ARTÍCULO ÑA̱ KAʼVIYÓ 40
Sanáʼa̱na ku̱a̱ʼání na̱ yiví “ña̱ xa̱a̱na keʼéna ña̱ va̱ʼa”
“Na̱ sánáʼa̱ ku̱a̱ʼání na̱ yiví ña̱ xa̱a̱na keʼéna ña̱ va̱ʼa, ndiʼi tiempo ndaye̱ʼe̱na táki̱ʼva yéʼe̱ ki̱mi” (DAN. 12:3).
YAA 151 Jehová sandátakura na̱ ni̱xi̱ʼi̱
ÑA̱ KA̱ʼA̱NYÓ XA̱ʼA̱ *
1. ¿Ndáaña ndátuyó koo ti̱xin ña̱ mil ku̱i̱ya̱ tá ná kaʼndachíñu ta̱ Cristo?
¿Á XA̱A̱ ndákanixi̱níyó ña̱ liviní koo tá ná ndataku na̱ yiví ti̱xin ña̱ mil ku̱i̱ya̱ tá ná kaʼndachíñu ta̱ Cristo? Ndiʼi miíyó na̱ ni̱xi̱ʼi̱ na̱ veʼe kúni̱kavíyó ndikóyó kuniyóna ta saátu Jehová kúni̱ra ndikóra kunirana (Job 14:15). Ná ndakanixi̱níyó ña̱ ku̱a̱ʼánína ndikó tukuna kunina na̱ veʼena ta kusi̱íní-inina. Nda̱a̱ táki̱ʼva sa̱kuaʼayó nu̱ú artículo ña̱ ni̱ya̱ʼa, na̱ ke̱ʼé ña̱ va̱ʼa va̱xi ki̱vi̱na nu̱ú libro nu̱ú va̱xi ki̱vi̱ na̱ kutaku, ta na̱yóʼo ndatakuna (Hech. 24:15; Juan 5:29). Sana na̱ veʼeyó na̱ kúni̱níyó xíniyó kúú na̱ siʼna ndataku, * ta saátu na̱ ke̱ʼé ña̱ va̱ása va̱ʼa, na̱ va̱ása nísakuaʼa xa̱ʼa̱ Jehová á na̱ va̱ása níkachíñu nu̱úra tá kúma̱ní kuvina, ndatakuna ta ndatiinna ku̱a̱chi xíʼinna.
2, 3. a) Nda̱a̱ táki̱ʼva káchi Isaías 11:9, 10, ¿ndáaña sakúaʼa na̱ ndataku? b) ¿Ndáaña sakúaʼayó nu̱ú artículo yóʼo?
2 Ndiʼi na̱ ndataku yóʼo ku̱a̱ʼání ña̱ xa̱a̱na sakúaʼana (Is. 26:9; 61:11). Ña̱kán tiempo saá ku̱a̱ʼáníka na̱ yiví natúʼunyó xíʼin xa̱ʼa̱ Ndióxi̱ (kaʼvi Isaías 11:9, 10). * Na̱ ke̱ʼé ña̱ va̱ása va̱ʼa na̱ ndataku tiempo saá xíniñúʼu sakúaʼana xa̱ʼa̱ ta̱ Jesucristo, xa̱ʼa̱ Reino Ndióxi̱ xíʼin xa̱ʼa̱ ña̱ nda̱tava ta̱ Jesús miíyó ndaʼa̱ ku̱a̱chi. Ta saátu sakúaʼana xa̱ʼa̱ Jehová ña̱ kúúmiíra derecho ña̱ kaʼndachíñura. Ta nda̱a̱ na̱ ke̱ʼé ña̱ va̱ʼa sakúaʼakana xa̱ʼa̱ ña̱ kúni̱ Jehová keʼéra chi sava na̱yóʼo ni̱xi̱ʼi̱na tá kúma̱ní ndiʼi ka̱ʼyi̱ Biblia. Ña̱yóʼo náʼa̱ña nu̱úyó ña̱ koo ku̱a̱ʼáníva ña̱ sakúaʼa na̱ ke̱ʼé ña̱ va̱ʼa ta saátu na̱ keʼé ña̱ va̱ása va̱ʼa.
