HOSỌ OPLỌN TỌN 40
‘Mẹsusu Hinhẹnwa Dodowiwa Kọ̀n’
“Mẹhe to mẹsusu hẹnwa dodowiwa kọ̀n lẹ na sẹ́ taidi sunwhlẹvu lẹ kakadoi podọ doidoi.”—DAN. 12:3.
OHÀN 151 E Na Ylọ
BLADOPỌ *
1. Nujijọ ayajẹ tọn tẹlẹ wẹ to tepọn mí to Gandudu Owhe Fọtọ́n tọn lọ whenu?
AZÁN ayidego tọn nankọ die e na yin whenue fọnsọnku na bẹjẹeji to aigba ji fi to Gandudu Owhe Fọtọ́n tọn Klisti tọn whenu! Mẹhe ko hẹn mẹyiwanna yetọn bu to okú mẹ lẹpo wẹ to jejeji nado mọ yé whladopo dogọ. Numọtolanmẹ he Jehovah lọsu tindo niyẹn. (Jobu 14:15) Pọ́n lehe homẹ mẹhe to aigba ji lẹpo tọn na hùn do to whenue mẹyiwanna yetọn lẹ yin finfọnsọnku. Dile mí plọn do to hosọ he jẹnukọn mẹ, “dodonọ lẹ,” enẹ wẹ mẹhe yinkọ yetọn tin to owe ogbẹ̀ tọn lọ mẹ lẹ na mọ “fọnsọnku ogbẹ̀ tọn” yí. (Owalọ 24:15; Joh. 5:29) Vlavo susu to mẹyiwanna mítọn lẹ mẹ na to omẹ tintan he na yin finfọnsọnku do aigba ji lẹ mẹ. * Humọ, “mawadodonọ lẹ,” di apajlẹ mẹhe ma tindo whenu he pé nado yọ́n Jehovah bo sẹ̀n ẹn po nugbonọ-yinyin po jẹnukọnna okú yetọn lẹ na mọ “fọnsọnku whẹdida tọn” yí.
2, 3. (a) Dile Isaia 11:9, 10 dọ do, etẹwẹ na yin azọ́n mẹpinplọn tọn daho hugan to whenuho gbẹtọvi tọn mẹ? (b) Etẹwẹ mí na gbadopọnna to hosọ ehe mẹ?
2 E na biọ dọ yè ni plọnnu mẹhe na yin finfọnsọnku ehe lẹpo. (Isa. 26:9; 61:11) Enẹwutu, azọ́n mẹpinplọn tọn daho hugan to whenuho gbẹtọvi tọn blebu mẹ dona yin wiwà. (Hia Isaia 11:9, 10.) Etẹwutu? Whẹwhinwhẹ́n dopo wẹ yindọ mawadodonọ he yin finfọnsọnku lẹ dona plọnnu gando Jesu Klisti, Ahọluduta lọ, ofligọ lọ, gọna whẹho titengbe he gando oyín po nupojipetọ-yinyin Jehovah tọn po go lọ go. Yè sọ dona plọnnu dodonọ lẹ lọsu gando nuhe Jehovah dehia vudevude na nuhe dù lẹndai etọn na aigba go. Delẹ to nugbonọ ehelẹ mẹ ko kú hoho whẹpo Biblu do yin tadona. Dodonọ lẹ po mawadodonọ lẹ po na tindo nususu nado plọn.
3 To hosọ ehe mẹ mí na dọhodo kanbiọ he bọdego lẹ ji: Nawẹ azọ́n mẹpinplọn tọn daho ehe na yin wiwà gbọn? Nuyiwadomẹji tẹwẹ tito ehe na tindo do mẹhe yinkọ yetọn yin kinkan do owe ogbẹ̀ tọn lọ mẹ kakadoi kavi lala lẹ ji? Gblọndo kanbiọ ehelẹ tọn dona nọ duahunmẹna mí to egbehe. Dile mí na mọ do, dọdai ojlofọndotenamẹ tọn he to owe Daniẹli po Osọhia po tọn mẹ delẹ na hẹn nukunnumọjẹnumẹ mítọn gando nuhe na jọ whenue oṣiọ lẹ na yin finfọnsọnku go họnwun dogọ. Jẹnukọn whẹ́, mì gbọ mí ni dọhodo nujijọ ayidego tọn he Daniẹli 12:1, 2 dọ dọdai yetọn lẹ ji.
