1. ¿Chuqui tac mi caj i yujtel ti jiñi Mil jab i Yumʌntel Cristo?

 ¿MUʼ ba lac ñaʼtan bajcheʼ yilal miʼ cajel cheʼ bʌ miʼ tejchel ti chaʼ chʼojyesʌntel jiñi chʌmeñoʼ bʌ ila ti Lum ti jiñi Mil jab i Yumʌntel Cristo? Ti lac pejtelel la com lac chaʼ qʼuel jiñi chʌmeñoʼ bʌ lac chaʼan. I Jehová yomʌch jaʼel (Job 14:15). Laʼcu lac ñaʼtan bajcheʼ cʼamel miʼ cajel tijicñʌyel ila ti Lum cheʼ bʌ miʼ chaʼ chʼojyelob jiñi chʌmeñoʼ bʌ. Cheʼ bajcheʼ tsaʼ laj cʌñʌ yaʼ ti yambʌ estudio, «jiñi tojoʼ bʌ», tsʼijbubiloʼ bʌ i cʼabaʼ yaʼ ti libro chaʼan bʌ cuxtʌlel, mi caj i «chʼojyelob chaʼan cuxtʌlel» (Hech. 24:15; Juan 5:29). Tajol jiñi ñaxam bʌ mi caj i chʼojyelob jiñʌch jiñi chʌmeñoʼ bʌ lac chaʼan. * Cheʼ jaʼel, mi caj i «chʼojyelob chaʼan meloñel» «jiñi mach bʌ tojobic», ili jiñobʌch maʼañic bʌ tsaʼ mejli i cʌñob Jehová i maʼañic tsiʼ melbeyob i yeʼtel (troñel).

2, 3. a) Cheʼ bajcheʼ miʼ yʌl Isaías 11:9, 10, ¿chuqui mi caj i pʌstʌl ti jiñi ñuc bʌ cʌntesa muʼ bʌ i cajel? b) ¿Chuqui mi caj laj qʼuel ti ili estudio?

² Cabʌl chuqui yom bʌ miʼ cʌñob jiñi muʼ bʌ i chaʼ chʼojyelob (Is. 26:9; 61:11). Jin chaʼan yomʌch miʼ yʌjqʼuel jiñi ñuc bʌ cʌntesa (pejcan Isaías 11:9, 10). Cheʼ jaʼel, jiñi mach bʌ tojobic yom miʼ cʌñob chaʼan bʌ  Jesucristo, jiñi Yumʌntel, jiñi i tojol laj coltʌntel, chucoch ñuc i cʼʌjñibal jiñi i cʼabaʼ Jehová yicʼot chucoch jin jach an tiʼ wenta miʼ chaʼlen yumʌntel. Jinto jaʼel jiñi tojoʼ bʌ yom mi caj i cʌñob jiñi cʌntesa tac am bʌ i tsictesa majlel Jehová chaʼan jiñi ñaʼtʌbil bʌ i chaʼan. An tsaʼ bʌ chʌmiyob cheʼ bʌ jalto yom chaʼan miʼ yujtel ti tsʼijbuntel jiñi Biblia. Tsiquil chaʼan cabʌl chuqui yom bʌ miʼ cʌñob jiñi mach bʌ tojobic yicʼot jiñi tojoʼ bʌ.

³ Ti ili estudio mi caj lac jacʼ ili cʼajtiya tac: ¿Bajcheʼ mi caj i mejlel ili ñuc bʌ cʌntesa?, ¿chuqui mi caj i yujtel tiʼ tojlel jiñi weñʌch bʌ miʼ jacʼob ili cʌntesa?, i ¿chuqui mi caj i yujtel tiʼ tojlel jiñi mach bʌ añic miʼ jacʼob? Yomʌch mi lac mulan laj qʼuelben i jacʼbal ili cʼajtiya tac. Cheʼ bajcheʼ mi caj laj qʼuel, yaʼ ti libro chaʼan Daniel yicʼot Apocalipsis an utsʼatax bʌ profecía tac muʼ bʌ caj i coltañonla lac ñaʼtan chuqui mi caj i yujtel cheʼ bʌ miʼ chaʼ chʼojyelob jiñi chʌmeñoʼ bʌ. Laʼ lac ñaxan qʼuel muʼ bʌ i yʌjlel ti Daniel 12:1, 2.

4, 5. Cheʼ bajcheʼ miʼ yʌl Daniel 12:1, ¿chuqui mi caj i yujtel ti jiñi i yorajlel i jilibal?

