1. Yinki mambu ya kitoko kena kuvingila beto na ntangu ya Luyalu ya bamvula 1000?

 YAKEVUANDA kilumbu mosi ya kitoko ntangu mfutumukunu kebanda awa na ntoto na ntangu ya Luyalu ya bamvula 1000 ya Klisto! Bantu nionso yina mezimbisaka bantu yina bavuandaka zola kele na nsatu ya kumona bau diaka. Yehova diaka kekukimonaka mutindu yina. (Yobi 14:15) Muntu nionso kevuanda na kiese awa na ntoto ntangu yandi kemona muntu yina yandi kezolaka mefutumuka. Mutindu beto monaka yau na disolo lutaka, “bantu ya lunungu,” yina bankumbu na bau kele ya kusonama na mukanda ya luzingu, bakebaka ‘mfutumukunu ya luzingu.’ (Bis. 24:15; Yoa. 5:29) Mbala yankaka bantu mingi yina beto vuandaka zola kevuanda na kati ya bantu yina kefutumuka kaka na ebandeli ya mfutumukunu na ntoto. * Katula yau, bantu ya ‘kukondua lunungu’ na kifuani bayina vuandaka ve na diluaku ya kuzaba Yehova to kusadila yandi na kukuikama, bakevutuka na luzingu samu na ‘mfutumukunu ya kusambisa.’

2-3. (a) Na kutadila Yezaya 11:9, 10, yinki kevuanda programe ya nene ya malongi yina salama ntete ve na disolo ya bantu? (b) Yinki beto ketadila na disolo yayi?

² Bantu nionso yina kefutumuka kevuanda na nsatu ya kubaka malongi. (Yez. 26:9; 61:11) Na yau, programe ya nene ya malongi yina salama ntete ve na disolo ya bantu kepesama. (Tanga  Yezaya 11:9, 10.) Samu na yinki? Samu na mfunu kaka mosi, bantu ya kukondua lunungu yina kefutumuka kevuanda na nsatu ya kulonguka mambu metadila Yesu Klisto, Kimfumu ya Nzambi, nkudulu, mpe mfunu ya nkumbu ya Yehova mpe mfunu yina kena kumonisa ti yandi kaka kele na yinsua ya kuyala. Ata bantu ya lunungu kevuanda na nsatu ya kulonguka diaka mambu yina Yehova monisaka malembemalembe samu na lukanu na yandi awa na ntoto. Ndambu na kati ya bantu yango ya kukuikama kufuaka ntama tekila Mpova ya Yehova manisa kusonama na mvimba na yau. Bantu ya kukondua lunungu mpe bantu ya lunungu kevuanda na mambu mingi ya kulonguka.

³ Na disolo yayi, beto ketadila biuvu yayi melanda: Yinki mutindu kisalu yango ya nene ya kulonga kesalama? Yinki bupusi programe yango kevuanda na yau samu nkumbu ya muntu sonama mvimbamvimba to ve na mukanda ya luzingu? Bamvutu na biuvu yango fueti vuanda na mfunu samu na beto bubu yayi. Mutindu beto kemona yau, bambikudulu yankaka ya kitoko yina kele na mukanda ya Daniele mpe Kusonga kebongisa diaka mbakusulu na beto samu na mambu yina kesalama ntangu bantu ya kufua kefutumuka. Ya ntete, beto tadila mambu ya kitoko yina samunuaka na mbikudulu ya Daniele 12:1, 2.

4-5. Yinki Daniele 12:1 metuba samu na ntangu ya nsuka?

⁴ Tanga Daniele 12:1. Mukanda ya Daniele kena kumonisa mutindu mambu ya kitoko kesalama na mulongo na ntangu ya nsuka. Na kifuani, Daniele 12:1 memonisa ti Mikaele, yina kele Yesu Klisto, kele ya ‘kutelema samu na mambote ya bantu ya [Nzambi]’ kitini ya mbikudulu yango bandaka kukokisama na mvula 1914 ntangu Yesu ponamaka lokola Ntinu ya Kimfumu ya Nzambi.

