STADI 40
“Oli Stap Givhan Long Plante Man Blong Folem Stret Fasin”
“Olgeta we oli stap givhan long plante man blong folem stret fasin [bambae oli saen] olsem ol sta, gogo i no save finis.”—DAN. 12:3.
SINGSING 151 Bambae Hem i Singaot Olgeta
BIGFALA TINGTING *
1. ?Wanem nambawan samting we bambae i hapen long Rul Blong Wan Taosen Yia?
!TRAEM tingbaot nambawan dei ya long Wan Taosen Yia Rul Blong Kraes we ol dedman oli stat blong girap bakegen! Olgeta we oli lusum ol fren mo famle long ded, oli wantem tumas blong luk olgeta bakegen. Hemia filing blong Jehova tu. (Job 14:15) Traem tingbaot glad we ol man long fulwol bambae oli kasem blong joen bakegen wetem olgeta we oli laef bakegen. Olsem we yumi lanem long laswan stadi, “ol man we oli stret,” we nem blong olgeta i stap long buk blong laef, bambae “oli girap blong kasem laef.” (Wok 24:15; Jon 5:29) Maet plante fren mo famle blong yumi bambae oli stap wetem ol faswan we oli laef bakegen long wol. * Mo tu, “ol man we oli no stret,” hemia olgeta we oli no bin gat janis blong save Jehova o blong mekem wok blong hem bifo we oli ded, bambae “oli girap blong kasem jajmen.”
2-3. (1) Folem Aesea 11:9, 10, ?bambae i gat wanem bigfala wok blong tijim ol man? (2) ?Bambae yumi tokbaot wanem long stadi ya?
2 Olgeta we oli laef bakegen bambae oli nidim blong lanem plante samting. (Aes. 26:9; 61:11) Taswe bambae i gat wan bigfala wok blong tijim ol man, we i bigwan moa i bitim ol narawan long histri. (Ridim Aesea 11:9, 10.) ?From wanem? Wan risen se, taem ol man we oli no stret oli laef bakegen, bambae oli mas kasemsave long Jisas Kraes, Kingdom, ransom, mo bigfala kwestin long saed blong nem blong Jehova mo rul blong hem. Ol stret man tu we oli laef bakegen, bambae oli mas lanem ol samting we oli no save yet, we Jehova i bin soemaot sloslo long saed blong stamba tingting blong hem long wol ya. Sam long olgeta oli ded longtaem bifo we oli wokem ful Baebol. Ol man we oli no stret mo ol man we oli stret, bambae olgeta evriwan oli nidim blong lanem plante samting.
3 Long stadi ya, bambae yumi tokbaot ol kwestin olsem: ?Olsem wanem bambae oli mekem bigfala wok ya blong tijim ol man? ?Olsem wanem samting we ol man oli mekem taem oli kasem tijing ya, bambae i soemaot sipos i stret we nem blong olgeta i stap olwe long buk blong laef o nogat? Ansa blong ol kwestin ya i impoten long yumi tede. Bambae yumi luk olsem wanem sam profet tok long Daniel mo Revelesen oli soemaot klia, samting we bambae i hapen taem ol dedman oli laef bakegen. Fastaem, bambae yumi luk profet tok blong Daniel 12:1, 2.
“OLGETA WE OLI STAP SLIP INSAED LONG DAS . . . BAMBAE OLI WEKAP”
4-5. ?Daniel 12:1 i soemaot wanem long saed blong taem blong en?
4 Ridim Daniel 12:1. Buk blong Daniel i soemaot ol nambawan samting we bambae oli hapen long taem blong en, wan afta narawan. Eksampol, Daniel 12:1 i soemaot se Maekel, hemia Jisas Kraes, i “stap stanap long bihaf blong ol man blong [God].” Profet tok ya i stat blong kamtru long 1914, taem Jisas i kam King long Kingdom blong God long heven.
