STODI AATIKL 40
“Help Lata Peepl fi Du Weh Rait”
“Dehn wan weh di help lata peepl fi du weh rait wahn shain brait laik di staarz, fareva an eva.”—DAN. 12:3.
SANG 151 Hihn Wahn Kaal
WEH WI WAHN DISKOS? a
1. Weh aal wi ku luk faawod tu joorin di Towzn-Yaa Rool?
IH WAHN bee wahn wandaful day wen di rezorekshan staat rait ya pahn ert joorin Krais Towzn-Yaa Rool. Aala wi kyaahn wayt fi si dehn wan weh wi lov kohn bak tu laif, ahn da rait soh Jehoava feel tu. (Job 14:15) Tink bowt how hapi evribadi pahn di ert wahn bee wen dehn wan weh dehn lov kohn bak tu laif. Laik weh wi mi laan eena di laas aatikl, dehn wan “weh mi raichos,” hoofa naym deh eena di buk a laif, wahn geh “evalastin laif.” (Aks 24:15; Jan 5:29) Ih ku bee dat dehn wan weh wi lov wahn deh monks di fers wanz weh wahn geh rezorek rait afta Armagedon. b Ahn dehn wan “weh neva raichos,” hoo neva geh fi laan bowt Jehoava er serv ahn bifoa dehn ded, “wahn geh joj” afta dehn rezorekshan.
2-3. (a) Akaadn tu Isaiah 11:9, 10, wat da di bigis teechin proagram weh wahn hapm pahn di ert? (b) Weh wi wahn diskos eena dis aatikl?
2 Dehn wan weh geh rezorek wahn need fi laan wahn lat. (Isa. 26:9; 61:11) Soh di bigis teechin proagram pahn di ert wahn need fi staat. (Reed Isaiah 11:9, 10.) c Wai? Bikaaz dehn wan weh neva raichos weh geh rezorek wahn need fi laan bowt Jeezas Krais, Gaad Kingdom, di ransom, wai Jehoava naym impoatant, ahn wai onli hihn ga di rait fi rool. Eevn dehn wan weh raichos wahn need fi laan bowt di nyoo tingz weh Jehoava mi teech ih peepl bowt ih perpos fi di ert. Som a Jehoava faytful servants mi ded lang bifoa di Baibl mi kompleet. Soh dehn wan weh mi raichos ahn dehn wan weh neva raichos wahn ga wahn lat fi laan.
3 Eena dis aatikl, wi wahn kansida dehnya kweschan: How dis big teechin proagram wahn hapm? How da teechin proagram wahn afek weda er nat peepl naym wahn geh rait dong eena di buk a laif wid ink weh wahn neva geh irays? Di ansa tu dehnya kweschan impoatant tu wi tudeh. Sohn inchrestin prafesi weh geh rait dong eena di buk a Daniel ahn Revilayshan wahn help wi fi andastan weh wahn hapm wen di ded geh rezorek. Fers mek wi taak bowt sohn eksaitin tingz weh di prafesi da Daniel 12:1, 2 taak bowt.
“PEEPL WEH DI SLEEP EENA DI DOS . . . WAHN WAYK OP”
4-5. Weh Daniel 12: 1 tel wi bowt di taim a di en?
4 Reed Daniel 12:1. d Di buk a Daniel tel wi di aada a how tingz wahn hapm eena di laas dayz. Fi egzampl, Daniel 12:1 tel wi dat Maikl, hoo da Jeezas Krais, di “stan op fi [Gaad] peepl.” Da paat a di prafesi mi staat tu kohn chroo eena 1914 wen Jeezas staat rool az King a Gaad Kingdom da hevn.
5 Bot Danyel prafesi aalso seh dat Jeezas mi “stan op” joorin wahn taim wen “lata sofarin wahn deh, laik notn weh eva hapm fahn bifoa eni peepl kohn tugeda az wahn nayshan.” Da taim wen “lata sofarin wahn deh” da di “grayt chribyulayshan” weh Jeezas taak bowt da Machyu 24:21. Da taim wahn finish wen Armagedon kom, ahn Jeezas wahn stan op, er tek akshan fi difen Gaad peepl. Di buk a Revilayshan kaal da groop a peepl wahn big krowd “weh mi paas chroo di grayt chribyulayshan.”—Rev. 7:9, 14.
6. Weh wahn hapm afta di big krowd servaiv di grayt chribyulayshan? Pleez eksplayn yu ansa. (Si di “Kweschanz Weh Peepl Aks” aatikl eena dis magazeen weh taak bowt di rezorekshan tu laif pahn ert.)
