ANG ỌJẸ́JẸ 40
“Ụgbẹyị nya Ang Ọnyịịla Ọhọhọ” ọ-Mẹjẹ Angịkịla
“Ọng myị ọng ọlẹ kọ . . . mẹ ụgbẹyị nya ang ọnyịịla ọhọhọ jẹ angịkịla ka hụ́ lala ịdịchụ gbe oyi myị oyi.”—DAN. 12:3.
EJE 151 Ohe ka Be Ẹkọ
ẸHỊ NYA ẸLA *
1. Ẹla ịkpịpyọ-kpịpyọ iyina à tị́ nụwa gbehi lụka nya Eji Ọkpakpa ọla Ẹka Ụnọ?
AHYẸẸNỤ ọlẹ ká owuleji bwula igu ka dọmwụ odehe ọlẹ lụka nya Eji Ọkpakpa ọla Ẹka Ụnọ nya ịKịrayịsị ka kpịpyọ lụmẹ! Angịlẹ wuu ká angị háa-há byi hyaa kaa charịnya nyọka yaa. Ịnyịnyị ọ tị la iJihova lẹ. (Job. 14:15) Kụ irya nya abwọlẹ ká ọng myị́ ọng ka chị ọkẹkẹnị kaka ba ụka ká angị háa-há ka wuleji bwula igu wẹẹ. Jaabwọ kahị jẹ́ ẹ-ẹpwụ nya ang ọjẹ́jẹ ọkẹkpẹ, “alabwẹla ọnyịịla,” kị ri angịlẹ ká ẹnyị nyaa juwa ụ-ụpwụ nya ọhịhị, ka “wuleji bwula igu kaka la ọhịhị.” (Ụkụr. 24:15; Jọn. 5:29) Ọ chịkpẹẹ myị́ ká iru nya angị háahị há ka ji ẹpwụ nya angịlẹ kị ka wuleji bwula igu jene ụka ká Amagẹdọn á myị́ kpá. * Ọ-da ọọwa u-uhye, “alabwẹla onyobyi,” lala angịlẹ kị la iwe nyọka jẹ́ iJihova bala ọ-gbịgba họọ ọlam-ọlam ene kịị gbu ka, ka “wuleji bwula igu ka ju ka ẹpwụ nya eje owuwu.”
2-3. (a) Jaabwọ ká ụpwụ nya Ayịsaya 11:9, 10 ya, ụkụrwọ nya ang ọmẹjẹ oyina à tị́ ka ri ọlẹ kọ gụ́ wuu odehe ọlẹ? (b) Ẹlịyẹ ahị tị́ wẹẹ ka kụ ẹhị yẹ ẹ-ẹpwụ nya ang ọjẹ́jẹ ọlẹ?
2 Angịlẹ kị ka wuleji bwula igu ka baba kị ka mẹ ang jáa. (Ayị. 26:9; 61:11) Lẹ ụkụrwọ nya ang ọmẹjẹ ọtụka-ọtụka ọlẹ kọ ji ẹnẹnẹhẹ lẹka à wẹẹ ka ji lẹ. (Wa Ayịsaya 11:9, 10.) Ịyẹ à tị́ du? Ang ookpokpo ọhẹ ri, alabwẹla onyobyi ịlẹ kị ka wuleji ka baba nyọka jẹ́ ang u-uhye nya Ịpyị-Adịrahụ nya Ohe, iya ọkịlaakịla nya iJisọsị, bala ọbaba nya ẹnyị nya iJihova tụ́ ang odudu ká ọwa ụbọọmwụ à chịla nyọka kpeji. Alabwẹla ọnyịịla ka dọmwụ baba nyọka jẹ́ ang u-uhye nya ẹla ịlẹ ká iJihova wẹẹ wụlẹ je angịnyị nyamwụ gụ́ ọọwa u-uhye nya irya ọlẹ kọ la jahị da odehe ọlẹ. Angịhyẹ lẹpwụ nya alabwẹla ọnyịịla ịwẹ gbu tataata ene kị lẹẹ da ịBayịbụụ kpá. Alabwẹla onyobyi tụ́ alabwẹla ọnyịịla la ang lụmẹ-lụmẹ kị ka jẹ́.
