AWTIK POU ÉTIDYÉ 40
« Yo ka édé onlo moun fè sa ki jis »
« Séla ki ka édé onlo moun fè sa ki jis ké kléré kon sé zétwal-la, pou touttan » (DAN. 12:3).
KANTIK 151 Jéhovah appellera
ON TI LIDÉ ASI SA NOU KAY VWÈ a
1. Pannan Jézi ké ka gouvèné, ni dé biten èstraòwdinè ki ké fèt. Ki biten ésa ?
PANNAN sé 1 000 an-la Jézikris ké ka gouvèné la, a pa ti kontan nou ké kontan lèwvwè i ké koumansé résisité moun asi latè ! Si nou pèd on moun nou té enmé, nou présé wouvwè-y toubònman. É Jéova osi présé vwè sa (Jòb 14:15). Ou ka imajiné jan sa ké yé asi latè, jan yonn ké tonbé an bra a lòt ! Kon nou vwè-y adan awtik a simenn pasé, « moun jis » ni non a yo maké adan liv a lavi é yo ké pé bénéfisyé dè « on rézirèksyon pou lavi » (Akt 24:15 ; Jan 5:29). Pétèt kè pawmi sé moun-la ki ké résisité la jis apré Awmagédon ké ni onlo moun adan fanmi an nou é zanmi an nou b. Anplisdisa, « moun ki pa jis », kivédi moun ki pa ni tan konnèt Jéova oben moun ki pa ni tan sèvi-y kon i té ka mandé avan yo té mò, ké bénéfisyé dè « on rézirèksyon pou on jijman ».
2-3. a) Kon Izayi 11:9, 10 ka montré, ka sé moun-la ké aprann adan pli gran pwogram-la ki ké fèt pou anségné moun adan istwa a limanité é poukwa yo ké aprann sa ? b) Ka nou ké vwè adan awtik-lasa ?
2 Tout sé moun-lasa ki ké résisité ké bizwen yo anségné-yo (Iz. 26:9 ; 61:11). Sé pousa, sa ké nésésè kè yo mèt on pwogram pou anségné moun anplas é pwogram-lasa sé ké pli gran pwogram ki ké fèt pou anségné moun adan istwa a limanité (li Izayi 11:9, 10). Poukwa yo ké bizwen pwogram-lasa ? Dabò pou yonn, sé pas sé moun-la ki pa jis la ki ké résisité la ké bizwen aprann sèwten biten asi Jézikris, asi Wayòm-la é asi ranson-la. É yo ké bizwen aprann osi jan non a Jéova enpòwtan é poukwa sé li tousèl ki ni dwa dirijé. É menm séla ki jis la ké bizwen yo aprann-yo piti-a-piti tousa Jéova anségné pèp a-y asi pwojé a-y pou latè. Sèwten adan sé moun fidèl lasa mò lontan avan yo té fin maké tout Labib. Ki sé moun-la ki jis la, ki sé moun-la ki pa jis la ké ni onlo biten a aprann.
3 Adan awtik-lasa, nou ké réponn a sé kèsyon-lasa : Kijan yo kay mèt pwogram-la pou anségné sé moun-la anplas ? Ka ki ké pasé pou sé moun-la ki ké dakò èvè pwogram-lasa é siwvwè ni moun ki kont pwogram-lasa, ka ki ké rivé-yo ? Jòdijou sa enpòwtan kè nou réponn a sé kèsyon-lasa. Kon nou ké vwè-y, ni sèwten pwofési a Danyèl é a Révélasyon ki ké édé-nou konprann pibyen ka ki rivé lèwvwè sé mò-la ké résisité é sé pwofési-lasa entérésan toubònman. Men pou nou koumansé, an-nou palé dè sé bèl biten-la nou ka touvé adan pwofési a Danyèl 12:1, 2.
« SÉLA KI KA DÒMI ANBA TÈ KÉ LÉVÉ »
4-5. Ka Danyèl 12:1 ka di anrapò èvè tan a lafen ?
