CILONGESA 40
‘Longeseni Babangi Kulinga bya Busunga’
“Co baje balongesele banu babangi kulinga bya busunga bakabyazima ku myaka yoshe ngwe bingongonosi.”—NDANYE 12:3.
MWASO 151 Akasana
BILI MUNO MU CILONGESA a
1. Byuma muka bya kulitila bitukalimwena mu myaka 1,000 yakayula Kristu?
TUKABWAHELELA manene batsi mubakashangumuka kusanguka mu myaka 1,000 yakayula Kristu. Banu boshe baje banatsisa babushoko bwabo bali na kushungwiya kukabamona lalo. Yehova nendi ali na kushungwiya kukabamona. (Yombi 14:15) Banu boshe bakabwahelela manene mubakalimwena babushoko na babusamba babo basanguka. Ngwe mutunasimutwiiye mu cilongesa cinahu, “baka-busunga” babanasoneka mu libulu lya kuyoya ‘bakasangukila kuyoya.’ (Bili 24:15; Yiwa 5:29) Hamo bwingi bwa babusamba na babushoko bwetu bakebo bakalibanga kusanguka. b Kutundaho “baka-kujeneka busunga” bakufwa ngwe baje kubazibukile Yehova na kumupangela simbu kanda batse “bakasangukila kubasompa.”
2-3. (a) Kwesekesa na mukanda wa Isaya 11:9, 10 cipangi muka cakama cikakalako? (b) Bika bitusimutwiya muno mu cilongesa?
2 Boshe bakasanguka banapande kukalilongesa. (Isaya 26:9; 61:11) Ngeci, cipangi cakama ca kulongesa cinapande kukakalako. (Tandeni Isaya 11:9, 10.) Mwafwa bika? Mwafwa baka-kujeneka busunga baje bakasanguka banapande kukalilongesa bya Yesu Kristu, bya Bumwene, bya ndando ya kupatula na lizina lya Yehova na byuma bimulingisa apwe ikeye lika napande kuyula byuma byoshe. Baka-busunga bamo banapande kukabalongesa byuma byanatulongesa Yehova mu kwita kwa simbu kutalesa ku byuma byanayongola kulinga hano hasi. Baka-busunga bamo batsile simbu kanda Mbimbiliya ihwe kuisoneka. Baka-busunga na baka-kujeneka busunga baje bakasanguka bakakala na byabingi bya kulilongesa.
3 Muno mu cilongesa tusimutwiya ha bihula binatako. Cipangi cakama ca kulongesa tukacilinga bati? Kuma byuma bibakalinga banu munima ya kubalongesa bikabalingisa babasoneke mu libulu lya mwonyo nambe kujeneka kulinga ngoco ndi? Bikumbululo ku bihula ebi, bya seho manene kuli yetu. Bupolofweto buli ku mukanda wa Ndanyele na ku Kujombolola butukwasa tuzibisise mwamubwa byuma bikalingiwa batsi mubakasanguka. Tushangumukileni kusimutwiya ha bupolofweto buli ku Ndanyele 12:1, 2.
“BAJE BANALALA MU LIBU BAKENDUKA”
4-5. Byuma muka bilingiwa mu matangwa a kukotoka bibanendeka ku mukanda wa Ndanyele 12:1?
4 Tandeni Ndanyele 12:1, NWT. Mukanda wa Ndanyele unendeka mubilikabasanena byuma bya kulitila bije bilingiwa mu matangwa a kukotoka. Cakumwenako, mukanda wa Ndanyele 12:1 umwesa ngwawo Mikaele uje wapwa Yesu Kristu ‘akemanenako banu ba Njambi.’ Obu bupolofweto bwashangumukile kulishulisilila mu 1914 omwo Yesu bamwangwile kupwa Mwene wa Bumwene bwa Njambi bwa mwilu.
5 Oloni Daniele bamulekele lalo ngwabo Yesu “akakatuka” ha “simbu ya kayando kaje kanda kakaleko kutunda haje hawashangumukilile muyati wakulibanga na kweta ha simbu ije.” Ei “simbu ya kayando” ikeyo lalo simbu ya “kayando kakama” ije ibanendeka ku Mateu 24:21. Yesu akakatuka nambe ngwetu akamena banu ba Njambi ku mamaneselelo a simbu ya kayando ha simbu ya nzita ya Alamagidoni. Mukanda wa Kujombolola umwesa ngwawo bakapwa mbunga yakama ya banu baje ‘bakatunda mu kayando kakama.’
