တၢ်မၤလိ ၄၀
“မၤစၢၤပှၤအါဂၤ ဒ်သိး အကကဲထီၣ် ပှၤတီပှၤလိၤ”
“ပှၤလၢ အမၤစၢၤ ပှၤအါဂၤ ဒ်သိး အကကဲထီၣ် ပှၤတီပှၤလိၤအဂီၢ်န့ၣ် ကကပီၤထီၣ်ဒ် ဆၣ်တဖၣ်အသိး အစိၤစိၤအဃၣ်ဃၣ် လီၤထူလီၤယိာ်လီၤ.”—ဒၤနံးယ့လး ၁၂:၃.
တၢ်သးဝံၣ် ၁၅၁ ယွၤကကိး
တၢ်မၤလိအံၤ အတၢ်တိာ်ပာ် *
၁. ဖဲခရံာ်ပၢတၢ် အနံၣ်တကထိ အတီၢ်ပူၤန့ၣ် တၢ်လၢအလီၤသးခုမနုၤတဖၣ် ကကဲထီၣ်အသးလဲၣ်.
ဖဲခရံာ်ပၢတၢ် အနံၣ်တကထိအတီၢ်ပူၤ မုၢ်နံၤဖဲ ပှၤစးထီၣ်ဂဲၤဆၢထၢၣ်သမူထီၣ်က့ၤန့ၣ် ကမ့ၢ်မုၢ်နံၤလၢ အလီၤသးခုဒိၣ်မး. ပဝဲခဲလၢာ်န့ၣ် ပှၤလၢပအဲၣ်ဘၣ်အီၤ လၢအသံသဒၣ်ပှၤန့ၣ် ပအဲၣ်ဒိးထံၣ်ဘၣ်က့ၤ အဝဲသ့ၣ် သပှၢ်ကတၢၢ်. ဒီးယဟိဝၤယွၤနာ်က့ အဲၣ်ဒိးထံၣ်ဘၣ်အဝဲသ့ၣ်စ့ၢ်ကီး. (ယိၤဘး ၁၄:၁၅) ထံၣ်တမှံကွၢ်လၢ ဖဲပှၤဂဲၤဆၢထၢၣ်သမူထီၣ်က့ၤအခါ ပှၤကသးခုထဲလဲၣ်. ဒ်ပမၤလိဘၣ်လၢ တၢ်မၤလိလၢအပူၤကွံာ်တခါအသိး “ပှၤတီပှၤလိၤ” လၢအမံၤအိၣ်လၢ လံာ်တၢ်မူအပူၤ လၢအကဂဲၤဆၢထၢၣ်သမူထီၣ်က့ၤန့ၣ် “ကဒိးန့ၢ်ဘၣ် တၢ်မူ.” (မၤတၢ် ၂၄:၁၅; ယိၤဟၣ် ၅:၂၉) ပှၤအါဂၤလၢ ပအဲၣ်ဘၣ်အီၤန့ၣ် ဘၣ်သ့ၣ်သ့ၣ် ကဂဲၤဆၢထၢၣ်သမူထီၣ်က့ၤ ဖဲအၢ်မက့းဒိၣ်ဝံၤတယံာ်ဘၣ်. * မ့မ့ၢ်လၢ “ပှၤတတီတလိၤ” န့ၣ်အကဲ ပှၤလၢအတဒိးန့ၢ်ဘၣ် တၢ်ခွဲးတၢ်ယာ် လၢလၢပှဲၤပှဲၤ လၢကသ့ၣ်ညါထီၣ်ယဟိဝၤယွၤ ဒီးအကဲပှၤလၢ အတဘူၣ်ထီၣ်ဘါထီၣ်ဘၣ် ယဟိဝၤယွၤဘၣ်. အဝဲသ့ၣ်န့ၣ် ကဂဲၤဆၢထၢၣ် သမူထီၣ်က့ၤဒီး “ကဘၣ်တၢ်စံၣ်ညီၣ်အီၤ.”
၂-၃. (က) ယၡါယၤ ၁၁:၉, ၁၀ ပာ်ဖျါထီၣ်ဝဲလၢ ဟီၣ်ခိၣ်သီခဲကၢာ်န့ၣ် တၢ်သိၣ်လိ အတၢ်ရဲၣ်တၢ်ကျဲၤ ကအိၣ်ဝဲဒ်လဲၣ်. (ခ) လၢတၢ်မၤလိအံၤအပူၤ ပကတဲသကီး တၢ်ဂ့ၢ်မနုၤလဲၣ်.
၂ ပှၤလၢအကဂဲၤဆၢထၢၣ် သမူထီၣ်က့ၤ ကိးဂၤဒဲးန့ၣ် ကလိၣ်ဘၣ် တၢ်ဟံးစုနဲၣ်ကျဲ. (ယၡါယၤ ၂၆:၉; ၆၁:၁၁) အဃိ ဖဲန့ၣ်အဆၢကတီၢ် တၢ်သိၣ်လိ အတၢ်ရဲၣ်တၢ်ကျဲၤ ကအိၣ်ဝဲ. (ဖး ယၡါယၤ ၁၁:၉, ၁၀.) အဒိ ပှၤတတီတလိၤ လၢအကဂဲၤဆၢထၢၣ်သမူထီၣ်က့ၤတဖၣ်န့ၣ် ကမၤလိဘၣ်ဝဲ တၢ်ဂ့ၢ်ဘၣ်ဃးဒီး ယ့ၣ်ၡူးခရံာ်, ယွၤအဘီအမုၢ်, တၢ်ပှ့ၤက့ၤ, ကစၢ်ယွၤအမံၤ မ့ၢ်တၢ်လၢအရ့ဒိၣ် ဒီးထဲဒၣ် ယဟိဝၤယွၤတဂၤန့ၣ် အိၣ်ဒီးတၢ်ခွဲးတၢ်ယာ်လၢ ကပၢတၢ်အဂ့ၢ်. ပှၤတီပှၤလိၤတဖၣ်စ့ၢ်ကီး ကဘၣ်မၤလိအါထီၣ်ဝဲ တၢ်ဂ့ၢ်ဘၣ်ဃးဒီး ယဟိဝၤယွၤ အတၢ်တိာ်ပာ်လၢ ပှၤဟီၣ်ခိၣ်ဖိအဂီၢ် လၢယဟိဝၤယွၤ သိၣ်လိတ့ၢ်ပှၤ တဆီဘၣ်တဆီ. ကစၢ်ယွၤအခ့အပှၤလၢ အအိၣ်ဒီးတၢ်သးတီတနီၤန့ၣ် အဝဲသ့ၣ်သံဝဲ တချုးလၢ ပှၤကွဲးလံာ်စီဆှံ ဝံၤဒံးဘၣ်ဖးယံာ်လံ. အဃိ ပှၤတီပှၤလိၤမ့ၢ်ဂ့ၤ, ပှၤတတီတလိၤဘၣ်မ့ၢ်ဂ့ၤန့ၣ် ကဘၣ်မၤလိတၢ် အိၣ်ဝဲဒီဒူၣ်.