4 (Li Danyèl 12:1.) Liv a Danyèl ka palé dè évènman èstraòwdinè ki ké fèt yonn apré lòt. I ka di kè sé évènman-lasa ké fèt an tan a lafen. Pa ègzanp, an Danyèl 12:1, yo ka di-nou kè Michèl, kivédi Jézikris « doubout pou aji an favè a pèp a [Bondyé] ». Pawti a pwofési-lasa koumansé réyalizé an 1914 lèwvwè Jézi vin Wa a wayòm a Bondyé ki an syèl-la.
5 Men Danyèl té ja anonsé kè Jézi té’é « lévé » pannan « on tan a malè, on tan kè nou po’o jen vwè dépi on nasyon ka ègzisté jous an tan-lasa ». Tan a malè-lasa, sé « gwo tribilasyon-la » yo ka palé an Matyé 24:21. Jézi ké lévé kivédi i ké koumansé aji pou défann pèp a Bondyé. I ké fè sa an fen a tan a malè-lasa kivédi a Awmagédon. Adan liv a Larévélasyon, pèp-lasa sé gran-foulmoun-la é yo ka di adan vèwsé-la kè yo ka « sòti anba gwo tribilasyon-la » (Rév. 7:9, 14).
6. Lèwvwè gran-foulmoun-la ké sòti anba gwo tribilasyon-la vivan, ka ki ké fèt apré ? (gadé awtik-la « Zò té vlé sav... » ki adan Tou dè Gad lasa. I ka palé dè rézirèksyon-la ki ké fèt asi latè la).
6 (Li Danyèl 12:2.) Lèwvwè gran-foulmoun-la ké viv pannan tan a malè-la é kè yo ké sòti anba a sa vivan, ka ki ké fèt apré ? Nou té ka pansé avan kè Danyèl 12:2 té ka palé dè rézirèksyon-la ki té’é fèt an syèl-la oben dè balan-la prédikasyon-la pran la apré 1918 magré sé moun-la ki té kont nou la té manké fè-y arété c. Men aprézan a pa konsa nou ka konprann sa. An réyalité, Danyèl 12:2 ka palé dè sé moun-la ki ké résisité la adan nouvo mond-la ki ka vin la. Kifè, i ka palé dè rézirèksyon-la ki ké fèt an bout a sé dènyé jou-la, apré Awmagédon.
7. a) Sèwten adan sé résisité-la ké viv pou touttan. Kijan pou nou konprann sa ? b) Poukwa rézirèksyon-lasa ké lontan myé ki onlo dòt rézirèksyon ki fèt asi latè ?
7 Lèwvwè Danyèl 12:2 ka di kè ni sèwten adan sé résisité-la ki « ké viv pou touttan ». Ka i té vé di pa la ? Ében sa vé di kè sé résisité-la ki ké aprann konnèt Jéova é Jézi oben ki ké kontinyé aprann konnèt-yo é ki ké obéyi a sa yo ka mandé-yo pannan sé 1 000 an-la, Jéova ké ba-yo lavi étèwnèl (Jan 17:3). Rézirèksyon-lasa ké lontan myé ki onlo dòt rézirèksyon ki fèt asi latè (Ébr. 11:35). Poukwa nou ka di sa ? Pas sé moun-la yo té résisité la asi latè la té enpawfè é yo viré mò apré.
8. Ni sèwten moun ki ké résisité pou « lawont é on mépri étèwnèl ». Poukwa nou ka di sa ?
8 Pawmi moun ki ké résisité, ni sèwten moun ki pé’é vé kè Jéova anségné-yo. Pwofési a Danyèl ka di kè sèwten moun ké résisité pou yo « rèsèvwa lawont é on mépri étèwnèl ». Konm yo rèbèl, yo pa ni bon létadèspri-la, kifè, yo pé ké ni non a yo maké adan liv a lavi é yo pé ké ni lavi étèwnèl nonplis. Bondyé ké ba-yo on «mépri étèwnèl » kivédi i ké détwi-yo. Anfinaldikont, Danyèl 12:2 ka palé dè sa ki ké rivé sé résisité-la parapòt a sa yo fè apré yo résisité d (Rév. 20:12). Ni sèwten moun ki ké ni lavi étèwnèl é ni dòt ki pé’é ni sa menm menm menm.
