1. ¿Kʼãrẽ nebiata berabarita jʉ̃ãpanʉ Jesuba 1.000 poagabayeda zokʼabʉrʉde?

 KʼÃRẼABA yibia bʼai Jesukristoba 1.000 poagabayeda zokʼanʉmʉne ẽbẽrarã jẽda piradrʉira. Ẽbẽra jõmaʉ̃ba jẽda ũdukĩrãbʉ ãyi mebẽrã beidara, Jeowabida jẽda ũdukĩrãbʉ (Job 14:15). Krĩchara ẽbẽrarã kʼãrẽaba sobia bʼaita ãyi mebẽrã jẽda piradrʉbʉrʉdera. Nabema artikulode akʉda kĩrãkʼa yi ẽbẽra bia obeadarãra ãyi trʉ̃ bebʉ librode edabʉra jẽda piradrʉyi ewari jõmaʉ̃nẽ bʼaita (Hech. 24:15; Juan 5:29). Dayirã mebẽrãnebema beidara Armagedón tẽã piradrʉibaibara. * Akʉza yibia ẽãta obeadarãra jẽda piradrʉyi kʼawua odaita, ãyi bei nãã Jeowa ʉ̃rʉ kʼawua ẽ basi baera akʉza Jeowa ʉ̃rʉ ĩjã ẽ basi baera.

2, 3. (1) ¿Isaías 11:9 akʉza 10ba jarabʉdebara, kʼãrẽa naʉ̃ drʉa jõmaʉ̃nẽ jaradiadai Daizeze Bedʼeara? (2) ¿Kʼãrẽta kʼawuadai naʉ̃ artikulodera?

² Ẽbẽrarã jẽda piradrʉbʉrʉrabara nesidayi jaradiadamarẽã (Is. 26:9; 61:11). Naʉ̃ drʉa jõmaʉ̃nẽ jaradiadayi Daizeze Bedʼeata, naʉ̃ drʉade maʉ̃ kĩrãkʼara odakata (akʉra Isaías 11:9, 10). ¿Kʼãrẽa? Ẽbẽrarã yibia ẽãta obeadarabara nesidai baera kʼawuaita Daizeze Nokʼo ʉ̃rʉ, Jesu beida ʉ̃rʉ, Jeowa trʉ̃ ʉ̃rʉ akʉza kʼãrẽa Jeowabʉrʉ zokʼaseabʉta. Adewara yibia obeadarabida nesidayi audre kʼawuaita Jeowaba kʼãrẽta ozebʉrʉ ʉ̃rʉ akʉza Jeowaba kʼãrẽta krĩchabʉta naʉ̃ drʉa ʉ̃rʉ. Ʉ̃kʉrʉ naʉ̃ra ẽbẽranebemara beisi baera Daizeze Bedʼea ma bʉ ẽ nãã. Ẽbẽrarã bia obeadaraba akʉza bia ẽã obeadaraba  nesidayi mejãcha kʼawuaita Daizeze ʉ̃rʉ.

³ Naʉ̃ artikulode naʉ̃ra bedʼeata panʉnañi: ¿sãwũã oi maʉ̃ra ẽbẽrarã jõmaʉ̃ʼa jaradiaira? Naʉ̃ra ẽbẽrarãba ãya kʼawuada obʉdeba, ¿sãwũã kʼarebayi ãyi trʉ̃ bebʉ librode ewari jõmaʉ̃nẽ bamarẽã? Maʉ̃ ʉ̃rʉ kʼawuaira dayirãitara yibiabaibara. Akʉza propesia Daniel librode akʉza Apocalipsis librodebʉba kʼarebayi biʼia ũrĩta kʼãrẽta berabarita ẽbẽrarã jẽda piradrʉbʉrʉde. Nããra kʼawuadayi propesia Daniel 12:1, 2debʉta.

4, 5. ¿Kʼãrẽta berabarita jarabʉ Daniel 12:1bara naʉ̃ ewari jõbodoarera?

⁴ (Akʉra Daniel 12:1). Daniel libroba jara ũrĩbibʉ kʼãrẽta berabarita ewari jõbodoare. Bari jaraita Daniel 12:1ba jarabʉ Miguelʼra iyabaʉta Jesukristota, Daizeze pʉwʉrʉare piradrʉ edaʉnʉmʉta. Naʉ̃ propesiara aripe berabarisi 1914de Jeowaba Jesuta jidaside iyi Nokʼota zokʼamarẽã.