၃ လၢတၢ်မၤလိအံၤန့ၣ် ပကတဲသကီး တၢ်သံကွၢ်လၢအမ့ၢ် တၢ်သိၣ်လိအတၢ်ရဲၣ်တၢ်ကျဲၤတခါအံၤ ကလဲၤသးဒ်လဲၣ်. ဒီးပှၤမံၤကဘၣ် တၢ်ကွဲးလီၤအီၤလၢ လံာ်တၢ်မူအပူၤ လီၤထူလီၤယိာ်ဧါ, တဘၣ်တၢ်ကွဲးလီၤအီၤဧါန့ၣ် ဘၣ်ထွဲလိာ်သးဒီး တၢ်သိၣ်လိ အတၢ်ရဲၣ်တၢ်ကျဲၤတခါအံၤဒ်လဲၣ်. ဆၢကတီၢ်ခဲအံၤ တၢ်ဂ့ၢ်တဖၣ်အံၤန့ၣ် အရ့ဒိၣ်လၢပဂီၢ်ဒိၣ်မး. ပကထံၣ်ဘၣ်လၢ ဝံအတၢ်စံးပာ်ဖဲ လံာ်ဒၤနံးယ့လး ဒီးလံာ်လီၣ်ဖျါန့ၣ် ကမၤစၢၤပှၤလၢ ပကနၢ်ပၢၢ်အါထီၣ် ဘၣ်ဃးဒီး ဖဲပှၤသံတဖၣ် ဂဲၤဆၢထၢၣ်သမူထီၣ်က့ၤအခါ တၢ်ကမၤအသးဒ်လဲၣ်. ခဲအံၤ ပကတဲသကီး တၢ်မၤအသးလၢ ဒၤနံးယ့လး ၁၂:၁, ၂ တဲဆိပာ်စၢၤဝဲ.
“ပှၤအါဂၤလၢ အမံလၢ ဟီၣ်ခိၣ်လာ်န့ၣ် ကပၢၢ်ထီၣ်”
၄-၅. ဘၣ်ဃးဒီး တၢ်အကတၢၢ် အဆၢကတီၢ်န့ၣ် ဒၤနံးယ့လး ၁၂:၁ ပာ်ဖျါထီၣ်ဝဲဒ်လဲၣ်.
၄ ဖး ဒၤနံးယ့လး ၁၂:၁. လံာ်ဒၤနံးယ့လး ပာ်ဖျါထီၣ်ဝဲ တၢ်ကမၤအသး ဖဲတၢ်အကတၢၢ် အဆၢကတီၢ်. အဒိ ဖဲ ဒၤနံးယ့လး ၁၂:၁ ပာ်ဖျါထီၣ်ဝဲလၢ မံၤက့လးလၢအကဲ ယ့ၣ်ၡူးန့ၣ် “အဆၢထၢၣ်ပာ်စၢၤ လၢ [ကစၢ်ယွၤ] အပှၤကလုာ်အဂီၢ်.” ဖဲ ၁၉၁၄ နံၣ်န့ၣ် ဝံအတၢ်စံးပာ်အံၤ စးထီၣ်လၢထီၣ်ပှဲၤထီၣ်ဝဲ. ဖဲန့ၣ်အခါကစၢ်ယွၤ ပာ်ထီၣ်ယ့ၣ်ၡူးလၢ ဘီမုၢ်အစီၤပၤ.
၅ လံာ်ဒၤနံးယ့လး ပာ်ဖျါထီၣ်ဝဲလၢ ယ့ၣ်ၡူး “ကဆၢထၢၣ်” ဖဲ “တၢ်ကိၢ်တၢ်ဂီၤ အဆၢကတီၢ်.” ဒီးတၢ်ဆၢကတီၢ်တခါအံၤန့ၣ် “စးထီၣ်လၢ ပှၤတကလုာ်ကဲထီၣ်ဝဲ တုၤလီၤလၢ ဆၢကတီၢ်ဖဲန့ၣ်န့ၣ် အတဟဲကဲထီၣ်တ့ၢ်အသး ဒ်န့ၣ် နီတဘျီဒံးဘၣ်.” ဘၣ်ဃးဒီး “တၢ်ကိၢ်တၢ်ဂီၤ အဆၢကတီၢ်” အံၤန့ၣ် မးသဲ ၂၄:၂၁ ကီးဝဲလၢ “တၢ်နးတၢ်ဖှီၣ်ဖးဒိၣ်.” တၢ်ကိၢ်တၢ်ဂီၤ အဆၢကတီၢ်အံၤ အကတၢၢ်န့ၣ် အကဲဝဲ အၢ်မက့းဒိၣ်. အၢ်မက့းဒိၣ်တၢ်ဒုး မ့ၢ်စးထီၣ်န့ၣ် ယ့ၣ်ၡူး ကဆၢထၢၣ်ဝဲ လၢကဒီသဒၢ ကစၢ်ယွၤအပှၤဂီၢ်မုၢ်. ပှၤသ့ၣ်တဖၣ်အံၤ လံာ်လီၣ်ဖျါကီးအဝဲသ့ၣ်လၢ ပှၤဂီၢ်မုၢ်ဖးဒိၣ်လၢ “အလဲၤခီဖျိ တၢ်နးတၢ်ဖှီၣ်ဖးဒိၣ်.”—လီၣ်ဖျါ ၇:၉, ၁၄.
