CHIBAABA CHAKUDIZA 40
‘Kukwasha Antu Amavulu Kwikala Aloña’
“Owu anakukwasha antu amavulu kwikala aloña akatoñeka neyi tutumbwa, haya nyaaka nanyaaka.”—DAN. 12:3.
KAMINA 151 Wakatambika
NSAÑU YIDI MUCHIBAABA *
1. Yumanyi yayiwahi yikamwekana Muchiyuulu chaYaaka Ikombakaji?
YAKEKALA mpinji yayiwahi nankashi hakela akatachiki kusañula antu hanu hamaseki muChiyuulu chaYaaka Ikombakaji chaKristu! Antu afwisha antaña jawu afwilaña kuyimona cheñi. Yehova niyena dichatiyañayi. (Yoba 14:15) Antu ejima hamaseki akatiya kuwaha hama hakumona antaña jawu akasañulawu. Neyi chitwadiza muchibaaba chinafumuhu, “aloña,” asonekawu majina awu mumukanda wawumi, “akasañukila kuwumi.” (Yilw. 24:15; Yow. 5:29) Hadaha antaña jetu amavulu akekala hakachi kawantu atachi akasañukila kuwumi hamaseki. * Kubombelahu, ‘abula kuloña,’ antu abulili kwikala nakukooleka kwakumwiluka Yehova hela kumukalakela nakashinshi henohu kanda afwi, “akasañukila kukuyisompesha.”
2-3. (a) Neyi chinashimuniwu haIsaya 11:9, 10, Mudimwinyi weneni nankashi wakekalaku wakutañisha? (b) Tukuhanjekadi muchinu chibaaba?
2 Awa antu ejima akasañulawu akakeñekaña kuyidizisha. (Isa. 26:9; 61:11) Dichi mudimu weneni wakutañisha wabulahu dehi kuzata antu wakatachika. (Tañenu Isaya 11:9, 10.) Muloñadi? Chatachi, antu abula kuloña akasañulawu akakeñeka kumwiluka Yesu Kristu, ntanjikilu yaWanta, ifutu danyiloña nichalemena ijina daYehova niwuswa wukwetiyi wakuyuula. Antu aloña niwena akakeñekaña kwiluka yuma yinayidizishiyi Yehova antu jindi hankeñelu yindi kutalisha kwiiseki. Antu amakwawu ashinshika afwili henohu Bayibolu kanda amanishi kuyisoneka. Komana antu aloña niabula kuloña akadiza yuma yayivulu.
3 Muchinu chibaaba, tukuhanjeka hanawa malwihu: Indi iwu mudimu weneni wakutañisha akawuzata ñahi? Tukuhosheladi netu antu aketeja iyi ntañishilu majina awu akayisoneka mumukanda wawumi, ilaña akakaana akayisonekamu wanyi? Ñakwilu yanawa malwihu yatela kutukwasha makonu. Neyi chitukumona, wuprofwetu wawuwahi wukwawu wekala mumukanda waDanyeli niChimwekeshu chiwukulumbulula kulonda twiluki yuma yikamwekana neyi afu anayisañuli dehi. Chatachi, tuhanjekenu hayuma yayiwahi yashimwineñawu dehi muwuprofwetu wekala haDanyeli 12:1, 2.
“AKAAMA MULUNKUÑU . . . AKAHINDUKA”
4-5. Indi Danyeli 12:1 yashimuna nawudi mumpinji yakukuminina?
4 Tañenu Danyeli 12:1. Mukanda waDanyeli washimuna yuma yayiwahi yikamweka mundonda mumpinji yakukumishaku. Chakutalilahu, Danyeli 12:1 yamutena Mikeli, hela netu Yesu Kristu, nawu ‘nakwimenaku antu jaNzambi.’ Iwu wuprofwetu watachikili kushikijewa mu 1914 hamutondeliwu Yesu kwikala Mwanta waWanta waNzambi wamwiwulu.
5 Hela chochu, Danyeli amulejeli cheñi nawu Yesu “wakemana” mumpinji “yayihuñu yakwila kanda yimwekaneñahu dehi kufuma hampinji yekaliliku muza kushika nihanoyu mpinji.” Iyi “mpinji yayihuñu” “[hi]lukadi lwasweja” lwashimunawu haMatewu 24:21. Yesu wakemana, hela wakakiña antu jaNzambi hakukuma kwayinu mpinji yayihuñu, dikwila nawu haAmagedoni. Mukanda waChimwekeshu watena awa nawu “izaza deneni anafumi mulukadi lwasweja.”—Chim. 7: 9, 14.
