ICIPANDE CA KUSAMBILILAMO 40
‘Ukusambilizya Awavule Ukucita Icete’
“Nawano wasambilizizye awavule ukuchita ichete waliwazikimila ndivino intanda umuyayaya.”—DAN. 12:3.
ULWIMBO 151 Aliyita
VINO TWANDI TUSAMBILILE a
1. Acintu ci ica nsansa cino cilicitika pa myaka 1,000 iyakuteka kwa kwe Yesu?
UWANDA wakutalicila pano awantu walitalikavye ukuzyulupuka mu Myaka 1,000 iya Kuteka kwa kwe Yesu, wuliwa awanda wa nsansa nkaninye. Amuno wonsinye wano wafwilwa awakundikwe wawo wakalondesya sana ukwiza mukuwalola naswinya. Swinya wonye avino ne Yehova akayivwa. (Job 14:15) Teyelenganyani pa nsansa zino awantu wonsinye waliwa nazyo pano waliwalola kuno awakundikwe wawo wakuzyulupuka. Ndi vino twasambilizile mu cipande cino cafumileko, ‘awalungamane’ wano amazina yawo yalembwa mwi buku lya wumi walizyulupicila “kuwumi.” (Imili. 24:15; Yoha. 5:29) Awakundikwe witu awavule, ncepamwi waliwa pe wano walitalicila ukuzyulupuka pansizi ye Amagedoni. b Cinji acakuti, wano “wasa walungamane” ponga ngati awawo wano watalinji nulongo lwa kumanya Yehova nanti ukumuwombela nicisinka pano watani wafwe walizyulupucila “kwipanzyo.”
2-3. (a) Ukulingana ne Ayizeya 11:9, 10, avyani vino wano waliwawomba wo-o umulimo uwukulu waliwasambilizya awantu swinya amulandu ci? (b) Avyani vino twandi tusambilile mwe co-o icipande?
2 Wonsinye wano walizyulupuka, waliwalondekwa ukuwanena ivyakucita. (Ayize. 26:9; 61:11) Acino kuliwalondekwa umulimo uwukulu uwakusambilizya awantu wonsinye. (Wazyani Ayizeya 11:9, 10.) Amulandu ci wuno kuliwalondecelwa wo-o umulimo? Umulandu wonga awa kuti, wo watalungamana wano walizyulupuka, waliwalondekwa ukusambilila pa Wufumu wa kwe Leza, pe Yesu na pa nzuwi yakwe, pawucindami wi zina lya kwe Yehova, na pamulandu wuno Yehova wayanila ukuteka. Nawalungamane nye waliwalondekwa ukusambilila pe vino Yehova wasokololelanga awawomvi wakwe katici katici pe vino akalonda insi ukuwa. Wamwi awantu wacisinka wafwile kaali lyo ne Baibolo yitani yisile ukulembwa. Fwandi ukwasowa nukuvwilika awalungamane na wano watalungamana waliwa nivivule ivyakusambilila.
3 Mwe co-o icipande twandi tusambilile amawuzyo ya kuti: Uzye wo-o umulimo uwukulu wuliwawombwa wuli? Avyani vino viliciticila awantu wano waliyivwila vino waliwawasambilizya? Swinya avyani vino viliciticila wano walikana ukwivwila vino waliwawasambilizya? Ivyasuko kwe ya-a amawuzyo vicindime nkaninye kwe sweswe mwe ya-a amanda. Ndi vino twandi tulole, amasesemo yamwi yano yawa mwi buku lya kwe Daniel ni lya Ukuwumbulika yandi yatwavwe ukwivwicisya vino vilicitika nga cakuti awafwe wiza wazyulupuka. Lekani tutalicile ukulanda pa vizima vino vilicitika vino vyalandwa mu wusesemo wuno wawa pe Daniel 12:1, 2.
“WANO WAFWA WALIZYULUPUKA”
4-5. Avyani vino iwaliko lya kwe Daniel 12:1 lyasokolola pa manda ya kulecelezya?
