ບົດຄວາມສຶກສາທີ 40
“ຊ່ວຍຫຼາຍຄົນໃຫ້ເຮັດສິ່ງທີ່ຖືກຕ້ອງ”
“ຄົນທີ່ຊ່ວຍຫຼາຍຄົນໃຫ້ເຮັດສິ່ງທີ່ຖືກຕ້ອງຈະສ່ອງແສງຕະຫຼອດໄປຄືກັບດາວ.”—ດາ. 12:3, ລ.ມ.
ເພງ 151 ພະອົງຈະເອີ້ນ
ໃຈຄວາມສຳຄັນ a
1. ໃນລະຫວ່າງການປົກຄອງໜຶ່ງພັນປີ ຈະມີເຫດການຫຍັງເກີດຂຶ້ນ?
ເມື່ອການຄືນມາຈາກຕາຍເລີ່ມຕົ້ນໃນລະຫວ່າງການປົກຄອງຂອງພະເຢຊູໜຶ່ງພັນປີ ນັ້ນຈະເປັນເວລາທີ່ໜ້າຕື່ນເຕັ້ນແລະດີໃຈຫຼາຍແທ້ໆ! ເພາະເຮົາຈະເຫັນຄົນທີ່ເຮົາຮັກກັບມາມີຊີວິດອີກຄັ້ງ ແລະພະເຢໂຫວາກໍຮູ້ສຶກດີໃຈຄືກັນ. (ໂຢບ 14:15) ລອງນຶກພາບວ່າທຸກຄົນທີ່ຢູ່ທົ່ວໂລກຈະມີຄວາມສຸກຫຼາຍສ່ຳໃດເມື່ອເຫັນຄົນທີ່ຮັກຄືນມາຈາກຕາຍ. ຄືກັບທີ່ເຮົາໄດ້ຮຽນໃນບົດຄວາມກ່ອນ “ຄົນດີ” ທີ່ມີຊື່ໃນປຶ້ມລາຍຊື່ຂອງຄົນທີ່ຈະໄດ້ຊີວິດຈະ “ຄືນມາແລ້ວໄດ້ຊີວິດ.” (ກຈກ. 24:15; ຢຮ. 5:29) ບາງທີຄົນທີ່ເຮົາຮັກກໍອາດຈະຖືກປຸກໃຫ້ຄືນມາຈາກຕາຍຫຼັງຈາກຈົບສົງຄາມອາມາເຄໂດນ. b ນອກຈາກນັ້ນ “ຄົນຊົ່ວ” ທີ່ບໍ່ມີໂອກາດໄດ້ຮູ້ຈັກພະເຢໂຫວາຫຼືບໍ່ໄດ້ຮັບໃຊ້ເພິ່ນຢ່າງສັດຊື່ກ່ອນຕາຍກໍຈະຖືກປຸກໃຫ້ ‘ຄືນມາແລ້ວຖືກຕັດສິນ.’
2-3. (ກ) ຕາມເອຊາອີ 11:9, 10 ຈະມີການສອນຫຍັງແດ່ໃນໂຄງການການສອນທີ່ໃຫຍ່ທີ່ສຸດໃນໂລກ? (ຂ) ເຮົາຈະຮຽນຫຍັງໃນບົດຄວາມນີ້?
2 ທຸກຄົນທີ່ຄືນມາຈາກຕາຍຈະຕ້ອງໄດ້ຮັບການສອນ. (ເອຊາ. 26:9; 61:11) ດັ່ງນັ້ນ ພະເຢໂຫວາຈຶ່ງຈັດໃຫ້ມີໂຄງການການສອນທີ່ໃຫຍ່ທີ່ສຸດໃນໂລກແບບທີ່ບໍ່ເຄີຍມີມາກ່ອນ. (ອ່ານເອຊາອີ 11:9, 10) ເປັນຫຍັງຈຶ່ງຕ້ອງມີການສອນ? ເຫດຜົນໜຶ່ງກໍຄື ເພື່ອໃຫ້ຄົນຊົ່ວທີ່ຄືນມາຈາກຕາຍໄດ້ຮຽນຮູ້ກ່ຽວກັບການປົກຄອງຂອງພະເຈົ້າ ຄ່າໄຖ່ຂອງພະເຢຊູ ແລະຄວາມສຳຄັນຂອງຊື່ພະເຢໂຫວາແລະສິດໃນການປົກຄອງຂອງເພິ່ນ. ແມ່ນແຕ່ຄົນດີທີ່ຄືນມາຈາກຕາຍກໍຍັງຕ້ອງໄດ້ຮຽນຮູ້ກ່ຽວກັບຄວາມຕ້ອງການຂອງພະເຢໂຫວາທີ່ຄ່ອຍໆເປີດເຜີຍໃຫ້ເຂົາເຈົ້າຮູ້ ເພາະເຂົາເຈົ້າບາງຄົນກໍຕາຍໄປດົນແລ້ວກ່ອນທີ່ຈະມີຄຳພີໄບເບິນຄົບຊຸດ. ດັ່ງນັ້ນ ທັງຄົນດີແລະຄົນຊົ່ວຈະຕ້ອງໄດ້ຮຽນຮູ້ອີກຫຼາຍຢ່າງ.
