LONGO DlA 40
‘Gukuatesa Athu Avula ha Gutshita Ndaga Jiabonga’
‘Athu ana kuatesa athu avula ha gutshita ndaga jiabonga, mbaakhala muhenya gifua themua ivo nu ivo.’—DAN. 12:3.
LUNGIMBO 151 Jéhovah appellera
NDAGA JIDI MU LONGO EDI *
1. Ndaga jitshi jia gushimana mbajikalegewa mu Uhinyinyi wa Ivo 1000?
NZAMBI mbawusendesa gufuzumuna athu ha mavu mu Uhinyinyi wa Klisto wa Ivo 1000. Mbayikhala diago tangua dia gusuanguluga! Athu anyi afuishile gale athu akhalele muzumba ana tshigina guamona. Yehowa nji wana tshigina ngenyi. (Yobo 14:15) Tangiza gusuanguluga athu mbaakhala nago tangua athu mbaafuzumuga. Gifua luholo tuayimonyi mu longo diabalega, “athu abonga” adi nu majina mu mukanda wa monyo, “mbaafuzumuga ha guheta monyo.” (Makal. 24:15; Yone 5:29) Yajiya gukhala egi athu tuakhalele muzumba, mbaakhala mukatshi dia athu mbaafuzumuga gungima dia Alemagedona. * Uvi, “athu abola” gifua anyi ahetelego luendu lua gujiya Yehowa gutuama egi afue, “mbaafuzumuga ha gusophesewa.”
2-3. (a) Ha gutadila Yeshaya 11:9, 10, mudimo utshi wakoma mbawukalegewa ha mavu agasue? (b) Itshi tuza mumona mu longo edi?
2 Athu anyi mbaafuzumuga, mbaakhala nu funu ya gulonguga ndaga jiavula. (Yesh. 26:9; 61:11) Hene mudimo wakoma wa gulongesa mbawukalegewa ha mavu agasue. (Tanga Yeshaya 11:9, 10.) Mukunda natshi? Handaga athu abola anyi mbaafuzumuga mbaakhala nu funu ya gulonguga ndaga jiatadila Yesu Klisto, Ufumu wa Nzambi, mulambu nu gujiya egi jina dia Yehowa didi nu ndando. Adi naye nji gujiya egi phamba Yehowa udi watagana ha guhinyina. Athu abonga nji mbaakhala nu funu ya gujiya ndaga jiko jiatadila felela dia Yehowa mukunda nu mavu, jinyi jialongesele muene akombeledi enji. Ako mukatshi diawo afuile gutuama egi Biblia ya mudidi yisonegewe. Athu abola nu athu abonga mbaakhala nu ndaga jiavula jia gulonguga.
3 Mu longo edi tuza muhana mvutu gu mihu eyi: Luholo lutshi mudimo wakoma wa gulongesa mbawukalegewa? Itshi mbayibuila athu mbaatumagela ndaga mbaalongesewa nu itshi mbayibuila athu mbaatuna? Mvutu jia mihu eyi, jidi nu ndando mukunda nu esue mangino. Gifua luholo tuza guyimona, profesi jiko jia gushimana jidi mu mukanda wa Danyele nu Gumonesa jiza gutukuatesa ha gukotelesa muabonga ndaga mbajikalegewa tangua athu mbaafuzumuga. Tutadilenu thomo ndaga jia gushimana jidi mu profesi idi mu Danyele 12:1, 2.
‘ATHU ADI A GUBANDA TULO MU FULUGUTA DIA MAVU . . . MBAAZUGA’
4-5. Itshi Danyele 12:1 yana monesa mukunda nu masugu a gisugishilo?
4 Tanga Danyele 12:1. Mukanda wa Danyele udi mumonesa luholo ndaga jia gushimana mbajikalegewa mu masugu a gisugishilo. Ha gufezegesa, Danyele 12:1 idi mumonesa egi Mikaele, yakotelesa Yesu Klisto udi ‘ya gumagana ha gubamba akombeledi a Nzambi.’ Gitshinyi gia profesi eyi giasendesele gutagenesewa mu 1914 tangua Yesu wabuile Fumu ya Ufumu wa Nzambi.
5 Danyele wazuelele nji egi Yesu ‘mbawuzoga’ mu sungi ‘ya lamba dinyi khenji dibuilego sendese gugisendeselo gia ifutshi ya ha mavu.’ Sungi yene ya “lamba” idi “lamba diakola” dinyi ana zuelela mu Matayo 24:21. Yesu mbawuluila akombeledi a Nzambi gu gisugishilo gia tangua diene dia lamba, yakotelesa mu Alemagedona. Mukanda wa Gumonesa wana zuelela athu ene gifua “thundu yakoma ya athu akatuga mu lamba diakola.”—Gumo. 7:9, 14.