4 Wazyani Daniel 12:1. Ibuku lya kwe Daniel likasokolola pa vizima vino vilicitika mu manda yakulecelezya. Ku cakulolelako e Daniel 12:1 yasokolola ukuti e Mikaeli, akuli ukuti e Yesu Klistu “wino akachinjilila awantu wako [awantu wa kwe Leza] aliloleka.” Wo-o uwusesemo watalisile ukuficiliswa mu 1914 pano e Yesu wasonsilwe ukuwa Amfumu mu Wufumu wa kwe Leza uwa mwi yulu.
5 Lelo nanti ciwe wo-o, e Daniel wamunenile nukuti e Yesu “aliloleka” mu “mpindi ya matamyo, mawipisye ukufumilila pano insi yalile iyelewulilwa.” Yo-o “impindi yamatamyo” ayili impindi ya ‘wucuzi wukulu’ wuno walumbulwa pe Mateyu 24:21. E Yesu aliloleka nanti alicitapo cimwi pakuti acinjilile awantu wa kwe Leza kukusila kwe yo-o impindi ya matamyo, akuli ukuti pa Armagedoni. Ibuku lya Ukuwumbulika likalanda pe wa-a awantu ukuti ‘aliwumba kulu, wano wafuma mu wuyimvi wukulu.’—Ukuwu. 7:9, 14.
6. Avyani vino vilicitika nga cakuti iwumba kulu lyapusuka pawucuzi wukulu? Londololani. (Lolani na kambokosi kakuti “Amawuzyo Ukufuma kwa Kawazya” kano kakulanda pakuzyulupucila ku wumi mu nsi.)
6 Wazyani Daniel 12:2. Avyani vino vilicitika nga cakuti iwumba kulu lyapusuka pa wucuzi wukulu? Uwusesemo wuno wawa pe Daniel 12:2 wusilanda pakuzyulupuka kwa mankolanya nanti pakuzyulupuka kwa kumuzimu kuno kukacitika mu manda yakulecelezya ku wantu wa kwe Leza ndi vino twamanyile kaali. c Lelo wukalanda pakuzyulupuka kuno kulicitika kunkolelo mu nsi mpya. Amulandu ci wuno tungalandila wo-o? Mucitundu cino wawomvizye pano walemvilevye e Baibolo, wawomvizye izwi lya kuti ‘kulukungu’ piwaliko lya kwe Job 17:16 na pe Daniel 12:2. Fwandi awuli umulandu wuno tungalandila ukuti amazwi yano yawa pe Daniel 12:2 yakalanda pakuzyulupuka kuno kuliwako pa nsizi ya manda yakulecelezya nanti pa nsizi ye Amagedoni.
7. (a) Amunzila ci muno wamwi “walizyulupuchila kuwumi”? (b) Uzye ko-o kuliwa wuli ‘akuzyulupuka ukuzima’?
7 Uzye iwaliko lya kwe Daniel 12:2 likasula mwinye nanti acakuti likanda ukuti wamwi “walizyulupuchila kuwumi”? Likasula mukuti wonsinye wano walizyulupuka waliyiza wamanye nanti walitwalilila ukumanya nu kwivwila e Yehova ne Yesu mu myaka 1,000, apano wize wawe nu wumi wa muyayaya. (Yoha. 17:3) Ko-o kuliwa ‘akuzyulupuka ukuzima’ ukucila nakuno kwalinjiko ku nsizi. (Hebe. 11:35) Amulandu ci? Amuno wawo wano wazyulupusile kaali wizile awafwa naswinya.
8. Uzye wamwi walizyulupucila wuli “kumukwelengula na kukusulwa kwa muyayaya”?
8 Asa we wonsi wo walizyulupuka wano waliwazumila ukuwasambilizya pe Yehova. Uwusesemo wa kwe Daniel wukalanda ukuti wamwi walizyulupucila “kumukwelengula na kukusulwa kwa muyayaya.” [NWT] Pamulandu wakuti walilanjizya imiwele yawucipondoka, amazina yawo yatalilembwa mwi buku lya wumi. Fwandi e Daniel 12:2 yikalanda pe vino viliciticila wonsinye wano walizyulupuka ukulingana na vino waliwacita pansizi yakuzyulupuka. d (Ukuwu. 20:12) Wamwi waliwa nu wumi wamuyayaya ne wamwi wataliwa nawo.