⁵ Danielʼa jarasida Jesura piradrʉita «zʉbʉria ẽbẽra bedadeba yẽta dayirã ewari basidu» ũdudakabada ewaride. Naʉ̃ zʉbʉria zromara iyabaʉ zʉbʉria Mateo 24:21​ne jarabʉ. Jesura piradrʉyi, maʉ̃ bedʼeaba jarakĩrãbʉ Daizeze pʉwʉrʉ kʼarebaita zʉbʉria zroma jõbodoare, Armagedónʼne. Naʉ̃ pʉwʉrʉra iyabaʉ mejãcha ẽbẽrarã zʉbʉria zromaneba ẽdrʉda Apocalipsisde jarabʉ (Apoc. 7:9, 14).

6. ¿Kʼãrẽta berabari mejãcha ẽbẽrarã zʉbʉria zromaneba ẽdrʉda tẽã akʉza kʼãrẽa mawũã jarapanʉ? (Akʉza naʉ̃ artikulode akʉra «Lepanʉraba widipanʉta» nama bedʼeabʉ nama Egorode jẽda piradrʉi ʉ̃rʉ).

⁶ (Akʉra Daniel 12:2). ¿Kʼãrẽta berabari mejãcha ẽbẽrarã zʉbʉria zromaneba ẽdrʉda tẽã? Propesiaba jarabʉ jẽda piradrʉi ʉ̃rʉ. Nããrãra krĩchapanasi Daniel 12:2ba bedʼeabasita yi ʉ̃ta wãira piradrʉi ʉ̃rʉ. Mawũã ẽ bʉrʉ bedʼeabasita sãwũã Daizeze Bedʼea audre jaradiasita 1918 tẽã. Maʉ̃ poagadera mebẽrãra mejãcha pẽwãsida baera mejãcha jaradia ẽ basi. * Mamina idi ewadera kʼawuapanʉ maʉ̃ bedʼeabara jarakĩrãbʉta ẽbẽrarã ẽjũã biade piradrʉi ʉ̃rʉ. ¿Kʼãrẽa mawũã jarapanʉ? Job 17:16de zokʼabʉ baera bedʼea «egoro» akʉza zokʼabʉ baera bedʼea «Bewara deda». Naʉ̃ra bedʼeabara iyabaʉta jarakĩrãbʉ. Naʉ̃ba ũdubibʉ Daniel 12:2de jẽda piradrʉi jarabʉra berabarita ewari jõbodo jõna tẽã akʉza Armagedón yõ jõna tẽã.

7. (1) ¿Kʼãrẽta jarakĩrãbʉ ʉ̃kʉrʉ «ewari jõmaʉ̃nẽ bʼaita» piradrʉibara? (2) ¿Naʉ̃ jẽda piradrʉira kʼãrẽa audre yibia?

⁷ ¿Kʼãrẽta jarakĩrãbʉ Daniel 12:2de jarabʉrʉde ʉ̃kʉrʉra «ewari jõmaʉ̃nẽ bʼaita» piradrʉita? Maʉ̃ba jarakĩrãbʉ 1.000 poagabayeda yi ẽbẽrarã jẽda piradrʉbʉrʉba audre kʼawuara Jeowa ʉ̃rʉ akʉza ũrĩnara Jeowaba Jesuʉ̃meba jarabʉta, ãyira jipa ewari jõmaʉ̃nẽ bʼaita (Juan 17:3). Naʉ̃ kʼãwũã jẽda piradrʉira audre yibiabayi nabema ẽbẽrarã beida jẽda piradrʉdaira (Heb. 11:35). ¿Kʼãrẽa? Maʉ̃ra ẽbẽrarã jẽda piradrʉdara jẽda beisi baera.

8. ¿Kʼãrẽta jarakĩrãkʉ bedʼea piradrʉita «ʉ̃kʉrʉta ãyi so perabidaita akʉza ewari jõmaʉ̃nẽ jʉradaita»?

⁸ Mamina ʉ̃kʉrʉ maʉ̃ra jẽda piradrʉidebemabara ũrĩna ẽ bayi Jeowaba  jaradiabʉra. Daniel propesiaba jarabʉ piradrʉita «ʉ̃kʉrʉta ãyi so perabidaita akʉza ewari jõmaʉ̃nẽ jʉradaita». Ãyara jipa ũrĩkĩrã ẽ baera ãyi trʉ̃ra bebʉ librode ba ẽ bayi. Akʉza ewari jõmaʉ̃nẽ jʉradayi ãyira, maʉ̃ba jarakĩrãbʉ makenaita ãyira. Daniel 12:2ba jara ũrĩbibʉ kʼãrẽta berabarita ẽbẽrarã jẽda piradrʉda tẽã. Maʉ̃ kʼawuaira akʉyi ãya kʼãrẽta oita jẽda piradrʉda tẽã * (Apoc. 20:12). Ʉ̃kʉrʉra ewari jõmaʉ̃nẽ bayi, ʉ̃kʉrʉta jipa beiyi.

