Awˬ Lawn 40
“Hteˇ ve cawˇ ve kanˉ htaꞈ te tuˬ shu htaꞈ maˍ piˇ ve”
“Hteˇ ve cawˇ ve kanˉ htaꞈ te tuˬ shu htaꞈ maˍ piˇ ve chaw hui lehˬ, meuꞈ keu shiˍ hkʼa shuˍ co co taiˍ taiˍ awˬ gʼeuˆ ba chehˇ tuˬ yoˬ.” —DAˍYEˍLAˆ 12:3.
KʼA MUIˬ HKAWˇ 151 Gʼuiˬ sha yawˇ hui htaꞈ kuˬ piˇ tuˬ yoˬ
HENˇ TUˬ VE TEˇ HPAˍ *
1. Yeˍsuˆ uˉ peunˍ ve 1,000 hkʼawꞈ ve awˬ yanˇ hkʼaw ha lehˬ jaˇ tuˬ ve awˬ ceuˬ aˬ htoꞈ ma cawˬ tuˬ le?
Yeˍsuˆ uˉ peunˍ ve 1,000 hkʼawꞈ ve awˬ yanˇ htaˇ, suh peuˬ ve chaw teˇ hpaˍ htaꞈ kʼawꞈ teꞈ tu la piˇ tuˬ yoˬ. Chi lehˬ ha lehˬ jaˇ ve awˬ yanˇ hpehꞈ ve yoˬ. Ngaˬ hui teˇ gʼaˇ le le kaꞈ haꞈ ve chaw htaꞈ gʼa kʼawꞈ mawˬ daꞈ tuˬ law chehˇ leh Yaˬhoˉvaˬ kaꞈ chi hkʼe law chehˇ ve yoˬ. (Yawˇbaˆ 14:15) Miˬ guiˬ hkʼoˆ lo ve chaw yaˇ lehˬ yawˇ haꞈ ve chaw htaꞈ gʼa kʼawꞈ mawˬ daꞈ htaˇ, hkʼaˬ hkʼe taw ha lehˬ tuˬ ve htaꞈ dawˇ nyi sheˍ. Peuˬ taˉ ve teˇ lawn hkʼaw ngaˬ hui gʼa henˇ˗oˬ ve hkʼe, “hteˇ ve chaw” co tiꞈ ha tiꞈ gʼa tuˬ liꞈ awˬ hkʼaw lo awˬ meh cawˬ ve chaw lehˬ ‘a shaꞈ gʼa tuˬ kʼawꞈ teꞈ tu la’ tuˬ yoˬ. (Tcuh yaˇ 24:15; Yoˇhanˬ 5:29) Ngaˬ hui ve awˬ chawˇ leh awˬ viˉ awˬ nyi laiˉ gʼaˇ awˬ moˍ chi ve hkʼaw chehˇ ve yoˬ hehˉ. * Chi hkʼoˆ kaꞈ, “maˇ hteˇ ve chaw” chi lehˬ yawˇ hui maˇ suh sheˍ htaˇ Yaˬhoˉvaˬ ve awˬ lawn maˇ shiˍ leh Yaˬhoˉvaˬ ve kanˉ kaꞈ maˇ te ve pa taw, “suhˉ jehˬ tuˬ awˬ pon kʼawꞈ teꞈ tu la tuˬ yoˬ.”
2-3. (a) Iˉsaˍyaˆ liꞈ 11:9, 10 hkʼaw kʼoˆ taˍ ve hkʼe, miˬ guiˬ hkʼoˆ lo teˇ pawˆ kaꞈ maˇ cawˬ jaw sheˍ ve maˍ ve kanˉ uiˍ jaˇ ve aˬ htoꞈ ma cawˬ tuˬ le? Leh aˬ htoꞈ ma pa taw le? (b) Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?
2 Kʼawꞈ teꞈ tu la ve chaw teˇ gʼaˇ le le maˍ piˇ ve htaꞈ gʼa tuˬ yoˬ. (Iˉsaˍyaˆ 26:9; 61:11) Hkʼe te leh, Yaˬhoˉvaˬ lehˬ miˬ guiˬ hkʼoˆ lo teˇ pawˆ kaꞈ maˇ cawˬ jaw sheˍ ve maˍ ve kanˉ uiˍ jaˇ ve cawˬ tcuh tuˬ yoˬ. (Iˉsaˍyaˆ 11:9, 10 gʼaw sheˍ.) Aˬ htoꞈ ma pa taw le? Awˉ lawˉ teˇ ceuˬ lehˬ “maˇ hteˇ ve chaw” kʼawꞈ teꞈ tu la leh Yeˍsuˆ, Gʼuiˬ sha ve mvuhˇ miˬ, htaiˍ hkʼawꞈ laˇ ve awˬ hpfuhˇ, Yaˬhoˉvaˬ teˇ gʼaˇ ceh tiˉ uˉ peunˍ keunˍ ve, leh yawˇ ve awˬ meh a yeˇ uiˍ jaˇ ve kaꞈ yawˇ hui gʼa shiˍ cawˇ ve yoˬ. Kʼawꞈ teꞈ tu la ve “hteˇ ve chaw” htawˇ, Yaˬhoˉvaˬ ve a loˍ miˬ guiˬ htaꞈ caˉ daꞈ ve awˬ meu˗eˇ awˬ meu˗eˇ hpeuꞈ maw laˇ ve awˬ ceuˬ kaꞈ yawˇ hui gʼa henˇ cawˇ ve yoˬ. Leh ka tiꞈ yeˬ ve chaw teˇ hpaˍ kʼo, Liꞈ hpu teˇ daw hkʼa peu˗eˬ maˇ cawˬ sheˍ htaˇ kaꞈ suh˗e ve yoˬ. Chi htaꞈ pa taw, “hteˇ ve chaw” leh “maˇ hteˇ ve chaw” gʼa henˇ tuˬ laiˉ ceuˬ cawˬ sheˍ ve yoˬ.