‘UKUSAMBILIZYA AWAVULE UKUCITA ICETE’
9-10. (a) Ukulingana ne Daniel 12:3, avyani vinji vino vilicitika pa nsizi ya wucuzi wukulu? (b) Awaweni wano “waliwazikimila nukuzikimila kwamwiyulu”?
9 Wazyani Daniel 12:3. Avyani vinji vino vilicitika pa nsizi ya “mpindi ya matamyo”? Ukulunda pamazwi yano yawa pe Daniel 12:2, e vesi 3 yalanda pe vimwi vino vilicitika pa nsizi ya wucuzi wukulu.
10 Awaweni wano “waliwazikimila nukuzikimila kwamwiyulu”? Iwaliko lwa kwe Mateyu 13:43 likatwavwa ukwivwicisya co-o icisinka, pano pakati: ‘Nga awalungamane wize wawale ndi vino ilanzi mu Wufumu wa Mukwasi wawo.’ Pano Yesu walandanga lyo-o ilyasi, walandanga pa “wana wa Wufumu,” akuli ukuti awapakwe wano waliwawombela ponga nawe mu Wufumu wa mwiyulu. (Mat. 13:38) Fwandi e Daniel 12:3 yifwile yikalanda pawapakwe na pamulimo wuno waliwawomba mu Myaka 1,000 iya Kuteka kwa kwe Yesu.
Wa 144,000 waliwawombela ponga ne Yesu ukutungulula umulimo wakusambilizya wuno wuliwawombwa mu nsi pa myaka 1,000 (Lolani paragrafu 11)
11-12. Amulimo ci wuno wa 144,000 waliwawomba mu myaka 1,000?
11 Uzye awapakwe walisambilizya wuli “awavule ukuchita ichete”? Awapakwe waliwawombela ponga ne Yesu ukutungulula umulimo wakusambilizya wuno wuliwawombwa mu nsi pa mwaka 1,000. Wa 144,000 wataliwavye azya mfumu, lelo waliwawomba nu mulimo wawusimapepo. (Ukuwu. 1:6; 5:10; 20:6) Fwandi tungati waliwawomba umulimo ‘wakupozya imyiko yonsi’—nukwavwa awantu ukuwa awapwililike naswinya. (Ukuwu. 22:1, 2; Ezek. 47:12) Ukwasowa nukuvwika, yo-o yiliwa ampindi ya nsansa ku wapakwe!
12 Awaweni wano waliwa pe wa-a “awavule” wano awapakwe waliwakwavwa ukuwa awalungamane? Pe wa-a paliwa wano walizyulupuka, wano walipusuka pa Amagedoni apano na wana wano wangiza wakwatwe mu nsi mpya. Kukusila kwa myaka 1,000 awantu wonsinye mu nsi walipwililika. Nomba lyo ampindi ci pano amazina yawo yalifutwa mwe penso nukulembwa ne peni mwi buku lya wumi?
UWELEZYO WAKULECELEZYA
13-14. Avyani vino awantu waliwalondekwa ukucita pakuti wawe nu wumi wamuyayaya?
13 Lyonsinye tuzipizile twakwizuka ukuti umuntu nga wapwililika lyo citakusula mukuti calala casila wawa nu wumi wamuyayaya. Yizukani pe vino e Adamu ne Eva wacisile. Walinji awapwililike, lelo pakuti wawe nu wumi wamuyayaya walondekwanga ukuwa nicivwila kwe Yehova. Nomba kucawulanda wakanile ukumwivwila.—Roma. 5:12.