“MẸHE TO AMLỌNDỌ TO KỌ́GUDU . . . MẸ LẸ NA FỌ́N”
4, 5. Etẹwẹ Daniẹli 12:1 dehia gando ojlẹ opodo tọn lọ go?
4 Hia Daniẹli 12:1. Owe Daniẹli tọn do aliho debọdo-dego he mẹ nujijọ ojlofọndotenamẹ tọn lọ lẹ na wá aimẹ to ojlẹ opodo tọn mẹ te hia. Di apajlẹ, Daniẹli 12:1 dọ dọ Mikaẹli, enẹ wẹ Jesu Klisti, ‘ṣite do ota omẹ Jiwheyẹwhe tọn lẹ tọn mẹ.’ Adà dọdai lọ tọn ehe jẹ hẹndi mọ ji to 1914, whenue Jesu yin dide taidi Ahọlu Ahọluduta Jiwheyẹwhe tọn to olọn mẹ.
5 Amọ́, Daniẹli sọ yin didọna dọ Jesu “na fọ́n” to ‘ojlẹ ayimajai tọn de mẹ, ehe nkọ ma ko tin pọ́n sọn whenue gbọ́n akọta de ko wá aimẹ kakajẹ whenẹnu.’ “Ojlẹ ayimajai tọn” ehe wẹ “nukunbibia daho” he yin nùdego to Matiu 24:21 mẹ. Jesu fọ́n, kavi yinuwa nado yiavùnlọna omẹ Jiwheyẹwhe tọn lẹ to vivọnu ojlẹ ayimajai tọn ehe tọn, enẹ wẹ to Amagẹdọni. Owe Osọhia tọn dlẹnalọdo omẹ ehelẹ taidi gbẹtọ susugege de he “jugbọn nukunbibia daho lọ mẹ.”—Osọ. 7:9, 14.
6. Etẹwẹ jọ to whenue gbẹtọ susugege lọ lùn nukunbibia daho lọ tọ́n godo? Basi zẹẹmẹ. (Sọ pọ́n nuhe yin didọ gando fọnsọnku aigba ji tọn go to “Kanbiọ lẹ sọn Wehiatọ lẹ Dè” mẹ to zinjẹgbonu ehe mẹ.)
6 Hia Daniẹli 12:2. Etẹwẹ jọ to whenue gbẹtọ susugege lọ lùn ojlẹ ayimajai tọn ehe tọ́n godo? Dọdai ehe ma to alọdlẹndo fọnsọnku yẹhiadonu tọn de, yèdọ hẹngọwa gbigbọmẹ tọn devizọnwatọ Jiwheyẹwhe tọn lẹ tọn he wá aimẹ to azán godo tọn lẹ mẹ dile mí mọnukunnujẹemẹ do dai. * Kakatimọ, hogbe ehelẹ to alọdlẹndo fọnsọnku oṣiọ lẹ tọn he na wá aimẹ to aihọn yọyọ he ja mẹ. Naegbọn mí gán wá tadona ehe kọ̀n? Hogbe lọ “kọ́gudu” sọ yin yiyizan ga to Jobu 17:16 mẹ bo do zẹẹmẹ dopolọ hẹ hogbe lọ “Yọdò.” Nugbo ehe dohia dọ Daniẹli 12:2 to alọdlẹndo fọnsọnku jọnun he na wá aimẹ to vivọnu azán godo tọn lẹ tọn, podọ to awhàn Amagẹdọni tọn godo.
7. (a) Linlẹn tẹ mẹ wẹ mẹdelẹ na yin finfọnsọnku na “ogbẹ̀ madopodo” te? (b) Nawẹ ehe na yin “fọnsọnku he yọ́n hugan de” gbọn?
