IBUOTIKỌ UKPEPN̄KPỌ 40
‘Ẹnam Ediwak Owo Ẹkabade Ẹdi Ndinen Owo’
“Mbon oro ẹnamde ediwak owo ẹkabade ẹdi ndinen owo [ẹyeyama nte] mme ntantaọfiọn̄ ke nsinsi nsinsi.”—DAN. 12:3.
ỌYỌHỌ IKWỌ 151 Abasi Ayanam Enye Eset
SE IDIKPEPDE *
1. Nso ye nso iditịbe emi ẹdinemde owo esịt ke isua 1,000 emi Christ edikarade?
INI mme owo ẹditọn̄ọde ndiset ke isua 1,000 emi Christ edikarade edidi ata ini inemesịt! Ọdọn̄ kpukpru mbon emi mbon mmọ ẹkekpade ndikụt mmọ ẹsetde ẹdi. Ọdọn̄ Jehovah n̄ko ndifiak n̄kụt mme ufan esie emi ẹkekpade. (Job 14:15) Idara ididịghe ekpri ke nsio nsio itie ke ererimbot ini mme owo ẹdikụtde mbon mmọ emi ẹsetde ẹdi. Ima ikpekpep ke ibuotikọ emi ekebede ke “ndinen owo” emi enyịn̄ mmọ ẹwerede ke n̄wed uwem “ẹyeset . . . ẹdụk uwem.” (Utom 24:15; John 5:29) Ekeme ndidi ediwak mbon nnyịn emi ẹma ẹkekpa ẹyesịne ke otu mbon emi ẹdisetde ekpri ini ke Armageddon ama okokụre. * N̄kpọ efen edi ke “mme anam ukwan̄n̄kpọ,” oro edi, mbon oro mîkenen̄ekede inyene ifet ndidiọn̄ọ Jehovah mbemiso mmọ ẹkpade, m̀mê emi mîkatuakke ibuot inọ enye mbemiso mmọ ẹkpade “ẹyeset . . . ẹdụk ikpe.”
2-3. (a) Isaiah 11:9, 10 owụt ke ẹdikpep mme owo nso ke isua 1,000 emi Christ edikarade? Ntak ẹdikpepde? (b) Idineme nso ke ibuotikọ emi?
2 Eyedi se ẹkpepde kpukpru mbon emi ẹdisetde idi n̄kpọ. (Isa. 26:9; 61:11) Ntre ẹyekpep mme owo n̄kpọ ke usụn̄ emi owo mîkpepke akanam. (Kot Isaiah 11:9, 10.) Ntak kiet emi ẹdikpepde ntre edi ke oyoyom mme anam ukwan̄n̄kpọ emi ẹdisetde ẹdi ẹdiọn̄ọ n̄kpọ ẹban̄a Jesus Christ, ukara Abasi, nte Jesus akakpade afak nnyịn, enyịn̄ Jehovah, se enyịn̄ oro ọwọrọde, ye ntak emi Jehovah ikpọn̄ enyenede unen ndikara nnyịn. Ẹyekpep ndinen owo n̄kpọ n̄ko sia ana mmọ ẹdiọn̄ọ nte Jehovah akasan̄ade an̄wam ikọt esie sụn̄sụn̄ tutu mmọ ẹdiọn̄ọ se enye aduakde ndinam ke isọn̄. Ndusụk nti ikọt Abasi oro ẹma ẹkpa anyan ini mbemiso ẹwetde Bible ẹma. Se mme anam ukwan̄n̄kpọ ye ndinen owo ẹdikpepde ididịghe ekpri.
3 Imọn̄ ineme mme mbụme emi ke ibuotikọ emi: Ẹdinam didie ikpep mme owo se isụk idọhọde emi? Nso iditịbe inọ mbon emi ẹdinyịmede se ẹkpepde mmọ, ye mbon emi mîdinyịmeke? Ibọrọ mme mbụme oro akpana ebehe nnyịn. Nte inemede ika, iyokụt nte ndusụk prọfesi ke n̄wed Daniel ye Ediyarade ẹnamde inen̄ede idiọn̄ọ se iditịbede ini ẹdinamde mme owo ẹset. Edi yak ibem iso ineme mme akpan n̄kpọ emi ẹtịn̄de ẹban̄a ke prọfesi Daniel 12:1, 2.
“MBON EMI ẸDEDE KE NTAN . . . ẸYEDEMEDE”
4-5. Daniel 12:1 owụt ke nso iditịbe ke utịt ini?
