NSUNZO 40
‘Wattukulela Attu Enjene Muliganani’
“Abale vina àlelile athu enjene muliganani, anere ozerimela ninga vineneri okala n’okala-wene.”—DAN. 12:3.
JIBO 151 Nabuya Onele Wawittana
DHINASUNZE IYO *
1. Mapadduwo gani anjedhihu wakwanihedheya mwari mwa Olamulela wa Vyaka Txikwi?
AMARAFULA agaroma ovenyihiwa mukwani, mwari mwa Olamulela wa Kristu wa Vyaka Txikwi onakale mudhidhi wowagalaliha vaddiddi! Otene ayelelile amudhawa mukwani anele wawona wili. Eji enele omwagalaliha Yehova. (Job 14:15) Karoma wubuwela wagalala onakane attu otene velaboni ya vati agaroma wawona amudhawa avenyihiwaga mukwani. Ninga monilihu nsunzo nivirile, ‘aligani’ alebiwe mazina awa munivuruni na egumi anele ‘ovenyihiwa mukwani wi akaane egumi.’ (Mer. 24:15; Jo. 5:29) Enoneya ninga mohigonela amarafula enji anele ovenyihiwa mukwani omagomo wa koddo ya Armagedon. * Ottiya ejo ‘ahiligani’ ahana gari yomulabela Yehova nororomeleya mpaka okwa wawa, anele ‘ovenyihiwa mukwani wi attongiwe.’
2-3. (a) Ninga munlagiha Izaiya 11:9, 10, porogarama gani enakosiwe mwilaboni mwetemwene ehinattigi opadduwa? (b) Txini enasekeserhihu mwari mwa nsunzo ntti?
2 Otene abale anavenyihiwe mukwani enele ofuneya wi asunze. (Iza. 26:9; 61:11) Nona enele witiwa porogarama enddimuwa ya masunziho enakosiwe mwilaboni mwetemwene ehinattigi opadduwaga. (Kengesa Izaiya 11:9, 10.) Sabwaya? Sabwa ya dhilobo dhinjene; ahiligani anavenyihiwe mukwani enele ofuneya wila asunzihiwe sabwa ya Yezu Kristu, Omwene wa Mulugu, yobolo, ttima ya nzina na Yehova vina sabwa enoniha wi Yehova ddinfwanyelela olamulela. Ottiya ejo enele ofuneya wi aligani adhowevi asunzaga esile dhinavitulege Yehova vangono-vangono dhiniwanana na efunelo yaye na elabo ya vati. Mwa emeleli abo ororomeleya enaya akwile Bibilia ahinatti olebiwa wetene. Makuru omeli aligani na ahiligani anele odhowavi asunzaga venjene.
3 Mwari mwa nsunzo ntti, ninele osekeserha mavuzo aba: Porogarama eji enakosiwe mwilaboni mwetemwene eneddihiwe dhavi? Enapatte dhavi attu alebiwe mazina awa munivuruni na egumi? Yowakula ya mavuzo aba enofwanyela okala yamakamaka vaddiddi wa iyo masaka abano. Ninga munonelihu, mavuhulo mena otikiniha anfwanyeya munivuruni na Daniyel vina na Ovuhulela anele onikamihedha okana eziwelo yononeleyamo sabwa ya ejile enapadduwe amarafula agavenyihiwa. Ovano ndowe nisekeserhe mavuhulo otikiniha a nivuru na Daniyel 12:1, 2.
“ATHU ENJENE ANGONA VATI VA MATTAKA . . . ANERE OVENYA”
4-5. Txini evuhuleli Daniyel 12:1 sabwa ya nsaka nomariha?
4 Kengesa Daniyel 12:1. Nivuru na Daniyel ninovuhulela mapadduwo otikiniha anereye mwari mwa nsaka nomariha. Motagiha, Daniyel 12:1 onovuhulela wi Migeli, oli Yezu Kristu, onowimelela ‘ovuna nlogo na Mulugu.’ Mpaddi wa nivuhulo ntti niromile wakwanihedheya yaka ya 1914 vattomiwe Yezu wirimu ninga Mwene wa Omwene wa Mulugu.