3 ໃນບົດຄວາມນີ້ເຮົາຈະຕອບຄຳຖາມຕໍ່ໄປນີ້: ຈະມີການຈັດໂຄງການການສອນທີ່ໃຫຍ່ທີ່ສຸດໃນໂລກແນວໃດ? ໂຄງການນີ້ມີຜົນແນວໃດຕໍ່ທຸກຄົນທີ່ຢາກມີຊື່ຢູ່ໃນປຶ້ມລາຍຊື່ຂອງຄົນທີ່ຈະໄດ້ຊີວິດຢ່າງຖາວອນ? ການຕອບຄຳຖາມເຫຼົ່ານີ້ສຳຄັນຕໍ່ເຮົາຫຼາຍໃນທຸກມື້ນີ້. ນອກຈາກນັ້ນ ເຮົາຍັງຈະມາເບິ່ງຄຳພະຍາກອນທີ່ຢູ່ໃນປຶ້ມດານຽນແລະປຶ້ມພະນິມິດ ເຊິ່ງຊ່ວຍເຮົາໃຫ້ເຂົ້າໃຈສິ່ງທີ່ເກີດຂຶ້ນເມື່ອມີການຄືນມາຈາກຕາຍ. ຕອນນີ້ໃຫ້ເຮົາມາເບິ່ງຄຳພະຍາກອນທີ່ໜ້າຕື່ນເຕັ້ນທີ່ຢູ່ໃນດານຽນ 12:1, 2.
“ຫຼາຍຄົນທີ່ນອນໃນຂີ້ຝຸ່ນດິນຈະຕື່ນຂຶ້ນ”
4-5. ດານຽນ 12:1 ເວົ້າເຖິງສະໄໝສຸດທ້າຍແນວໃດ?
4 ອ່ານດານຽນ 12:1. ປຶ້ມດານຽນເວົ້າເຖິງເຫດການຕ່າງໆທີ່ຈະເກີດຂຶ້ນໃນສະໄໝສຸດທ້າຍ. ຕົວຢ່າງເຊັ່ນ: ໃນດານຽນ 12:1, ລ.ມ. ບອກວ່າ: ມີຄາເອນເຊິ່ງກໍຄືພະເຢຊູຄລິດ “ກຳລັງຊ່ວຍເຫຼືອຄົນຂອງ [ພະເຈົ້າ] ຢູ່.” ຄຳພະຍາກອນສ່ວນນີ້ເລີ່ມສຳເລັດເປັນຈິງໃນປີ 1914 ຕອນທີ່ພະເຢຊູຖືກແຕ່ງຕັ້ງໃຫ້ເປັນກະສັດໃນການປົກຄອງຂອງພະເຈົ້າຢູ່ໃນສະຫວັນ.
5 ດານີເອນຍັງບອກວ່າພະເຢຊູຈະ “ປະຕິບັດການ” ໃນ “ເວລາທີ່ທຸກຍາກລຳບາກເຊິ່ງບໍ່ເຄີຍເກີດຂຶ້ນມາກ່ອນນັບຕັ້ງແຕ່ເລີ່ມມີຊາດໜຶ່ງຈົນຮອດປັດຈຸບັນນີ້.” “ເວລາທີ່ທຸກຍາກລຳບາກ” ນີ້ແມ່ນ “ຄວາມທຸກລຳບາກຄັ້ງໃຫຍ່” ທີ່ເວົ້າໃນມັດທາຍ 24:21. ພະເຢຊູຈະປະຕິບັດການຫຼືປົກປ້ອງຄົນຂອງພະເຢໂຫວາໃນຕອນທ້າຍຂອງຄວາມທຸກລຳບາກຄັ້ງໃຫຍ່ໃນສົງຄາມອາມາເຄໂດນ. ປຶ້ມພະນິມິດເວົ້າເຖິງຄົນຂອງພະເຢໂຫວາກຸ່ມນີ້ວ່າເປັນຄົນຝູງໃຫຍ່ “ທີ່ຜ່ານຄວາມທຸກລຳບາກຄັ້ງໃຫຍ່.”—ພນມ. 7:9, 14
6. ຈະມີຫຍັງເກີດຂຶ້ນຫຼັງຈາກທີ່ຄົນຝູງໃຫຍ່ຜ່ານຄວາມທຸກລຳບາກຄັ້ງໃຫຍ່? ຂໍໃຫ້ອະທິບາຍ. (ຂໍໃຫ້ເບິ່ງ “ຄຳຖາມຈາກຜູ້ອ່ານ” ທີ່ເວົ້າກ່ຽວກັບການຄືນມາຈາກຕາຍທີ່ຈະເກີດຂຶ້ນໃນໂລກໃນຫໍສັງເກດການ ສະບັບນີ້.)
