1. Ki susesonan emoshonante lo tuma lugá durante e Reinado di Mil Aña?

 IMAGINÁ kon maravioso lo ta ora ku resurekshon kuminsá tuma lugá aki riba tera durante e Reinado di Mil Aña di Kristu. Nos tur ku a pèrdè nos sernan kerí ta anhelá di mira nan atrobe. Esei ta loke Yehova tambe ta deseá. (Yòb 14:15) Imaginá kon kontentu nos lo ta ora nos topa nos famia- i amigunan resusitá. Manera nos a siña den e artíkulo anterior, esnan “hustu,” kende nan nòmber ta skirbí den e buki di bida, lo lanta pa “un resurekshon di bida.” (Echo. 24:15; Huan 5:29) Kisas hopi di nos sernan kerí lo ta entre esnan ku lo haña resurekshon un poko despues di Armagedon. b Anto tambe lo tin esnan “inhustu,” entre nan esnan ku no a haña e oportunidat pa konosé òf sirbi Yehova promé ku nan a muri. Nan tambe lo lanta, pero pa “un resurekshon di huisio.”

2-3. (a) Segun Isaías 11:9 i 10, riba kiko e programa di siñansa i entrenamentu lo konsentrá? (b) Kiko nos lo bai trata den e artíkulo akí?

² Lo tin ku siña tur hende ku resusitá. (Isa. 26:9; 61:11) P’esei, lo implementá e programa di siñansa i entrenamentu di mas grandi ku a yega di tuma lugá riba tera. (Lesa Isaías 11:9, 10.) Dikon? Pa kuminsá, e inhustunan  mester siña tokante Hesus, e Reino, e reskate i e kuestion relashoná ku Yehova su nòmber i soberania. Asta e hustunan mester aktualisá nan konosementu di loke Yehova a revelá tokante su propósito pa e tera. Algun di e sirbidónan fiel ei di Yehova a muri hopi promé ku a kaba di skirbi Beibel. Pues, tantu e hustu komo e inhustu tin hopi kos di siña.

³ Den e artíkulo akí nos lo bai kontestá e siguiente preguntanan: Kon e programa inmenso akí di siñansa i entrenamentu ta hinká den otro? Ki konekshon tin entre e programa akí i e skirbimentu di nòmber permanentemente den e buki di bida? Ta masha importante pa nos sa e kontestanan ei. Manera nos ta bai mira, algun profesia di e buki di Daniel i Revelashon lo yuda nos komprondé mihó kiko lo pasa ora resurekshon tuma lugá. Pero promé, laga nos wak un profesia emoshonante ku Daniel 12:1 i 2 ta papia di dje.

4-5. Kiko Daniel 12:1 ta bisa ku lo pasa durante e tempu di fin?

⁴ Lesa Daniel 12:1. E buki di Daniel ta revelá den ki órden algun evento emoshonante lo sosodé durante e tempu di fin. Por ehèmpel, Daniel 12:1 ta bisa ku Miguel, kende ta Hesukristu, “lo lanta” pa “protehá e yu hòmbernan di [e] pueblo” di Dios. Parti di e profesia ei a kuminsá kumpli na 1914 ora ku Hesus a bira Rei di e Reino di Dios.

⁵ Pero, Daniel a bisa tambe ku Hesus “lo lanta” durante “un tempu di angustia manera nunka tabatin for di tempu ku tabata eksistí un nashon te na e tempu ei.” E “tempu di angustia” ei ta e “tribulashon grandi” menshoná na Mateo 24:21. Hesus lo lanta, òf defendé Dios su pueblo, na fin di e tempu di angustia ei, esta, na Armagedon. E buki di Revelashon ta referí na e hendenan ei komo un multitut grandi ku lo “sobrebibí e tribulashon grandi.”—Rev. 7:9, 14.

6. Kiko lo pasa despues ku e multitut grandi sobrebibí Armagedon? (Pa mas informashon tokante resurekshon riba tera, wak “Pregunta di Lektor” den e revista akí.)