5 Be profet tok blong Daniel i tokbaot tu se Jisas bambae i “stanap” long “taem blong harem nogud. Stat taem i gat faswan nesen kam kasem taem ya, i no gat wan taem olsem.” “Taem blong harem nogud” ya, hemia “bigfala trabol” we Matiu 24:21 i tokbaot. Jisas i stanap, o i tekem aksen blong protektem ol man blong God, long Amagedon, hemia long en blong taem blong harem nogud. Buk blong Revelesen i talem se ol man ya hemia bigfala hip blong ol man we “oli pastru long bigfala trabol.”—Rev. 7:9, 14.
6. ?Wanem bambae i hapen afta we bigfala hip blong ol man oli pastru long bigfala trabol? Yu eksplenem. (Yu luk haf ya “Kwestin” long magasin ya, we i tokbaot laef bakegen long wol.)
6 Ridim Daniel 12:2. ?Wanem bambae i hapen afta we bigfala hip blong ol man oli pastru long bigfala trabol? Profet tok ya i no wan pijatok blong tokbaot laef bakegen o se God i makemaot ol tabu Kristin long ol las dei, olsem we yumi stap talem bifo. * Be, hem i tokbaot laef bakegen long niufala wol we i stap kam. ?From wanem yumi talem olsem? Long Job 17:16 oli yusum tok ya “das” blong minim “Gref.” Hemia i soemaot se Daniel 12:2 i stap tokbaot laef bakegen blong ol man, afta we las dei i finis mo afta long Amagedon.
7. (1) ?Olsem wanem samfala bambae oli laef bakegen blong “kasem laef we i no save finis”? (2) ?From wanem “laef bakegen ya i gud moa”?
7 ?Wanem mining blong Daniel 12:2 taem i talem se samfala bambae oli laef bakegen blong “kasem laef we i no save finis”? Hemia i min se olgeta we oli laef bakegen mo oli kasemsave, o oli gohed blong kasemsave, mo oli obei long Jehova mo Jisas long 1,000 yia, bambae oli kasem laef we i no save finis. (Jon 17:3) “Laef bakegen ya i gud moa” i bitim laef bakegen blong samfala long taem bifo. (Hib. 11:35) ?From wanem? From we olgeta ya bifo oli ded bakegen.
8. ?Olsem wanem samfala oli laef bakegen “blong kasem ol strong tok mo blong sakemaot olgeta olwe”?
8 Be samfala we oli laef bakegen, bambae oli no akseptem ol tijing blong Jehova. Daniel i talem se samfala bambae oli laef bakegen “blong kasem ol strong tok mo blong sakemaot olgeta olwe.” From we oli rebel, nem blong olgeta bambae i no stap long buk blong laef, mo bambae oli no kasem laef olwe. Be bambae oli “sakemaot olgeta olwe,” o oli lus olgeta. Taswe, Daniel 12:2 i stap tokbaot samting we bambae i hapen long olgeta we oli laef bakegen, folem samting we oli mekem afta long taem ya. * (Rev. 20:12) Samfala bambae oli kasem laef blong olwe, mo samfala bambae oli no kasem.
“OLI STAP GIVHAN LONG PLANTE MAN BLONG FOLEM STRET FASIN”
9-10. ?Wanem narafala samting bambae i hapen afta long bigfala trabol? ?Hu “bambae oli saen olsem laet long spes long heven”?
9 Ridim Daniel 12:3. ?Wanem narafala samting we bambae i hapen afta long “taem blong harem nogud”? Olsem long Daniel 12:2, vas 3 i tokbaot samting we bambae i hapen afta long bigfala trabol.
10 ?Hu “bambae oli saen olsem laet long spes long heven”? Tok blong Jisas long Matiu 13:43 i halpem yumi blong faenem ansa, i se: “Long taem ya, ol stret man bambae oli saen olsem san insaed long Kingdom blong Papa blong olgeta.” Ol vas raonabaot i soemaot se Jisas i stap tokbaot “ol pikinini blong Kingdom,” hemia ol tabu brata blong hem we bambae oli rul wetem hem long Kingdom long heven. (Mat. 13:38) So Daniel 12:3 i stap tokbaot ol tabu Kristin, mo wok we bambae oli mekem long Rul Blong Wan Taosen Yia.
Ol 144,000 bambae oli wok wetem Jisas blong lidim wok ya blong tijim ol man long 1,000 yia (Haf 11)
11-12. ?Ol 144,000 bambae oli mekem wanem wok long 1,000 yia?