3 Awˬ lawn chi ve hkʼaw na hkawˇ chi teˇ hpaˍ htaꞈ teˇ geh henˇ tuˬ yoˬ. Miˬ guiˬ hkʼoˆ lo teˇ pawˆ kaꞈ maˇ cawˬ jaw sheˍ ve maˍ ve kanˉ uiˍ jaˇ ve chi hkʼaˬ hkʼe te henˇ tuˬ le? Kanˉ chi ve lehˬ co tiꞈ ha tiꞈ gʼa tuˬ liꞈ awˬ hkʼaw lo awˬ meh cawˬ ve chaw htaꞈ awˬ bon hkʼaˬ hkʼe cawˬ tuˬ le? Hkʼawꞈ laˇ hkawˇ chi teˇ hpaˍ, chi teˇ hkui ngaˬ hui awˬ pon kaꞈ a yeˇ uiˍ jaˇ ve yoˬ. Chi hkʼoˆ kaꞈ, Daˍyeˍlaˆ liꞈ leh Hpeuꞈ maˍ ve liꞈ hkʼaw tcuh kaˍ paˍ ve tawˇ hkawˇ nyi ma pfuhˇ lawꞈ lawꞈ ve teˇ tawn tawn htaꞈ awˬ lawn chi ve hkʼaw teˇ geh henˇ tuˬ yoˬ. Chi ve lehˬ suh˗oˬ ve chaw htaꞈ kʼawꞈ teꞈ tu la piˇ htaˇ, hkʼaˬ hkʼe hpehꞈ la tuˬ ngaˬ hui hkʼa dehꞈ na gʼa tuˬ kaꞈ teˇ geh henˇ tuˬ yoˬ. Daˍyeˍlaˆ liꞈ 12:1, 2 hkʼaw tcuh kaˍ paˍ ve tawˇ hkawˇ kʼoˆ taˍ ve htaꞈ ngaˬ hui awˉ lawˉ teˇ geh henˇ sheˍ.
“SUH TAˍ PEUˬ VE CHAW LAIˉ GʼAˇ KʼAWꞈ TEꞈ TU LA TUˬ YOˬ”
4-5. Awˬ leh meuˇ ve awˬ yanˇ htaꞈ caˉ daꞈ ve Daˍyeˍlaˆ liꞈ 12:1 hkʼaw awˉ lawˉ htaˇ kaꞈ hkʼaˬ hkʼe kʼoˆ laˇ taˍ ve le?
4 Daˍyeˍlaˆ liꞈ 12:1 gʼaw sheˍ. Awˬ leh meuˇ ve awˬ yanˇ htaˇ awˬ yanˇ cawˇ ve hkʼe, hkʼaˬ hkʼe hpehꞈ la tuˬ tehꞈ Daˍyeˍlaˆ ve liꞈ hkʼaw kʼoˆ laˇ taˍ ve yoˬ. Tawˇ pa haˉ te kʼo, Daˍyeˍlaˆ liꞈ 12:1 hkʼaw kʼoˆ ve, Miˆhkeˍlaˆ lehˬ Yeˍsuˆ Hkriꞈ hpehꞈ leh ‘Gʼuiˬ sha ve chaw htaꞈ haꞈ shaˉ chehˇ ve yoˬ.’ 1914 hkʼawꞈ Yeˍsuˆ Gʼuiˬ sha ve mvuhˇ miˬ hkʼaw Jawˇ mawˇ hpehꞈ htaˇ, tcuh kaˍ paˍ tawˇ hkawˇ chi awˬ tehˬ hpehꞈ la ve yoˬ.
5 Chi hkʼoˆ kaꞈ, Daˍyeˍlaˆ awˬ gʼuˇ suhˍ htaˇ kaꞈ kʼoˆ taˍ ve, “miˬ guiˬ hkʼoˆ lo teˇ pawˆ kaꞈ maˇ hpehꞈ la jaw ve kawˆ tuˬ dawˇ haˍ tuˬ awˬ ceuˬ gaˬ la” htaˇ, Yeˍsuˆ “tawˆ la tuˬ yoˬ.” Leh “tuꞈ jaˇ hkanˍ jaˇ ve” awˬ yanˇ lehˬ Maꞈhtehˍ liꞈ 24:21 hkʼaw kʼoˆ taˍ ve “tuꞈ jaˇ hkanˍ jaˇ ve” awˬ yanˇ hkʼa shuˍ yoˬ. Tuꞈ jaˇ hkanˍ jaˇ ve awˬ leh meuˇ htaˇ, Yeˍsuˆ tawˆ la leh Gʼuiˬ sha ve chaw htaꞈ haꞈ shaˉ piˇ tuˬ yoˬ. Chi ve lehˬ Aˍmaˍgeˍdonˍ htaˇ yoˬ. Hpeuꞈ maˍ ve liꞈ hkʼaw kʼoˆ ve, Gʼuiˬ sha ve chaw chi teˇ moˍ lehˬ, “uiˍ jaˇ ve tuꞈ ve hkanˍ ve awˬ hkʼaw lo tawˆ la” ve chaw awˬ moˍ lonˉ hpehꞈ ve yoˬ.—Hpeuꞈ maˍ ve 7:9, 14.
