1. Ka katei wagurabubei lídanme Larúeihan Kristu le lánina Milu Irumu?

 SAMINAADIWA san luagu lanarime ugundani danme le lagumeserun águyuguni ya ubouagu lídanme lidaani Larúeiha Kristu le lánina Milu Irumu? Sun wagía ha féridihañabaña haduheñu lidan óunweni busén haadiwa warihiniña waduheñu. Busenhali giñe Heowá larihiniña (Hob. 14:15). Maame lanarime ugundani hadunragun sun gürigia lidan sun Ubóu. Kei wafurendeiruni lidan aturiahani le lubaragiñebei le, gürigia ha “richaguatiña”, ha bürüwañubei hiri tidan líburu to lánina ibagari, “háguyuguba lun habagaridun” (Adü. 24:15; Huan 5:29, TNM). Másiñati háguyuguba lan saragu hádangiñe waduheñu hadan furumiñetiña águyugutiña ya ubouagu. * Lanwoun lira, háguyuguba giñe ha “marichabaña”, ha meha lóuguabei hachansin lun hasubudiruni Heowá o lun heseriwidun lun lau úaraguni lubaragiñebei meha hóunwegun, “háguyuguba lun haguserawagüdün”.

2, 3. a) Kei lafuranguagüdüniwa lidan Isaíasi 11:9, 10, kaba arufudahóua lidan arufudahani le lunbei ladügǘn lidan sun ubóu túteme? b) Kaba wakutiha lidan aturiahani le?

² Sun ha lúnbaña háguyugun gíbebei katei lunti hafurendeiruni (Isa. 26:9; 61:11). Ligía mégeiwabei lubéi arufudahani le lunbei ladügǘn lidan sun ubóu túteme (aliiha huméi Isaíasi 11:9, 10). Luagu le aban oubaü, mósume hafurendeirun ha marichabaña luagu Hesukrístu, luagu Larúeihan, luagu esefuruni, luagu  liri Heowá luma luagu liricha lun Larúeihan. Íbini ha richaguabaña lúntime hafurendeirun luagu burí le lafuranguagüdübei Heowá luagu lisuuni. Añahein meha hádangiñe lubúeingu Heowá ha úaraguabaña hilaguatiña saragu dan lubaragiñe lagumuchun tabürüdǘn Bíbülia. Furanguti gíbebei lan katei lunti hafurendeiruni ha richaguabaña hama ha marichabaña.

³ Lidan aturiahani le lóunabuba álügüdahani burí le: ida luba lichugún aturiahani houn sun gürigia?, kaba asusereda houn ha lúnbaña gaganbadi hamá? ani kaba asusereda houn ha lúnbaña maganbadi hamá? Súdiniti óunabagülei le woun uguñe weyu. Kei le aubei warihei, líderagubadiwa fiu lídangiñe lubuidun profesía le tídanbei liliburun Danieli luma le tídanbei líburu Arufudúni lun gunfuranda wamani le lunbei lasuseredun danme le hásaarun hilaaña. Furumiñe akutiha waméi lubuidun burí sügǘ le lídanbei profesía le tídanbei liliburun Danieli 12:1, 2.

4, 5. Ka tariñagubei liliburun Danieli luagu le lunbei lasuseredun lidan lagumuhóun dan?

⁴ (Aliiha huméi Danieli 12:1). Ariñaga tumuti liliburun Danieli woun ida luba lan lasuseredun fiu sügǘ aban lárigiñe aban lídanme lagumuchagüle lagumuhóun dan. Kéiburi, ariñagati Danieli 12:1 lóunigirubaña lan Migeli, le Hesukrístu lumutuniña Bungiu. Gumeseti fánreinti lídangiñe profesía le agunfulira lidan irumu 1914, dan le liridúnbei Hesusu Urúeime lidan Larúeihan Bungiu sielu.

