TLAMACHTIL 40
“Miakej kinualikaskej itech melajkayotl”
“Miakej kinualikaskej itech melajkayotl, yetoskej nochipa ken sitlalimej” (DAN. 12:3).
TLAKUIKALI 151 Jehová kinyolitis
XIKILNAMIKTO a
1. ¿Tlen panos ijkuak Cristo tlanauatis mil xiuitl?
¡SAPANOUA tiyolpakiskej ijkuak Cristo tlanauatis nikan tlaltikpak uan kinyolitiskej akinmej yoixpolikej! Tinochtin yitikneki tikinmitaskej tofamiliares tlen oixpolikej uan Jehová noijki ijkon kineki (Job 14:15). Matimokuayejyekokan ken sapanoua tiyolpakiskej porque itech nochi tlaltikpak miakej kinseliskej infamiliares. Yotikitakej “akimeh amó” otlajtlakolchijkej kinyolitiskej uan intoka ijkuilitok itech iamoch toTajtsin Dios (Hech. 24:15; Juan 5:29). Xamo achto kinyolitiskej tofamiliares tlen yoixpolikej. b Pero “akimeh otlájtlakolchijkeh” amo okixmatkej Jehová, ik non, amo okitekichiuilijkej, yejuan noijki kinyolitiskej uan satepan “kinyolkuitiskeh [noso kinmixkomakaskej]”.
2, 3. (1) Ijkon ken kijtoua Isaías 11:9, 10, ¿ken kinmachtiskej akinmej kinyolitiskej? (2) ¿Tlen tikitaskej?
2 Nochtin akinmej kinyolitiskej monekis momachtiskej miak tlamantli (Is. 26:9; 61:11). Ik non, moneki tikmatiskej ken tikinmachtiskej (xiktlajtolti Isaías 11:9, 10). Moneki kimatiskej akin okatka Jesucristo, tlen kijtosneki iTekiuajkayo toTajtsin Dios, tleka omonekiaya matechmakixtikan uan ken Satanás okisokioti itoka toTajtsin Dios uan ijkuak okijto amo kinamiki tlanauatis. Akinmej amo otlajtlakolchijkej noijki monekis momachtijtiaskej tlen kichiuas Jehová. Miakej itekipanojkauan Jehová oixpolikej ijkuak ayamo okijkuilouayaj nochi Biblia. Ken tikitaj, akinmej otlajtlakolchijkej uan akinmej amo, momachtiskej miak tlamantli.
3 Itech nin tlamachtil tiknankiliskej nin: ¿Ken kinmachtiskej akinmej kinyolitiskej? ¿Ken kinpaleuis tla momachtiskej? ¿Tlen kinpanos akinmej amo kinekiskej momachtiskej? Axkan ipati ijkon matimotlajtlanikan. Tikitaskej ken techpaleuiskej profecías tlen ijkuilitokej itech amochtli Daniel uan Apocalipsis matikajsikamatikan ken kinyolitiskej akinmej oixpolikej. Matikitakan seki tlamantli tlen opanok uan ijkuilitok itech Daniel 12:1, 2.
“MIAKEJ TLEN KOCHTOKEJ IJTIK TLALI IJSASKEJ”
4, 5. Ijkon ken kijtoua Daniel 12:1, ¿tlen panos itlamian tonalmej?
4 (Xiktlajtolti Daniel 12:1). Amochtli Daniel kijtoua ken panotiaskej seki tlamantli itlamian tonalmej. Daniel 12:1 kijtoua Miguel ye Jesucristo uan “moketos para kipaleuis” ialtepe toTajtsin Dios. Non profecía opejki mochiua itech 1914 ijkuak Jesús opejki tlanauatia.
5 Daniel okijkuilo Jesús ualaskia ijkuak “sapanoua tlajyouiskej ken amo keman omochiuaya desde ijkuak omochi se altepetl”. Non kiteititia tlen kijtoua Mateo 24:21, “tlaijyowílistli yetos satlawel temojti”. Ijkuak peuas Armagedón Jesús kinpaleuis itekipanojkauan toTajtsin Dios. Amochtli Apocalipsis kintokayotia “senmiaktikeh tlaltikpaktlakah”, yejuan momakixtiskej itech ueyi tlajyouilistli (Apoc. 7:9, 14).
