NAʼLEBʼ RE TZOLOK 40
«Li keʼkʼutuk re li tiikil chʼoolej chiruhebʼ li kʼiila tenamit»
«Li keʼkʼutuk re li tiikil chʼoolej chiruhebʼ li kʼiila tenamit, teʼlemtzʼunoʼq joʼ li saqenk saʼ choxa ut joʼkaqebʼ li chahim chi junelik» (DAN. 12:3).
BʼICH 142 Qachapaq qibʼ rikʼin li qoybʼenihom
RUʼUJIL LI TZOLOM a
1. Kʼaru naqoybʼeni naq t-awabʼejinq li Kriist?
MA NACHALK saʼ qachʼool naq kʼajoʼaq xchʼinaʼusal naq teʼwakliiq chi yoʼyo ebʼ li qakomon arin saʼ li Ruuchichʼochʼ chiru li jun mil chihabʼ naq t-awabʼejinq li Jesukriist? Chiqajunilo li ak xkamk junaq qakomon naqaj wiʼ chik rilbʼalebʼ ru, ut joʼkan ajwiʼ li Jehobʼa (Job 14:15). Qakʼoxlaq, kʼajoʼ tana li sahil chʼoolejil twanq saʼ chixjunil li Ruuchichʼochʼ. Joʼ ak xqil saʼ li tzolom rubʼelaj, «li tiikebʼ xchʼool» li wankebʼ xkʼabʼaʼ saʼ li xhuhil li yuʼam «teʼwakliiq chi yoʼyo re li yuʼam» (Hech. 24:15, Wy; Juan 5:29). Maare li qakomon li xeʼkamk aʼanebʼ xbʼeenwa teʼwakliiq chi yoʼyo. b Moqon, «li inkʼaʼ tiikebʼ xchʼool» li moko xeʼruuk ta xnawbʼal ru li Jehobʼa ut kʼanjelak chiru «teʼwakliiq chi yoʼyo re li tojbʼamaak [raqok aatin]».
2, 3. a) Joʼ naxye saʼ Isaías 11:9, 10, chanru tbʼaanumanq li nimla kʼanjel aʼin? b) Kʼaru tqatzʼil rix saʼ li tzolom aʼin?
2 Chixjunilebʼ li teʼwakliiq chi yoʼyo naabʼal teʼxtzol (Is. 26:9; 61:11). Re xbʼaanunkil aʼin tento naq tbʼaanumanq jun li nimla kʼanjel re xtzolbʼalebʼ li kristiʼaan chirix li Santil Hu (taayaabʼasi Isaías 11:9, 10). Ebʼ li inkʼaʼ tiikebʼ xchʼool teʼxtzol chirix li Jesukriist, li Awabʼejilal, li xkamik li Jesús, li xwankilal li xkʼabʼaʼ li Jehobʼa ut li xkʼulubʼ chi Awabʼejink. Joʼ ajwiʼ li tiikebʼ xchʼool tento teʼxtzol chirix li rajom li Jehobʼa. Wankebʼ li tiikebʼ xchʼool xeʼkamk naq toj maajiʼ nachoymank xtzʼiibʼankil li Santil Hu. Chʼolchʼo naq li tiikebʼ xchʼool ut li inkʼaʼ tiikebʼ xchʼool naabʼal teʼxtzol.
3 Saʼ li tzolom aʼin tqasume ebʼ li patzʼom: Chanru tbʼaanumanq li nimla kʼanjel aʼin?, kʼaru tkʼulmanq rikʼinebʼ li kristiʼaan li teʼxyuʼami li teʼxtzol?, ut kʼaru tkʼulmanq rikʼinebʼ li inkʼaʼ teʼabʼinq? Aajel ru xnawbʼal li xsumenkil. Xbʼaan naq tqil ebʼ li propesiiy li natawmank saʼ li hu Daniel ut Apocalipsis li tooxtenqʼa chi xtawbʼal ru chanru tbʼaanumanq li wakliik chi yoʼyo. Xbʼeen, qilaq li xninqal ru naʼlebʼ li natawmank saʼ li propesiiy re Daniel 12:1, 2.
«LI AK KAMENAQEBʼ TEʼWAKLIIQ CHAQ WIʼ CHIK CHI YOʼYO»
4, 5. Kʼaru naxye Daniel 12:1 chirix li tkʼulmanq saʼ li rosoʼjikebʼ li kutan?