3 Ẹ-ẹpwụ nya ang ọjẹ́jẹ ọlẹ, ahị ka kụ ẹhị yẹ ịtọ ẹla ịlẹ: Ányị ị tị́ ka bwu họ ụkụrwọ nya ang ọmẹjẹ ọtụka ọwẹ? Ányị abwọlẹ ká angịnyị họ la ang ọmẹjẹ ọọwa à tị́ ka mẹjẹ kori kị ka da ẹnyị nyaa ụ-ụpwụ nya ọhịhị pyịyọọ lee kị ka dọọ ka? Ọwẹwẹ nya ịtọ ẹla ịwẹ baba hahị alẹ. Jaabwọ kahị wẹẹ ka yẹ, ọmwụ ọyẹyẹ ịkpịpyọ-kpịpyọ ịhyẹ ụ-ụpwụ nya ịDanẹlụ bala Ọwụrụụ-wụrụ ka dahị ụbwọ nyọka jẹ́ ang gụ́ ọọwa u-uhye nya ẹla ọlẹ kọ ka họ ụka ká egu ka wuleji kpá. Ọhọhẹ-họhẹ, ahị kụ ẹhị yẹ ẹla ịkpịpyọ-kpịpyọ ịlẹ kị yẹ ọmwụ neeji ụ-ụpwụ nya ịDanẹlụ 12:1, 2 wẹẹ.
“ANGỊNYỊ ỊLẸ KỊ GBU KPÁ ENE-ENE KA WULEJI”
4-5. Ẹlịyẹ ịDanẹlụ 12:1 à tị́ ya u-uhye nya ocheju nya odehe?
4 Wa ịDanẹlụ 12:1. Ụpwụ nya ịDanẹlụ ya jaabwọ ká ang ịkpịpyọ ịwẹ ka họ hi tọ awụlẹ lụka nya ocheju ọlẹ. Ọ-chụ pwokwita, ịDanẹlụ 12:1 họ kahị jẹ́ nyori ịMayịkẹlụ ko ri iJisọsị ịKịrayịsị, “ọngọlẹ kọọ gbe [angịnyị nya Ohe] ka hyeehe gẹgịlẹ.” Ụpa nya ọmwụ ọyẹyẹ ọwẹ dọmwụ nyọka họ jịra la 1914 ụka ká Ohe hu iJisọsị ri adịrahụ e-epwoohe.
5 Ma, ị tị byi ịDanẹlụ ịnyịnyị nyori iJisọsị nyị ka “hyeehe gẹgịlẹ” lụka nya “uhila nya akama. Ụma nya akama ọlịnyị-ị́ ji ẹnẹnẹhẹ mwiiji nyọlẹ ká angịnyị dọmwụ nya ọ-nọ ẹpwa ẹpwụma-ẹpwụma lẹka.” Ụka nya “uhila nya akama” ọwẹ à ri “akama ọtụka okpelego” ọlẹ kị gu ẹnyị ụ-ụpwụ nya ịMatiyu 24:21 lẹ. IJisọsị ka hyeehe gẹgịlẹ nyọka chewu ke angịnyị nya Ohe lụka nya ocheju nya akama ọtụka ọwẹ ko ri ụka nya Amagẹdọn. Ụpwụ nya Ọwụrụụ-wụrụ ya ẹla rụ angịwẹ lala iru nya angịnyị ịlẹ kị ri “angị bebe bwu ẹpwụ nya akama ọtụka-ọtụka.”—Ọwụ. 7:9, 14.
6. ḷyẹ à tị́ ka họ ụka ká iru nya angịnyị lụmẹ-lụmẹ á be bwu akama ọtụka okpelego kpá? Ịyẹ tị́ du kahị ka jẹ́-ẹ ya ịnyị? (Yẹ “Ịtọ Ẹla Bwu Ẹga nya Angị Wa Apwụ Nyahị” ọlẹpwụ nya ụpwụ ọlẹ u-uhye nya owuleji bwula igu kaka hịhị odehe.)