3 Nu̱ú artículo yóʼo ndakuiinyó pregunta yóʼo: ¿ndáa ki̱ʼva sanáʼa̱yó na̱ yiví? ¿Ndáaña kundoʼo na̱ kandíxa ña̱ sanáʼa̱ Jehová? Ta, ¿ndáaña kundoʼo na̱ va̱ása kandíxa ña̱ sanáʼa̱ra? Ndáyáʼviní kunda̱a̱-iniyó xa̱ʼa̱ ña̱yóʼo tiempo vitin. Nda̱a̱ táki̱ʼva sakúaʼayó vitin, sava profecía ña̱ va̱xi nu̱ú libro ta̱ Daniel xíʼin Apocalipsis chindeétáʼanña xíʼinyó kunda̱a̱-iniyó ndáaña kuu tá ná ndataku na̱ ni̱xi̱ʼi̱. Soo siʼna ná sakúaʼayó xa̱ʼa̱ profecía ña̱ va̱xi nu̱ú Daniel 12:1, 2, chi yóʼo káʼa̱nña xíʼinyó xa̱ʼa̱ ña̱ kuu.
NA̱ NI̱XI̱ʼI̱ NDATAKUNA
4, 5. ¿Ndáaña káʼa̱n Daniel 12:1 koo tiempo so̱ndíʼi?
4 (Kaʼvi Daniel 12:1). * Libro ta̱ Daniel yiku̱nní káʼa̱nña xíʼinyó xa̱ʼa̱ ña̱ koo tiempo nu̱ú ndíʼi. Tá kúú Daniel 12:1 káʼa̱nña xa̱ʼa̱ ta̱ Miguel á ta̱ Jesucristo, ña̱ chindeétáʼanra xíʼin na̱ ñuu Ndióxi̱. Profecía yóʼo ki̱xáʼaña xínuña ku̱i̱ya̱ 1914 tá ndu̱ura Rey ti̱xin Reino Ndióxi̱.
5 Ta saátu ni̱ka̱ʼa̱nna xíʼin ta̱ Daniel ña̱ ndakundichi ta̱ Jesús “iin tiempo ña̱ ndi̱ʼi̱ní-inina, ña̱ ta̱ʼán koo nda̱a̱ tá ki̱xáʼa íyo iin ñuu”. Ta tiempo ña̱ ndi̱ʼi̱ní-inina yóʼo kooña tá ná kixaa̱ tu̱ndóʼo ña̱ káʼnu ña̱ káʼa̱n Mateo 24:21 xa̱ʼa̱. Tá ná ndiʼi tiempo ña̱ ndi̱ʼi̱ní-inina á tá ná kixaa̱ ña̱ Armagedón, ta̱ Jesús ndakundichira ta chindeétáʼanra xíʼin na̱ ñuu Ndióxi̱. Ta na̱yóʼo kúú ku̱a̱ʼání na̱ yiví na̱ ka̱ʼa̱n libro ña̱ Apocalipsis xa̱ʼa̱, na̱ ni̱ya̱ʼa nu̱ú tu̱ndóʼo ña̱ káʼnu (Apoc. 7:9, 14).
6. ¿Ndáaña kuu xíʼin na̱ yiví tá ná ya̱ʼa tu̱ndóʼo ña̱ káʼnu ta nda̱chun káʼa̱nyó ña̱yóʼo? (Koto artículo ña̱ va̱xi nu̱ú tutu yóʼo ña̱ naní “Pregunta ña̱ kéʼé na̱ káʼvi tutu yóʼo” ña̱ káʼa̱n xa̱ʼa̱ na̱ ndataku nu̱ú ñuʼú yóʼo).