4 (Taayaabʼasi Daniel 12:1). Saʼ li xhu laj Daniel, naxkʼut chanru tkʼulmanq chi tustu ru junjunq li naʼlebʼ saʼ rosoʼjikebʼ li kutan. Jun eetalil, saʼ Daniel 12:1 naxye naq laj Miguel, aʼ li Jesukriist, aʼan «li nakolok» re li xtenamit li Yos. Aʼin kiʼok chi tzʼaqlok ru saʼ li chihabʼ 1914, naq li Jesús kixaqabʼaak choʼq Awabʼej re li Xʼawabʼejilal li Yos.
5 Nayeheʼk re laj Daniel naq li Jesús tchalq naq «qʼaxal rahaq rilbʼalebʼ li kutan aʼan, joʼ maajun wa kikʼulmank chalen chaq saʼ xtiklajikebʼ li tenamit toj anaqwan». Li hoonal aʼan li «xnimal li rahilal» li naʼaatinak wiʼ Mateo 24:21. Li Jesús naxkol li xtenamit li Yos, saʼ xraqik li nimla rahilal, malaj Armagedón. Li hu Apocalipsis naʼaatinak chirix li «xkʼihalebʼ li tenamit» li nekeʼkoleʼk saʼ «li xnimal rahilal» (Apoc. 7:9, 14).
6. Kʼaru tkʼulmanq rikʼin li xkʼihalil li tenamit naq ak xnumeʼk li nimla rahilal, ut kʼaʼut naqaye aʼin? (Chaawil saʼ li hu aʼin li naʼlebʼ «Xpatzʼom ebʼ laj ilol hu» li naʼaatinak chirix li wakliik wiʼ chik chi yoʼyo saʼ Ruuchichʼochʼ).
6 (Taayaabʼasi Daniel 12:2). Kʼaru tkʼulmanq naq li kʼiila tenamit tixqʼax ru li nimla rahilal? Li propesiiy moko yook ta chi aatinak chirix jun eetalil malaj li wakliik chi yoʼyo saʼ musiqʼej saʼ rosoʼjikebʼ li kutan joʼ nayeemank chaq junxil. c Aʼin bʼan, li wakliik chi yoʼyo li tkʼulmanq saʼ li akʼ ruuchichʼochʼ. Kʼaʼut naqaye aʼin? Saʼ Job 17:16 naʼaatinak ajwiʼ chirix li «pojtzʼ», li naraj xyeebʼal li «Jul». Aʼin naraj xyeebʼal naq li wakliik chi yoʼyo li naʼaatinak wiʼ Daniel 12:2 tkʼulmanq naq ak xraqeʼk li rosoʼjikebʼ li kutan ut naq ak xnumeʼk li Armagedón.
7. a) Kʼaru naraj xyeebʼal naq wiibʼ oxibʼ teʼwakliiq chi yoʼyo re «li junelik yuʼam»? b) Kʼaʼut naq «qʼaxal chaabʼil» li wakliik chi yoʼyo aʼin?
7 Kʼaru naraj xyeebʼal Daniel 12:2 chirix wiibʼ oxibʼ li teʼwakliiq chi yoʼyo re «li junelik yuʼam»? Naraj xyeebʼal naq chiru li jun mil chihabʼ teʼxnaw ru, malaj inkʼaʼ teʼxkanabʼ xnawbʼal ru li Jehobʼa ut li Jesús, ut wi nekeʼabʼink teʼxkʼul li junelik yuʼam (Juan 17:3). Aʼin «jun xwaklijikebʼ chi yoʼyo qʼaxal chaabʼil» chiru li xeʼxkʼul chaq junxil (Heb. 11:35). Kʼaʼut? Xbʼaan naq ebʼ aʼin xeʼkamk wiʼ chik.
8. Kʼaru naraj xyeebʼal naq teʼwakliiq chi yoʼyo re «xutaan ut tojbʼamaak chi junajwa»?
8 Moko chixjunilebʼ ta li teʼwakliiq chi yoʼyo teʼraj tzoleʼk xbʼaan li Jehobʼa. Li xpropesiiy laj Daniel naxye naq wank teʼwakliiq chi yoʼyo re «xutaan ut tojbʼamaak chi junajwa». Saʼ xkʼabʼaʼ li teʼxbʼaanu inkʼaʼ wanqebʼ li xkʼabʼaʼ saʼ xhuhil li yuʼam inkʼaʼ teʼxkʼul li junelik yuʼam. Teʼxkʼul bʼan li «tojbʼamaak chi junajwa». Saʼ Daniel 12:2 yook chi aatinak chirix li teʼxkʼul li xeʼwakliik chi yoʼyo aʼ yaal chanru xeʼnaʼlebʼak d (Apoc. 20:12). Wanqebʼ teʼxkʼul li junelik yuʼam, ut wanqebʼ inkʼaʼ.
