Cawn Awk Capar 40
‘Lamding Ah Mizapi Kha An Hruai Hna’
“Lamding ah mizapi a hruaitu hna cu zungzal in zungzal tiang arfi [bantukin an ceu lai].”—DAN. 12:3.
HLA 151 A Auh Hna Lai
LANGHTERNAK *
1. Kum Thongkhat Uknak chungah zei bantuk lung cawlcangh awk ngai a simi thil dah a cang lai?
KHRIH Kum Thongkhat Uknak chungah hi vawleicung ah thawhṭhannak aa thawk tikah zeitluk in dah a nuamh lai! Dawtmi nih thihtaknak a tongmi hna nih anmah he i ton ṭhan lai kha an i ngaih tuk. Jehovah zong cutin a si ve. (Job 14:15) An dawtmi a tho ṭhanmi hna he an i ton tikah zeitluk in dah an i nuamh lai ti khi na mitthlam ah cuanter hmanh. A hmasa capar ah kan i ruah cang bantukin nunnak cauk ah an min khumh a simi “miṭha” mi hna cu “an tho lai i an nung lai.” (Lam. 24:15; Johan 5:29) Kan dawtmi mi tampi cu Armageddon hnu tlawmpal i a tho ṭhanmi hna lakah an i tel ve men lai. * Cun an thih hlanah Jehovah kong cawn awkah asiloah zumhfek tein biak awkah caanṭha a za in a hmu lomi “miṭhalo” mi hna cu “an tho ve lai i sualphawt an si lai.”
2-3. (a) Isaiah 11:9, 10 ningin minung tuanbia ah a ngan bikmi fimcawnnak program ah zeidah cawnpiak a si lai, zeicah? (b) Hi capar ah zei kong dah kan i ruah hna lai?
2 A tho ṭhanmi vialte nih lamhruainak an herh lai. (Isa. 26:9; 61:11) Cucaah minung tuanbia ah a ngan bikmi fimcawnnak program cu liim a hau lai. (Isaiah 11:9, 10 rel.) Zeicah? A ruang pakhat cu a tho ṭhanmi miṭhalo pawl nih Jesuh Khrih, Pathian Pennak, tlanhnak man, Jehovah min a biapitnak kong le Pathian lawng nih uknak nawl a ngeihnak kong hna kha an cawn a hau lai. Jehovah nih vawlei ca i aa tinhnak kong kha duhsah duhsah in a phuan caah hmanung bik kong hna kha miṭha pawl hmanh nih an cawn a hau lai. Zumhfekmi cheukhat cu Jehovah Bia, Baibal liim a rak si hlanpi in an rak thi cang. Cucaah miṭha he, miṭhalo he tampi an cawn a hau lai.
3 Hi capar ah mah biahalnak hna hi kan i ruah lai: Mah a nganmi cawnpiaknak program cu zeitindah liim a si lai? Nunnak cauk ah a zungzal in an min ṭial a si lai maw, a si lai lo timi kongah mah program cu zeitindah huham a ngeih lai? Mah biahalnak hna i a phi cu tuchan kan caah a biapi tukmi a si. Daniel le Biathlam Baibal cauk i khuaruahhar a simi chimchungbia cheukhat nih mithi pawl an thawh ṭhan tikah a cang dingmi kong kha fiang tein hngalhthiam awkah a kan bawmh lai. Pakhatnak ah, Daniel 12:1, 2 i chimchungbia kong kha zohhmanh hna u sih.
‘Leidip Chungah A Itmi Hna Cu An Hun I Ṭhang Lai’
4-5. Daniel 12:1 nih donghnak caan kong he aa tlaiin zeidah a phuan?
4 Daniel 12:1 rel. Daniel Baibal cauk nih donghnak caan chungah aa changchang in a cang dingmi khuaruahhar thil kong kha a langhter. Tahchunhnak ah, Daniel 12:1 ah Jesuh Khrih a simi “[Pathian] miphun a zohkhenhtu hna Mikhael kha a hung chuak lai” tiah a ti. Mah chimchungbia cu 1914 ah Pathian vancung Pennak Siangpahrang in Jesuh rian pek a si tikah a rak tling.
5 “Hi miphun nih miphun an si hramthawk in an tonmi harnak, harnak ṭhalo bik” a tlun lio caan ah Jesuh cu “a hung chuak lai” tiah Daniel cu chimh a si. “Harnak ṭhalo bik” timi cu Matthai 24:21 ah langhtermi “harnak” nganpi kha a si. Harnak ṭhalo bik a dongh caan a simi Armageddon ah Jesuh cu a hung chuak lai asiloah Pathian miphun kha a huhphenh hna lai. Biathlam cauk nih mah Pathian miphun kha “hremnak nganpi a ingmi” mibu nganpi in a langhter.—Biat. 7:9, 14.