5 Daniyel vina onologa wi Yezu, onele ovenya mudhidhi wa ‘nsaka nowawa’ nihinatti okalagawo ‘oromana vetiwe malogo a attu mpaka vanapadduwe esodha.’ ‘Nsaka ntti nowawa’ ji “goyi enddimuwa” enlogiwa va Mateu 24:21. Nsakanene ntto Yezu onele ovenya obe onele ovuna nlogo na Mulugu, omagomo wa nsaka ntto nowawa onaddiwana mudhidhi wa Armagedon. Nivuru na Ovuhulela nintonya muttitti munddimuwa wa ‘abale avirile mmasosoni manddimuwa.’—Ovuh. 7:9, 14.
6. Txini enapadduwe muttitti munddimuwa ogaviluwa vagoyini enddimuwa? Katapulela. (Koona vina mu revista ntti “Mavuzo Ankosa Anamengesa” anavenyihiwe mukwani velaboni ya vati.)
6 Kengesa Daniyel 12:2. Txini enapadduwe muttitti munddimuwa ogaviluwa mugoyini enddimuwa? Nivuhulo ntti kaninloga ovenyihiwa mukwani wa nladdaniho nne ovenyihiwa wa alabeli a Yehova anadhowe wirimu masaka omariha, dhahene ninga mwanonelamo iyo wale. * Ottiya ejo, mazu aba antonya ovenyihiwa wa amarafula anakale mwilaboni eswa. Txini ennittukulela ologa dhahene? Nzu ntti “vamathakani” ttakene nilabihedhiwe va Job 17:16 nintonya mazu oladdana “Masiye.” Sabwa ya nzu ntti vamattakani okana yotapulela yakene na masiye Daniyel 12:2 ontonya ovenyihiwa mukwani onapadduwe omagomo wa masaka vina koddo ya Armagedon.
7. (a) Ena anavenyihedhiwe dhavi ‘okalawo namukalakala’? (b) Ovenyihiwa oku onakalele nni ‘wamakamaka’ opitta okule wawale?
7 Txini entapulela mazu a Daniyel 12:2 anloga wi ena anele ovenyihiwa wi akene ‘egumi yohimala’? Eji entapulela wi mwari mwa vyika 1.000, abale anavenyihiwe anele odhowavi amuziwaga vina amwiwelelaga Yehova na Yezu, omamalelowa anele wakela egumi yohimala. (Jo. 17:3) Ovenyihiwa oku onakale wamukalakala ‘opitta wa attu abale avenyihiwe’ nsaka na wale. (Aheb. 11:35) Sabwaya? Sabwani attu abale avenyihiwe mukwani nsaka na wale akwa wili.
8. Ena anavenyihiwe dhavi wila afwanyiwe ‘okoneya vina manyazo ohimala’?
8 Kahiye otene anavenyihiwe mukwani anarumele porogarama a masunziho a Yehova. Nivuhulo na Daniyel ninologa wi ena anele ovenyihiwa wi afwanye ‘okoneya na manyazo ohimala.’ Sabwani mweddelo wawa onele woniha wi addiyamaru mazina awa kanalebiwe munivuruni na egumi vina kanakele egumi yohimala. Ottiya ejo anele ofwanya ‘okoneya na manyazo ohimala’ obe otolotxiwa. Nona Daniyel 12:2 onloga dhinapadduwele abale otene anavenyihiwe mukwani, mowiwanana na esile dhinakosani agamala ovenyihiwa. * (Ovuh. 20:12) Ena anele wakela egumi yohimala ena kanakele.
‘WATTUKULELA ATTU ENJENE MULIGANANI’
9-10. Txini enapadduwe goi enddimuwa egavira, vina ‘bani anazerimele ninga vineneri okala n’okala-wene’?
9 Kengesa Daniyel 12:3. Elobo gani yina enapadduwe “goyi enddimuwa” egavira? Daniyel 12:2, enologa elobo yina versu 3 enologa elobo enapadduwe goi enddimuwa egavira.
10 Bani ‘onazerimele ninga dhineneri okala n’okala-wene’? Ninofwanya yowakulaya na mazu a Yezu anfwanyeya va Mateu 13:43: “Nsakantto aligani anele ong’animela ninga nzuwa, Mumweneni mwa Babawa.” Mazu anfwanyeya versu eji Yezu wawaddana, “ana a Omwene” abalaye ottikitteliwa analamulele na iyene Mumweneni wa wirimu. (Mt. 13:38) Nona Daniyel 12:3 onatonya attikitteliwi vina mabasa anakosani mwari mwa Olamulela wa Vyaka Txikwi.