6. Chumanyi chakamwekana hanyima yakwila Izaza deneni dinapuluki lukadi lwasweja? Lumbululenu. (Talenu “Malwihu Kufuma Kudi Antañi” kutalisha hakusañukila kuwumi hamaseki.)
6 Tañenu Danyeli 12:2. Chumanyi chakamwekana hanyima yakwila izaza deneni dinapuluki haniyi mpinji yayihuñu? Iwu wuprofwetu wunakutalisha wanyi kukusañuka kwachifwikija, kusañuka kwawambuña aNzambi kwakuspiritu kwamwekanaña mumafuku akukuminina neyi chitwelukili kunyima. * Ilaña, awa mazu anakutalisha kukusañuka kwawafu kwakekalaku mwituña dadiha. Muloñadi chitunahosheli mwenimu? Mazu akwila nawu ‘lunkuñu’ ayizatisha cheñi haYoba 17:16 nawa atalisha mukwila nawu ‘Ijamu.’ Ichi chikuma chinakumwekesha nawu Danyeli 12:2 yinakutalisha kukusañuka kwakekalaku hanyima yakumana kwamafuku akukuminina nawa njita yaAmagedoni yinamani dehi.
7. (a) Antu amakwawu akayisañwila ñahi “kuwumi wahaya nyaaka”? (b) Iku kusañuka kunekali ñahi “kusañuka kwabadika kuwaha”?
7 Danyeli 12:2 yatalisha mudihi chiyahosha nawu amakwawu akasañukila “kuwumi wahaya nyaaka”? Yatalisha mukwila nawu antu akasañulawu nawa akamwiluka hela kutwalekahu kumwiluka nikumwovwahila Yehova niYesu mumpinji yayaaka ikombakaji akatambwila wumi wahaya nyaaka. (Yow. 17:3) Iku kwakekala “kusañuka kwabadika kuwaha” kubadika kwasañwiliwu antu kunyima. (Heb. 11:35) Muloñadi? Muloña awa antu abula kuwanina afwili cheñi.
8. Antu amakwawu akasañukila ñahi “kunsonyi nikukusawuka kwahaya nyaaka”?
8 Bayi neyi antu ejima akasañulawu aketeja kuyidizisha kudi Yehovaku. Wuprofwetu waDanyeli wahosha nawu amakwawu akasañukila “kunsonyi nikukusawuka kwahaya nyaaka.” Chineli akadikaña, majina awu akayisoneka wanyi mumukanda wawumi nawa hiyakatambwila wumi wahaya nyaakaku. Ilaña akatambwila “kusawuka kwahaya nyaaka,” hela kujilumuka. Dichi Danyeli 12:2 yinakuhosha yuma yakafumamu mudi antu ejima akasañulawu kushindamena hayuma yakelawu hanyima yakusañuka. * (Chim. 20:12) Amakwawu akatambwila wumi wahaya nyaaka amakwawu nehi.
‘KUKWASHA ANTU AMAVULU KWIKALA ALOÑA’
9-10. Yumanyi yikwawu yikamwekana hanyima yaAmagedoni, nawa anyi “akatoñeka neyi chatoñekaña luzwizu lwewulu”?
9 Tañenu Danyeli 12:3. Chumanyi chikwawu chikamwekana hanyima “[ya]mpinji yayihuñu”? Kubombela haDanyeli 12:2, vasi 3 yinakutena chuma chakamwekana hanyima yalukadi lweneni.
10 Anyi “akatoñeka neyi chatoñekaña luzwizu lwewulu”? Ñakwilu twayiwanaña mumazu aYesu ekala haMatewu 13:43: “Hanoyu mpinji aloña akatoñeka chikupu neyi itena muWanta waTata yawu.” Munawa mazu Yesu wahosheleña hadi “anyana kaWanta,” amanakwindi awayishewa akazata nindi muWanta wamwiwulu. (Mat. 13:38) Dichi Danyeli 12:3 yatela yinakutena awayishewa nimudimu wakazatawu muChiyuulu chaYaaka Ikombakaji.