6 (Kaʼvi Daniel 12:2). * ¿Ndáaña kuu tá ná ndiʼi ka̱ku ku̱a̱ʼání na̱ yiví? Ña̱ profecía yóʼo káʼa̱nña ña̱ ndataku na̱ ni̱xi̱ʼi̱. Soo profecía yóʼo, su̱ví ña̱ ndána̱ʼa̱ kuití kúúña xa̱ʼa̱ na̱ nda̱taku, á xa̱ʼa̱ na̱ ndataku chí ndiví ña̱ kuu tiempo so̱ndíʼi nda̱a̱ táki̱ʼva xi̱kunda̱a̱-iniyó tá ya̱chi̱. * Chi xa̱ʼa̱ na̱ ndataku nu̱ú ñuyǐví xa̱áva káʼa̱nña. ¿Nda̱chun va̱ʼa kúnda̱a̱-iniyó ña̱ xa̱ʼa̱ na̱yóʼo káʼa̱nña? Saáchi nu̱ú Job 17:16 káʼa̱nña xa̱ʼa̱ yáká, ta tu̱ʼun yóʼo kítáʼanña xíʼin tu̱ʼun ña̱ káʼa̱n xa̱ʼa̱ nu̱ú ndúxu̱n na̱ ni̱xi̱ʼi̱. Ña̱yóʼo táxiña kúnda̱a̱-iniyó ña̱ Daniel 12:2 káʼa̱nña xa̱ʼa̱ ña̱ ndataku na̱ ni̱xi̱ʼi̱ tá ná ya̱ʼa tiempo ña̱ so̱ndíʼi ta saátu tá ná ya̱ʼa ña̱ Armagedón.
7. a) ¿Ndáaña kúni̱ kachi ña̱ ndatakuna ta koona ndiʼi tiempo? b) ¿Nda̱chun va̱ʼaníka koo ña̱ ndatakuna nu̱ú ñuyǐví xa̱á?
7 Soo, ¿ndáaña kúni̱ kachi Daniel 12:2 tá káʼa̱nña ña̱ ndataku savana ta koona ndiʼi tiempo? Ña̱ kúni̱ kachiña kúúña, na̱ nda̱taku ta ná xa̱a̱na kuxini̱ va̱ʼana xa̱ʼa̱ Jehová xíʼin xa̱ʼa̱ ta̱ Jesús ta ná ndakundeéna sakúaʼana xa̱ʼa̱ na̱yóʼo ta kundiku̱nna ña̱ káʼa̱nna ti̱xin ña̱ mil ku̱i̱ya̱, ndakiʼinna ña̱ kutakuna ndiʼi tiempo (Juan 17:3). Ta ña̱ ndatakuna yóʼo va̱ʼaníka kooña nu̱ú ña̱ nda̱taku sava na̱ ni̱xi̱yo tiempo xi̱naʼá (Heb. 11:35). ¿Nda̱chun? Saáchi na̱kán ni̱xi̱ʼi̱ tukuvana.
8. ¿Nda̱chun ndiʼi-xa̱ʼa̱ sava na̱ ndataku?
8 Su̱ví ndiʼi na̱ ndataku kandíxa ña̱ sanáʼa̱ Jehová miína. Profecía ta̱ Daniel káʼa̱nña ña̱ sava na̱ ndataku na̱ ndiʼi-xa̱ʼa̱va koona. Chi xa̱ʼa̱ ña̱ va̱ása kandíxana, kǒo ki̱vi̱na ki̱xi nu̱ú libro nu̱ú va̱xi ki̱vi̱ na̱ kutaku, ta va̱ása ni̱ʼína ña̱ kutakuna ndiʼi tiempo. Na̱kán, Ndióxi̱ va̱ása kandíxara kunirana ta na̱ ndiʼi-xa̱ʼa̱va koona. Ña̱kán, Daniel 12:2 káʼa̱nña xa̱ʼa̱ ña̱ kuu xíʼin ndiʼi na̱ ndataku * (Apoc. 20:12). Ta ña̱ keʼéna tá xa̱a̱ ná ndatakuna kúú ña̱ na̱ʼa̱ á na̱ kutaku ndiʼi tiempo kúúna á na̱ kuvi kúúna.
SANÁʼA̱NA KU̱A̱ʼÁNÍ NA̱ YIVÍ “ÑA̱ XA̱A̱NA KEʼÉNA ÑA̱ VA̱ʼA”
9, 10. a) Nda̱a̱ táki̱ʼva káchi Daniel 12:3, ¿Ndáaña kooka tá ná ya̱ʼa tu̱ndóʼo ña̱ káʼnu? b) ¿Ndáana ndaye̱ʼe̱ nda̱a̱ táki̱ʼva yéʼe̱ ndiví?
9 (Kaʼvi Daniel 12:3). * ¿Ndáaña kuu tá ná ya̱ʼa tiempo ña̱ ndi̱ʼi̱ní-inina ña̱ xa̱a̱ ku̱yatin kixaa̱? Xa̱a̱ sa̱kúaʼayó xa̱ʼa̱ ña̱ va̱xi nu̱ú Daniel 12:2, soo versículo 3 káʼa̱ntuña xa̱ʼa̱ inka ña̱ʼa ña̱ kuu tá ná ya̱ʼa “tu̱ndóʼo ña̱ káʼnu”.
