1. Shaning 1,000 uphkang ai laman, gara myit kahpra hpa mabyin ni byin wa na kun?

 HKRISTU a shaning 1,000 uphkang ai laman, ginding aga ntsa hkrung rawt ai lamang hpang ai shani gaw grai pyaw na re. Si mat ai tsawra ai ni hpe anhte yawng bai mu mayu ai myit katu nga ai. Yehowa mung grai mu mayu nga ai. (Yob 14:15) Tsawra ai ni bai hkrung rawt wa ai shaloi, masha shagu kade daram pyaw nga na hpe shingran yu u. Shawng na sumhpa hta chye wa sai hte maren, asak laika hta mying ka matsing hkrum ai “ding man ai ni” gaw, “bai hkrung rawt” wa na re. (Kas 24:15; Yhn 5:29) Anhte tsawra ai ni gaw, Hara Magedon majan ngut ai hpang, kade n na yang hkrung rawt na hpung hta lawm chye ai. * Dai sha n-ga, n si shi yang Yehowa hpe chye chyang na matu, sadi dung let nawku na matu, ahkaw ahkang n lu dat ai “n ding n man” ai ni mung, “tara daw dan” hkrum na matu bai hkrung rawt wa na re.

2-3. (a) Esaia 11:9, 10 hta tsun da ai masha labau hta kaba dik htum hpaji jaw lamang gaw gara hku rai kun? (b) Ndai sumhpa hta hpa lam bawngban na kun?

² Hkrung rawt wa ai ni yawng sharin achyin hkrum na re. (Esa 26:9; 61:11) Masha labau hta kaba dik htum hpaji jaw lamang  nga na re. (Esaia 11:9, 10 hpe hti u.) Hpa majaw kun? Hkrung rawt wa na n ding man ai ni gaw, Yesu Hkristu, Karai Kasang Mungdan lam, gawng malai jahpu, Yehowa a mying hte awmdawm ahkaw ahkang a lam hpe sharin la ra na re. Dingman ai ni mung, ginding aga hte seng ai yaw shada lam hpe, Yehowa gara hku tsang hte tsang madun wa ai hpang jahtum lam ni chye na matu ra ai. Sadi dung ai nkau gaw, Chyum Laika n ka shi yang, si mat wa ai. N ding man ai ni mung, dingman ai ni mung sharin la na lam ni grai law hkra nga ai.

³ Ndai hpaji jaw lamang gaw gara hku rai kun? Asak laika hta mying ngut hkra ka matsing hkrum ai, n hkrum ai ngu ai ntsa gara hku akyu shabyin ya ai kun? Dai ga san ni hpe ndai sumhpa hta bawngban na re. Mahtai gaw anhte a matu grai ahkyak ai. Daniela Laika hte Shingran Laika hta lawm ai myit lawm hpa myihtoi ga nkau gaw, si mat ai ni hkrung rawt wa ai shaloi, hpa byin na ngu ai hpe chye na shangun na re. Daniela 12:1, 2 hta lawm ai myihtoi ga kaw na myit kahpra hpa mabyin ni hpe shawng dinglik yu ga.

4-5. Hpang jahtum aten hte seng nna Daniela 12:1 hta gara hku tsun da ai kun?

⁴ Daniela 12:1 hpe hti u. Hpang jahtum aten laman, langai hpang langai byin na myit kahpra hpa mabyin ni hpe Daniela Laika hta madun da ai. Ga shadawn, Meshia Yesu Hkristu gaw, “[Karai] a amyu masha ni hpe makawp maga” ya na ngu Daniela Laika 12:1 hta tsun da ai. Karai a Mungdan hta hkawhkam hku nna Yesu aya ap hkrum ai 1914 hta, myihtoi ga a dai daw gaw hpring tsup hpang wa ai.