6 Wa ịDanẹlụ 12:2. Ịyẹ à tị́ ka họ ụka ká iru nya angịnyị ịwẹ á be hi ụka nya akama ọtụka ọwẹ kpá? Ọmwụ ọyẹyẹ ọwẹ á ya ẹla rụ owuleji bwula igu nya olegu, kọ ri ila ọchịchị myịmyị ẹ-ẹga nya ang nya olegu nya anchẹ nya Ohe la ahyẹẹnụ ohyẹẹkpẹ, jaabwọ kahị kaa wo etu nyamwụ ene-ene ka. * Lụka ọkẹkpẹ, ahị kaa me nyori ịDanẹlụ 12:2 ya ẹla rụ owuleji bwula igu rụ ka epwoohe lee ụkụrwọ ọ-nwà kịlahị ọlẹ kọ ji ku ẹkpẹ nyọlẹ ká aluji tụbwọọ tụ ụkụrwọ nya ẹrụ ọnyịịla ọ-kpa pyẹ ku la 1918 ịnyị. Ma ọlẹẹlẹẹ tị lẹ, ahị jẹ́ nyori omyi ẹla ịwẹ wẹẹ ya ẹla rụ owuleji bwula igu ọlẹ kọ ka ji odehe onyeewe ọlẹ kọ wẹẹ warị ịnyị. Ịyẹ tị́ du kahị ka jẹ́-ẹ ya ịnyị? O-òja ọlẹ kị kpa da ịBayịbụụ lụka nya ọgbanyẹ, etu nya omyi ẹla nya ‘ịpyị’ bala ‘iworu’ ọlẹ kị kpa ya ẹla ụ-ụpwụ nya iJobu 17:16, ị kpa ya ẹla ụ-ụpwụ nya ịDanẹlu 12:2 ịnyịnyị lẹ. Nyọlẹ ká etu nya omyi ẹla imiiye ịwẹ la okpokpo wẹẹ, ọ mẹjẹ nyori ịDanẹlụ 12:2 wẹẹ ya ẹla rụ́ owuleji bwula igu ọlam-ọlam ọlẹ kọ ka ji ụka ká ahyẹẹnụ ihyẹẹkpẹ á cheju, bala ụka ká ẹwụ nya Amagẹdọn á myị́ kpá.
7. (a) Ụ-ụgbẹyị oyina angịhyẹ à tị́ ka bwu wuleji bwula igu ka la “ọhịhị ọmyịmyị-ka”? (b) Ịyẹ tị́ du kọ ri “owuleji bwula igu ọlẹ kọ hagụ”?
7 Ịyẹ à tị́ ri etu nya ẹla ọlẹ ká ụpwụ nya ịDanẹlụ 12:2 ya nyori angịhyẹ nyị ka wuleji bwula igu ka la “ọhịhị ọmyịmyị-ka”? Ọọwa ri, angịlẹ kị wuleji bwula igu kị wẹ ka jẹ́ iJihova, lee ọ-kịnyaa la ọ-jọ́ọ, bala o-ju ihi nyamwụ bala iJisọsị lụka nya ẹka ụnọ ka yé ọhịhị ọmyịmyị-ka. (Jọn. 17:3) Ọwẹ ka ri “owuleji bwula igu ọlẹ kọ hagụ” ọlẹ kọ họ lụka onyogo ká angịhyẹ tịrẹkpẹ wẹ ọhịhị. (Hib. 11:35) Ịyẹ tị́ du? Chajị angịlẹ kị wuleji bwula igu lụka ọkẹkpẹ gbu myị́myị́.
8. Ịyẹ à tị́ ri etu nya angịhyẹ ọ-ka wuleji bwula igu “ju ka ẹpwụ nya oyoyi o-gbe oyi myị oyi”?
