MUTWI WAKWIIYA 40
‘Kutanjilila Bantu Baanji Kubululami’
“Abo batanjilila bantu baanji mubululami, balaakunoobala anga ni nyenyeenshi kwalyoonse alyoonse.”—DANYE. 12:3.
LWIIMBO 151 Alaakwiita
NSHESHI TWIIYE *
1. Ino nshintu nshi shisangalasha sheshi shikacitike Mubuleelo bwa Myaaka 1,000?
CILAAKUBA ciindi cisangalasha abuumbi bantu ndyeshi bakatalike kubushikwa pacishi capanshi Mubuleelo Bwakwe Klistu bwa Myaaka 1,000! Abo boonse bakafwitwa beshikamukowa na beshicibusa balisunishishi kubabona alimwi. Alakwe Yehova mbwaasuni. (Jobo 14:15) Amuyeeyebo bantu boonse pacishi capanshi mbweshi bakasangalale na beshikamukowa nabi beshicibusa babo bakabushikwe. Kweelana ambotwakeeya mumutwi wamana, “baluleme” abo balembetwe meenaabo mulibuku lya buumi, ‘balaakubukila kubuumi.’ (Milimo 24:15; Joni 5:29) Mpashi buunji bwa beshikamukowa na beshicibusa balaakuba pakati kabaabo beshibakabushikwe pacishi capanshi pesule lya Amagedoni. * Kwiilikaawo, “bataluleme” mbuli baabo batakalinga kucite coolwe cikwene cakwiiya pali Yehova na kumusebensela cakushomeka kabatana kufwa, ‘balaakubukila kukoomboloshekwa.’
2-3. (a) Kweelana a Isaya 11:9, 10 ino ni ncito nshi inene abuumbi itana kucitwawo kale pacishi capanshi yeshi ikabeeko? (b) Ino nshiinshi nsheshi twiiye mumutwi uyu?
2 Abo boonse beshibakabushikwe balaakuyandika kwiishikwa. (Isa. 26:9; 61:11) Aboobo kulaakuyandika ncito inene abuumbi yakwiisha bantu itana kucitwawo kale pacishi capanshi. (Amubelenge Isaya 11:9, 10.) Ino nceebonshi? Ceebo comwi ncakwaamba ayi bataluleme beshibakabushikwe balaakuyandika kwiishikwa pali Yesu Klistu, Bwaami bwakwe Lesa, cilubula, kuyandika kwa liina lyakwe Yehova alimwi aceebo lakwe eenka ncaabetele weelela kweendelesha. Baluleme abalo balaakuyandika kwiiya Yehova nshaiisha bantu bakwe mukuya kwaciindi pamakani aluyaando ndwaakalengela cishi capanshi. Bamwi pa bashomeka aba bakafwa Baibo kaitana kumana kulembwa. Aboobo baluleme abataluleme boonse balaakuyandika kwiiya shiinji.
3 Mumutwi uyu tutocana shikumbulo ku miipusho itokonkelaawo: Ino ncito inene abuumbi yakwiisha bantu ilaakucitwa buyani? Ino bantu nsheshi bakacite pesule lya kwiishikwa shilaakupa buyani kwaamba ayi meenaabo akalembwe mulibuku lya buumi kwamuyayaya na sobwe? Shikumbulo kumiipusho iyi shilayandika abuumbi kuli ndiswe pacecino ciindi. Kweelana ambweshi twiiye, bushinshimi bumwi bukankamika bucanika mulibuku lyakwe Danyelo alya Ciyubululo butootucafwa kunyumfwishisha busansulushi bupya pamakani asheshi shikacitike na bafu bakabushikwe. Citaanshi, amuleke tubandike shintu shisangalasha shakaambwa mubushinshimi mbotucana mulibuku lyakwe Danyelo 12:1, 2.
‘ABO BOONSE BALETE MUBULONGO . . . BALAAKUBUKA’
4-5. Ino Danyelo 12:1 ilaamba nshi pa sheshi shikacitike munshiku shakweelaako?
