NKHANI YOPHUNZILA N.° 40
‘Kuyavya ŵanthu anyinji kuti ankhale olungama’
“Ŵala oyavya ŵanthu anyinji kunkhala olungama, [azaŵale] monga ni nyenyezi mpaka kale-kale, eye mpaka kale-kale.”—DAN. 12:3.
NYIMBO N.° 140 Tizafwane moyo—wosasila!
VATIKUTI TIPHUNZILE *
1. Kansi ni vinthu votyani vokondwelesha vatuyembekezela mu Ulamulilo wa Khilisitu wa vyaka 1.000?
VIZANKHALE vokondwelesha ngako ŵanthu akazayamba kuushiwa pano pachalo mu Ulamulilo wa Khilisitu wa vyaka 1.000! Ŵanthu onse amene okondewa ŵawo emwalila, ofunishisha kuzaŵawonasoti. Umu niyesoti mwakumvwila Yehova. (Yobu 14:15) Ganizilani mwati vizankhalile vokondwelesha kuwona ŵanthu pachalo chonse owonanasoti na okondewa ŵawo amene emwalila. Monga mwetiwonela mu nkhani yapita, “olungama” amene mazina ŵawo elembewa m’buku ya moyo “azauke kuti alondele moyo.” (Mac. 24:15; Yoh. 5:29) Vingachitike kuti anyinji mwa okondewa ŵasu amene aŵa azankhale mu gulu ya ŵanthu oyambilila kuushiwa kuti ankhale na moyo pano pachalo Aramagedo ikazasila. * Kuyangijila pamene apo, “osalungama,” monga ŵanthu amene enzeve mwayi woziŵa Yehova nomutumikila mokhulupilika pa nthawe yenze akali moyo, “azauke kuti aweluziwe.”
2-3. (a) Mokatijana na Yesaya 11:9, 10, kansi ni ntchito ikulu yotyani yophunzisa yati izachitike? (b) Kansi tikambilane chinji mu nkhani ino?
2 Ŵanthu onse ati azaushiwe azafunike kuphunzisiwa. (Yes. 26:9; 61:11) Tetyo, pazankhale ntchito ikulu ngako yophunzisa ŵanthu yamene ikaliyechitikapo kufumila kale. (Ŵelengani Yesaya 11:9, 10.) Ndaŵa yanji? Mwanjila iyakine, osalungama amene akuti azaushiwe azafunike kuphunzisiwa vokhuza Yesu Khilisitu, Ufumu wa Mulungu, dipo, kufunika kwa zina ya Yehova, komasoti chifukwa chake yove yeka niye woyenelela kulamulila. Olosoti olungama azafunike kuziŵa vawankhala ophunzisa ŵanthu ŵake Yehova vokhuza cholinga chake pano pachalo. Ndipo anyinji mwa okhulupilika amene aŵa echifwa Baibolo ikaliyesilijiwa kulembewa. Tetyo, pali vinyinji vangazafunikila kuphunzila olungama na osalungama kumo.
3 Mu nkhani ino, tikambilane makonsho aŵa: Kansi ntchito ikulu yophunzisa yamene iyi izachitike tyani? Lomba izakhuze tyani nkhani yakuti mazina ŵawo apitilije kunkhala m’buku ya moyo olo afivyiwemo? Mayankho a makonsho amene aŵa ni ofunika ngako kuli sewo masiku ŵano. Monga mwatikuti tiwonele, maulosi ayakine ochitisha chidwi amene ali m’buku ya Danieli na Chivumbulutso, atiyavye kumvwisha vikuti vizachitike ŵanthu akazaushiwa. Choyamba, tiyeni tiwone vinthu vokondwelesha vamene vinenelewatu mu ulosi wa pa Danieli 12:1, 2.
“ŴALA EYONA MULITO. . . AZAUKE”
4-5. Kansi lemba ya Danieli 12:1 yufotokoza vinthu votyani vokhuza nthawe ya mapeto?
