1. Kal kusas interesanti ku bu sta ku presa di bin oja duranti Renansa di Mil Anu?

 I NA sedu un dia garandi dimas, ora ku resureison kumsa na Tera duranti Renansa di Mil Anu di Kristu! Tudu jintis ku pirdi kilis ke ama, sta ku presa di oja elis mas. I asin ku Jeova ta sinti tambi. (Jo 14:15) Imaẑina kontentamentu ku tudu jintis na tene ora ke oja kilis ke ama lantandadu. Suma ku no oja na studu ku pasa, jintis “bons”, ku se nomi skirbidu na livru di bibus, “na lanta pa vida.” (At 24:15; Jon 5:29) Talves manga di kilis ku no ama na sta entri kilis ku na lantandadu puku tempu dipus di Armajedon. * Tambi, jintis “maus”, ku sedu, kilis ku ka tene manga di oportunidadi di kunsi Jeova o di sirbil ku fidelidadi antis de muri, na “lanta pa kondenason” o julgamentu.

2-3. (a) Suma ki faladu na Isaias 11:9, 10, kal programa garandi di nsinu ku na fasidu ku nunka ciga di ojadu? (b) Ke ku no na bin fala del nes studu?

² Tudu kilis ku na lantandadu na pirsisa di nsinadu. (Isa 26:9; 61:11) Pa kila, i pirsis pa i fasidu un programa garandi di nsinu ku nunka ciga di ojadu. (Lei Isaias 11:9, 10.) Pabia di ke? Pabia, jintis mau ku na lantandadu na pirsisa di aprindi aserka di Jesus Kristu, aserka di Renu di Deus, di sakrifisiu di resgati di Jesus ku importansia  di nomi di Jeova i pabia ki el son ku tene diritu di manda. Te mesmu jintis bon na pirsisa di nsinadu puku-puku, pa sibi kuma ku Jeova nsina si povu aserka di ke ki misti pa Tera. Alguns des jintis fiel muri manga di tempu antis di Biblia kaba skirbidu. Tantu jintis mau suma jintis bon na tene manga di kusas di aprindi.

³ Nes studu no na bai fala des purguntas: Kuma ku es programa garandi di nsinu na fasidu? Kuma ku reason di jintis pa es tarbaju, na juda pa sibi si kontra se nomi, na fika pa sempri na livru di bibus o nau? I importanti pa no sibi respostas des purguntas. Suma ku no na bin oja, alguns profesias interesanti ku sta na livru di Daniel ku Apokalipsi na judanu tene un ntindimentu mas klaru di ke ku na kontisi, ora ku kilis ku muri lantandadu. Purmeru, no na jubi kusas interesanti ku faladuba ja del na profesia di Daniel 12:1, 2.

4-5. Ke ku Daniel 12:1 fala aserka di tempu di fin?

⁴ Lei Daniel 12:1. Livru di Daniel falanu na kal ordi ku kusas interesanti na kontisi na tempu di fin. Pur isemplu, Daniel 12:1 mostra kuma Migel, ku sedu Jesus Kristu, ‘ku ta guarda povu di Deus, na lanta.’ Es parti di profesia kumsa ku kumpri na 1914, oca Jesus nomiadu suma Rei di Renu di Deus.

⁵ Ma, Daniel falaba tambi kuma Jesus na bin “lanta” na “tempu di garandi sufrimentu, ku nunka ka tenba disna ku nasons ten te na ki dias.” Es “tempu di garandi sufrimentu” i “garandi foronta”, ku faladu del na Mateus 24:21. Jesus lanta, o aẑi pa difindi povu di Deus na fin des tempu di garandi sufrimentu, ku sedu, na Armajedon. Livru di Apokalipsi fala delis, suma “garandi multidon” ku bin di “garandi pirsigison” o garandi tribulason. — Apok 7:9, 14.

6. Ke ku kontisi dipus ku garandi multidon salba di garandi tribulason? Bu pudi splika. (Bu pudi jubi tambi nes Sintinela “Purguntas di kilis ku ta lei no publikasons” aserka di resureison pa vivi na Tera.)

⁶ Lei Daniel 12:2. Ke ku kontisi dipus ku garandi multidon salba des tempu di garandi sufrimentu? Es profesia ka sta na fala di resureison simboliku, ku misti fala servus di Deus volta vivi mas na sintidu spiritual, kusa ku kontisi duranti fin de tempu, suma ku no ntindiba. * En ves di kila, es palabras na fala di resureison di kilis ku muri, ku na bin kontisi na nobu mundu. Ke ku manda no fala kila? Na linguas ku Biblia skirbiduba nel na kumsada, palabra “con” usadu tantu na Jo 17:16 suma na Daniel 12:2. E ku manda no pudi fala kuma, Daniel 12:2 na fala di kilis ku na bin lantandadu na Tera. Es na bin kontisi dipus di fin de tempu i dipus di gera di Armajedon.

