1. Bintu bihi by’okushagalusa rhuli rhwalindirira byayish’iba omu Burhegesi bwa Yezu bw’Emyaka Cihumbi?

 OLUSIKU obufûke bwarhangira hanw’igulu omu Burhegesi bwa Yezu bw’Emyaka Cihumbi lwayish’iba lusiku lwinja bwenene! Abafîrirwe n’abazigirwa babo, boshi bali balindirira okucib’ibabona. Na Yehova naye ali alindirira ako kasanzi. (Ayu. 14:15) Orhanye kunganaci ngasi muntu ayish’ishagaluka hano acib’ibuganana n’abazigirwa bage bafîre. Nk’oku rhwayigaga omu cigabi c’embere, “abashinganyanya,” k’okuderha abantu amazino gabo gayandisirwe omu citabu c’obuzine, “bafûkire obuzine.” (Ebj. 24:15; Yn. 5:29) Nkaba banji b’omu bazigirwa birhu bayish’iba omu bantu bayish’irhang’ifûlwa hanw’igulu. * Kandi, “abarhali bashinganyanya,” kwa lwiganyo, abantu barhapataga obulyo bw’okumanya Yehova erhi kumukolera embere bafê, “bafûkire olubanja.”

2-3. (a) Nk’oku biyerekinwe omu Izaya 11:9, 10, mukolo guhi munene bwenene gw’okuyigiriza gwayish’ijirwa gurhasag’ijirwa bundi? (b) Bici rhwaganirira mw’eci cigabi?

² Abo bantu boshi bayish’ifûlwa bashinganine bayigirizibwe. (Iz. 26:9; 61:11) Co cirhumire, byayish’ihûna okujira omukolo munene bwenene gw’okuyigiriza gurhasag’ijirwa agandi mango goshi. (Osome Izaya 11:9, 10.) Bulya gurhi? Ecirhumire cirhanzi, abarhali bashinganyanya bayish’ifûlwa bashinganine bayige okubiyerekire Yezu Kristu, omupango gw’Obwami, engombôlo, n’obulagirire bw’izino lya Yehova na bulya gurhi  yene ogwerhe ehaki y’okurhegeka. Ciru n’abashinganyanya bakwanine bayigirizibwe ebi Yehova agendekire ayigiriza abantu bage bunyi-bunyi lugenda omuhigo gwage okubiyerekire igulu. Baguma na baguma b’omu bakozi bishwekerezi ba Yehova bafîre myaka minji bwenene embere Ebibliya ehwe okuyandikwa yoshi. Abarhali bashinganyanya n’abashinganyanya boshi bayish’iba na binji bya kuyiga.

³ Mw’eci cigabi, rhwaganirira aga madoso: Gurhi ogo mukolo munene bwenene gw’okuyigiriza gwayish’ihikirizibwamwo? Oku abantu bayish’ijira hano bayigirizibwa, gurhi kwarhuma amazino gabo gayandikwa erhi garhayandikwe omu citabu c’obuzine? Amashuzo kw’ago madoso gali ga bulagirire bwenene kuli rhwe ene. Nk’oku rhwabona, bulebi buguma na buguma buli omu citabu ca Daniyeli n’ec’Amafulûlo bwarhurhabala rhuhugûkwe bwinja ebyayish’iba hano abantu bafîre bafûlwa. Burhangiriza, rhuganirire ebintu by’okushagalusa byayish’ijirikana bilebirwe omu lwandiko lwa Daniyeli 12:1, 2.

4-5. Bici olwandiko lwa Daniyeli 12:1 luyerekine lugenda amango ga buzinda?

⁴ Osome Daniyeli 12:1. Ecitabu ca Daniyeli ciyerekine entondekanye ebintu by’okushagalusa byajirikanamwo omu mango ga buzinda. Kwa lwiganyo, olwandiko lwa Daniyeli 12:1 luyerekine oku Mikaheli, k’okuderha Yezu Kristu, ‘anayimange ly’alikûza olubaga [lwa Nnâmahanga].’ Eco cigabi c’obo bulebi carhonderaga okuhikirizibwa omu mwaka gwa 1914 erhi Yezu ajirwa Mwami w’Obwami bwa Nnâmahanga bw’omu mpingu.

