ORUPA RWOMAKONḒONONENO 40
‘Okuhonga ovandu ovengi okutjita ousemba’
“Nu imba mba honga ovandu ovengi okutjita ousemba mave yere otja ozonyose nga aruhe.”—DAN. 12:3.
EIMBURIRO 151 Eye ma isana
OMAPU KU MATU KATARA *
1. Ovitjitwa viṋe ovinanḓengu mbi mavi katjitwa mOzombura Eyovi zOuhonapare wa Jesus?
TJIRI ma rire oruveze oruwa indu ombendukiro kombanda yehi tji mai utu mOzombura Eyovi zOuhonapare wa Jesus. Imba avehe mba zepaisa ovasuverwa vawo, ve vanga okuvemuna rukwao. Nu Jehova wina u vanga nao. (Job 14:15) Iho otjiṋa tjondjoroka kovandu avehe kombanda yehi indu tji mave munu ovasuverwa vawo amave pendurwa. Otja tji twe rihongo morupa ndwa kapita, imba “ovawa” womana nga tjangwa membo romuinyo “mave penduka nave kara nomuinyo.” (Oviung. 24:15; Joh. 5:29) Ovasuverwa vetu ovengi mba ṱa ngahino mave kara mokati ka imba mbu mave pendurwa katjisupi kombunda yovita vya Armagedon. * Imba ‘ovavi’ mbe hi na va muna oruveze okurihonga ohunga na Jehova poo okumukarera nouṱakame ngunda ave hi ya ṱa, “mave penduka nave pangurwa.”
2-3. (a) Otja tji pa raisiwa mu Jesaja 11:9, 10, omahongero yeṋe omanenenene ngu maye katjitwa mekuruhungi rovandu? (b) Matu katara ku ye morupa ndwi?
2 Avehe mbu mave kapendurwa, mave hepa okuhongwa. (Jes. 26:9; 61:11) Ku nao, omahongero omanenenene mekuruhungi rovandu maye hepa okutjitwa. (Lesa Jesaja 11:9, 10.) Omena raye? Omena rokutja imba ovavi mbu mave pendurwa, mave hepa okurihonga ohunga na Jesus Kristus, Ouhona wa Mukuru, otjisuta tjonguturiro, nounahepero wena ra Jehova. Nokutja ongwaye eye erike tje ri ngu nousemba wokuhonapara. Nandarire imba ovawa mave hepa okuhongwa imbi Jehova mbya honga ovakarere ve ohunga nondando ye kehi. Nu tjiva va imba ovaṱakame va ṱa ngunda Ombeibela ai hi ya manuka okutjangwa. Ovandu avehe ovawa novavi mbu mave pendurwa mave kara novingi okurihonga.
3 Morupa ndwi matu kahungirira komapuriro nga: Hapo oviungura vyomahongero mbi mavi kayendisiwa vi? Omomuano uṋe ongaro ovandu ndji mave raisa koviungura vyomahongero mbi, mu mai tjiti kutja omana wawo ye tjangwe nga aruhe membo romuinyo poo aye ha tjangwa? Omaziriro komapuriro nga omananḓengu tjinene ku eṱe ndino. Otja tji matu kamuna, omaprofetero tjiva omananḓengu nga tjangwa membo ra Daniel na indi rOmavandururiro maye tu vatere okuzuva nawa imbi mbi mavi katjitwa indu imba mba ṱa tji mave pendurwa. Rutenga indjo tu tare kovitjitwa ovinanḓengu mbya hunganekwa momaprofetero wa Daniel 12:1, 2.
“OVENGI VA IMBA MBA ṰA RUKURU MAVE KARA NOMUINYO RUKWAO”
4-5. Daniel 12:1 ri tjiukisa ye ohunga noruveze rwomaandero wouye mbwi?
4 Lesa Daniel 12:1. Embo ra Daniel ri raisa ongongorasaneno yoviṋa mbi mavi katjitwa moruveze rwomaandero wouye. Otjotjihorera, Daniel 12:1 ri tjiukisa kutja Mikael, ngu ri Jesus Kristus, ma “yama otjiwaṋa” tja Mukuru. Orupa rwomaprofetero ngo rwa uta okuyenenisiwa mombura ndji 1914, indu Jesus tja zikwa otjombara yOuhona wa Mukuru.
5 Nungwari, Daniel wina wa raerwa kutja Jesus ma “yama otjiwaṋa” tja Mukuru moruveze “rwomaumba, oruveze oruvi tjinene ndu ha ri po okuza koviwaṋa tji vya utirwe korutenga.” “Oruveze rwomaumba” ndwa tamunwa mba, maru hee “ozombamisiro ozonene tjinene” nḓa tamunwa mu Mateus 24:21. Jesus ma yama ovakarere va Mukuru pomaandero wozombamisiro ozonene tjinene povita vya Armagedon. Embo rOmavandururiro ra hungira ohunga na wo otjotjimbumba otjinene tjovandu “mba zira mondatumisire ondirise.”—Omavan. 7:9, 14.