10 ¿Ndáana kúú na̱ ndaye̱ʼe̱ nda̱a̱ táki̱ʼva yéʼe̱ ndiví? Tu̱ʼun ña̱ ni̱ka̱ʼa̱n ta̱ Jesús ña̱ va̱xi nu̱ú Mateo 13:43 chindeétáʼanña xíʼinyó kunda̱a̱-iniyó xa̱ʼa̱ ña̱yóʼo. Ta̱yóʼo ka̱chira: “Tiempo saá, na̱ xíniso̱ʼo ña̱ káʼa̱n Ndióxi̱ ndaye̱ʼe̱na ti̱xin Reino yivána nda̱a̱ táki̱ʼva ndáye̱ʼe̱ ñu̱ʼu”. Tá ni̱ka̱ʼa̱n ta̱ Jesús tu̱ʼun yóʼo, xa̱ʼa̱ na̱ ñanira na̱ ku̱ʼu̱n kaʼndachíñu xíʼinra chí ndiví kúú ña̱ ni̱ka̱ʼa̱nra, á na̱ “kúú se̱ʼe Reino Ndióxi̱” (Mat. 13:38). Ña̱kán Daniel 12:3 káʼa̱nña xa̱ʼa̱ na̱ ku̱ʼu̱n chí ndiví xíʼin xa̱ʼa̱ chiñu ña̱ keʼéna ti̱xin mil ku̱i̱ya̱.
Na̱ 144,000 inkáchi kachíñuna xíʼin ta̱ Jesucristo ña̱ sánáʼa̱na na̱ yiví ti̱xin ña̱ mil ku̱i̱ya̱. (Koto párrafo 11).
11, 12. ¿Ndáa chiñu kúú ña̱ keʼé na̱ 144,000 ti̱xin ña̱ mil ku̱i̱ya̱?
11 Na̱ ku̱ʼu̱n chí ndiví, sanáʼa̱na ku̱a̱ʼání na̱ yiví xa̱ʼa̱ ña̱ va̱ʼa. ¿Ndáa ki̱ʼva kéʼéna ña̱yóʼo? Inkáchi kachíñuna xíʼin ta̱ Jesucristo ña̱ kuniʼina yichi̱ nu̱úyó ña̱ natúʼunyó xíʼin na̱ yiví xa̱ʼa̱ Ndióxi̱ ti̱xin ña̱ mil ku̱i̱ya̱. Na̱ 144,000, su̱ví rey kuití koona chi saátu koona su̱tu̱ (Apoc. 1:6; 5:10; 20:6). Ña̱kán loʼo tá loʼo chindeétáʼanna xíʼin na̱ yiví ña̱ va̱ása kookana na̱ yiví ku̱a̱chi (Apoc. 22:1, 2; Ezeq. 47:12). Ta kusi̱íní-inina keʼéna chiñu yóʼo.
12 ¿Ndáana kúú na̱ ku̱a̱ʼání na̱ káʼa̱n ña̱yóʼo xa̱ʼa̱, na̱ xa̱a̱ sakúaʼa keʼé ña̱ va̱ʼa? Na̱yóʼo kúú na̱ ndataku, na̱ ka̱ku tá ná ya̱ʼa ña̱ Armagedón ta saátu na̱ va̱lí na̱ kaku ti̱xin ñuyǐví xa̱á. Tá ná ndiʼi ña̱ mil ku̱i̱ya̱, ndiʼi na̱ koo nu̱ú ñuʼú kán va̱ása kookana na̱ yiví ku̱a̱chi. Tásaá, ¿ama kúú ña̱ ka̱ʼyi̱ va̱ʼa ki̱vi̱na nu̱ú libro nu̱ú va̱xi ki̱vi̱ na̱ kutaku ndiʼi tiempo ta va̱ása ndookaña?
PRUEBA SO̱NDÍʼI
13, 14. ¿Ndáaña xíniñúʼu keʼé ndiʼi na̱ yiví na̱ koo nu̱ú ñuyǐví xa̱á tá kúni̱na kutakuna ndiʼi tiempo?