၆. ပှၤဂီၢ်မုၢ်ဖးဒိၣ် လဲၤခီဖျိ တၢ်နးတၢ်ဖှီၣ်ဖးဒိၣ်ဝံၤအလီၢ်ခံ တၢ်မနုၤ ကကဲထီၣ်အသးလဲၣ်. တဲဖျါထီၣ်. (ကွၢ်စ့ၢ်ကီး တၢ်ဂ့ၢ်လၢ “ပှၤဖးလံာ်ဖိတဖၣ် အတၢ်သံကွၢ်” လၢအဘၣ်ဃးဒီး တၢ်ဂဲၤဆၢထၢၣ်သမူထီၣ်က့ၤလၢဟီၣ်ခိၣ်ချၢ.)
၆ ဖး ဒၤနံးယ့လး ၁၂:၂. ဖဲပှၤဂီၢ်မုၢ်ဖးဒိၣ် လဲၤခီဖျိဝဲ တၢ်ကိၢ်တၢ်ဂီၤ အဆၢကတီၢ်ဝံၤအခါ တၢ်ကမၤအသးဒ်လဲၣ်. ဘၣ်ဃးဒီး လံာ်စီဆှံတဆၢအံၤန့ၣ် လၢအပူၤကွံာ် ပနၢ်ပၢၢ်လၢ ဖဲမုၢ်နံၤခံကတၢၢ်တဖၣ် အတီၢ်ပူၤန့ၣ် ပှၤကဂဲၤဆၢထၢၣ်သမူထီၣ်က့ၤ လၢနီၢ်သးတခီ. ဘၣ်ဆၣ် ဝံဒၤနံးယ့လး အတၢ်စံးပာ်တခါအံၤ တအဲၣ်ဒိးတဲဝဲ တၢ်ဂဲၤဆၢထၢၣ်သမူထီၣ်က့ၤ လၢနီၢ်သးတခီဘၣ်. * ဝံအတၢ်စံးပာ်အံၤ အဲၣ်ဒိးတဲဝဲ တၢ်ဂဲၤဆၢထၢၣ်သမူထီၣ်က့ၤ လၢအကကဲထီၣ်အသး လၢဟီၣ်ခိၣ်သီအပူၤ. ဘၣ်မနုၤအဃိ ပတဲဒ်အံၤသ့လဲၣ်. တၢ်ကတိၤလၢအမ့ၢ် “ဟီၣ်ခိၣ်ကမူၣ်” ဖဲယိၤဘး ၁၇:၁၆ တဲဝဲ ဒီးတၢ်ကတိၤလၢအမ့ၢ် “ဟီၣ်ခိၣ်လာ်” ဖဲဒၤနံးယ့လး ၁၂:၂ တဲဝဲန့ၣ် အခီပညီဒ်သိးသိး ဒီးအအဲၣ်ဒိးတဲဝဲ တၢ်သွၣ်ခိၣ်. အဃိ ဒၤနံးယ့လး ၁၂:၂ န့ၣ်အဲၣ်ဒိးတဲဝဲဘၣ်ဃးဒီး တၢ်ဂဲၤဆၢထၢၣ်သမူထီၣ်က့ၤလၢ နီၢ်ခိတခီလၢ အကကဲထီၣ်သး ဖဲမုၢ်နံၤခံကတၢၢ်တဖၣ်အကတၢၢ် ဒီးအၢ်မက့းဒိၣ်ဝံၤအလီၢ်ခံ.
၇. (က) ပှၤတနီၤ ကဂဲၤဆၢထၢၣ်သမူထီၣ်က့ၤ ဒီးကဒိးန့ၢ်ဘၣ် “တၢ်မူအထူအယိာ်” န့ၣ်အဲၣ်ဒိးတဲဝဲ အခီပညီဒ်လဲၣ်. (ခ) ဘၣ်မနုၤအဃိ ပတဲသ့လၢ “တၢ်ဂဲၤဆၢထၢၣ်သမူထီၣ်က့ၤ” တခါအံၤ “ဂ့ၤဒိၣ်” ဝဲလဲၣ်.
၇ ဒၤနံးယ့လး ၁၂:၂ တဲဝဲလၢ ပှၤတနီၤ ကဂဲၤဆၢထၢၣ်သမူထီၣ်က့ၤ ဒီးကဒိးန့ၢ်ဘၣ် “တၢ်မူအထူအယိာ်” န့ၣ်အဲၣ်ဒိးတဲဝဲ အခီပညီဒ်လဲၣ်. အဲၣ်ဒိးတဲဝဲ ဖဲအနံၣ် ၁,၀၀၀ အတီၢ်ပူၤ ပှၤလၢအကဂဲၤဆၢထၢၣ်သမူထီၣ်က့ၤ လၢအကသ့ၣ်ညါထီၣ် ယဟိဝၤယွၤဒီးယ့ၣ်ၡူး ဒီးဆဲးဃုသ့ၣ်ညါ အဝဲသ့ၣ်အဂ့ၢ် ဒီးဒိကနၣ် အဝဲသ့ၣ်အကလုၢ်န့ၣ် ကဒိးန့ၢ်ဘၣ် တၢ်မူအထူအယိာ်. (ယိၤဟၣ် ၁၇:၃) မ့မ့ၢ် ပှၤလၢအဂဲၤဆၢထၢၣ်သမူထီၣ်က့ၤ လၢအပူၤကွံာ်တဖၣ်န့ၣ် အဝဲသ့ၣ် သံကဒါက့ၤဝဲ. အဃိ “တၢ်ဂဲၤဆၢထၢၣ်သမူထီၣ်က့ၤ” လၢကဟဲကဲထီၣ်အသးလၢ ခါဆူညါန့ၣ်က “ဂ့ၤဒိၣ်” န့ၢ်ဒံး တၢ်ဂဲၤဆၢထၢၣ်သမူထီၣ်က့ၤ လၢအပူၤကွံာ်တခါန့ၣ်ဒံး.—ဧ့ၤဘြံၤ ၁၁:၃၅.
