NKHANI YAKUPFUNZA 40
‘Kuthandiza Wanthu Azinji Kucita Cirungamo’
“Omwe akuthandiza wanthu azinji kucita cirungamo [an’dzayetima] ninga nyenyezi, ku nthawe zentse.” — DANIYELI 12:3.
NYIMBO 151 Iye An’dzawacemera
BZOMWE TIN’PFUNZA *
1. Kodi mpsinthu bziponi bzakudekeza bzomwe bzin’dzacitika mkati mwa Utongi bwa Magole 1000?
IFEPANO tin’dzakomedwa kwene-kwene tikadzawona Yahova akuyamba kulamusa anyakufa mkati mwa Utongi bwa Magole 1000 bwa Kristu! Wanthu omwe adafedwa adzinza wawo na axamwali wawo akufunisisa kudzawawona pomwe ndipo Yahova akufunisisambo. (Djobi 14:15) Ndokumbukirani momwe iwo an’dzabvera akadzawona adzinza wawo na axamwali wawowo akulamusidwa. Iwo an’dzakomedwa kwene-kwene. Mu nkhani idamala ire tidapfunza kuti wanthu “wakulungama,” omwe madzina yawo yali mu bukhu la moyo, “an’dzamuka kuti atambire moyo.” (Mabasa 24:15; Juwau 5:29) Pinango abale na axamwali wathu winango omwe adasaika ndiwo an’dzayamba kumuka. * Ndipo wanthu “wakusaya kulungama,” omwe alibe kukhala na mwayi wakupfunza bza Yahova ayai kumutumikira, “an’dzamuka kuti atongedwe.”
2-3. (a) Thangwe ranyi wanthu wentse omwe an’dzalamusidwa pa dziko la pantsi an’dzafunika kupfunzisidwa? (Zaiya 11:9, 10) (b) Kodi n’ciyani comwe tin’pfunza mu nkhani ino?
2 Wanthu wentse omwe an’dzalamusidwa an’dzafunika kupfunzisidwa. (Zaiya 26:9; 61:11) Ndipopa mu dziko lipsa mun’dzakhala na basa likulu lakupfunzisa wanthu. (Werengani Zaiya 11:9, 10.) Thangwe ranyi? Thangwe lakuyamba ndakuti, wanthu wakusaya kulungama omwe an’dzalamusidwa an’dzafunika kudziwa Jezu Kristu, Umambo bwa Mulungu, cakulombolera, kufunika kwa dzina la Yahova nakuti thangwe ranyi iye ngwakuthemera kutonga wanthu. Napo wanthu wakulungama kale an’dzafunikambo kupfunzisidwa bzinthu bzinango. Iwo an’dzafunika kudziwa momwe Yahova adazimbulira wanthu wace bzomwe akufuna kucita pa dziko la pantsi. Ndipo wanthu winango wakulungamawa adafa pa nthawe yomwe Fala la Mulungu likhanati kumala kunembedwa. Ndipopa tingalewe kuti wanthu wakulungama na wakusaya kulungama wentse an’dzafunika kupfunzisidwa akadzalamusidwa.
3 Mu nkhani ino, tiniwona mitawiro ya mibvunzo iyi: Kodi basa likulu lakupfunzisa wanthu lin’dzacitika tani? Kodi bzomwe wanthuwo an’dzacita akadzadziwa bzomwe Mulungu akufuna bzin’dzathandizira tani kuti madzina yawo yadzanembedwe mu bukhu la moyo nakuti yaleke kudzapfudzidwa? Mitawiro ya mibvunzo imweyi njakufunika kwene-kwene kwa ifepano ntsiku zino. Pomwe tikupfunza nkhaniyi, tiniwona mapolofesiya yakudabwisa yakunembedwa mu bukhu la Daniyeli na Apokalipse yomwe yan’tithandiza kubvesesa bzomwe bzin’dzacitika wanthu wakufa akadzalamusidwa. Cakuyamba, bwerani tiwone bzinthu bzakudabwisa bzomwe bzimbalewedwa mu polofesiya ya pa Daniyeli 12:1, 2.
“OMWE ADAGONA KUPFUMBI AN’DZAMUKA”
4-5. Kodi Daniyeli 12:1 ambalewa kuti n’ciyani comwe cin’dzacitika mu ntsiku zakumalizira?