Attikitteliwi 144.000 anele olamulela vamodha na Yezu Kristu wi asogorhele mabasa a osunziha anakosiwe mwari mwa vyaka 1.000 (Kang’ana ddima 11)
11-12. Mabasa gani anakose attikitteliwi 144.000 mwari mwa vyaka 1.000?
11 Attikitteliwi anattukulele dhavi “enjene muliganani”? Awene anele olaba na Yezu wi asogorhele porogarama ya osunziha enakosiwe velaboni ya vati mwari mwa vyaka 1.000. Attikitteliwi 144.000 anele olamulela ninga amwene vina anele olaba ninga anamakutta. (Ovuh. 1:6; 5:10; 20:6) Awene vina anele wavulumutxa attu a “malogo otene,”—vangono-vangono anele wattukulela attu otene wuliganani. (Ovuh. 22:1, 2; Ezek. 47:12) Attikitteliwi anele wagalala venjene!
12 Bani anakale mumodhani na “enjene” anattukuleliwe muliganani? Babale anavenyihiwe mukwani na abale anaviluwe mukoddoni ya Armagedon vina anabaliwe mwilaboni eswa. Omagomo wa vyaka 1.000 otene abale anakale velaboni ya vati anakale attu oligana. Oromana venevo mpaka musogorho mazina awa anele okalavi munivuruni na egumi balebiwe na tinta ottiya na lapi.
WEHIWA WOMARIHA
13-14. Attu otene oligana, anfwanyeela woniha eni ahinatti wakela egumi yohimala?
13 Niziweni wi muttu agakala owakwana eji kintapulela wi ohimala wakela egumi yohimala. Kobuwela epadduwile na Adamu na Eva. Awene ali attu owakwana mbwenye yanfuneya woniha omwiwelela wawa Yehova Mulugu, ahinatti okuluveliwana egumi yamukalakala. Mokubanyiha-mwene, awene kamwiweleli.—Rom. 5:12.
14 Omagomo wa vyaka 1.000 attu otene anakale velaboni ya vati anakale oligana. Attu abo otene oligana anele okamihedha olamulela wa Yehova okala n’okala-wene? Obe ena anakale ninga Adamu na Eva—ali attu oligana masiki dhawene amuttegeli Yehova? Mavuzo aba anofuneya yowakulaya, mbwenye anakuliwe dhavi?
15-16. (a) Mudhidhi gani onakane attu etene gari ya olagiha ororomeleya wawa wa Yehova? (b) Txini enapadduwe omagomo wa yoweha yomariha?
15 Satana onele ofugeliwa mwari mwa vyaka 1.000. Mudhidhi obu kanamunyengette muttu. Mbwenye omagomo wa vyaka 1.000 Satana onele ofuruliwa. Iyene onele otamela wanyengetta attu oligana. Mudhidhi onapadduwe yoweha ejo, attu otene oligana anakale velaboni ya vati anele okana gari yawoniha kakamwe akala anoriha nzina na Mulugu vina akala anokamihedha olamulela waye. (Ovuh. 20:7-10) Mukalelo onakulelani yoweha eji ya Satana enele woniha akala mazina awa anele olebiwa namukalakala munivuruni na egumi.
16 Muttengo wohiziweya wa attu, anele okala ninga Adamu na Eva, anele okodda olamulela wa Yehova. Txini enapadduwele? Ovuhulela 20:15 onnaddela dhahi: ‘Etene ahalebeliwe mazinawa munivuruni na attu eddilena egumi ya Mulugu, avokeliwa v’elalani ya motto.’ Addiyamaru otene anele otolotxiwa namukalakala. Mbwenye attu enjene oligana anele oviluwa yoweha eji yomariha. Mazinawa anele olebiwa na mukalakala munivuruni na egumi.
“OMAGOMELO WA MASAKA”
17. Txini yaddeliwe Daniyel na anju egapadduwile nsaka nttino? (Daniyel 12:4, 8-10)
17 Iyo ninotikina nigobuwela sabwa ya mapadduwo aba anereye musogorho! Mbwenye, Daniyel vina owakela miselu dha makamaka na anju esuwene dhigapadduwile mudhidhene obu onkalihu, “omagomelo wa masaka.” (Kengesa Daniyel 12:4, 8-10; 2 Tim. 3:1-5) Anju ohimwaddela dhahi Daniyel: ‘Eziwelo ya ebaribari enele winjiva.’ Ndde, nlogo na Mulugu ttiganonelimo mowakwana-mwene mazu ovuhulela a nivuru ntti. Anju wahenjedhedha wi omagomelo wa masaka ‘attu otakala murima elege okosavi dhilobo dhabure ne mmodha wa awene kagawodhile ononelamo esidha.’