8 Ma a-angịlẹ wuu kị wuleji bwula igu à ka myọnụ ju ang ọmẹjẹ nya iJihova ka. Ọmwụ ọyẹyẹ nya ịDanẹlụ ya nyori angịhyẹ nyị ka wuleji bwula igu “ju ka ẹpwụ nya oyoyi o-gbe oyi myị oyi.” Chajị nyọlẹ kị ka ya egbeju ọngịrị ọlala nyaa chehe wẹẹ, ị́ ka da ẹnyị nyaa juwa ụ-ụpwụ nya ọhịhị ka, ị́ tị ka ya ọhịhị ọmyịmyị-ka haa ka ịnyịnyị. Ọkọkọ nya ọọwa, ị ka “ju ka ẹpwụ nya oyoyi o-gbe oyi myị oyi,” lee ayịreji. Lẹ ịDanẹlụ 12:2 wẹẹ ya ẹla rụ́ ẹla ọlẹ kọ ka họ ta angịlẹ wuu kị wuleji bwula igu u-uhye nya ang ọlẹ kị họ nyọlẹ kị wuleji bwula igu kpá. * (Ọwụ. 20:12) Angịhyẹ ka yé ọhịhị ọmyịmyị-ka; angịkịla á ka yé ka.
“ỤGBẸYỊ NYA ANG ỌNYỊỊLA ỌHỌHỌ” Ọ-MẸJẸ ANGỊKỊLA
9-10. Ang ọkịla oyina à tị́ ka họ ụka ká akama ọtụka okpelego á chịpwụrụ kpá? Owo anyị à tị́ ka “hụ́ lala ahịgboo nya uhye-ọgba”?
9 Wa ịDanẹlụ 12:3. Ang ọkịla oyina à tị́ ka họ kori ká “ụka nya uhila nya akama” á chịpwụrụ kpá? Datị hi ịDanẹlụ 12:2, ọgba 3 ịnyịnyị ya ẹla rụ́ ang ọlẹ kọ ka họ ụka ká akama ọtụka okpelego á chịpwụrụ kpá.
10 Owo anyị à tị́ ka “hụ́ lala ahịgboo nya uhye-ọgba”? ỊMatiyu 13:43 dahị ụbwọ nyọka jẹ́ angịịwa nyọlẹ kọ yẹkẹẹ: “Alabwẹla ọnyịịla . . . ka juwa hụ́ tang tang lala ahịgboo nya ẹnụ ọchịchị ụ-ụwa ị-ịpyị nya Adịrahụ nya Ohe Oluhye Adaa.” Ẹla ọlẹ kọ dakoko ju omyi ẹla ọwẹ mẹjẹ nyori iJisọsị wẹẹ ya ẹla rụ́ “angịnyị nya ịpyị nya Adịrahụ,” kị ri aanamwụ ịlẹ ká Ohe ya ida wụ́, kị ka họ ụkụrwọ balọọ ị-Ịpyị-Adịrahụ olepwoohe. (Mat. 13:38) Lẹ angịlẹ ká Ohe ya ida wụ́ bala ụkụrwọ ọlẹ kị ka họ lụka nya Eji Ọkpakpa ọla Ẹka Ụnọ ịDanẹlụ 12:3 à wẹẹ ya ẹla rụ lẹ.
Angịnyị angị 144,000 ka họ ụkụrwọ bala iJisọsị ịKịrayịsị nyọka kpa ịlahị nya ụkụrwọ nya ang ọmẹjẹ ọtụka ọlẹ kọ ka ji lụka nya ẹka 1,000 (Yẹ ọgba 11)
11-12. Ịyẹ angị 144,000 à tị́ ka họ lụka nya ẹka ụnọ?
11 Ányị angịlẹ ká Ohe ya ida wụ́ à tị́ ka bwu “mẹ ụgbẹyị nya ang ọnyịịla ọhọhọ jẹ angịkịla”? Angịlẹ ká Ohe ya ida wụ́ ka họ ụkụrwọ bala iJisọsị ịKịrayịsị nyọka kpa ịlahị nya ụkụrwọ nya ang ọmẹjẹ ọtụka ọlẹ kọ ka ji odehe ọlẹ lụka nya ẹka ụnọ ọwẹ. Angị 144,000 á ka kpeji lala ịdịrịhụ kem ka, ma ị ka họ ụkụrwọ lala angịkiliya ịnyịnyị. (Ọwụ. 1:6; 5:10; 20:6) Lẹ, ị ka dụbwọ ẹ-ẹpwụ nyọka “họ alepwoja wuu uda” bala ọ-ka da angịnyị ehe ụbwọ nyọka la kpẹẹkpẹẹ dụmwọ-dụmwọ. (Ọwụ. 22:1, 2; Isi. 47:12) Ọ ka ri ọkẹkẹnị yẹẹyẹẹ ha angịlẹ ká Ohe ya ida wụ́!