4 Werengani Daniyeli 12:1. Bukhu la Daniyeli limbafotokoza bzinthu bzakusiyana-siyana bzomwe bzin’dzacitika mu ntsiku zakumalizira. Pa Daniyeli 12:1 pambalewa kuti Migeli, omwe ni Jezu Kristu, ‘an’dzaima kuti athandize wanthu wa Mulungu.’ Bzomwe polofesiyayi imbalewa bzidayamba kucita mu gole la 1914, pomwe Jezu adakhala Mambo wa Umambo bwa Mulungu kudzulu.
5 Tsono, Daniyeli adauzidwa kuti Jezu “an’dzaima” pomwe pa “nthawe ya matsautso makulisa yomwe yakanati kuwoneka ciyambiremo ca mtundu wa wanthu mpaka nthawe imweyo.” “Nthawe ya matsautso” imweyi ni “citsautso cikulu” comwe cimbalewedwa pa Mateu 24:21. Jezu an’dzaima, bzomwe bzikuthandauza kuti an’dzakhotcerera wanthu wa Mulungu kuphampha kwa nthawe ya matsautsoyi, yomwe ni pa Armagedo. Bukhu la Apokalipse limbacemera wanthu amwewa kuti ‘thimu likulu lomwe lacokera ku citsautso cikulu.’ — Apokalipse 7:9, 14.
6. Kodi n’ciyani cin’dzacitika thimu likulu likadzapulumuka pa citsautso cikulu? Fotokozani. (Onani mu revista ino “Mibvunzo Yakucokera kwa Anyakuwerenga,” yomwe ikulewa bza kulamusidwa kwa wanthu omwe an’dzakhala pa dziko la pantsi.)
6 Werengani Daniyeli 12:2. Kodi n’ciyani cin’dzacitika wanthu wa thimu likulu akadzapulumuka pa nthawe ya matsautsoyi? Polofesiyayi ikulewa lini bza kulamusidwa kwakuyezezera, komwe kukucitika na atumiki wa Mulungu mu ntsiku zakumalizira zino, ninga momwe tikhalewera kale-kale. * Koma, mafala yamweya yakulewa bza kulamusidwa kwa anyakufa komwe kun’dzacitika mu dziko lipsa. Kodi tikudziwa tani bzimwebzi? Tikudziwa bzimwebzi thangwe fala lakuti “pfumbi” lomwe liri pa polofesiyayi liripombo pa Djobi 17:16 ndipo lina thandauzo libodzi-bodzi na fala lakuti “Thenje.” Bzimwebzi bzikutithandiza kubvesesa kuti Daniyeli 12:2 akulewa bza kulamusidwa caiko komwe kun’dzacitika zikadzamala ntsiku zakumalizira na nkhondo ya Armagedo.
7. (a) Thangwe ranyi tingalewe kuti wanthu winango an’dzalamusidwa kuti adzakhale na “moyo wakusaya kumala”? (b) Thangwe ranyi ‘kulamusidwa kumweku n’kwabwino kwene-kwene’?
7 Tsono kodi Daniyeli 12:2 an’funa kulewanyi akambalewa kuti wanthu winango an’dzalamusidwa kuti adzakhale na “moyo wakusaya kumala”? Vesiri lin’funa kulewa kuti wanthu omwe an’dzalamusidwa an’dzapfunzisidwa bza Yahova na Jezu. Tsono, wale omwe an’dzapitiriza kupfunza bza iwo, na kuwabvera mkati mwa magole 1000, an’dzatambira moyo wakusaya kumala. (Juwau 17:3) Kumweku kun’dzakhala “kulamusidwa kwabwino kwene-kwene” kuposa komwe kudacitika m’mbuyomu. (Ahebereu 11:35) Thangwe ranyi tikulewa tenepoyo? Thangwe wanthu omwe adalamusidwa m’mbuyomu adadzafa pomwe.
8. Thangwe ranyi wanthu winango “an’dzanyozedwa na kuwengedwa mpaka kale-kale”?
8 Tsono ni wanthu lini wentse omwe an’dzabvuma kupfunzisidwa. Polofesiya ya Daniyeli imbalewa kuti wanthu winango omwe an’dzalamusidwa “an’dzanyozedwa ndipo an’dzawengedwa mpaka kale-kale.” Madzina ya wanthu amwewa yan’dzanembedwa lini mu bukhu la moyo ndipo iwo an’dzatambira lini moyo wakusaya kumala thangwe an’dzakhala wanthu wakupanduka. Iwo “an’dzanyozedwa,” ayai kuti an’dzapfudzidwa mpaka kale-kale. Ndipopa, pa Daniyeli 12:2 pambalewa bzomwe bzin’dzacitikira wanthu wentse omwe an’dzalamusidwa mwakubverana na bzicito bzawo akadzalamusidwa. * (Apokalipse 20:12) Wanthu winango an’dzatambira moyo wakusaya kumala ndipo winango ne.