6. Mape tjitwa tjike indu otjimbumba otjinene tjovandu tji tja zu nokutuurunga ondatumisire ondirise? Kahurura. (Wina tara korupa ndwi “Omapuriro okuza kovalese” ndu ri mokambo nga, ndu maru hungire ohunga nombendukiro yokukahupa kombanda yehi.)
6 Lesa Daniel 12:2. Maku tjitwa tjike kotjimbumba otjinene tjovandu tji tja zu nokutuurunga oruveze rwomaumba? Omaprofetero nga kaye nakuheya ombendukiro yovakarere va Mukuru yokuyenda keyuru, ndji mai tjitwa momayuva omasenina otja komazuviro wetu omakuru. * Nungwari omambo nga maye hee ombendukiro yovaṱi ndji mai katjitwa mouye oupe mbu mau ya. Ongwaye tji matu tja nao? Mu Job 17:16 mwa ungurisiwa embo ndi ‘otjovakoke’ ndi heya eyendo. Momaraka omatenga Ombeibela mu ya tjangerwe, ya ungurisa embo ndi “oruuma” mu Job 17:16 na Daniel 12:2. Ku nao, matu yenene okutja Daniel 12:2 ma ri hungire ohunga nombendukiro yokombanda yehi, ndji mai katjitwa kombunda yomayuva omasenina na kombunda yovita vya Armagedon.
7. (a) Tjiva mave kapendurwa vi kutja ve kakare ‘nomuinyo waaruhe’? (b) Hapo ongwaye indji tji i ri “ombendukiro yomuinyo omuwa”?
7 Hapo Daniel 12:2 ri heya tjike indu tji ri tja tjiva mbu mave kapendurwa mave kara ‘nomuinyo waaruhe’? Ihi matji hee kutja imba mba pendurwa nave tjiwa, poo ave kayenda komurungu okurihonga nokukara nonḓuviro ku Jehova na Jesus mozombura 1 000, mave kamuna omuinyo waaruhe. (Joh. 17:3) Indji “ombendukiro yomuinyo omuwa” pu indji yovandu mba pendurirwe komuinyo morukapitaveze. (Hebr. 11:35) Omena raye? Mena rokutja ovandu mba pendurirwe morukapitaveze va kaṱa rukwao.
8. Omomuano uṋe tjiva mba pendurwa mu “mave hihamisiwa mohoṋi nga aruhe”?
8 Posi yokutja kavandu avehe mba pendurwa mbu mave vanga okuhongwa i Jehova. Omaprofetero wa Daniel ye tja, tjiva mba pendurwa “mave hihamisiwa mohoṋi nga aruhe.” Mena rokutja mave karira ovapirukire, omana wawo kamaaye tjangwa membo romuinyo nu kamaave kamuna omuinyo waaruhe. Owo ‘mave kahihamisiwa mohoṋi’ poo mave kanyonwa nga aruhe. Ku nao, Daniel 12:2 mari hungirire ku imbi mbi mavi katjitwa korusenina ku imba mba pendurwa, okuisira kovitjitwa mbi mave tjiti tji va zu nokupendurwa. * (Omavan. 20:12) Tjiva mave munu omuinyo waaruhe nu varwe kamaave u munu.
‘OKUHONGA OVANDU OVENGI OKUTJITA OUSEMBA’
9-10. Ovikeṋa vyarwe mbi mavi katjitwa kombunda yondatumisire ondirise nu oouṋe mbu “mave keṋakeṋa tjimuna ondjerera yevaverwa”?
9 Lesa Daniel 12:3. Ovikwaye vyarwe mbi mavi katjitwa “oruveze rwomaumba” tji rwa kapita? Okuweza ku Daniel 12:2, ezeva 3 ri hungira ohunga notjiṋa tji matji tjitwa kombunda yondatumisire ondirise.
10 Ouṋe mbu “mave keṋakeṋa tjimuna ondjerera yevaverwa”? Matu munu eziriro momambo wa Jesus nge ri mu Mateus 13:43, ngu maye tja: “Indino otjiwaṋa tjaNdjambi matji yere otja eyuva mOuhona walhe yawo.” Otja komambo nga, Jesus aa hungire ohunga ‘novandu mba vOuhona,’ mbe ri ovatwirisiwa mbu mave kanana pu na ye mOuhona womayuru. (Mat. 13:38) Ku nao Daniel 12:3, mari sokuhungirira kovatwirisiwa na koviungura mbi mave katjita mozombura inḓa eyovi zouhonapare wa Jesus.