6 ອ່ານດານຽນ 12:2. ຈະມີຫຍັງເກີດຂຶ້ນຫຼັງຈາກທີ່ຄົນຝູງໃຫຍ່ຜ່ານຄວາມທຸກລຳບາກຄັ້ງໃຫຍ່? ແຕ່ກ່ອນ ເຮົາເຂົ້າໃຈວ່າຄຳພະຍາກອນນີ້ໝາຍເຖິງການກັບມາເຮັດວຽກປະກາດອີກເທື່ອໜຶ່ງຫຼັງຈາກທີ່ວຽກນີ້ເກືອບຢຸດຊະງັກໃນປີ 1918. c ແຕ່ຕອນນີ້ມີຄວາມເຂົ້າໃຈໃໝ່ວ່າຄຳພະຍາກອນນີ້ໝາຍເຖິງການຄືນມາຈາກຕາຍທີ່ຈະເກີດຂຶ້ນໃນໂລກໃໝ່. ເປັນຫຍັງເຮົາຈຶ່ງສະຫຼຸບແບບນັ້ນ? ກໍຍ້ອນຄຳວ່າ “ຂີ້ຝຸ່ນດິນ” ໃນດານຽນ 12:2 ມີຄວາມໝາຍດຽວກັນກັບຄຳວ່າ “ຂຸມຝັງສົບ” ທີ່ເວົ້າໃນໂຢບ 17:16. ດັ່ງນັ້ນ ເຮົາຈຶ່ງສະຫຼຸບວ່າດານຽນ 12:2 ຕ້ອງໝາຍເຖິງການຄືນມາຈາກຕາຍທີ່ຈະເກີດຂຶ້ນຫຼັງຈາກທີ່ສະໄໝສຸດທ້າຍແລະສົງຄາມອາມາເຄໂດນສິ້ນສຸດລົງ.
7. (ກ) ບາງຄົນທີ່ຄືນມາຈາກຕາຍເພື່ອຈະ “ມີຊີວິດຕະຫຼອດໄປ” ໝາຍຄວາມວ່າແນວໃດ? (ຂ) ເປັນຫຍັງນີ້ຈຶ່ງເປັນການ “ຄືນມາຈາກຕາຍໃນແບບທີ່ດີກວ່າ”?
7 ດານຽນ 12:2 ໝາຍຄວາມວ່າແນວໃດເມື່ອບອກວ່າບາງຄົນຈະຄືນມາຈາກຕາຍເພື່ອ “ມີຊີວິດຕະຫຼອດໄປ”? ໝາຍຄວາມວ່າໃນລະຫວ່າງ 1.000 ປີ ຜູ້ທີ່ຄືນມາຈາກຕາຍຈະໄດ້ຮຽນຮູ້ເລື່ອງຂອງພະເຢໂຫວາແລະຮຽນຮູ້ ເລື່ອງຂອງເພິ່ນຕໍ່ໆໄປ ແລະເຊື່ອຟັງພະເຢໂຫວາແລະພະເຢຊູເພື່ອຈະໄດ້ຮັບຊີວິດຕະຫຼອດໄປ. (ຢຮ. 17:3) ນີ້ເປັນການ “ຄືນມາຈາກຕາຍໃນແບບທີ່ດີກວ່າ” ການຄືນມາຈາກຕາຍຂອງຄົນໃນສະໄໝກ່ອນ ເພາະຄົນເຫຼົ່ານັ້ນຍັງຈະຕ້ອງຕາຍອີກ.—ຮຣ. 11:35
8. ບາງຄົນຈະຄືນມາຈາກຕາຍເພື່ອຮັບ “ຄວາມອັບອາຍຕະຫຼອດໄປ” ໝາຍຄວາມວ່າແນວໃດ?