⁴ (Pejcan Daniel 12:1). Ti jiñi libro chaʼan Daniel miʼ yʌl bajcheʼ mi caj i yujtel majlel jiñi albil bʌ chaʼan bʌ jiñi i jilibal. Jumpʼejl ejemplo, ti Daniel 12:1 miʼ yʌl chaʼan Miguel, ili jiñʌch Jesucristo, woli (choncol) i «cʌntan» jiñi i tejclum Dios. Ili profecía tsaʼ caji ti tsʼʌctiyel ti 1914, cheʼ bʌ Jesús tsaʼ otsʌnti bajcheʼ Rey ti jiñi i Yumʌntel Dios.

⁵ Pero Daniel tsaʼ subenti jaʼel chaʼan Jesús mi caj i tsictiyel cheʼ «i tejchibalix i yorajlel cabʌl wocol. Ti oñiyi cʼʌlʌl wʌle maʼanic baʼ ora tsiʼ yubiyob ñuc bʌ wocol cheʼ bajcheʼ iliyi». Iliyi jiñʌch jiñi i yorajlel «cabʌl wocol» muʼ bʌ i yʌjlel ti Mateo 24:21. Jesús miʼ tsictiyel o miʼ coltan jiñi i tejclum Dios tiʼ yujtibal majlel jiñi wocol, ili jiñʌch ti Armagedón. Jiñi libro chaʼan Apocalipsis miʼ taj ti tʼan ili lac piʼʌlob bajcheʼ jiñi yonlelob muʼ bʌ i loqʼuelob ti «jiñi cabʌl wocol» (Apoc. 7:9, 14).

6. ¿Chuqui mi caj i yujtel cheʼ bʌ tsaʼix ñumi jiñi cabʌl wocol, i chucoch mi la cʌl jiñi? (Qʼuele jaʼel jiñi sección «Jiñi xpejcaya juñob miʼ cʼajtibeñob i bʌ» am bʌ ti ili revista, muʼ bʌ i taj ti tʼan jiñi muʼ bʌ caj i chaʼ cuxtʌyelob ila ti Lum).

⁶ (Pejcan Daniel 12:2). ¿Chuqui mi caj i yujtel cheʼ bʌ tsaʼix ñumi jiñi i yorajlel cabʌl wocol? Jiñi profecía miʼ yʌl chaʼan miʼ cajel chaʼ chʼojyel. Ti ñaxan mi lac ñaʼtan chaʼan Daniel 12:2 woli (yʌquel) i taj ti tʼan jiñi chaʼ chʼojyel muʼ bʌ i cajel ti panchan o bajcheʼ tsaʼ ñumen coli jiñi subtʼan cheʼ bʌ tsiʼ ñopo i mʌctañob jiñi laj contrajob ti 1918. * Pero wʌle mi lac chʼʌmben i sujm chaʼan jin woliʼ taj ti tʼan jiñi chaʼ chʼojyel muʼ bʌ i cajel yaʼ ti tsijiʼ bʌ pañimil (mulawil) woli bʌ lac pijtan. Iliyi miʼ cajel cheʼ bʌ tsaʼix ujti jiñi cojix bʌ qʼuin tac yicʼot jiñi Armagedón.

7. a) ¿Chuqui yom i yʌl cheʼ an muʼ bʌ caj i chaʼ chʼojyelob «chaʼan miʼ tajob i cuxtilel mach bʌ anic miʼ jilel»? b) ¿Chucoch jiñʌch jiñi «ñumen wem bʌ chaʼ chʼojyel»?

⁷ ¿Chuqui i sujmlel  muʼ bʌ i yʌl Daniel 12:2 cheʼ bʌ miʼ yʌl chaʼan an muʼ bʌ caj i chaʼ chʼojyelob «chaʼan miʼ tajob i cuxtilel mach bʌ anic miʼ jilel»? Yom i yʌl chaʼan jiñi muʼ bʌ i chaʼ chʼojyelob i miʼ cʌñob, o miʼ bej cʌñob, yicʼot miʼ jacʼbeñob i tʼan Jehová yicʼot Jesús ti jiñi Mil jab muqʼuix caj i tajob jiñi i cuxtʌlel mach bʌ añic miʼ jilel (Juan 17:3). Ili jiñʌch jiñi «ñumen wem bʌ chaʼ chʼojyel» mach cheʼic bajcheʼ jiñi tsaʼ bʌ ujti ti wajali (Heb. 11:35). ¿Chucoch? Come jiñi tsaʼ bʌ chaʼ chʼojyiyob ti wajali tsaʼʌch chaʼ chʌmiyob.