13 Ná ndakaʼányó chi su̱ví ña̱ kǒo ku̱a̱chi kuumií na̱ yiví kúni kachiña ña̱ kutakuna ndiʼi tiempo. Ná ndakanixi̱níyó xa̱ʼa̱ ta̱ Adán xíʼin ñá Eva. Na̱yóʼo kǒo ku̱a̱chi níxi̱kuumiína, soo xi̱niñúʼu na̱ʼa̱na á ndixa kándíxana ña̱ káʼa̱n Jehová xíʼinna ña̱ va̱ʼa kutakuna ndiʼi tiempo, soo na̱yóʼo kǒo níxiniso̱ʼona ña̱ ni̱ka̱ʼa̱nra (Rom. 5:12).
14 Nda̱a̱ táki̱ʼva xa̱a̱ sa̱kúaʼayó, tá ná ndiʼi ña̱ mil ku̱i̱ya̱ ndiʼi na̱ koo nu̱ú ñuʼú yóʼo va̱ása kuumiíkana ku̱a̱chi. Ta ndiʼi na̱yóʼo, ¿á kundiku̱nna sa̱tá gobierno Jehová ndiʼi tiempo? ¿Á keʼétu na̱yóʼo nda̱a̱ táki̱ʼva ke̱ʼé ta̱ Adán xíʼin ñá Eva, chi ni kǒo ku̱a̱chi níxi̱kuumiína va̱ása níxi̱yo nda̱kú-inina xíʼinra? ¿Ndáa ki̱ʼva kunda̱a̱-iniyó ña̱ kǒo keʼéna nda̱a̱ táki̱ʼva ke̱ʼé ta̱ Adán xíʼin ñá Eva?
15, 16. a) ¿Ama kúú ña̱ na̱ʼa̱ ndiʼi na̱ yiví ña̱ íyo nda̱kú-inina xíʼin Jehová? b) ¿Ndáaña kuu tá xa̱a̱ ná ndiʼi prueba yóʼo?
15 Ta̱ Ndi̱va̱ʼa kundasira mil ku̱i̱ya̱. Ta tiempo saá va̱ása kuchiñura sandáʼvira ni iinna. Soo tá ná ndiʼi ña̱ mil ku̱i̱ya̱, sa̱ñávara ta kixáʼa tukura sandáʼvira na̱ yiví na̱ kǒo ku̱a̱chi kúúmií. Tá ná kuu ña̱yóʼo, ndiʼi na̱ koo nu̱ú ñuʼú kán kivi na̱ʼa̱na á íxato̱ʼóna ki̱vi̱ Ndióxi̱ ta á kúni̱na kaʼndachíñura nu̱úna (Apoc. 20:7-10). Xíʼin ña̱ ndaka̱xinna keʼéna na̱ʼa̱ña á ka̱ʼyi̱ ki̱vi̱na nu̱ú libro nu̱ú va̱xi ki̱vi̱ na̱ kutaku ndiʼi tiempo á va̱ása ka̱ʼyi̱ña.
16 Savana keʼéna nda̱a̱ táki̱ʼva ke̱ʼé ta̱ Adán xíʼin ñá Eva. Va̱ása kandíxana kaʼndachíñu Jehová nu̱úna, soo va̱ása xíni̱yó nda̱saana keʼé saá. Ta, ¿ndáaña kundoʼo na̱yóʼo? Apocalipsis 20:15 káchiña: “Na̱ kǒo ki̱vi̱ va̱xi nu̱ú libro nu̱ú va̱xi ki̱vi̱ na̱ kutaku, sa̱kánana na̱yóʼo nu̱ú xíxi̱ ñuʼu̱”. Xíʼin ña̱yóʼo kúnda̱a̱-iniyó ña̱ na̱ ndiʼi-xa̱ʼa̱va koona. Soo ku̱a̱ʼání na̱ kǒoka ku̱a̱chi kúúmií kuchiñuvana ya̱ʼana nu̱ú prueba yóʼo, ta ki̱vi̱na ka̱ʼyi̱ va̱ʼaña nu̱ú libro nu̱ú va̱xi ki̱vi̱ na̱ kutaku ndiʼi tiempo.
KI̱VI̱ NU̱Ú NDÍʼI
17. ¿Ndáaña ni̱ka̱ʼa̱nna xíʼin ta̱ Daniel kuu tiempo ña̱ ndóoyó vitin? (Daniel 12:4, 8-10).
