OSHITOPOLWA SHOKUKONAKONWA 40
‘Taya nongeke aantu oyendji okuninga shoka shu uka’
‘Mboka taya nongeke aantu oyendji okuninga shoka shu uka, otaa ka adhima ya fa oonyothi aluhe sigo aluhe.’ — DAN. 12:3.
EIMBILO 151 Oonakusa otaya ka yumuka
ELALAKANO LYOSHITOPOLWA a
1. Iiningwanima yini tayi nyanyudha twa tegelela yi ka ningwe pethimbo lyElelo lyOomvula Eyuvi?
ITALI ka kala tuu esiku ewanawa kaaku na we sho eyumuko tali ka tamekwa okuningwa kombanda yevi pethimbo lyElelo lyaKristus lyOomvula Eyuvi! Ayehe mboka ya silwa aantu yaandjawo, oya halelela oku ke ya mona natango. Jehova naye osho e uvite ngaaka. (Job 14:15) Dhiladhila owala nkene kehe gumwe ta ka kala a nyanyukwa sho ta ka mona aaholike ye ya yumudhwa. Ngaashi twe shi ilongo moshitopolwa sha tetekele, aantu ‘aawanawa,’ mboka omadhina gawo ga nyolelwa membo lyaanamwenyo, “otaa ka yumudhwa e taa kala ye na omwenyo.” (Iil. 24:15; Joh. 5:29) Otashi vulika mokati kaantu mboka taya ka yumudhwa nziya konima yaArmagedon, tamu ka kala mwa kwatelwa aantu oyendji mboka tu hole. b Shimwe ishewe, aantu ‘aawinayi,’ ngaashi mboka inaaya mona ompito ya gwana yokutseya Jehova nenge oku mu longela nuudhiginini manga inaaya sa, “otaa ka yumudhwa e taa ka pangulwa.”
2-3. (a) Ngaashi sha popiwa muJesaja 11:9, 10, opolohalama yini onene tayi ka ningwa ndjoka inaayi ningwa nando onale mondjokonona yaantu? (b) Oshike tatu ka kundathana moshitopolwa shika?
2 Aantu ayehe mboka taya ka yumudhwa otaya ka kala ya pumbwa okulongwa. (Jes. 26:9; 61:11) Onkee opolohalama onene yelongo ndjoka inaayi ningwa nando onale mondjokonona, otayi ka pumbwa okuya miilonga. (Lesha Jesaja 11:9, 10.) Omolwashike mbela? Etompelo limwe olyo kutya aantu aawinayi mboka taya ka yumudhwa otaya ka pumbwa okulongwa kombinga yaJesus Kristus, yUukwaniilwa, yekuliloyambo nosho wo tuu kombinga yompata ndjoka ya kwatela mo edhina lyaJehova nosho wo uuthemba we wokupangela. Kakele kaashono, aantu aawanawa mboka taya ka yumudhwa nayo otaya ka pumbwa okupewa uuyelele wu li pethimbo waashoka Jehova a kala nokulonga oshigwana she kombinga yelalakano lye li na ko nasha nevi. Aapiya yamwe mboka aadhiginini oomboka ya adhika ya sa nalenale nokuli manga oohapu dhaJehova, Ombiimbeli, inaadhi pwa okunyolwa. Onkee aantu aawinayi nosho wo mboka aawanawa otaya ka kala ye na oshindji okwiilonga.
3 Moshitopolwa shika, otatu ka kundathana omapulo taga landula: Opolohalama onene yokulonga aantu otayi ka enda ngiini? Oshike tashi ka ningilwa aantu mboka taya ka taamba ko opolohalama ndjoka? Oshike tashi ke ya ningilwa ngele inaye yi taamba ko? Omayamukulo gomapulo ngoka oga simana kutse kunena. Ngaashi tatu ke shi mona, omahunganeko gamwe omahokithi ge li membo lyaDaniel nosho wo lyEhololo otage ke tu kwathela tu uve ko nawa kutya oshike tashi ka ningwa po ngele oonakusa ya yumudhwa. Tango, natu taleni kiiningwanima tayi nyanyudha ya hunganekwa yi li muDaniel 12:1, 2.