8. ¿Bajcheʼ an i sujmlel cheʼ an muʼ bʌ caj i chaʼ chʼojyelob chaʼan miʼ yubiñob quisin yicʼot chaʼan miʼ chojquelob tiʼ pejtelel ora?

⁸ Pero mach tiʼ pejtelelobic jiñi muʼ bʌ caj i chaʼ chʼojyelob mi caj i jacʼob jiñi cʌntesʌntel tilem bʌ ti Jehová. Jiñi profecía am bʌ ti Daniel miʼ yʌl chaʼan an muʼ bʌ caj i chaʼ chʼojyelob «chaʼan miʼ yubiñob quisin [«yicʼot chaʼan miʼ chojquelob tiʼ pejtelel ora», TNM]». Maʼañic mi caj i tsʼijbuntel i cʼabaʼob yaʼ ti libro chaʼan bʌ cuxtʌlel i mi muqʼuicto caj i tajob jiñi i cuxtʌlel mach bʌ añic miʼ jilel tiʼ caj xñusatʼañob. Mi caj i «chojquelob tiʼ pejtelel ora» o mi caj i jisʌntelob. Jin chaʼan, miʼ mejlel la cʌl chaʼan Daniel 12:2 woliʼ taj ti tʼan muʼ bʌ caj i yujtel tiʼ tojlel pejtelel jiñi muʼ bʌ i chaʼ chʼojyelob, jin mi caj i qʼuejlel muʼ bʌ i melob (chaʼleñob) cheʼ bʌ tsaʼix chaʼ chʼojyesʌntiyob * (Apoc. 20:12). An muʼ bʌ caj i tajob i cuxtʌlel mach bʌ añic miʼ jilel, i an maʼañic bʌ.

9, 10. a) Cheʼ bajcheʼ miʼ yʌl Daniel 12:3, ¿chuqui yambʌ mi caj i yujtel cheʼ bʌ tsaʼix ñumi jiñi i yorajlel cabʌl wocol? b) ¿Majquiyob jiñi tsʼʌylawoʼ bʌ cheʼ bajcheʼ i cʼʌcʼal panchan?

⁹ (Pejcan Daniel 12:3). ¿Chuqui yambʌ mi caj i yujtel cheʼ bʌ tsaʼix ñumi jiñi «i yorajlel cabʌl wocol»? Daniel 12:3 miʼ yʌl yambʌ muʼ bʌ caj i yujtel cheʼ bʌ tsaʼix ujti jiñi i yorajlel cabʌl wocol.

¹⁰ ¿Majquiyob jiñi tsʼʌylawoʼ bʌ mi caj i yajñelob cheʼ bajcheʼ i cʼʌcʼal panchan? Jiñi tsaʼ bʌ i yʌlʌ Jesús ti Mateo 13:43 miʼ coltañonla lac ñaʼtan. Tsiʼ yʌlʌ: «Ti jimbʌ ora, jiñi tojoʼ bʌ mi caj i wen pʌsob i cʼʌcʼal yaʼ tiʼ Yumʌntel i Tat cheʼ bajcheʼ jiñi qʼuin». Cheʼ bʌ Jesús tsiʼ yʌlʌ iliyi woliʼ taj ti tʼan jiñi i yalobilob jiñi Yumʌntel, ili jiñobʌch jiñi muʼ bʌ caj i majlelob ti panchan chaʼan miʼ chaʼleñob yumʌntel yicʼot (Mat. 13:38). Jin chaʼan, Daniel 12:3 woliʼ taj ti tʼan jiñi muʼ bʌ caj i majlelob ti panchan yicʼot muʼ bʌ caj i melob ti jiñi Mil jab.

11, 12. ¿Chuqui mi caj i melob jiñi 144 mil ti jiñi Mil jab?

¹¹ Jiñi muʼ bʌ caj i majlelob ti panchan mi caj i tojʼesañob majlel yonlel wiñicob. ¿Bajcheʼ? Jiñʌch cheʼ bʌ miʼ chaʼleñob eʼtel yicʼot Jesús chaʼan miʼ yʌjqʼuel jiñi ñumen ñuc cʌntesa ila ti Lum ti jiñi Mil jab. Jiñi 144 mil mi caj i sujtelob ti rey yicʼot ti sacerdotejob (Apoc. 1:6; 5:10; 20:6). Jin chaʼan, miʼ cajelob ti coltaya chaʼan «miʼ tsʼʌcʌntel jiñi tejclum tac», cheʼ bajcheʼ jiñi cʼunteʼ cʼunteʼ mi caj lac tojʼan majlel (Apoc. 22:1, 2; Ez. 47:12). ¡Wen tijicña mi caj i yubiñob cheʼ bʌ miʼ melob jiñi!

