OBHEASACHO LEKH 40
‘Zaiteank Nitivontponnache Vatter Cholonk Xikoitolim’
“Zannim zaiteank promannikponnachi vatt xikoilea, tim noketram porim jhigjhikit zatolim sasnnachea sasnnak.”—DAN. 12:3.
GIT 151 To Ulo Kortolo
KITEM XIKTOLIM a
1. Kristache Ek Hozar Vorsanche Razvottkecho vell ekdom khuxalkaiecho kiteak astolo?
KRISTACHE Ek Hozar Vorsanche Razvottkechea vellar, melolim hea prithumer jivont zaunk lagtolim. To vell kitlo khuxalkaiecho astolo nhoi! Amchea mogachea meloleank porot pollounk ami khub axetat. Ani Jehova pasun tankam pollounk axeta. (Job 14:15) Ami fattlea lekhant polloilʼlem toxem, ‘nitivont munxam,’ zanchim nanvam jivitachea pustokant boroilʼlim asat, tim ‘jivit bhogunk jivont zatolim.’ (D.I. 24:15; Ju. 5:29) Amchim mogachim konnui halinch bhair poddleant zalear, jivont zatat tanche modem tim ghoddie poilim astolim. b Ani Jehovak vollkhonk vo tachi seva korunk sondhi mellonk na tim ‘onitivont munxam,’ ‘khast sosunk [“neai zaunk,” NW] jivont zatolim.’
2-3. (a) Izaias 11:9, 10 pormonnem, vhodd xikoupachem kam zatolem tednam ami kitem xikoitolim ani kiteak? (b) Hea lekhant ami kitem polloitolim?
2 Tor hea prithumer jivont zatat tea sogleank zaitem xikonk poddttolem. (Iz. 26:9; 61:11) Hea pasot, adim kednanch zaunk na titlea vhodd ritin hea prithumer xikoupachem kam zatolem. (Izaias 11:9, 10 vachat.) Oxem ami kiteak mhunnonk zata? Ek karonn mhunnttlear, jivont zatolim tea onitivont munxank Jezu Krista vixim, Devachea Rajea vixim, soddvonne vixim, Devachem nanv kitlem mhotvachem asa tea vixim ani Jehovakuch raj cholounk kiteak odhikar asa tea vixim xikonk poddttolem. Toxench, Jehovan sovkas-sovkas korun prithume pasot aplo udʼdhex koso kolloilo tem jivont zatat tea nitivont munxank pasun xikonk poddttolem. Karonn tanche modlim thoddim zannam akʼkho Bible boroun sompche poilinch bhair poddlim. Khorench, onitivont ani nitivont munxank zaitem xikonk poddttolem!
3 Tor hea lekhant ami hea prosnanche zobab polloitolim: Hem vhodd xikoupachem kam koxem zatolem? Hi xikounn mellttoli tea munxanchim nanvam jivitachea pustokar sodankal boroilʼlim urtolim kai? Hea prosnanche zobab zannam zavop aiz amkam khub gorjechem zaun asa. Tor Daniel ani Prokasovnni pustokant sanglolea thoddea bhasaunneancher ami dhean dium-ia. Hea vorvim, meloleanchea jivontponna vixim atam amchea somzonnent koslo bodol zala tem somzonk amkam modot zatoli. Tor poilim, Daniel 12:1, 2-ant sanglole bhasaunne vixim ami polloum-ia.
‘DHULʼLINT NHIDLOLIM ASAT TIM JIVONT ZATOLIM’
4-5. Daniel 12:1-ant nimannea disam vixim kitem sanglam?
4 Daniel 12:1 vachat. Nimannea disamnim eka-fattlean-ek korun, manddavollin kosleo ghoddnneo ghoddttoleo tea vixim Danielachea pustokant sanglolem asa. Udharonnak, Daniel 12:1-ant oxem sanglam: “Mikael . . . tuje porjecho Rakhnno, utthtolo.” Hacho orth, Jezu Krist Devachea lokam pasot ubo ravtolo. Tor 1914-nt, Jehova Devan, Jezu Kristak aplea sorginchea Rajeacho Raza nemlo tednam bhasaunnecho ho bhag purnn zaunk laglo.
5 Punn Jezu Krist, ‘raxttram utpon zalim tednam thaun kednanch ieunk na toslea vhodd sonkoxttachea kallar uttʼttolo vo ubo ravtoloʼ oxem-i Danielak sanglolem. Ho “vhoddam sonkoxttancho kall,” Matev 24:21-ant sangloloch “vhodd sonkoxtt” zaun asa. Ani Jezu Krist hea vhodd sonkoxttachea xevottak, tem mhunnttlear, Armageddonachea vellar Devachea lokam pasot zhuztolo. Prokasovnni pustokant heach lokank, “nixttur dhumalleantlo solamoti pavlo to lok” vo vhodd urponz mhunnttlam.—Prok. 7:9, 14.
