SUTUDI-ARTIKEL 40
‘Den o yeepi tyaipi sama fu toon leti-ati sama’
‘Den sama di e yeepi tyaipi sama fu toon leti-ati sama o de enke den sitali di e beenki fu teego.’—DAN. 12:3.
SINGI 151 Gadu o kai den
SAN WO LELI a
1. San o pasa na a ten fu a Dunsu Yali Tii?
PAKISEI fa aw de te omen sama o weki baka na a ten fu a Dunsu Yali Tii fu Kelestesi. Ala den sama di lasi wan sama fu den aini dede e angii fu si den baka. A so Yehofa e fii tu (Yopu 14:15). Ná pikin piisii wo piisii te den sama fu u o weki baka. Enke faw be luku aini a artikel di pasa, da den ‘sama di be libi a wan letifasi’ ‘o weki baka fu fende libi’. Den sama ya nen sikiifi aini a buku fu libi (Toli 24:15; Yoh. 5:29). Kande den sama fu u di dede, de aini a kulu fu den fosi sama di o weki baka. b Ma den ‘sama di á be libi a wan letifasi’, dati wani taki den sama di á be fende a okasi fu leli sabi Yehofa fosi den dede, o weki baka tu. Den o ‘weki baka fu fende kuutu’.
2-3. (a) Enke fa Yesaya 11:9, 10 e soi, da san den sama di o weki baka o leli? (b) San wo luku aini a artikel ya?
2 Ala den sama di o weki baka o abi leli fanowdu (Yes. 26:9; 61:11). Neen meke wan gaan wooko o du a hii goontapu fu leli sama. (Leisi Yesaya 11:9, 10.) Den sama di á be libi a wan letifasi di o weki baka o leli sabi sama a Yesesi, san na a Kownukondee fu Gadu, saide Yesesi be kon dede gi u, anga saide a Yehofa wawan abi a leti fu tii. Den sama di be libi a wan letifasi di o weki baka, o abi fu leli wantu nyun sani di Yehofa be abi a pakisei gi a goontapu. Son wan fu den sama ya dede fosi a Beibel kaba sikiifi. Den sama di be libi a wan letifasi, anga den sama di a be libi a wan letifasi o abi fu leli tyaipi sani.
3 Aini a artikel ya wo poti pakisei a den akisi ya: Fa wo leli den sama ya? San o pasa anga den sama di o du san den leli? San o pasa anga den sama di naw wani du san den leli? Den piki fu den akisi ya pelensipali gi u. Den polofeititoli di sikiifi aini Daniyeli anga Openbaring, o yeepi u fu fusutan san o pasa te den sama di be dede o weki baka. Meke u luku a simpan polofeititoli di sikiifi a Daniyeli 12:1, 2 fosi.
‘DEN SAMA DI E SIIBI A ONDOO DOTI O WEKI BAKA’
4-5. San Daniyeli 12:1 be taki fu a ten fu a kaba?
4 Leisi Daniyeli 12:1. A Beibel buku Daniyeli e soi fa sani be o pasa baka makandaa na a ten fu a kaba. Daniyeli 12:1 e soi fa Mikayeli, wan taa nen fu Yesesi Kelestesi, ‘opo taki gi a foluku fu Gadu’. A pisi fu a polofeititoli ya bigin kon tuu aini a yali 1914, di Yesesi toon Kownu fu Gadu Kownukondee a hemel.
5 Ma Daniyeli be yee tu taki Yesesi be o ‘opo du sani’ te wan ten fu banowtu’ be o kon. ‘Fanafu a ten fu den fosi sama te enke a ten de noiti ete sowan banowtu be de.’ A ‘banowtu’ ya, na a ‘gaan banowtu’ di Mateyesi 24:21 e taki fi en. Na a kaba fu a gaan banowtu na a ten fu Alimakedon, Yesesi o opo fu kon kibii a foluku fu Gadu. A Beibel buku Openbaring e taki fu wan ‘gaan kulu sama’ di o ‘pasa a gaan banowtu’ libilibi.—Openb. 7:9, 14.
