MAGIGIAMMU NGA ARTIKULO 40
‘Pangirattal ta Aru ta Kinatunung’
“Danuri mangirattal ta aru ta kinatunung [ay mannawag noka nga] kagitta na bitun ira adde noka.”—DAN. 12:3.
KANSION 151 Magagal Yayya
SUMARIO *
1. Anni ira i kappagayayya nga innaggattam nga mesimmu durante na Tanga-rivu Dagun nga Pammaguray?
SIGURADU nga kappagayayya noka i tiempo sonu mamegafu ngana i paginnolay taw ta davvun durante na Tanga-rivu Dagun nga Pammaguray ni Cristo! Kakanappattam ngana nga masingan uli i ngamin nga natay nga iddeddukattam. Kunnatun gapa i matageno ni Jehova. (Job 14:15) Imajinammu nu kunnasi noka ka-ayayya ta interu davvun sonu mesimmu yatun nga passirimmu uli. Gitta na nagigiammu tam ta nappasa nga artikulo, ‘maginnolay tapenu mattolay’ noka danuri “matunung” nga netura i ngaga-ngagadda ta libru na matolay. (Juan 5:29; King. 24:15, NW ) Awayya na tu kasali ta ollu ira nga mapaginnolay taw ta davvun i aru ta iddeddukattam. * Fuera tatun, danuri gapa “ari matunung,” nelagum ngana i totolay nga awan tu makalanno nga chansa da nga makannammuan si Jehova onu passerbian yayya nige na pateda ay ‘maginnolay tapenu makastigo.’
2-3. (a) Base ta ipasingan na Isaias 11:9, 10, anni noka i metuddu ta kadakallan nga trabahu na panuddu ta interu davvun? (b) Anni i gigiammuattam taw nga artikulo?
2 Mawag tu matudduan noka i ngamin nga mapaginnolay. (Isa. 26:9; 61:11) Yayya nga yatun noka i kadakallan nga trabahu na panuddu ta interu davvun. (Bibbigan i Isaias 11:9, 10.) Ngatta? Mawag gare nga magigiammu noka danuri na ari matunung nga mapaginnolay i meyannung kani Jesu-Cristo, i Pappatulan na Dios, i tavvu, anna i importante nga isyu meyannung ta ngagan anna soberania ni Jehova. Maski danuri matunung, mawag nga metuddu ta nira i sisinu ira nga nituddu ni Jehova meyannung ta gakkag na para ta davvun nga ari da nakannammuan ta katoleda. Nabayag ngana nga natay i karuan tatun ira nga matalo nige paga nga makumpleto i Biblia. Aru gafu i mawag nga gigiammuan noka parehu na ari matunung anna na matunung.
3 Tabbagattam taw nga artikulo i tumunug ira nga pakkiavu: Kunnasi noka nga mesimmu i kadakallan nga trabahu na panuddu? Anni noka i efekto natun nga trabahu nga panuddu ta permanente nga ketura na ngaga-ngagan ta libru na matolay? Mawag tu ammuattam sangawe i tabbag tatun ira nga pakkiavu. Gigiammuattam i karuan ta kappabbaw ira nga profesiya ta libru na Daniel anna Nepakannammu. Gitta na masingattam saw, makoffun ta nittam danatun tapenu mas nga mannawag i pakalippawa tam nu anni noka i mesimmu sonu mapaginnolay ngana i natay ira. Ngem ollu labbi, ammuattam i kappagayayya ira nga neprofesiya ta Daniel 12:1, 2.
‘MASIKKAG NOKA DANURI AGGA-KATRUG TA GAVU’
4-5. Anni i kagian na Daniel 12:1 meyannung ta tiempo na panuppalan?
4 Bibbigan i Daniel 12:1. Mabibbig ta libru na Daniel i natturunug nga kappagayayya nga mesimmu durante ta tiempo na panuppalan. Angngarigan na, kagian na Daniel 12:1 nga si Miguel, nga tumukoy kani Jesu-Cristo, ay ‘agga-taddag para ta totolay na Dios.’ Namegafu nga natuppal yatun nga parte na profesiya ta 1914 tagga ta namegafu nga nappatul si Jesus ta nelangitan nga Pappatulan na Dios.
5 Ngem nekagi gapa kani Daniel nga si Jesus ay “manaddag” durante na “tiempo na ziga-riga nga ari paga nesimmu namegafu turi ta napeggan tu nasion adde tatun nga tiempo.” Yatun nga “tiempo na ziga-riga” ay kaparehu gabbalaman na nakagi ta Mateo 24:21 (NW ) nga “dakal nga ziga.” Sonu Armagedon i ultimu natun nga tiempo na ziga-riga. Tatun nga tiempo, manaddag si Jesus, onu idefensa na noka i totolay na Dios. Natukoy ira ta libru na Nepakannammu bilang i dakal nga ammung nga “mallawan maggafu ta dakal nga ziga.”—Nep. 7:9, 14, NW.