6 Reed Daniel 12:2. e Weh hapm afta di big krowd servaiv dis taim wen lata sofarin wahn deh? Wi yoostu tink dat Daniel 12:2 mi-di taak bowt di rezorekshan tu hevn er bowt aala di werk weh di bradaz mi-di du fi preech di gud nyooz afta peepl mi nayli stap dehn eena 1918. f Bot now wi andastan dat dis prafesi di taak bowt di rezorekshan a di ded weh wahn hapm eena di nyoo werl. Wai wi seh dat? Job 17:16 yooz “di dos” fi meen di saym ting az “di grayv.” Dis shoa wi dat Daniel 12:2 di taak bowt di rezorekshan weh wahn hapm afta di laas dayz finish an afta Armagedon don.
7. (a) How som a di peepl weh geh rezorek wahn geh “evalastin laif”? (b) Wai dis da “wahn beta rezorekshan”?
7 Bot da weh Daniel 12:2 meen wen ih seh dat som a di peepl weh geh rezorek wahn geh “evalastin laif”? Ih meenz dat dehn wan weh geh rezorek wahn haftu geh fi noa, er kantinyu geh fi noa, an obay Jehoava ahn Jeezas joorin di 1,000 yaaz fi mek dehn ku geh evalastin laif. (Jan 17:3) Dis wahn bee “wahn beta rezorekshan” dan di wan weh sohn peepl mi geh eena di paas. (Heeb. 11:35) Wai? Bikaaz dehndeh peepl weh mi geh rezorek eena di paas mi en op di ded agen.
8. Wai som a di peepl weh geh rezorek wahn geh “evalastin shaym”?
8 Bot noh evribadi weh geh rezorek wahn waahn laan fahn Jehoava teechin proagram. Danyel prafesi seh dat som a di peepl weh geh rezorek wahn geh “evalastin shaym.” Bikaaz dehn rifyooz fi laan fahn Jehoava, dehn naym noh wahn geh rait dong eena di buk a laif ahn dehn noh wahn geh evalastin laif. Insteda dat, dehn wahn geh “evalastin shaym,” er dehn wahn geh dischrai. Soh Daniel 12:2 di taak bowt weh wahn en op di hapm tu dehn wan weh geh rezorek bays pahn weh dehn du afta dehn geh rezorek. g (Rev. 20:12) Som a dehn wahn geh evalastin laif; adaz wahn geh dischrai.
“HELP LATA PEEPL FI DU WEH RAIT”
9-10. Wat els wahn hapm afta di grayt chribyulayshan, ahn hoo “wahn shain brait laik di skai”?
9 Reed Daniel 12:3. h Wat els wahn hapm afta di taim wen “lata sofarin wahn deh”? Apaat fahn Daniel 12:2, vers 3 aalso taak bowt sohnting weh wahn hapm afta di grayt chribyulayshan.
10 Hoo “wahn shain brait laik di skai”? Machyu 13:43 help wi fi fain owt da hoo wen ih seh: “Da taim deh di raichos wan dehn wahn shain az brait az di son weh deh eena di skai—dehn wahn shain eena di Kingdom a fi dehn Faada.” Wen Jeezas mi seh dat, hihn mi-di taak bowt “di son dehn a di Kingdom,” fi hihn anointid bradaz, weh wahn serv lang wid hihn da di kingdom da hevn. (Mach. 13:38) Soh Daniel 12:3 di taak bowt di anointid ahn di werk weh dehn wahn du joorin di Towzn-Yaa Rool.
Di 144,000 wahn werk tugeda lang wid Jeezas Krais fi dairek di teechin werk weh wahn hapm pahn di ert joorin di 1,000 yaaz (Paragraaf 11)
11-12. Weh di 144,000 wahn werk pan joorin di 1,000 yaaz?
11 How di anointid wahn help “lata peepl fi du weh rait”? Di anointid wahn werk tugeda lang wid Jeezas Krais fi dairek di teechin werk weh wahn di goh aan rait ya pahn di ert joorin di 1,000 yaaz. Di 144,000 wahn rool az king, ahn dehn wahn serv az prees tu. (Rev. 1:6; 5:10; 20:6) Soh dehn wahn help “heel di peepl a di nayshan dehn.” Ahn dehn wahn help peepl lee bit bai lee bit fi bee perfek agen. (Rev. 22:1, 2; Ezek. 47:12) Dis werk wahn mek di anointid reeli hapi!
12 Hoo wahn deh monks di “lata peepl” weh laan fi du weh rait? Dehn wahn bee peepl weh geh rezorek ahn peepl weh servaiv Armagedon lang wid eni pikni weh baan eena di Paradais. Bai di en a di 1,000 yaaz, evribadi pahn ert wahn bee perfek. Soh da wen fi dehn naym wahn geh rait eena di buk a laif wid ink weh kyaahn irays?
DI FAINAL TES
13-14. Weh aal perfek peepl pahn di ert need fi du bifoa dehn ku geh evalastin laif?