⁵ Kasi, Daniele tubaka diaka ti Yesu ‘ketelema’ na kilokola yina ‘ntangu mosi ya mpasi kevuanda na mutindu yina mesalamaka ntete ve kubanda dikanda mosi mebimaka tii na ntangu yina.’ ‘Ntangu mosi ya mpasi’ kele ‘mpasi ya nene’ yina Matayo 24:21 metubila. Yesu ketelema, to yandi kesala diambu samu na kukotila bisadi ya Nzambi, na nsuka ya ntangu yango ya mpasi, yina kele, Armagedoni. Mukanda ya Kusonga kena kutubila bantu yango lokola ‘kimvuka ya nene ya bantu yina mekatuka na mpasi ya nene.’—Kus. 7:9, 14.

6. Yinki kesalama na manima ya kuvuka ya kimvuka ya nene ya bantu na mpasi ya nene? Sasila. (Tala diaka na nimero yayi “Biuvu ya Bantangi” yina kena kutubila mfutumukunu ya luzingu na ntoto.)

⁶ Tanga Daniele 12:2. Yinki kesalama na manima ya kuvuka ya kimvuka ya nene ya bantu na ntangu yango ya mpasi? Mbikudulu yango kena kutubila ve mfutumukunu ya kifuani, kulamuka ya kimpeve ya bisadi ya Nzambi yina kena kusalama na bilumbu ya nsuka, mutindu beto zabilaka yau ntete. * Kasi, bampova yango kena kutubila mfutumukunu ya bantu ya kufua yina kesalama na yinza ya yimpa yina kena kuiza. Samu na yinki beto metuba mutindu yina? Mpova ‘fundufundu’ mesadulua diaka na Yobi 17:16 yina zola sasila diaka ‘Diziami.’ Diambu kena kumonisa ti Daniele 12:2 kena kutubila mfutumukunu ya kedika yina kesalama ntangu bilumbu ya nsuka kemanisa mpe na manima ya mvita ya Armagedoni.

7. (a) Na yinki mutindu bantu yankaka kefutumuka samu na ‘luzingu ya mvula na mvula’? (b) Na yinki mutindu yakele ‘mfutumukunu yina meluta mbote’?

⁷ Kasi yinki Daniele 12:2 zola monisa, ntangu yametuba ti bantu yankaka kefutumuka samu  na ‘luzingu ya mvula na mvula’? Yazola monisa ti na bantu yina kefutumuka mpe kezaba, to ketatamana kuzaba, mpe kuzitisa Yehova mpe Yesu na Luyalu ya bamvula 1000 sukansuka bakebaka luzingu ya mvula na mvula. (Yoa. 17:3) Yakevuanda ‘mfutumukunu yina meluta mbote’ kuluta mfutumukunu yina salamaka na ntangu ya ntama yina vutulaka bantu na luzingu. (Ebr. 11:35) Samu na yinki? Samu bantu yango ya kuzanga kukoka kufuaka diaka.

8. Yinki mutindu bantu yankaka kefutumuka ‘samu na nsoni mpe mvuezolo ya mvula na mvula’?

⁸ Kasi bantu nionso ve yina kefutumuka kendima programe ya malongi ya Yehova. Mbikudulu ya Daniele metuba ti bantu yankaka kefutumuka ‘samu na nsoni mpe samu na mvuezolo ya mvula na mvula.’ Lokola bakemonisa mpeve ya butomboki, bankumbu na bau kesonama ve na mukanda ya luzingu mpe bakebaka ve luzingu ya mvula na mvula. Kasi, bakebaka ‘mvuezolo ya mvula na mvula’ to lufua. Na yau Daniele 12:2 kena kutubila mambu yina nsukansuka kesalama samu na bantu yina kefutumuka na kutadila mambu yina bakesala na manima ya mfutumukunu na bau. * (Kus. 20:12) Bantu yankaka kebaka luzingu ya mvula na mvula; kasi bayankaka kebaka yau ve.

9-10. Yinki diambu yankaka kesalama na manima ya mpasi ya nene, mpe banani ‘kelezima ngolo lokola kitandu ya dizulu’?

⁹ Tanga Daniele 12:3. Yinki mambu diaka kesalama na manima ya “ntangu mosi ya mpasi”? Katula Daniele 12:2, verse 3 kena kutubila diambu yina kesalama na manima ya mpasi ya nene.

