STADI ATIKOL 40
“Kara Maoromaoro Dalana ai Momo Idia Hakaua Mai”
“Kara maoromaoro dalana ai momo idia hakaua mai taudia be hisiu bamona do idia diari, ela bona hanaihanai.”—DAN. 12:3.
ANE 151 Do Ia Boiboi
POINT BADANA *
1. Keriso Ena Lagani 1,000 Lohia Negana ai, dahaka gau namodia do idia vara?
MOMOKANI, Keriso Ena Lagani 1,000 Lohia Negana ai, tanobada dekenai toreisi lou do ia matamaia be moale negana! Momo edia lalokau taudia be idia mase, bona idia ura bada unai taudia idia itaia lou. Iehova ena hemami danu be unai bamona. (Iobu 14:15) Tanobada hegegemadai taunimanima do idia hedavari lou ena moale mani oi laloa. Stadi atikol 39 ai ita itaia bamona, “kara maoromaoro taudia,” mauri bukana ai edia ladana ia noho taudia unai, be “do idia toreisi lou mauri abia totona.” (Kara 24:15; Ioa. 5:29) Iseda lalokau taudia momo be Aramagedono murinai do idia toreisi lou. * Danu, “kara maoromaoro lasi taudia” be, idia do mase lasi neganai Iehova idia dibaia lasi eiava hesiai henia lasi taudia. Idia be “do idia toreisi lou hahemaoro abia totona.”
2-3. (a) Isaia 11:9, 10 hegeregerena, tanobada hegegemadai dahaka hadibaia gaukara badana do ia vara? (b) Inai atikol ai, dahaka do ita herevalaia?
2 Idia toreisi lou taudia ibounai be ta ese do ia hadibadia be namo. (Isa. 26:9; 61:11) Unai dainai tanobada hegegemadai hadibaia gaukara badana do ia vara. (Isaia 11:9, 10 duahia.) Dahaka dainai? Badina idia toreisi lou kara maoromaoro lasi taudia ese inai gaudia idia dibaia be namo: Iesu Keriso, Dirava ena Basileia, Iesu ena mauri davana, bona Iehova ena ladana bona ena lohia siahuna. Kara maoromaoro taudia ese metairametaira Iehova ena ura tanobada totona do idia dibaia. Unai abidadama taudia haida be Baibel idia do torea haorea lasi neganai idia mase. Kara maoromaoro lasi taudia bona kara maoromaoro taudia be gau momo do idia dibaia.
3 Inai atikol ai, inai henanadai do ita herevalaia: Hadibaia gaukara badana be edena bamona do idia karaia? Edena dala ai taunimanima be edia kara amo do idia hahedinaraia edia ladana be mauri bukana ai do ia noho hanaihanai eiava lasi? Unai henanadai edia haere ita diba be mai anina bada. Do ita itaia, Daniela bona Apokalupo bukana ai idia noho peroveta herevadia ese ita do ia durua, mase taudia idia toreisi lou neganai do ia vara gauna dekenai diba matamata ita abia totona. Ginigunana be, Daniela 12:1, 2 ese ia perovetalaia gaudia mani ita herevalaia.
“TANO ENA KAHU LALONAI IDIA MAHUTA NOHO TAUDIA BE DO IDIA NOGA”
4-5. Daniela 12:1 ese dokona negana be edena bamona ia herevalaia?
4 Daniela 12:1 duahia. Daniela bukana ese dokona negana ai do idia vara gau namodia ia herevalaia. Hegeregere, Daniela 12:1 ia gwau Mikaela, ia be Iesu Keriso, be “[Dirava ena] taunimanima totona ia gini.” Unai peroveta herevana ena kahana be lagani 1914 ai ia guguru matamaia, unai neganai Iesu be Dirava ena Basileia ena King ai ia lao.
5 To, aneru ese Daniela ia hamaoroa danu, Iesu be do “ia gini,” bona unai nega lalonai “hisihisi negana do ia vara, bese ta ia vara negana amo unai bamona hisihisi ia vara lasi ela bona unai nega.” Unai “hisihisi negana” be, Mataio 24:21 ese ia herevalaia “hisihisi badana.” Iesu be hisihisi negana ena dokona, unai be Aramagedono ai, do ia gini, eiava kara ta do ia karaia Dirava ena taunimanima ia gimaia totona. Apokalupo bukana ese idia ia gwauraia “hutuma bada,” idia be “hisihisi badana amo idia hanaia mai.”—Apok. 7:9, 14.