“OYENDJI YOMWAAMBOKA YA SA NALE . . . OTAA KA YUMUKA”
4-5. Daniel 12:1 otayi popi shike kombinga yethimbo lyehulilo?
4 Lesha Daniel 12:1. Embo lyaDaniel otali holola kutya iiningwanima mbyoka tayi nyanyudha otayi ka ningwa ngiini melandulathano pethimbo lyehulilo. Pashiholelwa, Daniel 12:1 otayi popi kombinga yaMikael, ngoka oye Jesus Kristus, “ha popile oshigwana [shaKalunga].” Oshitopolwa shoka shehunganeko ndyoka osha tameke okugwanithwa momumvo 1914 sho Jesus a li a langekwa po e li Omukwaniilwa gwUukwaniilwa waKalunga womegulu.
5 Ihe, Daniel okwa li wo a lombwelwa kutya Jesus ota ka ‘popila’ oshigwana shaKalunga pethimbo ‘edhigu, lyomalwa omanene inaaga kala ko nale kombanda yevi, hela aantu ya shitilwe.’ Ethimbo ndyoka ‘edhigu lyomalwa omanene’ otali ka kala “uudhigu uunene” mboka wa popiwa muMateus 24:21. Jesus ota ka thikama nenge tu tye ota ka katuka onkatu a popile oshigwana shaKalunga pehulilo lyethimbo ndyoka edhigu, ano puArmagedon. Embo lyEhololo otali popi kutya aantu mboka ‘ongundu onene yaamboka ya piti momahepeko ngoka omanene.’ — Eh. 7:9, 14.
6. Oshike tashi ka ningwa po konima ngele ongundu onene ya hupu puudhigu uunene? Shi yelitha. (Tala wo oshitopolwa “Omapulo ga za kaaleshi” tashi popi kombinga yeyumuko lyaamboka taya ka kala kombanda yevi.)
6 Lesha Daniel 12:2. Oshike tashi ka ningwa po konima ngele ongundu onene ya hupu puudhigu uunene? Ehunganeko ndika itali popi kombinga yeyumuko lyopathaneko, ndyoka lya li tali ka ningwa pethimbo lyomasiku gahugunina, ngaashi twa li tu shi uvite ko nale. c Pehala lyaashono, oohapu ndhika otadhi popi kombinga yeyumuko lyaasi ndyoka tali ka ningwa muuyuni uupe. Omolwashike tatu tile ngawo? Oshitya ‘ontsi’ shoka sha longithwa muJob 17:16, (OB-1954) osha faathana noshitya ‘ombila.’ Shoka otashi ulike kutya oohapu ndhoka dhi li muDaniel 12:2 otadhi popi kombinga yeyumuko lyo lyenelyene ndyoka tali ka ningwa ngele omasiku gahugunina ga hulu nokonima yiita yaArmagedon.
7. (a) Omeityo lini aantu yamwe taya ka yumudhilwa ngiini “omwenyo gwaaluhe”? (b) Omolwashike ‘eyumuko ndyoka ewanawa’?
7 Daniel 12:2 oya hala okutya ngiini sho tayi ti kutya aantu yalwe otaya ka yumudhilwa “omwenyo gwaaluhe”? Shoka osha hala okutya, aantu mboka taya ka yumudhwa e taya tseya, nenge e taya tsikile okwiilonga, nokuvulika kuJehova naJesus pethimbo lyomimvo 1 000, otaya ka pewa omwenyo gwaaluhe. (Joh. 17:3) Eyumuko ndyoka otali ka kala “eyumuko ewanawa” li vule ndyoka lya li lya ningilwa aantu yamwe pethimbo lyonalenale. (Heb. 11:35, OB-1954) Omolwashike mbela? Omolwaashoka aantu mboka ya li inaaya gwanenena oya ka sa ishewe.