6. ¿Tlen panos ijkuak momakixtiskej “senmiaktikeh tlaltikpaktlakah”? (Noijki xikita itech nin revista tlamachtil “Sekimej techtlajtlaniaj”, ompa kijtoua akinmej kinyolitiskej nikan tlaltikpak).
6 (Xiktlajtolti Daniel 12:2). ¿Tlen panos ijkuak momakixtiskej “senmiaktikeh tlaltikpaktlakah”? Profecía tlen ijkuilitok itech Daniel 12:2 kijtoua miakej kinyolitiskej. Otikajsikamatiayaj yejuan akinmej kinyolitiskej iluikak. c Pero axkan tikajsikamatij, yejuan akinmej kinyolitiskej itech xochitlali. ¿Tleka ijkon tikijtouaj? Itech Job 17:16 kijtoua tlalpinoli noijki kijtosneki mikakoyoktli. Non kiteititia tlen kijtoua Daniel 12:2, panos ijkuak itlamian tonalmej uan Armagedón matlamikan.
7. (1) ¿Tlen kijtosneki kipiaskej “yolilistli tlen amo keman tlamis” akinmej kinyolitiskej? (2) ¿Tleka akinmej kinyolitiskej amo yetos ken akinmej okinyolitijkej yiuejkika?
7 Daniel 12:2 kijtoua sekimej kipiaskej “yolilistli tlen amo keman tlamis”. ¿Non tlen kijtosneki? Akinmej kinyolitiskej, kixmatiskej Jehová uan Jesús pero ok monekis ijkon kichijtoskej. Tla kinekij nochipa yoltoskej, moneki kintlakamatiskej ijkuak Jesús tlanauatis mil xiuitl (Juan 17:3). Akinmej kinyolitiskej amo yetos ken akinmej okinyolitijkej yiuejkika (Heb. 11:35). ¿Tleka? Porque akinmej okinyolitijkej yiuejkika oksepa oixpolikej.
8. ¿Tlen kinpanos sekimej tlen kinyolitiskej?
8 Amo nochtin akinmej kinyolitiskej kinekiskej kixmatiskej Jehová. Profecía tlen ijkuilitok itech amochtli Daniel kiteititia sekimej “kintlajtlakoltiskej uan oksekimej ayakmo kinseliskej”. Akinmej amo kinekiskej kitlakamatiskej Jehová, intoka amo yetos itech iamoch, ik non, amo kiseliskej yolilistli tlen amo keman tlamis uan kinmixpoloskej. Daniel 12:2 kijtoua tlen kinpanos akinmej kinyolitiskej, ok motas tlen kichiuaskej d (Apoc. 20:12). Sekimej nochipa yoltoskej uan oksekimej amo.
“MIAKEJ KINUALIKASKEJ ITECH MELAJKAYOTL”
9, 10. Ijkon ken kijtoua Daniel 12:3, ¿tlen panos ijkuak tlamis ueyi tlajyouilistli? (2) ¿Akinmej “petlaniskej ken petlani nochi iluikak”?
9 (Xiktlajtolti Daniel 12:3). ¿Tlen panos satepan ijkuak “sapanoua tlajyouiskej”? Itech Daniel 12:2 kijtoua seki tlamantli tlen panos pero versículo 3 kijtoua tlen panos ijkuak tlamis ueyi tlajyouilistli.
10 ¿Akinmej “petlaniskej ken petlani nochi iluikak”? Techpaleuia tlen okijto Jesús itech Mateo 13:43. Ye okijto: “Ijkuakó non yolchipawake tsotlaniskeh [noso petlaniskej] kemi n tonati ompa kan tlanawatia Totajtsi”. Jesús ijkon okijto kichiuaskej akinmej “iaxkawah Dios”, yejuan akinmej iuan tlanauatiskej (Mat. 13:38). Daniel 12:3 kijtoua tlen kichiuaskej tlapejpenalmej ijkuak tlanauatiskej mil xiuitl.
Itech mil xiuitl Jesús uan 144,000 san sekan kinmachtiskej oksekimej. (Xikita párrafo 11).
11, 12. ¿Tlen kichiuaskej itech mil xiuitl 144,000?
