NKHANI YOPFUNZIRA 40
‘Kuthandiza wanthu azinji kuti akhale olungama’
‘Omwe ankuthandiza wanthu azinji kukhala olungama adzagake ninge nyenyezi mpakana kalekale, inde mpakana muyaya.’ —DAN. 12:3.
NYIMBO NA. 151 Iye Adzaitana
VOMWE TIPFUNZIRE *
1. Ko tinkudikhira vinthu vabwino viponi nkati mwa utongi wa magole 1000?
VIDZAKHALE vokomedza maninge wanthu akadzayamba kumukisiwa nkati mwa magole 1000 ya utongi wa Yesu. Panthawe mweyo tidzagumane pomwe na anzathu omwe adafa. Yahova anashungu yochita vimwevi. (Yobu 14:15) Ndoganizani momwe wanthu adzakondwere panthawe mweyo. Ninge mwatidapfunzirira munkhani yapita, wanthu ‘olungama’ omwe madzina yawo yali m’bukhu ya moyo, ‘adzamukisiwe kuti atambire moyo.’ (Mac. 24:15; Yoh. 5:29) Panango anzathu azinji omwe adafa ndiwo wati adzakhale oyambirira kumukisiwa. * Ndipo ‘osalungama’ omwe adaferamo ne kumudziwa Yahova, ‘adzamukisiwe kuti aweruziwe.’
2-3. (a) Mobverana na Yesaya 11:9, 10, ko kudzachitike basa ikulu iponi kuposha yomwe inkuchitika ntsiku zino? (b) Ko tipfunzire chani mu nkhani ino?
2 Wanthu wose akadzamukisiwa adzafunikane kupfunzisiwa. (Yes. 26:9; 61:11) Ndipomwapa kudzakhale basa ikulu maninge yopfunzisa wanthu kuposha yomwe inkuchitika ntsiku zino. (Lewengani Yesaya 11:9, 10.) Ndawa chani tinkulewa tene? Ndawa yakuti osalungama akadzamukisiwa adzafunike kupfunzisiwa va Yesu, makonzedwe ya Ufumu, ntsembe ya dipo na nkhani ikulu yomwe mngelo adayambisa yakuti Yahova adziwalini kutonga. Wanthu olungama adzafunike kuuziwa momwe Yahova adakwanirisira cholinga chake padziko pano panthawe yomwe iwo enze m’manda. Atumiki anango okhulupirika adafa Baibolo ikanati kumala kunembewa. Ndipomwapa tingalewe kuti panavizinji vomwe olungama na osalungama adzapfunzire.
3 Munkhani ino, tikambirane midawiro ya mibvunzo aya: Ko basa yopfunzisa wanthu mwiyi idzachitike tani? Ko nchani chati chidzachitise kuti Mulungu asaine kunemba madzina ya wanthu panango kundoleka? Ni vodikana maninge kudziwa midawiro ya mibvunzo mwaya pakali pano. Maulosi yodabwisa ya m’bukhu ya Danieli na Chivumbulutso yatithandize kudziwa bwino vati vidzachitike akadzati wakufa amukisiwa. Naboni manje tikambirane maulosi ya pa Danieli 12:1, 2 yomwe yadalewewa kalekale.
‘OMWE ALI GONE MUDOTHI . . . ADZAMUKE’
4-5. Ko lemba ya Danieli ifotokoza vinthu viponi vomwe vidzachitike muntsiku zomalizira?
4 Lewengani Danieli 12:1. Bukhu ya Danieli ifotokoza vinthu vomwe vidzachitike molondozana muntsiku zomalizira. Mwakulinganiza, pa Danieli 12:1 pankufotokoza kuti Mikayeli yemwe ni Yesu Khrisitu, ‘waimirira kuti apulumuse wanthu’ wa Mulungu. Mbali imwiyi ya ulosi idayamba kukwanirisika mu 1914 panthawe yomwe Yesu adaikhiwa kukhala Mpfumu ya Ufumu wa Mulungu kudzulu.
5 Koma bukhu ya Danieli idafotokoza pomwe kuti Yesu ‘adzaimirire’ nkati mwa ‘nthawe yachisautso chomwe chikanati kuchitikako kuchokera pomwe dziko idakhazikisiwa mpakana manjeuno.’ ‘Nthawe yachisautso’ mwiyi ni ‘chisautso chikulu’ chofotokozewa pa Mateyu 24:21. Yesu adzaimirire kuti ateteze wanthu wa Mulungu kumapeto kwa nthawe mwiyi ndipo adzamenye nkhondo ya Arumagedo. Bukhu ya Chivumbulutso ifotokozambo va gulu mwiyi pakulewa kuti ni ‘gulu ikulu yomwe yabula pachisautso chikulu.’—Chiv. 7:9, 14.
