SEHLOGO SE ITHUTWAGO 40
Go Tliša “ba Bantši go Lokeng”
“Bao ba tlišago ba bantši go lokeng bona ba tla taga bjalo ka dinaledi go iša mehleng ya neng le neng.”—DAN. 12:3.
KOPELO 151 Modimo o tla Bitša
SEO RE TLAGO GO ITHUTA SONA *
1. Ke ditiragalo dife tše di kgahlišago tšeo re letetšego gore di tle di direge nakong ya Pušo ya Mengwaga e Sekete?
E TLA BA letšatši leo le kgahlišago kudu ge bahu ba thoma go tsošwa mo lefaseng nakong ya Pušo ya Kriste ya Mengwaga e Sekete. Batho ka moka bao ba lahlegetšwego ke baratiwa ba bona ba fela pelo ya go ba bona gape. Le Jehofa o fela pelo. (Jobo 14:15) Nagana ka tsela yeo batho ba tla bego ba thabile ka yona ge ba kopana le batho bao ba ba ratago ge ba tsošwa. Ka ge re ithutile sehlogong se se fetilego, “bao ba lokilego,” e lego bao maina a bona a ngwadilego ka pukung ya bophelo ba tla “tsogela bophelong.” (Dit. 24:15; Joh. 5:29) Mohlomongwe batho ba bantši bao re ba ratago ba tla ba ba le gare ga bao ba tsošwago ka morago ga Haramagedone. * Eupša “bao ba sa lokago” e lego bao ba sa kago ba hwetša sebaka sa go ithuta ka Jehofa le go mo hlankela ka go botega pele ba ka hlokofala, ba tla “tsošetšwa kahlolong.”
2-3. (a) Go ya ka Jesaya 11:9, 10, mošomo o mogolo wa go ruta wo o tlago go direga o akaretša’ng? (b)Re tlo ithuta’ng sehlogong se?
2 Batho ka moka bao ba tsošitšwego ba tlo swanelwa ke go hlahlwa. (Jes. 26:9; 61:11) Ka gona go tlo swanelwa gore go dirwe modiro o mogolo kudu wo o sa kago wa dirwa mo lefaseng. (Bala Jesaya 11:9, 10.) Ka baka la’ng? Ka gobane batho ba sa lokago bao ba tsošitšwego ba tlo swanelwa ke go ithuta ka Jesu Kriste, Mmušo wa Modimo, topollo le bohlokwa bja leina la Jehofa le gore ke yena a nnoši a swanelwago ke go buša. Le bao ba lokilego ba tlo swanelwa ke go ithuta ka dilo tše dingwe tšeo Jehofa a tlago go di utolla ka morero wa gagwe ka lefase. Ba bangwe ba bao ba botegago ke bao ba hlokofetšego pele Beibele e fetšwa go ngwalwa. Ba ba lokilego le ba sa lokago ba tlo swanelwa ke go ithuta dilo tše dintši.
3 Sehlogong se re tlo araba dipotšišo tše: Modiro wo o mogolo kudu o tlo dirwa bjang? Na tsela yeo batho ba arabelago ka yona mošomong wo e tla bontšha gore ba nyaka gore maina a bona a ngwalwa ka pukung ya bophelo goba aowa? Dikarabo tša dipotšišo tše di bohlokwa go rena lehono. Ka ge re tla bona diporofeto tšeo di lego ka pukung ya Daniele le Kutollo di tlo re thuša go kwešiša gore go tlo direga eng ge bahu ba tsošwa. A re thomeng pele ka go ithuta ka ditiragalo tšeo di kgahlišago tšeo go boletšwego ka tšona boporofeteng bjo bo lego go Daniele 12:1,2.
“BAO BA ROBETŠEGO LEROLENG . . . BA TLA TSOGA”
4-5. Daniele 12:1 e utolla eng ka mehla ya bofelo?
4 Bala Daniele 12:1. Puku ya Daniele e utolla tatelano ya ditiragalo tše di thabišago tšeo di tlago go direga nakong ya bofelo. Ka mohlala, Daniele 12:1 e utolla gore Mikaele e lego Jesu Kriste o “emela batho ba Modimo.” Karolo yeo ya boporofeta e ile ya thoma go phethagala ka 1914 ge Jesu a be a kgethwa go ba Kgoši ya Mmušo wa Modimo wa legodimong.