4 Amubelenge Danyelo 12:1. Libuku lyakwe Danyelo lilaamba shintu shisangalasha mbweshi shikacitike munshiku shakweelaako. Kucakubonenaako, Danyelo 12:1 ilaamba ayi Mikaeli, na Yesu Klistu, ‘aliimfwi kwaamba ayi acafwe bantu [bakwe] Lesa.’ Lubasu ulu lwa bushinshimi ubu lwakatalika kukumanishikwa mu 1914 Yesu ndyakasalwa mbuli Mwaami wa Bwaami bwakwe Lesa kwiculu.
5 Nacibi boobo, alimwi Danyelo wakalwiitikwa ayi Yesu “ulaakunyamuka” ‘paciindi ca mapensho ico citana kubonekawo kale kuswa kumatalikilo amishobo kushikila asunu.’ “Ciindi ca mapensho” ici cilasansulula ciindi ca “mapensho anene” aambwa palilembo lya Mateyo 24:21. Yesu alaakunyamuka na kucitawo comwi kwaamba ayi ashitilishe bantu bakwe Lesa, kumamanino amapensho aya na pabushiku bwa Amagedoni. Ili ndyelikoto lyaambwa mulibuku lya Ciyubululo ayi ‘likoto linene lya bantu -bakapula mumapensho anene.’—Ciyu. 7:9, 14.
6. Ino nshiinshi sheshi shikacitike pesule lyakwaamba ayi bamulikoto linene bapuluka mumapensho anene? Amusansulule. (Amubone makani aamwi mu Njashi yeenka iyi palubasu lwa “Miipusho Kuswa Kubeshikubelenga” atokwaamba pa beshibakabushikwe pacishi capanshi.)
6 Amubelenge Danyelo 12:2. Ino nshiinshi sheshi shikacitike pesule lyakwaamba ayi bamulikoto linene bapuluka mumapensho anene? Bushinshimi ubu tabusansululi bubuke bwa cikoshanyo bwakumushimu ubo bucitika munshiku shakweelaako, kweelana ambotwakalinga kushoma kale kale. * Kale kale, twakalinga kuyeeya ayi Danyelo 12:2 yakalinga kusansulula bubuke bwa kwiculu na kuya panembo kwa ncito yakushimikila pesule lyakwaamba ayi yeemikwa mu 1918 kwakaciindi kubaabo beshikupikisha. Nacibi boobo, pacecino ciindi tulashoma ayi maswi aya alasansulula kubuka kwa bafu kweshi kukacitike kunembo mucishi cipya. Ino nciinshi ncetwaambila boobo? Maswi akwaamba ayi “mubulongo” ngomaswi akaambwa apa Jobo 17:16 kusansulula maswi akwaamba ayi “Cuumbwe.” Aboobo ici cilatondesha ayi maswi ngotucana palilembo lyakwe Danyelo 12:2 alasansulula kubushikwa kwiine kweshi kukacitike pesule lyakumana kwa nshiku shakweelaako alimwi a nkondo ya Amagedoni.
7. (a) Ino maswi akwaamba ayi bamwi balaakubukila kuba “abuumi butamaani” alasansulula nshi? (b) Ino ubu bulaakuba ‘bubuke bwiinditeewo’ munshila nshi?
7 Ano ino maswi akwaamba ayi bamwi balaakubukila kuba “abuumi butamaani” ngotucana palilembo lyakwe Danyelo 12:2, alasansulula nshi? Alasansulula ayi abo beshibakabushikwe akwiiya na kutolelela kwiiya akunyumfwila Yehova alimwi a Yesu mu buleelo bwa myaaka 1,000, balaakutambula buumi butamaani. (Joni 17:3) Ubu bulaakuba ‘bubuke bwiinditeewo’ pa bubuke bwakale kale. (Ebu. 11:35, NWT) Ino nceebonshi? Nceebo cakwaamba ayi bantu bakabushikwa kale kale bakafwa alimwi mukuya kwaciindi.