14 Uzye awantu mu nsi waliwa wuli pansizi ya myaka 1,000? Wonsinye walipwililika. Nomba uzye we wonsinye wano waliwatunjilila imitecele ya kwe Yehova nga cakuti wapwililika? Nanti uzye wamwi waliwa ngati we Adamu ne Eva—wano watalinji nicisinka nanti acakuti walinji awapwililike? Ya-a amawuzyo yaliwalondekwa ukwasuka. Nomba yaliwakwasukwa wuli?
15-16. (a) Ampindi ci pano awantu waliwa nulongo lwakulanjizya wucisinka wawo kwe Yehova? (b) Avyani vino vilifumamo mu welezyo wakulecelezya?
15 E Satana walimunyepa pa myaka 1,000. Pe yoyo impindi ataliwasovya umuntu uwili wensinye. Lelo nanti ciwe wo-o, pansizi ya myaka 1,000 walimusapula. Swinya nga wamusapula alitalika na swinyanye ukusovya awantu. Pe yoyo impindi apano awantu awapwililike waliwa nulongo lwakulanjizya nga cakuti wacindika izina lya kwe Yehova nukutunjilila imitecele yakwe. (Ukuwu. 20:7-10) Vino awantu wonsinye waliwacita wenga na wenga pe yoyo impindi, avino vililanjizya nga cakuti amazina yawo yangalembwa umuyayaya mwi buku lya wumi.
16 E Baibolo yikatunena ukuti awantu wamwi wataliwa ni cisinka ngati we Adamu ne Eva swinya walikana ni mitecele ya kwe Yehova. Avyani vino viliwaciticila nga wacita wo-o? Pa Ukuwumbulika 20:15 pakatunena ukuti: “Wensi wino izina lyakwe litawalisilwe mwekalatanye weyo uwawawumi wasumbizilwe mwesumbi wamulilo.” Fwandi wacipondoka wonsinye waliyononwa umuyayaya. Lelo impendwa iyikulu iya wantu awapwililike walipusuka pe wo-o uwelezyo wakulecelezya. Nga cawa wo-o apano amazina yawo yalilembwa mwi buku lya wumi umuyayaya.
“IMPINDI YANSILO”
17. Avyani vino umungeli wanenile e Daniel ukuti avino viliwacitika mu manda yitu? (Daniel 12:4, 8-10)
17 Tukakwivwa icete ukwelenganya pevino vilicitika ku nkolelo. Lelo nanti ciwe wo-o, e Daniel wamunenile amazwi ayacindame nkaninye ku mungeli yano yalandanga pa mpindi yitu, akuli ukuti “impindi yansilo.” (Wazyani Daniel 12:4, 8-10; 2 Tim. 3:1-5) Umungeli wanenile e Daniel ukuti: “Ukumanya kwe neco kwe neco kulivula.” [NWT] Amuno awantu wa kwe Leza awano walinji nukwivwicisya icete cete ya amazwi ya wusesemo. Umungeli walunzilepo nukulanda ukuti pe yoyo impindi “awawembu wataliyiluka, walilanga walandalizile nuwuwipe wawo.”
18. Avyani vino vili mukuciticila awawipe nombanye?
18 Mwe ya-a amanda cingaloleka ngati awawipe wasisundwa ukulingana ni viwipe vino wakacita. (Mala. 3:14, 15) Lelo nombanye e Yesu ali mukupingula wano wawa ngati ambuzi nukuwapawula kwe wano wawa ngati ang’onzi. (Mat. 25:31-33) Wa-a awantu awawipe watalipusuka pa wucuzi wukulu swinya watalitela wazyulupuke nu kuwa nu wumi mu nsi mpya. Cinji acakuti amazina yawo yatalilembwa mwi ‘buku lya kwizucilako’ lino lyalumbulwa pe Malakayi 3:16.
19. Avyani vino tuzipizile ukucita peyonye impindi, swinya amulandu ci? (Malakayi 3:16-18)
19 Peyonye impindi apano tuzipizile ukuwa ni miwele yino yikulanjizya ukuti tusi kuluwali lwa wawembu. (Wazyani Malakayi 3:16-18.) E Yehova akalonganika wano akalola ukuti ‘awantu wakwe’ nanti wano wacindama kwe weliwe. Ukwasowa nukuvwilika swensinye tukalonda ukuwa pe wa-a awantu.