12 Owo à tị́ ka ji ẹpwụ nya iru nya “angịkịla” ịlẹ kị ka mẹ ụgbẹyị nya ang ọnyịịla ọhọhọ jẹ? Angịlẹ kị ka wuleji bwula igu bala angịlẹ kị ka chịda bwu Amagẹdọn tụ́ anyị ịlẹ kị ka ma myị́ odehe onyeewe ka ji ẹpwụ nya angịịwa. Ụka nya ocheju nya ẹka 1,000 wẹẹ, ọng myị́ ọng ọlẹ kọ jam odehe ka la kpẹẹkpẹẹ lẹ. Lẹ ụka oyina kpangga ị tị ka da ẹnyị nyaa gbobyi-gbobyi la ang ọ-da ụpwụ ọlẹ kị jẹ́-ẹ hịlẹ myị́ ka ju ụ-ụpwụ nya ọhịhị mẹ?
ỌMAYẸ OHYẸẸKPẸ
13-14. Ịyẹ angịlẹ kị ka la kpẹẹkpẹẹ odehe à tị́ ka baba nyọka mẹjẹ ene kị ka yé ọhịhị ọmyịmyị-ka?
13 Ahị ka kpịtịya nyori ọngịnyị ọ-la kpẹẹkpẹẹ á mẹjẹ nyori ọ ka la ọhịhị ọmyịmyị-ka pyii ka. Kpịtịya nya Adam bala Iivu wẹẹ. Ị la kpẹẹkpẹẹ, ma ị tị baba nyọka mẹjẹ nyori ị ju ihi nya iJihova ene kọ ka ya ọhịhị ọmyịmyị-ka haa. Ọ tị tolujwo nyori ị́ ju ihi nyamwụ ka.—Rom. 5:12.
14 Ányị iwe-ahụrụ nya angịlẹ kị ka jam odehe à tị́ ka la lụka nya ocheju nya ẹka 1,000? Ịwa wuu ka la kpẹẹkpẹẹ lẹ. Angịnyị ịkpẹẹkpẹẹ ịwẹ ka chẹkpẹ ju eji ọkpakpa nya iJihova pyịyọọ? Lee angịhyẹ tị́ ka họ lala Adam bala Iivu kị la egbeju ọngịrị nanana nyori ị la kpẹẹkpẹẹ? Ọwẹwẹ nya ịtọ ẹla ịwẹ baba, ma ányị ị tị́ ka bwu waa?
15-16. (a) Ụka oyina angịnyị ehe à tị́ ka la iwe nyọka mẹjẹ nyori ị godayị giri-giri ha iJihova? (b) Ịyẹ à tị́ ka ri ocheju nya ọmayẹ ohyẹẹkpẹ ọwẹ?
15 Olegu Onyobyi ka juwa u-ube nya agba lụka nya ẹka 1,000. Lụka ọọwa, ọ́ ka jẹ́-ẹ hụ ọngọngọhẹ ahị kaka. Ma, la ocheju nya ẹka 1,000, ị ka gba Olegu Onyobyi kpehe bwu agba. Ọọwa ọ ka dọmwụ nyọka mẹ angịnyị ehe yẹ tị lẹlẹ. Lụka nya ọmayẹ ọọwa, angịnyị ehe ịlẹ kị la kpẹẹkpẹẹ wuu ám̀ odehe ka la iwe nyọka mẹjẹ gede-gede kori kị chẹkpẹ ju Ohe lala Ọngọ chịla nyọka kpeji odehe. (Ọwụ. 20:7-10) Ang ọlẹ kị họ lụka ọọwa à ka mẹjẹ kori kị ka da ẹnyị nyaa ju ka ụpwụ nya ọhịhị gbobyi-gbobyi lẹ.