6. Byuma muka bikalingiwa mbunga yakama muikoboka kayando kakama? Lumbununeni. (Taleni lalo ñanda ya “Bihula bya Baka-Kutanda” ili muno mu Kaposhi ka Kukengela ije yendeka ha banu baje bakasanguka na kuyoya hano hasi.)
6 Tandeni Ndanyele 12:2, NWT. Byuma muka bikalingiwa mbunga yakama muikoboka kayando kakama? Obu bupolofweto kubwesi na kwendeka ha kusanguka kwa cifwisa nambe ngwetu kusanguka kwa ku sipilitu kwa bangamba ba Njambi, kuje kuli na kulingiwa mu matangwa a kukotoka ngwe mutwakele na kuzibisisila kunima. c Oloni bwendeka ha batsi baje bakasanguka mu kaye kakaha. Bika twendekela ngoco? Ku mukanda wa Yombi 17:16 nakwo banapangesa lijwi lya “libu,” kulumbununa “Mbumbo.” Ngeci, majwi ali ku mukanda wa Ndanyele 12:2 anatalesa ku batsi baje bakasanguka na kuyoya hano hasi munima ya matangwa a kukotoka, nambe ngwetu munima ya Alamagidoni.
7. (a) Banu bamo bakasangukila bati kuyoya “myaka yoshe”? (b) Bika twendekela ngwetu oku kukapwa “kusanguka kwakubwa”?
7 Mukanda wa Ndanyele 12:2 ulumbununa bika omwo wendeka ngwawo banu bamo bakasangukila kuyoya “myaka yoshe”? Ulumbununa ngwawo baje bakatwalelelaho kukalilongesa na kwononoka Yehova na Yesu mu myaka 1,000, bakayoya myaka yoshe. (Yiwa 17:3) Oku kukapwa “kusanguka kwakubwa” kutubakana kusanguka kwakeleko kunima. (Hebe 11:35) Bika twendekela ngoco? Mwafwa baje banu ba kujeneka kulumbunuka basangukile kunima, batsile lalo.
8. Banu bamo bakasangukila bati ‘kushauka na kukala na shwamwa ku myaka yoshe’?
8 Oloni keti banu boshe bakataba kubalongesa kuli Yehova. Bupolofweto buli ku mukanda wa Ndanyele bumwesa ngwabwo banu bamo bakasangukila ‘kushauka na kukala na shwamwa ku myaka yoshe.’ Mazina abo kubakawasoneka mu libulu lya kuyoya, co lalo kubakayoyo myaka yoshe mwafwa bakamwesa sipilitu ya kutengulukila. Bakaziba ‘shwamwa ku myaka yoshe’ nambe ngwetu bakabanyongesa. Ngeci, mukanda wa Ndanyele 12:2 uli na kwendeka ha byuma bikalingiwa kuli baje bakasanguka kwesekesa na byuma bibakalinga ha simbu oyo. d (Kujo 20:12) Bamo bakayoya myaka yoshe, bakwabo bakanyonga.
‘KULONGESA BANU BABANGI KULINGA BYA BUSUNGA’
9-10. Byuma muka bikwabo bikalingiwa munima ya simbu ya kayando kakama, co beya “bakabyazima ku myaka yoshe ngwe bingongonosi”?
9 Tandeni Ndanyele 12:3. Byuma muka bikwabo bikalingiwa munima ya “simbu ya kayando”? Kubwezelela ku byuma bibanendeka ku Ndanyele 12:2, ha vesi 3 banendekaho byuma bikalingiwa munima ya kayando kakama.
10 Beya “bakabyazima ku myaka yoshe ngwe bingongonosi”? Majwi a Yesu aje ali ku Mateu 13:43 atukwasa kuzibuka cikumbululo. Wendekele ngwendi: “Ha simbu ije, baka-busunga bakatwa ceke ngwe litangwa mu Bumwene bwa Ishabo.” Ha simbu ei Yesu wakele na kwendeka bya “bana ba Bumwene,” nambe ngwetu bandolome bendi ba kubwabesa baje bakayula nendi mu Bumwene bwa mwilu. (Mate 13:38) Ngeci, mukanda wa Ndanyele 12:3 wendeka hali bakubwabesa na cipangi cibakalinga mu myaka 1,000 yakayula Yesu.