«LI KEʼKʼUTUK RE LI TIIKIL CHʼOOLEJ CHIRUHEBʼ LI KʼIILA TENAMIT»
9, 10. Joʼ naxye Daniel 12:1, 3, kʼaru chik tkʼulmanq naq ak xnumeʼk li nimla rahilal? b) Anihebʼ li «teʼlemtzʼunoʼq joʼ li saqenk saʼ choxa»?
9 (Taayaabʼasi Daniel 12:1, 3). Kʼaru chik tkʼulmanq naq ak xnumeʼk li kutan li «qʼaxal rahaq» rilbʼal li yook chaq chi nachʼok? Joʼ xqil saʼ Daniel 12:2, li raqal 3 naxye ajwiʼ naq wank chik xkomon li tkʼulmanq naq ak xnumeʼk li nimla rahilal.
10 Anihebʼ li «teʼlemtzʼunoʼq joʼ li saqenk saʼ choxa»? Li kixye li Jesús saʼ Mateo 13:43 nokooxtenqʼa chi xtawbʼal ru naq kixye: «Tojaʼ naq ebʼ li tiikebʼ xchʼool teʼlemtzʼunq ruhebʼ kamaʼ li saqʼe, saʼ li xnimajwal awabʼejihom li xYuwaʼebʼ». Naq li Jesús kixye aʼin yook chi aatinak chirix «li ralal xkʼajol li xnimajwal wankilal li choxa», li naraj xyeebʼal li teʼawabʼejinq saʼ li Xʼawabʼejilal li Yos (Mat. 13:38). Joʼkan naq saʼ Daniel 12:3 naʼaatinak chirixebʼ li yulbʼilebʼ ru ut li kʼanjel li teʼxbʼaanu chiru jun mil chihabʼ.
Ebʼ li 144,000 teʼkʼanjelaq rochbʼen li Jesús saʼ li nimla kʼanjel re xtzolbʼal ebʼ li kristiʼaan chirix li Santil Hu li twanq chiru li jun mil chihabʼ. (Chaawil li raqal 11).
11, 12. Kʼaru kʼanjel teʼxbʼaanu li 144,000 chiru jun mil chihabʼ?
11 Chanru li yulbʼilebʼ ru teʼxkʼam li «tiikil chʼoolej chiruhebʼ li kʼiila tenamit»? Naq teʼkʼanjelaq rochbʼen li Jesús saʼ li nimla kʼanjel re xtzolbʼalebʼ li kristiʼaan chirix li Santil Hu chiru jun mil chihabʼ. Li 144,000 teʼwanq joʼ awabʼej, ut joʼ xyuwaʼil aj tij (Apoc. 1:6; 5:10; 20:6). Joʼkan naq teʼtenqʼanq re xbʼanbʼalebʼ «li tenamit» ut teʼxbʼaanu naq li qas qiitzʼin timil timil teʼtzʼaqloq ru li xyuʼamebʼ (Apoc. 22:1, 2; Ezeq. 47:12). Kʼajoʼ li sahil chʼoolejil teʼrekʼa li yulbʼilebʼ ru naq teʼruuq xbʼaanunkil aʼin!
12 Anihebʼ li wankebʼ saʼ xyanq li «kʼiila» tenamit li tyeechiʼimanq rehebʼ li «tiikil chʼoolej»? Aʼanebʼ li teʼwakliiq wiʼ chik chi yoʼyo, li teʼkoleʼq saʼ li Armagedón ut ebʼ li kokʼal li teʼyoʼlaaq saʼ li akʼ ruuchichʼochʼ. Naq ak xraqeʼk li jun mil chihabʼ, ebʼ li poyanam teʼxtaw li tzʼaqal yuʼam. Joʼkan bʼiʼ, joqʼe ttzʼiibʼamanq li xkʼabʼaʼebʼ saʼ xhuhil li yuʼam chi junajwa ut inkʼaʼ chik tbʼoreʼq?
JUN SUT AJ CHIK TEʼYALEʼQ RIX
13, 14. Kʼaru tento teʼxkʼutbʼesi li teʼwakliiq chi yoʼyo saʼ li Ruuchichʼochʼ naq toj maajiʼ nekeʼxkʼul li junelik yuʼam?
13 Qajultikaq naq junaq li qas qiitzʼin li tzʼaqal re ru xyuʼam moko naraj ta xyeebʼal naq tixkʼul li junelik yuʼam. Qakʼoxlaq aʼin, laj Adán ut li xʼEva tzʼaqalebʼ chaq re ru li xyuʼam abʼanan, tento raj xeʼabʼink chiru li Jehobʼa re naq teʼruuq xkʼulbʼal li junelik yuʼam. Abʼanan, inkʼaʼ xeʼabʼink (Rom. 5:12).
