CHIHANDE CHAKULINANGULA 40
“Kukafwa Vatu Vavavulu Mangana Vapwenga Vaka-Kwoloka”
“Vaze vali nakukafwa vatu vavavulu mangana vapwenga vaka-kwoloka navakamunyika nge vatanganyika haya myaka namyaka.”—NDANYE. 12:3.
MWASO 151 Mwakasanyika
VYUMA NATUSHIMUTWILA *
1. Vyuma muka vyakwivwisa kuwaha vize navikasoloka muChiyulo chaMyaka 1,000?
OCHO kuwaha kana natukevwa halikumbi lize navakaputuka kusanguka vatu hano hamavu muChiyulo chaKulishitu chaMyaka 1,000. Vosena vaze vafwisa vatu vaze vazanga vafwila kukamona cheka vatu kana. Omu mukiko naYehova afwila. (Yopa 14:15) Achishinganyekenu kuwaha navakevwa vatu vosena hano hamavu hakumona vatu vazanga vaze vafwile vanavasangula. Ngana muze twalinangulanga muchihande chinafumuho, “vaka-kwoloka” vaze vakwechi majina avo vasoneka mumukanda wakuyoya “navakasangukila kukuyoya.” (Vili. 24:15; Yowa. 5:29) Pamo vatu vavavulu vaze twazanga navakapwa hamukana wavaze navakalivanga kusanguka. * Kaha nawa “vaka-kuhenga” vaze kavatachikijile Yehovako chipwe kumuzachila shimbu kanda vafwenga, “navakasangukila kukuvasopesa.”
2-3. (a) Ngana muze vasolola hali Isaya 11:9, 10, mulimo muka waunene naukapwako? (b) Vyuma muka natushimutwila muchihande chino?
2 Vosena vaze navakasanguka navakasakiwa kuvanangula. (Isa. 26:9; 61:11) Shikaho nakukasakiwa kuzata mulimo waunene wakunangula uze kanda upwengangaho lyehi hano hamavu. (Tangenu Isaya 11:9, 10.) Mwomwo ika? Mwomwo yavyuma vino: Vaka-kuhenga vaze navakasanguka navakasakiwa kutachikiza Yesu Kulishitu, navyuma valongesa muWangana, nandando yakusokola, nachihande chize chakwata halijina lyaYehova nahawata wenyi. Kaha nawa vaka-kwoloka vaze navakasanguka navakasakiwa kuvalweza vyuma vize Yehova nalumbunwinanga vatu jenyi chindende chindende kutalisa kuvyuma ajina hano hamavu. Ava vatu vamwe vakushishika, vafwile shimbu kanda Mbimbiliya yosena yikume kuyisoneka. Chikupu vene, vaka-kuhenga navaka-kwoloka navakasakiwa kulinangula vyavivulu.
3 Muchihande chino, natushimutwila havihula vinakavangizaho: Uno ou mulimo waunene wakunangula navakauzata ngachilihi? Vyuma muka navikasoloka kuli vaze navakakula kanawa kuvyuma navakavanangula? Kaha nawa vyuma muka navikasoloka kuli vaze kaveshi kukakula kanawako? Kutachikiza mwakukumbulwila vihula kana chapwa chachilemu kuli yetu tuvosena makumbi ano. Ngana muze natumona, upolofweto umwe uze vasoneka mumukanda waNdanyele naKusoloka nautukafwa twivwishise kanawa vyuma navikasoloka omu vafu navakasanguka. Chatete, tushimutwilenu havyuma vyamwaza navikasoloka vize vahanjikilile chimweza muupolofweto vasoneka hali Ndanyele 12:1, 2.
“VAZE VANASAVALA KWISHI YAMAVU NAVAKAHINDUKA”
4-5. Uno mukanda waNdanyele 12:1 wasolola vyuma muka kutalisa kumakumbi akukuminyina?
