TANE MEKUN 40
Troa Eatrongëne “La Ka Ala Nyimu Kowe La Thina Ka Meköt”
“Tro la itete ujëne la ka ala nyimu kowe la thina ka meköt’ a tune la ite wëtesij’ epin’ epine palua.”—DAN. 12:3.
NYIMA 151 Tro Cilieti a Hë Elany
MEKUN KA TRU *
1. Nemen la itre ewekë hne së hna lapa treqen nge ka troa amadrinë së elany ngöne la 1 000 lao macatre ne Musi Keriso?
TRU catr la madrine së elany la kola amelene hmaca la itre ka mec e celë fen ngöne la 1 000 lao macatre ne Musi Keriso! Easa lapa treqen la ijine tro hmaca sa iöhnyi memine lo itre sinee së ka mec. Ketre tui Iehova fe. (Iobu 14:15) Pane mekune jë la madrine së elany, la easa iöhnyi memine la itre sinee së ka mec. Thenge lo tane mekun hnapan, ame “la itre atre ka meköt,” ka hetre ëjen ngöne la tusi ne mel, ke troa amele angatre hmaca “kowe la mel.” (Itre hu. 24:15; Ioane 5:29) Maine jë alanyimu la itre sinee së elany hna troa amelene panën e celë fen. * Ketre, ame la itre “ka tha meköti kö,” ene lo itre ka thatre Iehova me ka tha nyihlue i Nyidrëti kö qëmeken tro angatr a mec, ke troa amele angatr “kowe la iameköti.”
2-3. (a) Tune la hna qaja ngöne Isaia 11:9, 10, nemen la aqane trongen la porogaram ne ini ngöne la fen ka hnyipixe? (b) Nemen la itre hnying ka tru hne së hna troa ce wang?
2 Ame la itre hna amelen hmaca, ke tro lai a ini angatr. (Is. 26:9; 61:11) Ketre porogaram ne ini ka tru elanyi lai hna troa eköth, laka tha hna hane kö tun qaan ekö. (E jë la Isaia 11:9, 10.) Pine nemen? Pine laka ame la itre ka tha meköti kö hna troa amelen hmaca, ke troa ini angatr la pengöi Iesu Keriso, me Baselaia, me thupene mel, memine la ëje i Iehova me musi cile i Nyidrë. Nge ame la itre ka meköt, tro fe angatr elany a inine hmaca la itre hnei Iehova hna amamane trongën göne la aja i Nyidrë kowe la ihnadro. Alanyimu la itre ka mele nyipici nge ka mec qëmeken troa eköth la Tusi Hmitrötr. Celë hi matre itre ka meköti ju hë maine ka tha meköti kö, ngo tru catre elany la nyine tro angatr a inin.
3 Ame ngöne la tane mekun celë, easa troa sa la itre hnying hna hape: Nemene la aqane trongene la porogaram ne ini ka tru cili? Hnauëne laka, ka ce tro la porogaram ne ini cili memine la kola sija paluan la itre ëje ngöne la tusi ne mel? Ka nyipiewekë catr la itre mekun ka sa la itre hnyinge celë. Tro la itre hna perofetan ngöne la tusi Daniela me Hna Amaman a xatua së troa trotrohnine hnyawa la ka troa traqa ngöne la ijine mele hmaca. Tro sa pane wang la itre hna perofetan ngöne la tusi Daniela 12:1, 2.
“TRO LA ITRE KA MEKÖL E KUHU HNADRO A HLË HMACA”
4-5. Nemene la hna amaman hnene la tusi Daniela 12:1 göne la itre drai ne la pun?
4 E jë la Daniela 12:1. Tusi Daniela a e wengën la itre ewekë ka troa traqa ngöne la itre drai ne la pun. Daniela 12:1 a qaja ka hape, tro Mikaela ene Iesu Keriso a ‘cilëgölin la nöje i Akötresie.’ Hna nyiqane eatr la hna perofetane celë lo macatre 1914, lo kola acili Joxu Iesu ngöne la Baselaia i Akötresie e hnengödrai.
5 Daniela fe a qaja ka hape, tro Iesu a “cil” ngöne la ‘ijine akötr laka, tha hna hane kö tun qaane la kola xötrei lapane la ihnadro utihë la ijine cili.’ Ame la “ijine akötr” cili, ke kolo “akötr atraqatr” hna qaja ngöne Mataio 24:21. Nge tro Iesu a cil, kolo lai a hape, tro nyidrëti a isigöline la nöje i Akötresie ngöne lo pun la ijine akötr e Amagedro. Tusi Hna Amaman a hëne la nöje cili ka hape, ka alanyimu atraqatr, “angatr a xulu qa ngöne la akötr atraqatr.”—Hna ama. 7:9, 14.