17 Kúsi̱íní-iniyó tá ndákanixi̱níyó xa̱ʼa̱ ña̱ koo chí nu̱únínu. Saátu ni̱ka̱ʼa̱n iin ángel xíʼin ta̱ Daniel xa̱ʼa̱ ña̱ ndáyáʼviní koo tiempo ña̱ ndóoyó vitin á ki̱vi̱ nu̱ú ndíʼi (kaʼvi Daniel 12:4, * 8-10; * 2 Tim. 3:1-5). Ta̱yóʼo ka̱chira: “Ku̱a̱ʼání ña̱ nda̱a̱ xa̱a̱na kunda̱a̱-inina xa̱ʼa̱”. Xíʼin ña̱yóʼo kúnda̱a̱-iniyó, na̱ ñuu Ndióxi̱ va̱ʼaníka xa̱a̱na kunda̱a̱-inina xíʼin profecía ña̱ va̱xi nu̱ú libro ta̱ Daniel. Ta̱ ángel íyoka ña̱ ni̱ka̱ʼa̱nra xa̱ʼa̱ tiempo nu̱ú ndiʼi, ta ka̱chira: “Ta na̱ ndi̱va̱ʼa-ini ndeéníka kininí keʼéna ta nda̱a̱ ni iin na̱yóʼo kǒo kunda̱a̱-ini xíʼin ña̱yóʼo”.
18. ¿Ndáaña xa̱a̱ ku̱nu̱mí kundoʼo na̱ ndi̱va̱ʼa-ini?
18 Tiempo ña̱ ndóoyó vitin xítoyó ña̱ ku̱a̱ʼání na̱ ndi̱va̱ʼa-ini kéʼéna ña̱ kúni̱ miína ta kǒo ña̱ íxaana xíʼinna (Mal. 3:14, 15). Soo si̱lóʼo kúma̱ní, ta ta̱ Jesús ndatiinra ku̱a̱chi xíʼin na̱ íyo nda̱a̱ táki̱ʼva íyo ti̱xúʼu ta ndataʼvírana nu̱ú na̱ íyo nda̱a̱ táki̱ʼva íyo ndikachi (Mat. 25:31-33). Tá ná kixaa̱ ña̱ gran tribulación na̱ ndi̱va̱ʼa-ini va̱ása ka̱kuna, ta ni va̱ása ndatakuna ña̱ koona nu̱ú ñuyǐví xa̱á. Ki̱vi̱na va̱ása ka̱ʼyíña nu̱ú libro nu̱ú va̱xi ki̱vi̱ na̱ kutaku na̱ káʼa̱n Malaquías 3:16 xa̱ʼa̱.
19. ¿Ndáaña xíniñúʼu keʼéyó vitin, ta nda̱chun? (Malaquías 3:16-18).
19 Vitin kúú tiempo ña̱ xíniñúʼu na̱ʼa̱yó ña̱ va̱ása kúúyó táʼan na̱ ndi̱va̱ʼa-ini (kaʼvi Malaquías 3:16-18). * Jehová xa̱a̱ ndáchitáʼanra na̱ ndáyáʼviní nu̱úra ta miíyó kúni̱yó kuñuʼuyó xíʼin na̱yóʼo.
Kusi̱íní-iniyó tá ná ndataku ta̱ Daniel ta saátu na̱ táʼanyó na̱ xa̱a̱ ni̱xi̱ʼi̱, ta saátu savaka na̱ yiví ña̱ va̱ʼa kundoona nu̱ú ñuyǐví xa̱á. (Koto párrafo 20).
20. ¿Ndáaña ni̱ka̱ʼa̱nna xíʼin ta̱ Daniel kuu, ta nda̱chun kúni̱níún xi̱nu ña̱yóʼo?