8. Ongiini aantu yalwe taya ka yumudhwa ya ka ‘ehamekwe nekano lyaaluhe’?
8 Haantu ayehe mboka taya ka yumudhwa taya ka kala ya hala okulongwa kuJehova. Ehunganeko lyaDaniel otali popi kutya yamwe otaya ka yumudhwa ya ‘ehamekwe kekano lyaaluhe.’ Molwaashoka otaya ka ulika ombepo yuunashipotha, omadhina gawo itaga ka nyolwa membo lyomwenyo noitaya ka mona omwenyo gwaaluhe. Pehala lyaashono, otaya ka tokolelwa “ekano lyaaluhe,” nenge tu tye otaya ka hanagulwa po. Onkee oohapu ndhoka dhi li muDaniel 12:2 otadhi popi shoka tashi ka ningilwa hugunina aantu mboka taya ka yumudhwa shi ikolelela kiilonga mbyoka ya longo konima sho ya yumudhwa. d (Eh. 20:12) Yamwe otaya ka mona omwenyo gwaaluhe; yalwe itaye ke gu mona.
‘TAYA NONGEKE AANTU OYENDJI OKUNINGA SHOKA SHU UKA’
9-10. Oshike ishewe tashi ka ningwa po konima yuudhigu uunene, nolye taa “ka adhima ya fa uuyelele wokegulu”?
9 Lesha Daniel 12:3. Oshike ishewe tashi ka ningwa po konima ngele ‘ethimbo edhigu lyomalwa omanene’ lye ya? Kakele kuDaniel 12:2, ovelise 3 otayi popi kombinga yoshinima shimwe tashi ka ningwa konima yuudhigu uunene.
10 Oolye taa “ka adhima ya fa uuyelele wokegulu”? Eyamukulo otatu li adha moohapu dhaJesus ndhoka dhi li muMateus 13:43 tadhi ti: “Aayuuki otaa ka adhima ngetango omOshilongo shaHe.” Moohapu ndhoka, Jesus okwa li ta popi “aana yOshilongo,” ano aamwahe aagwayekwa, mboka taya ka lela pamwe naye mUukwaniilwa womegulu. (Mat. 13:38) Onkee Daniel 12:3 oku na okukala ta popi kombinga yaagwayekwa mboka, niilonga mbyoka taya ka longa pethimbo lyElelo lyOomvula Eyuvi.
Aagwayekwa 144 000 otaya ka longela kumwe thiluthilu naJesus Kristus mokuwilika iilonga yokulonga aantu mbyoka tayi ka longwa pethimbo lyomimvo 1 000 (Tala okatendo 11)
11-12. Iilonga yini tayi ka longwa kaagwayekwa 144 000 momukokomoko gwomimvo 1 000?
11 Aagwayekwa otaya ka nongeka ngiini “aantu oyendji okuninga shoka shu uka”? Aagwayekwa otaya ka longela kumwe thiluthilu naJesus Kristus mokukwatela komeho opolohalama yelongo, ndjoka tayi ka ningwa kombanda yevi pethimbo lyomimvo 1 000. Aagwayekwa 144 000 itaya ka lela owala ye li aakwaniilwa, ihe otaya ka longa wo ye li aayambi. (Eh. 1:6; 5:10; 20:6) Onkee, otaya ka kwathela ‘mokwaaludha aantu,’ sha hala okutya okweendela ko taye ya thikitha megwaneneno. (Eh. 22:1, 2; Hes. 47:12) Aagwayekwa itaya ka kala tuu ya nyanyukwa pethimbo ndyoka!
12 Oolye taya ka kala ‘yomaantu oyendji’ mboka taya ka longwa shoka shu uka? Maantu mboka otamu ka kala mwa kwatelwa aantu mboka ya yumudhwa nosho wo mboka taya ka hupa puArmagedon, nuunona mboka tashi vulika wu ka valwe muuyuni uupe. Pehulilo lyomimvo 1 000, aantu ayehe kombanda yevi otaya ka kala ya gwanenena. Onkee opethimbo lini nduno omadhina gawo taga ka kala ga nyolwa membo lyaanamwenyo nopena yohinga, ano kutya taga ka kala mo sigo aluhe, ihe hanopena yekala pathaneko?
EMAKELO LYAHUGUNINA
13-14. Aantu ayehe mboka taya ka kala kombanda yevi ya gwanenena otaya ka pumbwa okuninga shike manga inaaya pewa omwenyo gwaaluhe?