6. Nemene la ka troa traqa thupene la isi Amagedro? (Wange ju fe la hna hape, “Itre Hnyinge Ne La Itre Ka e” göne la melehmaca e celë fen.)
6 E jë la Daniela 12:2. Nemene la ka troa traqa thupene la isi Amagedro? Kola mekun ekö ka hape, Daniela 12:2 a qaja la melehmaca e koho hnengödrai, maine pena lo kola xejë hmaca la huliwa ne cainöj, thupene lo hna pane acilëne hnene la itre ka icilekeu lo 1918. * Ngo easa trotrohnine enehila ka hape, ame la hna perofetane celë ke, kola qaja la itre atr hna troa amelene hmaca ngöne la fen ka hnyipixe. Kola qaja lo melehmaca thupene la isi Amagedro.
7. (a) Nemene la aliene la kola hape, troa amelen la itre xan “kowe la mele ka epine palua”? (b) Pine nemen matre ka sisitria kö la melehmaca cili?
7 Kola hapeu la Daniela 12:2 a qaja ka hape, troa amelen la itre xan “kowe la mele ka epine palua”? Kolo lai a hape, ame la itre atr hna troa amelene hmaca, ene la itre ka atre Iehova hë me Iesu, me ka drengethenge nyidroti palahi, memine la itre ka troa atre nyidro ngöne la 1 000 lao macatre, ke tro angatr a kapa la mele ka pë pun. (Ioane 17:3) Celë hi “melehmaca ka sisitria,” ke ka sisitria kö hune lo itre melehmaca hna kuca ekö. (Heb. 11:35) Pine nemen? Pine laka, ame lo itre atr hna amelene hmaca ekö, ke meci hmaca ha angatr.
8. Pine nemene matre troa amelene hmaca itre xan kowe la “hna jele ngazone me sisin’ epine palua”?
8 Ngo ame la itre xan hna troa amelene hmaca, ke tro angatr a xelene la ini qaathei Iehova. Öni Daniela perofeta, hna amele angatr kowe la “hna jele ngazone me sisin’ epine palua.” Pine laka, angatr a icilekeu me Iehova, tha tro kö cinyanyine la ëje i angatr ngöne la tusi ne mel, nge tha tro kö angatr a kapa la mel ka pë pun. Tro Akötresie a ‘sisi angatr epine palua,’ kolo lai a hape, tro Nyidrëti a apatrenyi palua angatr. Celë hi matre Daniela 12:2 a qaja la ka troa traqa thupene la kola amele angatr hmaca. * (Hna ama. 20:12) Ame elany, hetre ka troa kapa, me tha kapa la mele ka pë pun, thenge la aqane ujë i angatr.
‘ANGATR A EATRONGËNE LA KA ALANYIMU KOWE LA THIINA KA MEKÖT’
9-10. Nemene la itre xaa ewekë ka troa traqa thupene la akötr atraqatr? Nge drei la itre ka “hudume tune la lai ne hnengödrai”?
9 E jë la Daniela 12:3. Nemene la itre xaa ewekë ka troa traqa thupene la “ijine akötr”? Tune fe ngöne Daniela 12:2, kola qaja ngöne la xötre 3 la ka troa traqa thupene la akötr atraqatr.
10 Drei la itre ka “hudume tune la lai ne hnengödrai”? Kola xatua së troa trotrohnine lai hnene la hna qaja hnei Iesu ngöne Mataio 13:43 ka hape : “Ame la itre ka meköt, tro angatr a hudrume tune la jö ngöne la Baselaia ne la Keme i angatr.” Iesu a qaja ngöne la xötr, la “itre neköne la Baselaia,” kolo itre trejin hna iën ka troa ce musi me nyidrë ngöne la Baselaia e hnengödrai. (Mat. 13:38) Haawe, ame ngöne Daniela 12:3 kola qaja la itre hna iën, memine la huliwa hnei angatr hna troa kuca elanyi ngöne la 1 000 lao macatre.
Tro la ala 144 000 a ce huliwa me Iesu Keriso ngöne la 1 000 lao macatre, me elemekene lo porogaram ne ini hna troa acil e celë fen (Wange ju la paragarafe 11)
11-12. Nemene la hna troa kuca hnene lo ala 144 000 ngöne la 1 000 lao macatre?