¹⁰ Banani ‘kelezima ngolo lokola kitandu ya dizulu’? Matayo 13:43 kena kusadisa beto beto zaba kana bantu yango kele banani ntangu yametuba: ‘Na ntangu yango, bantu ya lunungu kelezima ngolo mpenza lokola ntangu na Kimfumu ya Tata na bau.’ Na baverse yina kele na ebandeli ya bampova yango, Yesu vuandaka tubila “bana ya Kimfumu,” yina metulua mafuta na kimpeve, yina kesala kintuadi na yandi na Kimfumu ya dizulu. (Mat. 13:38) Na yau, Daniele 12:3 fueti tubila bantu yina metulua mafuta na kimpeve mpe kisalu yina bakesala na Luyalu ya bamvula 1000.

11-12. Yinki kisalu bantu 144000 kesala na ntangu ya Luyalu ya bamvula 1000?

¹¹ Na yinki mutindu bantu yina metulua mafuta na kimpeve kenata ‘bantu mingi na lunungu’? Bantu yina metulua mafuta na kimpeve kesala kintuadi na Yesu samu na kutuadisa programe ya malongi yina kesalama na ntoto na ntangu ya Luyalu ya bamvula 1000. Bantu 144000 keyala kaka ve lokola bantinu kasi bakesala diaka lokola banganga-nzambi. (Kus. 1:6; 5:10; 20:6) Na yau, bakepesa maboko samu na ‘kubelusa makanda’—mpe bakesadisa samu bantu kuma diaka bantu ya kukoka malembemalembe. (Kus. 22:1, 2; Eze. 47:12) Yakevuanda diambu ya kiese samu na bantu yina metulua mafuta na kimpeve!

¹² Banani kevuanda na kati ya “bantu mingi” yina bantu yina metulua mafuta na kimpeve kenata na lunungu? Yakesangisa bantu yina kefutumuka, buela diaka bantu yina kevuka na Armagedoni kintuadi na konso muana yina kebutuka na yinza ya yimpa. Na nsuka ya luyalu ya bamvula 1000, bantu nionso yina kezinga na ntoto kekuma bantu ya kukoka. Na yau, na yinki ntangu bankumbu na bau kesonama samu na mvimbamvimba na mukanda ya luzingu na biki kasi na kreyon ve?

13-14. Bantu nionso ya kukoka yina kevuanda na ntoto fueti monisa yinki tekila babaka luzingu ya mvula na mvula?

¹³ Beto fueti zimbakana ve ti kuvuanda muntu ya kukoka zola monisa ve ti muntu kebaka mbala mosi luzingu ya mvula na mvula. Kanisa na Adamu mpe Eva. Bavuandaka bantu ya kukoka, kasi yalombaka bamonisa luzitu na Yehova Nzambi tekila bavuanda na luzingu ya mvula na mvula. Mpe diambu ya kiadi, banungaka ve kuzitisa yandi.—Bar. 5:12.

¹⁴ Mambu kevuanda yinki mutindu samu na bantu yina kevuanda na ntoto na nsuka ya Luyalu ya bamvula 1000? Bantu nionso kekuma bantu ya kukoka. Bantu yango nionso ya kukoka kepesa mpenza maboko na luyalu ya Yehova samu na mvula na mvula? To bayankaka kemonisa nde bakele lokola Adamu na Eva—yina kumaka bantu ya kukondua kukuikama atako bavuandaka bantu ya kukoka? Bamvutu fueti pesama samu na biuvu yango, kasi yinki mutindu?

15-16. (a) Yinki ntangu bantu nionso kebaka diluaku ya kumonisa kukuikama na bau na Yehova? (b) Yinki mambu kumekama ya nsuka kebimisa?

¹⁵ Satana kevuanda na buloko samu na bamvula 1000. Na ntangu yango yandi kevuanda ve na dikoki ya kuvuna bantu. Kasi, na nsuka ya bamvula 1000, bakezibula Satana na buloko. Na manima yandi kesosa kuvuna bantu ya kukoka. Na ntangu ya kumekama yango, bantu  nionso ya kukoka yina kevuanda na ntoto, kevuanda na diluaku ya kumonisa puelele kana bakezitisaka nkumbu ya Nzambi mpe luyalu na yandi. (Kus. 20:7-10) Mambu yina bakesala na ntangu yango kemonisa kana bankumbu na bau fueti sonama samu na mvimbamvimba na mukanda ya luzingu.

