1. Mbamba be mam bevé ba yange bia Éjôé ya toyini mimbu?

 NGO’O abime mbamba môs ôte, môs ñwômane miñwuan wo ye taté si va, éyoñe ya Éjôé ya toyini mimbu! Bôte bese be nga jañele bôte bap be ne ôjeja’a ya beta yene be. Nne Yéhôva fe a wô’ôtane nalé. (Job 14:15) Tame simesan abim mevak môt ase a ye wôk éyoñ bôte bé bé wômô. Avale bi nga yen ayé’é ya mvus, bôt “be ne zôsô,” mbe bete môé map me ne ntilan kalate ya ényiñ, ba ye “wômô a nyiñ.” (Mame minlôman 24:15; Jean 5:29) Éko éziñ abui ya bôte bi nga jañele ba ye bo nsamba ôte. b Nde fe, ba be ne “bikotekot,” aval ane ba be nji bi fane ya yeme Yéhôva a kañe nye ôsusua na ba wu, ba ye “wômô a nyoñe mekua.”

2-3. (a) Avale kalate Ésaïe 11:9, 10 a jô, beta nta’ane mam asu ñye’elane mbé a ye boban? (b) Jé bia zu yen ayé’é di?

² Da ye sili na be ye’ele bôte bese ba ye wômô. (És. 26:9; 61:11) Ajô te, beta nta’ane mam asu ñye’elan a ye boban si va aval e ngenane teke tame boban  môs éziñ. (Lañe’e Ésaïe 11:9, 10.) Amu jé? Amu da ye sili na bikotekot bi bôt bia ye wômô bi yé’é na bi yem Yésus, nta’ane mam ya Éjôé Zambe, ntañ, mfi ya éyôlé Yéhôva, bi yeme fe amu jé nnye étam a yiane jôé bia. Da ye fe sili na bezôsô be bôt be yeme mame Yéhôva a zuya a ye’ele bebo bisaé bé ane éyoñ é nga lôt a lat a nsôñane wé asu si nyi. Bôte béziñ ya été be nga wu ôsusua na Kalate Zambe a tiliban. Ajô te, bezôsô be bôt a bikotekot bi bôt bese ba ye yé’é abui mam.

³ Ayé’é di, bia zu jeñ biyalane ya minsili mi: Beta ésaé ñye’elane bôt ate a ye boban aya? Jé ja ye kui bôte bé tôñe mam bé ye’ele be? Ba ki bé bene tôñe miñye’elane mite bé su’ulan aya? Biyalane ya minsili mite bi ne nya mfii asu dangan den. Aval bia zu yen, minkulane mejô miziñ ya kalate Daniel a kalate Nlitan mia ye volô bia na bi kôme wôk mam ma ye boban éyoñ bewu ba ye wômô. Bia zu taté yen mbamba be mam bia koone be kalate Daniel 12:1, 2.

4-5. Jé kalate Daniel 12:1 a jô a lat a éyoñ ya asu’ulan?

⁴ Lañe’e Daniel 12:1. Kalate Daniel a liti bia mbamba be mam ba ye boban éyoñ ya asu’ulan. Kalate Daniel 12:1 a liti na Micaël, nnye ate a ne Yésus Krist, “a tele ngame [bebo bisaé be Zambe].” Nkulan ajô ôte ô nga taté na wo tôéban mbu 1914, éyoñ Yésus a nga tebe Njôô ya Éjôé Zambe yôp été.

⁵ Daniel fe a nga jô na Yésus a ye “tebe” éyoñ “éyoñe ya njuk ja ye bo, aval éyoñ e nji tame kui ane ayoñe bôt é nga bo akekui éyoñ ete ébien.” “Éyôñ ya njuk” éfuse ja jôô je va é ne “beta étibila’a” kalate Matthieu 24:21 a jôô nye. Yésus a ye tebe, nge ke na a ye kamane bebo bisaé be Yéhôva memane ya mbia éyoñ ate, e bita ya Harmaguédon. Kalate Nlitan a loone bôte bete na bizu’u bi bôt bia so beta étibila’a.​—Nli. 7:9, 14.

6. Jé ja ye boban éyoñ bizu’u bi bôt bi maneya dañ beta étibila’a? Timi’in. (Fombô’ô fe “Minsili bôte ba sili” a lat a ñwômane miñwuan wo ye bobane si va, Nkume mmombô nyi.)

⁶ Lañe’e Daniel 12:2. Jé ja ye boban éyoñ bizu’u bi bôt bi maneya dañ beta minju’u mite? Nkulan ajô ôte wo kobô ajô ya nya ñwômane miñwuan é boban melu ma zu, ô nji bo ndeme ya jôm éziñ avale bi mbe bi simesa’ane melu mvus. c Mejô mete ma fombô ñwômane miñwu’an wo ye boban mfefé émo. Amu jé bia jô nalé? Bifia “mbulu’u ya si été” bia koone bie kalate Daniel bia lu’an a éfia “Sheol” bia koone je kalate Job 17:16. Ajô te, Daniel 12:2 a kobô ajô ya nya ñwômane miñwuane a ye boban éyoñ melu m’asu’ulan me maneya, mvuse bita ya Harmaguédon.