‘KUTHANDIZA WANTHU AZINJI KUCITA CIRUNGAMO’
9-10. Kodi n’ciyani cinango comwe cin’dzacitika citsautso cikulu cikadzamala, ndipo mbani omwe “an’dzayetima ninga kudzulu”?
9 Werengani Daniyeli 12:3. Kodi n’ciyani cinango comwe cin’dzacitika ikadzamala “nthawe ya matsautso makulisa”? Pa Daniyeli 12:2 palewa kale bzinthu bzinango. Tsono vesi 3 limbalewa pomwe bzinthu bzinango bzomwe bzin’dzacitika citsautso cikulu cikadzamala.
10 Kodi mbani “an’dzayetima ninga kudzulu”? Mafala yomwe Jezu adalewa pa Mateu 13:43 yambatithandiza kudziwa. Iye adati: “Pa nthawe imweyo, anyakulungama an’dzayetima kwene-kwene ninga dzuwa mu Umambo bwa Baba wawo.” Jezu adalewa mafala yamweya pomwe akhalewa bza “wana wa Umambo,” omwe ni Akristau wakudzozedwa omwe an’dzatonga naye pabodzi mu Umambo bwa kudzulu. (Mateu 13:38) Ndipopa tingalewe kuti mafala yomwe yali pa Daniyeli 12:3 yakulewa bza anyakudzozedwa na basa lomwe iwo an’dzacita mkati mwa Utongi bwa Magole 1000.
Anyakudzozedwa wa 144 000 an’dzaphata basa na Jezu pa kutsogolera basa likulu lakupfunzisa wanthu lomwe lin’dzacitika mkati mwa magole 1000 (Onani ndime 11)
11-12. Kodi ni basa liponi lomwe wa 144 000 an’dzacita mkati mwa magole 1000?
11 Kodi anyakudzozedwa an’dzathandiza tani “wanthu azinji kucita cirungamo”? Iwo an’dzaphata basa pabodzi na Jezu Kristu pakutsogolera basa lakupfunzisa wanthu pa dziko la pantsi pano mkati mwa magole 1000. Anyakudzozedwa amwewa wakukwana 144 000 an’dzandokhala lini amambo basi, koma an’dzakhalambo antsembe. (Apokalipse 1:6; 5:10; 20:6) Ndipopa, iwo an’dzathandiza Jezu pa basa la “kupoza mitundu ya wanthu.” Ndipo pang’ono na pang’ono, wanthu wentse an’dzakhala wakulungama. (Apokalipse 22:1, 2; Zakiyeri 47:12) Bzimwebzi bzikulatiza kuti anyakudzozedwa an’dzacita basa lakudekeza kwene-kwene!
12 Kodi mbani an’dzacitambo mbali ya “wanthu azinji” omwe an’dzathandizidwa kucita cirungamo? Wanthu omwe an’dzathandizidwa kucita cirungamowa ni wanthu omwe an’dzalamusidwa, wanthu omwe an’dzapulumuka pa Armagedo na wana omwe angadzabadwe mu dziko lipsa. Mpaka kuphampha kwa magole 1000, wanthu wentse omwe an’dzakhala na moyo pa dziko la pantsi pano an’dzakhala wakulungama. Kodi ni pa nthawe imweyi pomwe madzina yawo yan’dzanembedwa mu bukhu la moyo mwakuti yangapfudzidwe lini, bzomwe bzin’dzakhala ninga kuti yanembedwa na lapizera?
MAYEZO YAKUMALIZIRA
13-14. Kodi n’ciyani comwe wanthu wentse wakulungama pa dziko la pantsi pano an’dzafunika kucita pomwe akanati kutambira moyo wakusaya kumala?
13 Tin’funika kukumbukira kuti wanthu akadzakhala wakulungama bzin’funa lini kulewa kuti iwo an’dzatambiriratu moyo wakusaya kumala. Thangwe ranyi tikulewa tenepoyo? Kumbukirani bza Adamu na Eva. Iwo akhali wanthu wakulungama. Koma iwo akhafunika kubvera Yahova kuti akhale na mwayi wakukhala na moyo wakusaya kumala. Tsono iwo alibe kucita bzimwebzi, ndipopa adaluza mwayi umweyu. — Aroma 5:12.