14 Joʼ ak xqil, saʼ xraqik li jun mil chihabʼ, ebʼ li qas qiitzʼin tzʼaqalaqebʼ chik re ru li xyuʼam. Ma teʼokenq chirix li Xʼawabʼejilal li Jehobʼa chi junajwa ut teʼxkʼutbʼesi li tiikil chʼoolej? Malaj joʼaqebʼ laj Adán ut li xʼEva, usta tzʼaqalebʼ chaq re ru xyuʼam abʼanan moko tiikebʼ ta chaq xchʼool chiru li Jehobʼa? Chanru ttuqubʼamanq ru li naʼlebʼ aʼin?
15, 16. a) Joqʼe teʼxkʼutbʼesi li kristiʼaan li xtiikilalebʼ xchʼool chiru li Jehobʼa? b) Chanru traqeʼq li yalbʼaʼix aʼin?
15 Laj Tza ttzʼapeʼq saʼ li siwan chiru jun mil chihabʼ, chiru li hoonal aʼan maaʼani chik truuq xbʼalaqʼinkil. Abʼanan saʼ xraqik li jun mil chihabʼ tkolmanq malaj tkoqʼmanq wiʼ chik, ut aʼin naru t-oq wiʼ chik xbʼalaqʼinkilebʼ chixjunil li kristiʼaan. Chiru li yalbʼaʼix aʼin, ebʼ li kristiʼaan teʼxkʼutbʼesi chirix ani nekeʼokenk, ma teʼroxloqʼi li xkʼabʼaʼ li Yos ut li xkʼulubʼ chi awabʼejink (Apoc. 20:7-10). Aʼin tixbʼaanu naq ttzʼiibʼamanq li xkʼabʼaʼebʼ saʼ li xhuhil li yuʼam chi junelik.
16 Wanqebʼ chanchanaqebʼ laj Adán ut li xʼEva, teʼxtzʼeqtaana li Xʼawabʼejilal li Jehobʼa. Kʼaru tkʼulmanq rikʼinebʼ? Apocalipsis 20:15 naxye: «Ani inkʼaʼ kitaweʼk xkʼabʼaʼ chi tzʼiibʼanbʼil saʼ li xhuhil li yuʼam, kikuteʼk ajwiʼ saʼ li palaw xam». Joʼkan bʼiʼ, ebʼ aʼin li nekeʼxqʼet ribʼ teʼsacheʼq ru chi junajwa. Abʼanan li xkʼihalebʼ li kristiʼaan li tzʼaqal ru xyuʼamebʼ teʼxqʼax ru li yalbʼaʼix. Li xkʼabʼaʼebʼ ttzʼiibʼamanq chi junajwa saʼ xhuhil li yuʼam.
«TOJ SAʼ ROSOʼJIKEBʼ LI KUTAN»
17. Kʼaru kiyeheʼk re laj Daniel li tkʼulmanq saʼebʼ li qakutan? (Daniel 12:4, 8-10).
17 Qʼaxal nasahoʼk saʼ qachʼool xnawbʼal li tkʼulmanq saʼebʼ li kutan chalk re! Abʼan jun li ánjel kixye re laj Daniel chirix li tkʼulmanq «saʼ rosoʼjikebʼ li kutan» (taayaabʼasi Daniel 12:4, 8-10; 2 Tim. 3:1-5). Kixye re: «Teʼxtaw xtzʼaqobʼ li xnaʼlebʼebʼ». Joʼkan naq, li xtenamit li Yos teʼxtaw ru chiʼus li xpropesiiy laj Daniel. Li ánjel kixye ajwiʼ kʼaru chik tkʼulmanq saʼ rosoʼjikebʼ li kutan: «Ebʼ li yibʼru xnaʼlebʼebʼ toj yooqebʼ chi xbʼaanunkil li maaʼusilal, chi maajun taatawoq xyaalal».
18. Kʼaru teʼxkʼul li yibʼebʼ ru xnaʼlebʼ?
18 Saʼebʼ li qakutan ebʼ li yibʼru xnaʼlebʼebʼ chanchan naq maakʼaʼ nekeʼxkʼul (Mal. 3:14, 15). Chi seebʼ li Jesús traqoq aatin saʼ xbʼeenebʼ li chanchanebʼ li chibʼaat ut trisihebʼ saʼ yanqebʼ li chanchanebʼ li karneer (Mat. 25:31-33). Li yibʼebʼ ru xnaʼlebʼ inkʼaʼ teʼkoleʼq saʼ li nimla rahilal chi moko teʼwakliiq chi yoʼyo saʼ li akʼ ruuchichʼochʼ. Li xkʼabʼaʼebʼ maakʼaʼaq saʼ «li tasal hu, re naq patzʼbʼilaqebʼ», joʼ naxye Malaquías 3:16.