6. Chaw awˬ moˍ lonˉ uiˍ jaˇ ve tuꞈ ve hkanˍ ve awˬ hkʼaw lo tawˆ la peuˬ hkʼawꞈ nawˉ hkʼaˬ hkʼe hpehꞈ tuˬ le? Tawˇ pa haˉ kʼoˆ maˍ laˇ sheˍ. (Gʼaw ve chaw na nyi hkawˇ hkʼaw “Miˬ guiˬ hkʼoˆ lo kʼawꞈ teꞈ tu la ve htaꞈ caˉ daꞈ ve” hkʼaw gʼaw nyi sheˍ.)
6 Daˍyeˍlaˆ liꞈ 12:2 gʼaw sheˍ. Chaw awˬ moˍ lonˉ uiˍ jaˇ ve tuꞈ ve hkanˍ ve awˬ hkʼaw lo tawˆ la peuˬ hkʼawꞈ nawˉ hkʼaˬ hkʼe hpehꞈ tuˬ le? Daˍyeˍlaˆ liꞈ 12:2 hkʼaw hkʼawꞈ laˇ tuˬ yoˬ. Liꞈ hpu chi teˇ tawn hkʼaw yonˍ hkʼaˇ hpawˇ uiˍ la mvuhˇ la tcuh leh 1918 hkʼawꞈ htaˇ ngaˬ hui ve kanˉ jehˇ tuˬ te laˇ ve htawˇ, hto toˇ ve kanˉ teˇ pawˆ kʼawꞈ te gʼa sheˍ ve tehꞈ awˬ gʼuˇ suhˍ htaˇ ngaˬ hui na gʼa jaw ve yoˬ. Yaꞈ hkʼaˇ, Daˍyeˍlaˆ liꞈ 12:2 hkʼaw miˬ guiˬ suhˉ hkʼaw kʼawꞈ teꞈ tu la ve htaꞈ kʼoˆ gaˇ ve tehꞈ chi teˇ hkui ngaˬ hui na gʼa ve yoˬ. * Chi lehˬ awˬ leh meuˇ ve awˬ yanˇ peuˬ leh Aˍmaˍgeˍdonˍ peuˬ hkʼawꞈ nawˉ hpehꞈ la tuˬ yoˬ.
7. (a) “Co co taiˍ taiˍ teꞈ ve a shaꞈ” gʼa tuˬ kʼawꞈ teꞈ tu la ve aˬ htoꞈ ma htaꞈ kʼoˆ gaˇ ve le? (b) “Leuˉ leh daꞈ ve kʼawꞈ teꞈ tu la ve” hkʼaˬ hkʼe hpehꞈ tuˬ le?
7 Chaw teˇ hpaˍ “co co taiˍ taiˍ teꞈ ve a shaꞈ” gʼa tuˬ kʼawꞈ teꞈ tu la ve, Daˍyeˍlaˆ liꞈ 12:2 hkʼaw hkʼaˬ hkʼe kʼoˆ gaˇ ve le? Chi lehˬ kʼawꞈ teꞈ tu la ve chaw teˇ hpaˍ 1,000 hkʼawꞈ ve awˬ yanˇ hkʼaw Yaˬhoˉvaˬ leh Yeˍsuˆ htaꞈ shiˍ la ve maˇ heˆ leh caˉ leh kʼawꞈ shiˍ ve, leh yawˇ hui na yuˬ ve kʼo, co co taiˍ taiˍ ve a shaꞈ gʼa tuˬ yoˬ. (Yoˇhanˬ 17:3) Awˬ gʼuˇ suhˍ hpawˇ kʼawꞈ teꞈ tu la ve chi lehˬ, Liꞈ hpu ve awˬ co˗e htaˇ kʼawꞈ teꞈ tu la ve aꞈ kehˉ “leuˉ leh daꞈ ve” yoˬ. (Heˍbrehˇ 11:35) Aˬ htoꞈ ma pa taw le? Awˬ lawn kʼo, Liꞈ hpu ve awˬ co˗e htaˇ ve chaw kaꞈ gʼa suh˗e sheˍ ve yoˬ.
8. “Co co taiˍ taiˍ awˬ meꞈ awˬ hponˇ luˬ kʼai tuˬ yoˬ” tehꞈ kʼoˆ ve hkʼaˬ hkʼe kʼoˆ gaˇ ve le?