Imba 144 000 mave ungura pu na Jesus okuhongorera po otjiungura tjomahongero tji matji katjitwa mozombura nḓa 1 000 (Oparagrafa 11)
11-12. Oviungura viṋe imba 144 000 mbi mave kaungura mozombura nḓa 1 000?
11 Omomuano uṋe ovatwirisiwa mu mave yenene okuhonga ovandu “ovengi okutjita ousemba”? Ovatwirisiwa mave ungura kumwe na Jesus Kristus, okuhongorera po omahongero ngu maye kayendisiwa kombanda yehi mozombura nḓa 1 000. Imba 144 000 kave nokuhonapara otjozombara uriri, nungwari mave karere otjovapristeri wina. (Omavan. 1:6; 5:10; 20:6) Ku nao, owo mave vatere poo mave yandja “omberukiro koviwaṋa” nokutjita kutja ve rire ohomonena kouṱiṱiṱiṱi. (Omavan. 22:1, 2; Esek. 47:12) Tjiri iho matji rire otjitjitwa tjondjoroka onene kovatwirisiwa.
12 Oouṋe mbu mave kara mokati kaimba “ovengi” mbu mave tjitwa kutja ve rire ovasemba? Owo mave kamburire mo imba mba pendurwa na imba mba tuurunga ovita vya Armagedon pu na ovanatje ngamwa avehe mbu mape ya ave kakwatwa mouye oupe. Komaandero wozombura inḓa 1 000, avehe mbe ri kombanda yehi mave rire ohomonena. Nu hapo oruṋe omana wawo tji maye tjangwa nopena kutja ye karerere membo romuinyo?
OMARORERO OMASENINA
13-14. Hapo ovandu avehe ohomonena mbe ri kombanda yehi, mave hepa okuraisa ye ngunda ave hi ya muna omuinyo waaruhe?
13 Matu sokuzemburuka kutja okurira ohomonena kaku hee kutja omundu ma kamuna omuinyo waaruhe. Ripura na Adam na Eva. Owo va ri ohomonena, posi yokutja aave sokuraisa onḓuviro yawo ku Jehova Mukuru kokutja ve mune omuinyo waaruhe. Owo kave tjitire nao, nu iho tja ri otjiṋa otjihihamise.—Rom. 5:12.
14 Ongaro yaimba mbe ri kombanda yehi mai sana pi komaandero wozombura 1 000? Avehe mave rire ohomonena. Hapo ovandu avehe ohomonena mba mave kara nonḓuviro komananeno wa Jehova nga aruhe? Poo tjiva mave kakara tjimuna Adam na Eva, mbe ha ri ovaṱakame nandarire kutja va ri ohomonena? Omapuriro nga maye hepa okuzirwa. Nu hapo maye zirwa momuano uṋe?
15-16. (a) Ovandu avehe mave kamuna ruṋe oruveze rwokuraisa ouṱakame wawo ku Jehova? (b) Omarorero omasenina nga tji ya kapita maku katjitwa tjike?
15 Satan ma pandekwa oure wozombura 1 000. Oure wozombura nḓo eye kamaa yenene okupukisa ovandu. Posi yokutja, komaandero wozombura inḓa 1 000, Satan ma kuturwa. Eye ma kondjo okupukisa ovandu ohomonena. Moruveze indu ovandu tji mave rorwa, ovandu avehe ohomonena mbe ri kombanda yehi mave sokuraisa kutja va tenga ena ra Mukuru nousemba we womananeno poo indee. (Omavan. 20:7-10) Oviṋa mbi mave tjiti oruveze ndwo, ombi mavi raisa kutja omana wawo ye sokutjangwa membo romuinyo nga aruhe poo indee.
16 Ombeibela i tu raera kutja ovandu tjiva kave nokurira ovaṱakame nu mave nakaura omananeno wa Jehova, tjimuna Adam na Eva tji va tjita. Owo mave katjitwa vi? Omavandururiro 20:15 mari tja: “Nu auhe wena ndi ha tjangerwe membo romuinyo wa yumbwa merindi romuriro.” Tjiri ovapirukire mba mave kanyonwa nga aruhe. Posi yokutja otjingi tjovandu ohomonena mave tuurunga omarorero omasenina nga. Nu omana wawo otji maye tjangwa membo romuinyo nga aruhe.
‘MORUVEZE RWOMAANDERO’
17. Hapo omuengeli wa raera Daniel kutja moruveze mu tu ri mamu tjitwa tjike? (Daniel 12:4, 8-10)
17 Tjiri okuripurira kovitjitwa mbi mavi ya moruyaveze ku tu yorokisa. Posi yokutja Daniel wina wa pewa ondjivisiro onanḓengu okuza komuengeli, ndji notjiṋa noruveze mu tu ri, ndu ri “oruveze rwomaandero.” (Lesa Daniel 12:4 *, 8-10; 2 Tim. 3:1-5) Omuengeli wa raera Daniel kutja “ondjiviro youatjiri mai takavara.” Tjiri omambo womaprofetero nge ri membo re maye yenene okuzuvakwa nawa i yovakarere va Mukuru. Omuengeli wina wa tja, moruveze ndwi “imba ovarunde kamaave zuu, nungwari mave panḓere pourunde.”
