GONDO 40
‘Kukomba vathu nzila ya kululama’
“Vale va kombako vathu nzila ya kululama va na woninga ku nga tinyeleti, mbimo yotshe ni ha ku si gwitiko.”—DHAN. 12:3.
NDANDO 151 Txizimu txi na ta dhana
ATI HI NO TI GONDA *
1. Ngu tihi to tsakisa ti no ta maheka ngu mbimo ya Mfumo wa 1.000 ya malembe a Mfumo wa Kristu?
INAVA ditshiku do tsakisa mbimo ku no khatwa kuwuswa ava va nga fa ngu mbimo ya 1.000 wa malembe ya Mfumo wa Kristu. Votshe ava va nga felwa ngu maxaka awe va ti lava kutshumela ve va wona kambe. Jehovha nene a ti pfisa toneto. (Jobe 14:15) Alakanya litsako ali li no va ha mafuni kotshe mbimo yi ku no wuswa maxaka athu. Nga ha hi nga ti wona ngu kona ka gondo ayi yi nga pinda, “vo lulama” i ku va matina awe ma nga bhalwa ka dibhuku da wutomi va na tshumela ve “wukela kuya kuhanyani ko mbi guma.” (Mith. 24:15; Joh. 5:29) Ti nga maha ku tula ka maxaka athu ma na va ka va no khata vona ve wuswa. * Ava “vo mbi lulama” i ku va va nga mbi mana mkhanjo wo gonda ngu Jehovha mwendo ku mu thumela ngu kuthemba va si se fa va na “wukela kuya kusungwani,” ti wombako kuwukela kulamulwani.
2-3. a) Nga ha ti nga kombiswa ngu kona ka Isaya 11:9, 10, ngu dihi ditima di no maheka ngu mbimo ya Mfumo wa 1.000 wa malembe? b) Hi na bhula ngu txani?
2 Votshe ava va no wuswa ti na lava ve ta gondiswa. (Isaya 26:9; 61:11) Ngu toneto ku na ta va ni ditima da hombe do gondisa votshe va no wuswa. (Lera Isaya 11:9, 10.) Ngu kutxani, nguko ava vo mbi lulama ti na lava ve ta gonda ngu Jesu Kristu, lulamiselo ya Mfumo, mterulo, wukoma wa Jehovha ni ti to ngene dwe a fanelako kufuma. Hambi va vo lulama ti na lava ve ta txhamuselwa ati ti nga sala ti maheka msana ko va va di fite, ti patako ati Jehovha a nga sala e ti maha kasi ku hetisisa txikongomelo txakwe mayelano ni mafu. Vamwani ngu va va nga fa va di thembekile, kambe va fite na Bhiblia yi si se kubhalwa yotshe. Ngu toneto ava vo lulama ni va kwa mbi lulama ti na ta lava ve gonda to tala.
3 Ka gondo yiya hi na bhula ngu siwotiso siya si londiselako. Ngu tihi ati ti patekako ka ditima diya do gondisa? Ditima diya di na vhunisa kutxani vathu kasi ku matina awe ma ta maneka ma di bhatwe da magwito ka dibhuku da wutomi. Tixamulo ta siwotiso siya nda lisima kwathu nyamsi. Nga ha hi no ti wona kona, wuprofeti wumwani wo tsakisa wu ku ka dibhuku da Dhaniyeli ni da Mtuletelo wu na hi vhuna kutshukwatisa mapfisiselo athu mayelano ni ti ti no maheka ka va va no wuswa. Kukhata e bhule ngu simahakalo so tsakisa asi si nga wombwa ka Dhaniyeli 12:1, 2.
“VALE VA NGA OTELA HA MAFUNI VA NA WUKA”
4-5. Ngu tihi ati dibhuku da Dhaniyeli 12:1 di ti wombako mayelano ni timbimo ta magwito?