20 Ndóoyó tiempo ña̱ kúu ña̱ʼa ña̱ ndákanda̱ní-iniyó xíʼin. Soo xa̱a̱ ku̱nu̱mí koo ku̱a̱ʼáníka ña̱ʼa ña̱ ndeéní ndakanda̱ní-iniyó xíʼin. Si̱lóʼoní kúma̱ní ta kixaa̱ ki̱vi̱ ña̱ kǒoka nda̱a̱ ni ña̱ kini koo nu̱ú ñuʼú yóʼo. Ta saá kúú ña̱ kuniyó xi̱nu tu̱ʼun ña̱ ni̱ka̱ʼa̱n Jehová xíʼin ta̱ Daniel tá ka̱chira: “Tándi̱ʼi ndakoún ña̱ va̱ʼa ndakiʼún ña̱ taxi Ndióxi̱ ndaʼún tá ná kixaa̱ ki̱vi̱” (Dan. 12:13). ¿Á xa̱a̱ kúni̱níún ná kixaa̱ ki̱vi̱ ña̱ ndataku ta̱ Daniel ta saátu na̱ táʼún na̱ ni̱xi̱ʼi̱? Chika̱a̱níún ndee̱ ña̱ nda̱kú koo iniún xíʼin Jehová, tasaá kúú ña̱ ka̱ʼyi̱ ki̱vi̱ún nu̱ú libro nu̱ú káʼyí Jehová ki̱vi̱ na̱ kutaku ndiʼi tiempo.
YAA 80 Ná kotoyó ña̱ va̱ʼaní-ini Ndióxi̱
^ Síín xi̱kunda̱a̱-iniyó xa̱ʼa̱ chiñu ña̱ káʼa̱n Daniel 12:2, 3. Soo nu̱ú artículo yóʼo kunda̱a̱ va̱ʼa iniyó ndáaña kúni̱ kachiña. Kotoyó ama keʼéna chiñu yóʼo ta ndáana keʼéña. Ta saátu kotoyó ndáa ki̱ʼva chindeétáʼan chiñu yóʼo xíʼin na̱ koo ñuyǐví xa̱á tá ná ndiʼi kaʼndachíñu ta̱ Cristo ti̱xin ña̱ mil ku̱i̱ya̱.
^ Sana na̱ nda̱kúní ni̱xi̱yo ini xíʼin Jehová na̱ ni̱xi̱ʼi̱ tiempo so̱ndíʼi kúú na̱ siʼna ndataku tasaá ndatakuka na̱ ni̱xi̱ʼi̱ tá ya̱chi̱. Tasaá iin tá iin generación ndakiʼinna na̱ xínitáʼanna xíʼin tá ná ndatakuna. Ña̱ Biblia káʼa̱nña xa̱ʼa̱ ña̱ ndataku na̱ ku̱ʼu̱n chí ndiví, ña̱ yiku̱n koo ña̱ ndataku na̱yóʼo. Ña̱kán, saátu koo ña̱ ndatakuna nu̱ú ñuʼú yóʼo yiku̱n kooña (1 Cor. 14:33; 15:23).
^ Isaías 11:9, 10: “Ni iinna kǒo kundi̱va̱ʼa xíʼin na̱ ñui̱ nu̱ú koona; ta ndiʼi na̱ yiví na̱ kundoo nu̱ú ñuʼú kunda̱a̱-inina xa̱ʼa̱ Ndióxi̱ nda̱a̱ táki̱ʼva ñúʼu ti̱kui̱í tá mar. 10 Ki̱vi̱ kán ndakundichi ti̱oʼo ta̱ Jesé ta kooña iin señal nu̱ú na̱ ñuu. Ta na̱ ñuu ku̱ʼu̱nna nu̱úra ta ka̱ʼa̱nna xíʼinra ña̱ ná chindeétáʼanra xíʼinna, ta va̱ʼaní kaʼndachíñura”.
^ Daniel 12:1: “Ta tiempo saá ndakundichi ta̱ Miguel, ta̱ kúú príncipe ta̱ chíndeétáʼan xíʼin na̱ ñuu miíún. Ta koo iin tiempo ña̱ ndi̱ʼi̱ní-inina, ña̱ ta̱ʼán koo nda̱a̱ tá ki̱xáʼa íyo iin ñuu. Ta tiempo saá ka̱ku na̱ ñuu miíún, ndiʼi na̱ ni̱ka̱ʼyi̱ ki̱vi̱ nu̱ú libro”.
^ Daniel 12:2: “Ku̱a̱ʼání na̱ ni̱xi̱ʼi̱ na̱ ñúʼu ti̱xin ñuʼú ndatakuna, savana ndatakuna ta koona ndiʼi saá tiempo, ta savana ndatakuna ta kundasína kuninana ta na̱ ndiʼi-xa̱ʼa̱ va̱ʼa koona”.
