DI LESN FI STODI 40
“Uol Iip A Piipl A Lorn Fi Du Wa Rait”
“Di wan dem we a tiich uol iip a ada piipl fi du wa rait a-go shain brait laik di staar dem fi eva an eva.”—DAN. 12:3.
SANG 151 Im A-Go Kaal Dem
DIS A WA WI A-GO LUK PAN a
1. Wa a som a di nais nais sitn dem we a-go apm wen Jiizas Krais a ruul fi di Touzn Ier?
WAT a nais nais taim it a-go bi wen ded piipl staat fi kom bak alaiv wen Jiizas a ruul fi di Touzn Ier! Evribadi we sumadi fi dem ded wel waahn fi si dem kom bak alaiv agen. A siem so Jeuova wel waahn fi si dem kom bak alaiv tu. (Juob 14:15) Jos tingk ou swiit it a-go bi wen piipl we de aal uova di ort a-go get fi si di piipl dem we dem lov kom bak alaiv agen. Jos laik wa wi lorn se iina di laas lesn, ‘di piipl dem we did du gud sitn bifuo dem ded’ a dem a-go get fi ‘kom bak alaiv agen,’ kaa fi dem niem don de iina di buk we Gad rait dong di niem a di piipl dem we a-go get fi liv fi eva. (Aks 24:15; Jan 5:29, NWT ) Matarafak som a fi wi piipl dem mait-a kom bak iina di fos set a piipl dem we a-go get fi kom bak alaiv pan di ort. b Bot yu si di piipl dem we ded we du “bad” we neehn get di chaans fi lorn bout Jeuova so dat dem kuda sorv Jeuova di rait wie bifuo dem ded, dem a-go get fi ‘kom bak alaiv’ tu.
2-3. (a) Azkaadn tu Aizaiya 11:9, 10, wa a di bigis tiichin an priichin wok we a-go gwaan pan di ort? (b) Wa wi a-go luk pan iina da lesn ya?
2 Aal a di piipl dem we kom bak alaiv pan di ort afi go lorn nof tingz. (Aiz. 26:9; 61:11) So di bigis kain-a priichin an tiichin wok fram man de ya til nou a-go gwaan dem taim de. (Riid Aizaiya 11:9, 10.) Wa mek? Wan a di riizn a dat di piipl dem we did a du wa bad afi go lorn bout Jiizas Krais, an bout Gad Kindom govament, an ou Jiizas kom ded an gi op im laif fi wi, an dem afi lorn bout di kwestiyan we kom op iina di gyaadn a Iidn bout Jeuova niem an ef im av di rait fi ruul uova wi. Aal a di piipl dem we a du gud we did ded an kom bak alaiv afi go nuo bout di nyuu tingz we Jeuova a mek wi nuo bout we im a-go du fi di ort. An som a dem did ded lang bifuo wi did av di Baibl. So di wan dem we did a du gud sitn bifuo dem ded an di wan dem we did a du bad sitn bifuo dem ded afi go lorn nof tingz.
3 Iina da lesn ya, wi a-go get di ansa fi dem kwestiyan ya: Wa a som a di sopm dem we a-go afi apm fi mek da big priichin an tiichin wok ya gwaan? Da priichin an tiichin wok ya we a-go gwaan, wa it av fi du wid ef sumadi niem a-go rait dong iina di buk fi eva? Aal a wi shuda waahn fi get di ansa fi dem kwestiyan ya. Fi elp wi fi andastan wa a-go apm wen ded piipl kom bak alaiv, wi a-go luk pan som a di nais nais ting dem we rait dong iina di buk a Daniyel an Revilieshan we tel wi bout wa a-go apm iina di fyuucha. Fos, mek wi luk pan Daniyel 12:1, 2 an si som a di nais nais sitn dem we it se a-go apm.
“PIIPL WE DED AN A SLIIP IINA DI ORT A-GO WIEK OP”
4-5. Wa Daniyel 12:1 mek wi nuo bout di laas die dem?
4 Riid Daniyel 12:1. Di buk a Daniyel mek wi nuo wen som nais nais sitn a-go apm iina di laas die dem. Laik ou Daniyel 12:1 mek wi nuo se Maikal, uu a Jiizas Krais, “a yuuz di powa we im get fi elp [Gad] piipl dem.” An dis we Daniyel se wuda apm staat fi apm iina 1914 wen Jeuova mek Jiizas staat fi ruul iina im Kindom govament we de iina evn.