14 Kodi moyo un’dzakhala tani kwa wanthu wentse omwe an’dzakhala na moyo pa dziko la pantsi pano kuphampha kwa magole 1000? Wanthu wentse an’dzakhala wakulungama. Tsono kodi wentse an’dzathandizira utongi bwa Yahova mpaka kale-kale? Ayai an’dzakhala ninga Adamu na Eva, omwe alibe kubvera Yahova napo kuti akhali wakulungama? Mibvunzo imweyi in’dzafunika kutawiridwa. Tsono n’ciyani cin’dzacitika kuti mibvunzoyi idzatawiridwe?
15-16. (a) Kodi ni lini pomwe wanthu wentse an’dzakhala na mwayi wakulatiza kuti mbakukhulupirika kwa Yahova? (b) N’ciyani cin’dzacitika pa mayezo yakumalizira?
15 Sathani an’dzamala magole 1000 ali m’kawoko. Pa nthawe imweyi, iye an’dzakwanisa lini kupumpsa wanthu. Tsono kuphampha kwa magole 1000, Sathani an’dzacosedwa m’kawoko. Bzimwebzi bzikadzacitika, iye an’dzayezera kupumpsa wanthu wakulungama. Pa nthawe imweyi, wanthu wentse an’dzakhala na mwayi wakulatiza kuti ambalemekeza dzina la Mulungu na kuthandizira utongi bwace. (Apokalipse 20:7-10) Bzomwe wanthu an’dzacita pa nthawe imweyi ndibzo bzin’dzacitisa kuti madzina yawo yapitirize kukhala yalipo mu bukhu la moyo ayai yadzapfudzidwe.
16 Bibliya limbalewa kuti wanthu winango an’dzacita bzinthu ninga Adamu na Eva, iwo an’dzalamba kutongedwa na Yahova. Kodi n’ciyani cin’dzacitikira wanthu amwewa? Pa Apokalipse 20:15 pambatiuza kuti: “Ali-wentse omwe dzina lace liribe kugumanika mu bukhu la moyo, adathusidwambo mu thawale la moto.” Mafalaya yakulatiza kuti wanthu wakupandukawa an’dzapfudzidwa. Tsono wanthu azinji wakulungama an’dzakunda mayezo yakumaliziraya. Ndipo madzina yawo yan’dzanembedwa mu bukhu la moyo mwakuti yangapfudzidwe lini, bzomwe bzin’dzakhala ninga kuti yanembedwa na lapizera.
“NTHAWE YAKUMALIZIRA”
17. Kodi Daniyeli adalewa kuti n’ciyani comwe cingadadzacitika mu nthawe yathu ino? (Daniyeli 12:4, 8-10)
17 Ifepano timbakomedwa kwene-kwene tikambakumbukira bzinthu bzabwinobzi bzomwe bzin’dzacitika kutsogoloku! Tsono, Daniyeli adauzidwambo mafala yanango yakufunika kwene-kwene na anjo pa nkhani ya “nthawe yakumalizira.” (Werengani Daniyeli 12:4, 8-10; 2 Timotio 3:1-5) Anjoyo adauza Daniyeli kuti: “Cidziwiso cacadidi cin’dzawanda.” Mafalaya yan’funa kulewa kuti wanthu wa Mulungu angadadzabvesesa mapolofesiya mazinji ya m’bukhu la Daniyeli mu ntsiku zakumalizira. Ndipo anjoyo adauza pomwe Daniyeli kuti pa nthawe imweyi “wanthu wakuipa [angadadzacita] bzinthu bzakuipa, ndipo palibe munthu wakuipa omwe [angadadzabvesesa] mafala yamweya.”
18. Kodi n’ciyani cin’citikira wanthu wakuipa tsapanopapa?
18 Ntsiku zino bzimbawoneka ninga kuti wanthu omwe ambacita bzinthu bzakuipa an’dzalangidwa lini. (Malakiya 3:14, 15) Tsono tsapanopapa, Jezu an’pasa nyathwa wanthu wakuipa omwe ali ninga mbuzi ndipo an’dzawasiyanisa na wanthu wakulungama omwe ali ninga mabira. (Mateu 25:31-33) Wanthu wakuipawa an’dzapulumuka lini pa citsautso cikulu, ndipo ne an’dzalamusidwa lini mu dziko lipsa kuti adzakhale pomwe na moyo. Madzina yawo yan’dzagumanika lini mu “bukhu la cikumbuso” lomwe limbafotokozedwa pa Malakiya 3:16.