7. (a) Na kal sintidu ku alguns na bin lantandadu pa “vida ku ka ta kaba”? (b) Pabia ki sedu “minjor resureison”?

⁷ Ke ku Daniel 12:2 misti fala, oca i fala kuma alguns na bin lantandadu pa “vida ku ka ta kaba”? I signifika kuma, kilis ku lantandadu i ku kunsi o kontinua kunsi i obdisi Jeova ku Jesus duranti mil anu, na bin tene vida ku ka ta kaba. (Jon 17:3) Es na sedu “minjor  resureison” di ki kil ku kontisi ku alguns jintis na pasadu. (Eb 11:35) Pabia di ke? Pabia es jintis ku lantandadu na pasadu bin kaba pa muri.

8. Kuma ku utrus na lantandadu “pa borgoña ku disprezu ku ka ta kaba”?

⁸ Ma, i ka tudu kilis ku lantandadu ku na seta programa di nsinu di Jeova. Profesia di Daniel fala kuma alguns na lantandadu “pa borgoña ku disprezu ku ka ta kaba.” Suma e na bin mostra un atitudi rebeldi, se nomi ka na skirbidu na livru di bibus, i e ka na tene vida ku ka ta kaba. En ves di kila, e na bin risibi “disprezu ku ka ta kaba”, o e na kabadu ku el. Asin, Daniel 12:2 sta na fala di ke ku na bin kontisi ku tudu kilis ku na bin lantandadu. Es na basia na ke ke fasi dipus ke lantandadu. * (Apok 20:12) Alguns na tene vida ku ka ta kaba, utrus ka na tenel.

9-10. Ke mas ku na kontisi dipus di garandi tribulason, i ba kin ku “na lampra suma lus di seu”?

⁹ Lei Daniel 12:3. Ke mas ku na bin kontisi dipus di “tempu di garandi sufrimentu”? Alen di ke ku faladu na Daniel 12:2, versikulu 3 fala di utru kusa ku na kontisi dipus di garandi tribulason.

¹⁰ Ba kin ku “na lampra suma lus di seu”? Mateus 13:43 judanu diskubri i ba kin. I fala sin: “Na ki tempu jinti justu na lampra suma sol na renu di se Pape.” (Anos ku pui italiku.) Na kontestu des palabras, Jesus staba na fala di “kilis ku pertensi renu di Deus”, si ermons unjidus, ku na bin sirbi ku el na Renu di seu. (Mat 13:38) Pa kila, Daniel 12:3 sta na fala di unjidus ku tarbaju ke na bin fasi duranti Renansa di Mil Anu.

11-12. Kal tarbaju ku 144.000 na fasi duranti mil anu?

¹¹ Kuma ku unjidus na bin “gia manga di jinti pa e yanda diritu”? Unjidus na tarbaja juntu ku Jesus Kristu, pa orienta programa di nsinu ku na bin fasidu li na Tera duranti mil anu. 144.000 ka na rena so suma reis, ma tambi e na sirbi suma saserdotis. (Apok 1:6; 5:10; 20:6) Asin, e na juda ‘na kura jinti di tudu nasons’, i e na juda jintis puku-puku pa e sedu perfeitu mas. (Apok 22:1, 2; Eze 47:12) I na sedu un kontentamentu garandi pa unjidus!

¹² Ba kin ku na sta entri “manga di jinti” ku na giadu pa yanda diritu? Es na nklui kilis ku na lantandadu, tambi kilis ku na salva na Armajedon juntu ku mininus ku pudi bin padidu na nobu mundu. Na fin di mil anu, tudu kilis ku na vivi na Tera na sedu perfeitu. Kal tempu ku se nomi na skirbidu pa sempri ku kaneta na livru di bibus nau ku lapis?

13-14. Ke ku tudu jintis perfeitu na Tera pirsisa di fasi antis de risibi vida ku ka ta kaba?

¹³ No dibi di lembra di kuma, sedu perfeitu ka signifika di kuma algin na tene logu vida ku ka ta kaba. Pensa na Adon ku Eva. E seduba perfeitu, ma e pirsisaba di mostra se obdiensia pa Jeova Deus antis de risibi vida ku ka ta kaba. Infilismenti, e falia na obdisi Jeova. — Rom 5:12.