Tuliyivwa icete nkaninye ukulola kuno e Daniel, awakundikwe witu na wantu vye wanji ‘wakuzyulupuka,’ kukupocelela ivilambu vyawo mu nsi mpya. (Lolani paragrafu 20)
20. Awulayo ci uwakulecelezyako wuno walayile e Daniel, swinya amulandu ci wuno mukalonda ukuti wize wuficiliswe?
20 Ukwasowa nu kuvwilika pe yo-o impindi tukwikala mu manda ya nsansa. Nombanye ivintu ivizima ivicile na pa-a vili mukucitika. Swinya patakuzimba, twandi tuloleko kuno awawipe wonsinye wakononwa. Ukulunda pe vyonsinye vyo-o, tulilolako kuno uwusesemo wuno e Yehova wanenile e Daniel wukuficiliswa. Uwakuti: “Ulizyulupuka kukwiza pochelela ichilambu chako pano impindi yiza yasila.” (Dan. 12:13) Uzye mukalondesya sana ukwiza mukulola kuno e Daniel na wakundikwe winu ‘wakuzyulupuka’? Nga avino mukalonda, lyo muzipizile ukuwombesya ukuwa awacisinka peyonye impindi pakuti amazina yinu yatwalilile ukuwa mwi buku lya wumi ilya kwe Yehova.
ULWIMBO 80 ‘Yelezyani Mulole Vino Yehova Wazipa’
a Mwe co-o icipande twasambilila pakwivwicisya ukupya kuno kukulanda pa mulimo uwukulu wuno wusitela wuwombwepo mu nsi wuno walumbulwa pe Daniel 12:2, 3. Twandi tusambilile na pa mpindi pano vyo-o viliwacitika, na pe wano waliwimbwamo. Twalanda na pe vino wo-o umulimo wakusambilizya wulipekanizizya wonsinye awa munsi kuwelezyo wakulecelezya wuno wuliwako kukusila kwa Myaka 1,000 iya Kuteka kwa kwe Yesu.
b Ukuzyulupuka kufwile kuliwacitika ukulingana na vino awantu wakonkine pa kufwa, akuli ukuti ukulingana ni nkulo yawo. Awantu wa kwe Yehova wano walilecelezya ukufwa mumanda yakulecelezya, pamwi awano walitalicila ukuzyulupuka. Apano pakonke wano wafwile pano weni wacilinji watani wafwe mpaka wonsinye wano wawa mu cizyusyo ca kwe Yehova wize wazyulupuke. Nga cakuti wonye avino ciliwa, lyo cila nkulo waliwa nulongo lwakupocelela wano wamanyile. Asamulandu nivili vyonsinye vino vilicitika, amawaliko yakalanda ukuti pakawa ‘umuyano’ pe wano wakazyulupucila kwi yulu. Swinya tungasuwila ukuti na pe wano waliwazyulupucila mu nsi naponye paliwa umuyano.—1 Kor. 14:33; 15:23.
c Wo-o awulondolozi uwupya pe vino twamanyile kaali vino vyawa mwi buku lyakuti Angweniko ku Kusesema kwa kwa Daniele! icipandwa 17, na mu Ulupungu lwa kwe Kalinda ulwa July 1, 1987, amafwa 21-25 mu Ciwemba.
d Amazwi yano yawa pe Daniel 12:2 yasilanda pamiwele yino awantu walinji nayo pano watani wafwe. Lelo amazwi yano yawa pa Imilimo 24:15 ayakuti ‘awalungamane’ na wano “wasa walungamane” na ya pe Yohani 5:29 ayakuti ‘wano wacitanga icete ‘ na ‘wano watacitanga icete’ yeni yakalanda pamiwele yino awantu walinji nayo pano watani wafwe.