9, 10. ¿Adewara kʼãrẽta berabari zʉbʉria zroma berabarida tẽãra akʉza «kʼairata uruyayi bajã kĩrãkʼa»?

⁹ (Akʉra Daniel 12:3). ¿Adewara kʼãrẽta berabari zʉbʉria zroma berabarida tẽãra? Daniel 12:2de dayirãba kʼawuada awuara, yi bersikulo 3ba jara ũrĩbibʉ kʼãrẽta berabarita zʉbʉria zroma berabarida tẽã.

¹⁰ ¿Kʼairata «uruyayi bajã kĩrãkʼa»? Jesuba Mateo 13:43de bedʼea jaradaba kʼarebabʉ kʼawuaita kʼairata maʉ̃rãra. Iya jarasi: «Maʉ̃nerã biata bʼera ʉ̃madau kĩrãkʼa uruzhadʼaya ãzhi Zezeta Nokʼota bʼʉ maẽ». Jesuba naʉ̃ bedʼea jarasidera bedʼeanʉmasi ʉ̃ta wãira iyiʉ̃mebawaraʉba zokʼai ʉ̃rʉ, naʉ̃rãra Jesu mebẽrã (Mat. 13:38). Maʉ̃ kʼarea Daniel 12:3de bedʼeabʉbaibara ẽbẽrarã ʉ̃ta wãi ʉ̃rʉ akʉza ãya kʼãrẽta oi ʉ̃rʉ 1.000 poagabayeda zokʼabʉrʉde.

11, 12. ¿Kʼãrẽ trajota odai 144.000rabara 1.000 poagabayeda?

¹¹ Ʉ̃ta wãiraba ẽbẽra mejãchaʉʼa jaradiayi aripe oita. ¿Sãwũã odai maʉ̃ra? Jesuʉ̃me ãba trajadayi kʼarebaita Daizeze Bedʼea naʉ̃ drʉa jõmaʉ̃mae jaradiaita 1.000 poagabayeda. 144.000rabara zokʼayi, maʉ̃ awuara ãyira saserdoterabayi (Apoc. 1:6; 5:10; 20:6). Mawũã kʼarebayi wiña wiñane ẽbẽrarãba ãya kayirua obada jipa idubʉdamarẽã akʉza ãyi kakuasida bia bamarẽã (Apoc. 22:1, 2; Ezeq. 47:12). Kʼãrẽaba sobia bʼai ʉ̃ta wãirãra maʉ̃ta oi baera.

¹² ¿Kʼaira jaradiai aripe oita? Yi ẽbẽrarã jẽda piradrʉiraʼa akʉza Armagedónʼneba ẽdrʉiraʼa adewara wũãwũã zakera ẽjũã biade tobʉrʉraʼa. 1.000 poaga berabarida tẽãra jõmaʉ̃ta nemitia okabayi. Mawũẽra, ¿ãyi trʉ̃ra sõbede lapiseroba bʉyi bebʉ librodera?

13, 14. ¿Kʼãrẽta oũdubibara ẽbẽrarã nemitiara okabaibara ãyi ewari jõmaʉ̃nẽ bʼaita?

¹³ Kĩrãbeibara ẽbẽra nemitia okabara jarakĩrãkʉ ẽãta iyira ewari jõmaʉ̃nẽ bʼaita. Krĩchadadrʉ Adán Eva ʉ̃rʉ, ãyira nemitia okabasimina ãyi ewari jõmaʉ̃nẽ bʼaira, ũrĩbarabasi Jeowaba jarabʉta, mamina ãyara ũrĩ ẽ basi (Rom. 5:12).

¹⁴ Dayirãba kʼawuada kĩrãkʼa 1.000 poaga jõna tẽãra, ẽbẽrarã jõmaʉ̃ta nemitia okabayi. ¿Maʉ̃ra ẽbẽrarãra ewari jõmaʉ̃nẽ Daizeze Nokʼoare bʼaika? Mawũã ẽ bʉrʉ, ¿ʉ̃kʉrʉbara Adán akʉza Evaʉ̃meba oda kĩrãkʼa oika? Ãyira nemitia okabasimina kʼẽrẽpa ba ẽ basi. ¿Kʼãrẽta berabaribara maʉ̃ kʼawuaita?

15, 16. (1) ¿Ẽbẽrarã jõmaʉ̃ba sõbede ũdubidayi Jeoware kʼẽrẽpapanʉta? (2) ¿Kʼãrẽta berabari ẽbẽrarãba ũdubibʉrʉde kʼaiarepanʉta?