⁶ Lesa Daniel 12:2. Kiko lo pasa despues ku e multitut grandi sobrebibí e tempu di angustia akí? Wèl, promé nos tabata pensa ku e profesia na Daniel 12:2 tabata referí na un resurekshon simbóliko ku lo tuma lugá durante e último dianan. Anto ku e resurekshon, den un sentido, lo ta unu spiritual kaminda aktividat di Dios su sirbidónan lo rebibá òf kuminsá atrobe. c Pero, e palabranan akí mas bien ta referí na e resurekshon di e mortonan ku lo tuma lugá den e mundu nobo. Dikon nos ta bisa esaki? Pasobra Yòb 17:16 tambe ta usa e mesun palabra “stòf,” òf tera, anto ei e ta nifiká “Sheol,” esta, Graf. Esaki ta mustra ku Daniel 12:2 ta referí na un resurekshon literal ku lo sosodé despues di e último dianan i despues di Armagedon.

7. (a) Den ki sentido algun hende lo resusitá pa “bida eterno”? (b) Dikon esaki lo ta “un mihó resurekshon”?

⁷ Pero, kiko Daniel 12:2 ke men ku algun  lo resusitá pa “bida eterno”? E ke men ku esnan ku resusitá i siña konosé, òf sigui konosé, i obedesé Yehova i Hesus durante e 1.000 aña, al final lo risibí bida eterno. (Huan 17:3) Esaki lo ta “un mihó resurekshon” kompará ku e otro resurekshonnan ku a yega di tuma lugá den pasado. (Heb. 11:35) Dikon? Pasobra e hendenan imperfekto ei a bolbe muri.

8. Den ki sentido algun hende lo resusitá pa “bèrgwensa i despresio eterno”?

⁸ Pero, no ta tur esnan resusitá lo aseptá Yehova su programa di siñansa i entrenamentu. Daniel su profesia ta bisa ku algun hende lo resusitá pa “bèrgwensa i despresio eterno.” Komo ku nan lo rebeldiá, nan nòmber lo no ser skirbí den e buki di bida ni nan lo no haña bida eterno. Na lugá di “bida eterno,” nan lo haña “despresio eterno,” òf destrukshon. Pues, Daniel 12:2 ta papia di e resultado final di tur esnan resusitá a base di loke nan hasi despues di nan resurekshon. d (Rev. 20:12) Algun lo haña bida eterno i algun nò.

9-10. Kiko mas lo pasa despues di e tribulashon grandi, i ken “lo bria manera e splendor di e firmamentu di shelu”?

⁹ Lesa Daniel 12:3. Kiko mas lo pasa despues di e “tempu di angustia”? Meskos ku Daniel 12:2, versíkulo 3 tambe ta papia di algu ku lo pasa despues di tribulashon grandi.

¹⁰ Ken “lo bria manera e splendor di e firmamentu di shelu”? Loke Hesus a bisa na Mateo 13:43 lo yuda nos sa esei. El a bisa: “Na e tempu ei, e hustunan lo bria manera solo den e Reino di nan Tata.” Den e konteksto ei, Hesus tabata papia di “e yunan di Reino,” esta, su rumannan ungí, ku lo goberná kuné den shelu. (Mat. 13:38) Pues, Daniel 12:3 mester ta papia di e ungínan i di e trabou ku nan lo hasi durante e Reinado di Mil Aña.

11-12. Ki trabou e 144.000 lo hasi durante e 1.000 añanan?

¹¹ Kon e ungínan lo “guia hopi hende na hustisia”? Nan lo traha huntu ku Hesus pa supervisá e programa di siñansa i entrenamentu ku lo tuma lugá riba tera durante e 1.000 añanan. E 144.000 lo no ta rei so, ma saserdote tambe. (Rev. 1:6; 5:10; 20:6) Pues anto, nan lo yuda “kura e nashonnan,” hibando hende gradualmente na perfekshon. (Rev. 22:1, 2; Eze. 47:12) Esta un goso esei lo ta pa e ungínan!

¹² Ken tur lo kai den e grupo di “hopi hende” ku e ungínan lo guiá na hustisia? Esnan resusitá, esnan ku a sobrebibí Armagedon i kisas e yunan ku lo nase den e mundu nobo. Na fin di e 1.000 añanan, tur hende riba tera lo ta perfekto. Pues, ta ki ora e nòmbernan lo ser skirbí ku pèn den e buki di bida?

13-14. Kiko hende perfekto riba tera mester demostrá promé ku nan haña bida eterno?

¹³ Nos tin ku keda kòrda ku e echo ku un hende ta perfekto no ta nifiká ku outomátikamente e ta haña bida eterno. Kòrda riba Adam ku Eva. Nan tabata  perfekto, pero nan mester a demostrá nan obedensia na Yehova promé ku nan a haña bida eterno. Lamentablemente nan no a obedesé.—Rom. 5:12.