19. Kʼaru tento tqabʼaanu anaqwan ut kʼaʼut? (Malaquías 3:16-18).
19 Anaqwan li hoonal re elk saʼ xyanqebʼ li inkʼaʼ usebʼ xnaʼlebʼ (taayaabʼasi Malaquías 3:16-18). Li Jehobʼa yook xchʼutubʼankilebʼ xbʼaan naq naxye naq «aʼanebʼ tzʼaqal intenamitaqebʼ» malaj li oxloqʼebʼ chiru. Peʼyaal naq naqaj wank saʼ xyanqebʼ aʼin?
Kʼajoʼaq xchʼinaʼusal rilbʼal naq laj Daniel ut ebʼ li qakomon ut jalanebʼ chik, teʼwakliiq chaq saʼ rosoʼjikebʼ li kutan re xkʼulbʼalebʼ li xqʼajkamunkil! (Chaawil li raqal 20).
20. Kʼaru kiyeechiʼiik re laj Daniel xbʼaan li Jehobʼa, ut kʼaʼut nakaawaj rilbʼal li xtzʼaqlojik ru aʼin?
20 Chʼinaʼus li kutan wanko wiʼ. Chi seebʼ tkʼulmanq li xninqal ru naʼlebʼ. Yook chi nachʼok li kutan bʼarwiʼ ebʼ li inkʼaʼ usebʼ xnaʼlebʼ teʼsacheʼq ru chi junajwa. Tqil chanru ttzʼaqloq ru li kixye li Jehobʼa re laj Daniel: «Tatwakliiq chaq saʼ rosoʼjikebʼ li kutan re xkʼulbʼal laaqʼajkamunkil» (Dan.12:13). Ma naqaj rilbʼal naq laj Daniel ut ebʼ li qakomon teʼwakliiq wiʼ chik chi yoʼyo arin saʼ Ruuchichʼochʼ? Wi joʼkan, qabʼaanuhaq chixjunil li wank saʼ quqʼ re naq inkʼaʼ tqatzʼeqtaana li Yos, chi joʼkan li qakʼabʼaʼ twanq saʼ xhuhil li yuʼam.
BʼICH 89 Li Jehobʼa narosobʼtesi li naʼabʼink ut napaabʼank
a Saʼ li tzolom aʼin tqil chanru naqataw ru anaqwan li nimla kʼanjel re xtzolbʼalebʼ li kristiʼaan chirix li Santil Hu, li naqataw saʼ Daniel 12:2, 3. Tqatzʼil ajwiʼ rix joqʼe tkʼulmanq ut ani teʼokenq. Tqil ajwiʼ chanru tixkawresihebʼ li teʼwanq arin saʼ li Ruuchichʼochʼ naq junsut aj chik teʼyaleʼq rix naq traqeʼq chi awabʼejink li Kriist chiru jun mil chihabʼ.
b Maare li wakliik chi yoʼyo arin saʼ Ruuchichʼochʼ ttiklaaq rikʼin li xeʼkʼanjelak chiru li Jehobʼa saʼebʼ li qakutan ut moqon li xeʼkamk junxil. Wi joʼkan, li junjunq twanq li xhoonal re xkʼulbʼal li xeʼxnawebʼ ru naq yoʼyokebʼ chaq. Li Santil Hu naxye naq li teʼwakliiq chi yoʼyo saʼ choxa «moko jun waklijikebʼ ta, naq teʼwakliiq», joʼkan ajwiʼ tkʼulmanq arin saʼ Ruuchichʼochʼ xbʼaan naq tbʼaanumanq chi tustu ru (1 Cor. 14:33; 15:23).
c Li xchʼolobʼankil kijalmank rikʼin li naxye saʼ li tasal 17 re li hu Prestemos atención a las profecías de Daniel ut li hu Laj Kʼaakʼalehom 1 re julio 1987, perel 21 toj 25, maakʼaʼ saʼ qʼeqchiʼ.
d Li aatin «li tiikebʼ xchʼool» ut «li inkʼaʼ tiikebʼ xchʼool» li natawmank saʼ Hechos 24:15, Wy, ut «li xeʼxbʼaanu li us» ut «li xeʼxbʼaanu li inkʼaʼ us» li natawmank saʼ Juan 5:29 naʼaatinak chirix li xeʼxbʼaanu naq toj maajiʼ nekeʼkamk.