¹² ¿Majqui ochemob ti jiñi «cabʌl winicob» muʼ bʌ caj i tojʼesʌntelob majlel? Jiñobʌch jiñi muʼ bʌ caj i chaʼ cuxtʌyelob, jiñi cuxul bʌ miʼ ñumelob ti Armagedón yicʼot jiñi muʼ bʌ i yilañob pañimil (chʼocʼañob) yaʼ ti tsijiʼ bʌ pañimil. Cheʼ bʌ miʼ yujtel jiñi Mil jab, tojobix pejtelel jiñi chumuloʼ bʌ ti Pañimil. Yubil, ¿jala mi caj i tsʼijbubentelob i cʼabaʼ ti tinta yaʼ ti libro chaʼan bʌ cuxtʌlel?

13, 14. ¿Chuqui yom miʼ pʌsob pejtelel jiñi tojoʼ bʌ chumuloʼ bʌ ila ti Lum chaʼan miʼ tajob jiñi i cuxtʌlel mach bʌ añic miʼ jilel?

¹³ Laʼ laj cʼajtesan chaʼan juntiquil toj bʌ mach yomic i yʌl chaʼan mucʼʌch caj i taj jiñi i cuxtʌlel mach bʌ añic miʼ jilel. Laʼ lac ñaʼtan tsaʼ bʌ ujti tiʼ tojlel Adán yicʼot Eva. Tojobʌch, pero yom miʼ jacʼbeñob i tʼan Jehová chaʼan miʼ tajob jiñi i cuxtʌlel mach bʌ añic miʼ jilel. Pero tsiʼ ñusayob tʼan (Rom. 5:12).

¹⁴ Cheʼ bajcheʼ tsaʼix laj qʼuele, cheʼ bʌ miʼ yujtel jiñi Mil jab, tojobix pejtelel jiñi chumuloʼ bʌ ila ti Lum. ¿Muʼ ba caj i coltʌbeñob i yumʌntel Jehová tiʼ pejtelel ora iliyob? ¿O an cheʼ bʌ mi caj i sujtelob bajcheʼ Adán yicʼot Eva, mach bʌ xucʼulic tsaʼ ajñiyob, anquese tojob? ¿Bajcheʼ mi caj i tojʼesʌntel iliyi?

15, 16. a) ¿Jalaqui mi caj i mejlel i pʌsob i xucʼtʌlel ti Jehová pejtelel jiñi lac piʼʌlob? b) ¿Chuqui mi caj i yujtel cheʼ miʼ ñumel jiñi cojix bʌ prueba?

¹⁵ Satanás mi caj i ñujpʼel Mil jab. Ti jimbʌ ora maʼañic mi caj i mejlel i lotin lac piʼʌlob. Pero mi caj i cojlel cheʼ bʌ miʼ yujtel jiñi Mil jab i mi caj i ñop i lotiñonla. Ti jimbʌ ora, pejtelel jiñi  tojoʼ bʌ mi caj i pʌsob mi mucʼʌch i coltʌbeñob i cʼabaʼ Jehová yicʼot jiñi i yumʌntel (Apoc. 20:7-10). Jiñi muʼ bʌ i melob mi caj i pʌs mi yomʌch miʼ junyajl tsʼijbuntel cʌytʌl jiñi i cʼabaʼob yaʼ ti libro chaʼan bʌ cuxtʌlel.

¹⁶ An cheʼ bʌ mi caj i melob bajcheʼ Adán yicʼot Eva, i mi caj i tsʼaʼlebeñob i yumʌntel. Mach la cujilic jaytiquilob cheʼ mi caj i melob bajcheʼ iliyi. ¿Chuqui mi caj i yujtel tiʼ tojlelob? Apocalipsis 20:15 miʼ subeñonla: «Tsaʼ chojquiyob ochel yaʼ ti cʼajc jiñi mach bʌ tsʼijbubilobic i cʼabaʼ yaʼ ti libro chaʼan bʌ cuxtʌlel». Cheʼʌchi, ili xñusatʼañob mi caj i junyajl jisʌntelob. Pero lʌcʼʌ tiʼ pejtelelob jiñi tojoʼ bʌ maʼañic mi caj i yajlelob ti jiñi cojix bʌ prueba. Mi caj i junyajl tsʼijbubentelob cʌytʌl i cʼabaʼ yaʼ ti libro chaʼan bʌ cuxtʌlel.