8 ແຕ່ບໍ່ແມ່ນທຸກຄົນທີ່ຄືນມາຈາກຕາຍຈະຍອມຮັບການສອນຈາກພະເຢໂຫວາ. ເພາະຄຳພະຍາກອນຂອງດານີເອນບອກວ່າບາງຄົນຈະຄືນມາຈາກຕາຍເພື່ອຮັບ “ຄວາມອັບອາຍຕະຫຼອດໄປ.” ຍ້ອນເຂົາເຈົ້າສະແດງໃຫ້ເຫັນຢ່າງຈະແຈ້ງວ່າເຂົາເຈົ້າບໍ່ຍອມຢູ່ພາຍໃຕ້ການປົກຄອງຂອງພະເຢໂຫວາ ເຂົາເຈົ້າຈຶ່ງບໍ່ມີຊື່ຢູ່ໃນປຶ້ມລາຍຊື່ຂອງຄົນທີ່ຈະໄດ້ຊີວິດ ແລະຈະບໍ່ໄດ້ຮັບຊີວິດຕະຫຼອດໄປ. ແຕ່ເຂົາເຈົ້າຈະໄດ້ຮັບ “ຄວາມອັບອາຍຕະຫຼອດໄປ.” ຫຼືຖືກທຳລາຍຕະຫຼອດໄປ. ດັ່ງນັ້ນ ດານຽນ 12:2 ຈຶ່ງເວົ້າເຖິງຜົນສຸດທ້າຍທີ່ຈະເກີດຂຶ້ນກັບທຸກຄົນທີ່ຄືນມາຈາກຕາຍໂດຍເບິ່ງຈາກການກະທຳຂອງເຂົາເຈົ້າຫຼັງຈາກ ທີ່ຄືນມາຈາກຕາຍ. d (ພນມ. 20:12) ບາງຄົນຈະໄດ້ຮັບຊີວິດຕະຫຼອດໄປ ສ່ວນບາງຄົນຈະຖືກທຳລາຍ.
“ຊ່ວຍຫຼາຍຄົນໃຫ້ເຮັດສິ່ງທີ່ຖືກຕ້ອງ”
9-10. ມີຫຍັງອີກທີ່ຈະເກີດຂຶ້ນຫຼັງຈາກຄວາມທຸກລຳບາກຄັ້ງໃຫຍ່ ແລະໃຜ “ຈະສ່ອງແສງຄືກັບທ້ອງຟ້າທີ່ແຈ້ງໆໃນຕອນກາງເວັນ”?
9 ອ່ານດານຽນ 12:3. ມີຫຍັງອີກທີ່ຈະເກີດຂຶ້ນຫຼັງຈາກ “ເວລາທີ່ທຸກຍາກລຳບາກ”? ດານຽນ 12:3 ເວົ້າເຖິງບາງຢ່າງທີ່ຈະເກີດຂຶ້ນຫຼັງຈາກ ຄວາມທຸກລຳບາກຄັ້ງໃຫຍ່.
10 ໃຜ “ຈະສ່ອງແສງຄືກັບທ້ອງຟ້າທີ່ແຈ້ງໆໃນຕອນກາງເວັນ”? ເຮົາຮູ້ຄຳຕອບນີ້ຈາກຄຳເວົ້າຂອງພະເຢຊູທີ່ຢູ່ໃນມັດທາຍ 13:43 ທີ່ບອກວ່າ: “ໃນເວລານັ້ນ ຄົນທີ່ພະເຈົ້າຍອມຮັບຈະມີສ່ວນໃນການປົກຄອງຂອງພະອົງຜູ້ເປັນພໍ່ ທີ່ຢູ່ໃນສະຫວັນ ແລະພວກເຂົາຈະສ່ອງແສງກ້າຄືກັບດວງຕາເວັນ.” ໃນຂໍ້ນີ້ພະເຢຊູກຳລັງເວົ້າເຖິງ “ຄົນທີ່ຈະມີສ່ວນໃນການປົກຄອງທີ່ຢູ່ໃນສະຫວັນ” ເຊິ່ງກໍຄືຜູ້ຖືກເຈີມທີ່ຈະຮ່ວມປົກຄອງກັບພະເຢຊູໃນການປົກຄອງທີ່ຢູ່ໃນສະຫວັນ. (ມທ. 13:38) ດັ່ງນັ້ນ ດານຽນ 12:3 ຈຶ່ງໝາຍເຖິງຜູ້ຖືກເຈີມທີ່ເຮັດວຽກຮ່ວມກັບພະເຢຊູໃນລະຫວ່າງການປົກຄອງໜຶ່ງພັນປີ.
144.000 ຄົນຈະເຮັດວຽກຮ່ວມກັບພະເຢຊູຢ່າງໃກ້ຊິດໃນການຊີ້ນຳໂຄງການການສອນໃນລະຫວ່າງການປົກຄອງ 1.000 ປີ (ເບິ່ງຂໍ້ 11)
11-12. 144.000 ຄົນຈະເຮັດວຽກຫຍັງໃນລະຫວ່າງການປົກຄອງ 1.000 ປີ?
