DJAMBA DJƐ WEKELO 40
‘Waakomɛ anto efula lá sii’
‘Waakomɛ anto efula lá sii, wangɔpɛta nghayi nghayi etengo tɔɔtɔ lotshinda lotshinda.’—DAN. 12:3.
YEEMBO 151 Nde angeta (lá Otetela)
LÁ YOPASƐ *
1. Akambo wa wɔlɔ wakɔnge watokongela lá winá w’Ɛlɔndjɛlɔ k’ɛnɔnyi kinunu?
ƆSƆ ngo osasa wongoyala lanɛ lá looko winá wɔ ekfundwelo yongowanga lá winá w’Ɛlɔndjɛlɔ k’ɛnɔnyi kinunu kɛ Kristo! Onto onkfumɔ wovusisá onto wɔnde wɔ ngandji angoyala l’oloko lukuluku djɛ ndɔɔwɛna lonkina. Ngo nghɔsɔ ndeke Yehova oyawokande. (Djɔ. 14:15) Kokanela osasa wongoyala l’anto ankfumɔ welá looko winá wɔ anto wawɔ wa ngandji yongokfundɔ. Etengo isɛnyi lá djamba djemboheta, ‘anto wa wɔlɔ’ wa wiina wawɔ wafunamaka lá onkanda wɔ lowiko, wangokfundɔ ‘ekfundwelo kɛ lowiko.’ (Ele. 24:15; Dj. 5:29) Mbala imɔtshi efula k’anto waso w’ɔkɔpaso wangoyala l’anteyi kɛ anto wa ntondo wangokfundɔ́ m’ɔkɔngɔ wɔ Armagɛdɔ. * Lonkina, ‘anto wapɔlɔ,’ waatawá mbamba kɛ wɔlɔ kɛ ndjewa Yehova kana kɛ ndookambela la nkɔmano nkfumɔ lá ntondo kɛ nyɔyi kɛwɔ, wangokfundɔ lá ‘ekfundwelo kɛ dombo.’
2-3. a) Etengo yɔmbɛnyɛ lá Izaya 11:9, 10, akambo wakɔnge wa yongolakanyɛ anto lá nonghanyi k’olakanyelo keleka ekekete lá ɔnkɔndɔ wɔ wana w’anto? b) Kɛkɔnge kɛ songoshishima lá djamba djɛnɛ?
2 Anto ankfumɔ wangokfundɔ́ wasɔ wangoyala la djonyi djɛ ndakanyema. (Iza. 26:9; 61:11) Djɛkondeke nonghanyi keleka ekekete k’olakanyelo ketananghemaká ntondo l’ɔkɔndɔ wɔ wana w’anto kengonanghema. (Wala Izaya 11:9, 10.) Lamo? Ntondontondo, anto wapɔlɔ wangokfundɔ́ wangoyala la djonyi djɛ ndjeka akambo walendana la Yeso Kristo, Onkfumi wɔ Ndjambe, olambo w’oshinga wɔ mbendo wɔ Yeso, edjinge woopó wɔ ndjonyi wolendana la djiina djɛ Yehova la lotshungɔ lɔnde lɔ ndɔndjɛ. Kaanga anto wa wɔlɔ wangoyala la djonyi djɛ ndjeka djɛ ndjewa wopo wɔ Yehova ndotisolaká ndambondambo ikanyi yeyalisá lande lá nkambo djɛ looko. Amɔtshi l’anteyi k’anto wa nkɔmano wasɔ wavɔka ilá efula lá ntondo k’otepela wɔ Yehova Bible nshiyɛ mfunama. Ayale anto wa pɔlɔ kana anto wa wɔlɔ, yankfumɔ wangoyala l’akambo efula wa ndjeka.
3 Lá djamba djɛnɛ, tongoshishima weepó wɛwɔlama wɛnɛ: Wopo wɔkɔnge nonghanyi k’olemo woleka ekekete wɔso yonghonanghema? Eposelo wɛkɔnge wengoyala l’olemo wɔsɔ lá kɛnɛ kelendana la otshikalelo wɔ lotshinda wɔ wiina w’anto l’onkanda wɔ lowiko kana lako? Nsakiso yɛ weepó wɛsɔ ilekɔ djonyi efula leso lɔɔko kɛnɛ. Etengo sɔngɛna, prɔfɛsi imɔtshi yɛ nkamɔ yel’onkanda wɔ Danyɛlɛ la wɔ Ndjiso ingotokotshɛ dj’iso nsipisoyɛ papoo kɛnɛ kenghonanghemá winá wɔ anto yongokfundɔ. Ntondontondo, nyontshɔ tokoshishima nkambo mɔtshi djɛ nkamɔ dj’iyantepela lá prɔfɛsi kɛ Danyɛlɛ 12:1, 2.