⁵ Raitim, “masha amyu tai hpang ai kaw nna, ndai aten du hkra, galoi n byin yu ai, ru tsang ai aten” laman hta mung Yesu “makawp maga” ya na ngu tsun da ai. Dai “ru tsang ai aten” gaw, Mahte 24:21 hta lawm ai “ru tsang kaba” hte maren sha re. Yakhkak ai aten a jahtum, Hara Magedon hta, Karai a masha ni hpe Yesu makawp maga ya na re. Shanhte hpe, Shingran Laika hta “ru tsang kaba kata na hkrang pru wa ai wunawng wuwa kaba” ngu nna tsun da ai.​—Shr 7:9, 14.

6. Ru tsang kaba kaw na masha wunawng wuwa lawt wa ai hpang hpa byin na kun? Sanglang dan u. (Ginding aga hkrung rawt ai lam hte seng nna ndai laika buk hta lawm ai “Laika Hti Ai Ni Hpang De Na Ga San” hpe mung yu u.)

⁶ Daniela 12:2 hpe hti u. Ru tsang ai nhtoi kaw na wunawng wuwa kaba lawt wa ai hpang hpa byin na kun? Dai myihtoi ga gaw, anhte moi chye na wa ai hpang jahtum nhtoi ni laman byin ai, Karai a mayam ni a wenyi lam bai shamu shamawt wa ai, ga shadawn hkrung rawt ai lam hpe tsun mayu ai n re. * Mungkan nnan hta si mat ai ni bai hkrung rawt wa ai lam hpe tsun mayu ai re. Hpa majaw dai hku lu tsun ai kun? Daniela 12:2 hta lang da ai “ga nhpu” a matu madung ga si hpe Yoba 17:16 hta lang da ai. Yoba 17:16 hta lawm ai “ga nhpu” hte “katsan ga” gaw lachyum maren sha re ai majaw, Daniela 12:2 hta lang da ai “ga nhpu” mung katsan ga hpe tsun mayu ai rai na re. Dai majaw, Daniela 12:2 gaw, hpang jahtum nhtoi ngut ai hpang, Hara Magedon majan ngut ai hpang, ginding ga ntsa byin wa na hkrung rawt ai lam hpe tsun nga ai re.

7. (a) Hkrung rawt wa na masha nkau gaw, “htani hkana asak” lu na matu hpa galaw ra ai kun? (b) Hpa majaw “grau reng htum ai hkrung” rawt ai lam rai kun?

⁷ Rai yang, masha nkau “htani htana asak”  hkrung na matu hkrung rawt wa na ngu Daniela 12:2 hta tsun da ai gaw hpa lachyum rai kun? Hkrung rawt wa ai ni gaw, shaning 1,000 laman, Yehowa hte Yesu hpe chye chyang ra ai, matut chye chyang ra ai, madat mara ra ai. Rai yang, htani htana asak lu na ngu ai lachyum re. (Yhn 17:3) Dai gaw, moi hkrung rawt ai lam ni hta, “grau reng htum ai hkrung” rawt ai lam rai na re. (Heb 11:35) Hpa majaw kun? Moi aten hta hkrung rawt wa ai ni gaw, bai si mat ai majaw re.

8. Nkau gaw, gara lam hku nna, “htani htana kaya kahpa hte arawng hpoi ai hkrum” na matu hkrung rawt wa na kun?

⁸ Raitim, hkrung rawt wa ai ni yawng gaw, Yehowa a hpaji jaw ai lamang hpe hkap la na n re. Nkau gaw, “htani htana kaya kahpa hte arawng hpoi ai hkrum” na matu hkrung rawt wa na ngu, Daniela myihtoi ga hta tsun da ai. Ninghkap ai myit jasat nga taw ai majaw, asak laika hta shanhte a mying ka matsing hkrum na n re. Htani htana asak lu na n re ai sha, “htani htana kaya kahpa” hkrum na re. Htani htana jahten hkrum na re. Dai majaw, Daniela 12:2 gaw, hkrung rawt ngut ai hpang galaw ai akyang ni hta madung nna byin wa na lam hpe tsun nga ai re. * (Shr 20:12) Nkau gaw htani htana asak lu na. Nkau gaw n lu ai.

9-10. Ru tsang kaba ngut ai hpang hpa naw byin na kun? Kadai ni gaw “sumsing lamu a nhtoi zawn” htoi tu nga na kun?

