Onthele Yokulilongeswa 40
“Mavatuala Ovanthu Ovanyingi Kouviuki”
“Vana vatuala ovanthu ovanyingi kouviuki, mavakaliaima apeho ngononthugululu.” — DAN. 12:3.
OTYIIMBO 151 Ngwe Maihana
ETYI MATULILONGESA a
1. Otyipuka patyi matyikamoneka mokueenda kuomanima 1000 matyiketuhambukiswa unene?
MATYIKETUHAMBISWA unene, okukatala ovanthu mavatutuliswa pala okukala pano pohi mokueenda kuoutumini womanima 1000! Aveho vahiwapo no vavo vehole, vahanda okukevemona vali. Tupu na Siovaa otyo ahanda. (Jó 14:15) Pahe soka oñgeni ovanthu mavakakala tyina vamamono vavo vehole vatutiliswa. Ngetyi tuelilongesale monthele yokualamba, “ovaviuki,” vana wokuna omanyina avo momukanda womuenyo “mavakatutiliswa pala okukala nomuenyo.” (Ovil. 24:15; Suau 5:29) Iya tyipondola hamwe ovanyingi po vetu vanyima mavakatutiliswa tyina o Armagedom yamalambe. b tupu tuelilongesa okuti, vana “vehevaviuki” vokuahakalele nomphitilo yokunoñgonoka Huku nokumuumbila puetyi vehenenkhie ‘mavakatutiliswa pala okukoyeswa.’
2-3. (a) Ngetyi tyipopia Isaías 11:9, 10, otyilinga patyi otyinene matyikalingwa kombanda yohi? (b) Oityi matulilongesa monthele ei?
2 Ovanthu aveho mavakatutiliswa mavekesukisa okulongeswa. (Isa. 26:9; 61:11) Otyo makukakalela otyilinga tyimwe otyinene tyokulongesa ovanthu. (Tanga Isaías 11:9, 10.) Mokonda vana vehevaviuki mavakatutiliswa mavekesukisa okulongeswa opo vanoñgonoke Sesusi Kilisitu, nouhamba wa Huku, notyilikutila tyeyovo, nokunoñgonoka okuti Siovaa oe vala watokala okutumina. Atee umwe ovaviuki vamwe mavakatutiliswa navo mavekesukisa okulongeswa ovipuka vimwe Siovaa alongesa-le ovanthu vae. Ovaviuki ovo mavakalongeswa, ovo vana wokuanyima etyi Ombimbiliya yehenepwe okuhonekwa. Naina tyilinge ovaviuki tyilinge vana vehevaviuki aveho mavekesukisa okulongeswa.
3 Monthele ei, matulilongesa omapulo aa: Oñgeni otyilinga tyokulongesa matyikalingwa? Oñgeni otyilinga otyo matyikakuatesako ovanthu vehevaviuki okukapakwa omanyina avo momukanda womuenyo? Onthue hono tuesukisa umwe okunoñgonoka omakumbululo omapulo oo. Ngetyi matulilongesa, omaulo avasiwa momukanda wa Daniel no momukanda Eholololo maetukuatesako okunoñgonoka etyi matyikamoneka tyina ovanthu vamehimbika okututiliswa. Tete nkhele matulilongesa omaulo amwe avasiwa momukanda wa Daniel 12:1, 2.
“OVANYINGI VELELE MOMBUMA YEHEKE MAVAKAPINDUKAPO”
4-5. Oityi omukanda wa Daniel 12:1 upopia matyikamoneka kononthiki mbahulililako?
4 Tanga Daniel 12:1. Omukanda wa Daniele upopia ovipuka vimwe vihuvisa mavikamoneka kononthiki mbahulililako. Mongeleka, omukanda wa Daniel 12:1 upopia okuti Mingeli Sesusi Kilisitu “makakatuka, opo aamene ovanthu va Huku.” Onondaka mbeulo olio mbahimbika okufuisapo mo 1914 etyi Sesusi akala ohamba youhamba wa Huku keulu.
5 Tupu, Daniel wapopia okuti “Makukakala ononthiki mbononkhumbi onene mbehenekalekua-le nkhele vala kwahimbika okukala ovanthu atee pononthiki mbatyo ombo.” Omuvo wapopiwa apa, “omuvo wononkhumbi ononene” mbapopiwa momukanda wa Mateusi 24:21. Sesusi makakatuka opo ayakulile ovanthu va Huku konthyulilo yononkhumbi ononene mo Armagedom. Omukanda Eholololo upopia okuti ovanthu ovo “ovanthu ovanyingi-nyingi mavakahupa mononkhumbi ononene.” — Ehol. 7:9, 14.