6. Itshi mbayikalegewa gungima, tangua thundu yakoma ya athu mbaahuluishiwa mu lamba diakola? Kotelesa. (Tala nji “Mihu Yana Guhula Athu ana Gutanga Mikanda Yetu” idi muzuelela gufuzumuga ha gujinga ha mavu mu Inzo Yaleha ya Mutaledi eyi.)
6 Tanga Danyele 12:2. Itshi mbayikalegewa gungima, tangua thundu yakoma ya athu mbaahuluishiwa mu lamba diakola? Profesi eyi ishigo muzuelela gufuzumuga gua gifuanesa, nga gufuzumuga gua mu nyuma gua akombeledi a Yehowa gudi mukalegewa mu masugu a gisugishilo, gifua luholo tuakhalele mukotelesa thomo. * Uvi mbimbi jiene jidi muzuelela gufuzumuga mbagukalegewa mu mavu ahe-ahe. Mukunda natshi tudi muzuela ngenyi? Handaga mu Yobo 17:16 akalegele nji mbimbi ‘fuluguta dia mavu,’ mbimbi yene idi nu ukoteleshi umoshi nu “malumba.” Ndaga yene idi mumonesa egi Danyele 12:2 yana zuelela gufuzumuga gua athu mbagukalegewa gungima dia ita ya Alemagedona.
7. (a) Mu luholo lutshi athu ako mbaafuzumuga ha “gujinga ivo nu ivo”? (b) Mukunda natshi tudi muzuela egi mbayikhala ‘gufuzumuga guabonga diago’?
7 Danyele 12:2 yana zuela egi athu ako mbaafuzumuga ha ‘gujinga ivo nu ivo.’ Ndaga yene idi mukotelesa itshi? Idi mukotelesa egi mukatshi dia athu mbaafuzumuga anyi mbaalandula gutshita ngolo ha gujiya Yehowa nu Yesu nu guatumagela, mbaaheta monyo wa ivo nu ivo mu uhinyinyi wa ivo 1000. (Yone 17:3) ‘Gufuzumuga [guawo] mbagukhala guabonga diago’ gubalega gua athu anyi afuzumugile mu tangua dikulu. (Heb. 11:35) Mukunda natshi? Handaga athu afuzumugile mu tangua dikulu afuile luko.
8. Mukunda natshi athu ako mbaafuzumuga ‘ha guvishiwa musonyi nu ha gumona lamba dia ivo nu ivo’?
8 Uvi athu ako anyi mbaafuzumuga mbaashigo mutshigina gulonguga ndaga jiatadila Yehowa. Profesi ya Danyele yana zuela egi athu ako mbaafuzumuga ‘ha guvishiwa musonyi nu ha gumona lamba dia ivo nu ivo.’ Mukunda natshi? Handaga athu ene mbaalumbugila Nzambi, hene majina awo mbaashigo musonegewa mu mukanda wa monyo nu mbaashigo muheta monyo wa ivo nu ivo. Uvi, mbaamona ‘lamba dia ivo nu ivo,’ yakotelesa egi mbaashiyiwa. Hene Danyele 12:2 idi muzuelela ndaga mbajibuila athu mbaafuzumuga ha gutadila ndaga mbaakalagala gungima dia gufuzumuga guawo. * (Gumo. 20:12) Athu ako mbaaheta monyo wa ivo nu ivo uvi ako ndo.
‘GUKUATESA ATHU AVULA HA GUTSHITA NDAGA JIABONGA’
9-10. Itshi iko mbayikalegewa gungima dia lamba diakola? Akuatshi ‘mbaahenya gifua guhenya gua mu dilu’?
9 Tanga Danyele 12:3. Itshi iko mbayikalegewa gungima dia “tangua dia lamba”? Tuakatuga guzuelela ndaga jidi mu Danyele 12:2, uvi verse 3 yana zuelela nji ndaga mbayikalegewa gungima dia lamba diakola.
10 Akuatshi ‘mbaahenya gifua guhenya gua mu dilu’? Mbimbi jia Yesu jidi mu Matayo 13:43 jidi gutukuatesa ha gujiya ndaga yene muabonga. Udi muzuela egi: “Mu tangua diene, athu abonga mbahenya gifua muanya mu Ufumu wa Sh’awo.” Mu verse eyi Yesu wakhalele muzuelela “ana a Ufumu,” yakotelesa athu ambiwe maji mu nyuma, anyi mbaahinyina n’enji mu Ufumu wa mu dilu. (Mat. 13:38) Hene idi naye gukhala egi Danyele 12:3, yana zuelela athu ambiwe maji mu nyuma nu mudimo mbaakalagala mu Uhinyinyi wa Ivo 1000.