6. Ko nchani chidzachitike ikadzati gulu ikulu yapulumuka pachisautso chikulu? Fotokozani. (Onani pomwe mu ntsanja mwaino “Mibvunzo yochokera kwa olewenga” kuti mudziwe vizinji va momwe adzamukisiriwe wanthu padziko pano.)
6 Lewengani Danieli 12:2. Ko nchani chidzachitike ikadzati gulu ikulu yapulumuka panthawe yachisautso mweyi? Ulosi moyu unkulewalini va kumukisiwa kophiphirisa na kubadwa kunyowani kwa atumiki wa Mulungu kochitika muntsiku zomalizira ninge momwe tingabvera pakuyamba. * Koma unkulewa va wanthu omwe adzamukisiwe mudziko inyowani yomwe yafendera. Ndawa chani tinkulewa tene? Mawu yakuti ‘mudothi’ yankuphatisiwa pomwe basa pa Yobu 17:16 pakulewa va ‘Manda.’ Vimwivi vinkuwonesa kuti lemba ya Danieli 12:2 inkufotokoza va kumukisiwa chaiko komwe kudzachitike zikadzamala ntsiku zomalizira ikadzati nkhondo ya Arumagedo yachitika.
7. (a) Ko mawu yakuti anango adzamukisiwe nkupasiwa ‘moyo wosapera’ yankutanthauza chani? (b) Ndawa chani tingalewe kuti kumoku kudzakhale ‘kumukisiwa kwabwino maninge’?
7 Ko lemba ya Danieli 12:2 inkutanthauza chani ikambati anango adzamukisiwe nkupasiwa ‘moyo wosapera’? Inkutanthauza kuti nkati mwa magole 1000, wanthu omwe adzamukisiwe nkudziwa Yahova na omwe ambamudziwa kale nkupitiriza kumudziwa na kumbabvera Iye na Yesu, adzapasiwe moyo wosapera. (Yoh. 17:3) Kumoku kudzakhale ‘kumukisiwa kwabwino maninge’ kuposha komwe kudachitika muntsiku zakumbuyo. (Aheb. 11:35) Ndawa chani? Ndawa yakuti wanthu omwe adamukisiwa, nkuyenda kwa nthawe adafa pomwe.
8. Ndawa chani anango ‘vidzawamalirelini bwino nkumbazondewa mpakana kalekale’?
8 Koma sikuti wose womukisiwa adzabvume kupfunzisiwa na Yahova. Danieli adalewa pomwe kuti ‘anango vidzawamalirelini bwino ndipo adzazondewe mpakana kalekale.’ Pakuti iwo adzabverelini Yahova, madzina yawo yadzanembewelini m’bukhu ya moyo ndipo adzatambirelini moyo wosapera. Koma iwo ‘vidzawamalirelini bwino’ panango kuti adzachenekewe. Lemba mwiyi ya Danieli 12:2 inkulewa vomwe vidzachitikire wose womukisiwa mobverana na vomwe adzachite patsogolo pake. * (Chiv. 20:12) Anango adzatambire moyo wosapera, koma anango adzatambirelini.
‘KUTHANDIZA WANTHU AZINJI KUTI AKHALE OLUNGAMA’
9-10. Ko nchani chidzachitike chisautso chikulu chikadzamala, ndipo ni mbani ati ‘adzagake ninge kugaka kwa kudzulu’?
9 Lewengani Danieli 12:3. Ko nchani chinango chati chidzachitike ikadzapita ‘nthawe yachisautso’? Pakuthimizira vomwe valewewa pa Danieli 12:2, vesi 3 inkufotokoza chinthu chinango chomwe chidzachitike chikadzapita chisautso chikulu.
10 Ko ni mbani ati ‘adzagake ninge kugaka kwa kudzulu’? Mdawiro unkugumanika pa mawu yomwe Yesu adafotokoza pa Mateyu 13:43. Iye adati: ‘Panthawe mwiyo, olungama adzagake ninge dzuwa mu Ufumu wa Ababa wawo.’ Pamwapa Yesu ambalewa va ‘wana wa Ufumu’ omwe ni odzozewa ndipo adzatonge naye pabodzi mu Ufumu wakudzulu. (Mat. 13:38) Vimwivi vinkuwonesa kuti lemba ya Danieli 12:3 inkulewa va odzozewa na basa yati adzaphate nkati mwa magole 1000.