11 ຜູ້ຖືກເຈີມຈະ “ຊ່ວຍຫຼາຍຄົນໃຫ້ເຮັດສິ່ງທີ່ຖືກຕ້ອງ” ແນວໃດ? ຜູ້ຖືກເຈີມຈະເຮັດວຽກຮ່ວມກັບພະເຢຊູໃນການຊີ້ນຳໂຄງການການສອນທົ່ວໂລກໃນລະຫວ່າງການປົກຄອງ 1.000 ປີ. ຜູ້ຖືກເຈີມ 144.000 ຄົນຈະບໍ່ພຽງແຕ່ຮ່ວມປົກຄອງເປັນກະສັດເທົ່ານັ້ນ ແຕ່ຍັງຈະເປັນປະໂລຫິດນຳ. (ພນມ. 1:6; 5:10; 20:6) ນີ້ໝາຍຄວາມວ່າເຂົາເຈົ້າຈະຊ່ວຍ “ປິ່ນປົວຜູ້ຄົນຈາກຊາດຕ່າງໆ” ແລະຈະຊ່ວຍມະນຸດໃຫ້ຄ່ອຍໆກາຍເປັນຄົນທີ່ສົມບູນແບບ. (ພນມ. 22:1, 2; ເອເຊກ. 47:12) ຜູ້ຖືກເຈີມຄືຊິມີຄວາມສຸກຫຼາຍແທ້ໆໃນການເຮັດວຽກນີ້!
12 ໃຜແດ່ທີ່ຈະຢູ່ໃນກຸ່ມ “ຫຼາຍຄົນ” ທີ່ຖືກຊ່ວຍໃຫ້ເຮັດສິ່ງທີ່ຖືກຕ້ອງ? ຄົນກຸ່ມນີ້ລວມມີຄົນທີ່ຖືກປຸກໃຫ້ຄືນມາຈາກຕາຍ ຜູ້ທີ່ລອດຜ່ານສົງຄາມອາມາເຄໂດນ ແລະອາດຈະລວມເຖິງເດັກນ້ອຍທີ່ເກີດໃນໂລກໃໝ່. ໃນຕອນທ້າຍຂອງການປົກຄອງ 1.000 ປີ ທຸກຄົນທີ່ມີຊີວິດຢູ່ໃນໂລກນີ້ຈະກາຍເປັນຄົນທີ່ສົມບູນແບບ. ແລ້ວຊື່ຂອງເຂົາເຈົ້າຈະຖືກຂຽນໄວ້ໃນປຶ້ມລາຍຊື່ຂອງຄົນທີ່ຈະໄດ້ຊີວິດຢ່າງຖາວອນຕອນໃດ?
ການທົດສອບຄັ້ງສຸດທ້າຍ
13-14. ທຸກຄົນທີ່ເປັນຄົນສົມບູນແບບຕ້ອງເຮັດຫຍັງກ່ອນເພື່ອຈະໄດ້ຊີວິດຕະຫຼອດໄປ?
13 ເຮົາຕ້ອງຈື່ໄວ້ວ່າການເປັນຄົນທີ່ສົມບູນແບບບໍ່ໄດ້ໝາຍຄວາມວ່າຈະມີຊີວິດຕະຫຼອດໄປແບບອັດຕະໂນມັດ. ເຮົາເຫັນເລື່ອງນີ້ໄດ້ຈາກເລື່ອງຂອງອາດາມແລະເອວາ. ເຖິງເຂົາເຈົ້າຈະເປັນຄົນທີ່ສົມບູນແບບ ແຕ່ເຂົາເຈົ້າກໍຕ້ອງສະແດງໃຫ້ເຫັນວ່າເຊື່ອຟັງພະເຢໂຫວາເພື່ອຈະມີຊີວິດຕະຫຼອດໄປ. ແຕ່ໜ້າເສຍດາຍທີ່ເຂົາເຈົ້າບໍ່ໄດ້ເຊື່ອຟັງເພິ່ນ.—ຣມ. 5:12
14 ເມື່ອຮອດທ້າຍ 1.000 ປີ ທຸກຄົນຈະກາຍເປັນຄົນທີ່ສົມບູນແບບ. ແຕ່ທຸກຄົນຈະເລືອກຢູ່ຝ່າຍການປົກຄອງຂອງພະເຢໂຫວາບໍ? ຫຼືບາງຄົນຈະເປັນຄືກັບອາດາມແລະເອວາທີ່ເປັນຄົນສົມບູນແບບແຕ່ພັດບໍ່ໄດ້ເລືອກຢູ່ຝ່າຍພະເຢໂຫວາ? ໃຫ້ເຮົາມາເບິ່ງວ່າຈະມີການຕອບຄຳຖາມນີ້ແນວໃດ.
15-16. (ກ) ມະນຸດທຸກຄົນຈະຕ້ອງພິສູດຄວາມສັດຊື່ຕໍ່ພະເຢໂຫວາຕອນໃດ? (ຂ) ການທົດສອບຄັ້ງສຸດທ້າຍຈະເປັນແນວໃດ?