13 Wi haftu memba dat wi noh wahn geh evalastin laif jos bikaaz wi perfek. Tink bowt Adam ahn Eev. Dehn mi perfek, bot dehn mi need fi shoa dat dehn obeedyant tu Jehoava Gaad bifoa dehn kuda geh evalastin laif. Ahn dehn neva obay ahn.—Roam. 5:12.
14 Weh wahn bee di kandishan a di peepl pahn ert bai di en a di 1,000 yaaz? Aala dehn wahn bee perfek. Yu tink aala dehn wahn sopoat Jehoava roolaship fareva? Er yu tink som a dehn wahn bee laik Adam ahn Eev, weh neva stay faytful eevn doa dehn mi perfek? Dehndeh kweschanz need ansaz.
15-16. (a) Wen evribadi wahn geh di chaans fi shoa if dehn laayal tu Jehoava? (b) Weh wahn hapm da di en a di fainal tes?
15 Saytan wahn geh lak op fi di 1,000 yaaz. Joorin da taim, ih wahn kyaahn fool nobadi. Bot da di en a di 1,000 yaaz, Saytan wahn geh free fahn ih prizn. Den ih wahn chrai fool op di perfek peepl weh di liv joorin da taim. Joorin da tes, aala di perfek peepl pahn ert wahn ga di chaans fi shoa if dehn rispek Gaad naym ahn sopoat fi hihn roolaship. (Rev. 20:7-10) Weh dehn du joorin da taim wahn seh weda er nat dehn naym ku stay eena di buk a laif fareva.
16 Som peepl, wi noh noa humoch, wahn bee laik Adam ahn Eev. Dehn wahn rijek Jehoava roolaship. Weh wahn hapm tu dehn? Revilayshan 20:15 tel wi: “Hooeva naym neva deh rait dong eena di buk a laif, hihn chroa dehn intu di layk a faiya.” Enibadi weh rijek Jehoava roolaship wahn geh dischrai fareva. Bot moas perfek peepl wahn paas dis fainal tes. Den dehn naym wahn stay eena di buk a laif fareva.
JOORIN “DI TAIM A DI EN”
17. Weh di aynjel mi tel Danyel wuda hapm eena fi wee taim? (Daniel 12:4, 8-10)
17 Ih eksaitin fi tink bowt dehnya tingz weh wahn hapm eena di fyoocha. Bot di aynjel mi gi Danyel sohn impoatant infamayshan bowt fi wee taim tu, “di taim a di en.” (Reed Daniel 12:4, 8-10; i 2 Tim. 3:1-5) Di aynjel tel Danyel: “Nalij a di chroot wahn bee plenti.” Yes, Gaad peepl mi wahn geh wahn beta andastandin a di prafesi weh hihn rait. Ahn di aynjel mi seh dat joorin dis taim “wikid peepl wahn goh aan wikid, ahn no wikid peepl wahn andastan.”
18. Weh wahn soon hapm tu wikid peepl?
18 Nowadayz ih mait luk laik wikid peepl di get weh wid dehn wikidnis. (Mal. 3:14, 15) Bot soon Jeezas wahn joj peepl weh da laik goat ahn separayt dehn fahn peepl weh da laik sheep. (Mach. 25:31-33) Dehnya wikid peepl noh wahn servaiv di grayt chribyulayshan ner geh rezorek fi liv eena di nyoo werl. Fi dehn naym noh wahn deh eena di “buk” weh Malachi 3:16 taak bowt.
19. Weh wi need fi du now, ahn wai? (Malachi 3:16-18)
19 Now da di taim fi mek wi proov dat wi noh deh monks di wikid peepl. (Reed Malachi 3:16-18.) j Jehoava di gyada wahn “speshal prapati,” er peepl weh preshos tu hihn. Fi shoar wi waahn deh monks dehn.
Ih wahn bee soh eksaitin fi si Danyel, di peepl weh wi lov, ahn lat moa peepl “stan op” fi dehn inheritans eena di nyoo werl! (Paragraaf 20)
20. Wat da di laas pramis weh Jehoava giv Danyel, ahn wai yoo luk faawod fi si da pramis kohn chroo?
20 Eksaitin tingz di hapm now, an eevn moa eksaitin tingz wahn hapm eena di fyoocha. Soon wi wahn si aal wikidnis geh dischrai. Afta dat, wi wahn si Jehoava pramis tu Danyel kohn chroo; hihn mi tel ahn: “Yu wahn stan op fi yu inheritans da di en a di dayz.” (Dan. 12:13) Yoo luk faawod tu di day wen Danyel an evribadi els weh yu lov wahn “stan op” agen? Den du yu bes fi stay faytful now, ahn yu wahn ku bee shoar dat yu naym wahn stay eena Jehoava buk a laif.