4 Ŵelengani Danieli 12:1. Buku ya Danieli yutiuja vinthu vokondwelesha vati vizachitike mu nthawe ya mapeto. Mwachisanzo, pa Danieli 12:1 otiuja kuti Mikayeli, wamene ni Yesu Khilisitu, “wapanama kuti ayavye ŵanthu a [Mulungu].” Mbali yamene iyi ya ulosi iyamba kukwanilishiwa mu 1914 Yesu pechiikiwa kunkhala Mfumu ya Ufumu wakululu.
5 Olo n’tetyo, Danieli eujiwasoti kuti Yesu “azapaname” pa “nthawe ya masauso yamene ikaliyechitikapo kufumila pewinkhalapo ntundu woyambilila wa ŵanthu kufwika pa nthawe yamene iyo.” Pamene apa, “nthawe ya masauso” yamene iyi ni “chisauso chikulu” chutomolewa pa Mateyu 24:21. Yesu azapaname, kapena kuti azachitepo kanthu kuti ateteze ŵanthu a Mulungu kumapeto kwa nthawe ya masauso yamene iyi, yamene ni pa Aramagedo. Buku ya Chivumbulutso yunena za ŵanthu akuti azatetezewe kuti ni ‘gulu ikulu yamene ikuti izafume m’chisauso chikulu.’—Chiv. 7:9, 14.
6. Kansi n’chinji chikuti chizachitike a gulu ikulu akazapulumuka pa chisauso chikulu? Fotokozani. (Onanisoti nkhani yakuti “Makonsho ofumila kuli oŵelenga” m’magazini ino, kuti muziŵe vinyinji pa nkhani yokhuza kuushiwa kwa ŵanthu akuti azankhale pano pachalo.)
6 Ŵelengani Danieli 12:2. Kansi chikuti chizachitike n’chinji gulu ikulu ikazapulumuka pa nthawe yamene iyi ya masauso? Ulosi wamene uyu unenalini za kuushiwa kophiphilisa, kwamene ni kuushiwa kwauzimu kwa atumiki a Mulungu kuchitika masiku ŵano osilijila monga mwetenzekhulupilila masiku akuvuli. * Mmalomwake, mawu amene aŵa onena za kuushiwa kwa ŵanthu kwati kuzachitike m’chalo chanyowani. Ndaŵa yanji tunena tetyo? Mawu akuti “mu lito” kapena kuti mu lukungu, amene akatishiliwasoti ntchito pa Yobu 17:16 ni olingana na mawu akuti “manda.” Tetyo, lemba ya Danieli 12:2 yunena za kuushiwa ku manda kwati kuzachitike akazasila masiku osilijila komasoti pavuli pa nkhondo ya Aramagedo.
7. (a) Kansi kuushiwa kwa ŵanthu ayakine akuti azalondele “moyo wosasila” kutanthauza chinji? (b) Ndaŵa yanji tinganene kuti kwamene uku ni “kuuka kuweme ngako”?
7 Kansi lemba ya Danieli 12:2 yutanthauza chinji ikofotokoza kuti ayakine azaushiwe kuti alondele “moyo wosasila”? Yutanthauza kuti ŵanthu oushiwa akuti azaziŵe Yehova na Yesu noŵamvwila olo kupitilija kuŵaziŵa, azalondele moyo wosasila pa nthawe ya vyaka 1.000. (Yoh. 17:3) Kwamene uku kuzankhale “kuuka kuweme ngako” kupambana kuushiwa kwa ŵanthu kwechitika masiku akuvuli. (Ahe. 11:35) Ndaŵa yanji? Ndaŵa yakuti ŵanthu amene aŵa enzelini angwilo ndipo emwalilasoti.