6. Harnak nganpi in mibu nganpi an luat hnuah zeidah a cang lai? Fianter. (Vawleicung thawhṭhannak kong he aa tlaimi “Careltu Hna Sinin Biahalnak” timi capar zong zoh.)
6 Daniel 12:2 rel. Harnak ṭhalo bik caan in mibu nganpi an luat hnuah zeidah a cang lai? A hmasa kan rak hngalhthiam ning bantukin mah chimchungbia nih donghnak caan chungah a cang dingmi Pathian salle i thlaraulei an nun ṭhanmi, langhternak thawhṭhannak kha a chim duhmi a si lo. * Mah canah a ra laimi vawlei thar ah mithi an thawh ṭhan lainak kong kha a chim duhmi a si. Zeicah cutin kan chim khawh? Daniel 12:2 ah a hmanmi “leidip” timi biafang kha Job 17:16 ah “Sheol” tiah a leh. Mah nih mithi pawl an umnak hmun kha a langhter. Daniel 12:2 nih ni hmanung bik caan a dongh hnu le Armageddon raltuknak a dih hnuah a cang dingmi thawhṭhannak taktak kong a chim duhmi a si ti kha mah nih a langhter.
7. (a) Mi cheukhat cu zeiti lam in dah “zungzal nunnak” ah an thawh ṭhan lai? (b) “A ṭha deuhmi” thawhṭhannak cu zeitindah a si lai?
7 Daniel 12:2 nih mi cheukhat cu “zungzal nunnak” hmuh awkah an tho ṭhan lai tiah a ti tikah zeidah a chim duhmi a si? Kum 1,000 chungah a tho ṭhan i Jehovah le Jesuh kong a hun hngalmi asiloah a hngal pengmi le a nawl a ngaimi hna cu zungzal nunnak an hmu lai tinak a si. (Johan 17:3) Mah cu a hlanah a rak tho ṭhanmi hna thawhṭhannak nakin “a ṭha deuhmi” thawhṭhannak a si lai. (Heb. 11:35) Zeicah? Mah mitlinglo mi hna cu an thih ṭhan caah a si.
8. Mi cheukhat cu zeitindah ‘zungzal huatnak le ningzahnak chungah an hun i hlauh lai’?
8 Asinain Jehovah timhtuahpiakmi fimcawnnak program kha a tho ṭhanmi dihlak in cun an cohlang dih lai lo. Daniel chimchungbia nih “a cheu cu zungzal huatnak le ningzahnak chungah an hun i hlau lai” tiah a ti. Ralchanh duhnak lungput an ngeih kha an langhter lai caah nunnak cauk ah an min ṭial a si lai lo i zungzal nunnak zong an hmu lai lo. Mah canah ‘zungzal ningzahnak’ an huah lai asiloah hrawh an si lai. Cucaah an thawh ṭhan hnuah an tuahmi thil cungah i hngat in hmanung bik an ton laimi kong kha Daniel 12:2 nih a langhtermi a si. * (Biat. 20:12) Mi cheukhat nih zungzal nunnak an hmu lai i cheukhat nih cun an hmu lai lo.
‘Lamding Ah Mizapi Kha An Hruai Hna’
9-10. Harnak nganpi hnuah zeidah a cang rih lai, ahote dah “van i arfi ceu bantukin an ceu lai”?
9 Daniel 12:3 rel. A ra dingmi “harnak ṭhalo bik” caan hnuah zeidah a cang rih lai? Daniel 12:2 lengah caang 3nak nih harnak nganpi hnuah a cang dingmi thil pakhat kha a langhter.
10 Ahote dah “van i arfi ceu bantukin an ceu lai”? Matthai 13:43 i Jesuh chimmi bia nih a phi hngalh awkah a kan bawmh lai. Hitin a ti: “Pathian mi hna cu an Pa Pennak chungah ni bangin an ceu lai.” Jesuh nih vancung Pennak ah amah he rian a ṭuan dingmi, chiti thuhmi “Pennak chung i a ummi” hna kong kha a rak chim. (Matt. 13:38) Cucaah Daniel 12:3 nih chiti thuhmi le Kum Thongkhat Uknak chungah an ṭuan dingmi rian kong kha a chim duhmi a si lai.
144,000 cu kum 1,000 chungah ṭuan dingmi fimcawnnak rian tlangtlak awkah Jesuh Khrih he naih tein rian an ṭuanṭi lai (Catlangbu 11 zoh)
11-12. Kum 1,000 chungah 144,000 nih zei rian dah an ṭuan lai?