8. Ino bamwi “balaakubukila kulenshekwa nsoni akuba cintu ceelete kushibulukwa kwalyoonse alyoonse” munshila nshi?
8 Nacibi boobo, teshi boonse beshibakabushikwe beshi bakasumine kwiishikwa a Yehova. Bushinshimi mbotucana mulibuku lyakwe Danyelo bulaamba ayi “bamwi balaakubukila kulenshekwa nsoni akuba cintu ceelete kushibulukwa kwalyoonse alyoonse.” Mukwiinga balaakukaka kunyumfwila Yehova, meenaabo teshi akalembwe mulibuku lya buumi alimwi teshi bakatambule buumi butamaani. Sombi ‘balaakushibulukwa kwalyoonse alyoonse,’ na kunyonyoolwa. Aboobo makani ngotucana palilembo lyakwe Danyelo 12:2 alaamba sheshi shikacitikile baabo boonse beshibakabushikwe kweelana ansheshi bakacite pesule lyakubushikwa. * (Ciyu. 20:12) Bamwi balaakutambula buumi butamaani; sombi bamwi teshi bakabutambulewo.
‘KUTANJILILA BANTU BAANJI KUBULULAMI’
9-10. Ino nciinshi cimwi ceshi cikacitike pesule lya mapensho anene, alimwi ino mbaani beshi ‘bakabale bweenka butuba mwiculu’?
9 Amubelenge Danyelo 12:3. Ino nciinshi cimwi ceshi cikacitike pesule lya “ciindi ca mapensho” citoosa kunembo? Kwiilika pamakani ngotucana pa Danyelo 12:2, vesi 3 ilaamba pa cimwi ceshi cikacitike pesule lya mapensho anene.
10 Ino mbaani beshi ‘bakabale bweenka butuba mwiculu’? Mateyo 13:43 ilatucafwa kucana cikumbulo kumwiipusho uyu. Ilaamba ayi: ‘Lyalo baluleme balaakubala mbuli lisuba mu Bwaami bwakwe Ishiwabo.’ Mu maswi aya, Yesu wakalinga kwaamba pa “baana ba Bwaami,” bamakwabo bananikitwe, abo beshibakanookweendelesha pomwi anguwe mu Bwaami bwakwiculu. (Mate. 13:38) Aboobo Danyelo 12:3 ilyeelete ilaamba pa bananikitwe alimwi anciito njeshi bakanoosebensa mu Buleelo bwa Myaaka 1,000.
Ba 144,000 balaakusebensela pomwi a Yesu Klistu kutanjilila ncito yakwiisha bantu yeshi ikacitwe pacishi capanshi mu Buleelo bwa Myaaka 1,000 (Amubone palagilafu 11)
11-12. Ino ba 144,000 balaakunoosebensa ncito nshi mu Buleelo bwa Myaaka 1,000?
11 Ino bananikitwe ‘balaakutanjilila buyani bantu baanji kubululami’? Bananikitwe balaakusebensela pomwi a Yesu Klistu kutanjilila ncito yakwiisha bantu yeshi ikacitwe pacishi capanshi mu Buleelo bwa Myaaka 1,000. Ba 144,000 balaakunookweendelesha mbuli baami alimwi akunosebensa mbuli bapailishi. (Ciyu. 1:6; 5:10; 20:6) Aboobo balaakwaabanamo lubasu ‘mukushilika mishobo yoonse ya bantu’ kushikila bantu boonse ndyeshi bakabe bamaninite mukuya kwaciindi. (Ciyu. 22:1, 2; Esek. 47:12) Ici cilaakuba ciindi cisangalasha abuumbi kubananikitwe!
12 Ino mbaani beshi bakabe pakati ka ‘baanji batootanjililwa kubululami’? Palaakuba baabo beshibakabushikwe alimwi abaabo beshi bakapuluke nkondo ya Amagedoni pomwi abaana mpashi beshi bakashalwe mucishi cipya. Kumamanino amyaaka 1,000 bantu boonse pacishi capanshi balaakuba bamaninite. Aboobo ino ndilili meenaabo ndyeshi akalembwe mulibuku lya buumi kwamuyayaya?
KWEELESHEKWA KWA KWEELAAKO
13-14. Ino bantu boonse bamaninite pacishi capanshi balaakuyandika kutondesha nshi kabatana kutambula buumi butamaani?