15 ໃນລະຫວ່າງການປົກຄອງ 1.000 ປີ ຊາຕານຈະຖືກຂັງໄວ້ ແລະມັນຈະບໍ່ສາມາດອອກມາລໍ້ລວງຜູ້ຄົນໄດ້. ແຕ່ໃນຕອນທ້າຍ 1.000 ປີ ມັນຈະຖືກປ່ອຍອອກມາແລະພະຍາຍາມລໍ້ລວງມະນຸດບໍ່ໃຫ້ເຊື່ອຟັງພະເຢໂຫວາ. ໃນຕອນນັ້ນ ມະນຸດທີ່ສົມບູນແບບທຸກຄົນຈະຕ້ອງພິສູດວ່າເຂົາເຈົ້າຈະເລືອກຢູ່ຝ່າຍພະເຢໂຫວາແລະການປົກຄອງຂອງເພິ່ນຫຼືບໍ່. (ພນມ. 20:7-10) ການພິສູດຂອງແຕ່ລະຄົນຈະເປັນໂຕກຳນົດວ່າເຂົາເຈົ້າຈະມີຊື່ຢູ່ໃນປຶ້ມລາຍຊື່ຂອງຄົນທີ່ຈະໄດ້ຊີວິດຢ່າງຖາວອນຫຼືບໍ່.
16 ຄຳພີໄບເບິນບອກວ່າຈະມີຄົນຈຳນວນໜຶ່ງທີ່ເປັນຄືກັບອາດາມແລະເອວາ ເຊິ່ງບໍ່ຍອມຮັບການປົກຄອງຂອງພະເຢໂຫວາ. ແລ້ວຈະເກີດຫຍັງຂຶ້ນກັບຄົນເຫຼົ່ານັ້ນ? ພະນິມິດ 20:15 ບອກວ່າ: “ຜູ້ໃດທີ່ບໍ່ມີຊື່ຢູ່ໃນປຶ້ມລາຍຊື່ຂອງຄົນທີ່ຈະໄດ້ຊີວິດກໍຖືກໂຍນລົງໃນບຶງໄຟ.” ນີ້ສະແດງວ່າເຂົາເຈົ້າຈະຖືກທຳລາຍຕະຫຼອດໄປ. ແຕ່ຄົນສ່ວນຫຼາຍຈະຜ່ານການທົດສອບຄັ້ງສຸດທ້າຍນີ້ ແລະຊື່ຂອງເຂົາເຈົ້າກໍຈະຖືກຂຽນໄວ້ຢ່າງຖາວອນໃນປຶ້ມລາຍຊື່ຂອງຄົນທີ່ຈະໄດ້ຊີວິດ.
ໃນ “ສະໄໝສຸດທ້າຍ”
17. ດານີເອນຂຽນວ່າຈະເກີດຫຍັງຂຶ້ນໃນສະໄໝສຸດທ້າຍ? (ດານຽນ 12:4, 8-10)
17 ເຮົາຮູ້ສຶກຕື່ນເຕັ້ນຫຼາຍແທ້ໆເມື່ອຄິດເຖິງເຫດການທີ່ຈະເກີດຂຶ້ນໃນອະນາຄົດ! ແຕ່ທູດສະຫວັນຍັງໄດ້ບອກດານີເອນໃຫ້ຮູ້ເລື່ອງທີ່ສຳຄັນຢ່າງໜຶ່ງທີ່ຈະເກີດຂຶ້ນໃນ “ສະໄໝສຸດທ້າຍ.” (ອ່ານດານຽນ 12:4, 8-10, ລ.ມ.; 2 ຕມ. 3:1-5) ທູດສະຫວັນບອກວ່າ: “ຄວາມຮູ້ແທ້ຈະມີຫຼາຍແທ້ຫຼາຍວ່າ.” ນີ້ໝາຍຄວາມວ່າຄົນຂອງພະເຢໂຫວາຈະເຂົ້າໃຈຄຳພະຍາກອນຂອງດານີເອນຫຼາຍຂຶ້ນ. ແລະທູດສະຫວັນຍັງບອກອີກວ່າ ໃນເວລານັ້ນ ‘ຄົນຊົ່ວຈະເຮັດຊົ່ວຕໍ່ໄປແລະຄົນຊົ່ວຈະບໍ່ເຂົ້າໃຈເລື່ອງເຫຼົ່ານີ້.’
18. ອີກບໍ່ດົນຈະເກີດຫຍັງຂຶ້ນກັບຄົນຊົ່ວ?