¹⁵ Diarura 1.000 poagabayeda karselde  edabʉ kĩrãkʼabayi. Iyi mawũã bʉedara mia abaʉta sewabe ẽ bayi. Mamina 1.000 poaga berabarida tẽã ẽdrʉyi maʉ̃ karsel kĩrãkʼa bʉdeba, ẽbẽrarã nemitia okarata sewaita. Maʉ̃ mawũã berabaribʉrʉdera ẽbẽrarãbara ũdubibara kʼaiarebʉta, mawũã ũdubiyi Jeowabʉrʉ zokʼaseabʉta akʉza iyi trʉ̃ neneẽã erbʉta (Apoc. 20:7-10). Ãya obʉrʉba ũdubiyi ãyi trʉ̃ bebʉ librode ewari jõmaʉ̃nẽ bʼai kʼawuaita.

¹⁶ Kʼawua ẽ sõbe bʼaita mamina ʉ̃kʉrʉra Adán Eva kĩrãkʼabayi, kãgada ẽ bayi Jeowaba ãyi zokʼaita. ¿Kʼãrẽta berabari ãyira? Apocalipsis 20:15ba jarabʉ: «Yi ẽbẽrarã bebʉ librode trʉ̃ neẽãra do pʉreade balbʉesida». Mawũã, naʉ̃ra ẽbẽrarãra jipa beiyi mamina ẽbẽra mejãchaʉba ũdubiyi Jeowarepanʉta. Ãyi trʉ̃ra bebʉ librode jipa bʉbayi wua jãrẽ wã ẽ baita.

17. ¿Naʉ̃ ewari jõbodoarera kʼãrẽta berabarita jarasida Danielʼara? (Daniel 12:4, 8-10).

¹⁷ Mejãcha sobiapanʉ ʉ̃ra zeide kʼãrẽ berabari krĩchabʉrʉde. Angel abaʉba Danielʼa jarasi kʼãrẽta berabaribasita ewari jõbodoare (akʉra Daniel 12:4, 8-10; 2 Tim. 3:1-5). Jarasi: Wãrĩnura «mejãcha eaba wãñi». Mawũẽra Daizeze pʉwʉrʉbara biʼia ũrĩ bʼaibasi propesia  Daniel librode edabʉra. Adewara angelba jarasi naʉ̃ ewari jõbodoarera ẽbẽra kayiruarabara audre oibasita kayiruata akʉza mia abaʉ ẽbẽra kayiruaba ũrĩ ẽ baibasita.

18. ¿Aranʉ bʼai kʼãrẽta berabari ẽbẽra kayiruarãra?

¹⁸ Idi ewadera ẽbẽra kayiruabara ãya kãgabʉta obʉ kĩrãkʼabʉ (Mal. 3:14, 15). Aranʉ bʼai Jesubara awuara bʉyi ẽbẽrarã obeja kĩrãkʼabʉta akʉza awuara bʉyi chibo kĩrãkʼabʉta (Mat. 25:31-33). Ẽbẽra kayiruarãra zʉbʉria zromanebara ẽdrʉ ẽ bayi akʉza ãyita beira ẽjũã biadera jẽda piradrʉ ẽ bayi. Ãyi trʉ̃ra neẽbayi Malaquías 3:16ba libro Jeowaba kĩrãbei jarabʉdera.

19. ¿Kʼãwũãena kʼãrẽta oibara dayirãbara akʉza kʼãrẽa? (Malaquías 3:16-18).

¹⁹ Kʼãwũãena ũdubibara dayirãra ẽbẽra kayiruabawara ãba bʉ ẽãta (akʉra Malaquías 3:16-18). Jeowabara, iyita yibiarãra ãba jʉrenʉmʉ. ¿Dayirãra maʉ̃rane eda bakĩrãbʉka?

20. ¿Jeowabara kʼãrẽta jarasi Danielʼa akʉza bʉara kʼãrẽa kãgabʉ maʉ̃ta berabarimarẽã?

²⁰ Naʉ̃ ewari jõbodoarera nemejãcha ũdupanʉ, mamina aranʉ audre ũdudayi. Aranʉ ẽbẽra kayiruarãra wua neẽbayi, maʉ̃ tẽã ũdudayi sãwũã aripe berabarita  Jeowaba Danielʼa bedʼea jaradata: «Ewari jõbodo berabarida tẽã piradrʉyi bʉaʼa diaya adapeada jidaita» (Dan. 12:13). ¿Bʉa kãgabʉka Danielta akʉza bʉ mebẽrãta jẽda piradrʉmarẽã? Maʉ̃ta mawũãbʉrʉ zarea ora kʼẽrẽpa bʼaita akʉza bʉ trʉ̃ra mawũãra bebʉ librode jipa bʉbayi.