⁵ Gama lumoun, ariñawagúati lun Danieli liñuraguba lan Hesusu ani ábanbei lan “dan lánina idiheri dan ligía, aban dan le úagili libe lúmagiñe ñein hamá gürigia ubouagu”. Dan lánina idiheri le, ligía “saragu asufuriruni” le iridúbei lidan Matéu 24:21. Ábame lageindagun Hesusu haweigiñe lumutuniña Bungiu, lídanme lagumuchagüle dan le lánina idiheri, mini lan le lidan Arümahedón. Tidan líburu to gíriboun Arufudúni ayanuhóuati hawagu gürigia ha kei “saragu gürigia” ha ítarabei hagaburi kei mudún, ha ásügürübaña “luéigiñe óunwenbu asufuriruni” (Aruf. 7:9, 14).

6. Kaba asusereda lárigiñe hásügürün saragu gürigia lídangiñe óunwenbu asufuriruni, ani ka uagu wariñagei? (Ariha huméi giñe tidan garüdia to lidan fánreinti le gíribei “Álügüdahani le hadügübei aliihatiña” le ayanuhabei luagu águyuguni ya ubouagu).

⁶ (Aliiha huméi Danieli 12:2). Kaba asusereda lárigiñeme hásügürün saragu gürigia ha ítarabei hagaburi kei mudún, lídangiñe dan lánina idiheri? Saminatiwa meha luagu aban dan layanuhaña lan profesía le lídanbei Danieli 12:2 luagu laganwoundun apurichihani lárigiñe meha hararamuni áganiñu lidan irumu 1918. * Gunfurandawaali guentó, layanuhaña lan luagu águyuguni le lunbei lanügün fulasu lidan iseri ubóu. Ka uagu wariñagei ítara liña lan katei le? Lugundun lidan Hobu 17:16 ayanuhati luagu “múa”, ani yúsuati giñe dimurei “óunweni”. Arufuda lumuti dimurei burí le layanuhaña lan Danieli 12:2 luagu águyuguni le lunbei lasuseredun danme le lagumuchun lagumuhóun dan lárigiñeme wuribu le gíribei Arümahedón.

7. a) Ida luba águyuguni houn gürigia “lun habagaridun lun sun dan”? b) Ka uagu ábanme lubéi águyuguni “lidoun aban ibagari le buídutimati” águyuguni le?

⁷ Lanwoun lira, ka labusenrunbei Danieli 12:2 lariñagun dan le lariñagubei añaheinbaña lan águyugutiña “lun habagaridun lun sun dan”? Mini lan le, ha lanme águyugubaña lidan lidaani 1,000 irumu subudi hameime Heowá luma Hesusu o sigí hagíame asubudiraña, ani gaganbadi hagíame houn, ábame heresibirun ibagari magumuchaditi (Huan 17:3). Ábanbei águyuguni “lidoun aban ibagari le buídutimati” sügǘ luéi háguyugun fiu gürigia ha águyugubaña lidan  dan le sügühalibei (Ebü. 11:35). Ka uagu? Lugundun gürigia meha ha águyugubaña ábaya meha hóunwegun.

8. Kaba mini lan águyuguni houn gürigia lun “hǘnabudagüdüniwa luma lun mabahüdün hamá lun súnwandan”?

⁸ Mama sun ha lúnbaña háguyugun hánharuba lan lun aransehani le ladügübei Heowá lun larufudahóun houn. Ariñagati lani Danieli profesía añaheinbaña lan hádangiñe gürigia águyugutiña lun “hǘnabudagüdüniwa luma lun mabahüdün hamá lun súnwandan”. Ladüga luriban hagaburi mabürüdünbei hiri tidan líburu to lánina ibagari ani meresibirunbaña ibagari magumuchaditi. Hasufuriruba mabahüdǘni “lun súnwandan” mini lan le hagünrinchawaguba lan lun sun dan. Ligíati layanuhaña Danieli 12:2 luagu le lunbei lasuseredun agumuhóuni houn sun ha lúnbaña háguyugun luma luagu le lunbei hadügüni lárigiñe háguyugun * (Aruf. 20:12). Añaheinbaña hádangiñe hibihiba ibagari magumuchaditi, ha híbiri mibihin habéi.

9, 10. a) Según Danieli 12:3, kaba amu katei asusereda lárigiñe óunwenbu asufuriruni? b) Kátaña lúnbaña hámirihan kei “límirin sielu”?