11 Chiti thuhmi hna nih zeitindah ‘lamding ah mizapi kha an hruai’ hna lai? Chiti thuhmi hna nih kum 1,000 chungah vawleicung ah ṭuan dingmi cawnpiaknak program kha tlangtlak dingin Jesuh Khrih he naih tein rian an ṭuanṭi lai. 144,000 cu siangpahrang rian lawng si loin tlangbawi rian zong an ṭuan lai. (Biat. 1:6; 5:10; 20:6) Cucaah annih nih “miphun vialte hna damnak”—mi pawl duhsah duhsah in mitling an si ṭhan nakhnga an bawmh lai. (Biat. 22:1, 2; Ezek. 47:12) Mah cu chiti thuhmi hna caah zeitluk lunglawmh awk dah a si lai!
12 Lamding ah hruai a simi “mizapi” lakah ahote dah an i tel lai? A tho ṭhanmi hna le Armageddon in a luatmi hna, cun vawlei thar ah hrin a simi an fale zong an i tel lai. Kum 1,000 a dih tikah vawleicung ah a ummi vialte cu mitling an si cang lai. Cucaah nunnak cauk ah an min kha khedan in si loin zungzal in a taan nakhnga cahang in zeitik ah dah ṭial a si lai?
Hmanung Bik Hneksaknak
13-14. Vawleicung ah a ummi mitling a simi hna nih zungzal nunnak an hmuh hlanah zeidah an langhter a hauh lai?
13 Mitling sinak timi cu mi pakhat nih zeihmanh tuah loin zungzal nunnak a hmuh lai tinak a si lo ti kha kan i cinken awk a si. Adam le Evi kong kha ruathmanh. Annih cu mitling an si ko nain zungzal nunnak an hmuh hlan tiang Jehovah Pathian nawl an ngaih kha an langhter a hau. Asinain ngaihchiat awk ngai a simi cu Pathian nawl kha an rak ngai lo.—Rom 5:12.
14 Kum 1,000 a dongh hnuah vawleicung ah zeidah a cang lai? Kan dihlak in mitling kan si cang lai. Mitling a simi vialte nih Jehovah uknak kha a zungzal in tling tein an bawm lai maw? Asiloah cheukhat cu mitling an si ko nain zumhfek tein a um lomi Adam le Evi bantuk dah an si lai? Mah biahalnak hna i a phi kha kan hngalh a hau, asinain zeitin in dah?
15-16. (a) Mi vialte nih Jehovah cungah an zumhfehnak langhternak caanṭha kha zeitik ah dah an hmuh lai? (b) Mah hneksaknak i hmanung bik a phichuak cu zeidah a si lai?
15 Satan cu kum 1,000 chung thong thlak a si lai. Mah caan chungah ahohmanh a hleng kho hna lai lo. Asinain kum 1,000 a dih tikah Satan cu chuah a si ṭhan lai. Mah tikah a tlingmi minung pawl kha hlen khawh awkah aa zuam ṭhan lai. Mah hneksaknak caan chungah vawleicung i mitling mi vialte nih Pathian min an upat le a uknak an bawmh kha fiang tein langhternak caanṭha an hmu lai. (Biat. 20:7-10) Pakhat cio nih Satan tukforhnak an lehrulh ningin an min cu nunnak cauk chungah a zungzal in ṭial a si lai maw, a si lai lo ti kha bia a khiah lai.
16 Mi cheukhat cu Adam le Evi bantukin zumhfek tein an um lai lo i Jehovah uknak kha an cohlang duh lai lo tiah Baibal nih a ti. Annih nih zeidah an ton lai? Biathlam 20:15 ah hitin a ti: “Nunnak cauk chungah an min aa ṭial lomi paoh cu mei tili chungah cun an paih hna.” Mah ralchanhtu hna cu zungzal in hrawh dih cikcek an si lai. Asinain a tlingmi mi tampi cu hmanung bik hneksaknak in an luat lai. Mah tikah an min cu nunnak cauk ah zungzal ca in ṭial a si lai.
“Donghnak Caan”Chungah
17. Vancungmi nih Daniel kha kan chan ah a cang dingmi kong he aa tlaiin zeidah a chimh? (Daniel 12:4, 8-10)
17 Hmailei ah a cang dingmi kong ruahnak nih lung a cawlcanghter tuk! Daniel zong nih vancungmi pakhat sinin “donghnak caan” a simi kan caan kong he aa tlaiin a biapi tukmi a konglam cheukhat kha a rak hmuh. (Daniel 12:4, NW, 8-10 rel; 2 Tim. 3:1-5) * Vancungmi nih Daniel kha “a hmaanmi hngalhnak cu a karh lai” tiah a ti. Pathian miphun nih mah chimchungbia hna kha fiang tein an hun hngalhthiam lai. Vancungmi nih mah caan chungah “miṭhalo hna nih cun an hngal lai lo i ṭhatlonak kha an tuah lengmang ko lai” tiah a ti chap.