A 144,000 akazatila hamu naYesu Kristu hakulombola mudimu wakutañisha wakekalaku mumpinji yayaaka ikombakaji (Talenu paragilafu 11)
11-12. Mudimwinyi wakazata a 144,000 mumpinji yayaaka ikombakaji?
11 Awayishewa akakwasha ñahi “antu amavulu kwikala aloña”? Awayishewa akazatila hamu naYesu Kristu hakulombola mudimu wakutañisha wakekalaku hanu hamaseki mumpinji yayaaka Ikombakaji. A 144,000 hiyakayuula hohu neyi anyantaku ilaña akakalakala cheñi neyi atupristu. (Chim. 1:6; 5:10; 20:6) Dichi, akakwashana ‘kuuka nyuza,’ dikwila nawu akakwasha antu kwikala awanina. (Chim. 22:1, 2; Ezek. 47:12) Awayishewa akatiya kuwaha nankashi!
12 Anyi akekala hakachi ‘kawantu amavulu’ akakwashawu kwikala aloña? Munabombeli antu akasañulawu, akapuluka haAmagedoni nianyana amavulu akavwalika mwituña dadiha. Hakumana kwayaaka ikombakaji ejima akekala hamaseki akekala awanina. Hanu dinu mpinjinyi yakasonekawu majina awu chikupu mumukanda wawumi nainki bayi napensuluku?
KWESEKA KWAKUKUMISHAKU
13-14. Chumanyi chatela kwilawu antu ejima awanina akekala hamaseki henohu kanda atambwili wumi wahaya nyaaka?
13 Twatela kwanuka netu kwikala awanina hichinayi mukwila nawu muntu wakashikena kutambula wumi wahaya nyaakaku. Toñojokenu hadi Adama naEva. Adiña awanina, ilaña ateleleli kumwovwahila Yehova Nzambi henohu kanda ayinki wumi wahaya nyaaka. Nawa chawushona akañenyi kumwovwahila.—Rom. 5:12.
14 Yuma yakekala ñahi kudi antu akekala hamaseki hakumana kwayaaka ikombakaji? Ejima akekala awanina. Komana awa ejima awanina akahakwilaku chiyuulu chaYehova lwejima? Tahindi amakwawu akekala neyi aAdama naEva, akañenyi kwikala ashinshika hela chakwila adiña awanina? Awa malwihu atela kuyakula, ilaña munjilanyi?
15-16. (a) Mpinjinyi antu ejima yakamwekeshawu nawu ashinshika kudi Yehova? (b) Chumanyi chakafuma mukweseka kwakukumishaku?
15 Satana akamukasa hadi yaaka ikombakaji. Haniyi mpinji hakatwesha cheñi kudimba antuku. Hela chochu, hakumana kwayaaka ikombakaji Satana akamumbaku. Wakatachika cheñi kuluwañesha antu awanina. Haniku kweseka, antu awanina hamaseki akamwekesha neyi chakwila anakuhakwilaku ijina daNzambi nichiyuulu chindi hela nehi. (Chim. 20:7-10) Chuma chakelawu haniyi mpinji dichakaletesha majinawu kuyisoneka mumukanda wawumi hela nehi.
16 Antu amakwawu akela neyi chelili Adama naEva, akakaana chiyuulu chaYehova. Chumanyi chakayimwekena? Chimwekeshu 20:15 yatulejaña nawu: “Kubombelahu, muntu wejima abulili kusonekawu mumukanda wawumi, amuumbilili mwijiya dakesi.” Awa akakudikaña akayijilumuna haya nyaaka. Ilaña antu awanina amavulu akahita hakweseka kwakukumishaku. Majina awu akayisoneka chikupu mumukanda wawumi.
‘MUMPINJI YAKUKUMININA’
17. Yumanyi yamulejeliwu Danyeli nawu yikamwekana muyinu mpinji? (Danyeli 12:4, 8-10)
17 Twatiyaña kuwaha hakutoñojoka yuma yakamwekana kumbidi. Hela chochu, Danyeli amulejeli kudi kañelu nsañu yalema kutalisha “[mu]mpinji yakukuminina.” (Tañenu Danyeli 12:4, 8-10; 2 Tim. 3:1-5) Kañelu wamulejeli Danyeli nindi” “kwiluka kwalala kwakavula.” Eña, mazu awuprofwetu amumukanda anakuyitiyishisha kudi antu jaNzambi. Kañelu wabombelelihu nindi muyinu mpinji “antu atama akakoña yuma yatama, nawa kwosi muntu watama wakeluka yumiyiku.”
