2, 3 mitadtaday to sataˈangayay limasmas to pasifanaˈay a demak. Onini lalakaw misalofay to salakatay pitadtad ita to sinael. Mamilengo ko lalakaw onini pasifanaˈay a limasmas hahacowa misatapang, ato cima ko mamirienang. Milengoho ko lalakaw itini hererekan no Pikowan ni Kristo to Comaˈol Miheca, onini pasifanaˈay a limasmas sasamaan padama to fafekangay no sera a tamdaw maharek misaday misiˈayaw to salikoray a sapalifet.
b Oya madimadiay midoko to Kawas a tamdaw, hanaca itiniay salikoray romiˈad mapatay a tamdaw o aisalakat patikol maˈorip alatek. Dotoc patikol maˈorip a tamdaw oya iˈayaway nangra lintad a tamdaw alatek, mihaen a talaˈayaw. Ano soˈlinay mahaen ko pakayraan, o kahacecay lintad a tamdaw wa ira ko toki militemoh to kafanaˈan nangra a tamdaw i salakat. Ano samaanto ko pakayraan, somowal ko Fangcalay Cudad to patikol maˈorip tayra i kakarayan sanay ‘o kahacecay tamdaw o mamitoor to matatodongay kadadoedo a patikol maˈorip,’ iraay ko lalangian ita pakasoˈlin itiniay fafekang no sera patikol maˈorip o masieroday a madadoedo.—1 Korinto 14:33; 15:23.
c Misalofay konini to pitadtad no Sinanoten ko Sapairasol ni Taniil! a cudad saka 17 fedengan ato Mikecolay Saka 1 Folad 1, 1988, saka 20-25 fiedac.
d Masafelitay, itini Dmak 24:15 ‘moecelay a tamdaw’ ato ‘cowa ka moecel a tamdaw,’ ato Yohani 5:29 ‘ngaˈayay ko demak’ ato ‘tatiihay ko demak,’ o misowalan o waywayan no patikolay maˈorip i ˈayawho no mapatay.