7. (a) Aval avé bôte béziñ ba wômô a “nyiñe nnôm éto”? (b) Amu jé ñwômane miñwuan ôte “wo dañ” mi mivok?

⁷ Jé kalate Daniel 12:2 a kômbô jô éyoñ a jô na bôte béziñ bé wômô a  “nyiñe nnôm éto?” A kômbô jô na, bôte ba ye wômô a yeme Yéhôva, nge ke ôsu a yeme nye, a bo Yéhôva ba Yésus mewôk éyoñe ya toyini mimbu, bé su’ulane bi ényiñe ya melu mese. (Jean 17:3) Ñwômane miñwuan ôte wo ye bo wu “wo dañ” mi mi nga boban melu mvus. (Beh. 11:35) Amu jé? Amu bôte be nga wômô melu mvus be nga beta mane wu.

8. Aval avé bôte béziñ ba ye wômô a bi “ôson a mbiasane ya nnôm éto”?

⁸ Ve sa ke bôte bese bé wômô mbe bé kañese ñye’elane Yéhôva. Nkulan ajô Daniel wo jô na bôte béziñ ba ye wômô a “ôson a mbiasane ya nnôm éto.” Mbôle bôte bete bé bi nsisim éngana’a, biyôlé biap bia ye ke tiliban kalate ya ényiñ, a ba ye ke bi ényiñ ya melu mese. Ba ye bi “mbiasane ya nnôm éto,” nge ke njañane ya nnôm éto. Ajô te kalate Daniel 12:2 a kobô ajô jam da ye su’ulane kui bôte bese ba ye wômô mesoñ, éyoñe be fombôya mam bé bo mvuse ñwômane miñwuan. d (Nli. 20:12) Bôte béziñ ya été ba ye bi ényiñe ya melu mese, ba bevo’o ki momo.

9-10. Kalate Daniel 12:3 a liti na jam avé afe da ye boban mvuse beta étibila’a, a beza ba “ye faé aval ane mfaéan éfufupe ya yôp”?

⁹ Lañe’e Daniel 12:3. Jam avé afe da ye boban éyoñ “éyoñ ya njuk” é maneya lôt? A ne ô vaa jam Daniel 12:2 a jôô je, Daniel 12:3 a liti jam afe da ye boban mvuse beta étibila’a.

¹⁰ Beza ba “ye faé aval ane mfaéan éfufupe ya yôp”? Mejô Yésus a kobô kalate Matthieu 13:43 ma volô bi na bi bi éyalan ya nsili ôte, a jô na: “Éyoñe te bôt be ne zôsô ba ye faé [Éjôé] Ésaa wop yôp.” Bifuse bia bôman éfus éte bia liti na Yésus a kobô ajô “bone ya [Éjôé] Zambe,” miñwo’on, mmie mite mia ye jôé a nye yôp été. (Mt. 13:38) Ajô te Daniel 12:3 a yiane kobô ajô miñwo’on a ésaé mia ye bo Éjôé ya toyini mimbu si.

11-12. Ésaé évé miñwo’on mia ye bo memane ya 1000 mimbu?

¹¹ Aval avé miñwo’on mia ye kee “bôt abui mfa’a ya zôsô”? Miñwo’on mia ye saé a Yésus nsamba mfa’a ya tebele beta ésaé ñye’elan a ye boban si va Éjôé ya 1000 mimbu. Bekristen 144 000 bete ba ye bo ve bejôô bôt étam, ba ye fe bo beprêtre. (Nli. 1:6; 5:10; 20:6) Ajô te ba ye saé asu “mvo’é ya meyoñe me bôt.” Ôte’ete’e ôte’etek abé da ye mane vas bôt menyul. (Nli. 22:1, 2; Éz. 47:12) Ngo’o abim mevak miñwo’on mite mia ye wôk!

¹² Beza ba ye bo bôt “abui” ba ye ke be zôsô? Bi ne lañe bôt ba ye wômô mesoñ, bôt ba ye dañe Harmaguédon, a bone ba ye bialé mfefé émo. Memane ya 1000 mimbu, bôte bete bese ba ye bo ne ten, teke fe ayeñe ya abé. Nde ñhe, éyoñ évé nje Yéhôva a ye tili biyôlé biap kalate ya ényiñ éyoñ jia ya biyoñ bise?

13-14. Jé bôte bese ba ye nyiñe si va ba yiane liti ôsusua na ba bi ényiñe ya melu mese?

¹³ Bi nji yiane vuane na éyoñ môt a ne teke ayeñ, nalé a nji tinane na a biya ényiñe ya melu mese. Tame ve’ele simesan Adam ba Ève. Be mbe te metyi ya abé, ve e nga sili na be bo Yéhôva mewôk asu na be bi ényiñe ya melu mese. Ve éngôngole jam é ne na be nga bene bo Nye mewôk.​—Bero. 5:12.