16 ỊBayịbụụ ya nyori angịhyẹ nyị ka la egbeju ọngịrị lala Adam bala Iivu, bwula ọ-pwa eji ọkpakpa nya iJihova. Ịyẹ à tị́ ka họ taa mẹ? Ụpwụ nya Ọwụrụụ-wụrụ 20:15 ya nyori: “Ọng myị́ ọng ọlẹ kị yẹ ẹnyị nyamwụ ẹ-ẹpwụ nya ụpwụ nya ọhịhị nya Ohe Oluhye ọọwa kaka lẹ, ị wu ọngọọwa ju ka ẹpwụ nya ẹmwụ nya ila ọtụka-ọtụka.” Ee, angị la egbeju ọngịrị ịwẹ ka ta ayịreji gboyi myị́ oyi. Ma ụmụmẹ nya angị la kpẹẹkpẹẹ ịwẹ ka be ọmayẹ ohyẹẹkpẹ ọwẹ. Ẹnyị nyaa à ka ka ụpwụ nya ọhịhị gbobyi-gbobyi lẹlẹ.
‘LỤKA OHYẸẸKPẸ’
17. Ẹlịyẹ olegu-ẹrụ à tị́ byi ịDanẹlụ nyori nyị ka họ lụka nyahị? (ỊDanẹlụ 12:4, 8-10)
17 Ọ kpịpyọ yẹẹyẹẹ nyọka kụ irya u-uhye nya ang ịlẹ kị wẹẹ ka họ ị-ịlahị! Ma olegu-ẹrụ tị wụrụ ẹla ọkpọnchị ọhẹ mẹjẹ ịDanẹlụ u-uhye nya ụka nyahị, kọ ri “ụka ohyẹẹkpẹ.” (Wa ịDanẹlụ 12:4, 8-10; 2 Tim. 3:1-5) Olegu-ẹrụ ọọwa byi ịDanẹlụ nyori angịnyị nyị ka “jẹ ang gụ ọọwa.” Ee, anchẹ nya Ohe à ka wo etu nya ọmwụ ọyẹyẹ ọla ụpwụ ọwẹ yẹẹyẹẹ lẹ. Olegu-ẹrụ ọwẹ myịmyị ya nyori “angị ri angịnyị inyibyi-í tị ka jẹ ka. Ị ka kịnyaa lang onyobyi ọhọhọ,” lụka ohyẹẹkpẹ ọlẹ.
18. Ẹlịyẹ à tị́ ka họ ta angị inyibyi lụka okpii?
18 Alẹ ọ ka lala o-ri angị họ ang onyobyi nyị́ kaa yẹ akama chajị nya abwẹla ọtịpyọ nyaa ka myị́. (Mal. 3:14, 15) Ma lụka okpii iJisọsị ka la angị ịtịpyọ ị lala embiri eje bala ọ-chaa ebwo hi angị lala ịkpịlọ. (Mat. 25:31-33) Angị ịtịpyọ ịwẹ á ka be akama ọtụka okpelego ka, ị́ tị ka wuleji bwula igu ka hịhị odehe onyeewe ka ịnyịnyị. Ẹnyị nyaa á ka ju “ụ-ụpwụ” nya ịtịya ọkpụkụ ọlẹ kị gu ẹnyị ụ-ụpwụ nya ịMalakayị 3:16 ka.
19. Ịyẹ ahị tị́ baba nyọka họ lẹẹlẹẹ? Ịyẹ à tị́ du? (ỊMalakayị 3:16-18)
19 Ọlẹẹlẹẹ à ri ụka ọlẹ kahị baba nyọka mẹjẹ nyori áhị ji ẹpwụ nya angịnyị inyibyi kaka lẹlẹ. (Wa ịMalakayị 3:16-18.) IJihova wẹẹ tụ angịnyị ịlẹ kọ hu nya ‘angịnyị nya ụbwọ nya ịlọmwụ’ guru. Ị ri angịlẹ kị họ́ọ yẹẹyẹẹ. Ahị tịtọ nyọka ji ẹpwụ nya angịwẹ.