4 Kot Daniel 12:1. N̄wed Daniel anam ikụt mme akpan n̄kpọ emi ẹditịbede ke utịt ini ye nte mmọ ẹditịbede ke adiana ke adiana. Kiet edi ke Daniel 12:1 owụt ke Michael emi edide Jesus Christ, ke ‘ada ọnọ’ ikọt Abasi. Enye oro ọkọtọn̄ọ nditịbe ke 1914, ini ẹkemekde Jesus Edidem Obio Ubọn̄ Abasi ke heaven.
5 Edi ẹma ẹdọhọ Daniel n̄ko ke Jesus “ayadaha ada” ke “ini nnanenyịn . . . emi akanam orụk esie mîdụhe toto nte idụt okodu tutu esịm ini oro.” “Ini nnanenyịn” oro edi “akwa ukụt” emi ẹtịn̄de ẹban̄a ke Matthew 24:21. Jesus ayadaha ada, oro edi, enye ayan̄wam ikọt Abasi ke utịt ini nnanenyịn oro, emi edide Armageddon. Ikọt Abasi oro ẹdi akwa otuowo emi n̄wed Ediyarade ọdọhọde ke ‘ẹto akwa ukụt ẹwọn̄ọ.’—Edi. 7:9, 14.
6. Nso iditịbe ke akwa otuowo ẹma ẹkebọhọ akwa ukụt? Ntak ọdọhọde ntre? (Se n̄ko se ẹtịn̄de ẹban̄a mbon emi ẹdinamde ẹset ẹdidu ke isọn̄ emi ke “Mme Mbụme Oro Mme Andikot Ẹbụpde” ke Enyọn̄-Ukpeme emi.)
6 Kot Daniel 12:2. Nso iditịbe ke akwa otuowo ẹma ẹkebọhọ ini nnanenyịn oro? Ikesikere ke Daniel 12:2 etịn̄ aban̄a nte ikọt Abasi ẹkefiakde ẹsịn idem ẹnam n̄kpọ Abasi ke mme asua ẹma ẹkekpere nditre utom ukwọrọikọ ke 1918. Edi idịghe se prọfesi oro ọwọrọde edi oro. Nte an̄wan̄ade nnyịn idahaemi edi ke prọfesi oro aban̄a nte ẹdinamde mme owo ẹset ke obufa ererimbot emi edide ke iso. * Ntak idọhọde ntre? Ke Job 17:16, ikọ oro “ntan” edi ukem n̄kpọ ye “Udi.” Ntre, ntan ke prọfesi Daniel oro ada aban̄a udi n̄ko. Oro ọwọrọ ke Daniel 12:2 aban̄a nte ẹdinamde mme owo ẹset ke mme akpatre usen ẹma ẹketre, ekọn̄ Armageddon onyụn̄ okụre.
7. (a) Bible ndidọhọ ke ndusụk owo ẹyeset ẹdụk “nsinsi uwem” ọwọrọ nso? (b) Didie ke enye oro edi “ediset ke n̄kpa eke ọfọnde akan”?
7 Edi Daniel 12:2 ndidọhọ ke ndusụk owo ẹyeset ẹdụk “nsinsi uwem” ọwọrọ nso? Ọwọrọ ke mbon emi ẹsetde ẹdi ẹnyụn̄ ẹdiọn̄ọde Jehovah ye Jesus, m̀mê emi ẹkade iso ẹnam se idin̄wamde mmọ ẹdiọn̄ọ Jehovah ye Jesus ẹkan nte ẹkediọn̄ọde, ẹnyụn̄ ẹnamde se mmọ ẹdọhọde ke isua 1,000 emi Christ edikarade ẹyenyene nsinsi uwem ke akpatre. (John 17:3) Ediset ke n̄kpa enye oro edi “ediset ke n̄kpa eke ọfọnde akan” eke eyo Bible. (Heb. 11:35) Ntak idọhọde ntre edi ke mbon eyo Bible emi ẹkenamde ẹset ikọfọnke ima, mmọ ẹma ẹfiak ẹkpa nte ini akakade.