4 Lera Dhaniyeli 12:1. Dibhuku da Dhaniyeli di txhamusela simahakalo asi si no maheka ngu mbimo ya magwito. Ngu txikombiso dibhuku da Dhaniyeli 12:1 di womba-womba ngu Migeli i ku Jesu Kristu awu a “wuselwako vanana va ditiko dako.” Wuprofeti wonewo wu khatile kuhetiseka ngu 1914, mbimo yi Jesu a nga simekwa kota Mkoma wa Mfumo wa Txizimu.
5 Dhaniyeli a tshumete e profeta ti to Jesu a ndi na “humelela” ngu “mbimo ya kuxaniseka, ko mbi khala kuhumelela, kukhukhela ku nga va ni mfumo kala ka mbimo yile.” “Mbimo ya kuxaniseka” kuwombwa “kuxaniseka ka hombe” aku ku nga wombwa ka Matewu 24:21. Jesu a na humelela e emela vathu va Txizimu ngu magwito ka xanisa ya hombe ka yimbi ya Armagedhoni. Dibhuku da Mtuletelo di dhana vathu vonevo va no huluka kota “dibutho da hombe” i ku va va tako “ngu kuxanisekani ka hombe.”—Mtu. 7:9, 14.
6. Ngu tihi ati ti no maheka msana kova dibutho da hombe di di hulukile ka xanisa ya hombe? Txhamusela. (Wona “Tixamulo ta siwotiso sa vagondi” ka dona direvhista diya ti womba-wombako ngu kuwuswa ka vafi ha mafuni.)
6 Lera Dhaniyeli 12:2. Ngu tihi ti no maheka msana kova dibutho da hombe di di hulukile ka xanisa ya hombe? Wuprofeti wuwa kha wu wombi ngu kuwuswa ko fanekisela mwendo kuwuswa ngu didhawa da moya aku ku mahekako ka masiku ya magwito, nga ha hi nga txi tizivisa ngu kona. * Kambe mapswi yawa ma womba-womba ngu kuwuswa ka vakufa aku ku no maheka ka mafu a maphya. Makhatoni hi txi pfisisa to Dhaniyeli 12:2 a womba-womba ngu kuwuswa ko ya nzumani mwendo kuengetela ka mthumo wathu wo txhumayela msana kova wu di lavile ku emiswa ngu 1918. Hambi keto konkuwa hi pfisisa ti to mapswi yawa ma womba-womba ngu kuwuswa ka vakufa aku ku no maheka ka mafu a maphya. Kuwuswa kuwa ku na maheka msana ka Armagedhoni.
7. a) I ngu nzila muni vamwani va no wuselwa “ve yiswa ka wutomi wo mbi guma”? b) Ngu kutxani kuwuswa kuwa i di “ka tshuku”?
7 Dibhuku da Dhaniyeli 12:2 di lava kuwomba txani di txi khene “vamwani va na wukela ve yiswa ka wutomi wo mbi guma”? Ti womba ti to ngu mbimo ya 1.000 wa malembe, ava va no wuswa ve ta gonda ngu Jehovha mwendo ku simama ve mthumela, ni kutshumela ve engisa Jehovha ni Jesu va na mana wutomi wo mbi guma. (Joh. 17:3) Akuwa kuwuswa nga “nzila ya tshuku,” kuhambana ni kuwuswa ka vafi aku ku nga maheka ka timbimo ta Bhiblia. (Vaheb. 11:35) Ngu kutxani? Nguko vathu va nga wuswa ka timbimo ta Bhiblia va tshumete ve fa kambe.