18. A rauhhlan ah miṭhalo pawl nih zeidah an ton cang lai?
18 Tuchan ah miṭhalo pawl cu an tuahmi ṭhatlonak ruangah dantat an si lomi a lo. (Mal. 3:14, 15) Asinain Jesuh nih a rauhhlan ah meheh bantuk a simi kha bia a ceih hna lai i tuu bantuk a simi hna sinin a ṭhen cang hna lai. (Matt. 25:31-33) Mah miṭhalo pawl cu harnak nganpi in an luat lai lo i vawlei thar zongah an tho ṭhan lai lo. Malakhi 3:16 ah langhtermi Pathian “hmaika i cazin chungah” an min cu khumh a si lai lo.
19. Atu hi zei tuah caan dah a si, zeicah? (Malakhi 3:16-18)
19 Miṭhalo mi lakah kan i tel lo ti langhter khawhnak caanṭha cu atu caan hi a si. (Malakhi 3:16-18 rel.) Jehovah nih amah ‘a ta’ in asiloah a rothil in a hmuhmi hna kha a pumhkhawmh hna. Mah lakah tel kan duh lai ti cu a fiang ko.
Daniel, kan dawtmi hna le mi tampi nih vawlei thar i an covo hmuh awkah an ‘thawh’ ṭhan laimi hmuh cu zeitluk in dah lung cawlcangh awk a si lai! (Catlangbu 20 zoh)
20. Daniel sinah pekmi hmanung bik biakamnak cu zeidah a si, zeicah mah biakam a tlin lai kha naa ngaih?
20 Lung cawlcangh awk ngai a simi caan ah kan nung ti cu a hmaan ko. Asinain a rauhhlan ah mah nakin khuaruahhar deuh a simi thil hna a cang lai. Ṭhatlonak vialte hrawh a simi kha a rauhhlan ah kan hmuh cang lai. Cun Daniel sin Jehovah biakam a tlinmi zong kan hmuh lai. Hitin a ti: “Chan donghnak caan ah na hmuh awk hnga kha co awkah nang cu na tho te lai.” (Dan. 12:13) Daniel i telin na dawtmi a thimi hna an ‘thawh’ ṭhan lai caan kha naa ngaih maw? Naa ngaih ahcun zumhfek tein um khawh awkah atu tein fakpi in i zuam. Cutin na tuah ahcun Jehovah i nunnak cauk chungah na min a um peng lai ti kha na zumh khawh.
HLA 80 Jehovah A Ṭhatzia Kha Tep U
^ Hi capar ah Daniel 12:2, 3 ah langhtermi a nganmi fimcawnnak program kong he aa tlaiin kan hngalhthiamnak remh a sinak kong a langhter. Mah cu zeitik ah dah a si lai i ahodah aa tel lai timi kong kan i ruah lai. Cun Khrih Kum Thongkhat Uknak a donghnak i hmanung bik hneksaknak caah vawleicung mi hna ca i fimcawnnak program timhtuah a si ning kong zong kan i ruah hna lai.
^ Thawhṭhannak cu donghnak caan chungah zumhfek tein a thimi hna in aa thawk men lai. Cun anmah hlanah a rak nungmi, chankhat hnu chankhat in an tho ṭhan men lai. Cutin a si ahcun chankhat cio ah a nungmi nih an theihhngalhmi hna don khawhnak caanṭhan an hmu lai. Zeitin a si hmanhah Baibal nih vancung thawhṭhannak kong he aa tlaiin a chimmi ah “ningcang tein” a si lai tiah a ti caah vawleicung thawhṭhannak zong ningcang tein a si ve lai tiah kan zumh khawh.—1 Kor. 14:33; 15:23.
^ Mah fianternak cu Daniel Chimchungbia Cauk [Myanmar], ṭhen 17 le 1987, July 1, Vennak Innsang [English], cc. 21-25 ah langhtermi hngalhthiamnak remhmi a si.
^ Mah he i ralkah in Lamkaltu 24:15 i “miṭha” le “miṭhalo” timi biafang le Johan 5:29 i “ṭhatnak a tuahmi” le “ṭhatlonak a tuahmi” timi biafang nih an thih hlanah an rak tuahmi kha a langhtermi a si.
^ Daniel 12:4 (NW): “Sihmanhsehlaw Daniel, hi bia cu biathli ah chia hna law donghnak caan a phak hlan tiang cauk cu phit ko. Mi tampi nih mah cauk kha ṭha tein an hlathlai lai i a hmaanmi hngalhnak cu a karh lai,” tiah a ti.