18 ໃນທຸກມື້ນີ້ເບິ່ງຄືວ່າຄົນທີ່ເຮັດຊົ່ວບໍ່ໄດ້ຖືກລົງໂທດ. (ມລກີ. 3:14, 15) ແຕ່ອີກບໍ່ດົນ ພະເຢຊູຈະຕັດສິນຄົນເຫຼົ່ານັ້ນວ່າເປັນແບ້ ແລະເພິ່ນຈະແຍກແບ້ອອກຈາກແກະ. (ມທ. 25:31-33) ຄົນຊົ່ວເຫຼົ່ານັ້ນຈະບໍ່ລອດຜ່ານຄວາມທຸກລຳບາກຄັ້ງໃຫຍ່ ແລະຈະບໍ່ຖືກປຸກໃຫ້ຄືນມາຈາກຕາຍໃນໂລກໃໝ່. ດັ່ງນັ້ນ ເຂົາເຈົ້າຈະບໍ່ມີຊື່ຢູ່ໃນ “ໜັງສືທີ່ລະນຶກ” ທີ່ເວົ້າຢູ່ໃນມາລາກີ 3:16.
19. ຕອນນີ້ເປັນເວລາທີ່ເຮົາຕ້ອງເຮັດຫຍັງ ແລະຍ້ອນຫຍັງ? (ມາລາກີ 3:16-18)
19 ຕອນນີ້ເປັນເວລາທີ່ເຮົາຈະພິສູດວ່າເຮົາບໍ່ໄດ້ຢູ່ໃນກຸ່ມຂອງຄົນຊົ່ວ. (ອ່ານມາລາກີ 3:16-18, ລ.ມ.) e ເພາະພະເຢໂຫວາກຳລັງລວບລວມຄົນທີ່ຈະຢູ່ໃນກຸ່ມ ‘ຊົນຊາດທີ່ພິເສດ,’ ຫຼືຄົນທີ່ເພິ່ນຮັກເປັນພິເສດ. ເຮົາຄືຊິຢາກຢູ່ໃນກຸ່ມຄົນເຫຼົ່ານີ້ແມ່ນບໍ?
ເຮົາຈະຮູ້ສຶກຕື່ນເຕັ້ນແທ້ໆເມື່ອເຫັນດານີເອນ ຄົນທີ່ເຮົາຮັກ ແລະຄົນອື່ນໆ “ລຸກຂຶ້ນ” ໃນໂລກໃໝ່! (ເບິ່ງຂໍ້ 20)
20. ສິ່ງສຸດທ້າຍທີ່ພະເຢໂຫວາສັນຍາກັບດານີເອນແມ່ນຫຍັງ ແລະເປັນຫຍັງເຈົ້າຈຶ່ງຢາກເຫັນຄຳສັນຍານີ້ເກີດຂຶ້ນແທ້?
20 ເຖິງວ່າເຮົາຈະມີຊີວິດຢູ່ໃນສະໄໝທີ່ໜ້າຕື່ນເຕັ້ນ ແຕ່ຍັງຈະມີເລື່ອງທີ່ໜ້າຕື່ນເຕັ້ນຫຼາຍກວ່ານີ້ອີກ! ເພາະອີກບໍ່ດົນເຮົາຈະເຫັນຄວາມຊົ່ວຖືກກຳຈັດອອກໄປທັງໝົດ. ແລະຈະເຫັນຄຳສັນຍາທີ່ພະເຢໂຫວາເວົ້າກັບດານີເອນສຳເລັດເປັນຈິງທີ່ວ່າ: “ເຈົ້າຈະລຸກຂຶ້ນມາຮັບສ່ວນແບ່ງຂອງເຈົ້າເມື່ອຮອດເວລາ.” (ດາ. 12:13, ລ.ມ.) ເຈົ້າຢາກເຫັນມື້ທີ່ດານີເອນແລະຄົນທີ່ເຈົ້າຮັກ “ລຸກຂຶ້ນ” ຫຼື ຄືນມາຈາກຕາຍບໍ? ຖ້າເປັນແນວນັ້ນ ຂໍໃຫ້ເຈົ້າຮັກສາຄວາມສັດຊື່ຕັ້ງແຕ່ຕອນນີ້ ແລະເຮັດໃຫ້ແນ່ໃຈວ່າຊື່ຂອງເຈົ້າຍັງຢູ່ໃນປຶ້ມລາຍຊື່ຂອງຄົນທີ່ຈະໄດ້ຊີວິດ.