¹⁴ Kal ku na sedu situason di kilis ku  na sta na Tera na fin di mil anu? Tudu jintis na sedu perfeitu. Sera ki tudu es jintis perfeitu na apoia renansa di Jeova pa sempri? O sera ki alguns na fasi suma Adon ku Eva, ku seduba perfeitu ma e torna infiel? Es purguntas pirsisa di ruspundidu, ma di kal manera ke na ruspundidu?

15-16. (a) Kal tempu ku tudu jintis na tene oportunidadi di mostra se fidelidadi pa Jeova? (b) Kal ku na sedu rusultadu di ultimu testi?

¹⁵ Satanas na prindidu pa mil anu. Duranti ki tempu, i ka na pudi ngana ningin. Ma, na fin di mil anu, Satanas na tiradu na prison. Dipus i na tenta ngana jintis perfeitu. Duranti ultimu testi, tudu jintis perfeitu na Tera na tene oportunidadi di mostra di manera klaru, si kontra e rispita nomi di Deus i apoia si renansa. (Apok 20:7-10) Ke ku kada kin na fasi ki tempu, na mostra si kontra si nomi dibi di skirbidu pa sempri na livru di bibus.

¹⁶ Biblia kontanu di kuma, alguns jintis na sedu infiel suma Adon ku Eva, i e na nega renansa di Jeova. Ke ku na kontisi ku elis? Apokalipsi 20:15 fala sin: “Tudu kil ku si nomi ka ojadu skritu na libru ku tene nomi di bibus, i botadu na lagua di fugu.” Es jintis ku rebela na  kabadu ku el pa sempri. Ma, maioria di jintis perfeitu na pasa na ultimu testi. Asin, se nomi na skirbidu pa sempri na livru di bibus.

17. Ke ku anju fala Daniel di kuma i na kontisi na no tempu? (Daniel 12:4, 8-10)

¹⁷ I interesanti pensa nes kusas ku na bin kontisi! Ma, anju konta Daniel tambi alguns informason importanti aserka di “kabantada di tempu”, ku sedu, no tempu. (Lei Daniel 12:4, 8-10; 2 Tim 3:1-5) Anju fala Daniel: “Manga di jinti na kuri di un ladu pa utru pa buska buri ntindimentu.” Povu di Deus na ntindi diritu palabras profetiku ku sta na livru di Daniel. Anju fala mas di kuma, na ki tempu “disobdientis na kontinua sedu disobdienti; nin un delis ka na ntindi.”

18. Ke ku na kontisi ku jintis mau nin i ka na tarda?

¹⁸ Aos i ta parsi kuma jintis mau ka ta kastigadu pa se mau komportamentu. (Mal 3:14, 15) Ma, i ka na tarda Jesus na julga jintis ku parsi ku kabra, i na sipara elis di kilis ku parsi ku karnel. (Mat 25: 31-33) Es jintis mau ka na salva di garandi tribulason, nin e ka na  lantandadu pa vivi na nobu mundu. Se nomi ka na sta na “libru di lembransa” ku faladu del na Malakias 3:16.

19. Ke ku no dibi di fasi gosi, i pabia di ke? (Malakias 3:16-18)

¹⁹ Es i tempu pa no mostra di kuma, no ka sta na metadi di jintis mau. (Lei Malakias 3:16-18.) Jeova sta na junta kilis ki ta oja suma “rikesa spesial”, ku sedu, kilis ku tene balur pa rel. Ku sertesa, no misti sta entri ki jintis.

20. Kal ki ultimu purmesa ku Daniel fasidu, i ke ku manda bu sta ku presa di oja kumprimentu des purmesa?

²⁰ Na bardadi, no sta na vivi na un tempu interesanti dimas. Ma, i ten inda kusas mas interesanti ku na bin kontisi, nin i ka na tarda. I ka na tarda, no na bin oja fin di tudu kusas mau. Dipus des, no na oja kumprimentu di purmesa ku Jeova fasi Daniel: “Na kabantada di tempu, bu na lanta pa toma bu yardansa.” (Dan 12:13) Sera ki bu sta ku presa pa oja tempu ku Daniel juntu ku tudu kilis ku bu ama, na “lanta” mas pa vivi? Si sedu asin, fasi tudu ku bu pudi pa sedu fiel desdi gosi, i bu pudi tene sertesa di kuma, bu nomi na kontinua skirbidu na livru di bibus di Jeova.