7 Amọ́, etẹ dọ wẹ Daniẹli 12:2 te whenue e dọ dọ mẹdelẹ na yin finfọnsọnku na “ogbẹ̀ madopodo”? Nuhe dọ e te wẹ yindọ mẹhe yin finfọnsọnku bo wá yọ́n Jehovah po Jesu po lẹ, kavi zindonukọn nado to yé yọnẹn bosọ to tonusena yé to owhe 1000 lọ gblamẹ lẹ na mọ ogbẹ̀ madopodo. (Joh. 17:3) Ehe na yin “fọnsọnku he yọ́n hugan de” yijlẹdo fọnsọnku he gblamẹ gbẹtọvi delẹ gọwa ogbẹ̀ gbọn to hohowhenu go. (Heb. 11:35) Etẹwutu? Na gbẹtọvi mapenọ enẹlẹ sọ vọ́ wá kú to godo mẹ.
8. Nawẹ mẹdevo lẹ na yin finfọnsọnku “na vlẹko podọ na wangbẹna madopodo” gbọn?
8 Amọ́, e ma yin mẹhe fọnsọnku lẹpo wẹ na kẹalọyi tito mẹpinplọn tọn Jehovah tọn. Dọdai Daniẹli tọn dọ dọ mẹdelẹ na yin finfọnsọnku “na vlẹko podọ na wangbẹna madopodo.” Na yé na do gbigbọ atẹṣiṣi tọn hia wutu, yinkọ yetọn ma na yin kinkan do owe ogbẹ̀ tọn lọ mẹ, podọ yé ma na mọ ogbẹ̀ madopodo yí. Kakatimọ, yé na mọ “wangbẹna madopodo,” kavi vasudo yí. Enẹwutu, nuhe na jọ to godo mẹ gando mẹhe yin finfọnsọnku lẹpo go to dodonu nuhe yé wà to fọnsọnku yetọn godo tọn ji hodọ wẹ Daniẹli 12:2 te. * (Osọ. 20:12) Mẹdelẹ na nọgbẹ̀ kakadoi; bọ mẹdevo lẹ ma na mọ ogbẹ̀ madopodo.
“MẸSUSU HINHẸNWA DODOWIWA KỌ̀N”
9, 10. Nudevo tẹwẹ na jọ bọdo nukunbibia daho lọ go, podọ mẹnu lẹ wẹ na “to sisẹ́ mlanmlan taidi dovlomẹ olọn tọn”?
9 Hia Daniẹli 12:3. Onú devo tẹwẹ na jọ bọdo “ojlẹ ayimajai tọn” he ja lọ go? To yidogọ mẹ na Daniẹli 12:2, wefọ 3tọ dlẹnalọdo nude he na jọ to nukunbibia daho lọ godo.
10 Mẹnu lẹ wẹ na “to sisẹ́ mlanmlan taidi dovlomẹ olọn tọn”? Mí mọ gblọndo lọ to nuhe Jesu dọ to Matiu 13:43 mẹ dọmọ: “To ojlẹ enẹ mẹ, dodonọ lẹ na to sisẹ́ mlanmlan taidi owhè to Ahọluduta Otọ́ yetọn tọn mẹ.” To lẹdo hodidọ tọn ehe mẹ, Jesu to hodọ gando “ovi Ahọluduta lọ tọn lẹ” go, enẹ wẹ mẹmẹsunnu yiamisisadode etọn he na sẹ̀n dopọ hẹ ẹ to Ahọluduta olọn tọn mẹ lẹ. (Mat. 13:38) Enẹwutu, Daniẹli 12:3 dona ko to hodọ gando mẹyiamisisadode lẹ po azọ́n he yé na wà to Gandudu Owhe Fọtọ́n tọn lọ whenu po go.