« YO KA ÉDÉ ONLO MOUN FÈ SA KI JIS »
9-10. Ki dòt biten ki ké fèt apré gwo tribilasyon-la é kimoun ki « ké kléré kon syèl-la » ?
9 (Li Danyèl 12:3.) Ka ki ké pasé lèwvwè ‘tan a malè-lasa’ ké fin ? Menmjan ki Danyèl 12:2, Danyèl 12:3 ka palé dè on biten ki kay fèt apré gwo tribilasyon-la. An-nou vwè ki biten ésa.
10 Ni moun ki « ké kléré kon syèl-la ». A ki sé moun-lasa ? Matyé 13:43 ka pèwmèt-nou konprann kimoun yo yé lè i ka di : « A épòk-lasa, moun ki jis ké kléré menmjan ki solèy-la adan wayòm a Pap’a yo ». Lè nou ka li sé vèwsé-la ki avan tala, nou ka vwè kè Jézi ka palé dè gason a Wayòm-la, kivédi dè frè a-y ki wen é ki ké sèvi Bondyé èvè-y adan Wayòm-la ki an syèl-la (Mat. 13:38). Nou ka tou konprann kè an Danyèl 12:3, yo ka palé dè sé wen-la é dè sa yo ké fè pannan sé 1 000 an-la lè yo ké ka gouvèné èvè Jézi an syèl-la.
Jézikris ké kolaboré èvè sé 144 000 la é pannan sé 1 000 an-la, yo ké dirijé pwogram-la yo mèt anplas la pou anségné moun asi latè (gadé paragraf 11 la).
11-12. Ka sé 144 000 la ké fè pannan sé 1 000 an-la ?
11 Men kijan sé wen-la ké fè pou « édé onlo moun fè sa ki jis » ? Ében pannan sé 1 000 la, lèwvwè yo ké mèt pwogram-la ki fèt pou anségné moun anplas asi latè, yo ké kolaboré èvè Jézikris pou dirijé pwogram-lasa. Sé vré kè sé 144 000 la ké wa, men a pa travay-lasa tousèl yo ké fè. Yo ké prèt osi (Rév. 1:6 ; 5:10 ; 20:6). Lèwvwè moman-la ké rivé pou yo « géri sé nasyon-la », konm yo prèt yo ké ni on wòl a jouwé adan sa é piti-a-piti yo ké édé moun ki asi latè vin pawfè kon sa té yé odépa (Rév. 22:1, 2 ; Ézék. 47:12). Mésyé, a pa ti kontan sé wen-la ké kontan fè sa !
12 Yo ké édé « onlo » moun fè sa ki jis. Men kimoun sé moun-lasa yé ? Ében sé sé résisité-la, sé moun-la ki ké pasé Awmagédon vivan la é sé timoun-la ki ké fèt la adan nouvo mond-la. Lèwvwè sé 1 000 an-la ké bout, toutmoun ki ké asi latè ké pawfè. Men non a yo maké èvè on kréyon adan liv a lavi toujou. Alò, a ki moman non a yo ké maké adan liv a lavi èvè on pwennbik ki ni on lank ki pa ka éfasé ?
DÈNYÉ ÉPRÈV-LA
13-14. Pou sé moun-la ki pawfè la pé sa ni lavi étèwnèl, ka pou yo montré Jéova ?