8 Yaꞈ hkʼaˇ, kʼawꞈ teꞈ tu la ve chaw teˇ gʼaˇ le le lehˬ Yaˬhoˉvaˬ maˍ piˇ ve htaꞈ haꞈ yuˬ tuˬ ve maˇ heˆ. Daˍyeˍlaˆ ve tcuh kaˍ paˍ ve tawˇ hkawˇ hkʼaw kʼoˆ ve, chaw teˇ hpaˍ kʼawꞈ teꞈ tu la leh “co co taiˍ taiˍ awˬ meꞈ awˬ hponˇ luˬ kʼai tuˬ yoˬ.” Chaw chi teˇ hpaˍ lehˬ Yaˬhoˉvaˬ yawˇ hui htaꞈ maˇ uˉ peunˍ tcuh gaˇ ve tehꞈ hkʼa tawˍ lehˆ hpeuꞈ maw piˇ ve yoˬ. Hkʼe te leh, yawˇ hui ve awˬ meh co tiꞈ ha tiꞈ gʼa tuˬ liꞈ awˬ hkʼaw lo maˇ cawˬ. Yawˇ hui a shaꞈ maˇ gʼa leh “co co taiˍ taiˍ awˬ meꞈ awˬ hponˇ luˬ kʼai tuˬ yoˬ.” Chi kʼoˆ gaˇ ve lehˬ yawˇ hui htaꞈ te luˬ piˇ tuˬ yoˬ. Chi htaꞈ pa taw, Daˍyeˍlaˆ liꞈ 12:2 hkʼaw kʼoˆ gaˇ ve lehˬ kʼawꞈ teꞈ tu la ve chaw teˇ gʼaˇ le le yawˇ hui kʼawꞈ teꞈ tu la peuˬ hkʼawꞈ nawˉ te ve awˬ ceuˬ htaꞈ kʼawꞈ nyi tuˬ ve htaꞈ kʼoˆ gaˇ ve yoˬ. * (Hpeuꞈ maˍ ve 20:12) Chaw teˇ hpaˍ co co taiˍ taiˍ a shaꞈ kʼawꞈ gʼa leh chaw teˇ hpaˍ htaꞈ te luˬ piˇ tuˬ yoˬ.
“HTEˇ VE CAWˇ VE KANˉ HTAꞈ TE TUˬ SHU HTAꞈ MAˍ PIˇ VE”
9-10. (a) Daˍyeˍlaˆ liꞈ 12:3 hkʼaw kʼoˆ taˍ ve hkʼe, uiˍ jaˇ ve tuꞈ ve hkanˍ ve peuˬ hkʼawꞈ nawˉ, hkʼaˬ hkʼe hpehꞈ la tuˬ sheˍ ve le? (b) “Mvuhˇ naw ma hkʼe awˬ gʼeuˆ ba daꞈ jaˇ tuˬ” ve a shu le?
9 Daˍyeˍlaˆ liꞈ 12:3 gʼaw sheˍ. “Kawˆ tuˬ dawˇ haˍ tuˬ” peuˬ hkʼawꞈ nawˉ aˬ htoꞈ ma hpehꞈ la tuˬ sheˍ ve le? Uiˍ jaˇ ve tuꞈ ve hkanˍ ve peuˬ hkʼawꞈ nawˉ hpehꞈ la tuˬ ve awˬ ceuˬ teˇ hpaˍ Daˍyeˍlaˆ liꞈ 12:3 hkʼaw kʼoˆ taˍ ve yoˬ.
10 “Mvuhˇ naw ma hkʼe awˬ gʼeuˆ ba daꞈ jaˇ tuˬ” ve a shu le? Maꞈhtehˍ liꞈ 13:43 hkʼaw Yeˍsuˆ kʼoˆ ve tawˇ hkawˇ htaꞈ ngaˬ hui mawˬ gʼa ve yoˬ. Oˇ kaˬ lo kʼoˆ ve, “oˇ htaˇ hteˇ ve cawˇ ve chaw hui lehˬ, yawˇ hui Awˬ pa ve mvuhˇ miˬ awˬ hkʼaw lo, mvuhˇ nyi hkʼa shuˍ shuˍ awˬ gʼeuˆ ba tuˬ yoˬ.” Liꞈ hpu chi teˇ tawn hkʼaw ve awˬ lawn lehˬ “mvuhˇ naw ma mvuhˇ miˬ yaˇ” Yeˍsuˆ geh mvuhˇ naw ma hkʼoˆ uˉ peunˍ tuˬ leuˆ yuˬ taˍ ve chaw htaꞈ kʼoˆ gaˇ ve yoˬ. (Maꞈhtehˍ 13:38) Chi htaꞈ pa taw, Daˍyeˍlaˆ liꞈ 12:3 hkʼaw leuˆ yuˬ taˍ ve chaw leh 1,000 hkʼawꞈ ve awˬ yanˇ htaˇ yawˇ hui te tuˬ ve kanˉ htaꞈ kʼoˆ gaˇ ve yoˬ.