Bakubwabesa bakapangela hamo na Yesu mu kutwamenena cipangi ca kulongesa cije cikalingiwa hano hasi mu myaka 1,000 (Taleni palagilafu 11)
11-12. Cipangi muka cibakalinga bakubwabesa mu myaka 1,000?
11 Bakubwabesa bakakwasa bati “banu babangi kulinga bya busunga”? Bakapangela hamo na Yesu mu kutwamenena cipangi ca Kulongesa cije cikalingiwa hano hasi mu myaka 1,000. Bakubwabesa bakapwa bimyene, co lalo bakapwa tupilistu. (Kujo 1:6; 5:10; 20:6) Ngeci, bakakwasa mu ‘kusakesa baka-mafuti’ na kukwasa lalo banu bapwe bakulumbunuka kamandondo-kamandondo. (Kujo 22:1, 2; Ezeki 47:12) Bakubwabesa bakabwahelela manene omwo bakapanga eci cipangi.
12 Beya “banu babangi” baje bakapwa baka-busunga? Aba banambateselela banu baje bakasanguka na baje bakoboka Alamagidoni hamolika na banike baje bakasemukila mu kaye kakaha. Ku mamaneselelo a myaka 1,000, banu boshe bakayoya hano hasi bakapwa bakulumbunuka. Simbu muka ibakasoneka mazina abo na peni mu libulu lya kuyoya?
CESEKO CAMAMANESELELO
13-14. Bika bibanapande kukalinga banu ba kulumbunuka mangana bakawane mwonyo wa myaka yoshe?
13 Tunapande kwanuka ngwetu, kupwa wa kulumbunuka mu myaka 1,000 yakayula Yesu, kukulumbununa ngwabo, co munu ayoya myaka yoshe. Acisinganyekeni Adama na Eva. Nameme bapwile ba kulumbunuka, oloni bapandele kwononoka Yehova Njambi mangana bayoye myaka yoshe. Calubinda, kubamwononokele.—Loma 5:12.
14 Banu bakafwa bati kumamaneselelo a myaka 1,000? Boshe bakapwa ba kulumbunuka. Kuma banu boshe baje bakapwa ba kulumbunuka bakakundwiya ciyulo ca Yehova ndi? Indi bamo nameme bakapwa ba kulumbunuka kubakatwalelelaho kupwa ba kulongwa ngwe mubalingilile ba Adama na Eva ndi? Tuwaneni bikumbululo ku bihula ebi.
15-16. (a) Simbu muka ibanapande kukamwesa banu boshe ngwabo bapwa ba kulongwa kuli Yehova? (b) Byuma muka bikalingiwa munima ya ceseko ca mamaneselelo?
15 Satana bakamukuta myaka 1,000. Ha simbu oyo kakasa kungumuna banu. Oloni munima ya myaka 1,000, Satana bakamuzitula. Akeseka kungumuna banu ba kulumbunuka. Ha simbu oyo banu boshe ba kulumbunuka bakakala hano hasi, banapande kukamwesa ngwabo basingimika lizina lya Njambi na kukundwiya ciyulo cendi indi embwe. (Kujo 20:7-10) Byuma bibakalinga ha simbu oyo bikamwesa indi banapande kusoneka mazina abo na peni mu libulu lya kuyoya indi embwe.
16 Mbimbiliya imwesa ngwayo banu bamo kubakatwalelelaho kupwa ba kulongwa kuli Yehova, co bakabyana ciyulo cendi ngwe mubalingilile ba Adama na Eva. Bika bikalingiwa kuli bakebo? Mukanda wa Kujombolola 20:15 ngwawo: ‘Woshe uje kubasonekele mu libulu lya mwonyo bamumbilile mu lishali lya tuhya.’ Aba baka-kutengulukila bakabanyongesa. Oloni banu babangi ba kulumbunuka bakatwalelelaho kupwa ba kulongwa. Co mazina abo bakawasoneka mu libulu lya kuyoya na peni.
SIMBU YAMAMANESELELO
17. Kangelo walekesele Daniele ngwendi byuma muka bikalingiwa mu matangwa etu? (Ndanyele 12:4, 8-10)
17 Kusinganyeka ha byuma ebi bikalingiwa ku lutwe kutulingisa tupwe ba kubwahelela. Oloni kangelo walekesele lalo Daniele biñanda bimo bya seho bije bikalingiwa mu matangwa etu nambe ngwetu mu “simbu ya mamaneselelo.” (Tandeni Ndanyele 12:4, 8-10, NWT; 2 Timo 3:1-5) Kangelo walekele Daniele ngwendi: “Mana a busunga akatuma.” Banu ba Njambi bakebo bakazibisisa mwamubwa obu bupolofweto. Uje kangelo wendekele lalo ngwendi “baka-bubi bakalinga byuma byabibi, co kukwesi muka-bubi akazibisisa.”