5 Bot dem did tel Daniyel iina Daniyel 12:1 se Jiizas “a-go yuuz im powa iina wan speshal wie fi elp [Gad] piipl dem” iina “wan taim wen piipl a-go sofa bad bad; sofarieshan neva so wikid fram di fos konchri de bout til nou.” Da taim ya “wen piipl a-go sofa bad bad” a di sed taim we Matyu 24:21 taak bout. A siem ting it se, it se: “Piipl a-go sofa bad bad.” Bot wa a-go apm afta da taim de? Da taim de Jiizas a-go yuuz im powa iina wan speshal wie iina Aamagedan waar fi elp Gad piipl dem. An a da siem gruup a piipl de Revilieshan kaal “wan big kroud a piipl, dem a di wan dem we go chuu di torbl torbl sofarieshan.”—Rev. 7:9, 14.
6. Tel wi wa a-go apm afta di big kroud a piipl go chuu di wos sofarieshan. (An luk iina da Wachtowa ya tu, iina di paat we niem “Kwestiyan We Piipl Aks” we taak bout wen ded piipl kom bak alaiv pan di ort.)
6 Riid Daniyel 12:2. Wa a-go apm wen di big kroud a piipl go chuu di taim wen piipl a-go sofa bad bad? Wa Daniyel a taak bout ya so, wi did biliiv se it kuda a taak bout di wan dem we kom bak alaiv an liv a evn, ar it kuda av fi du wid di uol iip a priichin wok we did a gwaan afta di wok nieli tap iina 1918. c Bot wi get fi fain out se da skripcha ya a taak bout di taim wen ded piipl a-go kom bak alaiv iina di nyuu worl. Wa mek wi kyan se so? Wi kyan se so kaaz iina Juob 17:16 it taak bout “dong iina di ort.” An it miin di siem ting we Juob did a taak bout wen im taak bout di “griev.” Dis mek wi nuo se Daniyel 12:2 a taak bout di taim wen ded piipl a-go kom bak alaiv afta di laas die dem don an afta di Aamagedan waar.
7. (a) Wa a di onggl wie we som we kom bak alaiv a-go get fi “liv fi eva”? (b) Wa di Baibl miin wen it se di wan dem we “kom bak alaiv” a-go “liv wan beta laif”?
7 Bot wa Daniyel 12:2 miin wen it se som piipl a-go kom bak alaiv fi “liv fi eva”? It miin se wen Jiizas a ruul fi di Touzn Ier, di bad wan dem we kom fi nuo bout Jeuova an Jiizas, an di gud wan dem we get fi nuo muo bout Jeuova an Jiizas an a du di tingz dem we dem lorn fi du, a-go get fi liv fi eva. (Jan 17:3) Dem wan ya a-go “kom bak alaiv an liv wan beta laif” dan di ada wan dem we kom bak alaiv iina di taim wen di Baibl did a rait. (Iib. 11:35) Bot wa mek wi se dem a-go liv wan beta laif? Wi se so kaa di wan dem we did kom bak alaiv iina di taim wen di Baibl did a rait did en op ded agen.
8. Wa it miin wen it se som a di piipl dem we kom bak alaiv a-go “bring dong shiem pan demself an a-go don fa”?
8 A no aal a di piipl dem we kom bak alaiv a-go lov di sitn dem we dem a lorn. Iina Daniyel 12:2 it tel wi se som a di piipl dem we a-go kom bak alaiv a-go “bring dong shiem pan demself an a-go don fa.” Kaa dem wan ya did aad iez an neehn a du wa Gad se dem fi du, fi dem niem naa go de iina di buk we Gad rait dong di niem a di piipl dem we a-go get fi liv fi eva. So wi si se dem ya wan ya naa go get fi liv fi eva. Dat miin tu se dem “a-go don fa.” So wa Daniyel 12:2 taak bout a wa a-go apm tu dem afta dem kom bak alaiv kaaz a wa dem du iina dat de taim de. d (Rev. 20:12) So som piipl a-go get fi liv fi eva an som naa go get fi liv fi eva.
“UOL IIP A PIIPL A LORN FI DU WA RAIT”
9-10. Wa els a-go apm afta di wos sofarieshan we di worl eva si gwaan, an a uu “a-go shain brait laik di skai”?
9 Riid Daniyel 12:3. Wa els yu tingk a-go gwaan afta di “taim wen piipl a-go sofa bad bad”? An pan tap a dat, Daniyel 12:3 taak bout sopm we a-go gwaan afta di wos sofarieshan we di worl eva si gwaan.
10 A uu “a-go shain brait laik di skai”? Wi kain-a get fi nuo a uu wen wi riid wa Jiizas se a Matyu 13:43, it se: “Di piipl dem we du rait, a-go shain laik di son iina dem Faada Kindom.” Wen wi luk pan dem wod ya wi si se Jiizas did a taak bout “di piipl we bilang tu Gad kindom.” Dem wan ya a di wan dem we Gad pik fi ruul wid Jiizas iina evn iina Im Kindom. (Mat. 13:38) So Daniyel 12:3 mos did a taak bout di wan dem we get pik fi ga’a evn an di wok we dem a-go du de wen Jiizas a ruul fi di Touzn Ier.