8. Kansi vutanthauza chinji kuti ayakine azauke kuti alondele ‘chitonzo nozondewa mpaka kale-kale’?
8 Koma ni onselini oushiwa akuti azavomele kuphunzisiwa na Yehova. Ulosi wa Danieli winena kuti ayakine azauke kuti ‘alondele chitonzo ndipo azazondewe mpaka kale-kale.’ Chifukwa chakuti azawoneshe kusamvwila, mazina ŵawo azalembewelini m’buku ya moyo ndipo azapasiwelini moyo wosasila. Mmalomwake, ove “azazondewe mpaka kale-kale,” kapena kuti azawonongewe. Tetyo, lemba ya Danieli 12:2 yufotokoza vati vizachitikile onse oushiwa potolela vati akochita pavuli pa kuushiwa kwawo. * (Chiv. 20:12) Ayakine azalondele moyo wosasila, pamene ayakine azawonongewe.
‘KUYAVYA ŴANTHU ANYINJI KUTI ANKHALE OLUNGAMA’
9-10. Kansi n’chinji chiyakinesoti chikuti chizachitike pavuli pa chisauso chikulu, lomba ni ŵani akuti ‘azaŵale monga ni kungweleŵela kwa kululu’?
9 Ŵelengani Danieli 12:3. Kansi n’chinji chiyakinesoti chikuti chizachitike pavuli pa “nthawe ya masauso” yamene ikuza? Kuyangijila pa vayunena lemba ya Danieli 12:2, vesi 3 yufotokoza chinthu chiyakine chikuti chizachitike pavuli pa chisauso chikulu.
10 Kansi ni ŵani akuti “azaŵale monga ni kungweleŵela kwa kululu”? Mawu a Yesu apa Mateyu 13:43 otiyavya kufwana yankho ya konsho yamene iyi, amene onena kuti: “Pa nthawe yamene iyo, olungama azaŵale ngako monga ni zuŵa mu Ufumu wa Atata ŵawo.” Pamene apa Yesu enzenena za “ŵana a Ufumu, amene ni abale ŵake ozozewa akuti azalamulile naye pamozi mu Ufumu wakululu. (Mt. 13:38) Tetyo, vuwoneka kuti lemba ya Danieli 12:3 yunena za ozozewa komasoti ntchito yati azakate mu Ulamulilo wa vyaka 1.000.
A 144.000 azakate ntchito pamozi na Yesu Khilisitu posogolela ntchito yophunzisa ŵanthu ikuti izachitike m’vyaka 1.000 (Onani ndime 11)
11-12. Kansi ni ntchito yotyani yati azakate a 144.000 pa nthawe ya vyaka 1.000?
11 Kansi ozozewa azayavye tyani “ŵanthu anyinji kunkhala olungama”? Ove azakate ntchito pamozi na Yesu Khilisitu posogolela ntchito yophunzisa yamene ikuti izachitike pano pachalo pa nthawe ya vyaka 1.000. A 144.000 azankhalelini tyala mafumu, koma azatumikilesoti monga ansembe. (Chiv. 1:6; 5:10; 20:6) Ivi vutanthauza kuti azayavye ŵanthu patontho-patontho kuti ankhalesoti angwilo. (Chiv. 22:1, 2; Ezek. 47:12) Ozozewa azasangalale ngako na ntchito yamene iyi!
12 Kansi ni ayakinesoti otyani amene ali m’gulu ya “ŵanthu anyinji” akuti azayavyiwe kunkhala olungama? Ŵanthu amene aŵa opamikijapo ŵala akuti azaushiwe, akuti azapulumuke pa Aramagedo, komasoti ŵana onse amene angazavyalika m’chalo chanyowani. Pofwika kumapeto kwa vyaka 1.000, ŵanthu onse azankhale angwilo. Lomba kansi ni pa nthawe yotyani pamene mazina a ŵanthu azafivyiwelinisoti m’buku yamoyo, nonkhala monga alembewa na bopheni?
MAYESELO OSILIJILA
13-14. Kansi ŵanthu onse angwilo azafunike kuwonesha chinji akaliyelondela moyo wosasila?
13 Tufunika kukumbukila kuti kunkhala wangwilo kutanthauzalini kuti mphela munthu azalondele moyo wosasila. Ganizilani vichitikila Adamu na Hava. Ove enze angwilo, koma enzefunika kupitilija kumvwila Yehova Mulungu kuti alondele moyo wosasila. Koma n’vomvwisha chisoni kuti ove ekangiwa kumumvwila.—Aro. 5:12.