8. I ngu nzila muni vamwani ka va va no wuswa “va no yiswa kueyiswani ni tinganani to mbi guma”?
8 Hi nga votshe ava va no wuswa va no tumela kugondiswa ngu Jehovha. Wuprofeti wa Dhaniyeli wu womba ti to vamwani ka va va no wuswa “va na yiswa ku kueyiswani ni tinganani to mbi guma.” Ava va no kombisa wu moya wa kuwukela Txizimu matina awe ma na mbi bhalwa ka dibhuku da wutomi vona va na mbi mana wutomi wu si gumiko. Hahanze keto vona va na yiswa “tinganani to mbi guma,” ti wombako ku loviswa da magwito. Se dibhuku da Dhaniyeli 12:2 di womba-womba ngu wuyelo ayi yi no manwa ngu va va no wuswa. Vona va na lamulwa ngu kuya ngu ti va no ti maha msana ko va di wusilwe. * (Mtu. 20:12) Vamwani va na mana wutomi wo mbi guma kambe vamwani kha va na mbi wu mana.
“KUKOMBA VATHU NZILA YA KULULAMA”
9-10. Ngu tihi timwani ti no maheka msana ka xanisa ya hombe, ni ku mba mani ava va no “phatima kufana ni kuphatima ka nzuma”?
9 Lera Dhaniyeli 12:3. Ngu tihi timwani ti no maheka msana ka mbimo “ya ku xaniseka”? Ku engetela ka ti Dhaniyeli 12:2 yi ti wombako, ndimana ya 3 yi womba-womba ngu timwani ati ti no maheka msana ka xanisa ya hombe.
10 Mba mani ava va no “phatima kufana ni kuphatima ka mzuma”? Hi nga mana xamulo ka mapswi ya Jesu a nga ma womba aya ma ku ka Matewu 13:43: “Se valulami va na phatima nga ditambo Mfumoni ka Tate wawe.” Ka mapswi yawa hi tumbula to Jesu a txi womba-womba “ngu vanana va Mfumo” i ku vasawuleki vakwe ava va no fuma ni nene Mfumoni wa Txizimu. (Mat. 13:38) Se ti hakubasani ti to Dhaniyeli 12:3 yi womba-womba ngu vasawuleki ni mthumo awu va no wu maha ngu mbimo ya 1.000 wa malembe.
Jesu a na ta thuma kumweko ni va va 144.000 ti to ve thangela ka ditima do gondisa ha mafuni kotshe ngu mbimo ya Mfumo wa 1.000 wa malembe (Wona paragrafu 11)
11-12. Ngu wuhi mthumo awu wu no mahwa ngu va va 144.000 kudingana 1.000 wa malembe?
11 I ngu nzila muni vasawuleki va no “komba vathu nzila ya kululama”? Vasawuleki va na thumisana kumweko ni Jesu Kristu kasi kukongomisa ditima do gondisa aha di no mahwa mafuni ku dingana 1.000 wa malembe. Ava va 144.000 kha va na mbi gwitela kufuma kota vakoma dwe va na tshumela ve thuma kota vaphaxeli. (Mtu. 1:6; 5:10; 20:6) Ngu toneto vona va na vhuneta ko “hanyisa mifumo,” kudotho-kudotho vathu votshe va na va vo hetiseka. (Mtu. 22:1, 2; Eze. 47:12) Li na va litsako la hombe ngutu ka vasawuleki!
12 Mba mani ava va no pateka ka vale va no kombwa nzila ya kululama? Ku na pateka ava va no wuswa ni va va no huluka ka yimbi ya Armagedhoni kumweko ni vanana ava ti nga mahako ve ya velekwa ka mafu a maphya. Ngu magwito ka 1.000 wa malembe votshe vathu va na va vo hetiseka. Se yi na va yihi mbimo a yiya matina awe ma no bhalwa da magwito ngu kaneta i singa ngu lapis ka dibhuku da wutomi?
TXIDUKO TXO GWITA
13-14. Ngu tihi a ti votshe vathu ava no va va di hawa mafuni ti no lava ve ta ti kombisa kasi ku amukela wutomi wo mbi guma?
13 Hi fanete hi khumbula ti to kuva m’thu a di hetisekile kha ti wombi ti to a na mana wutomi wo mbi guma. Alakanya ngu Adhamu ni Evha. Vona i ti vathu vo hetiseka, hambi keto ti lavile ku ve kombisa ti to va txi engisa Txizimu, i di kona va nga di no ningwa wutomi wo mbi guma. Kambe nga ha hi zivako ngu kona vona va tandekile kuengisa Jehovha.—Var. 5:12.