Athu 144000 mbaatshita hamoshi nu Yesu ha gutuameza mudimo wa gulongesa unu mbawukalegewa ha mavu mu Uhinyinyi wa Ivo 1000 (Tala paragrafe 11)
11-12. Mudimo utshi athu 144000 mbaakalagala mu Uhinyinyi wa Ivo 1000?
11 Luholo lutshi Aklisto ambiwe maji mu nyuma mbaakuatesa ‘athu avula ha gutshita ndaga jiabonga’? Aklisto ene mbaatshita hamoshi nu Yesu ha gutuameza mudimo wa gulongesa unu mbawukalegewa ha mavu mu uhinyinyi wa ivo 1000. Athu 144000 mbaahinyina gifua mafumu nu mbaakhala nji nganga-nzambi. (Gumo. 1:6; 5:10; 20:6) Ngenyi mbaahana mago ha “gusaga ifutshi” nu mbakuatesa athu ha gubua athu atagana mage-mage. (Gumo. 22:1, 2; Ezek. 47:12) Mbayikhala diago ndaga ya gusuanguluga mukunda nu Aklisto ambiwe maji mu nyuma!
12 Akuatshi mbaakhala mukatshi dia “athu avula” anyi mbaakuatesewa ha gutshita ndaga jiabonga? Idi athu mbaafuzumuga nu athu mbaahuluishiwa mu Alemagedona. Yajiya gukhala nu ana anyi mbaavualewa mu mavu ahe-ahe. Gu gisugishilo gia ivo 1 000, athu agasue ha mavu mbaakhala atagana. Na tangua ditshi mbaasonega majina awo mayilago mu mukanda wa monyo?
GULOLEWA GUA GISUGISHILO
13-14. Athu mbaabua atagana ha mavu adi naye gutshita itshi ha guheta monyo wa mayilago?
13 Tudi naye gujiya egi gula muthu udi watagana, ishigo mukotelesa egi muthu muene mbawuheta monyo wa ivo nu ivo. Tangiza ndaga yabuidile Adama nu Eva. Akhalele athu atagana, uvi akhalele naye gutumagela Yehowa Nzambi hagula ajinge ivo nu ivo. Uvi ndaga ya gikenene idi egi alumbugile Yehowa.—Roma 5:12.
14 Itshi mbayikalegewa mukunda nu athu ha mavu gu gisugishilo gia ivo 1000? Mukut’awo agasue mbaakhala abui gale athu atagana. Athu ene agasue mbahana mago mu uhinyinyi wa Yehowa mayilago ba? Nga ndo, ako mbaatshita gifua Adama nu Eva, anyi alumbigile Yehowa ngatshima akhalele athu atagana? Idi nu ndando ha guheta mvutu gu mihu eyi. Uvi luholo lutshi?
15-16. (a) Tangua ditshi athu agasue mbaaheta luendu lua gumonesa gula adi agujinginyina gudi Yehowa? (b) Itshi mbayikalegewa gungima dia gulolewa gua gisugishilo?
15 Satana mbawumbiwa mu bologo mukunda nu ivo 1000. Mu tangua diene, mbagashigo mukhala nu luholo lua guhuiga athu. Uvi gu gisugishilo gia ivo 1000 Satana mbawuzolewa mu bologo. Mbawutshita yagasue ha guhuiga athu atagana. Mu tangua diene athu agasue ha mavu mbaakhala nu luendu lua gumonesa, gula ana nemesa jina dia Nzambi nu ana hana mago mu uhinyinyi wenji. (Gumo. 20:7-10) Ndaga muthu wagasue mbawukalagala mu tangua diene, jiene mbajimonesa gula jina dienji didi naye gusonegewa mayilago mu mukanda wa monyo nga ndo.
16 Biblia yana zuela egi athu ako mbaalumbugila Yehowa gifua Adama nu Eva nu mbaatuna utuameji wenji. Itshi mbayabuila? Gumonesa 20:15 idi muzuela egi: “Muthu yagasue yonu jina dienji diakhalelego dia gusonega mu mukanda wa monyo wabishidiwe mu kianga gia tshuya.” Ayi, athu awa agasue mbaashiyiwa mayilago. Uvi athu avula mbaabinga gulolewa guene gua gisugishilo. Majina awo mbaasonegewa mayilago mu mukanda wa monyo.