⁵ Cikone, kandi Daniyeli abwizirwe oku Yezu ‘akayimanzire’ omu ‘mango g’amalumwa galya garhasag’ibonekana bundi kurhenga ishanja linasingwa [erhi, lirhondezibwa] kuhika muli agala mango.’ Ago ‘mango g’amalumwa’ go “malibuko [madarhi]” gaganirirwe omu Mateyo 24:21. Yezu ayimanga erhi kuhalira olubaga lwa Nnâmahanga, oku buzinda bw’ago mango g’amalumwa, k’okuderha okw’ivita lya Harmagedoni. Omu citabu c’Amafulûlo, abo bantu bahamagirwe ‘hitû hy’abantu bayish’irhenga omu malibuko madârhi.’​—Maf. 7:9, 14.

6. Bici byayish’iba enyuma z’ehitû hy’abantu okucunguka amalibuko madarhi? Ohugûle. (Olole n’“Amadoso g’Abantu Basoma Ebitabu Birhu” galimw’eyi gazeti lugenda obufûke bwayish’ijirwa hanw’igulu.)

⁶ Osome Daniyeli 12:2, Mashi Bible. Bici byayish’iba enyuma z’ehitû hy’abantu okucunguka ago mango g’amalumwa? Obo bulebi burhaganiriri obufûke bw’olwiganyo, erhi bufûke bw’ekiroho bw’abakozi ba Nnâmahanga, bwakajirikine omu nsiku nzinda, nk’oku rhwal’ihugûsirwe embere. * Lubero n’oko, ezo nderho ziganirire obufûke bw’abafîre bwajirikana omw’igulu lihyahya lyayisha. Bulya gurhi rhudesire ntyo? Omu ndimi ntangiriza Ebibliya yayandikagwamwo, oluderho “budaka” lukolesibwe omu Ayubu 17:16 n’omu Daniyeli 12:2. Co cirhumire, rhwanaderha oku olwandiko lwa Daniyeli 12:2 luganirire obufûke bw’okunali bwajirwa enyuma z’okuhwa kw’ensiku nzinda n’enyuma z’ivita lya Harmagedoni.

7. (a) Omu njira nci bantu baguma na baguma banafûkiremwo “obuzine bw’ensiku n’amango”? (b) Bulya gurhi obo buli ‘bufûke bwinja kulusha’?

⁷ Cikone, bicigi olwandiko lwa Daniyeli 12:2 luhugwîre, omu kuderha oku baguma bayish’ifûkira “obuzine bw’ensiku n’amango”? Luhugwîre oku, abantu bayish’ifûlwa  n’okuhikira okumanya Yehova na Yezu, erhi kugendekera babamanya, n’okubarhumikira omu myaka 1 000, buzinda bayish’ihâbwa obuzine bw’ensiku n’amango. (Yn. 17:3) Obo bwayish’iba ‘bufûke bwinja kulusha’ obufûke bwa bantu belebe bafûkaga omu mango ga mira. (Hb. 11:35, Mashi Bible) Bulya gurhi? Bulya abo bantu barhali bimana bafûkaga omu mango ga mîra bacibir’ifâ.

8. Gurhi bantu baguma bayish’ifûka ‘n’okugayaguzibwa emyaka n’emyaka’?

⁸ Cikone, arhali abantu banafûke boshi bayish’iyemera okuyigirizibwa na Yehova. Obulebi bwa Daniyeli budesire oku abandi bayish’ifûka “n’enshonyi zibagwarhe n’okugayaguzibwa kw’emyaka n’emyaka.” Bulya banayerekane iroho ly’obugoma, amazino gabo garhayish’iyandikwe omu citabu c’obuzine barhakanahâbwa obuzine bw’ensiku n’amango. Cikone, ‘banagayaguzibwe emyaka n’emyaka,’ erhi kuhererekezibwa. Co cirhumire, olwandiko lwa Daniyeli 12:2 luganirire ebyayish’ihikira buzinda abantu boshi bayish’ifûlwa enyanya z’ebi bajira enyuma z’obufûke bwabo. * (Maf. 20:12) Baguma banahâbwe obuzine bw’ensiku n’amango; cikone abandi barhakabuhâbwa.

9-10. Bindi bici byayish’ijirikana enyuma z’amalibuko madarhi, na bandi “bayish’ilangala nka bumoleke bw’omu malunga”?

⁹ Osome Daniyeli 12:3. Bindi bici byayish’ijirikana enyuma z’‘amango g’amalumwa’? Ahanyuma na Daniyeli 12:2, omulongo gwa 3 nago guganirire kantu kalebe kayish’ijirikana enyuma z’amalibuko madarhi.