13 Otu na okudhimbulukwa kutya omuntu ngele okwa gwanenena itashi ti kutya ota ka mona nale omwenyo gwaaluhe. Dhiladhila kombinga yaAdam naEva. Oya li ya gwanenena, ihe oya li ya pumbwa okuvulika kuJehova Kalunga, opo ya ka pewe omwenyo gwaaluhe. Shi yemateka, oya ndopa okuvulika kuye.—Rom. 5:12.
14 Onkalo otayi ka kala ya tya ngiini kombanda yevi pehulilo lyomimvo 1 000? Aantu ayehe otaya ka kala ya gwanenena. Ihe mbela aantu mboka otaya ka yambidhidha ngaa uunamapangelo waJehova sigo aluhe? Nenge yamwe otaya ka kala ya fa Adam naEva, mboka nonando oya li ya gwanenena inaaya ka kala we aadhiginini? Omapulo ngoka oga pumbwa omayamukulo, ihe omayamukulo ngoka otatu ga mono ngiini?
15-16. (a) Uunake aantu ayehe taya ka mona ompito ya ulike uudhiginini wawo kuJehova? (b) Emakelo lyahugunina otali ka eta iizemo yini?
15 Satana ota ka kala a edhililwa uule womimvo 1 000. Pethimbo ndyoka, ita ka vula okupukitha aantu. Ihe pehulilo lyomimvo ndhoka 1 000, Satana ota ka mangululwa mo mondholongo. Opo nduno ota ka kambadhala okupukitha aantu ya gwanenena. Pethimbo lyemakelo ndyoka, aantu ayehe ya gwanenena otaya ka mona ompito yokuulika sha yela ngele oya simaneka edhina lyaKalunga notaya yambidhidha uunamapangelo we. (Eh. 20:7-10) Shoka taya ka ninga pauhandimwe sho taya makelwa kuSatana, osho tashi ka utha ngele omadhina gawo otaga ka nyolwa membo lyaanamwenyo ga kale mo sigo aluhe.
16 Omwaalu gwontumba gwaantu inaagu popiwa kutya ogu thike peni, otagu ka ninga ngaashi Adam naEva, ano kutya otagu ka tinda uunamapangelo waJehova. Aantu mboka otaya ka ningilwa shike? Ehololo 20:15 otali ti: “Kehe ngoka edhina lye inaali nyolelwa membo lyaanamwenyo, oku umbilwa mefuta lyomulilo.” Onkee ano, aantu mboka aanashipotha otaya ka hanagulwa po sigo aluhe. Ihe aantu oyendji ya gwanenena aadhiginini, otaya ka pita memakelo ndika lya hugunina. Opo nduno omadhina gawo otaga ka nyolwa membo lyaanamwenyo moka taga ka kala sigo aluhe.
PETHIMBO ‘LYEHULILO LYUUYUNI’
17. Daniel okwa li a lombwelwa shike komuyengeli shoka sha li tashi ka ningwa pethimbo lyetu? (Daniel 12:4, 8-10)
17 Itashi nyanyudha tuu okudhiladhila kiiningwanima mbyoka tayi ka ningwa monakuyiwa! Nonando ongawo, Daniel okwa li wo a pewa uuyelele wa simana komuyengeli gumwe wu na ko nasha nethimbo ndika tu li ‘lyehulilo lyuuyuni.’ (Lesha Daniel 12:4, 8-10; 2 Tim. 3:1-5) Omuyengeli ngoka okwe mu lombwele a ti: ‘Ontseyo otayi ka indjipala.’ Odhoshili kutya oohapu ndhoka dhopahunganeko ndhoka dhi li membo lye odha li tadhi ka uviwa ko nawa koshigwana shaKalunga. Omuyengeli ngoka okwa gwedha ko wo kutya pethimbo ndika ‘aakolokoshi [kaya li] taa ka pukuluka nando, yu uve ko, ihe [oya li] taa ka tsikila iikolokosha yawo.’
18. Aakolokoshi otaya ka ningilwa shike masiku?
18 Kunena otashi vulika shi kale sha fa shi iwetikile kutya aakolokoshi itaya ningwa sha sho taya yono. (Mal. 3:14, 15) Ihe masiku Jesus ota ka pangula mboka ya fa iikombo e te ya yoolola mo maantu mboka ya fa oonzi. (Mat. 25:31-33) Aakolokoshi mboka itaya ka hupa puudhigu uunene, shimwe ishewe itaya ka yumudhwa ya ka kale muuyuni uupe. Omadhina gawo ita ga ka nyolwa ‘membo lyokudhimbulukwa’ ndyoka lya popiwa muMaleaki 3:16, yelekanitha NW.