18. Txini enapadduwele attu otakala murima mohigonela?
18 Masaka abano enkala ninga attu otakala murima kantxinutxiwa saba ya mweddelo wawa wabure. (Mal. 3:14, 15) Mbwenye mohigonela Yezu onele wattonga attu ali ninga mbuzi vina onele wattiyaniha na abale ali ninga mabila. (Mt. 25:31-33) Attu otakala murima kanaviluwe va goyini enddimuwa vina kanavenyihiwe mukwani wila akale mwilaboni eswa. Mazina mena kanalebiwe ‘munivuruni na wubuweliwa’ ninlogiwa va Malakiya 3:16.
19. Obu mudhidhi wa okosa eni nanda sabwaya jani? (Malakiya 3:16-18)
19 Obu mudhidhi wa woniha wi kaninkosa mpaddi wa attu abure. (Kengesa Malakiya 3:16-18.) Yehova onodhowavi ataganyihaga attu a nlogo naye obe ‘attu anawoona iyene wi battima.’ Txibarene iyo ninofuna okala vamodha na awene.
Wagalala gani onakaanihu omona Daniyel, amudhihu akwile, na ena enjene ‘avenyihiwaga’ wi akale mwilaboni eswa! (Kang’ana ddima 20)
20. Nipikirhelo gani nomariha nikoseliwe Daniyel, nanda weyo onjedhela nni wakwanihedheya wa nipikirhelo ntti?
20 Txibarene ninkala mudhidhi wotikiniha. Mbwenye dhittabwile otikiniha si dhilobo dhinapadduwe mohigonela. Iyo ninele wona otolotxiwa wa attu otene abure. Vasogorhova, ninele wona wakwanihedheya wa nipikirhelo na Yehova ninfwanyeya va Daniyel ninloga dhahi: “Weyo dhowá wavume; onere ovenyela othuviwa omagomelo wa masaka.” (Dan. 12:13) Weyo onojeedhela mudhidhi ‘onavenyihiwe’ Daniyel, vamodha na amudhawo anakweliwe? Akala pumwenemo obu mudhidhi onfwanyeliwe olibiha nroromelo vina okane ebaribari wi mazina awa anele olebiwa namukalakala munivuruni na Yehova na egumi.
JIBO 80 ‘Pimani Moone Opama wa Yehova’
^ Nsunzo ntti ninele ononihedhamo mowakwana-mwene porogarama ya masunziho, anakosiwe elabo yotene anlogiwa va Daniyel 12:2, 3. Ninele osekeserha mudhidhi onapadduwe masunzo aba vina abale anakose mpaddi. Ninele wona vina wi porogarama eji ya masunziho enele wakamihedha abale anakale velaboni ya vati ovisasanyedhela wehiwa womariha omagomo wa Olamulela wa Kristu wa Vyaka Txikwi.
^ Enoneya ninga, anarome ovenyihiwa mukwani babale akwile ororomeleyene mwari mwa masaka omariha, oromana venevo mpaka musogorho anavenyihiwege ziza-ziza. Akala enapadduwe dhahene, ziza-ziza ninele okana gari yowawakela abale anaziwani. Kintanala mukalelo onapadduwani, Bibilia onloga dhahi wa abale anavenyihiwe wi adhowe wirimu, Mulugu ‘kanrumela ogudulana’ nona nikane ebaribari wi ovenyihiwa wa abale anakale velaboni ya vati onapadduwe na mukalelo wosasanyedheya kavanakale magudulano.—1 Kor. 14:33; 15:23.
^ Ononihedhiwamo oku onofwanyeya munivuruni Preste Atenção a Profecia de Daniel! kapitulu 17, vina A Sentinela 1 de Julho, 1987, makuku 21-25.
^ Mottiyana na mazu aba ‘aligani’ vina ‘ahiligani’ anfwanyeya va Merelo 24:15 na mazu aba “erile dhapama” vina “erile dhabure” anfwanyeya va Joau 5:29 antonya merelo eddilena abale anavenyihwe mukwani nsaka nikalilaniwo ahinatti okwa.