¹⁰ Bandi “bayish’ilangala nka bumoleke bw’omu malunga”? Rhwanabona ishuzo omu nderho za Yezu ziri omu Mateyo 13:43. Olo lwandiko ludesire oku ago mango “abinja [abashinganyanya] banalangashane nka izuba omu Bwami bw’Ishe wabo.” Omu milongo eri embere ly’ezo nderho, Yezu akag’iganirira ‘abana b’Obwami,’ k’okuderha bene wabo bashige amavurha, bayish’irhegeka haguma naye omu Bwami bw’empingu. (Mt. 13:38) Co cirhumire, olwandiko lwa Daniyeli 12:3 lushinganine lube luganirire abashige amavurha n’omukolo bayish’ijira omu Burhegesi bw’Emyaka Cihumbi.

11-12. Mukolo muci Abakristu bashige amavurha 144 000 bayish’ijira omu myaka 1 000?

¹¹ Gurhi abashige amavurha ‘bayish’imanyisamwo abandi enjira y’obushinganyanya’? Abashige amavurha bayish’ikola kwa hofi-hofi haguma na Yezu Kristu lyo balongoza omukolo gw’okuyigiriza gwayish’ijirwa hanw’igulu omu myaka 1 000. Abo bashige amavurha 144 000 barhayish’ibe bami kone cikone kandi bayish’iba bakuhani. (Maf. 1:6; 5:10; 20:6) Oko kwarhuma bayish’irhabala omu ‘kufumya embaga,’ k’okuderha oku bayish’irhabala bene bantu bunyi-bunyi bahikire aha baba bimana. (Maf. 22:1, 2, Mashi Bible; Eze. 47:12) Oko kwayish’ilerhera Abakristu bashige amavurha omwishingo munji!

¹² Bandi bayish’iba omu “bandi” erhi banji bamanyisibwa enjira y’obushinganyanya? Abo bayish’ihiramwo abantu bayish’ifûlwa n’abantu bayokoka ivita lya Harmagedoni haguma n’abana boshi bayish’iburhwa omw’igulu lihyahya. Oku buzinda bw’emyaka 1 000, abantu boshi bayish’iba balamire hanw’igulu bayish’iba bimana. Mangacigi amazino gabo gayish’iyandikwa loshi-loshi n’ebike omu citabu c’obuzine ahali h’okuyandikwa n’ekreyo?

13-14. Bici abantu bimana boshi bayish’iba bali balama hanw’igulu bashinganine bajire embere bahâbwe obuzine bw’ensiku n’amango?

¹³ Rhushinganine rhukengere oku okuba mwimana kone arhali k’okuderha oku omuntu apata obuzine bw’ensiku n’amango. Orhanye kuli Adamu na Eva. Bali bimana, cikone bal’ishinganine bagendekere barhumikira Yehova Nnâmahanga lyo bahâbwa obuzine bw’ensiku n’amango. Cikoki, eby’okugayisa, bayabirwa okumurhumikira.​—Rm. 5:12.

¹⁴ Gurhi abantu bayish’iba bali balama hanw’igulu bayish’iba bayosire oku buzinda bw’emyaka 1 000? Boshi bayish’iba bakola bali bimana. K’abo bantu bimana boshi bayish’ilunga okuboko oburhegesi bwa Yehova ensiku n’amango? Erhi, ka baguma mulibo bayish’iba aka Adamu na Eva bayabiragwa okugendekera babêra bishwekerezi kuli Yehova, ciru akaba bali bimana? Ago madoso gayish’ishuzibwa, cikone gurhi gashuzibwamwo?

15-16. (a) Mangaci abantu boshi bayish’ihâbwa obulyo bw’okuyerekana obwishwekerezi bwabo kuli Yehova? (b) Gurhi byayish’iba oku buzinda bw’er’irhangulo?

¹⁵ Shetani ayish’iba ali omu mpamikwa omu myaka 1 000. Muli ago mango, arhakaba n’obuhashe bw’okuhabula omuntu yeshi-yeshi. Cikone, oku buzinda bw’eyo myaka 1 000, Shetani ayish’ishwekûlwa mw’eyo mpamikwa yage. Ago mango ayish’ijira okwage koshi ly’arheba abantu bimana.  Amango g’er’irhangulo, abantu bimana boshi hanw’igulu bayish’iba n’obulyo bw’okuyerekana n’obwalagale erhi bakenzire izino lya Nnâmahanga n’okulunga okuboko oburhegesi bwage. (Maf. 20:7-10) Oku ngasi muntu ayish’ijira ago mango ko kwarhuma izino lyage lyayandikwa loshi-loshi erhi lirhayandikwe omu citabu c’obuzine.