18. Chumanyi chikuyimwekena katataka antu atama?
18 Makonu chinakumwekana neyi antu atama anakuyibabesha wanyi hayilwilu yawu yatama. (Mal. 3:14, 15) Ilaña katataka Yesu asompeshi antu atama adi neyi ampembi nakuyaambula nawantu adi neyi anyikoku. (Mat. 25:31-33) Awa antu atama akapuluka wanyi halukadi lweneni, nawa akayisañula wanyi nakushakama mwituña dadiha. Majina awu akekala wanyi “mumukanda wachanukishu” washimunawu haMalaki 3:16.
19. Chumanyi chitwatela kwila katataka, nawa muloñadi? (Malaki 3:16-18)
19 Ayinu diyi mpinji yitwatela kumwekesha netu tudi wanyi hakachi kawantu atama. (Tañenu Malaki 3:16-18.) Yehova nakupompesha antu amonañayi nindi “iheta dadimena,” hela iheta dalemeshayi. Tunakukeña chikupu kwikala hakachi kawu.
Twakazañalala nankashi hakumona Danyeli, antaña jetu niantu amakwawu‘anemani’ mwituña dadiha! (Talenu paragilafu 20)
20. Chikaninwinyi chakukumishaku chamulejeliwu Danyeli, nawa muloñadi chimunakukeñela kumona kushikijewa kwanichi chikaninu?
20 Tunakushakama mumpinji yamuzañalu. Ilaña yuma yakuhayamisha keña yimwekani. Katataka tumoni kujilumuka kwayuma yatama yejima. Kuhiñahu cheñi, tukamona kushikijewa kwamazu amukaniniwu Danyeli kudi Yehova nawu: “Wakemana nakutambwila iseka deyi kumafuku akukuminina.” (Dan. 12:13) Munakufwila wanyi kumona ifuku ‘dakemanayi’ Danyeli cheñi hamu niantaña jenu? Neyi dichimunakufwila, zatenu nañovu kulonda mwiikali ashinshika, nawa kuhwelelenu nenu ijina denu dikatwalekahu kwikala mumukanda waYehova wawumi.
KAMINA 80 “Tompenu Mutiyi Chawahayi Yehova”
^ Achinu chibaaba chinashimuni kuhimpika kwantiyishishilu yetu kumudimu weneni wakutañisha washimunawu haDanyeli 12:2, 3. Tukwiluka mpinji yikatachika iwu mudimu niantu akawuzata. Tukumona cheñi iwu mudimu wakutañisha chiwakakwasha antu akekala hamaseki kudiloñesha nakweseka kwakukumishaku hanyima yakumana kwaChiyuulu chaYaaka Ikombakaji chaKristu.
^ Hadaha akatachika kusañula antu ashinshika anakufwa munanu mafuku akukuminina. Kuhiñahu dinu hiyakufunta kunyima nakusañula antu, ikiñu niikiñu. Neyi yuma yakekala muniyi njila, ikiñu niikiñu dakatambwilaña antu elukiliwu. Neyi dichichakamwekana, nsona yahosha hansañu yakusañuka kwakuya mwiwulu nawu kwakamwekana ‘mundonda’, nawa tunakuhweleli netu kusañuka kwawantu akekala hamaseki nikwena kwakekala mundonda-mundonda.—1 Kor. 14:33; 15:23.
^ Iku kulumbulula hikuhimpika kwantiyishishilu yekala mumukanda waPay Attention to Daniel’s Prophecy! kapetulu 17 niKaposhi Kakutalila kaJuly 1, 1987, mafu 21-25.
^ Kwambukaku, mazu akwila nawu “aloña niabula kuloña” ekala haYilwilu 24:15 nimazu akwila nawu “akoñeleña yuma yayiwahi” nawa “akoñeleña yuma yatama” adi haYowanu 5:29 anakutalisha hayilwilu yakoñeleñawu antu akasañulawu henohu kanda afwi.