11 Tune kaa la aqane tro la itre hna iën a eatrongëne “la ka ala nyimu kowe la thina ka meköt”? Tro la ala 144 000 a ce huliwa me Iesu Keriso ngöne la 1 000 lao macatre, me elemekene lo porogaram ne ini hna troa acil e celë fen. Tha angatr hmekuje kö a troa joxu, ngo tro fe angatr a itretre huuj. (Hna ama. 1:6; 5:10; 20:6) Pine laka itretre huuje fe angatr, tro angatr a “aloine [trootro] la itre nöj” utihë la troa pexeje la itre atr. (Hna ama. 22:1, 2; Ezek. 47:12) Tha fene madrine kö elany kowe la itre hna iën!
12 Drei la itre ka troa hane sine “la ka ala nyimu” hna troa eatrongëne kowe la thiina ka meköt? Kolo itre hna amelene hmaca, me itre ka mele pe qa ngöne la isi Amagedro, memine fe la itre nekönatr hna hnahon ngöne la fene ka hnyipixe. Ame hë ngöne la pune la 1 000 lao macatre, ke pexej asë hë la itre atr hune la ihnadro. Ngo eu la ijine troa sija paluane la itre ëje i angatr ngöne la tusi ne mel?
ITUPATH TIXENUË
13-14. Nemene la nyine troa kuca hnene la itre atr ka pexeje hë, matre troa hetrenyi la mel ka pë pun?
13 Tha hnene kö laka, pexeje hë la atr matre ijiji angeice hë troa hetrenyi la mel ka pë pun. Pane meku Adramu jë së me Eva. Lue ka pexeje nyidroti lo, ngo loi e tro nyidroti a pane drengethenge Iehova matre hetrenyi la mele ka pë pun. Ame pe, tha celë kö la hnei nyidroti hna kuca.—Rom. 5:12.
14 Tune kaa la itre atr ngöne la pune la 1 000 lao macatre? Tro asë hi angatr a pexej. Ngo hapeu, tro kö angatr asë a isigöline la musi cile i Iehova? Maine tro pe kö itre xan a tui Adramu me Eva, lue ka pexej ngo tha ka mele nyipici kö? Eu la troa sa la itre hnyinge celë?
15-16. (a) Eue la ijin tro la nöjei atr a isa amamane ka hape, angatr a mele nyipici koi Iehova? (b) Nemene la hna troa amamane hnene la itupath tixenuë i Satana?
15 Troa umë Satana ngöne la gaa jidr koi 1 000 lao macatre. Ame e cili, thatreine hmaca kö angeic troa amenune la ketre atr. Ngo thupene la 1 000 lao macatre, tro hmaca a nue angeic. E cili, tro angeic a tupathe lo itre atr ka pexeje hë. Ame ngöne la itupath cili, tro la nöjei atr a isa amaman ka hape, angatre kö a metrötrëne la ëje i Iehova me isigöline la musi cile i Nyidrë. (Hna ama. 20:7-10) Tro la isa aqane ujë i angatr kowe la itre itupathi Satana a amamane ka hape, ijije kö tro hane sija paluane la ëje i angatr ngöne la tusi ne mel.
16 Alanyimu catr la itre ka troa thipetrije la musi Iehova, tui Adramu me Eva. Nemene la pun koi angatr? Öni Hna Amaman 20:15 : “Ame la nöjei atr ka pë ëjen hnine la tusi ne mel, hna kuië angatre fe hnine la hneopegejë eë.” Eje hi, troa apatrene palua angatr. Ngo tru catre kö hnei atr ka troa mele nyipici ngöne la itupath cili. Haawe, tro ha cinyanyine palua la itre ëje i angatr ngöne la tusi ne mel.
NGÖNE LA “IJINE LA PUN”
17. Thenge la hna qaja hnene la angela koi Daniela, nemene la ka troa traqa ngöne la hneijine së? (Daniela 12:4, 8-10)
17 Pi tro catre së a atre la itre ewekë ka troa traqa elany! Hnene la ketre angela hna qaja koi Daniela la itre ewekë ka troa traqa ngöne la hneijine së, ene la “ijine la pun.” (E jë la Daniela 12:4, 8-10; 2 Tim. 3:1-5) Önine la angela: ‘Troa mama cile la nyipi inamacan.’ Kolo lai a hape, tro la itre hlue i Iehova a trotrohnine hnyawa la itre hna perofetan ngöne la tusi Daniela. Ngo önine hmaca la angela ka hape, ngöne palahi la ijine cili, “tro la ite ka ngazo a kuca pala kö la ngazo ; nge pëkö ate ka ngazo troa trotrohnin.”