6. Anni i mesimmu kabalin nga mepaliag i dakal nga ammung ta dakal nga ziga? Ipakanawag. (Innan gapa taw nga isyu i artikulo nga “Pakkiavu na Mabbibbig Ira” meyannung ta paginnolay ta davvun.)
6 Bibbigan i Daniel 12:2. Anni i mesimmu sonu mabalin nga mapaliag i dakal nga ammung ta tiempo na ziga-riga? Base ta dati nga pakalippawa tam, yaw nga profesiya ay tumukoy ta simboliko onu espiritual nga pamaginnolay ta totolay na Dios nga mesimmu durante na pangurianan ira nga aggaw. Ngem nanguli ngana i pakalippawa tam tatun sangawe. * Tumukoy ngana danatun ta paginnolay na natay nga mesimmu sonu napabagu nga mundo. Ngatta makagi tam yatun? Ta Job 17:16, neyusa gapa i “gavu” tapenu tumukoy gabbalaman ta “Attanamman.” Ipasingan gafu natun nga tumukoy i Daniel 12:2 ta literal nga paginnolay nga mesimmu noka sonu mangultimu ngana i pangurianan ira nga aggaw anna kabalin noka na gerra na Armagedon.
7. (a) Anni i kayà kagian na egga i karuan nga mapaginnolay ta “mannanayun nga inango”? (b) Ngatta ‘mas mapia yatun nga paginnolay’?
7 Anni gafu i kayà kagian na Daniel 12:2 nga egga i karuan nga maginnolay ta “mannanayun nga inango”? Kayà kagian natun nga danuri mapaginnolay anna kannammuadda, onu tulu-tuloy nga kannammuadda, anna tuppaladda si Jehova anna si Jesus durante na 1,000 nga dagun ay makalawa gabbalaman noka tu mannanayun nga inango. (Juan 17:3) ‘Mas mapia yatun nga paginnolay’ kumpara tari ta paginnolay na totolay ta nappasa. (Heb. 11:35) Ngatta? Megafu ta danuri napaginnolay nga imperfekto nga totolay ay natay gabbalaman.
8. Anni i kayà kagian na mapaginnolay i karuan “ta kepasiranan anna mannanayun nga kauyu-uyaw”?
8 Ngem ari tu ngamin nga mapaginnolay noka ay maya nga mappetuddu kani Jehova. Kagian na profesiya ni Daniel nga egga ira i karuan nga mapaginnolay “ta kepasiranan anna mannanayun nga kauyu-uyaw.” Megafu ta mangipasingan noka ira tu rebelyoso nga appana-panono onu tendensia, ari noka nga metura i ngaga-ngagadda ta libru na matolay anna ari ira nga makalawa tu mannanayun nga inango. Malawa da noka i “mannanayun nga kauyu-uyaw” onu kadaral. Nu kunnuri gafu, tumukoy i Daniel 12:2 ta ultimu nga pattuppalan noka na ngamin nga mapaginnolay base ta kuadda kabalin na kapaginnoleda. * (Nep. 20:12) I karuan ay makalawa noka tu mannanayun nga inango; i karuan ay ari.
‘PANGIRATTAL TA ARU TA KINATUNUNG’
9-10. Anni paga noka i mesimmu kabalin na dakal nga ziga, anna sinni danuri “mannawag noka nga kagitta na langi”?
9 Bibbigan i Daniel 12:3. Anni paga i mesimmu kabalin noka na “tiempo na ziga-riga”? Mabibbig ta versikulo 3 i tadday paga nga mesimmu kabalin noka na dakal nga ziga fuera paga ta nakagi ta Daniel 12:2.
10 Sinni danuri “mannawag noka nga kagitta na langi”? Mammuattam i tabbag natun base ta kinagi ni Jesus ta Mateo 13:43: “Danuri i matunung ay mannawag noka ira nga kagitta na bilag ta Pammagurayan na Yama da.” Ta konteksto natun nga kinagi ni Jesus, tuktukuyan na danuri “ána na Pappatulan,” i nazelugan ira nga wawwaragi na nga makipammaguray noka ta nisa ta nelangitan nga Pappatulan. (Mat. 13:38, NW ) Nu kunnuri gafu, tumukoy i Daniel 12:3 ta nazelugan ira anna ta trabahu nga kuadda noka durante na Tanga-rivu Dagun nga Pammaguray.