6. San o pasa baka te a gaan kulu o pasa a gaan banowtu? (Luku a artikel di den e kai ‘Sani di leisiman akisi’, di de aini A Wakititolen ya di e taki fu a weki di sama o weki baka.)
6 Leisi Daniyeli 12:2. San o pasa baka te a gaan kulu o pasa a gaan banowtu? Fosi u be e denki taki Daniyeli 12:2 be e soi go na a fasi fa a peleikiwooko be go a fesi baka di den be tapu a wooko aini a yali 1918. c Ma u kon fusutan now taki na a weki di sama o weki baka aini a nyun goontapu a tekisi ya e taki. Saide u taki so? Den wowtu ‘ondoo doti’ di sikiifi a Daniyeli 12:2, sikiifi aini Yopu 17:16 tu. Den wowtu ya wani taki ‘geebi’. A sani ya e soi taki na a opobaka di o pasa baka Alimakedon Daniyeli 12:2 e taki.
7. (a) Aini Daniyeli 12:2, a sikiifi taki son sama ‘o weki fu fende teego libi’. San a sani ya wani taki? (b) Saide den sama ya o ‘weki baka a wan moo bun fasi’?
7 Aini Daniyeli 12:2, a sikiifi taki son sama ‘o weki fu fende teego libi’. San a sani ya wani taki? A sani ya e soi taki efu den sama di o weki baka na a ten fu a Dunsu Yali Tii tan meke moiti fu leli sabi Yehofa anga Yesesi, neen den tan du sani enke fa Yehofa wani, den o fende teego libi (Yoh. 17:3). Den sama ya o ‘weki baka a wan moo bun fasi’ (Heb. 11:35). Saide? Bika den naw dede moo, enke den sama di be weki baka na a ten fu Beibel.
8. A polofeititoli fu Daniyeli e soi taki son sama ‘o weki baka fu teke sen, taawan o toon wan sani di sama e buuse fu teego’. San a sani ya wani taki?
8 A ná ala den sama di o weki baka o wooko anga den sani di Yehofa o leli den. Daniyeli be taki aini a polofeititoli fi en taki son sama ‘o weki baka fu teke sen anga fu toon wan sani di sama e buuse fu teego’. Fu di den sama ya naw wani saka denseefi, meke den nen naw sikiifi aini a buku fu libi. Neen meke den naw fende teego libi. Den o ‘toon wan sani di sama e buuse fu teego’, dati wani taki den o dede fu teego. Den sani di sikiifi a Daniyeli 12:2 e soi fa sani o waka gi den sama di o weki baka (Openb. 20:12). Son sama o fende teego libi, ma taawan o dede baka. A den sani di den o du baka te den weki baka, o soi efu den o fende teego libi efuso dede. d
‘DEN O YEEPI TYAIPI SAMA FU TOON LETI-ATI SAMA’
9-10. San a wan taa sani di o pasa baka a gaan banowtu? Sama a den sama di o ‘beenki enke hemel’?
9 Leisi Daniyeli 12:3. San a wan taa sani di o pasa baka a gaan banowtu? Leti enke fa Daniyeli 12:2 e taki fu sani di o pasa baka a gaan banowtu, a so vers 3 e taki fu wan sani di o pasa baka a gaan banowtu tu.
10 Sama a den sama di o ‘beenki enke hemel’? A sani di Yesesi be taki a Mateyesi 13:43 e yeepi u fu fusutan sama a den sama ya: ‘Na a ten de, den sama di Gadu fende bun o beenki enke a san aini a Kownukondee fu den Dda.’ Di Yesesi be e taki den sani ya, a den ‘Manpikin fu a Kownukondee’ a be e taki. Den sama ya a den sama di o tii makandaa anga Yesesi a hemel (Mat. 13:38). Neen meke u sa biibi taki a den sama di o tii makandaa anga Yesesi Daniyeli 12:3 e taki. A sani di sikiifi aini a tekisi ya, e soi sowtu wooko den o du na a ten fu a Dunsu Yali Tii.
Den 144.000 sama di o go a hemel o wooko makandaa anga Yesesi 1000 yali langa fu yeepi sama fu sabi Yehofa (Luku paragraaf 11)
11-12. Sowtu wooko den sama di o tii makandaa anga Yesesi o du na a ten fu a Dunsu Yali Tii?