1,000 hkʼawꞈ ve awˬ yanˇ awˬ hkʼaw lo Yeˍsuˆ lehˬ miˬ guiˬ hkʼoˆ lo ve chaw kanˉ te tuˬ beˆ maˍ piˇ htaˇ, yawˇ hui kaꞈ Yeˍsuˆ geh teˇ geh te tuˬ yoˬ. (Awˬ tawn 11 nyi sheˍ)
11-12. Leuˆ yuˬ taˍ ve chaw 144,000 gʼaˇ 1,000 hkʼawꞈ ve awˬ yanˇ hkʼaw yawˇ hui aˬ htoꞈ ma ve kanˉ te tuˬ le?
11 Leuˆ yuˬ taˍ ve chaw lehˬ, “hteˇ ve cawˇ ve kanˉ htaꞈ te tuˬ shu htaꞈ maˍ piˇ ve” hkʼaˬ hkʼe te gʼa tuˬ le? 1,000 hkʼawꞈ ve awˬ yanˇ awˬ hkʼaw lo Yeˍsuˆ lehˬ miˬ guiˬ hkʼoˆ lo ve chaw htaꞈ kanˉ te tuˬ beˆ maˍ piˇ htaˇ, yawˇ hui kaꞈ Yeˍsuˆ geh teˇ geh te tuˬ yoˬ. Leuˆ yuˬ taˍ ve chaw 144,000 gʼaˇ lehˬ Jawˇ mawˇ ceh tiˉ hpehꞈ ve maˇ heˆ. Yaꞈ hkʼaˇ, paw hkuˇ kaꞈ hpehꞈ tuˬ yoˬ. (Hpeuꞈ maˍ ve 1:6; 5:10; 20:6) Yaˬhoˉvaˬ dawˇ law taˍ ve hkʼe, yawˇ hui lehˬ “chaw ceuˬ teˇ hpaˍ ve naˬ ve gawˬ ve htaꞈ na˗e la piˇ tuˬ” leh chaw yaˇ awˬ meu˗eˇ awˬ meu˗eˇ biˇ ve chaw hpehꞈ la tuˬ yawˇ hui ga piˇ tuˬ yoˬ. (Hpeuꞈ maˍ ve 22:1, 2; Yeˍsaˍkeˍlaˆ 47:12) Chi lehˬ leuˆ yuˬ taˍ ve chaw ha lehˬ jaˇ tuˬ te piˇ ve yoˬ.
12 Leuˆ yuˬ taˍ ve chaw ga piˇ ve laiˉ gʼaˇ hteˇ ve cawˇ ve htaꞈ te tuˬ a shu le? Kʼawꞈ teꞈ tu la ve chaw, Aˍmaˍgeˍdonˍ htaꞈ gʼa ponˬ ve chaw leh miˬ guiˬ awˬ suhˉ hkʼaw paw la ve chaw teˇ hpaˍ kaꞈ yoˬ. 1,000 hkʼawꞈ peuˬ hkʼawꞈ nawˉ miˬ guiˬ hkʼoˆ lo ve chaw teˇ gʼaˇ le le biˇ ve chaw hpehꞈ tuˬ yoˬ. Co tiꞈ ha tiꞈ gʼa tuˬ liꞈ awˬ hkʼaw lo yawˇ hui ve awˬ meh naˬ meuꞈ taˬ bvuhꞈ laˇ tuˬ ve hkʼaˬ hkʼe htaˇ le?
AWˬ LEH MEUˇ TEˇ PAWˆ BEˬ VE LAWˇ VE
13-14. Miˬ guiˬ hkʼoˆ lo ve chaw teˇ gʼaˇ le le co co taiˍ taiˍ a shaꞈ maˇ gʼa sheˍ htaˇ, yawˇ hui hkʼaˬ hkʼe gʼa hpeuꞈ maw piˇ sheˍ ve le?
13 Biˇ ve chaw lehˬ co co taiˍ taiˍ ve a shaꞈ laꞈ tcuh laꞈ haˉ gʼa tuˬ ve maˇ heˆ tehꞈ ngaˬ hui tawnˇ taˍ cawˇ ve yoˬ. Aˍdanˍ leh Eˇvaꞈ htaꞈ dawˇ nyi sheˍ. Yawˇ hui biˇ ve chaw hpehꞈ ve htawˇ, co co taiˍ taiˍ ve a shaꞈ gʼa tuˬ Yaˬhoˉvaˬ ve hkawˇ awˉ lawˉ gʼa na yuˬ cawˇ ve yoˬ. Yawˇ hui maˇ na yuˬ ve nyi ma luˬ jaˇ.—Roˉmaꞈ 5:12.
14 1,000 hkʼawꞈ ve awˬ yanˇ peuˬ la yoˬ te htaˇ, a shaꞈ teꞈ chehˇ sheˍ ve chaw hkʼaˬ hkʼe hpehꞈ tuˬ le? Teˇ gʼaˇ le le biˇ ve chaw hpehꞈ tuˬ yoˬ. Yaꞈ hkʼaˇ, teˇ gʼaˇ le le Yaˬhoˉvaˬ uˉ peunˍ ve hpawˇ lo hkʼaˬ htaˆ kaꞈ chehˇ˗aw laˇ? Maˇ heˆ leh chaw teˇ hpaˍ Aˍdanˍ leh Eˇvaꞈ hkʼe biˇ ve chaw hpehꞈ ve htawˇ, Yaˬhoˉvaˬ htaꞈ ka tiꞈ maˇ yeˬ ve laˇ? Na hkawˇ chi ve teˇ hpaˍ htaꞈ hkʼaˬ hkʼe hkʼawꞈ laˇ tuˬ le?