Ọ ka kpịpyọ yẹẹyẹẹ nyọka yẹ ịDanẹlụ, angị háahị-há, bala iru nya angịkịla kị ka “wuleji” wẹ ka ye uri nyaa odehe onyeewe! (Yẹ ọgba 20)
20. Ehe ọchịchị ohyẹẹkpẹ oyina Ohe à tị́ chị ịDanẹlụ? Ịyẹ tị́ du ká wẹẹ ya ẹhị rịrị gbe ọ-họ jịra nya ehe ọchịchị ọọwa?
20 Ahị jam hịhị ụ-ụka ọkpịpyọ ịlẹhị. Ma ang ịkpịpyọ gụ́ ọwẹ tị ja ka họ la ọ-bịrị ụka ka. Lụka okpii ahị ja ka yẹ ayịreji ọtata nya ang inyibyi wuu. Ba ọọwa ba, ahị ka yẹ ọ-họ jịra nya ehe ọlẹ ká iJihova chị ịDanẹlụ yẹkẹẹ: “Ụka ká ụka ohyẹẹkpẹ tị pwụ eji, à ka wuleji kaka ye uri nyang ọlẹ kị chị nọ hang.” (Dan. 12:13) Ọ tang-ta nya ụka ọlẹ ká ịDanẹlụ bala angị háng-há ịkịla ka “wuleji” myị́myị́? Ó ri ịnyị aalẹ, maga lẹẹlẹẹ nyọka godayị giri-giri mẹ, à ka jẹ́ myị̀myị̀ nyori ẹnyị nyang ka juwa ụ-ụpwụ nya ọhịhị nya iJihova pyịyọọ.
EJE 80 “Taste and See That Jehovah Is Good”
^ Ang ọjẹ́jẹ ọlẹ ya ẹla u-uhye nya ọnwụhọ ẹ-ẹga nya abwọlẹ kahị kaa wo etu nya ụkụrwọ nya ang ọmẹjẹ ọtụka ọlẹ ká ụpwụ nya ịDanẹlụ 12:2, 3 ya ẹla rụ. Ahị ka kụ ẹhị yẹ ụka ọlẹ ká ụkụrwọ ọwẹ ka dọmwụ bala angịlẹ kị ka la ụbwọ ẹ-ẹpwụ nyamwụ. Ahị ka yẹ ịnyịnyị jaabwọ ká ụkụrwọ nya ang ọmẹjẹ ọwẹ ka nwụla angị ka jam odehe ọlẹ nọ gbe ọmayẹ ohyẹẹkpẹ-ẹkpẹ ọla ocheju nya Eji Ọkpakpa ọla Ẹka Ụnọ nya ịKịrayịsị.
^ Ọhẹka, owuleji bwula igu ka dọmwụ bwu ẹga nya angịlẹ kị gbu ẹ-ẹpwụ nya ọmyịmyị la ahyẹẹnụ ihyẹẹkpẹ ịlẹ ene ká angị gbu jene nyaa ka wuleji bwula igu, bwu oyi ọhẹ ka ọkịla. Kori kọ ka lịnyị aalẹ, aloyi ọnyị myị́ ọnyị ka la iwe nyọka da angịlẹ kị jẹ́ la ịlaa ọwụraba tịrẹkpẹ. Jaabwọ myị́ abwọ kọ ka la, Ụpwụ Ịgọgọ ya ẹla rụ ‘ụka ọlẹ kị hunọ’ ha angịlẹ kị ka wuleji bwula igu rụ ka epwoohe, lẹ ahị ka jẹ́-ẹ ya nyori owuleji bwula igu ọla odehe ka họ ụbẹẹtụ-ụbẹẹtụ ịnyịnyị.—1 Kọr. 14:33; 15:23.
^ Ọdawụlẹ ọwẹ ri ọnwụhọ u-uhye nya etu nya ẹla ọlẹ kọ juwa ụ-ụpwụ nya Pay Attention to Daniel’s Prophecy! egbeju 17, bala ọla Ẹpwang ọ-Kụ Gbeji nya Ọya Ọharwiye 1, 1987, ẹbẹ 21-25.
^ Ọdatị tị rị, omyi ẹla nya “alabwẹla ọnyịịla” bala “alabwẹla onyobyi” ọla ụpwụ nya Ụkụrwọ nya Alẹrụ 24:15 bala omyi ẹla nya “angịlẹ kị họ abwẹla ọnyịịla” bala “angịlẹ kị tị họ abwẹla onyobyi” ọla ụpwụ nya ịJọn 5:29 wẹẹ ya ẹla rụ́ abwẹla ọlẹ ká angị wuleji bwula igu la ene kịị gbu ịnyị.