6. Vhodd urponz vhodd sonkoxttantlean salvar zalea uprant kitem zatolem? Somzaiat. (Prithumer zatolea jivontponna vixim hea masikent aslolo “Vachpeam Thaun Prosn” ho lekh pasun polloiat.)
6 Daniel 12:2 vachat. Vhodd urponz, vhodd sonkoxttantlean salvar zalea uprant kitem zatolem? Poilim ami, Daniel 12:2-ant dilʼli bhasaunni sorgar zatolea jivontponna vixim vo 1918-nt virodheamnim amchem porgottnnechem kam bond kelea uprant zalʼle vaddavollik lagu zata mhunn chintʼtalim. c Punn hi bhasaunni, novea sonvsarant zatolea meloleanchea jivontponnak lagu zata mhunn atam amkam kollon ailam. Oxem ami kiteak mhunnonk zata? Karonn Job 17:16-nt pasun ‘dhulʼl’ hench utor uzar kelam. Ani hea utracho orth, ‘norok [“somadhi,” NW]’ osoch zata. Tor ‘dhulʼl’ ani “somadhi” hancho orth ekuch zaun asa dekhun Daniel 12:2-nt sangloli bhasaunni, nimanne dis somplea uprant ani Armageddonachem zhuz zalea uprant, prithumer zatolea jivontponnak lagu zata mhunn amkam kollon ieta.
7. (a) Daniel 12:2-ant thoddim “sasnnik jivitak” jivont zatolim mhunn sanglolea utrancho orth kitem? (b) Hem ‘odik borem jivontponn’ kiteak zaun asa?
7 Punn Daniel 12:2-ant thoddim “sasnnik jivitak” jivont zatolim mhunn sanglolea utrancho orth kitem? Hacho orth, jivont zatat tannim, 1,000 vorsachea vellar Jehova ani Jezuchi vollokh ghetlear vo tanche vixim xikot ravlear, ani nimanni porikxa zaum porian Jehova ani Jezuchea utrak pallo dilear tankam sasnik jivit mellttolem. (Ju. 17:3) Hem jivontponn, adlea kallar zalʼlea jivontponna poros ‘odik borem jivontponn,’ oxem ami kiteak mhunnonk zata? (Heb. 11:35) Karonn adlea kallar jivont zalim tim opurnn munxam porot melim. Punn fuddarak jivont zatolim tim munxam xevott porian visvaxi ravlear tankam sasnik jivit mellttolem.
8. Thoddim zannam “loz ani sasnnak togta toslem nirbhag” bhogunk uttʼttolim, hea utrancho orth kitem?
8 Punn jivont zatat tantuntlim soglinch zannam Jehova thaun xikonk sodhchimnant. Ani tim Jehovachea add voitolim dekhun Jehova tanchim nanvam jivitachea pustokant borouncho na. Hea karonnak lagon Danielachea bhasaunnent, jivont zatat tantuntlea thoddea zannank, “loz ani sasnnak togta toslem nirbhag” bhogunk poddttolem mhunn sanglam. Tem mhunnttlear, sasnak tanchem nisonntton zatolem. Tor Daniel 12:2-ant, jivont zatat tim soglim, jivont zalea uprant kitem kortolim, tacher adarit tancho neai zatolo tea vixim sanglam. d (Prok. 20:12) Ek tor, tankam sasnik jivit mellttolem vo sasnak tancho nas zatolo.
‘ZAITEANK NITIVONTPONNACHE VATTER CHOLONK XIKOITOLIM’
9-10. Vhodd sonkoxtta uprant anik kitem zatolem, ani “mollbachea porzolla porim jhigjhigtolim” tim konn?
9 Daniel 12:3 vachat. Daniel 12:2 ani 3-ant pasun, vhodd sonkoxtta uprant kitem zatolem tea vixim anikui sanglam.
10 Tea versant “mollbachea porzolla porim jhigjhigtolim” mhunn sangleant tim konn zaun asat? Hea vixim Matev 13:43-ant Jezun sanglolea utrantlean amkam kitem tori kollon ieta. Tannem mhunnttlem: “Tea vellar nitivont munxam aplea Bapachea Rajeant suria bhaxen porzollttolim.” Jezun him utram mhunnttlim tednam to “Rajeache put” tem mhunnttlear, aplea sangata sorgar razvottki choloitolea makhlolea bhavam vixim uloitalo. (Mt. 13:38) Tor Daniel 12:3-ant, makhlolea Kristanvam vixim ani Kristache Ek Hozar Vorsanche Razvottke vellar tim kortolim tea kamam vixim sanglolem asa mhunn amkam kollon ieta.