13 On biten pou nou pa oubliyé sé kè a pa paskè on moun pawfè kè i ka enki ni lavi étèwnèl konsa. Enn gadé, Adan é Èv té pawfè, men avan Bondyé té ba-yo lavi étèwnèl, fò-yo té montré Jéova kè yo ka obéyi-y. Malérèzman, a pa sa yo fè (Wom. 5:12).
14 Kijan sé moun-la ki ké asi latè la an bout a sé 1 000 an-la ké yé ? Yotout ké pawfè. Men ès yotout ké dakò pou soutyenn dominasyon a Jéova a san pou san é ès yo ké paré a fè sa pou touttan ? Oben ès ni moun ki pé ké rété fidèl a Jéova kon Adan é Èv magré yo ké pawfè ? Fò tout sé kèsyon-lasa réglé. Men kijansa ?
15-16. a) A ki moman tout sé moun-la ki ké asi latè la ké pé montré kè yo vé rété fidèl a Jéova ? b) Ka dènyé éprèv-la ké pèwmèt Jéova vwè ?
15 Yo ké mèt Satan lajòl pannan 1 000 an. Pannan péryòd-lasa, i pé’é pé kouyonné ponmoun ankò. Men lèwvwè sé 1 000 an-lasa ké fin, yo ké lagé-y. A moman-lasa, i ké éséyé kouyonné onpakèt moun alòskè yo ké pawfè. Pannan éprèv-lasa, toutmoun asi latè ké pé montré si yo ka rèspèkté non a Bondyé é si sé byen li yo chwazi pou vin chèf a yo (Rév. 20:7-10). É lèwvwè Satan ké mèt tantasyon douvan yo, sé désizyon-la yo ké pran la ké montré si yo mérité ni non a yo adan liv a lavi pou touttan.
16 Labib ka di-nou kè sèwten moun pé’é rété fidèl kon Adan é Èv : yo ké kont dominasyon a Bondyé. Men ka ki ké rivé-yo ? Mi sa Révélasyon 20:15 ka di : « Tout moun ki pa té ni non a yo maké adan liv a lavi, yo jété-yo adan létan a difé la. » Donk, Jéova ké détwi moun ki ka ba-y do é i ké fè sa pou touttan. Men prèstout sé moun-la ki ké pawfè la ké rété fidèl douvan éprèv-lasa. Aprésa, yo ké ni non a yo maké adan liv a lavi pou touttan.
« AN TAN A LAFEN »
17. Dapré sa zanj-la té di Danyèl, ka ki té’é rivé a épòk an nou ? (Danyèl 12:4, 8-10).
17 Lèwvwè nou ka pran on tan pou réfléchi asi tout sé biten-la ki kay fèt talè, tchè an nou ka kontan é sa ka ankourajé-nou toubònman. Men zanj-la té di Danyèl déotwa biten enpòwtan ki té ka konsèwné épòk an nou, kivédi « tan a lafen » (li Danyèl 12:4, 8-10 ; 2 Tim. 3:1-5). Mi sa i té di-y : « Ké tini vré konésans-la pou tann-é-konprann. » Sa vé di kè sèwvitè a Bondyé té’é rivé konprann sé pwofési-la ki adan liv a Danyèl la pibyen. Men zanj-la té di-y osi kè toupannan sa té’é fèt, ‘moun ki méchan té’é kontinyé fè sa ki mal, é ponyonn adan yo pa té’é rivé konprann’.
18. Talè, ka ki ké rivé sé méchan-la ?
18 Pétèt kè jòdijou nou ni lenprésyon kè zafè a sé méchan-la ka maché (Mal. 3:14, 15). Men konm sé méchan-la sé yo ki sé sé kabrit-la, talè Jézi ké kondanné-yo é i ké séparé mouton é kabrit yonn dè lòt (Mat. 25:31-33). Sé méchan-la pé’é pasé gwo tribilasyon-la vivan é yo pé’é résisité adan nouvo mond-la nonplis. Non a yo pé’é maké adan ‘liv-la Jéova ni la pou sonjé moun’ Malaki 3:16 ka palé la.