11 ?Olsem wanem ol tabu Kristin bambae oli halpem “plante man blong folem stret fasin”? Bambae oli wok wetem Jisas Kraes blong lidim wok ya blong tijim ol man long wol long 1,000 yia. Ol 144,000 bambae oli rul olsem ol king, be bambae oli mekem wok blong ol pris tu. (Rev. 1:6; 5:10; 20:6) Olsem ol pris, bambae oli givhan “blong hilim ol man blong olgeta nesen.” Sloslo, bambae oli halpem ol man ya blong oli kam stretgud olgeta. (Rev. 22:1, 2; Esik. 47:12) !Traem tingbaot olsem wanem ol tabu Kristin bambae oli haremgud blong mekem wok ya!
12 ?Hu ya “plante man” we ol tabu Kristin oli halpem olgeta blong folem stret fasin? Hemia olgeta we oli laef bakegen, mo tu, olgeta we oli pastru long Amagedon, wetem ol pikinini we oli bon long niufala wol. Long en blong 1,000 yia, olgeta man long wol bambae oli kam stretgud olgeta. ?So wetaem nem blong olgeta bambae i stap olwe long buk blong laef, olsem we oli raetem long ink be i no long pensel?
LASWAN TRAEM
13-14. ?Ol man we oli stretgud oli mas mekem wanem bifo we oli save kasem laef we i no save finis long wol?
13 Yumi mas tingbaot se taem man i kam stretgud olgeta, hemia i no min se bambae hem i kasem laef we i no save finis. Traem tingbaot Adam mo Iv. Tufala i stretgud olgeta, be bifo we tufala i kasem laef we i no save finis, tufala i mas soemaot se bambae tufala i obei olwe long Jehova God. Sore tumas, tufala i no obei long hem.—Rom 5:12.
14 ?Long en blong 1,000 yia, olgeta man long wol bambae oli stap long wanem situesen? Olgeta evriwan bambae oli stretgud olgeta. ?Be bambae oli gohed olwe blong sapotem rul blong Jehova? ?O samfala bambae oli mekem olsem Adam mo Iv we i no obei, nating se oli stretgud olgeta? ?Olsem wanem ansa blong ol kwestin ya bambae i kam klia?
15-16. (1) ?Wetaem olgeta man bambae oli gat janis blong soemaot se oli holemstrong long Jehova? (2) ?Wanem bambae i hapen afta long laswan traem ya?
15 Setan bambae i kalabus blong 1,000 yia. Long taem ya, bambae hem i no save lidim eniman i go krangke. Be long en blong 1,000 yia, bambae Setan i go fri. Long taem ya nao, bambae hem i traehad blong lidim ol man we oli stretgud oli go krangke. Laswan traem ya bambae i givim janis long ol man we oli stretgud, blong oli soemaot klia sipos oli tinghae long nem blong God mo sapotem rul blong hem. (Rev. 20:7-10) Samting we wanwan man i mekem taem Setan i traem olgeta, bambae i soemaot sipos i stret we nem blong olgeta i stap olwe long buk blong laef, o nogat.
16 Samfala bambae oli mekem olsem Adam mo Iv we oli sakemaot rul blong Jehova, be yumi no save hamas man stret. ?Wanem bambae i hapen long olgeta? Revelesen 20:15 i talem se: “Hem i slingim olgeta ya . . . we oli no raetem nem blong olgeta long buk blong laef, oli go long lek blong faea.” Yes, ol rebel ya bambae oli lus blong olwe. Be bighaf blong ol stret man bambae oli winim laswan traem ya. Long taem ya nao, nem blong olgeta bambae i stap olwe long buk blong laef.
LONG “TAEM BLONG EN”
17. ?Wanem samting we enjel i talem long Daniel we bambae i hapen long taem blong yumi? (Daniel 12:4, 8-10)
17 !Yumi glad tumas blong tingbaot ol nambawan samting we bambae oli hapen long fiuja! Be enjel i talem long Daniel, sam impoten save tu long saed blong taem blong yumi, hemia “taem blong en.” (Ridim Daniel 12:4, 8-10; 2 Tim. 3:1-5) Hem i talem se: “Tru save bambae i kam plante.” Yes, ol man blong God bambae oli kasemsave moa long ol profet tok blong Daniel. Enjel ya i gohed se, long taem ya “ol man nogud bambae oli mekem ol fasin we i nogud, mo i no gat wan man nogud bambae i kasemsave.”