Gbẹtọ 144000 lẹ na wazọ́n alọ to alọmẹ hẹ Jesu Klisti nado deanana zọ́n mẹpinplọn tọn he na wá aimẹ to owhe 1000 lọ gblamẹ (Pọ́n hukan 11tọ)
11, 12. Azọ́n tẹwẹ gbẹtọ 144000 lẹ na wà to owhe 1000 lọ gblamẹ?
11 Nawẹ mẹyiamisisadode lẹ na hẹn ‘mẹsusu wá dodowiwa kọ̀n’ gbọn? Mẹyiamisisadode lẹ na wazọ́n alọ to alọmẹ hẹ Jesu Klisti nado deanana tito mẹpinplọn tọn he na wá aimẹ to aigba ji to owhe 1000 lọ gblamẹ lọ. Gbọnvona dọ gbẹtọ 144000 lẹ na dugán taidi ahọlu lẹ, yé nasọ sẹ̀n taidi yẹwhenọ lẹ. (Osọ. 1:6; 5:10; 20:6) Enẹwutu, yé na gọalọ to “azọ̀nhẹngbọ akọta lẹ tọn” mẹ—enẹ wẹ nado hẹn gbẹtọvi lẹ jẹ pipé kọ̀n vudevude. (Osọ. 22:1, 2; Ezek. 47:12) Ayajẹ nankọ die enẹ na yin na mẹyiamisisadode lẹ!
12 Mẹnu lẹ wẹ “mẹsusu” he yin hinhẹnwa dodowiwa kọ̀n lẹ na bẹhẹn? Omẹ ehelẹ na bẹ mẹhe yin finfọnsọnku lẹ po mẹhe lùn Amagẹdọni tọ́n lẹ po hẹn, gọna ovi depope he gán yin jiji to aihọn yọyọ lọ mẹ lẹ. Jei vivọnu owhe 1000 lọ tọn, gbẹtọvi he to aigba ji lẹpo na ko yin mẹpipe. Enẹwutu, whetẹnu wẹ yinkọ yetọn lẹ na yin kinkan kakadoi do owe ogbẹ̀ tọn lọ mẹ bọ e ma yin po núkannu he yè gán súnsún de po?
MẸTẸNPỌN GODO TỌN LỌ
13, 14. Etẹwẹ gbẹtọvi pipé he to aigba ji lẹpo dona dohia whẹpo do mọ ogbẹ̀ madopodo?
13 Mí dona flindọ eyin mẹde yin mẹpipé, enẹ ma zẹẹmẹdo dọ mẹlọ na mọ ogbẹ̀ madopodo dandan gba. Lẹnnupọndo apajlẹ Adam po Evi po tọn ji. Mẹpipe lẹ wẹ yé yin, etomọṣo, yé dona do tonusise yetọn na Jehovah Jiwheyẹwhe hia whẹpo do jẹna ogbẹ̀ madopodo. Podọ, e blawu dọ yé gboawupo nado setonuna ẹn.—Lom. 5:12.
14 Nawẹ nulẹ na te do na mẹhe to aigba ji lẹ jei vivọnu owhe 1000 lọ tọn? Mẹlẹpo na ko jẹ pipé kọ̀n. Be mẹhe yin mẹpipé ehe lẹpo na nọgodona gandudu Jehovah tọn mlẹnmlẹn podọ kakadoi ya? Kavi mẹdelẹ na yinuwa di Adam po Evi po, yèdọ mẹhe mahopọnna dọ yé yin mẹpipé ma wá yin nugbonọ? Kanbiọ ehelẹ dona mọ gblọndo, amọ́ gbọnna?
15, 16. (a) Whetẹnu wẹ gbẹtọvi lẹpo na do dotẹnmẹ lọ nado do nugbonọ-yinyin yetọn na Jehovah hia? (b) Etẹwẹ na yin kọdetọn mẹtẹnpọn godo tọn lọ tọn?