17. ¿Chuqui tsaʼ subenti Daniel chaʼan mi caj i yujtel ili ora? (Daniel 12:4, 8-10).

¹⁷ ¡Miʼ wen aqʼueñonla lac tijicñʌyel cheʼ bʌ mi lac ñaʼtan muʼ bʌ mi caj i yujtel ti talto bʌ qʼuin! Pero juntiquil ángel tiʼ sube Daniel junchajp ñuc bʌ i cʼʌjñibal muʼ bʌ caj i yujtel ti ili ora, tiʼ yorajlel «jini cojix bʌ ora» (pejcan Daniel 12:4, 8-10; 2 Tim. 3:1-5). Tiʼ sube: «Mi caj i pʼojlel i ñaʼtʌbal winicob ti  pañimil». Cheʼ bajcheʼ mi laj qʼuel jiñi i tejclum Dios mi caj i ñumen chʼʌmben i sujm jiñi profecía tac am bʌ yaʼ ti libro chaʼan Daniel. Jiñi ángel an chuqui yambʌ tsiʼ yʌlʌ chaʼan jiñi cojix bʌ qʼuin. Tsiʼ yʌlʌ: «Jini jontoloʼ bʌ mi caj i chʌn chaʼleñob jontolil. Maʼanic mi caj i chʼʌmbeñob isujm».

18. ¿Chuqui mi caj i chaʼleñob jiñi jontoloʼ bʌ?

¹⁸ Ili ora jiñi jontoloʼ (mañajoʼ) bʌ maʼañic chuqui miʼ chaʼleñob yilal (Mal. 3:14, 15). Pero ti lʌcʼʌlix Jesús mi caj i chaʼlen meloñel tiʼ tojlel jiñi lajaloʼ bʌ bajcheʼ chivo i mi caj i tʼoxob tiʼ tojlel jiñi lajaloʼ bʌ bajcheʼ tiñʌmeʼ (Mat. 25:31-33). Jiñi jontoloʼ bʌ mi caj i chʌmelob ti jiñi i yorajlel cabʌl wocol yicʼot maʼañic mi caj i chaʼ chʼojyelob chaʼan miʼ chumtʌlob ti jiñi tsijiʼ bʌ pañimil. Maʼañic mi caj i tsʼijbubentelob i cʼabaʼ yaʼ tiʼ «juñilel lac ñaʼtʌntel», muʼ bʌ i yʌjlel ti Malaquías 3:16.

19. ¿Chuqui yom mi lac mel ili ora, i chucoch? (Malaquías 3:16-18).

¹⁹ Wʌle i yorajlel chaʼan mi lac pʌs chaʼan mach yaʼic ochemonla ti jiñi jontoloʼ bʌ (pejcan Malaquías 3:16-18). Jehová woliʼ tempan jiñi muʼ bʌ i qʼuelob bajcheʼ «i tʼojol jax bʌ». ¿Mach ba yaʼic la com ochel yaʼi?

20. ¿Chuqui tsaʼ subenti Daniel, i chucoch a wom miʼ tsʼʌctiyel?

²⁰ Tiʼ sujm cabʌl chuqui ñuc tac bʌ woliʼ yujtel. Pero anto chuqui ñumen ñuc tac bʌ mi caj i yujtel ti lʌcʼʌl. Lʌcʼʌlix mi caj i jisʌntel pejtelel jiñi jontolil. Cheʼ jiñi, mi caj laj qʼuel bajcheʼ miʼ tsʼʌctiyel tsaʼ bʌ subenti Daniel: «Ti cojix bʌ qʼuin mi caj a tejchel chaʼan maʼ chʼʌm a chobejtʌbal» (Dn. 12:13). ¿A womix baʼ qʼuel cheʼ bʌ miʼ chaʼ chʼojyel Daniel yicʼot jiñi chʌmeñoʼ bʌ a chaʼan? Mi a womʌch, chaʼlen wersa chaʼan xucʼul maʼ wajñel, i mi caj i tsʼijbuntel a cʼabaʼ yaʼ ti libro chaʼan bʌ cuxtʌlel am bʌ i chaʼan Jehová.