15-16. (a) Chaw yaˇ teˇ gʼaˇ le le Yaˬhoˉvaˬ htaꞈ ka tiꞈ yeˬ ve tehꞈ hpeuꞈ maw piˇ tuˬ awˬ yanˇ hkʼaˬ hkʼe htaˇ le? (b) Beˬ ve lawˇ ve awˬ leh meuˇ chi ve teˇ pawˆ hkʼaˬ hkʼe hpehꞈ tuˬ le?
15 1,000 hkʼawꞈ ve awˬ yanˇ htaˇ, Saˍtanˍ htaꞈ miˬ kʼoˍ naˉ jaˇ ve hkʼaw haw tiˍ taˍ tuˬ yoˬ. Oˇ ve teˇ yanˇ yawˇ chaw teˇ gʼaˇ htaꞈ kaꞈ beˬ maˇ gʼa. Yaꞈ hkʼaˇ, 1,000 hkʼawꞈ peuˬ hkʼawꞈ nawˉ, yawˇ htaꞈ hpehˇ piˇ leh biˇ ve chaw yaˇ htaꞈ beˬ yuˬ tuˬ yoˬ. Beˬ ve lawˇ ve awˬ leh meuˇ chi ve teˇ pawˆ biˇ ve chaw yaˇ Yaˬhoˉvaˬ ve awˬ meh htaꞈ yawˆ yan tuˬ laˇ, leh Yaˬhoˉvaˬ uˉ peunˍ ve hpawˇ yawˇ hui chehˇ tuˬ tehꞈ hpeuꞈ maw piˇ tuˬ awˬ yanˇ cawˬ ve yoˬ. (Hpeuꞈ maˍ ve 20:7-10) Co tiꞈ ha tiꞈ gʼa tuˬ liꞈ awˬ hkʼaw lo yawˇ hui ve awˬ meh hkʼaˬ htaˆ kaꞈ cawˬ keunˍ ve tehꞈ gʼa hpeuꞈ maw piˇ ve yoˬ.
16 Gʼuiˬ sha uˉ peunˍ ve htaꞈ maˇ haꞈ yuˬ ve chaw Liꞈ hpu hkʼaw hkʼaˬ hkʼe ma cawˬ ve tehꞈ maˇ gʼa kʼoˆ laˇ taˍ ve htawˇ, maˇ haꞈ yuˬ ve chaw teˇ hpaˍ cawˬ tuˬ yoˬ. Leh yawˇ hui htaꞈ hkʼaˬ hkʼe hpehꞈ la tuˬ le? Hpeuꞈ maˍ ve liꞈ 20:15 hkʼaw kʼoˆ ve, “co tiꞈ ha tiꞈ liꞈ awˬ hkʼaw lo awˬ meh maˇ cawˬ ve chaw hkʼaˬ ve teˇ gʼaˇ htaꞈ maˇ kʼoˆ, aˬ miˍ gʼuiˬ po awˬ hkʼaw lo baˬ keu ve yoˬ.” Chi kʼoˆ gaˇ ve lehˬ Yaˬhoˉvaˬ uˉ peunˍ keunˍ ve htaꞈ maˇ loˍ ve tehꞈ hpeuꞈ maw piˇ ve chaw htaꞈ co co taiˍ taiˍ te luˬ piˇ tuˬ yoˬ. Yaꞈ hkʼaˇ, biˇ ve chaw maˇ˗awˍ ve lehˬ beˬ ve lawˇ ve chi teˇ pawˆ htaꞈ ponˬ tuˬ yoˬ. Leh yawˇ hui ve awˬ meh co tiꞈ ha tiꞈ gʼa tuˬ liꞈ awˬ hkʼaw lo hkʼaˬ htaˆ kaꞈ cawˬ tuˬ yoˬ.
“AWˬ LEH MEUˇ VE AWˬ YANˇ GAˬ LA HTAˇ”
17. Ngaˬ hui ve awˬ co˗e htaꞈ caˉ daꞈ ve mvuhˇ naw ma tcuh yaˇ Daˍyeˍlaˆ htaꞈ aˬ htoꞈ ma kʼoˆ piˇ ve le? (Daˍyeˍlaˆ 12:4, 8-10)
17 Awˬ gʼuˇ suhˍ hpawˇ hpehꞈ la tuˬ ve awˬ ceuˬ teˇ hpaˍ htaꞈ dawˇ nyi htaˇ ha lehˬ jaˇ. Yaꞈ hkʼaˇ, ngaˬ hui ve awˬ co˗e htaꞈ caˉ daꞈ ve Daˍyeˍlaˆ lehˬ mvuhˇ naw ma tcuh yaˇ geh a yeˇ uiˍ ve awˬ lawn gʼa ve yoˬ. Chi lehˬ “awˬ leh meuˇ ve awˬ yanˇ gaˬ la htaˇ” ve awˬ heˆ hpehꞈ ve yoˬ. (Daˍyeˍlaˆ 12:4, 8-10 gʼaw sheˍ; 2 Tiˆmoˉseˍ 3:1-5) Mvuhˇ naw ma tcuh yaˇ Daˍyeˍlaˆ htaꞈ kʼoˆ piˇ ve, “hpehꞈ la chehˇ ve awˬ ceuˬ teˇ hpaˍ htaꞈ na gʼa tuˬ” cuˇ yiˍ maˇ maˇ cawˬ tuˬ yoˬ. Chi kʼoˆ gaˇ ve lehˬ Yaˬhoˉvaˬ ve kanˉ te ve chaw Daˍyeˍlaˆ liꞈ hkʼaw tcuh kaˍ paˍ ve tawˇ hkawˇ htaꞈ na gʼa tuˬ yoˬ. Mvuhˇ naw ma tcuh yaˇ kʼawꞈ kʼoˆ sheˍ ve, awˬ leh meuˇ ve awˬ yanˇ hkʼaw “haiˬ ve chaw teˇ hpaˍ lehˬ, awˬ lawn chi teˇ hpaˍ htaꞈ shiˍ tuˬ ve maˇ heˆ. Yawˇ hui lehˬ, haiˬ ve kanˉ htaꞈ tiˉ te chehˇ tuˬ yoˬ.”