Wa 144 000 adzathandize Yesu pakutsogolera basa yopfunzisa wanthu yomwe idzachitike kwa magole 1000 (Onani ndime 11)
11-12. Ko wa 144 000 adzakhale na basa yanyi nkati mwa magole 1000?
11 Ko odzozewa adzathandize tani ‘wanthu azinji kuti akhale olungama’? Iwo adzachite vimwivi pakuthandizana na Yesu potsogolera basa yopfunzisa wanthu nkati mwa magole 1000 yomwe idzachitike padziko pano. Sikuti wa 144 000 andodzatonga ninge mafumu basi, koma ninge pomwe wantsembe. (Chiv. 1:6; 5:10; 20:6) Iwo adzathandizire ‘pakupolesa makhaindi yose ya wanthu’ kuti akhale wangwiro pang’ono-pan’gono. (Chiv. 22:1, 2; Ezek. 47:12) Vimwevi vidzakhale vokomedza maninge kwa odzozewa!
12 Ni mbani omwe adzakhale ‘mugulu’ ya wanthu omwe adzathandiziwe kukhala olungama? Ni wanthu omwe adzamukisiwe na omwe adzapulumuke pa Arumagedo kuphatanidzapo wana omwe adzabadwire mudziko inyowani. Pakumala kwa magole 1000, wanthu wose padziko yapasi adzakhale wangwiro. Manje iwo adzafunike kuchita chani kuti madzina yawo yanembewe na lapizera, osati na lápis m’bukhu ya moyo?
CHIYESO CHOMALIZIRA
13-14. Ko wanthu wose wangwiro padziko pano adzafunikane kuchita chani kuti apitirize kukhala na moyo wosapera?
13 Osati tiganize kuti munthu akandodzakhala wangwiro ndiye kuti adzapitirize kukhala na moyo wosapera. Ndoganizani vomwe vidachitikira Adamu na Hava. Iwo enze wangwiro, koma kuti apitirize kukhala na moyo wosapera, angadekana kumbabvera Yahova. Koma ni vokwinyiririsa kuti iwo adaleka kumubvera.—Aro. 5:12.
14 Ko nchani chati chidzachitikire wanthu padziko yapasi kumapeto kwa magole 1000? Wose adzakhale wangwiro. Ko wose adzapitirize kubvera Yahova mpakana kalekale? Panango adzachitembo ninge vomwe Adamu na Hava adachita podiya kuti enze wangwiro? Tichadekana kudziwa midawiro ya mibvunzo mwaya, koma ko tingayadziwe tani?
15-16. (a) Nilini pomwe wanthu adzapasiwe mpata wowonesa kuti ni wokhulupirika kwa Yahova? (b) Nchani chati chidzachitikire wanthu pachiyeso chomalizira?
15 Satana adzamangiwe kwa magole 1000. Panthawe mwiyi, iye ambadzakwaniselini kusokoneza wanthu. Koma magole 1000 yakadzamala, Satana adzamasuliwe ndipo adzayesese kusokoneza wanthu wangwiro. Pachiyeso chimwechi, wanthu wose adzafunikane kusankhula kumbatongewa na Satana panango Yahova. (Chiv. 20:7-10) Vomwe iwo adzachite akambadzayesewa na Satana, vidzachitise kuti Yahova aisunge dzina yawo m’bukhu ya moyo panango kundoipfudza.
16 Baibolo ifotokoza kuti anango adzalambe kutongewa na Yahova ninge mwadachitira Adamu na Hava. Manje nchani chati chidzawachitikire? Lemba ya Chivumbulutso 20:15 ilewa kuti: ‘Aliyese yemwe dzina yake ilibe kugumanika m’bukhu ya moyo, adathusiwa mnyanja ya moto.’ Vimwevi vinkuwonesa kuti wanthu osabvera mwawa adzachenekewe. Koma wanthu azinji maninge adzabvere Yahova akambadzayesewa na Satana. Vikadzakhala teno, Yahova adzachitise kuti madzina ya wanthu mwawa yakhaliretu m’bukhu ya moyo.
MU ‘NTHAWE YA MAPETO’
17. Ko Danieli adauziwa kuti nchani chidzachitike muntsiku zomalizira? (Danieli 12:4, 8-10)
17 Ni vabwino maninge kuganizira vinthu vatinkudikhira kutsogolo. Koma Danieli adauziwa pomwe vinthu vodikana maninge polewa va ‘nthawe ya mapeto ino.’ (Lewengani Danieli 12:4, 8-10; 2 Tim. 3:1-5) Mngelo adauza Danieli kuti: ‘Wanthu adzadziwe vinthu vizinji.’ Atumiki wa Mulungu ndiwo ankubvesa bwinobwino mawu mwaya yomwe yadalewewa kalekale. Mngelo adalewa pomwe kuti: ‘Wanthu woipa adzachite vinthu voipa ndipo palibe woipa ne m’bodzi wati adzakwanise kubvesa mawu mwaya.’