4 Tangenu Ndanyele 12:1. Mukanda waNdanyele wasolola vyuma vyamwaza vyakulikavasana vize navikasoloka kumakumbi akukuminyina. Chakutalilaho, mukanda waNdanyele 12:1 wamba ngwawo, Mikayele uze apwa Yesu Kulishitu “mwakemanyinako vatu [jaKalunga].” Upolofweto kana waputukile kutesamo mu 1914 omu Yesu vamutongwele kupwa Mwangana waWangana waKalunga uze watwama mwilu.
5 Ndanyele vamulwezele nawa ngwavo, Yesu “mwakemana” “[ha]lwola lwavihuli vize kanda visolokengaho lyehi kufuma haze waputukile muyachi watete nakuheta kulwola kana.” Elu “lwola lwavihuli” lwapwa “luyando lwalunene” luze vavuluka hali Mateu 24:21. Yesu mwakemana, chipwe ngwetu mwakakinga vatu jaKalunga haAlamangetone kusongo yalwola lwavihuli. Mukanda waKusoloka wavuluka ava vatu jaKalunga kupwa liyongomena lyalinene, “vaze vanafumu muluyando lwalunene.”—Kuso. 7:9, 14.
6. Vyuma muka navikasoloka nge liyongomena lyalinene linayovoka lyehi luyando lwalunene? Lumbununenu. (Talenu nawa chihande chakwamba ngwavo “Vihula Vyakufuma Kuli Vaka-Kutanga” chize chili mumangazini yino chakutalisa kukusanguka chavatu vaze navakayoyela hano hamavu.)
6 Tangenu Ndanyele 12:2. Vyuma muka navikasoloka nge liyongomena lyalinene linayovoka lyehi lwola lwavihuli? Ou upolofweto kawatalisa kukusanguka chachifwanyisa, kulumbununa kuhinduka chakushipilitu chavangamba jaKalunga chize chinasolokanga hamakumbi akukuminyina, ngana muze twevwishishile hakavangako. * Oloze awa mazu atalisa kukusanguka chavafu chize nachikapwako mukaye kakahya kaze kali nakwiza kulutwe. Mwomwo ika tunahanjikila ngocho? Mazu valumuna ngwavo “kwishi yamavu” hali Ndanyele 12:2 vawalumuna ngwavo “lukungu” hali Yopa 17:16. Shikaho mazu ahali Yopa 17:16 asolola chikupu nge lizu “lukungu” lyatalisa ‘kuFuka.’ Unjiho kana wasolola nge mazu ahali Ndanyele 12:2 atalisa kukusanguka chivene chize nachikapwako nge makumbi akukuminyina anakumu, nahanyima yajita yaAlamangetone.
7. (a) Uno vatu vamwe navakasangukila ngachilihi “[ku]kuyoya chahaya myaka yosena”? (b) Mwomwo ika nachikapwila “kusanguka chamwenemwene”?
7 Uno chisoneka chaNdanyele 12:2 chalumbununa ika hakwamba ngwacho vamwe navakatambula “kuyoya haya myaka yosena”? Echi chalumbununa nge, vaze navakasanguka nakutachikiza Yehova naYesu chipwe kutwalaho lika kuvatachikiza nakuvononoka mumyaka 1,000, navakayoya haya myaka. (Yowa. 17:3) Echi nachikapwa “kusanguka chamwenemwene” kuhambakana chize chakushikulu. (Hepe. 11:35) Mwomwo ika? Mwomwo vatu vaze vasangwile kushikulu vafwile cheka.
8. Uno vamwe navakasangukila ngachilihi ‘kukuvasaula nakukuvalumbilisa haya myaka yosena’?
8 Oloze tachikizenu ngwenu, vatu vamwe vaze navakasanguka navakakana kuvanangula kuli Yehova. Upolofweto waNdanyele wahanjika ngwawo vamwe navakasangukila ‘kukuvasaula nakukuvalumbilisa haya myaka yosena.’ Hakuwana nge navakasolola muchima wakulikanga, ngocho majina avo kaveshi kukawasoneka mumukanda wakuyoyako, kaha nawa kaveshi kukatambula kuyoya chahaya myakako. Oloze ‘navakavalumbilisa haya myaka yosena,’ chipwe ngwetu kuvanongesa. Shikaho, mukanda waNdanyele 12:2 uli nakutalisa kuvyuma vize navikasoloka kuvatu vosena vaze navakasanguka, kweseka navyuma navakalinga hanyima yakuvasangula. * (Kuso. 20:12) Vamwe navakayoya chahaya myaka, oloze veka chiku.