¹⁴ Manera nos a mira kaba, na fin di e 1.000 añanan tur hende lo ta perfekto. Pero, tur hende perfekto lo apoyá Yehova su outoridat i lo obedes’é pa semper? Òf algun di nan lo ta manera Adam ku Eva, kendenan a bira infiel? Ban wak e kontesta pa e preguntanan ei.

15-16. (a) Na ki momento tur hende lo haña e oportunidat pa demostrá nan lealtat na Yehova? (b) Kiko lo ta e resultado final di e prueba akí?

¹⁵ Satanas lo ser será pa 1.000 aña. Durante e tempu ei lo e no por gaña niun hende. Sinembargo, na final di e 1.000 añanan, lo lag’é sali for di su prizòn. E ora ei, lo e purba gaña tur hende perfekto. Anto durante e tempu ei, tur hende perfekto lo tin e chèns di proba na ki banda nan ta pará relashoná ku e kuestion di Dios su nòmber i soberania. (Rev. 20:7-10) Loke kada un hende hasi lo determiná si nan nòmber lo ser skirbí pa semper den e buki di bida.

¹⁶ Nos no sa kuantu, pero algun hende lo hasi meskos ku Adam ku Eva i rechasá Yehova su derecho di goberná. Kiko lo pasa ku nan? Revelashon 20:15 ta bisa:  “Tur esnan ku nan nòmber no tabata skirbí den e buki di bida, el a benta den e lago di kandela.” Pues, tur hende rebelde lo ser destruí pa semper. Pero, mayoria hende perfekto lo pasa e prueba final. Nan nòmber lo ser skirbí den e buki di bida pa semper.

17. Kiko e angel a bisa Daniel ku lo pasa den nos tempu? (Daniel 12:4, 8-10)

¹⁷ Ta masha emoshonante pa pensa tokante e kosnan ku lo bai pasa den futuro. Pero, un angel a bisa Daniel algu importante tokante nos tempu, esta, “e tempu di e fin.” (Lesa Daniel 12:4, 8-10; 2 Tim. 3:1-5) E angel a bis’é ku berdadero “konosementu lo oumentá.” Sí, Dios su pueblo lo komprondé e profesianan di e buki di Daniel mas mihó. E angel a bisa ku durante e tempu ei, “e malbadonan lo hasi maldat, i ningun di e malbadonan lo komprondé.”

18. Kiko lo pasa pronto ku e malbadonan?

¹⁸ Awe, hende malbado ta hasi hopi maldat i por parse ku no tin niun konsekuensia. (Mal. 3:14, 15) Pero, un djis Hesus lo husga hende ku ta manera kabritu i lo separá nan for di hende ku ta manera  karné. (Mat. 25:31-33) E hende malbado ei lo no sobrebibí tribulashon grandi ni nan lo no haña resurekshon. Nan nòmber lo no ta den e “buki di memoria” menshoná na Malakías 3:16.

19. Kiko nos mester hasi awor, i dikon? (Malakías 3:16-18)

¹⁹ Awor ta tempu pa nos demostrá ku nos no ta entre e malbadonan. (Lesa Malakías 3:16-18.) Awor Yehova ta reuniendo tur hende ku e ta konsiderá komo su “propiedat” spesial òf su poseshon presioso. Sin duda, nos tur ke ta entre e hendenan ei.

20. Kiko ta e último kos ku Yehova a primintí Daniel, i dikon bo ta anhelá e kumplimentu di e promesa ei?

²⁰ Nos ta biba durante tempunan masha emoshonante! Pero, tin hopi kos mas fasinante ainda ku tin ku tuma lugá. Pronto maldat lo no eksistí mas. Despues di esei, nos lo mira kon Yehova lo kumpli ku e promesa ku el a hasi na Daniel. El a primintié: “Lo [bo] lanta pa risibí e parti ku ta toka bo na e fin di dianan.” (Dan. 12:13) Bo ta anhelá pa mira e dia ku Daniel i bo sernan kerí lo “lanta” for di morto? Si ta asina, hasi bo máksimo esfuerso pa keda fiel i lo bo por ta sigur ku bo nòmber lo ta skirbí den Yehova su buki di bida.