Di 144,000 we get pik fi go a evn a-go wok wid Jiizas Krais iina di 1,000 ier an du wa im se fi liid di big priichin an tiichin wok we a-go gwaan pan di ort (Luk iina paragraaf 11)
11-12. Wa kain-a wok di 144,000 we get pik fi go a evn a-go du iina di 1,000 ier?
11 A ou di wan dem we get pik fi ga’a evn a-go “tiich uol iip a ada piipl fi du wa rait”? Di wan dem we get pik fi go a evn a-go wok wid Jiizas Krais iina did Touzn Ier, an du wa im se fi liid di big priichin an tiichin wok we a-go gwaan pan di ort. Di 144,000 we get pik fi go a evn no onggl a-go ruul bot dem a-go bi priis tu. (Rev. 1:6; 5:10; 20:6) Dem a-go elp fi mek piipl get beta, so dat miin tu se likl bai likl dem a-go elp piipl fi ton porfek. (Rev. 22:1, 2; Izii. 47:12) Di wan dem we Gad pik fi go a evn a-go api bad fi du da wok ya!
12 Uu an uu a-go de mongks di “uol iip a ada piipl” we a lorn fi du wa rait? Dem wan ya a-go bi di wan dem we kom bak alaiv an di wan dem we go chuu Aamagedan an di pikni dem we dem av iina di nyuu worl. Bai di taim di 1000 ier fi don evribadi we a liv pan di ort a-go porfek. So a wen dem niem a-go rait dong iina di buk we Gad rait dong di niem a di piipl dem we a-go get fi liv fi eva an it naa go rob out?
DI LAAS TES
13-14. Wen evribadi pan di ort porfek, wa dem afi go du bifuo dem kyan go get fi liv fi eva?
13 Wi fi memba se kaa sumadi porfek dat no miin tu se dem a-go liv fi eva. Kaa wen yu tingk bout it, luk pan Adam an Iiv. Dem did porfek, bot dem neehn get fi liv fi eva kaa dem neehn du wa Jeuova Gad se dem fi du. So fi sumadi get fi liv fi eva dem afi du wa Jeuova Gad se dem fi du.—Ruo. 5:12.
14 Afta di 1000 ier dem don evribadi we a liv pan di ort a-go porfek. Bot yu tingk aal a dem a-go waahn fi du wa Jeuova se an waahn im fi ruul dem? Ar dem a-go komiin laik Adam an Iiv we aalduo dem did porfek dem neehn du wa Jeuova se dem fi du? Wi afi go get di ansa fi dem kwestiyan ya, bot a ou wi a-go get di ansa fi dem?
15-16. (a) A wen evribadi a-go get di chaans fi shuo se a Jeuova dem a stik tu an dem a-go du wa im se no mata wa? (b) Wa a-go apm wen di laas tes don?
15 Sietan a-go get lak op fi di 1,000 ier we Jiizas a-go a ruul fa. So fi da taim de im naa go get fi chrai fi ton we nobadi fram Gad. Bot wen di 1,000 ier don, dem a-go let go Sietan. An da taim de im a-go chrai fi mek di piipl dem we porfek tap sorv Jeuova. So wen da laas tes de a gwaan evribadi we porfek a-go get di chaans fi mek evribadi si se dem av nof rispek fi Jeuova niem an a im av di rait fi ruul uova evribadi an evriting. (Rev. 20:7-10) So bies pan wa evribadi du dem taim de Gad a-go nuo ef im fi rait dem niem iina di buk we im rait dong di niem a di piipl dem we a-go get liv fi eva an rait it iina wan wie we it naa go rob out.
16 Wi no nuo a umoch bot wa nuo a dat uol iip a piipl a-go du laik Adam an Iiv an no du wa Jeuova tel dem fi du. Bot wa a-go apm tu dem piipl ya? Revilieshan 20:15 tel wi se: “Enibadi uufa niem no rait dong iina di buk we Gad rait di niem a di piipl dem we a-go liv fi eva an eva, dem a-go get fling dong iina di liek a faiya.” Dis miin se di wan dem we no du wa Gad waahn dem fi du a-go don fa. Bot wa wi nuo a dat uol iip a piipl a-go paas di laas tes. An a da taim de dem niem a-go rait dong iina di buk we Gad rait dong di niem a di piipl dem we a-go get fi liv fi eva, an dem niem naa go rob outa it.