Duffunan noka na 144,000 si Jesu-Cristo ta pangigiya ta trabahu nga panuddu durante na 1,000 nga dagun (Innan i parapo 11)
11-12. Anni noka nga trabahu i kuan noka na 144,000 durante na 1,000 nga dagun?
11 Kunnasi noka nga irattal na nazelugan ira i “aru ta kinatunung”? Uffunan noka na nazelugan ira si Jesu-Cristo tapenu megiya i trabahu nga panuddu taw ta davvun durante na 1,000 nga dagun. Ari laman saw nga mammaguray i 144,000 bilang papatul, nu ari, masserbi gapa ira bilang papari. (Nep. 1:6; 5:10; 20:6) Yayya nga manguffun gafu noka ira ta ‘panguru ta tulagan na nasa-nasion’—i sisinu nga pamabbalin ta totolay tu perfekto uli. (Nep. 22:1, 2; Eze. 47:12) Fermi noka i ayayya na nazelugan ira tatun!
12 Sinni i kasali tari ira ta “aru” nga merattal ta kinatunung? Kasali noka tatun danuri napaginnolay anna danuri mapaliag ta Armagedon, maski danuri abbing nga awayya na tu meyana noka ta napabagu nga mundo. Ta ultimu na 1,000 nga dagun, perfekto ngana noka ngamin i mattolay ta davvun. Yatun ngana kari noka i tiempo nga gitta na metura ngana tu permanente ta bolpen i ngaga-ngagadda ta libru na matolay?
I ULTIMU NGA KAPURUEBA
13-14. Anni noka i mawag nga ipasingan na ngamin nga perfekto nga totolay ta davvun nige ira nga makapattolay tu mannanayun?
13 Tandaanattam nakuan nga ari tu automatiko nga mattolay tu mannanayun i tadday nga tolay megafu laman ta perfekto yayya. Daddamman si Adan anna si Eva. Perfekto ira, ngem kawagan tu ipasingadda i pattuppal da kani Jehova nga Dios nige nga makapattolay ira tu mannanayun. Ngem kaddaraddam ta ari ira nga nattuppal.—Roma 5:12.
14 Anni noka i situasion danuri na mattolay ta davvun ta ultimu na 1,000 nga dagun? Perfekto ngana noka ngamin ira. Talaga suportan kari noka tu mannanayun na ngamin nga perfekto nga totolay i pammaguray ni Jehova? Onu egga kari noka i karuan nga mabbalin tu kagitta da Adan anna Eva nga maski nu perfekto ay nabbalin tu ari nga matalo? Mawag tu matabbag noka danatun nga pakkiavu, ngem kunnasi?
15-16. (a) Sonu anni nga meddan tu chansa i ngamin nga totolay nga ipasingan i kinamatalo da kani Jehova? (b) Anni noka i ultimu nga resulta naw nga kapurueba?
15 Mefuku noka tu 1,000 nga dagun si Satanas. Tatun nga tiempo, awan vuluvuga tu maski sinni nga melogo na. Ngem ta ultimu na 1,000 nga dagun, mapalawan noka si Satanas ta kefuku na. Tapus, purueban na noka nga ilogo i perfekto nga totolay. Durante tatun nga kapurueba, meddan noka tu chansa i ngamin nga perfekto nga totolay ta davvun tapenu ipasingan i manawag nga taddag da meyannung ta isyu na ngagan anna soberania na Dios. (Nep. 20:7-10) Ta anni nga nakadepende i permanente nga ketura na ngagan na kada indibidual ta libru na matolay? Depende noka ta taddag na ta pamurueba ni Satanas.
16 Egga noka i karuan nga mabbalin tu kagitta da Adan anna Eva nga mammanaki ta pammaguray ni Jehova. Ari nga nakagi ta Biblia i bilang da. Ngem anni i mesimmu ta nira? Kunnaw i kagian na Nepakannammu 20:15: “I sinni laman nga ari nga netura i ngagan na ta libru na matolay, ay metabbo ta weg na afi.” Interamente gafu nga madaral noka ta mannanayun danaw nga rebelyoso. Ngem makapasa noka taw nga ultimu nga kapurueba i magaru ta perfekto nga totolay. Tatun ngana noka nga permanente nga metura i ngaga-ngagadda ta libru na matolay.
DURANTE TA “TIEMPO NA PANUPPALAN”
17. Anni i nekagi kani Daniel nga mesimmu ta tiempo tam? (Daniel 12:4, 8-10)
17 Excited ittam ngana kada manono tam danatun nga mesimmu ta mappange! Ngem nakalawa gapa si Daniel tu importante nga informasion maggafu ta tadday nga anghel meyannung ta tiempo tam, i “tiempo na panuppalan.” (Bibbigan i Daniel 12:4, 8-10; 2 Tim. 3:1-5) Kinagi na anghel kani Daniel: “Umaru noka i fustu nga pakannammu.” Wan, mas mantindian ngana sangawe tu mapia na totolay na Dios i profesiya ira nga mabibbig ta libru na. Kinagi paga na anghel nga durante taw nga tiempo, “magangngua tu marake i marake ira, anna awan ta marake ira i makalippawa.”