14 Msana ka Mfumo wa 1.000 wa malembe vathu va na va vo zumbisa kutxani? Votshe va na va i di vo hetiseka. Ina votshe vathu va na sikota kuseketela wukoma wa Jehovha, hambi ku va no va di hetisekile? Mwendo va na fana ni Adhamu ni Evha ava va nga tandeka kuengisa Jehovha hambi ku va nga ti hetisekile? Siwotiso siya sa xamulwa, ngu nzila muni?
15-16. a) I ngu mbimo muni votshe vathu va no mana mkhanjo wo kombisa ti to va thembekile ka Jehovha mwendo nem? b) Ngu yahi ma no va magwito ya txiduko txonetxo?
15 Sathani a na sungwa kudingana 1.000 wa malembe. Ka mbimo yoneyo ene kha na mbi sikota kuhambukisa vathu. Hambi keto ngu magwito ka 1.000 wa malembe Sathani a na txhatxwa. Ene a na zama kuhambukisa vathu vo hetiseka. Ka txiduko txonetxo votshe vathu va na va ni mkhanjo wo kombisa ti to vona va ema hani ka timhaka to emela Txizimu ni wukoma wa txona. (Mtu. 20:7-10) Nzila yi mmwani ni mmwani a no angula ngu yona ka siduko sa Sathani, ti na kombisa ti to ina ditina dakwe di na bhalwa da magwito ka dibhuku da wutomi mwendo nem.
16 Mtengo wo kari wa vathu wu na fana ni Adhamu ni Evha, wona wu na lamba wukoma wa Jehovha. Se ngu tihi ati ti no va humelela? Mtuletelo 20:15 a hi gela tiya: “Se avale va nga ti sa bhalwa dibhukuni ka wutomi va to vinzwa ni vona txizivani ka mndilo.” Ina, vathu vonevo va no wukela Jehovha va na loviswa da magwito. Kambe ku tala ka vathu vo hetiseka va na pasa ka txiduko txo gwita. Ngu toneto matina awe ma na bhalwa ngu kaneta ka dibhuku da wutomi.
NGU KA “MBIMO YO GWITA”
17. Ngu tihi ati Dhaniyeli a nga womba to ti di na maheka ka timbimo tathu? (Dhaniyeli 12:4, 8-10)
17 Ta tsakisa ngutu kualakanyisisa ngu ti ti no maheka ka mbimo yi yi tako. Hambi keto ngelozi yi tshumete yi gela Dhaniyeli timhaka timwani ta lisima mayelano ni timbimo ti hi hanyako ka tona, i ku timbimo “ta magwito.” (Lera Dhaniyeli 12:4, 8-10; 2 Tim. 3:1-5) Ngelozi yi gete tiya Dhaniyeli: “Wutxhari u na anda.” Ina, wuprofeti wu ku ka dibhuku diya wu ndi na pfisiswa kha kwati ngu vathu va Txizimu. Ngelozi yi tshumete yi engetela timwani mayelano ni timbimo toneto yona yi wombile tiya: “Vabihi va na simama ve maha wubihi, ni wammweyo wa vabihi kha na mbi ma pfisisa, aniko titxhari ti na ma pfisisa.”
18. Ngu tihi ati ti no maheka i singa kale ka vabihi?
18 Nyamsi ti nga woneka nga vabihi va maha kuranda ni ku kha va wonwi ngu m’thu. (Mal. 3:14, 15) Kambe Jesu i singa kale a na lamula votshe vabihi ava va fananiswako ni tiphongo e va hambanisa ka vo lulama ava va fananiswako ni tinvuta. (Mat. 25:31-33) Vabihi va na mba huluka ka xanisa ya hombe, nem va na mba ta wuswa ka mafu a maphya. Se matina awe ma na mbi bhalwa ka “dibhuku da syalakanyiso” adi di nga wombwa ka Malakiya 3:16.