18. Nemene la ka troa traqa kowe la itre atr ka ngazo?
18 Ame la easa goeën enehila la itre atr ka ngazo, kösë ka loi hi la mele i angatr. (Mal. 3:14, 15) Ngo easenyi hë tro Iesu a ameköti angatr. Tro nyidrë a aisa angatr, itre nani, memine la itre hna aceitunën me itre mamoe. (Mat. 25:31-33) Troa apatrenyi angatr ngöne la akötr atraqatr, nge tha tro kö a amele angatr ngöne la fen ka hnyipixe. Pë fe kö ëje i angatr ngöne la “tusi ne amekunëne” thenge la hna qaja hnei Malaki 3:16.
19. Nemene la nyine tro sa canga kuca enehila? Nge pine nemen? (Malaki 3:16-18)
19 Enehila hi la ijin tro sa amaman ka hape, tha ce easë kö memine la itre atr ka ngazo. (E jë la Malaki 3:16-18.) Iehova a acasine la itre atr ka mele nyipici matre ewekë i Nyidrëti pë hë angatr, kolo itre atr hnei Nyidrëti hna hnim catrën. Nge aja së hi lai troa ce memine la itre hnei Nyidrëti hna hnim.
Easa lapa treqene la ijine tro Daniela, me itre sinee së, me itre xane ju kö a ‘mejë’ hmaca troa isa kepe edröne ngöne la fen ka hnyipixe! (Wange ju la paragarafe 20)
20. Nemene la hnei Iehova hna qaja koi Daniela? Nge hnauëne laka, easa lapa treqene la ijine cili?
20 Easë hnyawa hi a melën la hneijin ka ketrepengön. Ngo hetre ewekë palakö hne së hna treqen. Easenyi hë matre goeëne jë së la kola apatrene la ngazo e celë fen. Nge tro fe sa öhne la kola eatr lo hnei Iehova hna qaja koi Daniela ka hape: “Tro eö a mejë ngöne la itre drai ne la pun troa kapa la edrö i eö.” (Dan. 12:13, MN) Epuni kö a lapa treqene la ijine tro Daniela me itre sinee i epun a ‘mejë’ hmaca? Nga isine jë troa mele nyipici utihë la pun. Ame hë e cili, tro ha sija paluan la ëje i epun ngöne la tusi ne mel.
NYIMA 80 “Demeju, Nge Atejë Laka Ate Ihnimi Iehova”
^ Ame la tane mekun celë, ke kola qejepengöne hnyawa la porogaram ne ini Tusi Hmitrötr hna perofetan ngöne Daniela 12:2, 3. Tro sa ce wang ka hape, eu la ijine kola acil, nge drei la ka troa sine la porogaram ne ini cili. Easë fe a troa ce wang la aqane tro la itre ini cili a hnëkën la itre atr kowe la itupath tixenuë ngöne lo pun la 1 000 lao macatre ne Musi Keriso.
^ Maine jë troa amelene panëne la itre atr ka mele nyipici nge ka mec ngöne lo itre drai ne la pun, pine laka kola troa amelene trongëne la itre atr thenge la isa xötre i angatr. Maine eje hi la aqane trongen la mele hmaca, ke ijije hi tro sa kapa la itre ka mec nge hne së hna atre ngöne la isa hneijine i easë. Pine laka Tusi Hmitrötr a qaja ka hape, hetre hna troa amelen panën e koho hnengödrai, haawe ijije fe hi tro sa mekun ka hape, troa hane tun göne la mele hmaca e celë fen.—1 Kor. 14:33; 15:23.
^ Kola saze e celë la itre hna qejepengöne ngöne la mekene 17 ne la itus Prêtons attention à la prophétie de Daniel ! me ngöne la Ita Ne Thup 1 Julai 1987, g. 21-25 (Qene Wiwi).
^ Ngo ame la itre hnaewekë, “itre atre ka meköt” me “ka tha meköti kö” ngöne Itre Huliwa 24:15 memine la “itre ka kuca la loi” me “itre ka kuca la ngazo,” ngöne Ioane 5:29, ke kola qaja la aqane ujë ne la itre atr qëmekene tro angatr a mec.