၈. ပှၤဂဲၤဆၢထၢၣ်သမူထီၣ်က့ၤတနီၤ “ကဘၣ်တၢ်ဒုၣ်ဒွဲၣ်အီၤ ဒီးကဒိးန့ၢ်ဘၣ် တၢ်မဲာ်ဆှး လီၤထူလီၤယိာ်” န့ၣ်အဲၣ်ဒိးတဲဝဲ အခီပညီဒ်လဲၣ်.
၈ ပှၤလၢအဂဲၤဆၢထၢၣ်သမူထီၣ်က့ၤတဖၣ်န့ၣ် တမ့ၢ်လၢ အဝဲသ့ၣ်ကိးဂၤဒဲးကတူၢ်လိာ် ယဟိဝၤယွၤ အတၢ်သိၣ်လိ အတၢ်ရဲၣ်တၢ်ကျဲၤဘၣ်. ဝံဒၤနံးယ့လး တဲဆိပာ်စၢၤဝဲလၢ ပှၤလၢအကဂဲၤဆၢထၢၣ်သမူထီၣ်က့ၤတနီၤန့ၣ် “ကဘၣ်တၢ်ဒုၣ်ဒွဲၣ်အီၤ ဒီးကဒိးန့ၢ်ဘၣ် တၢ်မဲာ်ဆှး လီၤထူလီၤယိာ်.” မ့ၢ်လၢအဝဲသ့ၣ် တအဲၣ်ဒိး ဒိကနၣ်တၢ်ဘၣ်အဃိ အဝဲသ့ၣ် အမံၤတအိၣ်လၢ လံာ်တၢ်မူအပူၤ ဒီးတဒိးန့ၢ်ဘၣ် တၢ်မူအထူအယိာ်ဘၣ်. အဃိ အဝဲသ့ၣ် ကဒိးန့ၢ်ဘၣ် “တၢ်မဲာ်ဆှး လီၤထူလီၤယိာ်.” အခီပညီန့ၣ် အဝဲသ့ၣ် ကတုၤလၢ တၢ်ဟးဂီၤ လီၤထူလီၤယိာ်. အဃိ ဒၤနံးယ့လး ၁၂:၂ န့ၣ်အဲၣ်ဒိးတဲဝဲ ဘၣ်ဃးဒီး အလီၢ်ခံကတၢၢ်န့ၣ် တၢ်ကကဲထီၣ်သးဒီး ပှၤလၢအဂဲၤဆၢထၢၣ် သမူထီၣ်က့ၤတဖၣ်ဒ်လဲၣ်. ဒီးတၢ်လၢ အကဟဲကဲထီၣ်အသးဒီးအဝဲသ့ၣ်န့ၣ် ဒိးသန့ၤထီၣ်အသးလၢ တၢ်လၢအဝဲသ့ၣ်မၤဝဲ ဖဲအဝဲသ့ၣ် ဂဲၤဆၢထၢၣ်သမူထီၣ်က့ၤ ဝံၤအလီၢ်ခံ. * (လီၣ်ဖျါ ၂၀:၁၂) အဝဲသ့ၣ်တနီၤန့ၣ် ကဒိးန့ၢ်ဘၣ် တၢ်မူအထူအယိာ် ဒီးတနီၤန့ၣ် တဒိးန့ၢ်ဘၣ်ဝဲဘၣ်.
“မၤစၢၤပှၤအါဂၤ ဒ်သိး အကကဲထီၣ် ပှၤတီပှၤလိၤ”
၉-၁၀. တၢ်နးတၢ်ဖှီၣ်ဖးဒိၣ် ဝံၤအလီၢ်ခံ တၢ်မနုၤကကဲထီၣ်အသးလဲၣ်. ဒီးပှၤလၢ “ကကပြုၢ်ကပြီၤထီၣ် ဒ်မူကပိာ်လိၤအသိး” န့ၣ်ကဲမတဂၤသ့ၣ်တဖၣ်လဲၣ်.
၉ ဖး ဒၤနံးယ့လး ၁၂:၃. ဖဲ “တၢ်ကိၢ်တၢ်ဂီၤ အဆၢကတီၢ်” ဝံၤအလီၢ်ခံ တၢ်မနုၤ ကကဲထီၣ်အသးလဲၣ်. ဖဲတၢ်နးတၢ်ဖှီၣ်ဖးဒိၣ် ဝံၤအလီၢ်ခံ တၢ်ကကဲထီၣ်အသးဒ်လဲၣ်န့ၣ် ဒၤနံးယ့လး ၁၂:၂, ၃ ပာ်ဖျါထီၣ်န့ၢ်ပှၤ.
၁၀ ပှၤလၢ “ကကပြုၢ်ကပြီၤထီၣ် ဒ်မူကပိာ်လိၤအသိး” န့ၣ်အဲၣ်ဒိးတဲဝဲ မတဂၤသ့ၣ်တဖၣ်လဲၣ်. ယ့ၣ်ၡူးအတၢ်ကတိၤဖဲ မးသဲ ၁၃:၄၃ န့ၣ်မၤစၢၤပှၤ ဒ်သိးဒီး ပကနၢ်ပၢၢ်ထီၣ် တၢ်စံးဆၢအဂီၢ်. ဖဲန့ၣ် ယ့ၣ်ၡူးတဲဝဲလၢ “ဖဲန့ၣ်အခါ ပှၤတီပှၤလိၤတဖၣ် ကကပီၤထီၣ် ကပြုၢ်ကပြီၤဒ်မုၢ်အသိး လၢအဝဲသ့ၣ် အပၢ်အဘီမုၢ်အပူၤ.” ဖဲအံၤန့ၣ် ယ့ၣ်ၡူးအဲၣ်ဒိးတဲဝဲ ဘၣ်ဃးဒီး “ဘီမုၢ်အဖိခွါတဖၣ်” လၢအကဲဝဲ ပှၤဘၣ်တၢ်ဒိးဖှူအီၤ လၢအကပၢတၢ်ဒီးအီၤ လၢမူခိၣ်. (မးသဲ ၁၃:၃၈) အဃိ ဒၤနံးယ့လး ၁၂:၃ အဲၣ်ဒိးတဲဝဲ ဘၣ်ဃးဒီး ပှၤဘၣ်တၢ်ဒိးဖှူအီၤတဖၣ် ဒီးတၢ်လၢအဝဲသ့ၣ် ကမၤဝဲဖဲ အနံၣ်တကထိ အတီၢ်ပူၤ.