⁹ Daniela 12:3 hpe hti u. “Ru tsang ai aten” ngut ai hpang, hpa naw byin na kun? Ru tsang kaba ngut ai hpang, hpa byin na hpe Daniela 12:2 hta sha n-ga, daw kaji 3 hta mung tsun da ai.

¹⁰ Kadai ni gaw, “sumsing lamu a nhtoi zawn” htoi tu nga na kun? Mahte 13:43 hta lawm ai Yesu a ga hta mahtai hpe mu lu ai. “Dai shaloi e ding hpring ai ni gaw shanhte a Kawa a mungdan hta e, ajan zawn htoi kabrim na ma ra ai.” Sumsing Mungdan hta shi hte rau uphkang na namman chya hkam ai kanau ni, “mungdan a kashu kasha ni” a lam, Yesu tsun nga ai re. (Mat 13:38) Dai majaw, Daniela 12:3 mung namman chya hkam ai ni a lam, shaning 1,000 uphkang ai aten laman, shanhte hpa galaw na ngu ai hpe tsun nga ai rai na re.

11-12. Shaning 1,000 laman, 144,000 hpa galaw na kun?

¹¹ Gara lam hku nna namman chya hkam ai ni gaw, “masha law law hpe ding hpring ai maga de” hkan nang shangun na kun? Namman chya hkam ai ni gaw, Yesu hte rau shaning 1,000 laman, ginding ga ntsa na hpaji jaw lamang hpe lam matsun na re. 144,000 gaw, hkawhkam ni sha n ga, hkinjawng ni hku nna magam gun na re. (Shr 1:6; 5:10; 20:6) Shanhte gaw, “masha amyu ni a ana shamai shatsai” ya ai majaw, angwi ngwi bai hkum tsup wa na re. (Shr 22:1, 2; Eze 47:12) Dai zawn galaw ra na hpe namman chya hkam ai ni grai kabu ai.

¹² Ding hpring ai lam hkan na “masha law law” hta kadai ni lawm na kun? Hkrung rawt wa ai ni, Hara Magedon kaw na lawt wa ai ni, mungkan nnan hta shangai wa na ma ni lawm na re. Shaning 1,000 htum ai aten, ginding ga ntsa asak hkrung ai ni yawng hkum tsup nga na re. Gara aten hta asak laika hta shanhte a mying hpe hketan hte n re ai sha, tsi hte ngut hkra ka matsing na kun?

13-14. Htani htana asak lu na matu, ginding ga ntsa na hkum tsup ai masha yawng hpa hpe madun ra ai kun?

¹³ Hkum tsup ai ngu tsun ai hte htani htana asak shi hkrai shi lu na n re ai hpe dum ra ai. Adam yan Ewa a lam hpe myit yu u. Hkum tsup tim, htani htana asak lu na matu, Yehowa Karai Kasang hpe madat mara ai lam madun ra ai. Raitim, shanhte ga n madat wa ai.​—Rom 5:12.

¹⁴ Shaning 1,000 htum ai aten hta, ginding ga ntsa na masha ni a masa gara hku byin nga na kun? Yawng hkum tsup nga na re. Dai hkum tsup ai masha yawng, Yehowa a uphkang lam hpe htani htana tsep kawp madi shadaw na kun? Hkum tsup tim, sadi n dung wa ai Adam yan Ewa zawn byin mat na kun? Dai ga san ni a mahtai hpe htai na matu ra ai. Gara lam hku nna kun?

15-16. (a) Yehowa ntsa sadi dung ai lam masha yawng gara aten hta sakse madun na ahkang lu na kun? (b) Hpang jahtum chyam dinglik ai lam a mahtai gaw hpa rai na kun?

¹⁵ Satan gaw, shaning 1,000 sharen da hkrum na re. Dai aten hta kadai hpe mung n mai hkalem sai. Raitim, shaning 1,000 jahtum hta lawt wa na. Hkum tsup ai masha ni hpe hkalem na matu shakut na. Dai chyam dinglik ai aten laman hta, ginding ga ntsa na hkum tsup ai masha yawng gaw, Karai a mying ningsang, uphkang ai lam hte seng ai  lam hta gara maga de tsap na kun? ngu ai hpe asan sha sakse madun na ahkang lu na re. (Shr 20:7-10) Asak laika hta mying hpe grin hkra ka matsing hkrum na matu, Satan hkalem ai hpe anhte langai hpra bai htang ai hta madung na re.