13 Tulyeelete kwiibaluka kwaamba ayi kuba bantu bamaninite tacaambi ayi tulaakushikilabo kutambula buumi butamaani. Amuyeeye shakacita Adamu a Efa. Nabi kwaamba ayi bakalinga bamaninite bakalinga kuyandika kunyumfwila Yehova Lesa kwaamba ayi batambule buumi butamaani. Ano cakabica ncakwaamba ayi bakaalilwa kunyumfwila Lesa.—Loma. 5:12.
14 Ino bantu balaakuba buyani kumamanino a Buleelo bwa Myaaka 1,000? Bantu boonse balaakuba bamaninite. Sa bantu boonse bamaninite balaakutolelela kushomeka ku bweendeleshi bwakwe Yehova kwamuyayaya? Na mpashi bamwi balaakuba bweenka mbuli Adamu a Efa abo batakwe kushomeka nabi kwaamba ayi bakalinga bamaninite? Miipusho iyi ilaakuyandika kukumbulwa, ano ino munshila nshi?
15-16. (a) Ino ndilili bantu boonse ndyeshi bakabe acoolwe cakutondesha kushomeka kwabo kuli Yehova? (b) Ino nshiinshi sheshi shikacitike kumamanino aciindi cakweeleshekwa kwa kweelaako?
15 Satana alakwaangwa kwamyaaka 1,000. Paciindi ico teshi akayungewo muntu uli woonse. Nacibi boobo, kumamanino amyaaka 1,000, alaakwaangululwa. Lyalo alaakweelesha kuyunga bantu bamaninite. Paciindi cakweeleshekwa uku, bantu bamaninite pacishi capanshi balaakuba acoolwe cakutondesha patuba na balalemeka liina lyakwe Lesa akushomeka ku bweendeleshi bwakwe. (Ciyu. 20:7-10) Womwi awomwi nsheshi akacite paciindi ico nsheshi shikape kwaamba ayi liina lyakwe lilembwe mulibuku lya buumi kwamuyayaya na sobwe.
16 Baibo ilaamba ayi bantu bamwi teshi bakashomeke bweenka bwakacita Adamu a Efa alimwi balaakukaka bweendeleshi bwakwe Yehova. Ino nshiinshi sheshi shikabacitikile? Ciyubululo 20:15 ilaamba ayi: “Uyo woonse utakwe kulembwa liina mulibuku lya boomi, wakawaalwa mulweenge lwa mulilo.” Ncakwiila bantu boonse beshi bakapondoke balaakunyonyoolwa kwamuyayaya. Nacibi boobo, bantu baanji bamaninite balaakutolelela kushomeka paciindi cakweeleshekwa kwakweelaako. Lyalo meenaabo alaakulembwa mulibuku lya buumi kwamuyayaya.
“KUMEELELESHO ACIINDI”
17. Ino munjelo wakalwiita Danyelo ayi nshiinshi sheshi shikacitike munshiku shino? (Danyelo 12:4, 8-10)
17 Cilasangalasha abuumbi kuyeeya pashintu ishi sheshi shikacitike kunembo! Nacibi boobo, munjelo wakalwiita Danyelo makani aamwi aamba shitoocitika munshiku shino, na munshiku sha ‘meelelesho aciindi.’ (Amubelenge Danyelo 12:4, 8-10; 2 Timo. 3:1-5) Munjelo wakalwiita Danyelo ayi: ‘Lushibo lwancinencine lulaakufula abuumbi.’ Ncakwiila bantu bakwe Lesa balaakwanyumfwishisha kabotu abuumbi maswi abushinshimi ngotucana mulibuku lyakwe Danyelo. Munjelo wakatolelela akwaamba ayi munshiku shino: ‘Bamucita shibi balaakutolelela kucita shibiibi, alimwi taaku mucita shibi nabi womwi weshi akanyumfwishishe.’
18. Ino nshiinshi sheshi shikacitike conoono kubantu bacita shibiibi?
18 Mpashi munshiku shino cilaboneka anga bantu bacita shibiibi tabapekwi mulandu pashibiibi nshobacita. (Mala. 3:14, 15) Sombi conoonobo Yesu alaakoombolosha bantu abo bakoshanishikwa ku mpongo akubapansaanya kubaabo bakoshanishikwa ku mbelele. (Mate. 25:31-33) Bantu bacita shibiibi aba teshi bakapuluke mapensho anene na kubushikwa ayi bekale mucishi cipya. Meenaabo teshi akabe mu “libuku lya ciibalusho” lyaambwa pa Malaki 3:16.