“KUKAFWA VATU VAVAVULU MANGANA VAPWENGA VAKA-KWOLOKA”
9-10. Vyuma muka vikwavo navikasoloka hanyima yaluyando lwalunene, kaha veya “navakamunyika nge kumunyika chamuutangatanga walilu”?
9 Tangenu Ndanyele 12:3. Vyuma muka vikwavo navikasoloka hanyima ‘yalwola lwavihuli’? Vesi 3 yahanjika vyuma vikwavo navikasoloka hanyima yaluyando lwalunene, kuhakila kuli vize vavuluka hali Ndanyele 12:2.
10 Uno veya “navakamunyika nge kumunyika chamuutangatanga walilu”? Mazu ahanjikile Yesu aze vasoneka hali Mateu 13:43 atukafwa tutachikize vatu kana. Ambile ngwenyi: “Halwola luze, vaka-kwoloka navakamunyika zwalala nge likumbi muWangana waSevo.” Yesu hakuhanjika mazu kana, chasoloka nge apwile nakuhanjika “[ha]vana vaWangana,” kulumbununa vandumbwenyi vawavisa vaze navakazachila hamwe naikiye muWangana wamwilu. (Mateu 13:38) Shikaho, chisoneka chaNdanyele 12:3 chatalisa kuli vawavisa namilimo navakazata muChiyulo chaMyaka 1,000.
Vaze 144,000 navakazachila hamwe naYesu Kulishitu hakutetekela mulimo wakunangula vatu, uze naukapwa mumyaka 1,000 (Talenu palangalafu 11)
11-12. Mulimo muka navakazata vaze 144,000 mumyaka 1,000?
11 Uno vawavisa ‘navakakafwa ngachilihi vatu vavavulu vakapwe vaka-kwoloka’? Ava vawavisa navakazachila hamwe naYesu Kulishitu hakutetekela mulimo wakunangula vatu, uze naukapwa hano hamavu hamyaka 1,000. Vaze 144,000 navakayula kupwa vamyangana, kaha nawa vapilishitu. (Kuso. 1:6; 5:10; 20:6) Shikaho, navakakafwa mumulimo ‘wakuka vaka-mafuchi’ nakulingisa vatu kukapwa vakukupuka chindende chindende. (Kuso. 22:1, 2; Ezeke. 47:12) Chikupu vene, vawavisa navakevwa kuwaha kuzata mulimo kana.
12 Uno veya navakapwa hamukana ‘wavatu vavavulu’ vaze navakakafwa vakapwe vaka-kwoloka? Hamukana kana nahakapwa vatu vaze navakasanguka, navaze navakayovoka haluyando lwalunene, hamwe kaha nakala vana vaze navakasemuka mukaye kakahya. Kaha kuheta kusongo yamyaka 1,000, vatu vosena vaze navakayoyela hano hamavu navakapwa vakukupuka. Uno lwola muka majina avo navakawasoneka mumukanda wakuyoya nasonekeso yaulombo, keshi yalikalako, chakuzeneka kuwajima?
CHESEKO CHAMAKUMISHILO
13-14. Uno vatu vosena vakukupuka hano hamavu vatela kukasolola vyuma muka numba vakayoye haya myaka?
13 Anukenu ngwenu, kupwa vakukupuka kacheshi nakulumbununa nge mutu mwapwa jino nakuyoya chahaya myakako. Achishinganyekenu hali Alama naEve. Vapwile vakukupuka, oloze vatelelele kwononoka Yehova Kalunga numba vavahane kuyoya chahaya myaka. Chaluvinda, kavononokele Kalungako.—Loma 5:12.