6. Oityi matyikamoneka-po tyina ovanthu vamakahupa mononkhumbi ononene? Hangununa. (Tala “Omapulo Ovatangi” ovalie mavakatutiliswa pala okukala pano pohi, momutala ou womulavi.)
6 Tanga Daniel 12:2. Oityi matyikamoneka-po tyina ovanthu vamakahupa mononkhumbi ononene? Kohale ankho tunoñgonoka okuti, omukanda wa Daniel 12:2 upopia etutilo liavana mavaende keulu mokueenda kononkhumbi ononene. Tupu ankho tupopia okuti onondaka ombo mbupopia okuliyawisa kovilinga viokuivisa konyima yetyi viailikilwe mo 1918. c Mahi pahe tuanoñgonoka okuti onondaka ombo mbupopia vana mavakatutiliswa avakakala pano pohi. Omokonda yatyi tupopila ngotyo? Tupopia ngotyo mokonda ondaka yapopiwa momukanda wa Daniel 12:2 okuti “ombuma” tupu oyo yapopiwa momukanda wa Jó 17:16 okuti “eendo.” Otyo tyilekesa okuti onondaka mbuvasiwa momukanda wa Daniele 12:2 mbukahi nokupopia etutilo malikamoneka pano pohi, tyina o Armagedom yamalambe.
7. (a) Onondaka mbokuati vamwe mavakatutila “pala okukala nomuenyo” mbuhangununa-tyi? (b) Oñgeni etutilo olio “malikelikalela nomatutilo okohale”?
7 Onondaka mbuvasiwa momukanda Daniel 12:2 mbupopia okuti vamwe mavakatutiliswa pala okukalako “nomuenyo uhapu mbuhangununa-tyi”? Onondaka ombo mbulekesa okuti mokueenda kuomanima 1000 vana mavakatutiliswa aveketavela ku Siovaa na Sesusi tupu avakaendela muetyi valongesiwa mavakakala nomuenyo uhapu. (Suau 17:3) Etutilo olio “malikelikalela” nomatutilo alingailwe kohale. (Heb. 11:35) Omokonda yatyi? Mokonda vana wokuatutilisilwe konyima vankhile vali.
8. Onondaka mbokuati vamwe mavakatutiliswa “avakapolwa omunkhima nokupenyua pala apeho mbuhanda okupopia-tyi”?
8 Haveho mavakatutiliswa maveketavela etyi mavakalongeswa. Omukanda wa Daniele upopia okuti vamwe mavakatutiliswa “avakapolwa omunkhima nokupenyua pala apeho.” Mokonda ovanthu ovo kamaveketavela ovitumino vya Siovaa omanyina avo kamakapakwa momukanda womuenyo, tupu kamavakakala nomuenyo uhapu. “mavakapenyua pala apeho” tyilekesa okuti mavakahanyuako. Omukanda wa Daniel 12:2 upopia etyi matyikamoneka na vana mavakatutiliswa pala okukala mouye omupe. Otyipuka otyo matyikatalelwa kutyi mavakalinga mouye omupe. d (Ehol. 20:12) Otyo tyilekesa okuti vamwe mavakapewa omuenyo vamwe mavakahanyuako.
“OVANYINGI MAVAKAKUATESWAKO AVAKALA OVAVIUKI”
9-10. Oityi matyikamoneka-po tyina ononkhumbi ononene mbamalambe, iya “ovalie mavakaliaima ngetyi eulu liliaima”?
9 Tanga Daniel 12:3. Oityi vali matyikamoneka-po tyina ononkhumbi ononene mbamalambe”? Okuyawisa kuetyi tyipopia omukanda wa Daniel 12:2, ovelesikulu 3 pahe ipopia umwe nawa etyi matyikamoneka-po tyina ononkhumbi ononene mbamalambe.
10 Ovalie “mavakaliaima ngetyi eulu liliaima”? Ekumbululo tulivasa monondaka mba Sesusi mbuvasiwa momukanda wa Mateusi 13:43 mbati: “Momuvo oo, ovaviuki mavakaliaima ngekumbi Mouhamba wa Tate yavo.” Onondaka ombo, Sesusi ankho ukahi nokumbupopila “ovana wouhamba,” ovakilisitau ovalembulwa vana mavakatumina nae mouhamba wokeulu. (Mat. 13:38) Naina omukanda wa Daniel 12:3 ukahi nokupopia ovalembulwa novilinga mavakalinga mokueenda kuomanima 1000.