SANG 80 “Tays ahn Si How Gud Jehoava Gud”
a Eena dis aatikl, wi wahn diskos wahn nyoo andastandin bowt di big teechin proagram weh Daniel 12:2, 3 taak bowt. Wi wahn aalso diskos wen ih wahn hapm, ahn hoo wahn tek paat eena it. Wi wahn si how dis big teechin proagram wahn help dehn wan pahn di ert fi bee redi fi dehn fainal tes weh dehn wahn fays da di en a Krais Towzn-Yaa Rool.
b Dehn wan weh ded joorin di laas dayz ahn weh mi faytful mait bee di fers wanz fi geh rezorek. Den dehn wan weh mi ded bifoa dehn wahn geh rezorek, maybi jenarayshan bai jenarayshan. If dis da how ih wahn hapm, den eech jenarayshan wahn geh di apachooniti fi welkom dehn wan weh dehn noa. Wi noh reeli noa how ih wahn hapm, bot di Baibl seh dat di rezorekshan da hevn wahn hapm eena “aada.” Ahn soh wi ku bee shoar dat di rezorekshan pahn ert wahn bee eena aada tu.—1 Kor. 14:33; 15:23.
c Isaiah 11:9, 10: “Dehn noh wahn du no haam ner kaaz no kaina prablem pahn fi mee hoali mongtin; bikaa di ert wahn bee ful op a di nalij a Jehoava jos laik how di waata ful op di see. 10 Pahn da day di wan weh da Jesi root wahn stan op az wahn signal fi di peepl. Aala di nayshan dehn wahn ton tu hihn fi gaidans, ahn di plays wehpaat hihn liv wahn ga lata gloari.”
d Daniel 12:1: “Joorin da taim Maikl wahn stan op. Hihn da di grayt prins weh di stan op fi yu peepl. Ahn fi wahn wail lata sofarin wahn deh, laik notn weh eva hapm fahn bifoa eni peepl kohn tugeda az wahn nayshan. Ahn joorin da taim fi yoo peepl wahn eskayp, evribadi weh ga dehn naym rait dong eena di buk.”
e Daniel 12:2: “Wahn lata peepl weh di sleep eena di dos pahn di ert wahn wayk op. Som a dehn wahn geh evalastin laif, ahn som wahn en op wid evalastin shaym.”
f Dis eksplanayshan chaynj di way how wi andastan dis prafesi. Di oal andastandin deh eena Chapta 17 a di Pay Attention to Danielʼs Prophecy! buk an eena The Watchtower a Joolai 1, 1987, pp. 21-25.
g Dis difrent fahn Aks 24:15 weh taak bowt “peepl weh mi raichos” ahn “peepl weh neva raichos” ahn fahn Jan 5:29 weh taak bowt “peepl weh du gud tingz” ahn “peepl weh du bad tingz.” Dehnya vers di taak bowt di tingz weh di peepl weh geh rezorek mi du bifoa dehn ded.
h Daniel 12:3: “Ahn dehn wan weh ga andastandin wahn shain brait laik di skai, ahn dehn wan weh di help lata peepl fi du weh rait wahn shain brait laik di staarz, fareva an eva.”
i Daniel 12:4, 8-10: “Bot yoo, Danyel, mos kip dehnya werdz seekrit, ahn seel dis buk til di taim a di en kohn. Lata peepl wahn saach chroo ahn chroo it, ahn nalij a di chroot wahn bee plenti. 8 Now Ah mi hyaa weh ih seh, bot Ah kudn andastan, soh Ah aks ahn: ‘Mi laad, weh wahn hapm eena di en?ʼ 9 Den ih tel mi: “Goh Danyel, bikaaz yu mos kip dehnya werdz seekrit ahn seel dehn op til di taim a di en kohn. 10 Lata peepl wahn mek dehnself kleen; dehn wahn du weh rait ahn liv wahn beta laif. Ahn wikid peepl wahn goh aan wikid, ahn no wikid peepl wahn andastan. Bot waiz peepl wahn andastan.”
j Malachi 3:16-18: “Joorin da taim deh, di wan dehn weh di fyaa Jehoava mi-di taak wid wan anada, eech wan wid ih fren, ahn Jehoava mi-di pay atenshan ahn lisn. Ahn wahn buk mi geh rait op fronta Gaad weh gat een di naym a aal hoo fyaa Jehoava ahn meditayt pahn fi hihn naym. 17 Jehoava di Komanda a di hevnli aami seh: ‘Pahn di day Ai chooz wahn speshal prapati, dehn wahn bee fi mee. Ai wahn shoa dehn kompashan, jos laik how wahn man shoa kompashan tu ih son hoo serv ahn. 18 Ahn yu wahn si agen di difrens bitween wahn raichos persn ahn wahn wikid persn, yu wahn si di difrens bitween sombadi weh di serv Gaad ahn sombadi weh noh di serv ahn.ʼ”