5 Le gona Daniele o ile a botšwa gore Jesu o tla “ema” nakong “ya tlalelo yeo e sa kago ya ba gona ga e sa le go tloga ge setšhaba se e ba gona goba go fihla ka nako yeo.” Nako ye ya “tlalelo” ke nako ya “masetlapelo a magolo” yeo go boletšwego ka yona go Mateo 24:21. Jesu o a ema goba o tšea kgato go šireletša batho ba Modimo mafelelong a nako ya tlalelo e lego Haramagedone. Puku ya Kutollo e bitša sehlopha seo gore ke lešaba le legolo “leo le tšwago masetlapelong a magolo.”—Kut. 7:9, 14.
6. Go tlo direga’ng ka morago ga gore lešaba le legolo le phologe masetlapelo a magolo? Hlalosa. (Bona le sehlogo sa “Dipotšišo tše di Tšwago go Babadi” ka Morokaming wo, seo se bolelago ka tsogo yeo e tlago go ba gona mo lefaseng.)
6 Bala Daniele 12:2. Go tlo direga eng ka morago ga gore lešaba le legolo le phologe nako ye ya tlalelo? Boporofeta bjo ga bo bolele ka tsogo ya moya yeo e tlago go direga mehleng ya bofelo, go ya kamoo re bego re bo kwešiša ka gona peleng. * Eupša mantšu a a bolela ka tsogo ya bahu yeo e tlago go direga lefaseng le lefsa. Ke ka baka la’ng re realo? Lentšu “leroleng” le hlaloswa go swana le lentšu “lebitla” leo go bolelwago ka lona go Jobo 17:16. Ka ge lentšu leo le rego “lerole” le swana le leo le rego “lebitla” gona Daniele 12:2 e bolela ka tsogo yeo e tlago go direga ka morago ga ge mehla ya bofelo le ntwa ya Haramagedone di fetile.
7. (a) Ba bangwe ba tlo tsogela “bophelong bjo bo sa felego” bjang? (b) Ke ka baka la’ng ye e le “tsogo e kaone”?
7 Daniele 12:2 e ra go re’ng ge e re ba bangwe ba tlo tsogela “bophelong bjo bo sa felego”? Lengwalo le le ra gore nakong ya mengwaga e sekete ge bao ba tsošitšwego ba ka tseba, goba ba tšwela pele ba tseba, le go kwa Jehofa le Jesu ba tlo hwetša bophelo bjo bo sa felego. (Joh. 17:3) Ye e tlo ba “tsogo e kaone” go feta yeo e ilego ya ba gona nakong e fetilego. (Baheb. 11:35) Ka baka la’ng? Ka gobane batho bao ba ilego ba tsošwa ba be ba se ba phethagala ka gona ba ile ba hwa gape.
8. Ke bjang ba bangwe ba tlago go tsogela go “gobošwa le go hlaswa go iša mehleng ya neng le neng”?
8 Eupša ga se bohle bao ba tsošitšwego bao ba tlago go nyaka go rutwa ke Jehofa. Boporofeta bja Daniele bo bolela gore ba bangwe ba tla tsošetšwa “go gobošwa le go hlaswa go iša mehleng ya neng le neng.” Ka baka la go se nyake go rutwa ga bona maina a bona, a ka se ngwalwe ka pukung ya bophelo e bile ba ka se hwetše bophelo bjo bo sa felego. Go e na le moo ba tlo hwetša “tshenyego ya ka mo go sa felego,” goba ba fedišetšwa sa ruri. Daniele 12:2 e bolela ka mafelelo a bohle bao ba tlago go tsošwa go ithekgile ka ditiro tšeo ba di dirago ka morago ga gore ba tsošwe. * (Kut. 20:12) Ba bangwe ba tla hwetša bophelo bjo bo sa felego ba bangwe ba ka se bo hwetše.
“GO TLIŠA BA BANTŠI GO LOKENG”
9-10. Ke eng se sengwe seo se tlago go direga ka morago ga masetlapelo a magolo, gona ke bo mang bao ba tlago go “taga bjalo ka go phadima ga leratadima”?
9 Bala Daniele 12:3. Ke eng se sengwe gape seo se tlago go direga ka morago ga “nako ya tlalelo”? Go oketša go Daniele 12:2, temana 3 e bolela ka selo se sengwe seo se tla go go direga ka morago ga masetlapelo a magolo.
10 Ke bomang bao ba tlago go “taga bjalo ka go phadima ga leratadima”? Mateo 13:43 e re thuša go tseba gore ke bomang ge e re: “Ka nako yeo baloki ba tla taga bjalo ka letšatši Mmušong wa Tatago bona.” Mantšung a temaneng ye Jesu o be a bolela ka “barwa ba Mmušo,” e lego bana babo bao ba tloditšwego bao ba tla go go šoma le yena Mmušong wa legodimong. (Mat. 13:38) Ka gona Daniele 12:3 e swanetše goba e bolela ka batlotšwa le mošomo wo ba tlago go o dira Nakong ya Pušo ya Mengwaga e Sekete.