19. Kodi n’ciyani comwe tin’funika kucita, ndipo n’thangwe ranyi? (Malakiya 3:16-18)
19 Ino ni nthawe yakulatiza kuti timbafuna kucita bzinthu bzabwino. (Werengani Malakiya 3:16-18.) Yahova akukonkhanisa wanthu omwe ambawawona ninga “cuma cakupambulika”; wanthu omwe mbakufunika kwene-kwene kwa iye. Ndipo ifepano tikufunambo kukhala m’bodzi wa iwo.
Tin’dzakomedwa kwene-kwene kuwona Daniyeli, adzinza wathu na wanthu winango azinji “akulamusidwa” mu dziko lipsa! (Onani ndime 20)
20. Kodi n’ciyani comwe Yahova adauza Daniyeli, ndipo thangwe ranyi mukufunisisa kudzawona bzimwebzi bzikucitika?
20 Ifepano tikukhala mu nthawe zakudekeza kwene-kwene. Tsono pana bzinthu bzinango bzabwino kwene-kwene bzomwe bzin’citika tsapanopapa. Ifepano tiniwona kumala kwa dziko lakuipali. Bzimwebzi bzikamala, tin’dzawona bzomwe Yahova adauza Daniyeli bzikucitika. Iye adamuuza kuti: “Kuphampha kwa ntsikuzo un’dzalamuka kuti udzatambire gawo lako.” (Daniyeli 12:13) Kodi imwepo mukufuna lini kudzawona Daniyeli pabodzi na adzinza wanu ‘akulamusidwa’ kwa anyakufa? Penu mukufuna, citani nyongo kuti mupitirize kukhala wakukhulupirika kwa Yahova. Mukacita bzimwebzi, dzina lanu lin’dzapitiriza kukhala lidanembedwa mu bukhu la moyo la Yahova.
NYIMBO 80 ‘Lawidzani Muwone Kuti Yahova Ngwabwino’
^ Nkhani ino in’fotokoza bza kucinja kwa kabvesesedwe pa nkhani ya basa likulu lakupfunzisa wanthu lomwe limbafotokozedwa pa Daniyeli 12:2, 3. Tiniwona kuti basa limweri lin’dzacitika lini ndipo mbani omwe an’dzalicita. Pakumalizira, tiniwona momwe basa limweri lin’dzakonzekeresera wanthu kuti adzakwanise kukunda mayezo yakumalizira kuphampha kwa Utongi bwa Magole 1000 bwa Kristu.
^ Pinango wanthu wakukhulupirika omwe adafa mu ntsiku zakumalizira ndiwo an’dzayamba kulamusidwa. Ndipo amwewa akadzamala kulamusidwa, pinango angadzalamusidwembo wanthu omwe adafa pomwe iwo akhana moyo. Penu bzin’dzakhala tenepo, ndiye kuti wanthu omwe an’dzalamusidwawo an’dzakhala na mwayi wakutambira wanthu omwe adafa pomwe iwo akhana moyo. Ifepano tikudziwa lini bwino-bwino kuti bzin’dzakhala tani. Koma pakulewa bza wanthu omwe an’dzalamusidwa kuti akakhale na moyo kudzulu, Bibliya limbalewa kuti “ali-wentse an’dzalamusidwa pa nthawe yace.” Ndipopa tingalewe kuti wanthu omwe an’dzalamusidwa pa dziko la pantsi pano an’dzalamusidwambo ali-wentse pa nthawe yace. — 1 Akolinto 14:33; 15:23.
^ Bzimwebzi bzikucinja kabvesesedwe kathu komwe kadafotokozedwa m’bukhu lakuti Samalani Ulosi wa Danieli! kapitulo 17 na Ntsanza ya Mulindiri ya 1 Julho, 1987, matsa. 21-25 (Cipwitikizi).
^ Mafala yakuti “wakulungama” na “wakusaya kulungama” yomwe yali pa Mabasa 24:15 na mafala yakuti “omwe akhacita bzinthu bzabwino” na “omwe akhacita bzinthu bzakuipa” yomwe yali pa Juwau 5:29 yambalewa bza bzinthu bzomwe wanthuwo adacita pomwe akhanati kufa.