8. Didie ke ndusụk owo ẹdiset ẹdụk “bụt ye nsinsi esuene”?
8 Idịghe kpukpru mbon emi ẹdisetde idi ẹdinyịme se Jehovah edikpepde mmọ. Prọfesi Daniel ọdọhọ ke ndusụk owo ẹyeset ẹdụk “bụt ye nsinsi esuene.” Sia mmọ ẹdisọn̄de ibuot, owo idiwetke enyịn̄ mmọ isịn ke n̄wed uwem, mmọ idinyụn̄ inyeneke nsinsi uwem. Utu ke oro, utịp mmọ edidi “nsinsi esuene,” m̀mê nsobo. Ntre Daniel 12:2 etịn̄ se iditịbede ke utịt inọ kpukpru mbon emi ẹdisetde idi ẹtiene nte mmọ ẹdinamde n̄kpọ ke mmọ ẹma ẹkeset ẹdi. * (Edi. 20:12) Ndusụk mmọ ẹyenyene nsinsi uwem, ndusụk idinyeneke.
‘ẸNAM EDIWAK OWO ẸKABADE ẸDI NDINEN OWO’
9-10. (a) Daniel 12:3 owụt ke nso efen iditịbe ke akwa ukụt ama okokụre? (b) Mmanie ‘ẹdiyama nte un̄wana ikpaenyọn̄’?
9 Kot Daniel 12:3. “Ini nnanenyịn” emi edide ke iso ama okụre, nso efen iditịbe? Daniel 12:2 ama etịn̄ se iditịbede akwa ukụt ama ebe, edi ufan̄ikọ 3 etịn̄ n̄kpọ efen emi editịbede n̄ko.
10 Mmanie ‘ẹdiyama nte un̄wana ikpaenyọn̄’? Se Jesus eketịn̄de ke Matthew 13:43 ọfọi nnyịn owụt. Itie oro ọdọhọ: “Adan̄aoro ndinen owo ẹyeyama nte utịn ke obio ubọn̄ Ete mmọ.” Se Jesus ekenemede ini enye etịn̄de ikọ oro owụt ke enye eketịn̄ aban̄a “nditọ obio ubọn̄,” oro edi mbon emi ẹyetde aran, emi ẹditienede enye ikara ke heaven. (Matt. 13:38) Ntre se ẹtịn̄de ke Daniel 12:3 edida aban̄a mbon emi ẹyetde aran ye utom emi mmọ ẹdinamde ke isua 1,000 emi mmọ ẹditienede Christ ikara.
Owo 144,000 ẹyedian ubọk ye Jesus Christ ẹda usụn̄ ke se ẹdikpepde mme owo ke isua 1,000 emi mmọ ẹdikarade (Se ikpehe 11)
11-12. Nso utom ke owo 144,000 emi ẹditienede Christ ikara ẹdinam ke isua 1,000 oro?
11 Didie ke mbon emi ẹyetde aran ẹdinam “ediwak owo ẹkabade ẹdi ndinen owo”? Mbon emi ẹyetde aran ẹyedian ubọk ye Jesus Christ ẹda usụn̄ ke se ẹdikpepde mme owo mi ke isọn̄ ke isua 1,000 emi mmọ ẹdikarade. Owo 144,000 oro ẹyedi ndidem, ẹfiak ẹdi mme oku. (Edi. 1:6; 5:10; 20:6) Sia mmọ ẹdidide mme oku, mmọ ẹyen̄wam “ẹkọk mme idụt udọn̄ọ,” ẹyenyụn̄ ẹn̄wam mme owo ẹfọn ẹma sụn̄sụn̄ sụn̄sụn̄. (Edi. 22:1, 2; Ezek. 47:12) Utom oro eyenem mmọ etieti!
12 Mmanie ẹdisịne ke otu “ediwak owo” emi ẹdinamde ẹkabade ẹdi ndinen owo? Mmọ ẹdidi mbon emi ẹdinamde ẹset, mbon emi ẹdibọhọde Armageddon, ye nditọ emi ẹdimanade ke obufa ererimbot. Ke utịt isua 1,000 emi Christ edikarade, kpukpru owo ke isọn̄ emi ẹyefọn ẹma. Ini ewe ndien ke ẹdiwet enyịn̄ mmọ taktak ke n̄wed uwem nte ẹwet ke pen?
AKPATRE UDOMO
13-14. Nso ke ana kpukpru mbon emi ẹdifọnde ẹma ke isọn̄ ini oro ẹnam mbemiso mmọ ẹnyene nsinsi uwem?
13 Ti ke owo ndifọn mma iwọrọke ke enye eyenyene nsinsi uwem. N̄kọ emeti Adam ye Eve? Mmọ ẹma ẹfọn ẹma, edi akana mmọ ẹkop uyo Jehovah Abasi mbemiso mmọ ẹnyenede nsinsi uwem. Mmọ ikokopke uyo esie; ama ọdiọk etieti.—Rome 5:12.