ပှၤ ၁၄၄,၀၀၀ ဒီးယ့ၣ်ၡူးခရံာ် ကဟံးစုနဲၣ်ကျဲဝဲ တၢ်သိၣ်လိ အတၢ်ရဲၣ်တၢ်ကျဲၤ လၢအနံၣ် ၁,၀၀၀ အတီၢ်ပူၤ (ကွၢ်လံာ်အဆၢ ၁၁)
၁၁-၁၂. ဖဲအနံၣ် ၁,၀၀၀ အတီၢ်ပူၤန့ၣ် ပှၤ ၁၄၄,၀၀၀ ကမၤတၢ်မနုၤလဲၣ်.
၁၁ ပှၤလၢအဘၣ်တၢ်ဒိးဖှူအီၤတဖၣ်န့ၣ် ကမၤစၢၤ “ပှၤအါဂၤ ဒ်သိး အကကဲထီၣ် ပှၤတီပှၤလိၤအဂီၢ်” ဒ်လဲၣ်. ယ့ၣ်ၡူး ကဟံးစုနဲၣ်ကျဲဝဲ တၢ်သိၣ်လိ အတၢ်ရဲၣ်တၢ်ကျဲၤ လၢအနံၣ် ၁,၀၀၀ အတီၢ်ပူၤ ဒီးပှၤလၢအဘၣ်တၢ်ဒိးဖှူအီၤတဖၣ်အံၤ ကမၤသကီးတၢ်ဒီးယ့ၣ်ၡူး. ဒီးပှၤ ၁၄၄,၀၀၀ အံၤန့ၣ် ကပၢတၢ်ဒ်စီၤပၤတဖၣ်အသိး တကးဒံးဘၣ် ကကဲဝဲ ပှၤလုၢ်တၢ်ဒိၣ်တဖၣ်စ့ၢ်ကီး. (လီၣ်ဖျါ ၁:၆; ၅:၁၀; ၂၀:၆) အဃိ အဝဲသ့ၣ် “ကမၤဘျါက့ၤ ပှၤကလုာ်တဖၣ်.” ခီဖျိလၢ အဝဲသ့ၣ် အတၢ်မၤစၢၤဒ်အံၤအဃိ ကယီကယီန့ၣ် ပှၤဟီၣ်ခိၣ်ဖိတဖၣ် ကကဲထီၣ် ပှၤလၢပှၤပှဲၤ. (လီၣ်ဖျါ ၂၂:၁, ၂; ယဃ့းစက့လး ၄၇:၁၂) အဃိ လၢပှၤဒိးဖှူသးတဖၣ်အဂီၢ်န့ၣ် ကမ့ၢ်တၢ်လၢ အလီၤသးခုဒိၣ်မး.
၁၂ ပှၤဘၣ်တၢ်ဒိးဖှူအီၤတဖၣ်ကမၤစၢၤ “ပှၤအါဂၤ” ဒ်သိး အဝဲသ့ၣ်ကကဲထီၣ် ပှၤတီပှၤလိၤ. ပှၤတဖၣ်အံၤ ကကဲမတဂၤသ့ၣ်တဖၣ်လဲၣ်. အဝဲသ့ၣ်န့ၣ်ကကဲ ပှၤလၢအကဂဲၤဆၢထၢၣ်သမူထီၣ်က့ၤ, ပှၤလၢအပူၤဖျဲးထီၣ်လၢ အၢ်မက့းဒိၣ် ဒီးပှၤလၢအကအိၣ်ဖျဲၣ်ထီၣ်လၢ ဟီၣ်ခိၣ်သီအပူၤ. ဒီးဖဲအနံၣ် ၁,၀၀၀ ဝံၤအခါ ပှၤဟီၣ်ခိၣ်ဖိတဖၣ် ကကဲထီၣ် ပှၤလၢပှၤပှဲၤ. ဘၣ်ဆၣ်အဝဲသ့ၣ်အမံၤ ကဘၣ်တၢ်ကွဲးနီၣ်အီၤလၢ လံာ်တၢ်မူအပူၤ လီၤထူလီၤယိာ် လၢကသံၣ်ထံန့ၣ် ကဘၣ်လၢ အခါဖဲလဲၣ်.
တၢ်မၤကွၢ် လၢအလီၢ်ခံကတၢၢ်တခါ
၁၃-၁၄. ဒ်သိး ပှၤဟီၣ်ခိၣ်ဖိလၢ အကဲပှၤလၢပှၤပှဲၤတဖၣ် ကဒိးန့ၢ်ဘၣ် တၢ်မူအထူအယိာ်အဂီၢ် အဝဲသ့ၣ် ကဘၣ်မၤဝဲ တၢ်မနုၤလဲၣ်.
၁၃ ပကဲထီၣ် ပှၤလၢပှၤပှဲၤလံအဃိ ပကဒိးန့ၢ်ဘၣ် တၢ်မူအထူအယိာ်ဒု တမ့ၢ်ဘၣ်. ပမ့ၢ်ကွၢ် နီၢ်အံၣ်အု ဒီးစီၤအၤဒၣ်န့ၣ် အကဲပှၤလၢပှၤပှဲၤ. ဘၣ်ဆၣ် ဒ်သိးအဝဲသ့ၣ် ကဒိးန့ၢ်ဘၣ် တၢ်မူအထူအယိာ်အဂီၢ် အဝဲသ့ၣ် ကဘၣ်ဒိကနၣ် ယဟိဝၤယွၤ အကလုၢ်. အဝဲသ့ၣ် တဒိကနၣ် ယဟိဝၤယွၤ အကလုၢ်ဘၣ်အဃိ အဝဲသ့ၣ် တအိၣ်မူဘၣ် လီၤထူလီၤယိာ်ဘၣ်.—ရိမ့ၤ ၅:၁၂.