¹⁴ Bôte ba ye nyiñe si va ba ye tebe été évé memane ya 1,000 mimbu? Bôte bete bese ba ye bo zôsô ne tiññ. Ye bôte bete bese ba ye fo’o suk Éjôé Yéhôva nnôm éto? Ye bôte béziñe ya été ba ye vu Adam ba Ève, mbe bete be nga bo Yéhôva melo a too ke na be nji be be be’e metyi ya abé? Bia yiane jeñe biyalan ya minsili mite. Aval avé bi ne bi bie?

15-16. (a) Éyoñ évé nje bôte bese ba ye bi fane ya liti Yéhôva na be ne ngame jé? (b) Jé ja ye kui memane ya meve’ele ma su’ulan?

¹⁵ Satan é ke mimbôk tañe 1,000 mimbu. Nté é tabe mimbô’ô mite, a ye ke beta bi ngule ya joñôlô bôt. Ve memane ya toyini mimbu, ba ye beta suu nye. Éyoñe te é jeñe na a beta  du’u bôte be nto zôsô ne tiññ. Éyoñe meve’ele ma su’ulan mé boban, bôte bese ba ye bi fane ya liti na, ba semé jôé Yéhôva a na ba su’u éto njôane jé. (Nli. 20:7-10) Avale bii bo éyoñ éte nde ñhe da ye liti nge éyôlé jangan ja yiane tabe ntilan kalate ya ényiñ nnôm éto.

¹⁶ Kalate Zambe a jô na bôte béziñ ba ye vu Adam ba Ève, a bene kañese éto njôane Yéhôva. Jé ja ye kui bôte bete? Nlitan 20:15 a jô na: “Môt éziñ a nga bo te yené ntilane kalate ya ényiñ ate été, nnye a nga wuaban ato’o nduan ete été.” Ôwé, mbia be bôte bete ba ye jañ nnôm éto. Ve abui bôt da ye dañe meve’ele mete. Biyôlé biap bia ye bo ntilan kalate ya ényiñ éyoñe jia ya biyoñ bise.

17. Éngele a nga kate Daniel na mam mevé ma ye boban melu ma su’ulan?

¹⁷ Nlem ô ne bia njalan a mevak éyoñ bia simesan mbamba be mam ba yange bia melu ma zu! Ve éngele a nga kate fe Daniel beta be mam befe be tii a “éyoñe ya asu’ulan.” (Lañe’e Daniel 12:4, 8-10; 2 Tim. 3:1-5) Éngele a nga jô Daniel na: “Ñyeman wo ye bo  abui.” Ôwé, bebo bisaé be Yéhôva mbe ba kôme wô’ô minkulane mejô ya kalate Daniel. Éngele a nga beta jô Daniel na “bôt be ne abé ba ye bo abé; te ke môte ya bôt be ne abé a ye yem.” (Daniel 12:4, 8-10)

18. Jé ja ye kui mbia be bôt ana’ana?

¹⁸ Den, e ne yené ve ane bôte ba bo mbia be mam ba bi ki fonose ya mbia mboone wop. (Mal. 3:14, 15) Ve ana’ana, Yésus a zu tyi’i bikela mejô a kandé bie a mintômba. (Mt. 25:31-33) Mbia be bôt bete ba ye ke dañe beta étibila’a, nge wômô asu na be nyiñe mfefé émo. Biyôlé biap bia ye ke tiliban “kalate ya ôsimesan” Malachie 3:16 a jôô nye.

19. Jé bia yiane bo den, a amu jé? (Malachie 3:16-18)

¹⁹ Den nnye bia yiane liti a ntabane wongan na bi nji bo nsamba mbia be bôt. (Lañe’e Malachie 3:16-18.) Yéhôva a kôane bôt a yen ane “jôme jé émien,” nge ke bôt a nyane be. Teke bisô na bia fe bia kômbô bo nsamba ôte.

20. Ngaka’a fé Yéhôva a nga su’ulane bo Daniel, a amu jé wo yange na ngaka’a éte é tôéban a ôjeja’a ôse?

²⁰ Bia nyiñe fo’o ngum aval éyoñ. Bitu’a bi mam bia zu boban. Ana’ana bia zu yen ane mbia be bôt bese ba zu mane fitan. Mvuse ya valé, bii yen ane Yéhôva a tôé ngaka’a a nga bo Daniel: “Wo ye tebe mfa’a ya ngabe jôé été, melu ya asu’ulan.” (Dn. 12:13) Ye wo yange a ôjeja’a ôse môse Daniel, a bôte bôé be nga mane wu, ba ye beta “tebe”? Nge e ne nalé, va’a ngule jôé ése asu na ô wulu ba’aba’a a Yéhôva, ndemben éyôlé jôé ja ye tabe ntilane kalate ya ényiñe Wé.