1,44,000 makhlolim Kristanvam Jezu Krista sangata mellon 1,000 vorsanchea vellar zatolea xikoupachea kamak margdorxon ditolim (Peregraf 11 polloiat)
11-12. 1,000 vorsanchea vellar makhlolim Kristanvam koslem kam kortolim?
11 Makhlolim Kristanvam, ‘zaiteank nitivontponnache vatter cholonk koxim xikoitolim’? Tim Jezu sangata mellon 1,000 vorsanchea vellar hea prithumer zatolea xikoupachea kamak margdorxon ditolim. Tea vellar, tim fokot raza mhunn nhoi punn iadnik mhunn pasun seva kortolim. (Prok. 1:6; 5:10; 20:6) Tor “raxttrancheo pidda kaddunk,” tem mhunnttlear, sovkas-sovkas korun munxakullak poripurnn zaunk tim modot kortolim. (Prok. 22:1, 2; Ez. 47:12) Khorench, ho vell makhlolea Kristanvank kitlo khuxalkaiecho astolo nhoi!
12 Tor nitivontponnache vatter cholonk xiktolim tim ‘zaitim’ konn? Hea munxam modem, jivont zatolim tim, toxench Armageddona thaun salvar zatolim tim ani ghoddie tankam novea sonvsarant zolmotolim tim bhurgim mellon astolim. 1,000 vorsanchea xevott meren, prithumer jietat tim soglim poripurnn zatolim. Tor Jehova tanchim nanvam jivitachea pustokant pen-an boroilʼlea sarko, tem mhunnttlear sodankal uronk kednam boroitolo?
NIMANNI PORIKXA
13-14. Sasnik jivit melloun gheunk prithumer aslolea soglea poripurnn munxank kitem korunk poddttolem?
13 Ek munis poripurnn asa dekhun taka sasnachem jivit mellttolench oxem kai? Hea prosnacho zobab zannam zaunk, Adanv ani Eve vixim chintat. Tim poripurnn aslim. Tori astana sasnachem jivit melloun gheunk, tannim Jehovachi adnea pallunk zai asli. Punn dukhachem mhunnttlear, tannim toxem korunk na.—Rom. 5:12.
14 1,000 vorsam somptat toxim prithumer aslolim soglim munxam poripurnn zatolim. Punn poripurnn zalolim soglinch munxam Jehovachea utrak pallo ditolim? Vo thoddim zannam Adanv ani Eve bhaxen poripurnn asonui ovisvaxi zatolim? Hea vixim ami fuddem polloum-ia.
15-16. (a) Poripurnn zatolea soglea munxank tim Jehovak visvaxi ravtolim kai na tem dakhoun diunk kednam sondhi mellttoli? (b) Nimanne porikxechea xevottak kitem zatolem?
15 1,000 vorsanchea vellar Soitan bondkhonnint astolo. Tednam to konnakuch fosounk xokchona. Punn 1,000 vorsanchea xevottak, Soitanak bondkhonnintlean soddttole. Ani tea vellar to zaitea poripurnn munxank fosounk proitn kortolo. Tea porikxechea vellar, prithumer aslolea soglea poripurnn munxank, tim Devachea nanvak man ditolim ani tache razvottkek tenko ditolim kai na, tem dakhoun diunk ek sondhi mellttoli. (Prok. 20:7-10) Tor tea vellar tim kitem kortolim tache vorvim, tanchim nanvam jivitachea pustokant sodankal uronk borounchim kai na tem Jehova tharaitolo.
16 Punn thoddim munxam Adanv ani Eve bhaxen ovisvaxi zatolim, ani Jehovachi razvottki nakartolim mhunn Bible-ant sanglam. Tanchem kitem zatolem? Hea vixim Prokasovnni 20:15-nt oxem sanglam: ‘Zanchim nanvam jiveanchea vo jivitachea pustokar boroilʼlim naslim, tankam sogleank ujeachea konddant xevttilim.’ Tor Jehovachea add vochpi sogleancho sasnak nas zatolo. Punn choddxim poripurnn munxam nimanne porikxechea vellar visvaxi ravtolim. Tednam Jehova Dev tanchim nanvam jivitachea pustokant sodankal uronk boroitolo.
“XEVOTTACHEA KALLAR”
17. Xevottachea kalla vixim ainzan Danielak kitem sanglolem? (Daniel 12:4, NW, 8-10)
17 Fuddarak ghoddttolea ghoddnneam vixim ami chintʼtat tednam ami umedin bhortat nhoi! Punn ami jietat tea kalla vixim, tem mhunnttlear, xevottachea kalla vixim Jehovachea ainzan Danielak kitem tori mhotvachem sanglolem. Tannem Danielak mhunnttlolem: “Xevottachea kallar khorem ginean vaddttolem.” (Daniel 12:4, NW, 8-10 vachat; 2 Tim. 3:1-5) Tor Danielachea pustokant sanglolea bhasaunneam vixim Devachea lokank xevottachea kallar anikui purnn toren somzonni mellttoli asli. Punn “noxttim monxam noxtteponn korit ravtolim, ani noxtteank hem kednanch somzochem na,” oxem ainzan fuddem sanglem.