Wo 144.000 mavakaundapela kumwe na Sesusi opo vakahongolele ovilinga viokulongesa mavikalingwa mokueenda kuomanima 1000 (Tala opalangalafu 11)
11-12. Mokueenda kuomanima 1000 otyilinga patyi wo 144.000 mavakalinga?
11 Oñgeni ovalembulwa mavakakuatesako “ovanthu ovanyingi avakala ovaviuki”? Mokueenda kuomanima 1000 ovalembulwa kumwe na Sesusi ovo mavakahongolela otyilinga tyokulongesa ovanthu ouye auho. Vo 144 mili kamavakakala vala onohamba mahi tupu mavakakala ovanakwa. (Ehol. 1:6; 5:10; 20:6) Mavakahakula “ovanthu ovanyingi” nokukuatesako ovanthu okutunda monkhali. (Ehol. 22:1, 2; Eze. 47:12) Otyilinga otyo matyikahambukiswa unene ovalembulwa!
12 Ovalie “mavakakuateswako” okukala ovaviuki? Ovovana mavakatutiliswa, navana mavakahupa mononkhumbi ononene, novana vana mavakatyitilwa mouye omupe. Konthyulilo yomanima 1000 ovanthu aveho mavakakala tyihena onkhali. Naina onalupi omanyina etu maakahonekwa momukanda womuenyo nolapisela?
EHETEKO LIEHULILILAKO
13-14. Oityi ovanthu aveho mavekesukisa okulinga tyina nkhele vehenepewe omuenyo uhapu?
13 Tuna okuhinangela okuti okukala tyihena onkhali katyilekesa okuti ngotyo tuna omuenyo uhapu. Nkhele soka ko Andau na Eva. Ankho vetupu onkhali, mahi opo ankho Siovaa eveavele omuenyo uhapu ankho vesukisa okukala ovakuatyili kwe. Mahi ngetyi tutyii ovo kavetavelele ku Siovaa. — Loma. 5:12.
14 Oñgeni ovanthu mavakakala konthyulilo yomanima 1000? Ovanthu aveho mavakakala tyihena vali onkhali. Mahi okuti ovanthu aveho vehena onkhali maveketavela outumini wa Siovaa pala apeho? Ine mavakalinga ngoo Andau na Eva vahakalele ovakuatyili ku Siovaa namphila ankho vehena onkhali? Tuesukisa okukumbulula omapulo oo. Mahi pahe oñgeni matuekumbulula?
15-16. (a) Onalupi ovanthu aveho kombanda yohi mavakalekesa okuti vahula ku Siovaa? (b) Oityi matyikamoneka-po konthyulilo yeheteko liahulililako?
15 Satanasi makapakwa mokaleya mokueenda kuomanima 1000. Pomuvo opo Satanasi kemeketyivila vali okuyondya omunthu nawike. Mahi konthyulilo yomanima 1000 makapolwa mokaleya. Pomuvo opo, opo pahe makayondya ovanthu aveho vehena vali onkhali. Meheteko liahulililako, ovanthu aveho kombanda yohi opo vala pahe mavakalekesa umwe okuti vahula kouhamba wa Huku. (Ehol. 20:7-10) Etyi mavakalinga tyina vamalolwa na Satanasi, otyo matyilekesa umwe ine vatokala okupakwa omanyina avo momukanda womuenyo.
16 Ombimbiliya ipopia okuti ovanthu vamwe mavakalinga ngetyi ovo Andau na Eva valingile, aveheketavela kouhamba wa Huku. Oityi matyikalingwa ovanthu ovo? Omukanda Eholololo 20:15 wapopia okuti: “una uhahonekelwe momukanda womuenyo, ayumbwa metala liotupia.” Otyo tyilekesa okuti ovanthu vana veheketavela mavakanyimuako umwe pala apeho. Mahi ovanthu ovanyingi mavakaanya okuyondyua na Satanasi. Ovanthu ovo omanyina avo maakahonekwa momukanda womuenyo pala apeho.
KONONTHIKI “MBAHULILILAKO”
17. Oityi oandyu yapopilile Daniele matyikamoneka kononthiki mbahulililako? (Daniel 12:4, 8-10)
17 Okusoka kovipuka mavikamoneka komutwe wandyila tyituhambukiswa unene! Mahi no pehepano tupondola okuhambukwa. Oandyu yapopilile Daniele ovipuka mavikamoneka momuvo wetu, “kononthiki mbonthyulilo.” (Tanga Daniel 12:4, 8-10; 2 Tim. 3:1-5) Oandyu yapopilile Daniele okuti: “Enoñgonoko liotyili malikakala enyingi unene.” Ngokuti ovanthu va Huku ankho mavakanoñgonoka umwe nawa omaulo Ombimbiliya. Tupu oandyu yapopila Daniele okuti “onondingavivi mavakavilapo okulinga ovipuka ovivi mahi nawike pono ndingavivi meketyinoñgonoka.”