¹⁶ Mubalè mulebe gw’abantu gurhamanyikini bayish’iba aka Adamu na Eva, omu kulahira oburhegesi bwa Yehova. Bici byayish’ibahikira? Olwandiko lw’Amafulûlo 20:15, Mashi Bible, lurhubwizire ntya: “Ngasi yeshi orhâli muyandike omu citabu c’obuzine, bamukweba mw’eyo nyenga [nyanja] y’omuliro.” Kobinali, abo bantu bagoma bayish’ihererekezibwa loshi-loshi barhakanacihaba bundi. Cikone, bantu banji bimana bayish’ihima er’irhangulo lya buzinda. Ago mango, amazino gabo gayish’iyandikwa loshi-loshi omu citabu c’obuzine.

17. Bici malahika abwizire Daniyeli byakabire muli gano mango girhu? (Daniyeli 12:4, 8-10)

¹⁷ Okurhanya lugenda ebyo byayish’iba omu mango gayisha kurhushagalusize bwenene! Cikone kandi, malahika amanyisize Daniyeli myanzi milebe y’obulagirire okubiyerekire gano mango girhu, k’okuderha  “mango ga buzinda.” (Osome Daniyeli 12:4, 8-10, Mashi Bible; 2 Tm. 3:1-5) Malahika abwira Daniyeli oku “obwenge [bumanye bw’okunali, NWT] bwanayushûke.” Kobinali, abakozi ba Nnâmahanga bakahugûsirwe bwinja-bwinja ebinwa by’obulebi biri omu citabu ca Daniyeli. Malahika ayushula oku muli gano mango girhu, “ababi balya barhâkayumva [bakagendekire] okujira amabi.”

18. Bici byayish’ihikira abantu babi?

¹⁸ Ene, byanabonekana nk’abantu babi barhali bahâbwa obuhane enyanya z’olugenzi lwabo lubi. (Mal. 3:14, 15) Cikone, hano hofi-hofi Yezu atwira olubanja abantu bashushanyizibwe n’empene n’okubaberula n’abantu bashushanyizibwe n’ebibuzi. (Mt. 25:31-33) Abo bantu babi barhayish’iyokoke amalibuko madarhi barhanafûlwe lyo balama omw’igulu lihyahya. Amazino gabo garhayish’ibe omu “citabu c’okukengeza” ciganirirwe omu Malakiya 3:16, NWT.

19. Bici rhushiganine rhujire ene, na bulya gurhi? (Malakiya 3:16-18)

¹⁹ Kano ko kasanzi k’okuyerekana oku rhurhali egarhi k’abantu babi. (Osome Malakiya 3:16-18.) Yehova ali agusanya abantu ali abona oku buli “buhirhi bwage yene [bwago-bwago, NWT],” k’okuderha balya abona oku bali ba ngulo ndarhi kuli ye. Kobinali, rhulonzize rhube baguma ba mulibo.

20. Ciragane cihi cizinda Daniyeli ahâbirwe, na bulya gurhi oli walindirira okuhikirizibwa kw’eco ciragane?

²⁰ Kobinali, rhuli rhwalama omu kasanzi k’okushagalusa. Cikone, ebintu by’okusomeza bwenene biri hofi bijirikane. Hano hofi-hofi, rhwabona gurhi obubi boshi bwahwa. Enyuma z’aho, rhwabona gurhi eci ciragane Yehova ahâga Daniyeli cahikirizibwa: “Wanayish’iyimanga ohâbwe oluhembo lwawe aha buzinda bw’ensiku.” (Dan. 12:13) K’oli wacifinja okubona amango Daniyeli, haguma n’abazigirwa bawe bafîre, ‘bacib’iyimanga’? Akaba ntyo kobiri, ojire okwawe koshi ly’ogendekera wabêra mwishwekerezi, n’erhi wakajira ntyo wanayemera n’obwalagale oku izino lyawe lyagendekera okuba liyandike omu citabu ca Yehova c’obuzine.