¹⁶ Biblia metuba, bantu yankaka kemonisa kikadulu ya kukondua kukuikama lokola Adamu mpe Eva mpe bakemanga luyalu ya Yehova. Yinki kesalama samu na bau? Kusonga 20:15 metubila beto ti: ‘Konso muntu yina basonikaka ve nkumbu na yandi na mukanda ya luzingu balozaka yandi na laki ya tiya.’ Batomboki yango kekufua mbotembote samu na mvimbamvimba. Kasi, mingi ya bantu ya kukoka kenunga kumekama yango ya nsuka. Mpe bankumbu na bau kesonama samu na mvimbamvimba na mukanda ya luzingu.

17. Daniele tubaka yinki mambu kemonana na bilumbu na beto? (Daniele 12:4, 8-10)

¹⁷ Yakele kitoko kukanisa samu na mambu yango yina kesalama na bilumbu kena kuiza! Kasi, Daniele bakaka diaka na nzila ya mbasi bansangu ya mfunu yina metadila ntangu na beto, “ntangu ya nsuka.” (Tanga Daniele 12:4, 8-10; 2 Tm. 3:1-5) Mbasi tubilaka Daniele ti: ‘Nzayilu ya kedika kekuma mingi.’ Ee, bisadi  ya Nzambi kebakusa diaka mbote bampova ya mbikudulu yina kele na mukanda na yandi. Mbasi buelaka ti na ntangu yango ‘bantu ya yimbi [kesala] mambu ya yimbi, mpe muntu mosi ve ya yimbi [kebakusa].’

18. Yinki mambu kesalama ntama mingi ve samu na bantu ya yimbi?

¹⁸ Bubu yayi yalenda monana ti bantu ya yimbi kena kubaka ve kitumbu samu na mambu ya yimbi yina bakesalaka. (Mal. 3:14, 15) Kasi ntama mingi ve Yesu kesambisa bankombo mpe yandi kekabula bau na mameme. (Mat. 25:31-33) Bantu yango ya yimbi kevuka ve na mpasi ya nene, mpe bakefutumuka ve samu na kuzinga na yinza ya yimpa. Bankumbu na bau kesonama ve na ‘mukanda ya kukanisama’ yina Malaki 3:16 metubila.

19. Yayi kele ntangu samu na beto ya kusala yinki mpe samu na yinki? (Malaki 3:16-18)

¹⁹ Yayi kele ntangu samu na beto ya kumonisa ti beto kele ve na kati ya bantu ya yimbi. (Tanga Malaki 3:16-18.) Yehova kena kusangisa bantu yina yandi kemonaka lokola ‘kima na yandi mosi,’ to bayina kele na valere samu na yandi. Ya kedika beto kele mpenza na nsatu ya kuvuanda na kati na bau.

20. Yinki nsilulu ya nsuka Yehova pesaka Daniele, mpe samu na yinki nge kele na nsatu ya kumona kukokisama ya nsilulu yango?

²⁰ Ya kedika beto kena kuzinga na ntangu mosi ya kukamua. Kasi mambu ya kukamua kuluta kesalama ntama mingi ve. Ntama mingi ve beto kemona kubebisama ya bantu ya yimbi. Na manima na yau, beto kemona kukokisama ya nsilulu yina Yehova pesaka Daniele: ‘Nge kelamuka samu na kubaka dikabu na nge na nsuka ya bilumbu.’ (Dan. 12:13) Nge kena kuvingila na nsatu ya ngolo kilumbu yina Daniele, mpe bantu yina nge vuandaka zola ‘kelamuka’ diaka? Kana yakele mutindu yina, sala nionso yina nge lenda sala bubu yayi samu na kuvuanda ya kukuikama, mpe nge lenda kukindimisa ti nkumbu na nge ketatamana kuvuanda ya kusonama na mukanda ya luzingu ya Yehova.