6. Hutuma bada be hisihisi negana amo idia roho mauri murinai, dahaka do ia vara? Herevalaia. (Tanobada ai do ia vara toreisi lou dekenai diba ma haida abia totona, inai magasin ai atikol ladana “Duahia Taudia Edia Henanadai” itaia danu.)
6 Daniela 12:2 duahia. Hutuma bada be hisihisi negana amo idia roho mauri murinai, dahaka do ia vara? Unai peroveta herevana be guba ena toreisi lou eiava lagani 1918 ai dagedage taudia ese nega sisina lalonai Dirava ena hesiai taudia edia gaukara idia koua, to ia bada lou karana ia herevalaia lasi. * To, hari ita laloparara Daniela 12:2 ena peroveta herevana be tanobada matamatana ai do ia vara toreisi lou ia herevalaia. Dahaka dainai unai bamona ita hereva? Iobu 17:16 ese inai hereva, “kahu” ia gaukaralaia danu bona ena anina be “Mase Gurina.” Unai ese ia hahedinaraia, Daniela 12:2 be dina gabedia idia ore negana bona Aramagedono tuarina murinai do ia vara toreisi lou karana ia herevalaia.
7. (a) Haida be “mauri hanaihanai” abia totona do idia toreisi lou, unai ena anina be dahaka? (b) Edena dala ai, unai be “toreisi lou hereadaena”?
7 To, Daniela 12:2 ia gwau, haida be “mauri hanaihanai” abia totona do idia toreisi lou, unai ena anina be dahaka? Anina be lagani 1,000 lalonai, idia toreisi lou taudia be Iehova bona Iesu do idia diba bona kamonai henidia noho dainai, mauri hanaihanai do idia abia. (Ioa. 17:3) Unai be “toreisi lou hereadaena,” badina unai ese guna idia vara toreisi lou haida ia hereaia. (Heb. 11:35) Dahaka dainai? Badina guna idia toreisi lou taudia be idia mase lou.
8. Dahaka dainai toreisi lou taudia haida be “do idia hemarai ela bona hanaihanai”?
8 To do idia toreisi lou taudia haida ese Iehova ena hadibaia gaukara do idia abia dae lasi. Daniela ena peroveta herevana ese unai toreisi lou taudia haida ia gwauraia, “do idia hemarai ela bona hanaihanai.” Idia be gwau-edeede karana do idia hahedinaraia dainai, Dirava ese edia ladana be mauri bukana ai do ia torea lasi bona mauri hanaihanai do idia abia lasi. To, “do idia hemarai ela bona hanaihanai,” eiava dika bada do idia davaria. Unai dainai, Daniela 12:2 be mase taudia ese toreisi lou murinai idia karaia karadia dainai idia dekenai do ia vara gauna ia herevalaia. * (Apok. 20:12) Haida be mauri hanaihanai do idia abia, to ma haida be lasi.
“KARA MAOROMAORO DALANA AI MOMO IDIA HAKAUA MAI”
9-10. Hisihisi badana murinai dahaka do ia vara, bona daidia be “do idia diari momokani, guba ia diari bamona”?
9 Daniela 12:3 duahia. “Hisihisi negana” murinai, dahaka do ia vara? Daniela 12:2 sibona lasi, to siri 3 ese hisihisi badana murinai do ia vara gauna ia herevalaia.
10 Daidia be “do idia diari momokani, guba ia diari bamona”? Mataio 13:43 ai, Iesu ena hereva ese ita ia durua unai taudia ita lalopararalaia totona, ia gwau: “Unai nega ai, kara maoromaoro taudia be edia Tamana ena Basileia lalonai dina bamona do idia diaridiari.” Unai siri dekenai, Iesu ese “Basileia ena natudia,” iena horoa tadikaka unai, ia herevalaia, idia be ia ida guba Basileia lalonai do idia lohia. (Mat. 13:38) Unai dainai, reana Daniela 12:3 be horoa taudia bona Lagani 1,000 Lohia Negana lalonai do idia karaia gaukarana ia herevalaia.
144,000 taudia be Iesu Keriso ida do idia gaukara hebou, unai amo tanobada ai lagani 1,000 lalonai ia vara hadibaia gaukara badana do idia gunalaia (Paragraf 11 itaia)
11-12. Lagani 1,000 lalonai, 144,000 taudia ese dahaka gaukara do idia karaia?