11 Tlapejpenalmej “miakej kinualikaskej itech melajkayotl”. ¿Ken kichiuaskej? Ijkuak 144,000 yetoskej teopixkej uan tlanauatiskej iuan Jesús mil xiuitl, miakej kinmachtiskej (Apoc. 1:6; 5:10; 20:6). Ijkon yejuan “kimpajtiskeh n tlaltikpaktlakah” uan yolik ayakmo kichiuaskej tlen amo kuali (Apoc. 22:1, 2; Ezeq. 47:12). ¡Sapanoua yolpakiskej tlapejpenalmej ijkuak ijkon kichiuaskej!
12 “Miakej kinualikaskej itech melajkayotl”. ¿Akinmej ompa pouiskej? Akinmej kinyolitiskej uan momakixtiskej ijkuak tlamis Armagedón uan konemej tlen nesiskej itech xochitlali. Ijkuak tlamis mil xiuitl akinmej chantiskej nikan tlaltikpak ayakmo yetoskej tlajtlakolejkej, Pero, ¿keman ijkuilitos intoka itech iamoch toTajtsin Dios?
SAIKTLAMI KINYEJYEKOSKEJ
13, 14. ¿Tlen kiteititiskej akinmej ayakmo yetoskej tlajtlakolejkej uan chantiskej nikan tlaltikpak para kiseliskej yolilistli tlen amo keman tlamis?
13 Akin ayakmo yetos tlajtlakole amo kijtosneki ayamo moneki itlaj kichiuas para yoltos nochipa. Maski Adán uan Eva amo okatkaj tlajtlakolejkej, omonekiaya kitlakamatiskej Jehová para ijkon uelis nochipa yoltoskiaj. Pero yejuan amo otetlakamatkej (Rom. 5:12).
14 Yotikitakej ijkuak tlamis mil xiuitl akinmej chantiskej nikan tlaltikpak ayakmo yetoskej tlajtlakolejkej. ¿Nochipa kipaleuiskej iTekiuajkayo toTajtsin Dios? Noso, ¿kichiuaskej ken Adán uan Eva uan amo kitlakamatiskej toTajtsin Dios? ¿Tlen panos satepan?
15, 16. (1) ¿Keman nochtin monekis kiteititiskej kitlakamatij Jehová? (2) ¿Tlen kinpanos ijkuak saiktlami kinyejyekoskej?
15 Satanás kitsakuaskej mil xiuitl. Ijkon ayakmo uelis tlakajkayauas, ijkuak tlamis mil xiuitl kikajkauaskej para kinkajkayauas akinmej ayakmo yetoskej tlajtlakolejkej. Ijkuakon kiteititiskej kox kipatioitaj itoka toTajtsin Dios uan iTekiuajkayo (Apoc. 20:7-10). Tlen kichiuaskej kiteititis tla nochipa ijkuilitos intoka itech iamoch toTajtsin Dios.
16 Tejuan amo tikmatij kox miakej noso amo kichiuaskej ken Adán uan Eva uan amo kipaleuiskej iTekiuajkayo Jehová. ¿Tlen panos satepan? Apocalipsis 20:15 kijtoua: “Akin amo omachotitoka [noso oijkuilitoka] itech n amatlajkuíloli kan machotitokeh non nochipa yolitoskeh, okintlamotlakeh kan mextok tletl”. Kinmixpoloskej akinmej amo tetlakamatiskej pero miakej tlaxikoskej ijkuak kinyejyekoskej uan intoka nochipa ijkuilitos itech iamoch toTajtsin Dios.
“ITLAMIAN TONALMEJ”
17. ¿Tlen okiluijkej Daniel panos itlamian tonalmej? (Daniel 12:4, 8-10).
17 ¡Sapanoua tiyolpakij ijkuak timokuayejyekouaj tlen panos satepan! Pero se ángel noijki okilui Daniel tlen panoskia “itlamian tonalmej” (xiktlajtolti Daniel 12:4, 8-10; 2 Tim. 3:1-5). Ye okijto: “Momiaktilis tlamatilistli tlen melauak”. Itekipanojkauan toTajtsin Dios okachi kajsikamatiskiaj profecías tlen ijkuilitokej itech amochtli Daniel. Ángel okijto okseki tlamantli tlen panoskia “itlamian tonalmej”. Ye okijto “Akinmej amo yolkualmej kichiuaskej tlen sapanoua amo kuali. Akin amo yolkuali amitlaj kajsikamatis”.