19. Ayiya i mbimo yo hi maha txani, ngu kutxani? (Malakiya 3:16-18)
19 Ayiya i mbimo yo kombisa ti to athu kha hi lavi kuva ka vale va vabihi. (Lera Malakiya 3:16-18.) Jehovha a sengeleta vathu ava a va wonako kota “thomba yakwe.” Ngu ditshuri nanathu hi lava kupateka ka vathu va va lumbako thomba yakwe.
Ti na tsakisa ngutu ku ta wona Dhaniyeli, maxaka athu ni vamwani va txi wuka ka mafu a maphya! (Wona paragrafu 20)
20. Ngu txihi txithembiso txo gwitisa a txi Jehovha a nga mahela Dhaniyeli, ni ku ina awe u yi rinzete mbimo yi txi no hetiseka txithembiso txonetxo?
20 Ngu ditshuri athu hi hanya ka timbimo to tsakisa ngutu. Hambi keto ku ni to tsakisa ngutu ati ti no maheka mbimo yi tako. I singa kale hi na wona ku fuviswa ka wotshe wubihi. Msana keto hi na tshumela hi wona kuhetiseka ka txithembiso atxi Jehovha a nga mahela Dhaniyeli atxi txi ku: “U na humula kambe u na zumba ka dikato dako, ngu magwito ka masiku.” (Dhan. 12:13) Ina awe u yi rinzete mbimo yi Dhaniyeli kumweko ni maxaka ako ma no “zumba ka dikato” mwendo ku ta wuswa? I di toneto maha totshe ti u nga ti kotako kasi kusimama u di thembekile, u txi maha toneto u nga tsaniseka ti to ditina dako di na simama di ti bhatwe ka dibhuku da wutomi.
NDANDO 80 ‘Dukani mi wona to Jehovha mbwa mnene’
^ Gondo yiya yi na tshukwatisa mapfisiselo athu mayelano ni ditima do gondisa adi di nga txhamuselwa ka dibhuku da Dhaniyeli 12:2, 3. Hi na wona ti to atiya ti na maheka ditshiku ni ku mba mani va no pateka. Hi na tshumela hi wona ti to ditima diya di na lulamiselisa kutxani vathu ti to ve ta wonisana ni txiduko txo gwita msana ka Mfumo wa Kristu wa 1.000 wa malembe.
^ Kuwuswa ka vakufa ti nga maha ku ta khata ngu va va fako konkuwa, se ti tsimbila kudotho-kudotho kala wo gwita kuya msana. Ngako ti txi mahekisa tiya, liveleko limwani ni limwani li na ta va ni mkhanjo wo wuswa li ta tekela kumanana ni wu a nga hanya nayo, mwendo a nga mu ziva ngu hafuhi. Ti si nga ni mhaka ni ti ti no mahekisa tona, Bhiblia yi womba-womba ngu “m’thu ngu txikhati txakwe” yi txi womba ngu kuwuswa ka va va yako nzumani. Se hi nga pimisa ti to ava va no wuswela ku ta hanya ha mafuni ni vona mmwani ni mmwani a na ta wuswa ngu txikhati txakwe.—1 Vak. 14:33; 15:23.
^ Titxhamuselo tiya ti tshukwatisa mapfisiselo athu aya ma ku ka dibhuku di di ku Preste Atenção à Profecia de Daniel! kapitulo 17, ni ka A Sentinela ya 1 ka Julho wa 1987, paj. 21-25.
^ Mapswi ya ma ku “vo lulama” ni “va kwa mbi lulama” aya ma ku ka Mithumo 24:15 kumweko ni ya ma ku “ava va nga maha tatinene” ni “ava va nga maha to biha” ma ku ka Johani 5:29 ma womba mahanyelo aya ava va no wuswa va nga va navo na va si se fa.