14 Mbon emi ẹdidude ke isọn̄ ke utịt isua 1,000 emi Christ edikarade ẹdinam n̄kpọ didie? Ini oro kpukpru owo ẹyefọn ẹma. Ndi kpukpru mbon emi ẹdifọnde ima do ẹyenyịme ke ofụri esịt mmọ yak Jehovah akara mmimọ ke nsinsi? Mîdịghe ndi ndusụk mmọ ẹyenam se Adam ye Eve ẹkenamde, ẹsịn ndisọn̄ọ nda ye Jehovah kpa ye emi mmọ ẹfọnde ẹma? Eyedi se ẹbọrọde mme mbụme oro, edi ẹdibọrọ didie?
15-16. (a) Ini ewe ke kpukpru owo ẹdinyene ifet ndiwụt ke mmimọ ida ye Jehovah? (b) Nso iditịbe ke utịt udomo oro?
15 Ẹyemụm Satan ẹkọbi ke isua 1,000, enye idinyụn̄ ikemeke nditụn owo ndomokiet usụn̄ ini oro. Edi ke isua 1,000 oro ama okokụre, ẹyekpọk enye ẹyak. Enye oyodomo nditụn mbon emi ẹma ẹkefọn ẹma do usụn̄. Ini oro, kpukpru owo ke isọn̄, emi ẹma ẹkefọn ẹma ẹyenyene ifet ndinam ẹnen̄ede ẹkụt m̀mê mmimọ imokpono enyịn̄ Jehovah inyụn̄ inyịme Jehovah akara mmimọ. (Edi. 20:7-10) Se owo kiet kiet edinamde ini Satan edidomode odudu esie ise do ke ẹdida ibiere m̀mê edi se ẹwetde enyịn̄ esie taktak ẹsịn ke n̄wed uwem.
16 Ndusụk owo ẹyenam se Adam ye Eve ẹkenamde, mmọ idinyịmeke Jehovah akara mmimọ. Edi owo itịn̄ke m̀mê mmọ ẹdidi owo ifan̄. Nso iditịbe inọ mmọ? Ediyarade 20:15 ọdọhọ nnyịn ete: “[Ẹyetop] owo ekededi emi owo mîkwe enyịn̄ esie ke n̄wed uwem ẹsịn ke n̄kpọdiọhọ ikan̄ oro.” Ẹyesobo kpukpru mbon nsọn̄ibuot oro ẹfep ke nsinsi. Edi mbon emi ẹdibede akpatre udomo ẹyewak ẹkan mbon emi ẹdisobode ifep. Ini oro ndien ke ẹdiwet enyịn̄ mmọ taktak ke n̄wed uwem.
SE IDITỊBEDE KE “UTỊT INI”
17. Angel ọkọdọhọ Daniel ke nso iditịbe ke eyo nnyịn? (Daniel 12:4, 8-10)
17 Enenem nnyịn ndikere mban̄a kpukpru se iditịbede oro ke ini iso! Edi angel kiet ama ọdọhọ Daniel mme akpan n̄kpọ efen emi ẹditịbede ke eyo nnyịn emi Bible okotde “utịt ini.” (Kot Daniel 12:4, 8-10; 2 Tim. 3:1-5) Angel oro ọkọdọhọ Daniel ke “ata ifiọk oyokpon.” Oro ọwọrọ ke mme prọfesi emi ẹdude ke n̄wed Daniel ẹyenen̄ede ẹn̄wan̄a ikọt Abasi. Angel oro ama ọdọhọ enye n̄ko ke utịt ini, ke “mme idiọkowo ẹyedọdiọn̄ ẹdiọk, ndien baba idiọkowo kiet idifiọkke” se ikọt Abasi ẹdifiọkde.
18. Nso iditịbe inọ ndiọi owo ekpri ini ke iso?
18 Ekeme nditie nnyịn mfịn nte edi ndiọi owo ẹma ẹnam idiọkn̄kpọ ẹma, mmọ ẹdia ẹnyọn̄, n̄kpọ inamke mmọ. (Mal. 3:14, 15) Edi ekpri ini ke iso, Jesus eyedi ndibiere ikpe. Enye ayadian̄ade ndiọi owo emi Bible okotde mme ebot ọkpọn̄ nti owo emi Bible okotde mme erọn̄. (Matt. 25:31-33) Ndiọi owo oro idibọhọke akwa ukụt, owo idinyụn̄ inamke mmọ ẹset ẹdidu uwem ke obufa ererimbot. Enyịn̄ mmọ ididụhe ke “n̄wed editi” emi ẹtịn̄de ẹban̄a ke Malachi 3:16.