18. Oityi matyikalingwa onondingavivi apa katutu?
18 Hono ovanthu valinga ovivi vamoneka ngoti petupu-ale etyi valingwa. (Mal. 3:14, 15) Mahi apa katutu Sesusi makakoyesa vana vekahi ngovinkhombo ekeveyapula konongi. (Mat. 25:31-33) Ovanthu vana wokulinga ovivi mavakahanyuako mo Armagedom iya kamavakatutiliswa vali opo vakale mouye omupe. Omanyina avo kamakahonekwa “momukanda wokuhinangela” wapopiwa mu Malaquias 3:16.
19. Oityi tuna okulinga pehepano, iya omokonda yatyi? (Malaquias 3:16-18)
19 Omuvo uno, oo omuvo wokulekesa onthue valie, mahi katuhande okukala onondingavivi. (Tanga Malaquias 3:16-18.) Siovaa ukahi nokuongiya ovanthu “velikalela ovanthu vana valinga etyi tyimuhambukiswa.” Nonthue tuhanda okukala povanthu ovo.
Matyiketuhambukiswa unene okukatala Daniele no vetu vokuanyima novanthu ovakuavo vali “mavakatutiliswa” pala okukala mouye omupe! (Tala opalangalafu 20)
20. Oityi Daniele apopililwe iya omokonda yatyi nove uhandela okuketyimona?
20 Tyotyili onthue tukahi momuvo umwe uhambukiswa unene. Mahi ovipuka maviketuhambukiswa vali, mavimoneka apa katutu. Apa katutu matukamona tyina onondingavivi mbuhanyuako. Konyima atukatala onondaka Daniele apopililwe noandyu mbufuisuapo, mbokuati: “Ove mokapululukuapo, konthyulilo yononthiki mokapindukapo otambula ondyambi yove. (Dan. 12:13) Okuti ove uhanda okukamona Daniele no wove vanyima tyina “vamakatutuliswa”? Inkha otyo uhanda, linga ononkhono mbokulinga evi viaviuka. Ine utyilinga, kala nonthumbi yokuti Siovaa mapake enyina liove momukanda womuenyo.
OTYIIMBO 80 “Makelei Opo Mutale Okuti Jeova Ukahi Nawa”
a Onthele ei maipopi otyipuka tyimwe tyapiluluka omo ankho tunoñgonokela otyilinga tyimwe tyokuivisa tyapopiwa mu Daniel 12:2, 3. Tupu matulilongesa oñgeni otyilinga otyo matyikalingwa iya ovalie maveketyilinga. Matutale oñgeni otyilinga otyo matyikakuatesako ovanthu okulambela meheteko liahulililako konthyulilo yomanima 1000.
b Tyipondola mavatetekela okutuliswa ovava vanyima umwe tyifenda Huku mononthiki mbahulilila, pahe otyo atyikondoka no ku ava vanyima-le kohale, matyiti umwe akututiliswa vomuvo ou akututiliswa vomuvo ou. Ine o ngotyo matyiende, opo ovanthu vokualiko pomuvo wike maveliliepesa, aveliyakula nawa na vakwavo vakalaile umwe navo. Tyilinge otyo, tyilinge hatyo, mahi Ovihonekwa viapopia okuti vana vatutiliswa opo vende keulu vatutiliswa monkhalelo “yaongana nawa.” Otyipuka otyo tyilekesa okuti opo na ava mavatutiliswa vakakale pano pohi, o ngotyo ñgo matyiende, matyoonganekwa umwe nawa. — 1 Kol. 14:33; 15:23.
c Etyi pahe tuanoñgonoka pehepano tyelikalela netyi ankho tunoñgonoka kohale tyivasiwa momukanda Preste Atenção à Profecia de Daniel! okapitulu 17 nomo Momutala Womulavi 1 ya Julho yo 1987, pefo 21- 25.
d Onondaka mbuvasiwa momukanda Ovilinga 24:15 mbokuati “ovaviuki” na “vana vehevaviuki,” no ombu mbuvasiwa momukanda wa Suau 5:29 mbokuati “vana valinga ovipuka oviwa” na “vana valinga ovipuka ovivi” mbupopia ovipuka ovanthu valingaile etyi nkhele vehenenkhie.