18. I no longtaem, ?wanem bambae i hapen long ol rabis man?
18 Tede maet i luk olsem se ol rabis man oli stap win. (Mal. 3:14, 15) Be i no longtaem, bambae Jisas i jajem ol man we oli gat fasin olsem nani, mo i seraotem olgeta long ol man we oli olsem sipsip. (Mat. 25:31-33) Ol rabis man ya bambae oli no pastru long bigfala trabol, mo bambae oli no laef bakegen long niufala wol. Nem blong olgeta bambae i no stap long “buk blong rimemba,” we Malakae 3:16 i tokbaot.
19. ?Naoia i stret taem blong yumi mekem wanem? ?From wanem? (Malakae 3:16-18)
19 Naoia i stret taem blong yumi pruvum se yumi no stap joen wetem ol rabis man. (Ridim Malakae 3:16-18.) Jehova i stap hivimap olgeta we oli olsem ol “spesel propeti” blong hem, we oli sas long ae blong hem. Yumi wantem tumas blong stap long grup ya.
!Bambae yumi glad tumas blong luk Daniel wetem ol fren mo famle blong yumi, we oli “stanap” bakegen long niufala wol! (Haf 20)
20. ?Wanem laswan promes we Jehova i mekem long Daniel? ?From wanem yu wantem tumas blong luk promes ya i kamtru?
20 Tru ya, taem we yumi stap laef long hem i spesel. Be yumi sapraes moa long ol nambawan samting we bambae oli hapen i no longtaem. Bambae yumi luk we ol rabis fasin oli lus. Afta long hemia, promes we Jehova i talem long Daniel bambae i kamtru, we i se: “Bambae yu stanap blong kasem ol samting we i blong yu, long en blong ol dei.” (Dan. 12:13) ?Yu yu wantem tumas blong stap long taem ya we Daniel, wetem ol famle mo fren blong yu, bambae oli “stanap” bakegen? Sipos yes, yu mas stanap strong naoia, nao yu save sua se nem blong yu bambae i stap olwe long buk blong laef blong Jehova.
SINGSING 80 God i Gud Tumas, Yu Traem Trastem Hem
^ Stadi ya i tokbaot wan niufala save long saed blong bigfala wok blong tijim ol man, we Daniel 12:2, 3 i tokbaot. Bambae yumi tokbaot wetaem wok ya bambae i gohed, mo hu bambae i joen long hem. Mo tu, bambae yumi luk olsem wanem wok ya i rerem olgeta long wol, from laswan traem long en blong Wan Taosen Yia Rul Blong Kraes.
^ Maet ol man blong Jehova we oli ded long ol las dei, bambae oli laef bakegen fastaem, mo biaen jeneresen we i ded bifo long olgeta. Mo bambae i gohed olsem gogo kasem we olgeta man oli laef bakegen. Sipos i olsem, evri jeneresen bambae i gat janis blong welkamem bak olgeta we oli bin save. Nomata se i hapen olsem wanem, be Baebol i talem se bambae i gat “oda” taem olgeta we oli go long heven oli laef bakegen, taswe yumi save se bambae i gat oda taem olgeta long wol oli laef bakegen.—1 Kor. 14:33; 15:23.
^ Hemia i wan niufala save we i defren long hemia long buk ya Pay Attention to Daniel’s Prophecy! japta 17, mo Wajtaoa blong 1 Julae 1987, pej 21-25 long Inglis.
^ Ol Wok 24:15 i tokbaot “ol man we oli stret” mo “ol man we oli no stret.” Jon 5:29 i tokbaot “olgeta we oli mekem ol gudfala samting” mo “olgeta we oli mekem ol rabis samting.” Ol vas ya oli stap tokbaot fasin we ol man oli mekem bifo we oli ded.