14 Kansi vinthu vizankhale tyani kuli ŵanthu pano pachalo pofwika kumapeto kwa vyaka 1.000? Onse azankhale angwilo. Kansi ove azankhale ku mbali ya Ulamulilo wa Yehova mpaka kale-kale? Kapena ayakine azankhale monga ni Adamu na Hava—amene aliyemvwile Mulungu olo kuti enze angwilo? Pazafunike kufwana mayankho a makonsho amene aŵa. Lomba kansi azapezeke tyani?
15-16. (a) Kansi ni pa nthawe yotyani pamene ŵanthu onse pakuti azapasiwe mwayi wowonesha kuti ni okhulupilika kwa Yehova? (b) Kansi vokonkhapo va mayeselo osilijila vizankhale votyani?
15 Satana azamangiwe kwa vyaka 1.000. Pa nthawe yamene iyo, yove azakwanishelini kuluŵilisha aliyense. Olo n’tetyo, vikazasila vyaka 1.000 Satana azamasuliwe ndipo azayeje kuluŵilisha ŵanthu angwilo. Pa nthawe ya mayeselo amene aŵa, ŵanthu onse angwilo azankhale na mwayi wowonesha kuti ali ku mbali yotyani pa nkhani ya zina ya Mulungu na Ulamulilo wake. (Chiv. 20:7-10) Vakuti azachite aliyense pa nthawe yamene iyo vizawoneshe keno ni woyenelela kuti zina yake ipitilije kunkhala m’buku ya moyo.
16 Ŵanthu ayakine, amene chiŵelengelo chawo chuziŵikalini, azankhale monga ni Adamu na Hava ndipo azakane Ulamulilo wa Yehova. Lomba kansi n’chinji chikuti chizaŵachitikile? Lemba ya Chivumbulutso 20:15 yutiuja kuti: “Aliyense wamene aliyepezeke kuti alilembewe m’buku ya moyo eponyewa m’nyanja ya mulilo.” Tetyo, ŵanthu amene aŵa osamvwila azawonongewe ndipo azankhalekolinisoti. Koma ŵanthu anyinji angwilo azapambane mayeselo amene aŵa osilijila. Vikazachitika tetyo, mazina ŵawo azafivyiwelinisoti m’buku ya moyo.
“NTHAWE YA MAPETO”
17. Kansi Danieli eujiwa kuti n’chinji chikuti chizachitike muli ino nthawe yasu? (Danieli 12:4, 8-10)
17 N’vokondwelesha ngako kuganizila vinthu vamene ivi vikuti vizachitike kusogolo! Olo n’tetyo, mngelo euja Danieli uthenga uyakine wofunika ngako wokhuza ino nthawe yasu, yamene ni “nthawe ya mapeto.” (Ŵelengani Danieli 12:4, 8-10; 2 Tim. 3:1-5) Mngelo wamene uyo euja Danieli kuti: “Ŵanthu azaziŵe vinthu vinyinji vachendi.” Ŵanthu a Mulungu eyamba kumvwisha bwino maulosi opezeka m’buku yake. Mngelo wamene uyo eyangijila kuti pa nthawe yamene iyo “ŵanthu aipa azachite vinthu viipa, ndipo paliye munthu aliyense muipa [wamene] akuti azamvwishe mawu amene aŵa.”
18. Kansi n’chinji chikuti chizachitikile ŵanthu aipa kwalombapano?
18 Masiku ŵano, vingawoneke monga ŵanthu amene ochita viipa azalangiwelini. (Mal. 3:14, 15) Koma kwalombapano, Yesu azaweluze ŵanthu aipa amene ali monga ni mbuzi noŵalekanisha na ŵanthu amene ali monga ni mbelele. (Mt. 25:31-33) Ŵanthu aipa amene aŵa azapulumukelini pa chisauso chikulu, ndipo azaushiwelini kuti ankhale m’chalo chanyowani. Mazina ŵawo azapezekemolini “m’buku ya chikumbutso” yutomolewa pa Malaki 3:16.