14 Vyuma muka navikasoloka hanyima yamyaka 1,000 kuli vaze navakapwa hano hamavu? Vosena navakapwa vakukupuka. Uno ava vatu vakukupuka vosena navakakundwiza chiyulo chaYehova haya myaka tahi? Nyi vamwe navakalinga ngana muze valingile vaAlama naEve vaze kavapwile vakushishikako numba tuhu vapwile vakukupuka tahi? Vihula kana navisakiwa kuvikumbulula. Mujila muka?
15-16. (a) Halwola muka vatu vosena navakasolola kushishika chavo kuli Yehova? (b) Kaha vyuma muka navikasoloka hanyima yacheseko chamakumishilo?
15 Satana navakamukasa hamyaka 1,000. Halwola kana, keshi kukahasa kuhungumwisa vatuko. Chipwe ngocho, kusongo yamyaka 1,000, Satana navakamukasununa. Ngocho, mwakaputuka kuhungumwisa vatu vakukupuka. Halwola lwacheseko kana, vatu vosena vakukupuka vaze navakapwa hano hamavu navakasakula numba nge vatela kukundwiza chihande chize chakwata halijina lyaKalunga nahawata wenyi. (Kuso. 20:7-10) Vyuma navakasakula halwola kana navikasolola chikupu numba nge majina avo vatela kuwasoneka mumukanda wakuyoya chakuzeneka kuwajima.
16 Vatu vamwe navakasakula kukana chiyulo chaYehova, ngana muze alingile Alama naEve, kaha katwatachikiza kuvula chavatu kanako. Uno vyuma muka navikasoloka kuli vakiko? Chisoneka chaKusoloka 20:15 chatulweza ngwacho: “Weshowo mutu vazenekele kusoneka mumukanda wakuyoya, vamumbilile muze muchijiva chakakahya.” Chikupu vene, ava vatu vakulikanga navakavanongesa. Oloze vatu vavavulu vakukupuka navakahita cheseko kana. Kaha majina avo navakawasoneka mumukanda wakuyoya chakuzeneka kuwajima.
‘HAMAKUMBI AKUKUMINYINA’
17. Uno Ndanyele vamulwezele vyuma muka vize navikasoloka mulwola lwetu? (Ndanyele 12:4, 8-10)
17 Tweji kwivwanga kuwaha kushinganyeka hali evi vyuma navikasoloka kulutwe. Chipwe ngocho, Ndanyele nawa vamulwezele mijimbu yimwe yayilemu kuli kangelo yakutalisa kumakumbi etu, kulumbununa ‘makumbi akukuminyina.’ (Tangenu Ndanyele 12:4, 8-10; Chimo. 2, 3:1-5) Uze kangelo alwezele Ndanyele ngwenyi: “Chinyingi chamwenemwene nachikavula.” Chikupu vene, mazu aupolofweto amumukanda waNdanyele vatelele kuwevwishisa chikuma kuli vatu jaKalunga kulutwe. Uze kangelo ahanjikile cheka ngwenyi, halwola kana “vaka-kuhuka navakalinga vyuma vyavipi, kaha naumwe wauchi mwakatachikiza mazu kana.”
18. Vyuma muka navisoloka kalinwomu kuli vaka-kuhuka?
18 Makumbi ano, chinahase kusoloka nge vaka-kuhuka kaveshi nakuvazangamisa havilinga vyavo vyakuhukako. (Mala. 3:14, 15) Oloze kalinwomu Yesu asopese vatu vaze vafwanyisa kuvapembe, nakuvahandununa kuli vaka-kwoloka vaze vafwanyisa kumikoko. (Mateu 25:31-33) Ava vaka-kuhuka kaveshi kukayovoka luyando lwalunene chipwe kukavasangula nakukayoyela mukaye kakahyako. Majina avo kaweshi kukapwa ‘mumukanda wakwanukilahoko,’ uze vavuluka hali Malaki 3:16.