19. Ino nciinshi ncotweelete kucita pacecino ciindi, alimwi ino nceebonshi? (Malaki 3:16-18)
19 Cino nceciindi ndyetweelete kucita shintu shitondesha ayi tatubete pabaabo bacita shibiibi. (Amubelenge Malaki 3:16-18.) Yehova atoobunganya baabo mbwaabona ayi balilibetele kuli nguwe. Ncakutatoonsha soonse tulisuni kuba pakati kabo.
Cilaakuba ciindi cisangalasha abuumbi kubona Danyelo, beshikamukowa na beshicibusa besu bakafwa ndyeshi bakabushikwe akutambula cilambu cabo mucishi cipya! (Amubone palagilafu 20)
20. Ino ncishomesho nshi cakweelaako Danyelo ncaakashomeshekwa, alimwi ino nceebonshi mutoolangila kukumanishikwa kwa cishomesho ico?
20 Ncakwiila tuli muciindi cisangalasha abuumbi. Nacibi boobo, kuli shintu shiinji shikankamika sheshi shikacitike conoonobo. Shintu shibiibi shoonse shilaakunyonyoolwa conoono. Lyalo Yehova alaakukumanisha cishomesho ncaakalwiita Danyelo ayi: “Ulaakubuka alimwi akutambula cilambu cako kumeelelesho aciindi.” (Danye. 12:13) Sa mutoolangila kuciindi Danyelo alimwi abeshikamukowa na beshicibusa banu ndyeshi bakabuke? Na mboboobo, amucite shoonse nsheenga mwacikonsha kwaamba ayi mutolelele kushomeka, lyalo inga mwashoma cakutatoonsha ayi liina lyanu lilaakutolelela kuba mulibuku lya buumi lyakwe Yehova.
LWIIMBO 80 “Amweeleshe Akubona Ayi Yehova Ngumubotu”
^ Mumutwi uyu tutokwiiya busansulushi bupya pamakani ancito inene yakwiisha bantu itana kucitwawo kale pacishi capanshi yaambwa pa Danyelo 12:2, 3. Tutoobandika ncito iyi ndyeshi ikacitwe alimwi abeshi bakaabanemo lubasu. Alimwi tutokwiiya ambweshi ikacafwe bantu pacishi capanshi kulibambila kweeleshekwa kwakweelaako kumamanino a Buleelo Bwakwe Klistu bwa Myaaka 1,000.
^ Mpashi beshi bakataangune kubushikwa mbaabo bashomeka bakafwa munshiku shakweelaako lyalo abo bakataanguna kufwa mbeshi bakacaalile kubushikwa. Na ubu mbweshi cikabe, nkokwaamba ayi lishalane lyomwi alyomwi lilaakuba acoolwe cakutambula baabo mbobakalinga kushi. Muli moonse mweenga cabeta, Malembo alaamba ayi womwi awomwi wabaabo beshibakabushikwe kuya kwiculu alaakubushikwa “paciindi cakwe ceelete,” aboobo inga twalangila ayi ubu mbweshi cikabe akubaabo beshibakabushikwe pacishi capanshi.—1 Koli. 14:33; 15:23.
^ Ubu mbusansulushi bupya pamakani ngotucana mulibuku lyamu Chitonga lya Amububikkile Maanu Businsimi bwa Daniele! cibalo 17 alimwi amu Njashi Yamulindilishi yamu Cisungu ya July 1, 1987, mape 21-25.
^ Mubupusano, maswi akwaamba ayi “baluleme” alimwi a “bataluleme” ngotucana palilembo lya Milimo 24:15, alimwi amaswi akwaamba ayi “abo bakalinga kucita shibotu” alimwi abaabo “bakalinga kucita shibiibi” ngotucana pa Joni 5:29, alaamba pashintu abo beshibakabushikwe nshobakalinga kucita kabatana kufwa.