Ba 144,000 ba tlo šoma kgauswi le Jesu go hlahla modiro o mogolo wa go ruta wo o tlago go dirwa nakong ya mengwaga e sekete (Bona serapa 11)
11-12. Ba 144,000 ba tla ba ba dira mošomo ofe Nakong ya Pušo ya Mengwaga e Sekete?
11 Batlotšwa ba tlo tliša bjang batho ba “bantši go lokeng”? Batlotšwa ba tlo dirišana le Jesu Kriste ka mošomo o mogolo wa go ruta mo lefaseng nakong ya Pušo ya Mengwaga e Sekete. Ba 144,000 ga ba tle go hlankela feela e le dikgoši eupša ba tlo hlankela gape e le baperisita. (Kut. 1:6; 5:10; 20:6) Ka gona ba tlo thuša “go alafa ditšhaba” le go dira gore batho ba phethagale gape. (Kut. 22:1, 2; Hesek. 47:12) Mošomo wo o tlo thabiša batlotšwa kudu!
12 Ke bomang bao ba tlago go ba gare ga batho ba “bantši” bao ba tlišwago go lokeng? E tlo ba batho bao ba tsošitšwego bahung bao ba phologilego Haramagedone le bana bao ba ka belegwago lefaseng le lefsa. Ka morago ga mengwaga e sekete batho ka moka bao ba lego mo lefaseng ba tla ba ba phethagetše. Bjale ke neng mo maina a bona a tlago go ngwalelwa sa ruri ka pukung ya bophelo, a ngwalwa ka enke e sego ka phensele?
TEKO YA MAFELELO
13-14. Batho ka moka bao ba phethagetšego mo lefaseng ba tlo swanelwa ke go dira’ng gore ba hwetše bophelo bjo bo sa felego?
13 Re swanetše go gopola gore go ba yo a phethagetšego ga go bolele gore motho o tla hwetša bophelo bjo bo sa felego. Nagana ka Adama le Efa. Ba be ba phethagetše eupša ba be ba swanetše go bontšha gore ba kwa Jehofa pele ba ka hwetša bophelo bjo bo sa felego. Ka manyami ba ile ba palelwa ke go mo kwa.—Baroma 5:12.
14 Boemo bo tlo ba bjang go bao ba lego mo lefaseng mafelelong a mengwaga e sekete? Batho ka moka ba tla ba ba phethagetše. Na batho ka moka bao ba tla bego ba phethagetše ba tla thekga pušo ya Jehofa kamoo go feletšego? Goba na ba tla swana le Adama le Efa bao ba ilego ba se botege le ge ba be ba phethagetše? Dipotšišo tše di swanetše go arabja. Bjang?
15-16. (a) Batho ka moka ba tlo hwetša sebaka neng gore ba bontšhe Jehofa gore ba a mmotegela? (b) Ditlamorago tša teko ya mafelelo e tlo ba dife?
15 Sathane o tlo golegwa ka mengwaga e sekete. Ke moka a ka se kgone go aroša motho. Lega go le bjalo mafelelong ga mengwaga e sekete Sathane o tlo lokollwa. Ka nako yeo o tlo leka go aroša batho bao ba phethagetšego. Batho ka moka bao ba phethagetšego ba tlo ba le sebaka sa go bontšha gore ba hlompha leina la Modimo le go thekga bogoši bja gagwe. (Kut. 20:7-10) Tsela yeo ba arabelago ka yona e tlo bontšha ge e ba maina a bona a swanetše go ngwalelwa sa ruri ka pukung ya bophelo.
16 Beibele e re botša gore batho ba bangwe ba tla swana le Adama le Efa ka go se botege gomme ba gana bogoši bja Jehofa. Go tlo direga’ng ka bona? Kutollo 20:15 e re botša gore: “Mang le mang yo a sa hwetšwago a ngwadilwe pukung ya bophelo a lahlelwa letsheng la mollo.” Batho ka moka ba babe ba tlo fedišetšwa sa ruri. Eupša batho ba bantši bao ba phethagetšego ba tlo fenya tekong yeo ya mafelelo. Ke moka maina a bona a ngwalelwa sa ruri ka pukung ya bophelo.
“MEHLENG YA BOFELO”
17. Morongwa o ile a botša Daniele gore go tlo direga eng nakong ye ya rena? (Daniele 12:4, 8-10)
17 Go a thabiša go nagana ka ditiragalo tšeo di tlago go direga nakong e tlago, eupša Daniele o ile a hwetša molaetša o mongwe o bohlokwa woo o bolelago ka nako ya rena e lego “mehleng ya bofelo.” (Bala Daniele 12:4, 8-10;2 Tim. 3:1-5) Morongwa o ile a botša Daniele gore: “Tsebo ya therešo e tla ata.” Mantšu a boporofeta ao a lego pukung ya Daniele a be a tlo kwešišwa ka botlalo ke bahlanka ba Modimo. Morongwa o ile a oketša ka gore: “Ba kgopo ba tla dira bokgopo ga go le o tee wa bona yo a tlago go kwešiša.”