19. Luno hilwola lwakulinga ika, kaha mwomwo ika? (Malaki 3:16-18)
19 Shikaho, luno hilwola lwakusolola hatoma ngwetu katweshi hamukana wavaka-kuhukako. (Tangenu Malaki 3:16-18.) Yehova ali nakukungulula vatu vaze amona kupwa “luheto [lwenyi] lwakulipwila,” chipwe luheto lwalulemu. Chikupu vene, tuli nakusaka kupwa hamukana wavatu kana.
Natukevwa kuwaha chikuma hakumona Ndanyele, navatu vaze twazanga vaze vafwa, navatu veka ‘navahinduka’ nakutambula chazano chavo mukaye kakahya (Talenu palangalafu 20)
20. Lushiko muka lwamakumishilo vashikile Ndanyele, kaha mwomwo ika muli nakutalilila kutesamo chalushiko kana?
20 Chikupu vene, tuli nakuyoyela mulwola lwakwivwisa kuwaha. Oloze kalinwomu kusoloke vyuma vyavivulu vyakukomwesa. Kalinwomu tumone omu navanongesa vatu vakuhuka. Kufumaho, natukamona kutesamo chalushiko lwaYehova luze ashikile Ndanyele ngwenyi: “Naukahinduka nakutambula chazano chove kusongo yamakumbi kana.” (Ndanye. 12:13) Kutala muli nakutalilila kulikumbi lize Ndanyele navatu vaze mwazanga vaze vafwa ‘navakahinduka’ cheka tahi? Nge mukiko, kaha zatenu nangolo mangana mupwenga vakushishika. Kaha namukunyuka ngwenu majina enu nawakapwanga lika mumukanda wakuyoya, uze wapwa mukanda waYehova.
MWASO 80 ‘Makilenu Mumone Ngwenu Yehova Apwa Wamwaza’
^ Chihande chino chinasolola ulumbunwiso wauhya kutalisa kumulimo waunene wakunangula vatu, uze vavuluka hali Ndanyele 12:2, 3. Natushimutwila lwola naukapwako ou mulimo kana navatu vaze navakauzata. Natumona nawa omu mulimo kana naukakafwa vaze navakapwa hano hamavu vakalizange vyacheseko chamakumishilo chize nachikapwa kusongo yaChiyulo chaKulishitu chaMyaka 1,000.
^ Vatu vaze vapwile vakushishika palanga nakukufwa chavo mumakumbi akukuminyina vakiko pamo navakalivanga kusanguka, numba jino pamo mukakavangize vaze valivangile kufwa, chisemunwino hichisemunwino. Nge mukiko nachikapwa, kaha chisemunwino hichisemunwino nachikasambilila vatu vaze vatachikijile. Kala mweshomwo nachikapwa, oloze tachikizenu ngwenu Visoneka vyahanjika kutalisa kukusanguka chakuya mwilu ngwavyo, kacheshi kukapwa chaliwayangako. Ngocho tunahase kushinganyeka ngwetu nakusanguka chavatu vaze navakayoyela hano hamavu mukiko nachikapwa.—Koli. 1, 14:33; 15:23.
^ Ou ulumbunwiso unalumunako vyuma twevwishishile hakavanga, vize vyatwama mumukanda waPay Attention to Daniel’s Prophecy! kapetulu 17, namuKaposhi Kakutalila waChingeleshi waJuly 1, 1987, li. 21-25.
^ Mazu akwamba ngwavo “vaka-kwoloka” ‘navaka-kuhenga’ vavuluka hali Vilinga 24:15, namazu atwama hali Yowano 5:29 akwamba ngwavo “vaze valingile vyuma vyamwaza” ‘navaze valingile vyuma vyaunyengwe,’ atalisa kuvilinga vize valingilenga vaze navakasanguka shimbu kanda vafwenga.