18. Noxttea munxanchem beginuch kitem zatolem?
18 Aiz vaitt kornneo kortat tea munxank khast favo zaina oxem amkam disonk puro. (Mal. 3:14, 15) Punn beginuch, Jezu bokddeam sarkea munxanchi nit kortolo ani tankam menddram sarkea munxam thaun kuxin kaddttolo. (Mt. 25:31-33) Him noxttim munxam vhodd sonkoxttantlean salvar zaunchim nant, ani novea sonvsarant pasun jivont zaunchim nant. Ani tanchim nanvam Malaki 3:16-nt sanglolea ‘ugddasachea pustokant’ aschim nant.
19. Aiz ami kitem korunk zai ani kiteak? (Malaki 3:16-18)
19 Tor atam amchea kornneam vorvim, ami noxttea munxam modlim nhoi mhunn ami dakhoun diunk zai. (Malaki 3:16-18 vachat.) Karonn Jehova “kherit mannkulem daiz,” vo moladik mhunn lekhta tankam ektthaim korta. Ami pasun tanche modlim ek zaunk sodhtat nhoi!
Daniel, amchim mogachim melolim, ani anik zaitim zannam novea sonvsarant ‘jivont zatolim’ tednam tankam mellon ami kitlim khuxal zatolim nhoi! (Peregraf 20 polloiat)
20. Daniel morchea poilim Jehovan taka kosli bhas dili, ani ti bhas purnn zalʼli tumkam kiteak zai?
20 Khorench, aiz Jehovan dilʼleo bhasaunneo purnn zatat tea kallar ami jietat. Punn beginuch anikui kitem ojapachem zaunchem asa. Tem mhunnttlear, soglea noxtteponnacho nas zatolo ani tea uprant Jehovan Danielak dilʼli bhas purnn zatoli. Jehovan Danielak mhunnttlem: “Tujem inam gheunk kallachea xevottak tum utthtoloi.” (Dan. 12:13) Tor Daniel ani tumchim mogachim ‘jivont zatolim’ tea vellak tumi axeun ravleant kai? Toxem zalear, atam Jehovak visvaxi ravonk tumchean zata tem soglem korat. Tumi oxem kelear Jehovachea jivitachea pustokant tumchem nanv sodankal urtolem mhunn tumi khatri dovrunk zata.
GIT 80 “Taste and See That Jehovah Is Good”
a Daniel 12:2, 3-ant vhodd ritin zatolea xikoupachea kama vixim sanglam. Hea vixim atam amche somzonnent kitem bodol zala tem ami hea lekhant polloitolim. Toxench, hem kam kednam zatolem, tantunt konn bhag ghetolo, ani hem xikoupachem kam Kristachea Ek Hozar Vorsanchea Razvottkechea xevottak zatolea nimanne porikxe pasot, prithumer asloleank koxem toiar kortolem, tem pasun ami polloitolim.
b Nimannea disamnim melim, tim Jehovachim visvaxi sevokam, ghoddie poilim jivont zatolim. Ani uprant tanche adim melolim, tim ghoddie jivont zatolim. Oxem zata zalear, dor eke pinddkek, tim vollkhotalim tea munxank ieukar diunk ek sondhi mellttoli. Tor jivontponn koxem-i zaum, sorginchem jivontponn ‘kroma pormannem vo manddavollin’ zatolem mhunn Bible-ant sanglam. Teach bhaxen, prithume voilem jivontponn pasun oxech toren manddavollin zait voitolem mhunn ami mhunnonk zata.—1 Kor. 14:33; 15:23.
c Daniel 12:2-ant sanglolea bhasaunne vixim adim amchi somzonni kitem asli, tem Pay Attention to Daniel’s Prophecy! hea pustokachea odheai 17-nt, ani Julay 1, 1987-achea Pahrogopur-ant, p. 21-25-acher dilʼlem asa. Punn hea somzonnent atam bodol zala.
d Punn Itihas 24:15-nt uzar kelʼlim ‘borim vo nitivont’ ani ‘vaitt vo onitivont’ him utram, ani Juanv 5:29-ant uzar kelʼlim “zannim borem kelam” ani “zannim vaitt kelam” him utram, jivont zatat tea munxamnim morchea adim kelʼlea kamank lagu zatat.