ເພງ 80 “ລອງຊີມແລ້ວຈະຮູ້ວ່າພະເຢໂຫວາດີ”
a ບົດຄວາມນີ້ຈະປັບຄວາມເຂົ້າໃຈກ່ຽວກັບໂຄງການການສອນທີ່ໃຫຍ່ທີ່ສຸດໃນໂລກທີ່ເວົ້າໃນດານຽນ 12:2, 3. ເຮົາຈະໄດ້ເຫັນວ່າໂຄງການການສອນນີ້ຈະເລີ່ມຕົ້ນຕອນໃດ ແລະໃຜຈະມີສ່ວນຮ່ວມ. ນອກຈາກນັ້ນ ເຮົາຍັງຈະມາເບິ່ງວ່າ ໂຄງການການສອນນີ້ຈະກຽມທຸກຄົນໃນໂລກແນວໃດໃຫ້ພ້ອມສຳລັບການທົດສອບຄັ້ງສຸດທ້າຍໃນຕອນທ້າຍການປົກຄອງຂອງພະເຢຊູໜຶ່ງພັນປີ.
b ການຄືນມາຈາກຕາຍອາດຈະເລີ່ມຕົ້ນໂດຍການປຸກຜູ້ຮັບໃຊ້ທີ່ສັດຊື່ທີ່ຕາຍໃນສະໄໝສຸດທ້າຍ. ຈາກນັ້ນ ກໍປຸກຄົນທີ່ຕາຍກ່ອນໜ້ານັ້ນຕາມລຳດັບເທື່ອລະລຸ້ນ. ຖ້າເປັນແບບນີ້ ຄົນແຕ່ລະລຸ້ນກໍຈະມີໂອກາດໄດ້ຕ້ອນຮັບຄົນທີ່ເຂົາເຈົ້າຮູ້ຈັກ. ຄຳພີໄບເບິນບອກວ່າການຄືນມາຈາກຕາຍເພື່ອໄປສະຫວັນຈະ “ເປັນໄປຕາມລຳດັບ” ດັ່ງນັ້ນ ເຮົາຈຶ່ງສະຫຼຸບໄດ້ວ່າ ການຄືນມາຈາກຕາຍເພື່ອມີຊີວິດຢູ່ໃນໂລກກໍຈະເປັນໄປຕາມລຳດັບຄືກັນ.—1 ກຣ. 14:33; 15:23
c ຄຳອະທິບາຍນີ້ເປັນການປັບປ່ຽນຄວາມເຂົ້າໃຈທີ່ຢູ່ໃນປຶ້ມຈົ່ງເອົາໃຈໃສ່ຄຳພະຍາກອນຂອງດານີເອນ! ບົດ 17 (ພາສາໄທ) ແລະຫໍສັງເກດການ 1 ກໍລະກົດ 1987 ໜ້າ 21-25 (ພາສາອັງກິດ).
d ຄຳວ່າ “ຄົນດີ” ແລະ “ຄົນຊົ່ວ” ຢູ່ໃນກິດຈະການ 24:15 ແລະຄຳວ່າ “ຄົນທີ່ເຮັດດີ” ແລະ “ຄົນທີ່ເຮັດຊົ່ວ” ທີ່ຢູ່ໃນໂຢຮັນ 5:29 ເວົ້າເຖິງການກະທຳຂອງຄົນທີ່ຄືນມາຈາກຕາຍກ່ອນ ທີ່ເຂົາເຈົ້າຕາຍ.
e ມາລາກີ 3:16-18 (ລ.ມ.): “ເມື່ອເປັນແບບນີ້ ຄົນທີ່ຢ້ານຢຳພະເຢໂຫວາກໍເລີຍລົມກັນ ແລະພະເຢໂຫວາສົນໃຈຟັງສິ່ງທີ່ເຂົາເຈົ້າເວົ້າ. ພະອົງສັ່ງໃຫ້ຂຽນປຶ້ມທີ່ບັນທຶກຊື່ຄົນທີ່ພະອົງຈື່ ຄືຄົນທີ່ຢ້ານຢຳພະເຢໂຫວາແລະລະນຶກເຖິງຊື່ຂອງພະອົງ. ພະເຢໂຫວາຜູ້ເປັນຈອມທັບເວົ້າວ່າ ‘ເຮົາຈະໃຫ້ເຂົາເຈົ້າເປັນປະຊາຊົນຂອງເຮົາ ແລະໃນວັນນັ້ນເຂົາເຈົ້າຈະເປັນຊົນຊາດທີ່ພິເສດ ແລະເຮົາຈະສະແດງຄວາມຮັກຄວາມເມດຕາຕໍ່ເຂົາເຈົ້າຄືພໍ່ສະແດງຕໍ່ລູກທີ່ເຊື່ອຟັງ ແລະພວກເຈົ້າຈະເຫັນອີກຄັ້ງໜຶ່ງເຖິງຄວາມແຕກຕ່າງລະຫວ່າງຄົນດີແລະຄົນຊົ່ວ ລະຫວ່າງທີ່ຮັບໃຊ້ພະເຈົ້າແລະຄົນທີ່ບໍ່ໄດ້ຮັບໃຊ້ພະອົງ.’”