11 Fa den salufuwan o yeepi den ‘tyaipi sama fu toon leti-ati sama’? Den o wooko makandaa anga Yesesi Kelestesi fu leli sama a hii goontapu na a ten fu a Dunsu Yali Tii. Boiti taki den 144.000 sama di o go a hemel o tii makandaa anga Yesesi enke kownu, den o du wooko enke pilisite tu (Openb. 1:6; 5:10; 20:6). Beibel taki ‘den o deesi den foluku’. Dati wani taki den o yeepi libisama fu den naabi sondu moo (Openb. 22:1, 2; Eseik. 47:12). Anga ala piisii den o du a wooko ya.
12 Sama a den ‘tyaipi sama’ di den o yeepi fu toon leti-ati sama? Dati a den sama di o weki baka anga den sama di o pasa Alimakedon libilibi. Kande den pikin di o meke na a ten fu a Dunsu Yali Tii o de aini a kulu ya tu. Na a kaba fu a Dunsu Yali Tii, nawan sama di o de a goontapu o abi sondu moo. Ma a ten de anga potolowtu den nen o sikiifi aini a buku fu libi. On ten den nen o sikiifi anga enki aini a buku fu libi?
A LASITI TESI
13-14. San den sama di naw abi sondu moo o abi fu du, fu man fende teego libi?
13 Te wan sama naabi sondu moo, a sani ya á wani taki a fende teego libi kaba. Pakisei Adan anga Efa, den á be abi sondu. Ma efu den be wani libi fu teego, den be mu soi taki den be o aliki Yehofa ala yuu. Ma a tyali taki den ná aliki en.—Rom. 5:12.
14 Fa sani o de gi den sama di o de a goontapu na a kaba fu a Dunsu Yali Tii? Nawan fu den sama ya o abi sondu moo. Ma, na ala den sama ya o holibaka gi Yehofa? Efuso son wan fu den o de enke Adan anga Efa? Meke u luku fa sani o waka.
15-16. (a) On ten ala sama a goontapu o fende a okasi fu soi taki den nai gwe fika Yehofa? (b) San o pasa baka a lasiti tesi?
15 Den o sooto Saatan wan dunsu yali langa. A ten di aw sooto, a naw poi koli sama moo. Ma na a kaba fu a Dunsu Yali Tii, den o losi en baka. Faisi aw losi, a so aw meke moiti fu koli den sama di naw abi sondu moo. Ala sama o fende a okasi fu soi efu den wani Yehofa enke den Tiiman. Den o abi fu soi tu efu den e lesipeki Yehofa tuutuu (Openb. 20:7-10). A den sani di den o du te Saatan o tesi den, o soi efu den nen o sikiifi aini a buku fu libi fu teego.
16 Beibel e soi taki wantu sama o de enke Adan anga Efa. Den naw wani Yehofa enke den Tiiman. San o pasa anga den sama ya? Openbaring 20:15 e taki: ‘A fiingi ala den sama di nen á be sikiifi aini a buku fu libi, go aini a faya di de enke wan se.’ A tekisi ya e soi taki ala den sama di naw wani saka denseefi a Yehofa ondoo, o dede fu teego. Ma gaanse sama o pasa a lasiti tesi. Den nen fu den sama ya o sikiifi aini a buku fu libi fu teego.
‘A TEN FU A KABA’
17. San wan engel be taigi Daniyeli taki be o pasa na ‘a ten fu a kaba’? (Daniyeli 12:4, 8-10)
17 Ná pikin taanga-sikin we fende te we pakisei den sani di o pasa aini a ten di e kon. Ma Daniyeli be taki fu sani di be o pasa aini a ten fu u ya tu. A be kai a ten ya, ‘a ten fu a kaba’. (Leisi Daniyeli 12:4, 8-10; 2 Tim. 3:1-5). Wan engel be taigi Daniyeli taki u be o kon sabi ‘omen tuu toli’. A sani ya e soi taki aini den lasiti dei, a foluku fu Gadu be o kon fusutan den polofeititoli fu Daniyeli moo bun. A engel be taki tu taki: ‘Den ogii sama o tan du den ogii di den be e du. Nawan fu den o man fusutan den toli ya.’