18. Aˉ cheꞈ htaꞈ shuˍ ve haiˬ ve chaw htaꞈ maˇ maw ve awˬ yanˇ aˬ htoꞈ ma hpehꞈ la tuˬ le?
18 Chi beuꞈ teˇ co˗e nyi˗a kʼo, haiˬ ve chaw htaꞈ maˇ ciˍ yanˍ piˇ sheˍ. (Maˍlaˍhkiˆ 3:14, 15) Yaꞈ hkʼaˇ, maˇ maw ve awˬ yanˇ aˉ cheꞈ htaꞈ shuˍ ve chaw htaꞈ yawˬ ehˉ awˬ hkʼaw lo leuˆ tawˆ leh Yeˍsuˆ yawˇ hui htaꞈ suhˉ jehˬ piˇ tuˬ yoˬ. (Maꞈhtehˍ 25:31-33) Haiˬ ve chaw chi teˇ hpaˍ lehˬ uiˍ jaˇ ve tuꞈ ve hkanˍ ve htaꞈ maˇ gʼa ponˬ leh miˬ guiˬ awˬ suhˉ awˬ hkʼaw lo kaꞈ maˇ gʼa teꞈ tu la. Maˍlaˍhkiˆ liꞈ 3:16 hkʼaw kʼoˆ taˍ ve “awˬ meh bvuhꞈ keu taˍ ve caˇ lanˇ liꞈ kʼoˆ teˇ maˬ” hkʼaw yawˇ hui ve awˬ meh maˇ cawˬ.
19. Chi teˇ hkui ngaˬ hui aˬ htoꞈ ma te cawˇ ve le? Leh aˬ htoꞈ ma pa taw le? (Maˍlaˍhkiˆ 3:16-18)
19 Haiˬ ve chaw oˇ ve teˇ moˍ hkʼaw ngaˬ hui maˇ chehˇ ve tehꞈ chi teˇ hkui kaꞈ gʼa hpeuꞈ maw piˇ ve yoˬ. (Maˍlaˍhkiˆ 3:16-18 gʼaw sheˍ.) Yaˬhoˉvaˬ lehˬ ‘yawˇ ve chaw teˇ hpaˍ’ shaw hpoˆ chehˇ ve yoˬ. Chaw chi teˇ hpaˍ lehˬ yawˇ awˬ pon awˬ hpfuhˇ hkʼaˆ jaˇ tehꞈ shawˍ ve yoˬ. Ngaˬ hui kaꞈ awˬ moˍ chi ve hkʼaw ve teˇ gʼaˇ hpehꞈ gaˇ ve yoˬ.
Daˍyeˍlaˆ, ngaˬ hui haꞈ ve chaw, leh suh˗oˬ ve chaw laiˉ lanˬ gʼaˇ, miˬ guiˬ awˬ suhˉ hkʼaw ‘laꞈ shawnˍ yuˬ tuˬ’ kʼawꞈ teꞈ tu la ve htaꞈ ngaˬ hui gʼa mawˬ htaˇ hkʼaˬ hkʼe taw ha lehˬ jaˇ tuˬ ve htaꞈ dawˇ nyi sheˍ. (Awˬ tawn 20 nyi sheˍ)
20. Yaˬhoˉvaˬ Daˍyeˍlaˆ htaꞈ aˬ htoꞈ ma ka tiꞈ te taˍ piˇ ve le? Leh aˬ htoꞈ ma te ka tiꞈ chi htaꞈ nawˬ awˬ tehˬ hpehꞈ la tcuh gaˇ ve le?