18. Byuma muka bilingiwa kuli baka-bubi ololo?
18 Ano matangwa kunasa kusholoka ngwe baka-bubi kubesi na kubana cihiso ha bubi bubali na kulinga. (Mala 3:14, 15) Oloni ololo Yesu asompa banu bakufwa ngwe bimembe na kubangununa ku banu bakufwa ngwe bimanga. (Mate 25:31-33) Aba banu baka-bubi kubakoboka kayando kakama nambe kubasangula mangana bakayoye mu kaye ka kaha. Mazina abo kubakawasoneka mu “libulu lya canukiso” libanendeka ku mukanda wa Malakiya 3:16.
19. Byuma muka bitunapande kulinga hano bene, co mwafwa bika? (Malakiya 3:16-18)
19 Ino ikeyo simbu itunapande kulinga byuma bije bimwesa ngwabyo kutwapwile baka-bubi. (Tandeni Malakiya 3:16-18, NWT.) Yehova ali na kukungulula banu baje bapwa “bufuko bwa kulitila,” nambe ngwetu baje bapwa ba seho kuli ikeye. Netu kutushaka kupwa umo wabo.
Tukabwahelela manene mutukamona Daniele na banu batwazema basanguka na kutambula cikandelela cabo (Taleni palagilafu 20)
20. Cuma muka camamaneselelo cibakulahesele Daniele, co mwafwa bika tushaka kukalimwena mubakacishulisilila?
20 Cili bene tuli na kuyoya mu simbu ya kulitila. Oloni ololo kulingiwa byuma byakukasamesa. Ololo tumona byuma byoshe byabibi mubakabinyongesa. Kutundaho, tukalimwena Yehova mwakashulisilila byuma byakulahesele Daniele ngwendi: “ukasanguka ngeci ukatambule cikandelela cobe ha simbu ya kukotoka kwa kaye.” (Ndanye 12:13) Kuma mwashungwiya kukamona Daniele na banu bamwazema mubakasanguka ndi? Nga mukemwo, co lingeni mwoshe mumwasela kupwa ba kulongwa mangana lizina lyeni litwaleleleho kukala mu libulu lya kuyoya.
MWASO 80 ‘Makeleni Mumone Ngweni Yehova Wamubwa’
a Muno mu cilongesa tusimutwiya mutuli na kuzibisisila cipangi cakama ca kulongesa cibanendeka ku mukanda wa Ndanyele 12:2, 3. Tushaka kuzibuka hacikashangumukila eci cipangi na byuma byalibungilamo. Tumona lalo mucikakwasela banu bakakala hano hasi balibwahesele kukolesa mubakaliwana na ceseko cije cikakalako ku mamaneselelo a myaka 1,000 yakayula Kristu.
b Kumoneka baje bakapwa ba mamaneselelo kutsa bakebo bakalibanga kusanguka, co bakalikabasana bene ngoco mu bisemwa kuketa na kuli uje walibangele kutsa. Nga mukemwo mubikafwila byuma, co kukapwa kwakwasi kutambula batsi mwafwa tukabazibuka. Mwoshe-mwoshe mubikafwila byuma, Bisoneka bimwesa ngwabyo baje bakasanguka na kukayoya mwilu, bakasanguka kwesekesa nomu ‘mwanabwahesela’ Njambi. Co twakulahela ngwetu na baje bakasanguka na kuyoya hano hasi bakasanguka mu ngila inapande.—1 Koli 14:33; 15:23.
c Twatengulula mutunakele na kuzibisisila obu bupolofweto buli mu libulu lya Mu Ise Pilu kwa Bupolofita bwa Daniele! capita 17 na mu Kaposhi ka Kukengela ka Ingilishi ka July 1, 1987, lipu. 21-25.
d Majwi a kwendeka ngwawo “baka-busunga” na “baka-kujeneka busunga” aje ali ku Bilinga 24:15 na majwi a kwendeka ngwawo “baje balingile byuma byabibwa” na “baje balingile byuma byabibi” aje ali ku Yiwano 5:29, anatalesa ku byuma bibalingile banu simbu kanda batse.