၁၄ ဖဲအနံၣ် ၁,၀၀၀ အကတၢၢ်န့ၣ် ပှၤဟီၣ်ခိၣ်ဖိတဖၣ် ကကဲထီၣ် ပှၤလၢပှၤပှဲၤခဲလၢာ်. အဃိ မ့ၢ်အဝဲသ့ၣ် ကဆီၣ်ထွဲဝဲ ယဟိဝၤယွၤ အတၢ်ပၢ လီၤထူလီၤယိာ်ဧါ, မ့တမ့ၢ် ပှၤတနီၤန့ၣ် ကလီၤဂာ်ဒ် နီၢ်အံၣ်အု ဒီးစီၤအၤဒၣ်လၢ အတအိၣ်ဒီး တၢ်သးတီဘၣ်န့ၣ်ဧါ. အရ့ဒိၣ်လၢ ပကဘၣ်သ့ၣ်ညါ တၢ်သံကွၢ်တဖၣ်အံၤ အတၢ်စံးဆၢ. ဘၣ်ဆၣ် ပသ့ၣ်ညါကသ့ဒ်လဲၣ်.
၁၅-၁၆. (က) ပှၤဟီၣ်ခိၣ်ဖိတဖၣ် ကအိၣ်ဒီး တၢ်ခွဲးတၢ်ယာ် လၢကပာ်ဖျါထီၣ်ဝဲလၢ အသးတီဒီး ယဟိဝၤယွၤန့ၣ် လၢအခါဖဲလဲၣ်. (ခ) ခီဖျိလၢ တၢ်မၤကွၢ် အလီၢ်ခံကတၢၢ်အဃိ တၢ်ကမၤအသးဒ်လဲၣ်.
၁၅ မုၣ်ကီၤလံၢ် ကဘၣ်အိၣ်လၢဃိာ်ပူၤ အနံၣ် ၁,၀၀၀. ဖဲန့ၣ်အဆၢကတီၢ် အလ့ပစီပှၤဟီၣ်ခိၣ်ဖိ တန့ၢ်နီတဂၤဘၣ်. ဘၣ်ဆၣ် ဖဲအနံၣ် ၁,၀၀၀ ဝံၤအလီၢ်ခံ မုၣ်ကီၤလံၢ် ကဟးထီၣ်ဘၣ်လၢ ဃိာ်ပူၤ အဃိ အဝဲကဂုာ်ကျဲးစၢး လ့ပစီဝဲ ပှၤဟီၣ်ခိၣ်ဖိလၢ အကဲပှၤလၢပှၤပှဲၤတဖၣ်. ဖဲန့ၣ်အဆၢကတီၢ် ပှၤဟီၣ်ခိၣ်ဖိတဖၣ် ကအိၣ်ဒီးတၢ်ခွဲးတၢ်ယာ်လၢ ကပာ်ဖျါထီၣ်လၢ အပာ်ကဲ ယဟိဝၤယွၤအမံၤ ဒီးအဆီၣ်ထွဲ ယဟိဝၤယွၤ အတၢ်ပၢ. (လီၣ်ဖျါ ၂၀:၇-၁၀) ပှၤတဂၤဘၣ်တဂၤ အမံၤကအိၣ်လၢ လံာ်တၢ်မူအပူၤ လီၤထူလီၤယိာ်အဂီၢ်န့ၣ် ကဒိးသန့ၤထီၣ်အသး လၢတၢ်လၢအဝဲသ့ၣ်မၤဝဲ ဖဲမုၣ်ကီၤလံၢ် လ့ပစီ အဝဲသ့ၣ် အဆၢကတီၢ်.
၁၆ ပှၤတနီၤန့ၣ် ကလီၤဂာ်ဒီး နီၢ်အံၣ်အုဒီးစီၤအၤဒၣ် လၢအတအဲၣ်ဒိး တူၢ်လိာ် ယဟိဝၤယွၤ အတၢ်ပၢဘၣ်. အဃိ တၢ်ကကဲထီၣ်အသးဒီးအဝဲသ့ၣ် ဒ်လဲၣ်. လီၣ်ဖျါ ၂၀:၁၅ တဲဝဲလၢ “ပှၤလၢ အမံၤတအိၣ်လၢ လံာ်မူအပူၤဘၣ်န့ၣ် တၢ်ကွံာ်လီၤအဝဲသ့ၣ်လၢ နိၣ်မ့ၣ်အူအပူၤ.” အဃိ ပှၤလၢအထီဒါတၢ်တဖၣ်န့ၣ် ကဘၣ်တၢ်မၤဟးဂီၤကွံာ် အဝဲသ့ၣ် လီၤထူလီၤယိာ်. ဘၣ်ဆၣ် ပှၤအါတက့ၢ်န့ၣ် ကလဲၤခီဖျိဝဲ တၢ်မၤကွၢ်လၢ အလီၢ်ခံကတၢၢ်တခါ. ဒီးဖဲန့ၣ် အဝဲသ့ၣ်အမံၤ ကအိၣ်လၢ လံာ်တၢ်မူအပူၤ လီၤထူလီၤယိာ်.
“တၢ်အကတၢၢ် အဆၢကတီၢ်”
၁၇. ဘၣ်ဃးဒီး တၢ်ကမၤအသးလၢ ဆၢကတီၢ်ခဲအံၤန့ၣ် မူခိၣ်ကလူးတဂၤ တဲဘၣ်စီၤဒၤနံးယ့လးဒ်လဲၣ်. (ဒၤနံးယ့လး ၁၂:၄, ၈-၁၀)
၁၇ ပမ့ၢ်ဆိကမိၣ်ထီၣ် ဘၣ်ဃးဒီး တၢ်ကမၤအသးလၢ ခါဆူညါတဖၣ်န့ၣ်ပသးခုဒိၣ်မး. မူခိၣ်ကလူးတဂၤ တဲဘၣ်စီၤဒၤနံးယ့လးလၢ တၢ်ကမၤအသးလၢ “တၢ်အကတၢၢ် အဆၢကတီၢ်” လၢအမ့ၢ် ဆၢကတီၢ်ခဲအံၤ. (ဖး ဒၤနံးယ့လး ၁၂:၄, ၈-၁၀; ၂ တံၤမသ့း ၃:၁-၅) မူခိၣ်ကလူးတဲဘၣ်စီၤဒၤနံးယ့လးလၢ ဖဲတၢ်အကတၢၢ် အဆၢကတီၢ်န့ၣ် “တၢ်သ့ၣ်ညါတၢ်မ့ၢ်တၢ်တီန့ၣ် ကအါထီၣ်ဝဲ.” အဃိ ကစၢ်ယွၤ အပှၤဂီၢ်မုၢ်တဖၣ် ကနၢ်ပၢၢ်အါထီၣ် ဝံအတၢ်စံးပာ်လၢ လံာ်ဒၤနံးယ့လးအပူၤ. တကးဒံးဘၣ် မူခိၣ်ကလူး တဲစ့ၢ်ကီးလၢ ဖဲတၢ်အကတၢၢ် အဆၢကတီၢ်န့ၣ် “ပှၤအၢပှၤသီန့ၣ် ကမၤတၢ် အၢအၢသီသီ ဒီးပှၤအၢပှၤသီ တနၢ်ပၢၢ်ထီၣ်တၢ် နီတဂၤဘၣ်.”