18. Anni i aranni ngana nga mesimmu ta marake nga totolay?
18 Ta tiempo tam, gitta na ari nga makastigo danuri marake ta marake ira nga annangngua da. (Mal. 3:14, 15) Ngem aranni ngana nga kastigowan ni Jesus danuri megitta ta kazzing anna isina na ira ta totolay nga megitta ta karneru. (Mat. 25:31-33) Ari noka nga mapaliag ta dakal nga ziga danatun nga marake, ni tu mapaginnolay ira tapenu mattolay ta napabagu nga mundo. Ari noka nga metura i ngaga-ngagadda ta “libru nga panaddamman” nga mabibbig ta Malakias 3:16.
19. Anni ngana nakuan i kuattam sangawe, anna ngatta? (Malakias 3:16-18)
19 Sangawe ngana i tiempo tapenu pakurugattam nakuan nga ari ittam nga kasali ta marake. (Bibbigan i Malakias 3:16-18.) Maddaggun ngana nga ammungan ni Jehova danuri imammatan na nga “espesial nga pakkukua,” onu matagibalor ta nisa. Magga kayà tam nga tadday ittam nakuan gapa tatun.
Kappagayayya noka nga masingan si Daniel, i iddeddukattam ira, anna i aru paga nga “tumaddag” para ta billeda ta napabagu nga mundo! (Innan i parapo 20)
20. Anni i ultimu nga nepromesa kani Daniel, anna ngatta iinnaggammu ngana nga matuppal yatun nga promesa?
20 Talaga kappagayayya i tiempo nga pattolayattam sangawe. Ngem egga paga i mas kappabbaw ira nga gannug nga aranni ngana nga mesimmu. Aranni tam ngana nga masingan i kadaral na ngamin nga kinadake. Kabalin natun, masingattam noka nga tuppalan ni Jehova yaw nga promesa na kani Daniel: ‘Tumaddag ka noka ta panuppalan na aggaggaw tapenu alawatammu i billem.’ (Dan. 12:13) Iinnaggammu ngana kari i tiempo sonu “tumaddag” uli si Daniel kunne na gapa i natay ira nga iddeddukammu? Nu wan, kuammu i adde na mawayyam sangawe tapenu mabbalin tu matalo. Nu kuammu yatun, siguradu noka nga ari nga mavurran i ngagammu ta libru na matolay ni Jehova.
KANSION 80 Tikman at Tingnan ang Kabutihan ni Jehova
^ Magigiammu taw nga artikulo i nanguli nga pakalippawa tam meyannung ta kadakallan nga trabahu nga panuddu ta Daniel 12:2, 3. Gigiammuattam nu sonu anni nga mesimmu yatun anna nu sinni noka ira i nelagum tatun. Ammuattam gapa nu kunnasi nga meprepara naw nga trabahu nga panuddu i ngamin noka nga egga ta davvun para ta ultimu nga kapurueba kabalin na Tanga-rivu Dagun nga Pammaguray ni Cristo.
^ Posible nga ollu labbi nga maginnolay i henerasion danuri na matalo nga natay durante na pangurianan nga aggaw. Tapus tumunug gapa i mas nappollu ngana ira nga henerasion ta nira. Nu kunnatun gafu, egga i chansa na kada henerasion nga dafungan danuri mapaginnolay nga personal nga nammammu da. Base ta kagian na Katurakan, mesimmu i nelangitan nga paginnolay segun ta maayus onu “natullo nga patturunug.” Awayya tam gafu nga makkonklusion nga maski sinni paga i ollu nga mapaginnolay taw ta davvun, magga maayus lagapa saw i patturunug natun.—1 Cor. 14:33; 15:23.
^ Yaw ngana i bagu nga pakanawag, ari ngana tu i dati nga pakalippawa tam nga mabibbig ta kapitulo 17 na libru nga Magbigay-Pansin sa Hula ni Daniel! anna ta Hulio 1, 1987 nga isyu na Ang Bantayan, p. 21-25.
^ Ta Kingngua 24:15 (NW ) gapa, i uvovug ira nga i “matunung” anna i “ari matunung” anna i uvovug ira ta Juan 5:29 nga “ngamin i nangngua tu mapia” anna “danuri i marakay i kikkingngua da” ay tumukoy ta kinikkingngua na napaginnolay ira nige da nga natay. Yayya nga tanakuan yatun ta tukuyan na Daniel 12:2.