19. Ngashingeyi ethimbo lyetu lyokuninga shike, nomolwashike? (Maleaki 3:16-18)
19 Ngashingeyi olyo ethimbo lyoku shi ulika meihumbato lyetu kutya katu li yamwe yomwaamboka aakolokoshi. (Lesha Maleaki 3:16-18.) Jehova ota gongele aantu mboka e ya tala ko kutya ‘oye mwene,’ nenge tu tye mboka ye na ondilo momeho ge. Onkee otwa hala okukala mokati kaantu mboka.
Itatu ka kala tuu twa nyanyukwa okumona Daniel, aantu yaandjetu nosho wo yalwe oyendji ya ‘yumudhwa’ ya taambe oshipewa shawo muuyuni uupe? (Tala okatendo 20)
20. Euvaneko lini lyahugunina lya li lya uvanekelwa Daniel, nomolwashike twa halelela oku ka mona tali gwanithwa?
20 Ngashingeyi otu li pethimbo tali nyanyudha shili noonkondo. Ihe opu na iinima iiwanawa yi li pokuningwa. Masiku otatu ka mona aakolokoshi ayehe taya hanagulwa po. Konima yaashoka, otatu ka mona euvaneko ndyoka Jehova a li a uvanekele Daniel tali gwanithwa po. Otali ti: “Oto ka yumukila okutaamba oshipewa shoye pehulilo lyomasiku.” (Dan. 12:13) Mbela ino halelela oku ka mona Daniel nosho wo aantu yaandjeni mboka ya sa sho taya ka ‘yumudhwa’? Ngele osho, ninga ngaashi to vulu ngashingeyi wu kale omudhiginini, noto vulu okukala wu na uushili kutya edhina lyoye omo tali kala lya nyolwa membo lyaJehova lyaanamwenyo.
EIMBILO 80 ‘Konakona wu mone nkene Jehova omwaanawa’
a Oshitopolwa shika oshi na uuyelele uupe meuvoko lyetu li na ko nasha nopolohalama onene yokulonga aantu ndjoka inaayi ningwa nando onale muuyuni awuhe ya popiwa muDaniel 12:2, 3. Otatu ka konakona kutya otayi ka ningwa uunake, noolye taya ka kutha ombinga mopolohalama ndjoka. Otatu ka tala wo kutya opolohalama ndjoka yelongo otayi ka longekidhila ngiini aantu mboka taya ka kala kombanda yevi emakelo lya hugunina pehulilo lyElelo lyaKristus lyOomvula Eyuvi.
b Otashi vulika eyumuko ndyoka tali ka ningwa li tameke naamboka ya si aadhiginini pethimbo lyomasiku gahugunina, opo nduno taku landula mboka ya sile tango kuyo taya ka yumudhwa epipi nepipi. Ngele shoka osho tashi ka ningwa, epipi kehe otali ka kala li na ompito yokuhambelela mboka ya li ye shi nawa. Kutya nduno oshike tashi ka ningwa, Ombiimbeli otayi ti kutya mboka taya ka yumuka e taya yi megulu, kehe gumwe ota ka yumudhwa ‘palufo lwe.’ Onkee otatu vulu okutya eyumuko ndyoka tali ka ningilwa kombanda yevi, otali ka ningwa melandulathano. — 1 Kor. 14:33; 15:23.
c Eyelitho ndika elunduluko epe meuvoko ekulu ndyoka li li membo Pay Attention to Daniel’s Prophecy! ontopolwa 17, nosho wo mOshungolangelo yOshiingilisa 1 Juli 1987, ep. 21-25.
d Mepingathano naashoka, oshitya ‘aawanawa’ nosho wo ‘aawinayi’ shoka shi li mIilonga 24:15 noohapu “mboka ya longo uuwanawa” nosho wo “naamboka ya longo uuwinayi” dhi li muJohannes 5:29 otadhi popi kombinga yeihumbato lyaamboka taya ka yumudhwa ya li ye na manga inaaya sa.