၁၈. တယံာ်လၢၤဘၣ်န့ၣ် တၢ်ကကဲထီၣ်အသးဒီး ပှၤအၢပှၤသီတဖၣ်ဒ်လဲၣ်.
၁၈ ဆၢကတီၢ်ခဲအံၤန့ၣ် လီၤဂာ်လၢ ပှၤအၢပှၤသီတဖၣ်န့ၣ် တထံၣ်ဘၣ်တၢ်ကီတၢ်ခဲ ခီဖျိ တၢ်လၢအမၤဝဲတဖၣ်အဃိဘၣ်. (မၤလကံ ၃:၁၄, ၁၅) ဘၣ်ဆၣ် တယံာ်လၢၤဘၣ်န့ၣ် ယ့ၣ်ၡူးကစံၣ်ညီၣ်ဝဲ ပှၤအၢပှၤသီလၢ အလီၤဂာ်ဒီး မဲာ်တဲးလဲး ဒီးကပာ်လီၤဆီဝဲ ပှၤလၢအလီၤဂာ်ဒီးသိတဖၣ်. (မးသဲ ၂၅:၃၁-၃၃) ပှၤအၢပှၤသီတဖၣ်န့ၣ် တပူၤဖျဲးထီၣ်လၢ တၢ်နးတၢ်ဖှီၣ်ဖးဒိၣ်ဘၣ်. ဒီးအဝဲသ့ၣ် တဂဲၤဆၢထၢၣ်သမူထီၣ်က့ၤလၢ ဟီၣ်ခိၣ်သီအပူၤဘၣ်. ဒီးအဝဲသ့ၣ် အမံၤန့ၣ် တအိၣ်လၢ “လံာ်တၢ်သ့ၣ်နီၣ်ထီၣ်က့ၤ” အပူၤဘၣ်.—မၤလကံ ၃:၁၆.
၁၉. ဆၢကတီၢ်ခဲအံၤ ပကဘၣ်မၤဒ်လဲၣ် ဒီးဘၣ်မနုၤအဃိလဲၣ်. (မၤလကံ ၃:၁၆-၁၈)
၁၉ ဆၢကတီၢ်ခဲအံၤန့ၣ် မ့ၢ်ဝဲ တၢ်ဆၢကတီၢ်လၢ ပကဘၣ်ပာ်ဖျါထီၣ်လၢပတပၣ်ဃုာ်လၢ ပှၤအၢပှၤသီတဖၣ် အကျါဘၣ်. (ဖး မၤလကံ ၃:၁၆-၁၈.) ပှၤလၢယဟိဝၤယွၤ ထံၣ်အီၤဒ် “ပှၤလုၢ်ဒိၣ်ပှ့ၤဒိၣ်” တဖၣ်န့ၣ် ခဲအံၤယဟိဝၤယွၤ ပာ်ဖှိၣ်ထီၣ်အဝဲသ့ၣ်. ဒီးပအဲၣ်ဒိး ပၣ်ဃုာ်လၢ ပှၤလုၢ်ဒိၣ်ပှ့ၤဒိၣ်တဖၣ်အံၤအကျါ.
ဖဲပထံၣ်ဘၣ် ဒၤနံးယ့လး, ပှၤလၢပအဲၣ်ဘၣ်အီၤတဖၣ် ဒီးပှၤအါဂၤ “ဂဲၤဆၢထၢၣ်” က့ၤလၢဟီၣ်ခိၣ်အခါ ပကသးခုဒိၣ်မး (ကွၢ်လံာ်အဆၢ ၂၀)
၂၀. ယဟိဝၤယွၤ အၢၣ်လီၤစီၤဒၤနံးယ့လး ဒ်လဲၣ် ဒီးဘၣ်မနုၤအဃိ နခိးကွၢ်လၢ်လၢ တၢ်အၢၣ်လီၤအီလီၤတခါန့ၣ် ကဟဲလၢထီၣ်ပှဲၤထီၣ်လဲၣ်.
၂၀ ပအိၣ်မူဘၣ် တၢ်ဆၢကတီၢ်လၢ အလီၤသးခုဒိၣ်မး. တၢ်မၤအသးလၢ အလီၤဆီတဖၣ် ကဟဲကဲထီၣ်အသးဘူးထီၣ်လံ. တယံာ်လၢၤဘၣ်န့ၣ် ပကထံၣ်ဘၣ် ပှၤအၢပှၤသီခဲလၢာ် ကဘၣ်တၢ်မၤဟးဂီၤကွံာ် အဝဲသ့ၣ်. ဒီးပကထံၣ်ဘၣ်လၢ ယဟိဝၤယွၤ အတၢ်အၢၣ်လီၤ ဟဲလၢထီၣ်ပှဲၤထီၣ်ဝဲ. ယဟိဝၤယွၤ အၢၣ်လီၤဝဲ ဝံဒၤနံးယ့လးလၢ “ဖဲမုၢ်နံၤတဖၣ် အကတၢၢ်န့ၣ် နကဂဲၤဆၢထၢၣ် ဒ်သိး နကန့ၢ်ဘၣ် တၢ်န့ၢ်သါ အဂီၢ်.” (ဒၤနံးယ့လး ၁၂:၁၃) နအဲၣ်ဒိးထံၣ်ဘၣ် ဝံဒၤနံးယ့လး ဒီးပှၤလၢနအဲၣ်ဘၣ်အီၤတဖၣ် “ဂဲၤဆၢထၢၣ်” က့ၤဧါ. နမ့ၢ်အဲၣ်ဒိးထံၣ်ဘၣ် အဝဲသ့ၣ်န့ၣ် နကဘၣ်အိၣ်ဒီး တၢ်သးတီ တုၤလၢအကတၢၢ်. ဒီးနမ့ၢ်အိၣ်ဒီး တၢ်သးတီ တုၤလၢအကတၢၢ်န့ၣ် နနာ်သ့သပှၢ်ကတၢၢ်လၢ နမံၤကအိၣ်လၢ ယဟိဝၤယွၤ အလံာ်တၢ်မူပူၤ.