18. San o pasa dyonson anga den sama di nai libi enke fa Yehofa wani?
18 Aini a ten ya, ai gei enke den sama di e du ogii nai fende sitaafu fu den sani di den e du (Male. 3:14, 15). Ma dyonson Yesesi o paati sama enke kaabita anga sikapu. Aw paati den sama di e du ogii enke kaabita, ma den sama di e libi enke fa Yehofa wani o de enke sikapu (Mat. 25:31-33). Den sama di e du ogii naw pasa a gaan banowtu. Te den o dede na Alimakedon, Yehofa naw weki den moo fu libi aini a nyun goontapu. Den nen naw sikiifi aini a ‘buku’ di kai aini Maleyaki 3:16.
19. San u mu du nownow? Saide u mu du a sani ya? (Maleyaki 3:16-18)
19 A nownow u mu soi anga den sani di we du, taki wa de aini a kulu fu den sama di e du ogii. (Leisi Maleyaki 3:16-18.) Nownow Yehofa e tyai ala den sama di e libi enke fa a wani kon a wan. Ai si den enke wan ‘gudu’, bika a nai meke sipowtu anga den. U mu meke moiti fu de aini a kulu ya.
Wo poolo di wo si Daniyeli, den sama di u lobi, anga omen taa sama di o weki baka aini nyun goontapu (Luku paragraaf 20)
20. San na a lasiti sani di Yehofa paamisi Daniyeli? Saide ye angii fu a ten di a sani ya o kon tuu?
20 A wan simpan ten we libi nownow. Ma dyonson, moo simpan sani o pasa. Wo si fa Gadu o puu ala den sama di e du ogii a goontapu. Baka dati, wo si fa Yehofa o du a sani di a be paamisi Daniyeli. A be taigi en taki: ‘Yu o weki baka, fu fende i pai na a kaba fu den dei’ (Dan. 12:13). I nai angii fu si a ten di Daniyeli anga taa sama di i lobi o weki baka noh? Efu a so, i mu du ala san i poi fi ya gwe fika Yehofa. Efii tan neen se, i sa biibi taki i nen o tan sikiifi aini a buku fu libi.
SINGI 80 Kon, da yu o si fa Yehofa bun
a Aini a artikel ya, wo luku fa we fusutan a polofeititoli di sikiifi a Daniyeli 12:2, 3 nownow. A tekisi ya e soi taki wan gaan wooko o du a hii goontapu fu leli sama. Wo luku on ten a sani ya o pasa, anga sama o du a wooko ya. Wo luku tu fa a wooko ya, o yeepi sama fu pasa a lasiti tesi baka a Dunsu Yali Tii fu Kelestesi.
b Kande a den sama di be e dini Yehofa aini den lasiti dei, di holidoo te enke den dede, fosi o weki baka. Kande a den lasiti sama di dede aini a ten ya fosi o weki, baka dati den sama di be dede a den fesi. A so den sama di weki baka, o sabi den taa sama di o weki baka den, fu den bali wadaa gi den. Beibel e soi taki ibii sama di o go libi a hemel ‘o kon a libi baka te en yuu doo’. Kande a so sani o waka tu, te sama o weki baka fu libi a goontapu. Sani naw waka buuyabuuya.—1 Kor. 14:33; 15:23.
c Disi a wan nyun fasi fa we fusutan a sani di be sikiifi aini a buku di den e kai ¡Poti Prakseri na a Profeititori fu Danièl! kapitel 17, anga a san be sikiifi aini A Wakititolen fu 1 yuli 1987, blz. 21-25.
d Toli fu den apostel 24:15 e taki fu ‘sama di be libi a wan letifasi’, anga ‘sama di á be libi a wan letifasi’. Yohanisi 5:29 e taki fu ‘sama di be du bun sani’ anga ‘sama di be du ogii’. Ala den tu tekisi ya e taki fu den sani di den sama ya be du fosi den dede.