19. Nso ke ikpanam idahaemi? Ntak anade inam? (Malachi 3:16-18)
19 Idahaemi ke ana iwụt ke nnyịn isịneke ke otu ndiọi owo. (Kot Malachi 3:16-18.) Jehovah ke atan̄ mbon emi enye adade nte “akpan inyene” m̀mê n̄kpọuto obok. Iyom ndisịne ke otu mbon enye oro.
Ẹyenem nnyịn ndikụt nte Daniel, mbon nnyịn, ye ediwak mbon en̄wen ‘ẹdahade ẹda’ ẹbọ udeme mmọ ke obufa ererimbot! (Se ikpehe 20)
20. Nso idi akpatre n̄kpọ emi ẹken̄wọn̄ọde ẹnọ Daniel? Ntak emi ọdọn̄de fi ndikụt ini emi n̄kpọ oro editịbede?
20 Akpan ini ke idu uwem emi. Ndyọ ndyọ n̄kpọ ke ẹtịbe, edi se iditịbede ke ini iso ayakan oro. Ekpri ini ke iso, iyokụt nte ẹsobode kpukpru ndiọi owo, kpukpru ndiọi n̄kpọ ẹnyụn̄ ẹtre. Ke oro ebede, iyokụt nte se Jehovah ọkọn̄wọn̄ọde ọnọ Daniel etịbede. Jehovah ọkọdọhọ enye ete: “Afo ayadaha ada ọbọ udeme fo ke utịt mme usen.” (Dan. 12:13) Ndi ọdọn̄ fi ndikụt usen emi Daniel ye mbon mbufo ẹdifiakde ‘ẹdaha ẹda’? Ekpedi ntre, domo nte ekekeme idahaemi ndisọn̄ọ nda ye Jehovah. Ama anam ntre, inyeneke se idinamde ẹsio enyịn̄ fo ẹfep ke n̄wed uwem emi Jehovah osụk ewetde.
ỌYỌHỌ IKWỌ 80 Di Tabi Se Nte Jehovah Ọfọnde
^ Nte Daniel 12:2, 3 an̄wan̄ade nnyịn idahaemi ke idineme ke ibuotikọ emi. Itie oro aban̄a nte ẹdikpepde mme owo n̄kpọ. Akananam owo ikpepke mme owo n̄kpọ ntre ke mbụk emana owo. Iyeneme iban̄a ini emi ẹdinamde oro ye mbon emi ẹdikpepde mme owo n̄kpọ ini oro. Iyokụt n̄ko nte se ẹdikpepde oro editịmde mme owo idem iben̄e akpatre udomo ke utịt isua 1,000 emi Christ edikarade.
^ Etie nte ikọt Jehovah emi ẹkekpade ke mme akpatre usen ẹdibem iso iset, ekem ẹnam emana emi okodude mbemiso mmọ ẹset, ntre ntre tutu kpukpru mbon emi anade ẹset, ẹset ẹma. Ekpedi editịbe ntre, mme owo ẹdiset ke emana emi ẹdidiọn̄ọde mmọ. Edide edidi ntre m̀mê ididịghe, Bible ọdọhọ ke mbon emi ẹdisetde ika heaven ẹdiset ke “idaha” mmọ. Oro ọwọrọ ke ẹdiset ke nde ke nde, ndutịme ididụhe. Imekere ke edidi ntre n̄ko ini mme owo ẹdisetde ididu ke isọn̄.—1 Cor. 14:33; 15:23.
^ Se itịn̄de emi ke ida ikpụhọ se iketịn̄de ke n̄wed Nọ Ntịn̄enyịn ke Prọfesi Daniel! ibuot 17, ye ke Enyọn̄-Ukpeme eke July 1, 1987, p. 21-25.
^ Ikọ emi “ndinen owo” ye “mme anam ukwan̄n̄kpọ” ke Utom 24:15 ye “mbon oro ẹkenamde se ifọnde” ye “mbon oro ẹkenamde se idiọkde” ke John 5:29 ẹnam ikụt utọ uwem se mbon emi ẹdinamde ẹset ẹkedude mbemiso mmọ ẹkpade.