20 Ngaˬ hui lehˬ ha lehˬ jaˇ ve awˬ yanˇ hkʼaw chehˇ taˍ ve yoˬ. Yaꞈ hkʼaˇ, chi aꞈ kehˉ ha lehˬ jaˇ tuˬ ve laiˉ ceuˬ cawˬ sheˍ. Haiˬ ve hkʼa peu˗eˬ htaꞈ te luˬ piˇ ve ngaˬ hui gʼa mawˬ tuˬ yoˬ. Peuˬ leh Yaˬhoˉvaˬ Daˍyeˍlaˆ htaꞈ ka tiꞈ te piˇ ve awˬ tehˬ hpehꞈ la tuˬ ve htaꞈ kaꞈ ngaˬ hui gʼa mawˬ tuˬ yoˬ. Oˇ kaˬ lo kʼoˆ ve, “awˬ leh meuˇ teˇ nyi gaˬ kʼo, laꞈ shawnˍ yuˬ tuˬ nawˬ teˇ pawˆ kʼawꞈ teꞈ tu la tuˬ yoˬ.” (Daˍyeˍlaˆ 12:13) Daˍyeˍlaˆ leh nawˬ haꞈ ve chaw suh˗oˬ ve htaꞈ teˇ pawˆ kʼawꞈ teꞈ tu la piˇ htaˇ mawˬ daꞈ gaˇ˗aw laˇ? Mawˬ daꞈ gaˇ ve kʼo, nawˬ awˬ leh hkʼa gaˬ ka tiꞈ yeˬ sheˍ. Co tiꞈ ha tiꞈ gʼa tuˬ liꞈ awˬ hkʼaw lo nawˬ ve awˬ meh cawˬ tuˬ tehꞈ yonˍ gʼa tuˬ yoˬ.
KʼA MUIˬ HKAWˇ 80 Yaˬhoˉvaˬ hkʼaˬ ma daꞈ ve chaˬ nyi sheˍ mehˍ
^ Miˬ guiˬ hkʼoˆ lo teˇ pawˆ kaꞈ maˇ cawˬ jaw sheˍ ve maˍ ve kanˉ uiˍ jaˇ ve Daˍyeˍlaˆ liꞈ 12:2, 3 hkʼaw caˉ daꞈ taˍ ve, na gʼa ve awˬ suhˉ ve awˬ lawn chi ve hkʼaw teˇ geh henˇ tuˬ yoˬ. Hkʼaˬ hkʼe htaˇ hpehꞈ la tuˬ ve leh kanˉ chi ve htaꞈ a shu gʼa ga tuˬ le, ngaˬ hui teˇ geh nyi sheˍ. Chi hkʼoˆ kaꞈ, Yeˍsuˆ uˉ peunˍ ve 1,000 hkʼawꞈ peuˬ htaˇ awˬ leh meuˇ teˇ pawˆ beˬ ve lawˇ ve htaꞈ gu hehnˇ taˍ gʼa tuˬ, maˍ ve kanˉ chi miˬ guiˬ hkʼoˆ lo chehˇ ve chaw htaꞈ gu teh taˍ laˇ ve kaꞈ teˇ geh henˇ tuˬ yoˬ.
^ Awˬ leh meuˇ ve awˬ yanˇ hkʼaw ka tiꞈ yeˬ ve chaw suh˗e ve htaꞈ Yaˬhoˉvaˬ awˉ lawˉ kuˬ tu piˇ ve yoˬ hehˉ. Peuˬ hkʼawꞈ nawˉ suh peuˬ ve chaw htaꞈ teˇ caˉ peuˬ teˇ caˉ kʼawꞈ kuˬ tu piˇ tuˬ yoˬ. Chi hkʼe hpehꞈ ve kʼo, awˬ yanˇ teˇ yanˇ hkʼaw a shaꞈ teꞈ chehˇ jaw ve chaw lehˬ yawˇ hui shiˍ daꞈ ve pa taw haꞈ yuˬ daꞈ gʼa tuˬ yoˬ. “Awˬ yanˇ cawˇ ve hkʼe” kʼawꞈ teꞈ tu la leh mvuhˇ naw ma hkʼoˆ taˆ˗e tuˬ ve htaꞈ Liꞈ hpu hkʼaw kʼoˆ taˍ ve yoˬ. Miˬ guiˬ hkʼoˆ lo kaꞈ awˬ yanˇ cawˇ ve hkʼe kʼawꞈ teꞈ tu la tuˬ yoˬ .—1 Kawˇrenˍhtuˆ 14:33; 15:23.
^ Chi lehˬ Daˍyeˍlaˆ ve tcuh kaˍ paˍ ve tawˇ hkawˇ htaꞈ a yeˇ yuˬ sheˍ! Awˬ lawn 17 leh Shaw nyi kuiˬ Taꞈ yehˬ Ha pa 7 maˬ 1 nyi 1987 hkʼawꞈ liꞈ mehˆ hpfuhˇ 24-30 hkʼaw ngaˬ hui na gʼa ve htaꞈ pa ve yoˬ.
^ Chi lehˬ Tcuh yaˇ liꞈ 24:15 hkʼaw “hteˇ ve chaw” leh “maˇ hteˇ ve chaw” leh Yoˇhanˬ liꞈ 5:29 hkʼaw “daꞈ ve htaꞈ te ve chaw” leh “haiˬ ve htaꞈ te ve chaw” hui htaꞈ peun daꞈ jaˇ. Oˇ ve lehˬ kʼawꞈ teꞈ tu la ve chaw yawˇ hui maˇ suh sheˍ htaˇ te ve awˬ ceuˬ htaꞈ kʼoˆ taˍ ve yoˬ.