15 Satani na yin ginglọn na owhe 1000. To ojlẹ enẹ gblamẹ, e ma na penugo nado klọ mẹdepope. Amọ́, to vivọnu owhe 1000 lọ tọn, Satani na yin didesọn gànpa etọn mẹ. To whenẹnu, e na tẹnpọn nado klọ gbẹtọvi pipé lẹ. To mẹtẹnpọn enẹ whenu, gbẹtọvi pipé he to aigba ji lẹpo na tindo dotẹnmẹ hundote nado dohia to aliho he họnwun mẹ adà he mẹ yé tin te na nuhe dù whẹho he gando oyín po nupojipetọ-yinyin Jiwheyẹwhe tọn po go. (Osọ. 20:7-10) Nuhe dopodopo yetọn na wà gando vivẹnudido Satani tọn lẹ go wẹ na magbe eyin oyín yetọn lẹ na yin kinkan kakadoi do owe ogbẹ̀ tọn lọ mẹ kavi lala.
16 Mẹdelẹ, enẹ wẹ mẹhe sọha yetọn ma yin yinyọnẹn lẹ na yinuwa di Adam po Evi po bo na gbẹ́ gandudu Jehovah tọn dai. Etẹwẹ na jọ do yé go? Osọhia 20:15 dọ dọ: “Mẹdepope he oyín etọn ma yin kinkan do owe ogbẹ̀ tọn lọ mẹ yin dindlan do agbàdo miyọ́n tọn lọ mẹ.” Mọwẹ, atẹṣitọ ehelẹ na yin vivasudo mlẹnmlẹn podọ kakadoi. Amọ́, suhugan gbẹtọvi pipé lẹ tọn wẹ na lùn mẹtẹnpọn godo tọn ehe tọ́n. To whenẹnu, yinkọ yetọn lẹ na yin kinkan do owe ogbẹ̀ tọn lọ mẹ kakadoi.
TO “OJLẸ OPODO TỌN” MẸ
17. Etẹwẹ angẹli lọ dọna Daniẹli dọ e na jọ to ojlẹ mítọn mẹ? (Daniẹli 12:4, 8-10)
17 Lehe e yin ojlofọndotenamẹnu do sọ nado lẹnnupọndo nujijọ sọgodo tọn ehelẹ ji! Amọ́, Daniẹli sọ mọ nudọnamẹ titengbe delẹ yí sọn angẹli de dè gando ojlẹ mítọn go, enẹ wẹ gando “ojlẹ opodo tọn” lọ go. (Hia Daniẹli 12:4, 8-10; 2 Tim. 3:1-5) Angẹli lọ dọna Daniẹli dọmọ: “Oyọnẹn nugbo nasọ lẹzun susugege.” Mọwẹ, omẹ Jiwheyẹwhe tọn lẹ na mọnukunnujẹ hogbe dọdai tọn he to owe etọn mẹ lẹ mẹ to gigọ́ mẹ. Angẹli lọ yidogọ dọ to ojlẹ ehe gblamẹ, “mẹylankan lẹ [na] yinuwa po kanyinylan po, podọ depope to mẹylankan lẹ mẹ ma na mọnukunnujẹemẹ.”
18. Etẹwẹ na jọ do mẹylankan lẹ go to madẹnmẹ?
18 To egbehe, e gán taidi dọ mẹylankan lẹ ma nọ jiya nuhe yé wà lẹ tọn. (Mal. 3:14, 15) Amọ́ to madẹnmẹ, Jesu na dawhẹna mẹhe taidi gbọgbọẹ lẹ bo na klan yé sọn mẹhe taidi lẹngbọ lẹ go. (Mat. 25:31-33) Mẹylankan ehelẹ ma na lùn nukunbibia daho lọ tọ́n, mọ yé ma na yin finfọnsọnku nado nọgbẹ̀ to aihọn yọyọ lọ mẹ. Yinkọ yetọn lẹ ma na tin to “owe oflin tọn” he yin nùdego to Malaki 3:16 mẹ lọ mẹ.
19. Etẹwẹ mí dona wà todin hugan gbede pọ́n, podọ etẹwutu? (Malaki 3:16-18)
19 Din wẹ ojlẹ lọ na mí nado dohia dọ mí ma tin to mẹylankan lẹ mẹ. (Hia Malaki 3:16-18.) Jehovah to mẹhe e nọ pọnhlan taidi “nutindo vonọtaun de” kavi nutindo họakuẹ de lẹ bẹpli. Ayihaawe ma tin dọ mí jlo na tin to yé mẹ.