⁹ (Aliiha huméi Danieli 12:3). Kaba burí amu katei asusereda lidan “dan lánina idiheri” le yarafaalibei? Amu luéi le ariha wamaalibei lidan Danieli 12:2, adimurehati bérusu 3 luagu ámuya katei le lunbei lasuseredun lárigiñe óunwenbu asufuriruni.

¹⁰ Kátaña san ha lúnbaña hámirihan kei “límirin sielu”? Íderagua lumutiwa dimurei le lariñagubei Hesusu, le wadarirubei lidan Matéu 13:43 lun wasubudiruni kátaña lan. Ariñagati: “Hámeti adügübalin le lubeibei Bungiu, ábame hámiridun kei weyu lidan larúeihan Wáguchi Bungiu”. Dan le lariñagunbalin Hesusu dimurei le layanuhaña hawagun “gürigia ha lílana larúeihan Bungiu” kristiánugu anuadirúaaña ha ítarabaña lun Hesusu kei líbirigu, ha lúnbaña Harúeiha luma sielu (Mat. 13:38). Ligíati, layanuhaña Danieli 12:3 hawagu kristiánugu anuadirúaaña luma luagu dasi le lunbei hadügüni lídanme Milu Irumu le lánina Larúeihan Bungiu.

11, 12. Kaba wadagimanu hadüga 144,000 lídanme 1,000 irumu?

¹¹ Hanügübaña kristiánugu anuadirúaaña “saragu gürigia lidoun üma le surubei”. Ida luba hadügüni? Hawadigimariduba úara luma Kristu lun halidihani programa lánina arufudahani le lunbei ladügǘn lidan sun Ubóu lídanme 1,000 irumu le lunbei liabin. Mámarügübaña urúeigu, 144,000, fádirigubaña giñe (Aruf. 1:6; 5:10; 20:6). Hídehaba “lun lagaranihóun houn néchanigu” lun lagidarun figóu hawéi néchanigu murusun murusun (Aruf. 22:1, 2; Ese. 47:12). Maame hagundan kristiánugu anuadirúaaña danme le hadügüni katei le!

¹² Kátaña san hádangiñebaña “saragu” ha lúnbaña hanügǘn lidoun “üma le surubei”? Ha lúnbaña háguyugun, ha lúnbaña hásügürün lídangiñe Arümahedón hámati irahüñü ha lúnbaña hágurahoun lidan iseri ubóu. Danme le lagumuchun milu irumu sunme ha awinwandubaña ubouagu mafigoun hañame. Ligíati, ídaame labürüdǘwa hiri tidan líburu to lánina ibagari lun súnwandan?

13, 14. Ka lunbei harufuduni sun gürigia mafigountiña ha lúnbaña hawinwandun ubouagu lubaragiñe heresibirun ibagari magumuchaditi?

¹³ Haritagua waméi mama lan ladüga mafigounhaali lanme aban gürigia lun libihini ibagari magumuchaditi. Samina wamá luagu Adán tuma Ewa. Mafigountiña meha, lun gayara  lan meha heresibiruni ibagari magumuchaditi mosu meha gaganbadi hamá lun Heowá. Ma lirun aba lan meha maganbadi hamá lun Heowá (Rom. 5:12).

¹⁴ Kei le aubei warihei, danme le lagumuchun 1,000 irumu, sunme ha lúnbaña hawinwandun ubouagu mafigounhañame. Luéigiñebaña san lóubadina larúeihan Heowá sun gürigia mafigountiña ha? Ítara haba san hádangiñe gürigia ha kei Adán tuma Ewa, ha meha múaragunbaña lun Bungiu lau sun meha mafigoun hamá? Ida luba lounabún katei le?

15, 16. a) Ídaame gachansin hamá sun gürigia lun harufuduni úaragua hamá lun Heowá? b) Kaba ibihúa lárigiñe lagumuhóun óuchawaguni?

¹⁵ Ladaürüba Satanási luagu 1,000 irumu. Lídanme dan ligía siñabei leyeedun ni aban. Danme lagumuchun 1,000 irumu ábame lígirawagüdüniwa ani láluguba leyeeduniña gürigia mafigountiña. Lídanme lidaani óuchawaguni sunme gürigia gachansinbaña lun harufuduni ka lan úmagiñeñanu, ligíaba dan ligía lasubudirúniwa anhein luéigiñeñanu lubéi liri luma liricha Bungiu lun larúeihan (Aruf. 20:7-10). Según le lunbei hanúadiruni ítara luba lerederun hiri bürüwañu lun súnwandan tidan líburu to lánina ibagari.