11 Edena dala ai horoa taudia ese “kara maoromaoro dalana ai momo [do] idia hakaua mai”? Horoa taudia be Iesu Keriso ida do idia gaukara hebou, unai amo tanobada ai lagani 1,000 lalonai do ia vara hadibaia gaukara badana do idia gunalaia. Unai 144,000 taudia be king bona hahelaga gaukara do idia karaia. (Apok. 1:6; 5:10; 20:6) Unai dainai, idia ese “bese idauidau hanamoa” gaukarana do idia karaia bona taunimanima do idia durua metairametaira goevadae taudia ai idia lao totona. (Apok. 22:1, 2; Ese. 47:12) Horoa taudia be mai moale ida unai gaukara do idia karaia!
12 Daidia be kara maoromaoro dalana ai idia hakaua taudia “momo” huanai do idia noho? Do idia noho taudia be inai: Mase amo do idia toreisi lou taudia, Aramagedono amo do idia roho mauri taudia, bona tanobada matamata ai do idia vara natudia. Lagani 1,000 ena dokona ai, tanobada ai idia noho taudia ibounai be do idia goevadae. To, edena negai unai taudia edia ladana be mauri bukana ai do ia noho hanaihanai, peni amo idia torea bamona, eiava edia ladana do ia kokia, pensolo ai idia torea bamona?
HAHETOHO GINIGABENA
13-14. Tanobada dekenai goevadae taudia ese mauri hanaihanai idia do abia lasi neganai, dahaka idia karaia guna be namo?
13 Namona be ita laloatao, ta ia goevadae karana ese ia hahedinaraia lasi ia be maoromaoro mauri hanaihanai do ia abia. Adamu bona Heva mani ita laloa. Idia be goevadae taudia, to mauri hanaihanai idia abia totona Iehova Dirava badinaia karana idia hahedinaraia guna be namo. Bona madi, Iehova idia badinaia totona idia kwalimu lasi.—Roma 5:12.
14 Lagani 1,000 ena dokona ai, tanobada ai do idia noho taudia dekenai dahaka do ia vara? Idia be goevadae taudia ai do idia lao. Idia ese Iehova ena lohia dalana do idia badinaia ela bona hanaihanai, a? Eiava haida be Adamu bona Heva hegeregerena, ena be idia goevadae to Dirava do idia badinaia lasi, a? Unai henanadai edia haere ita diba be namo, to edena dala ai?
15-16. (a) Edena negai taunimanima ese do idia hahedinaraia idia be Iehova idia badinaia eiava lasi? (b) Hahetoho ginigabena ai dahaka do ia vara?
15 Lagani 1,000 lalonai, Satani be guri lalonai do ia noho. Unai nega ai, ia ese ta do ia hakaua kerere lasi. To, lagani 1,000 ena dokona ai, Satani do idia ruhaia. Bena ia ese dala do ia tahua goevadae taudia ia hakaua kerere totona. Unai hahetoho negana lalonai, goevadae taudia ibounai ese do idia hamomokania idia be Dirava ena ladana idia matauraia bona ena lohia dalana idia abia isi eiava lasi. (Apok. 20:7-10) Unai nega lalonai idia karaia gaudia ese do ia hahedinaraia, mauri bukana ai edia ladana do ia noho hanaihanai eiava lasi.
16 Baibel ia gwau haida be Adamu bona Heva bamona, kamonai lasi karana do idia hahedinaraia, bona Iehova ena lohia dalana do idia dadaraia. Idia dekenai dahaka do ia vara? Apokalupo 20:15 ia gwau: “Mauri bukana lalonai edia ladana idia torea lasi taudia be lahi gohuna lalonai ia negea diho.” Oibe, unai gwau-edeede taudia do ia hadikaia ore ela bona hanaihanai. To goevadae taudia momo be unai hahetoho ginigabena do idia hanaia. Bena mauri bukana ai edia ladana do ia noho ela bona hanaihanai.
“DOKONA NEGANA” LALONAI
17. Aneru ese Daniela ia hamaoroa iseda nega lalonai dahaka do ia vara? (Daniela 12:4, 8-10)
17 Vaira nega ai do idia vara gaudia ita laloa neganai ita moale, ani? To, aneru ese Daniela dekenai iseda nega, eiava “dokona negana” totona mai anina bada gaudia haida ia herevalaia danu. (Daniela 12:4, 8-10 duahia; 2 Tim. 3:1-5) Aneru ese Daniela ia hamaoroa: “Diba momokanina be do ia bada herea.” Oibe, Daniela ese ia torea peroveta herevadia be Dirava ena taunimanima ese do idia lalopararalaia namonamo. Aneru ma ia gwau inai nega dokona ai, “dika taudia be kara dika do idia karaia, bona do idia laloparara lasi.”