19. Ka pou nou fè aprézan é poukwa ? (Malaki 3:16-18).
19 Sé aprézan pou nou pòté mannèv pou nou montré adan jan nou ka aji kè nou vé pa fè pawti a sé méchan-la (li Malaki 3:16-18). Jéova ka sanblé moun ki kon « byen èspésyal » pou-y kivédi moun ki ni onlo valè pou-y toubònman. É sé adan gwoup-lasa nou vé touvé-nou.
A pa ti bèl sa ké bèl lèwvwè nou ké vwè Danyèl é moun nou té enmé é dòt moun ankò ka « lévé » pou rèsèvwa pa a yo adan nouvo mond-la ! (gadé paragraf 20 la).
20. Ki dènyé pwomès Jéova fè Danyèl é poukwa nou présé vwè pwomès-lasa réyalizé ?
20 Mésyé, nou ka viv on épòk èstraòwdinè toubònman. Men talè, nou ké viv dé biten ki ké pi bèl ki sa ankò ! Nou ké vwè tout méchansté-la disparèt. Aprésa, nou ké vwè pwomès-la Jéova fè Danyèl la réyalizé : « An fen a sé jou-la, ou ké lévé pou rèsèvwa pa a-w » (Dan. 12:13). Danyèl é moun ou té enmé é ki mò ké lévé. Ès ou présé vwè jou-lasa rivé ? Si sé sa, fè tousa ou pé pou rété fidèl. Konsa, ou ké sèten kè Jéova ké maké non a-w adan liv a lavi é kè non a-w ké rété maké adan-y pou touttan.
KANTIK 80 « Goûtez et voyez que Jéhovah est bon »
a An Danyèl 12:2, 3 yo ka palé dè gran pwogram-la ki fèt pou anségné la. Awtik-lasa ka palé dè on biten nou vin konprann pibyen anrapò èvè pwogram-lasa. Nou ké vwè a ki moman yo ké mèt pwogram-lasa anplas é kimoun ki ké pawtisipé adan-y. Nou ké vwè osi kè pwogram-lasa ké préparé tout moun asi latè pou dènyé éprèv-la nou ké ni la lèwvwè Jézi ké fin gouvèné an bout a sé 1 000 an-la.
b Pétèt kè larézirèksyon ké fèt piti-a-piti, kivédi, pétèt kè Jéova ké résisité on jénérasyon avan i résisité ondòt jénérasyon. Pétèt osi kè sèwvitè a Bondyé ki mò pannan sé dènyé jou-la ké résisité an prèmyé é kè aprésa Bondyé ké résisité jénérasyon a sé moun-la ki té la avan. I ké fè sa joustan tout sé moun-la ki an mémwa a-y la résisité. Si sé byen konsa Jéova prévwa fè sa, moun a chak jénérasyon ké pé akéyi moun yo té konnèt. Kèlkanswa jan-la sa ké pasé la, nou pé pansé kè rézirèksyon-la ki ké fèt asi latè la ké fèt on mannyè ki byen òwganizé pas lèwvwè Labib ka palé dè rézirèksyon-la ki ké fèt an syèl-la i ka di kè Jéova ka résisité « chakmoun lè tou a-y rivé » (1 Kor. 14:33 ; 15:23).
c Sa nou sòti vwè la ka ranplasé sé èsplikasyon-la nou té ka bay la adan chapit 17 a Liv-la Prêtons attention à la prophétie de Daniel ! é adan niméwo a 1é juiyé 1987 a Tou dè Gad la paj 21-25.
d Men lè Akt 24:15 ka palé dè « moun jis » é dè « moun ki pa jis » é lè Jan 5:29 ka palé dè « sa ki fè bon biten », é dè « sa ki té ni labitid fè mové biten », an réyalité yo ka palé dè sa sé résisité-la fè avan yo mò.