19. Kansi ino ni nthawe yakuti tikochita chinji, lomba ndaŵa yanji? (Malaki 3:16-18)
19 Ino ni nthawe yakuti tikowonesha kuti tililini m’gulu ya ŵanthu aipa. (Ŵelengani Malaki 3:16-18.) Yehova ounganisha ŵanthu ŵakuwona kuti ni “chuma chapadela,” kapena kuti ŵanthu ŵake a ntengo wapatali. N’vosakaikisha kuti tufuna kunkhala m’gulu ya ŵanthu amene aŵa.
Vizankhale vokondwelesha ngako kuwona Danieli, okondewa ŵasu, komasoti ŵanthu ayakine anyinji ‘ouka’ kuti alondele gawo yawo m’chalo chanyowani! (Onani ndime 20)
20. Kansi ni lonjezo yotyani yechipasiwa Danieli, lomba ndaŵa yanji muyembekezela mwachidwi kukwanilishiwa kwa lonjezo yamene iyi?
20 Kulaŵila chendi, palipano tunkhala mu nthawe yokondwelesha ngako. Koma vinthu viyakine vokondweleshasoti ngako vasala patontho kuchitika. Kwalombapano, tiwone vinthu vonse viipa vusilijiwa. Pavuli pa vamene ivi, tizawone kukwanilishiwa kwa vinthu vamene Yehova vechilonjeza Danieli kuti: “Uzauke kuti ulondele gawo yako pa mapeto a masiku amene awo.” (Dan. 12:13) Kansi muyembekezela mwachidwi nthawe yati ‘azaushiwe’ Danieli pamozi na okondewa ŵanu? Keno n’tetyo, palipano mukochita vonse vamungakwanishe kuti mupitilije kunkhala okhulupilika. Mukachita tetyo, munkhale osimikijila kuti zina yanu ipitilije kunkhala m’buku ya moyo ya Yehova.
NYIMBO N.° 89 Nkhalani omvwila kuti mulondele madaliso
^ Nkhani ino, ifotokoze kamvwikidwe kasu kanyowani kokhuza ntchito ikulu yophunzisa yufotokozewa pa Danieli 12:2, 3. Tiwone nthawe yati izakatiwe ntchito yamene iyi komasoti akuti azaikate. Tiwonesoti mwati izayavyile ŵanthu onkhala pano pachalo ntchito yamene iyi yophunzisa, kukonzekela mayeselo osilijila kumapeto kwa Ulamulilo wa Khilisitu wa vyaka 1.000.
^ Vingachitike kuti kuushiwa kwamene uku kuzayambe na ŵanthu amene omwalila ali okhulupilika m’masiku ŵano osilijila, nojokela kuvuli m’badwo na m’badwo. Keno umu niye mwati vizankhalile, niye kuti m’badwo uliwonse uzankhale na mwayi wolondela ŵanthu oushiwa ŵenzeziŵana nawo. Keno vinthu vizankhale tyani, Malemba ofotokoza kuti kuushiwa kwa ŵanthu akuti azalute kululu kuzachitike mwadongosolo, kapena kuti “aliyense pa malo ŵake.” Tetyo, tinganenesoti kuti kuushiwa kwa ŵanthu akuti azankhale pano pachalo kuzachitikesoti chimozi-mozi.—1 Akor. 14:33; 15:23.
^ Vamene ivi, vuchinja vetifotokoza m’buku yakuti Samalani Ulosi wa Danieli! mutu 17, komasoti mu Nsanja ya Olonda ya 1 July, 1987, pedji 21-25.
^ Mosiyana na vamene ivi, mawu akuti “olungama” na “osalungama” opezeka pa Machitidwe 24:15 komasoti akuti “amene enzechita viweme” na “amene enzechita viipa” opezeka pa Yohane 5:29 onena za vochita va ŵala akuti azaushiwe penze akaliyemwalila.