18. Maku katjitwa tjike kovarunde moruveze rwatjimanga?
18 Ndino mape ya ape munika aayo ovarunde kave vererwa ourunde wawo. (Mal. 3:14, 15) Posi yokutja moruveze rwatjimanga Jesus me yekupangura ovandu mbe sasanekwa nozongombo nu eve haṋa ku na imba mbe sasanekwa nozonḓu. (Mat. 25:31-33) Ovarunde kave nokutuurunga ondatumisire ondirise, nu wina kamaave kapendurwa okukahupa mouye oupe. Omana wawo kamaaye kara ‘membo romazemburukiro’ nda tamunwa mu Maleaki 3:16.
19. Ovikwaye mbi matu sokutjita nai nu omena raye? (Maleaki 3:16-18)
19 Nai matu sokuraisa mongaro yetu kutja kaweṱe orupa rwaimba ovarunde. (Lesa Maleaki 3:16-18.) Jehova u wonga imba mbe muna kutja ‘ouini we omuini’ poo mbe ri ovahuze ku ye. Eṱe tjiri matu vanga okurira vemwe vaimba.
Tjiri indjo mai rire ondjoroka ku eṱe okumuna Daniel, novasuverwa vetu, na varwe ovengi tji mave “penduka” okukambura otjirumatwa tjawo mouye oupe (Oparagrafa 20)
20. Omakwizikiro yeṋe omasenina nga tjitwa ku Daniel, nu omena raye ove tji mo vanga okukamuna omayenenisiro womakwizikiro ngo?
20 Tjiri eṱe tu hupa moruveze rwapeke. Posi yokutja moruveze rwatjimanga maku katjitwa oviṋa oviwa tjinene. Katjisupi matu kamuna omayandekero wourunde auhe. Tjazumba matu kamuna omayenenisiro womakwizikiro wa Jehova nga tjita ku Daniel, nge tja: “Nungwari komaandero woruveze ove mo penduka okukambura otjirumatwa tjoye.” (Dan. 12:13) Hapo ove u zera eyuva Daniel novasuverwa woye tji mave “penduka” rukwao? Ndoovazu pe ri nao, kondja pu mo yenene okurira omuṱakame nai. Nu mo yenene okutjiwa kutja ena roye mari tjangwa membo ra Jehova romuinyo nga aruhe.
EIMBURIRO 80 “Roreye nu mu rimunine ouwa” waJehova
^ Orupa ndwi maru tu pe omazuviro omape ohunga notjiungura tjomahongero omanene nga tamunwa mu Daniel 12:2, 3. Nu matu kakonḓonona kutja mavi tjitwa ruṋe nu oouṋe mbu mave kara norupa. Nu wina matu katara kutja omahongero nga maye karongerisa vi imba mbe ri kombanda yehi, komarorero omasenina ngu maye tjitwa komaandero wOzombura Eyovi zOuhonapare wa Jesus.
^ Ombendukiro mape ya ai utu novandu mba, mba ṱa ovaṱakame ku Jehova momayuva omasenina. Pu mape hee kutja imba mba ṱa ovasenina ombu mave pendurwa ovatenga. Nu okuzambo ai yaruka ombunda okuza kondekurona nga kondekurona. Ndoovazu pe ri nao, imba mba ṱa mave yenene okuyakurwa i yovandu mbaave tjiwa nawa. Nandarire kutja pe ri nao, Omatjangwa maye tja ombendukiro ya imba mbu mave i keyuru mai tjitwa “mongongorasaneno,” ku nao matu yenene okukambura kutja ombendukiro yokombanda yehi mai tjitwa mongongorasaneno wina.—1 Kor. 14:33; 15:23.
^ Omakahururiro nga, omarundurukiro komazuviro nge ri membo ndi Pay Attention to Daniel’s Prophecy! ekondwa 17, nokambo kOruhungu 1 ku Juli, 1987, pomuk. 21-25.
^ Omambo nga “ovawa novavi” nge ri mOviungura 24:15 nomambo nga “imba mba tjita ouwa” na “imba mba tjita ouvi” nge ri mu Johanes 5:29, ye hungirira koviṋa imba mba pendurwa mbi va tjita ngunda ave hi ya ṱa.
^ Daniel 12:4 (NWT): “Nu ove Daniel, ṱiza omambo nga otja otjiundikwa, nu u twe ko otjiyambo nga koruveze rwomaandero. Ovengi mave konḓonona, nu ondjiviro youatjiri mai takavara.”