18. Ko nchani chati chichitikire wanthu woipa manjemanje?
18 Ntsiku zino, makhalidwe ya wanthu woipa yakundoyenda yachiipiraipira. (Mal. 3:14, 15) Koma manjemanje Yesu aweruze kuti padzawoneke kusiyana pakati pa wanthu omwe ali ninge mbuzi na wanthu omwe ali ninge nkhosa. (Mat. 25:31-33) Wanthu woipa mwawa adzapulumukelini pachisautso chikulu ndipo adzamukisiwelini kuti akhale mudziko inyowani. Madzina yawo yadzakhalemolini ‘m’bukhu yachikumbuso’ yofotokozedwa pa Malaki 3:16.
19. Ko ino ni nthawe yofunika kuyesesa kuchita chani, ndipo ndawa chani? (Malaki 3:16-18)
19 Ino ndiyo nthawe yoyesesa kuchita vabwino kuti osati tikhale mugulu ya wanthu woipa. (Lewengani Malaki 3:16-18.) Yahova ankuunganidza wanthu omwe ali ninge ‘chuma chapadera’ kwa iye. Isepano tifunambo kukhala wanthu wapadera kwa Yahova.
Vidzakhale vokomedza maninge kuona Danieli, azishamwali wathu na anango azinji ‘ankumukisiwa’ mudziko inyowani! (Onani ndime 20)
20. Ko Danieli adapolomisiwa chinthu chomalizira chiponi, ndipo ndawa chani imwepo munashungu yodzawona kukwanirisika kwake?
20 Tinkukhala munthawe yapadera. Koma kutsogolo uku kuchitike pomwe vinthu vinango kuposha pamwapa. Manjemanje tiwone kuchenekewa kwa wanthu woipa. Ndipo patsogolo pake, tidzawone kukwanirisika kwa vomwe Yahova adauza Danieli kuti: ‘Iwepo udzamuke kuti utambire mbali yako kumapeto kwa ntsiku zimwezo.’ (Dan. 12:13) Ko imwepo munashungu yakudzawona Danieli ‘wamukisiwa’ nkuyamba pomwe kukhala na anzake? Peno nteno, chitani vose vamungakwanise kuti mukhale wokhulupirika kwa Yahova ndipo mukateno, Yahova adzanembe dzina yanu m’bukhu ya moyo ndipo idzapitirize kukhalamo.
NYIMBO NA. 80 “Talawani Ndipo Muwona Kuti Yehova Ndi Wabwino”
^ Munkhani ino, tinkuchinja momwe tingaibvera lemba ya Danieli 12:2, 3 yomwe inkulewa va basa ikulu yopfunzisa wanthu. Tiwone kuti basa mwiyi idzachitike nthawe yanyi ndipo ni mbani wati adzaiphate. Ndipo tiwone pomwe momwe basa mwiyi idzakonzekeresere wanthu ku chiyeso chomalizira chomwe chidzachitike kumapeto kwa utongi wa magole 1000 wa Yesu.
^ Vinkuwoneka kuti wanthu omwe adafa ali wokhulupirika muntsiku zomalizira zino, ndiwo wati adzakhale woyamba kumukisiwa. Ndipo adzapitirize kumukisa wanthu pakuyendera m’badwo. Vimwevi vidzathandize kuti wanthu womukisiwa ambadzatambiriwe na anzawo omwe adziwana nawo kale. Malemba yafotokoza mobveka bwino kuti wanthu woyenda kudzulu amukisiwa ‘mwadongosolo’ ndipo ndimo mwati vidzakhalirembo na wanthu womukisiwa padziko yapasi.—1 Akor. 14:33; 15:23.
^ Pamwapa tinkuchinja kabvekesedwe posiyanisa vomwe tidafotokoza m’bukhu yakuti Samalani Ulosi wa Danieli! msolo 17, na mu Nsanja ya Olonda ya 1 Julho, 1987, tsa. 21-25.
^ Kusiyana komwe kulipo pakati pa mawu yakuti ‘olungama’ na ‘osalungama’ yogumanika pa Machitidwe 24:15 na mawu yakuti ‘omwe adachita vabwino’ na ‘omwe adachita voipa’ yogumanika pa Yohane 5:29, ni kwakuti vochita vimwivi adavichita akanati kufa.