Lehe e na yin ayajẹnu do sọ nado mọ Daniẹli, mẹyiwanna mítọn lẹ po mẹsusu devo lẹ po whenue yé “na fọ́n” na mimá yetọn to aihọn yọyọ lọ mẹ! (Pọ́n hukan 20tọ)
20. Opagbe godo tọn tẹwẹ yin dido na Daniẹli, podọ naegbọn a to nukọnpọnhlan hẹndi opagbe enẹ tọn?
20 Na nugbo tọn, mí to gbẹnọ to ojlẹ ayidego tọn de mẹ. Amọ́, nujijọ he sọ jiawu tlala lẹ nasọ wá aimẹ to madẹnmẹ. To zande, kanyinylan wunmẹ lẹpo na yin didesẹ. Enẹgodo, mí na mọ hẹndi opagbe he Jehovah do na Daniẹli tọn he dọmọ: “A na fọ́n na mimá towe to opodo azán lẹ tọn.” (Dan. 12:13) Be a to jejeji pọ́n ojlẹ enẹ whenue Daniẹli po mẹyiwanna towe lẹ po “na fọ́n” whladopo dogọ ya? Eyin mọ wẹ, wà nuhe go a pé lẹpo todin nado yin nugbonọ, podọ a gán kudeji dọ yinkọ towe na gbọṣi owe ogbẹ̀ tọn Jehovah tọn mẹ.
OHÀN 80 “Dọ́pọ́n bo Mọdọ Jehovah Yọ́n”
^ Hosọ ehe bẹ vọjlado de hẹn gando tito mẹpinplọn tọn daho he yin nùdego to Daniẹli 12:2, 3 mẹ lọ go. Mí na dọhodo whenue ehe na wá aimẹ gọna mẹhe na do mahẹ to e mẹ lẹ ji. Mí nasọ mọ lehe azọ́n mẹpinplọn tọn ehe na wleawudaina mẹhe to aigba ji lẹ na mẹtẹnpọn godo tọn lọ do to vivọnu Gandudu Owhe Fọtọ́n tọn Klisti tọn lọ tọn.
^ Fọnsọnku gán bẹjẹeji po mẹhe yin nugbonọ kakajẹ okú to azán godo tọn mẹ lẹ po, bọ mẹhe kú jẹnukọnna yé lẹ gán bọdo yé go, enẹ wẹ sọn whẹndo de ji jẹ devo ji. Eyin mọ wẹ, mẹhe nọgbẹ̀ to ojlẹ dopolọ mẹ lẹ na do dotẹnmẹ lọ nado dokuavọna mẹhe yé yọnẹn nukun sọ nukun lẹ. Depope he e na yin, Owe-wiwe lẹ dọho gando fọnsọnku olọn mẹ tọn go, dọ e na yin to “aliho he to kannukannu de” mẹ, podọ mí gán kudeji dọ fọnsọnku aigba ji tọn lọsu na yin to aliho dopolọ mẹ.—1 Kọl. 14:33; 15:23.
^ Zẹẹmẹ ehe yin vọjlado de gando nukunnumọjẹnumẹ mítọn he to owe lọ Payi Dọdai Daniẹli Tọn Go! weta 17tọ mẹ, podọ to Atọ̀họ̀-Nuhihọ́ lọ Tọn Flansegbe tọn 1er juillet 1987, weda 21-25 mẹ go.
^ To vogbingbọn mẹ, hodidọ lọ lẹ “dodonọ lẹ” po “mawadodonọ lẹ” po he to Owalọ lẹ 24:15 mẹ gọna “mẹhe wà dagbe lẹ” po “mẹhe wà nuylankan lẹ” po he to Johanu 5:29 mẹ zinnudo walọ he mẹhe yin finfọnsọnku lẹ zan jẹnukọnna okú yetọn ji.