တၢ်သးဝံၣ် ၈၀ “လ့ၣ်ကွၢ် ဒီးထံၣ်လၢ ယဟိဝၤယွၤ မ့ၢ်တၢ်ဂ့ၤ”
^ လၢတၢ်မၤလိအံၤအပူၤ ပကတဲသကီး တၢ်နၢ်ပၢၢ်အသီလၢ ဘၣ်ဃးဒီး တၢ်သိၣ်လိအတၢ်ရဲၣ်တၢ်ကျဲၤလၢ အအိၣ်လၢ ဒၤနံးယ့လး ၁၂:၂, ၃. ပကကွၢ်သကီး တၢ်သိၣ်လိ အတၢ်ရဲၣ်တၢ်ကျဲၤတခါအံၤ ကစးထီၣ်အသးလၢ အခါဖဲလဲၣ် ဒီးမတဂၤသ့ၣ်တဖၣ် ကပၣ်ဃုာ်လဲၣ်. ဒီးတၢ်သိၣ်လိအတၢ်ရဲၣ်တၢ်ကျဲၤတခါအံၤ ကမၤစၢၤပှၤဟီၣ်ခိၣ်ဖိတဖၣ် ဒ်သိး အဝဲသ့ၣ်လဲၤခီဖျိဝဲ တၢ်မၤကွၢ် အလီၢ်ခံကတၢၢ်တခါ ကန့ၢ်ဝဲအဂီၢ်. ဒီးတၢ်မၤကွၢ်အံၤန့ၣ် ကကဲထီၣ်အသး ဖဲခရံာ်ပၢတၢ် အနံၣ်တကထိ မ့ၢ်ဝံၤအခါ.
^ ဘၣ်သ့ၣ်သ့ၣ် ပှၤလၢအကဂဲၤဆၢထၢၣ် သမူထီၣ်က့ၤ အဆိကတၢၢ်န့ၣ် ကမ့ၢ်ဝဲ ပှၤသးတီလၢအသံဖဲ မုၢ်နံၤခံကတၢၢ် အဆၢကတီၢ်. ဝံၤဘျီ ပှၤလၢခံသ့ၣ်တဖၣ် ကဂဲၤဆၢထၢၣ်ကဒါက့ၤ တစိၤဘၣ်တစိၤ. တၢ်ရဲၣ်တၢ်ကျဲၤ မ့ၢ်လဲၤသးဒ်အံၤန့ၣ် ပှၤလၢအဂဲၤဆၢထၢၣ်ဆိတဖၣ် ကအိၣ်ဒီး တၢ်ခွဲးတၢ်ယာ်လၢ ကတူၢ်လိာ်မုာ်ဝဲ ပှၤလၢအကဂဲၤဆၢထၢၣ်သမူထီၣ်က့ၤ လၢအဝဲသ့ၣ်အလီၢ်ခံတဖၣ်. ဒ်လဲၣ်ဂ့ၤဒ်လဲၣ်ဂ့ၤ ဘၣ်ဃးဒီး ပှၤကဂဲၤဆၢထၢၣ်သမူထီၣ်က့ၤ လၢမူခိၣ်န့ၣ် လံာ်စီဆှံတဲဝဲလၢ အဝဲသ့ၣ် ကဂဲၤဆၢထၢၣ်သမူထီၣ်က့ၤ “ဒ်တၢ်ရဲၣ်တၢ်ကျဲၤ” အိၣ်ဝဲအသိး. အဃိ ပနာ်သ့လၢ ပှၤလၢအဂဲၤဆၢထၢၣ်သမူထီၣ်က့ၤလၢ ဟီၣ်ခိၣ်စ့ၢ်ကီး ကဂဲၤဆၢထၢၣ်သမူထီၣ်က့ၤ ဒ်တၢ်ရဲၣ်တၢ်ကျဲၤ အိၣ်ဝဲအသိး.—၁ ကရံၣ်သူး ၁၄:၃၃; ၁၅:၂၃.
^ ပဘှီဘၣ်ထီၣ်က့ၤ ပတၢ်နၢ်ပၢၢ်လၢအပူၤကွံာ် လၢအအိၣ်ဖဲလံာ် Pay Attention to Daniel’s Prophecy! Chapter 17, and in The Watchtower of July 1, 1987, pp. 21-25.
^ “ပှၤတီပှၤလိၤ” ဒီး “ပှၤတတီတလိၤ” လၢမၤတၢ် ၂၄:၁၅ ပာ်ဖျါထီၣ်ဝဲ ဒီး “ပှၤလၢ အမၤတၢ်ဂ့ၤတဖၣ်” ဒီး “ပှၤလၢ အမၤတၢ်အၢတဖၣ်” လၢယိၤဟၣ် ၅:၂၉ ပာ်ဖျါထီၣ်ဝဲန့ၣ် အဲၣ်ဒိးတဲ ဘၣ်ဃးဒီးတၢ်လၢ ပှၤလၢအကဂဲၤဆၢထၢၣ် သမူထီၣ်က့ၤတဖၣ်မၤဝဲ တချုးလၢအဝဲသ့ၣ် သံဒံးဘၣ်အခါ.