¹⁶ Ñéinbaña hádangiñe gürigia mafigountiña —ibidiñeti woun átiribaña lan—ítara haba kei Adán tuma Ewa, máhabaña lun larúeihan Heowá. Kábati asusereda houn? Ariñagati Arufudúni 20:15: “Ha mabürüdünbaña iri tidan  líburu to lánina ibagari aba hagurún lidoun lagunu lauti watu gemeti”. Ítara luba, hagünrinchawaguba salufuritiña sunsuinagubei lun súnwandan. Gama lumoun, hiibe-agei gürigia mafigountiña magarabagunbaña luagu Bungiu danme le hásügürün lídangiñe lagumuhóun óuchawaguni. Labürüdǘwaba hiri lun súnwandan tidan líburu to lánina ibagari.

17. Ka ariñawagúbei lun Danieli luagu le lunbei lasuseredun lidan wadaani? (Danieli 12:4, 8-10)

¹⁷ Ma wagundan wasubudiruni sun le lunbei lasuseredun ámuñegü! Ruti giñe aban ánheli fiu ariñahani súdiniti lun Danieli luagu le lunbei lasuseredun lidan wadaani, luáguti lagumuchagüle “lagumuhóun dan” (aliiha huméi Danieli 12:4, 8-10; 2 Tim. 3:1-5). Ariñagati: “Saragubaña gürigia éibugutiña yagüroun yaroun áluaha laganwoundun hasubudin”. Ligíati gunfuranda habéi lubéi lumutuniña Bungiu profesía le tídanbei liliburun Danieli buidu. Ariñagayati ánheli ligía lanwoun le lunbei lasuseredun lidan lagumuchagüle lagumuhóun dan. Ariñagati: “Ha wuribabaña hasigiruba adaagua wuribani, úouga gunfuranda hamani le asuseredubei”.

18. Kaba asusereda yarafa madise houn salufuritiña?

¹⁸ Lidan wadaani mabeichuntiña wuribatiña luagu wuribani le hadügübei (Mal. 3:14, 15). Yarafa  madise laguseragüdübaña Hesusu gürigia ha ítarabaña kei gábara ani lafanreinragubaña hawéi gürigia ha ítarabaña kei mudún (Mat. 25:31-33). Hóunweguba gürigia ha salufuribaña lídanme óunwenbu asufuriruni ani máguyugunbaña lidan iseri ubóu. Úabei hiri tidan garüdia to ídanboun laritawagúa hawagu gürigia buítiña según le tariñagubei liliburun Malakíasi 3:16.

19. Ka lunbei wadügüni guentó, ani ka uagu? (Malakíasi 3:16-18).

¹⁹ Anihán dan lun warufuduni ua wamá hadan gürigia salufuritiña (aliiha huméi Malakíasi 3:16-18). Lóundaraguñanu Heowá ha lanügübaña kei lánigu o ha espechalibaña lun. Ma busentiwa lun hádangiñe wamá, adián?

20. Ka lagumuhóun füramasei adügǘbei lun Danieli, ani ka uagu busén hubéi lun lagunfulirun?

²⁰ Chóuruti wawinwanduña lan lidan dan súdiniti. Yarafa madise lasusereduba katei hanarimeburiti. Yarafaali weyu lun lagumuchun sun wuribani. Lárigiñe le, warihibei ida liña lan lagunfulirun füramasei le ladügübei Bungiu lun Danieli: “Lídanme lagumuhóun dan, básaaruba lun bibihini bafayeiruaha” (Dan. 12:13). Hayumahaña san lun lachülürün weyu lun lásaarun Danieli, hau sun hiduheñu lídangiñe óunweni? Anhein ítara liña lubéi, adüga huméi sun hiyaraati lun úaragua humá, ítara luba lerederun hiri bürüwañu tidan liliburun Heowá to lánina ibagari.