¹⁶ Adam yan Ewa zawn, Yehowa a uphkang ai lam hpe nyet kau ai masha nkau nga na re. Shanhte hpa byin na kun? “Asak laika hta amying n lawm ai wa kadai mung, dai wan nawng hta jahkrat bang kau ai hkrum” na ngu Shingran 20:15 hta tsun da ai. Ninghkap ai ni htani htana jahten hkrum na re. Raitim, hkum tsup ai masha law malawng gaw, ndai hpang jahtum chyam dinglik ai lam hta awng dang na re. Shanhte a mying asak laika hta gin mat na re.

17. Anhte a prat hta hpa byin na ngu Daniela hpe lamu kasa tsun ai kun? (Daniela 12:4, 8-10)

¹⁷ Htawm hpang hte seng ai ndai mabyin ni a lam myit ai gaw myit kahpra hpa re. Anhte a prat, “amu htum ai aten” a lam hte seng ai ahkyak ai lam nkau hpe mung Daniela hpe lamu kasa tsun ai. (Daniela 12:4, 8-10 hpe hti u; 2 Tm 3:1-5) Tengman ai “nyan hpaji jat wa na ra ai” ngu tsun da ai. Dai hte maren, Karai a amyu masha gaw, Daniela Laika kaw na  myihtoi ga ni hpe grau nna chye na wa ai. Raitim, “tara n lang ai ni chyawm gaw, tara n lang ai hku hkan nang na ma ra ai; tara n lang ai wa kadai mung, chye na lu na n rai” ngu nna mung lamu kasa tsun ai.

18. Nhkru ai masha ni kade n na yang hpa byin mat na kun?

¹⁸ Ya aten hta, n kaja ai akyang galaw ai nhkru ai masha ni gaw, ari n jaw hkrum ai zawn re. (Mal 3:14, 15) Raitim, kade n na yang, Yesu gaw sagu hte bainam garan na re. Bainam zawn re ai ni hpe tara jeyang na re. (Mat 25:31-33) Dai nhkru ai masha ni gaw, ru tsang kaba kaw na lawt lu na n re. Mungkan nnan hta hkrung rawt wa na n re. Malahki 3:16 hta tsun da ai “jahpan laika” hta, shanhte a mying lawm na n re.

19. Ya aten gaw hpa galaw ra na aten kun? Hpa majaw kun? (Malahki 3:16-18)

¹⁹ Tinang gaw, nhkru ai masha n re ai hpe ya aten hta, galaw ai lam hte sakse madun dan ra ai. (Malahki 3:16-18 hpe hti u.) “Sut gan” zawn manu shadan ai amyu hpe Yehowa kahkyin nga ai. Dai hta anhte lawm mayu na gaw teng sha re.

20. Daniela hpe Karai Kasang hpa ga sadi jaw ai kun? Dai ga sadi hpring tsup wa na nhtoi hpe mu mayu ai myit nang hpa majaw sharawng nga ai kun?

²⁰ Myit kahpra hpa aten hta anhte asak hkrung nga ga ai. Dai hta grau myit kahpra hpa aten ni mung naw byin wa na re. Kade n na yang, nhkru ai masha ni jahten hkrum ai hpe mu lu na. “Aten ladaw jahtum e na a kamhtaw hta tsap nga lu na rin dai” ngu Daniela hpe jaw ai Yehowa a ga sadi hpring tsup wa na hpe mu lu na. (Dan 12:13) Daniela mung, anhte tsawra ai ni mung “tsap” nga na nhtoi hpe anhte grai mu mayu ga ai. Rai yang, sadi dung na matu dang lu ai daram shakut u. Sadi dung nga yang asak laika hta, na a mying nga nga na hpe kam mai ai.