‘MASUGU A GISUGISHILO’
17. Ndaga jitshi muanjelo wawambelele Danyele mukunda nu masugu etu? (Danyele 12:4, 8-10)
17 Idi diago nu ndando ha gutangigiza ndaga eji mbajikalegewa mu masugu adi muza! Uvi, muanjelo wamonesele nji Danyele ndaga jiko jia ndando jiatadila tangua dietu, yakotelesa ‘masugu a gisugishilo.’ (Tanga Danyele 12:4, 8-10; 2 Tim. 3:1-5) Muanjelo muene wawambelele Danyele egi: ‘Ujiyi wa giamatshidia mbawudivudisa.’ Idi yadiago, akombeledi a Nzambi mbaakotelesa muabonga profesi jidi mu mukanda wene. Muanjelo wazuelele luko egi mu sungi yene ‘athu abola mbaakotelesago, uvi mbaalandula gukalagala ndaga jiabola.’
18. Itshi mbayibuila athu abola ana fuanesewa nu khombo?
18 Mangino yajiya gumonega gifua athu abola anago gumona lamba mukunda nu gubola ana kalagala. (Mal. 3:14, 15) Uvi gualeha ndo, Yesu mbawusophesa athu ana fuanesewa nu khombo nu mbawakhaphumuna nu athu ana fuanesewa nu imeme. (Mat. 25:31-33) Athu abola anyi ana fuanesewa nu khombo mbaashigo muhuluishiwa mu lamba diakola nu mbaashigo mufuzumuga ha gujinga mu mavu ahe-ahe. Majina awo mbaashigo mukhala mu ‘mukanda wa giwungulugilo’ adi muzuelela mu Malaki 3:16.
19. Itshi tudi naye gukalagala mangino nu mukunda natshi? (Malaki 3:16-18)
19 Didi tangua tudi naye gumonesa egi tushigo mukatshi dia athu abola. (Tanga Malaki 3:16-18.) Yehowa udi mubungisa athu ana tamega muene egi ‘athu enji diago,’ yakotelesa athu ana khala nu ndando gumeso enji. Esue nji tuana tshigina gukhala mukatshi dia athu ene.
Mbayikhala ndaga ya gusuanguluga ha gumona Danyele nu athu tuakhalele muzumba nu athu ako avula ‘mufuzumuga’ ha gujinga mu mavu ahe-ahe! (Tala paragrafe 20)
20. Ndaga itshi ya suga Nzambi walayele Danyele? Mukunda natshi wana nengenena gutagenesewa gua laji diene?
20 Tudi mujinga mu tangua dimoshi diabonga diago. Uvi ndaga jia gushimana mbajikalegewa. Gualeha ndo athu abola mbaashiyiwa. Gungima mbatumona ndaga Yehowa walayele Danyele egi: ‘Mbawuzuga ha guheta gishimbigo gu gisugishilo gia masugu.’ (Dan. 12:13) Wana nengenena gale sendese mualeha lusugu Danyele nu athu wakhalele muzumba ‘mbaafuzumuga’ ba? Gula idi ngenyi, tshita yagasue ha gusala ya gujinginyina, ngenyi jina diaye mbadisala mu mukanda wa monyo.
LUNGIMBO 80 “ Goûtez et voyez que Jéhovah est bon ”
^ Longo edi didi muhana usombegeshi mu luholo tuakhalele mukotelesa mudimo wakoma wa gulongesa unu ana zuelela mu Danyele 12:2, 3. Tuza mumona tangua ditshi mudimo wene mbawukalegewa nu akuatshi mbaawukalagala. Tuza mumona nji luholo mudimo wene mbawukuatesa athu ha mavu, ha gudilondega mukunda nu gulolewa gua gisugishilo gusuga ya Uhinyinyi wa Klisto wa Ivo 1000.
^ Yajiya gukhala egi athu afuile agujinginyina mu masugu a gisugishilo ene mbasendesa gufuzumuga, gungima athu anyi adiangele gufua mbaafuzumuga nji. Gula idi ngenyi, gindongo giagasue mbagikhala nu luendu lua guyamba athu akhalele mujiya muabonga. Ikhale ngenyi nga ndo, Biblia idi mumonesa egi gufuzumuga ha guya mu dilu guana kalagewa “muthu nu muthu mu tangua dienji.” Ndaga yene idi gututshiginyisa egi gufuzumuga gua athu ha mavu mbagushigo mukalegewa mulumuamua.—1 Kol. 14:33; 15:23.
^ Ukoteleshi owu udi usombegeshi wa ndaga jidi mu mukanda Prêtons attention à la prophétie de Daniel ! mukhapho 17 nu mu Inzo Yaleha ya Mutaledi ya 1 Juillet 1987 diyiji 21-25.
^ Uvi mbimbi “athu abonga” nu “athu abola” jidi mu Makalegelo 24:15 nu mbimbi “athu anyi akalegele ndaga jiabonga” nu “anyi akalegele ndaga jiabola” jidi mu Yone 5:29 jidi muzuelela ndaga jiakalegele athu mbaafuzumuga gutuama egi afue.