18. Kahirakahira kara dika taudia dekenai dahaka do ia vara?
18 Hari ita itaia kara dika taudia be edia kara dikadia dainai panisi idia abia lasi. (Mal. 3:14, 15) To, kahirakahira Iesu ese nanigosi bamona taudia be mamoe bamona taudia amo do ia hapararaia. (Mat. 25:31-33) Unai kara dika taudia be hisihisi badana amo do idia roho mauri lasi, bona do idia toreisi lou lasi tanobada matamatana ai idia noho totona. Malaki 3:16 ese ia herevalaia “buka” lalonai edia ladana do ia noho lasi.
19. Hari be nega namona dahaka ita karaia totona, bona dahaka dainai? (Malaki 3:16-18)
19 Hari be nega namona, iseda kara amo ita hamomokania ita be kara dika taudia ita tohotohoa lasi. (Malaki 3:16-18 duahia.) Iehova ese ‘[iena] lalokau taudia ai ia halaoa,’ eiava dava bada kohuna bamona ia laloa taudia ia haboua noho. Ita ura unai bamona taudia huanai ita noho.
Daniela, iseda lalokau taudia, bona taunimanima momo herea do idia “gini,” tanobada matamatana ai edia ahuna idia abia karana ita itaia neganai, do ita moale bada! (Paragraf 20 itaia)
20. Iehova ese Daniela dekenai dahaka ia gwauhamatalaia, bona dahaka dainai oi ura unai ena guguru karana oi itaia?
20 Momokani, ita be mai anina bada negana lalonai ita noho. To kahirakahira kara badadia momo do idia vara. Kahirakahira kara dika taudia idia ore karana do ita itaia. Unai murinai, Iehova ese Daniela dekenai ia gwauraia gwauhamata ena guguru karana do ita itaia, ia gwau: “Dokona dinadia ai do oi toreisi emu ahuna oi abia totona.” (Dan. 12:13) Oi ura momokani Daniela, bona emu lalokau taudia, do idia “gini” lou, a? Bema oibe, hari oi gaukara goada Iehova oi badinaia noho, bona oi diba momokani emu ladana be Iehova ena mauri bukana lalonai do ia noho hanaihanai.
ANE 80 Iehova be Herea Momokani
^ Inai atikol ai, Daniela 12:2, 3 ese ia herevalaia hadibaia gaukara badana dekenai diba matamata do ita abia. Bona do ita itaia, edena negai unai do ia vara bona daidia ese unai gaukara do idia karaia. Danu, inai hadibaia gaukara badana ese Keriso Ena Lagani 1,000 Lohia Negana ena dokona ai do ia vara hahetoho ginigabena totona taunimanima do ia hegaegaelaia dalana do ita herevalaia.
^ Toreisi lou karana be ena nega ta ta hegeregerena do ia vara, anina be uru ta ta hegeregerena ai unai do ia vara. Reana dina gabedia ai idia mase Iehova ena hesiai taudia do idia toreisi lou guna, unai murinai idia mase vadaeni uru ma ta taudia do idia toreisi lou, bona toreisi lou be unai bamona do ia vara ela bona Iehova ese ia laloatao taudia ibounai do idia toreisi lou. Bema unai bamona ia vara, dala do ia noho uru ta ta ese idia dibaia namonamo taudia do idia welkam henia lou. Ena be unai bamona do ia vara eiava lasi, to Baibel ia hahedinaraia guba idia lao taudia be “edia nega ta ta ai” idia toreisi lou, bona ita gwau diba tanobada ai toreisi lou be unai bamona do ia vara danu.—1 Kor. 14:33; 15:23.
^ Unai diba matamata ese inai buka, Daniela Ena Peroveta Herevana Oi Laloa Namonamo! ena karoa 17, bona The Watchtower July 1, 1987, rau 21-25 dekenai ia noho lalohadai gunana ia haidaua.
^ Kara 24:15 ai inai hereva, “kara maoromaoro taudia” bona “kara maoromaoro lasi taudia,” bona Ioane 5:29 ai inai hereva, “kara namo idia karaia taudia” bona “kara dika idia karaia taudia,” be taunimanima idia do mase lasi neganai idia karaia karadia ia herevalaia.