^ Vitin na̱sama ki̱ʼva ña̱ kúnda̱a̱-iniyó xíʼin ña̱ káʼa̱n libro Prestemos atención a las profecías de Daniel capítulo 17 ta saátu ña̱ káʼa̱n ña̱ La Atalaya 1 tí julio ña̱ ku̱i̱ya̱ 1987, página 21 nda̱a̱ 25.
^ Tu̱ʼun “na̱ ke̱ʼé ña̱ va̱ʼa” ta saátu “na̱ ke̱ʼé ña̱ va̱ása va̱ʼa” ña̱ va̱xi nu̱ú Hechos 24:15 xíʼin Juan 5:29 káʼa̱nña xa̱ʼa̱ ña̱ ke̱ʼé na̱ ndataku tá kúma̱ní kuvina.
^ Daniel 12:3: “Ta na̱ kúúmií ña̱ ndíchi ndaye̱ʼe̱na nda̱a̱ táki̱ʼva yéʼe̱ ndiví, ta na̱ sánáʼa̱ ku̱a̱ʼání na̱ yiví ña̱ xa̱a̱na keʼéna ña̱ va̱ʼa, ndiʼi tiempo ndaye̱ʼe̱na táki̱ʼva yéʼe̱ ki̱mi”.
^ Daniel 12:4: “Soo yóʼó Daniel, chise̱ʼé va̱ʼún tu̱ʼun yóʼo ta ndakasi kútu̱ ña̱ libro yóʼo nda̱a̱ tiempo nu̱ú ndíʼi. Ku̱a̱ʼánína viíní xa̱a̱na nandukú va̱ʼana xa̱ʼa̱ña, ta ku̱a̱ʼání ña̱ nda̱a̱ xa̱a̱na kunda̱a̱-inina xa̱ʼa̱”.
^ Daniel 12:8-10: “Xi̱niso̱’i̱ soo va̱ása níkunda̱a̱-inii̱. Ña̱kán ni̱ka̱ʼi̱n: ‘Táta, ¿ndáaña kuu tá ná xi̱nu ña̱yóʼo?’. 9 Ta ta̱kán ni̱ka̱ʼa̱nra xíʼi̱n: ‘Kúáʼan Daniel, saáchi tu̱ʼun yóʼo xíniñúʼu koo se̱ʼéña ta xíniñúʼu ndasi kútu̱ña nda̱a̱ tiempo nu̱ú ndíʼi. 10 Ku̱a̱ʼánína xa̱a̱na nduu limpiona ta keʼéna ña̱ va̱ʼa. Ta na̱ ndi̱va̱ʼa-ini ndeéníka kininí keʼéna ta nda̱a̱ ni iin na̱yóʼo kǒo kunda̱a̱-ini xíʼin ña̱yóʼo. Nda̱saa na̱ ndíchi kunda̱a̱-ini xíʼinña”.
^ Malaquías 3:16-18: “Tiempo kán na̱ xi̱ ixato̱ʼó Jehová ni̱ka̱ʼa̱nna xíʼin táʼanna ta xi̱niso̱ʼova Jehová ña̱ ni̱ka̱ʼa̱nna. Ta ni̱ka̱ʼa̱nra ña̱ ná ka̱ʼyi̱ iin libro nu̱ú ndakaʼánra xa̱ʼa̱ na̱ íxato̱ʼó-ñaʼá xíʼin na̱ ndákanixi̱ní xa̱ʼa̱ ki̱vi̱ra. 17 Ta xa̱a̱na koona na̱ ñui̱, káchi Jehová ta̱ xáʼndachíñu nu̱ú na̱ ángel, tá ná kixaa̱ ki̱vi̱ ña̱ ndaka̱xii̱nna ña̱ koona kuenta miíi̱. Ta kundáʼvi-inii̱ kunii̱na, nda̱a̱ táki̱ʼva íxaa iin ta̱a ña̱ kúndáʼvi-inira xínira se̱ʼera ta̱ káchíñu nu̱úra. 18 Ta ndóʼó xa̱a̱ndó ndakunindó ndáa na̱ kúú na̱ va̱ʼa ta ndáana kúú na̱ va̱ása va̱ʼa, ndáa na̱ kúú na̱ káchíñu nu̱ú Ndióxi̱ ta ndáa na̱ kúú na̱ va̱ása káchíñu nu̱úra”.