18. E se kgale go tlo direga’ng ka batho ba babe?
18 Lehono re ka bona okare batho ba babe ga ba otlwe ka baka la boitshwaro bja bona bjo bobe. (Mal. 3:14, 15) Kgauswinyane Jesu o tlo ahlola batho ba babe bao ba swantšhetšwago ke dipudi gomme a ba arola go batho bao ba lokilego bao ba swantšhetšwago ke dinku. (Mat. 25:31-33) Batho ba ba babe ba ka se phologe masetlapelo a magolo goba go tsošetšwa bophelong mo lefaseng. Maina a bona a ka se be ka “pukung ya kgopotšo” yeo go bolelwago ka yona go Maleaki 3:16.
19. Ke eng seo re swanetšego go se dira gona bjale, gona ka baka la’ng? (Maleaki 3:16-18)
19 Gona bjale ke nako ya gore re itlhatsele gore ga se rena batho ba babe. (Bala Maleaki 3:16-18.) Jehofa o kgoboketša batho bao a ba bonago e le “thoto e kgethegilego,” goba ba le bohlokwa. Ke therešo gore re nyaka goba gare ga bona.
Go tlo thabiša kudu ge re bona Daniele, batho bao re ba ratago le ba bangwe ba bantši ba “emelela” gore ba hwetše moputso wa bona lefaseng le lefsa! (Bona serapa 20)
20. Daniele o ile a tshepišwa eng pele a ka hwa, gona ke ka baka la’ng o fela pelo ya go bona tshepišo yeo e phethagala?
20 Ke therešo gore re phela dinakong tšeo di thabišago. Eupša go sa tlo direga dilo tše di thabišago le go feta. E se kgale re tlo bona batho ba babe ba fedišwa. Gomme ra bona go phethega seo Jehofa a se tshepišitšego Daniele ge a be a re: “O tlo emelela gore o tšee kabelo ya gago bofelong bja matšatši.” (Dan. 12:13) Na o fela pelo ya go bona nako yeo Daniele le batho ba bangwe bao o ba ratago ba “emelela” gape? Ge e ba go le bjalo, šoma ka thata gore o dule o botegela Jehofa gona bjale gomme o kgodišege gore leina la gago le tlo dula le ngwadilwe ka pukung ya Jehofa ya bophelo.
KOPELO 80 “Latswang le be le Boneng Gore Jehofa o Lokile”
^ Sehlogo se se tlo re thuša go kaonefatša kwešišo yeo re bego re na le yona ka mošomo o mogolo kudu wa go ruta, wo o tlago go ba gona wo go bolelwago ka ona go Daniele 12:2, 3. Re tlo ithuta gore mošomo wo o tlo direga neng le gore ke bomang bao ba tlago go tšea karolo. Re tlo bona le kamoo mošomo wo o tlago go thuša bao ba lego mo lefaseng gore ba itokišeletše teko ya mafelelo yeo e tlago go ba gona mafelelong a Pušo ya Kriste ya Mengwaga e Sekete.
^ Mohlomongwe tsogo ye e tla thoma ka bao ba hwilego ba botega mehleng ya bofelo, ke moka ka morago gwa tsoga moloko ka morago ga moloko o mongwe. Ge e ba go le bjalo, gona moloko o mongwe le o mongwe o tlo ba le sebaka sa go amogela batho bao o ba tsebago. Go sa šetšwe gore seo se tlo direga bjang Beibele e bolela ka “thulaganyo” ya bao ba tsogelago legodimong, ka gona re ka re go ka tla gwa ba ka tsela yeo go bao ba tlago go tsogela mo lefaseng.—1 Bakor. 14:33; 15:23.
^ Tlhaloso ye ke ye e kaonefaditšwego go tšwa go yeo e lego ka pukung ya Pay Attention to Daniel’s Prophecy! kgaolo 17 le Morokami wa July 1, 1987, matl. 21-25.
^ Mantšu “bao ba lokilego” le “bao ba sa lokago” ao a lego go Ditiro 24:15 le mantšu “bao ba dirilego dilo tše dibotse” le “le bao ba dirilego dilo tše mpe” ao a hwetšagalago go Johane 5:29 a bolela ka ditiro tša bao ba tsošitšwego pele ba ehwa.