18. ¿Tlen kinpanos akinmej kichiuaj tlen amo kuali?
18 Axkan akinmej kichiuaj tlen amo kuali mota amitlaj kinpanoua (Mal. 3:14, 15). Pero Jesús nochtin kinmixkomakas uan kinxelos akinmej yetoskia ken tentsomej uan amo yetoskej iuan akinmej yetoskia ken ichkamej (Mat. 25:31-33). Akinmej kichiuaj tlen amo kuali, amo momakixtiskej itech ueyi tlajyouilistli uan amo kinyolitiskej para yetoskej nikan tlaltikpak. Intoka amo ijkuilitos itech iamoch toTajtsin Dios tlen kijtoua Malaquías 3:16.
19. ¿Tlen moneki tikchiuaskej uan tleka? (Malaquías 3:16-18).
19 Axkan moneki tikteititiskej amo tikinpaleuiaj akinmej kichiuaj tlen amo kuali (xiktlajtolti Malaquías 3:16-18). Jehová kinnechikojtok nochtin akinmej ‘kinpatioita’. ¡Tinochtin tiknekij inmiuan tipouiskej!
¡Sapanoua tiyolpakiskej tikinmitaskej, Daniel, tofamiliares tlen oixpolikej uan oksekimej! Ijkuak kinyolitiskej kiseliskej itech xochitlali tlen Jehová okinmilui. (Xikita párrafo 20).
20. ¿Tlen okiluijkej Daniel uan tleka tikneki mamochiua?
20 Axkan sapanoua tiyolpakij porque tikitaj ken mochijtokej seki profecías uan ayakmo miak poliui okachi tiyolpakiskej porque tikitaskej ken kipojpoloskej nochi tlen amo kuali. Noijki satepan tikitaskej ken mochiuas tlen Jehová okilui Daniel: “Timeuas uan tikselis tlen moaxka ijkuak tlamiskej tonalmej” (Dan. 12:13). ¿Tiknekiskia tikitas ken kinyolitiskej Daniel uan mofamiliares tlen oixpolikej? Tla ijkon, ximochijchikaua para nochipa tiktlakamatis Jehová uan motoka nochipa ijkuilitos itech iamoch.
TLAKUIKALI 80 “Xikita Jehová yolkuali”
a Itech nin tlamachtil okachi kuali tikajsikamatiskej ken kijtoua Daniel 12: 2, 3 para uelis kinmachtiskej akinmej kinyolitiskej. Tikitaskej keman ijkon mochiuas uan akinmej tlamachtiskej. Noijki tikitaskej akinmej kinmachtiskej kinpaleuis ijkuak kinyejyekoskej, keman Cristo tlamis tlanauatis mil xiuitl.
b Xamo achto kinyolitiskej akinmej nochipa okitekichiuilijkej Jehová itlamian tonalmej, satepan kinyolitiskej oksekimej uan inmixuiuan. Ijkuak ijkon panos, sejse familias kinseliskej akinmej okinmixmatiayaj. Biblia tlamachtia akinmej kinyolitiskej iluikak, kinyolitiskej ijkon ken Jehová kineki. Xamo noijki ijkon panos nikan tlaltikpak, achto kinyolitiskej akinmej okitekichiuilijkej Jehová itlamian tonalmej uan satepan nochtin akinmej kinmilnamikij (1 Cor. 14:33; 15:23).
c Axkan okse tlamantli tikajsikamatij, tlen kijtoua amochtli Prestemos atención a las profecías de Daniel capítulo 17 uan revista Akin Tetlapouijtok 1 de julio de 1987, páginas 21 hasta 25.
d Tlajtoli “akimeh otlájtlakolchijkeh” uan “akimeh amó” otlajtlakolchijkej tlen ijkuilitok itech Hechos 24:15 uan tlajtoli “akimeh okichijkeh” tlen kuali uan “akimeh okichijkeh tlan amokuali” tlen ijkuilitok itech Juan 5:29 kiteititia, tlen okichijkej akinmej kinyolitiskej ijkuak oyoltokaj.