IINA “DI LAAS DIE DEM”
17. Wa di ienjel did tel Daniyel se wuda apm iina fi wi taim? (Daniyel 12:4, 8-10)
17 It nais fi sidong an tingk bout wa a-go apm iina di fyuucha, no chuu! Wan ienjel di tel Daniyel som impuotant sitn we av fi du wid “di laas die dem.” (Riid Daniyel 12:4, 8-10; 2 Tim. 3:1-5) Di ienjel did tel Daniyel se: ‘Uol iip a piipl a-go get fi nuo di chuut we iina Gad Wod.’ Ye man, a dem taim ya Gad piipl wuda riili andastan di sitn dem we Daniyel did rait dong. Di ienjel did aal tel im se iina dem taim ya “di wikid piipl dem a-go gwaan wikid an dem naa go andastan wa a gwaan.”
18. Wa suun apm tu di wikid piipl dem?
18 Rait ya nou ya it mait-a komiin laik se di wikid piipl dem a get we wid di wikid sitn dem we dem a du. (Mal. 3:14, 15) Bot suun suun Jiizas a-go joj di wan dem we komiin laka guot an im a-go muuv dem fram di wan dem we komiin laka shiip. (Mat. 25:31-33) Dem wikid wan ya we did get di chaans fi du wa Jeuova se bot neehn dwi’it naa go go chuu di wos sofarieshan, dem a-go ded an dem naa go kom bak alaiv iina di nyuu worl niida. Dem niem naa go de iina di “buk wid di niem a di wan dem we im waahn fi memba” we Malikai 3:16 did taak bout.
19. Wa wi fi a du nou an wa mek? (Malikai 3:16-18)
19 A nou a di taim fi wi du tingz fi shuo se wi a no wan wikid sumadi. (Riid Malikai 3:16-18.) Rait ya nou ya Jeuova a gyada op di wan dem we a fi’im speshal piipl an aal a wi waahn fi bi wan a dem sumadi de.
It a-go nais fi si Daniyel, an wi piipl dem, an uol iip muor piipl “kom bak alaiv” an dem a-go get wa Gad pramis fi gi dem iina di nyuu worl (Luk iina paragraaf 20)
20. Wa a di laas ting we Jeuova did pramis Daniyel, an wa mek yu wel waahn fi si dat apm tu?
20 Ye man, som uol iip a nais tingz a gwaan iina dem taim ya. Bot uol iip muor nais tingz a-go gwaan kaaz suun suun no muo wikidnis naa go de bout. An afta dat wa Jeuova did tel Daniyel se a-go apm a-go apm. Im se: “Yu a-go kom bak alaiv agen an yu a-go get di sitn dem we yu fi get wen di taim fi yu fi get dem kom.” (Dan. 12:13) Yu no wel waahn fi si di die wen Daniyel an yu piipl dem “kom bak alaiv agen”? Ef yu wel waan fi si dem, chrai yu bes fi du evriting we yu kyan du fi stik tu Jeuova no mata wa, an wen yu du dat yu kyan go nuo se yu niem a-go de iina di buk we Jeuova rait dong di niem a di piipl dem we a-go get fi liv fi eva.
SANG 80 Si Fi Yuself Ou Jeuova Gud
a Iina da lesn ya wi a-go taak bout wan big tiichin wok we a-go gwaan pan da ort ya we Daniyel 12:2, 3 did taak bout. An wi a-go si ou wi chienj wa wi did biliiv bout da skripcha ya. Pan tap a dat wi a-go luk pan wen da wok ya a-go gwaan an uu an uu a-go dwi’it. Den wi a-go luk pan ou da wok ya a chrien wi nou fi di wok we wi gweehn du afta Jiizas don ruul fi Touzn Ier an wi a get tes fi di laas taim.
b Di fos set a piipl dem we guda kom bak alaiv a di gud wan dem we ded iina di laas die dem, an den jos afta dat, di wan dem we ded jos bifuo dem wan ya wuda kom bak alaiv. An a so piipl wudaana a kom bak alaiv gu dong. So ef a so it go den wan jinarieshan a-go get fi welkom di ada jinarieshan we a kom bak. Wen di Baibl taak bout di wan dem we a-go kom bak alaiv fi liv iina evn, it se: “Evribadi naa go kom bak alaiv siem taim, evribadi av dem uona taim.” Dis mek wi fiil se di wan dem we a-go kom bak alaiv pan di ort, aal a dem naa go kom bak siem taim tu.—1 Kor. 14:33; 15:23
c Dis we wi se nou difrant fram wa wi did biliiv se, we rait dong iina di buk we niem Pay Attention to Daniel’s Prophecy! chapta 17, an we iina di The Watchtower fi Julai 1, 1987, p. 21-25.