‘ANTO WALEKƆ́ L’ILƆ LÁ OTOKO . . . WANGOWETSHƆ’
4-5. Kɛkɔnge kɛ Danyɛlɛ 12:1 otepelande lá nkambo dj’etsho w’ekomo?
4 Wala Danyɛlɛ 12:1. Onkanda wɔ Danyɛlɛ nyɛnyɛka wopo wɔ akambo wa wɔlɔ wasɔ yongonanghema l’etsho w’ekomo. Ndjɔmbɔmba, Danyɛlɛ 12:1 nyɛnyɛka djɛ Mikayɛlɛ, ntepela ente Yeso Kristo, ‘nyemala lá wapɔ w’anto wa Ndjambe.’ Etenyi kɛ prɔfɛsi kɛsɔ kewangaka nkotshama lá 1914 winá wɔ Yeso ndakome Nkfumi kɛ Onkfumi wɔ Ndjambe wɔ l’olongo.
5 Koko, Danyɛlɛ atepelaka lonkina ante Yeso ‘anghemala’ lá ‘winá wɔ ndjolo ketananghemaka ntondo ntateyɛ má bango dj’andja tii winá wɔsɔ.’ ‘Winá wɔ ndjolo wɔsɔ’ oyɛwɔnde ‘ndjolo k’ekekete’ k’otepelawɔ lá Mateo 24:21. Yeso anghemala, kana angoseela enkambi wɛ Ndjambe, l’etena k’ekomo kɛ winá wɔ ndjolo kɛsɔ, ntepela ente lá Armagɛdɔ. Onkanda wɔ Ndjiso ndawetaka ante ‘oloyi w’ekekete w’anto womboyɛ má ndjolo k’ekekete.’—Ndj. 7:9, 14.
6. Kɛkɔnge kenghonanghemá m’ɔkɔngɔ wɔ oloyi w’ekekete w’anto mba ewiko lá ndjolo k’ekekete? Pakisola. (Lenda lonkina “Weepó w’antangi” welá numelo kɛnɛ lá nkambo dj’ekfundwelo kelá looko.)
6 Wala Danyɛlɛ 12:2. Kɛkɔnge kenghonanghemá m’ɔkɔngɔ wɔ oloyi w’ekekete w’anto mba ewiko lá ndjolo k’ekekete kɛsɔ? Prɔfɛsi kɛnɛ apatepela ekfundwelo kɛ djingingi kana owetshwelo welá nyuma wɔ enkambi wɛ Ndjambe wonanghemá l’etsho w’ekomo wɛnɛ, etengo isasipisoyɛká ntondo. * Koko, etepela wɛsɔ ndendanaka l’ekfundwelo k’anto wavwisá kengonanghemá l’andja wa bango wayaye. Ladjikɛnge otepelaso nghɔsɔ? Wakamba la itepela ‘otoko,’ lonkina lá Djɔbɔ 17:16 edjinge itepela yɛsɔ yelekɔ la nsakiso kɛkɔ kɛmɔ l’itepela ‘nketa.’ Nkambo djɛsɔ nyɛnyɛka ente, Danyɛlɛ 12:2 ndendanaka l’ekfundwelo kɛ nsɔsɔlɔ kenghonanghemá m’ɔkɔngɔ w’etsho w’ekomo nshila la m’ɔkɔngɔ wɔ mbandji k’Armagɛdɔ.
7. a) Wopo wɔkɔnge anto amɔtshi yongokfundɔ lá ‘ekfundwelo kɛ lowiko l’etshinda’? b) Lá wopo wɔkɔnge oyɛwɔ ‘ekfundwelo keleka wɔlɔ’?
7 Iya kɛkɔnge kɛ Danyɛlɛ 12:2 osakisolande winá w’otepelande ante, anto amɔtshi wangokfundɔ lá ‘ekfundwelo kɛ lowiko’? Kɛsɔ nsakisola ante anto wangokfundɔ́ edjinge wangewá kana wangokindjɛ ndjewa la nɛmɛyɛ Yehova nya Yeso lá ɛnɔnyi 1 000, wangowa lowiko l’etshinda l’ekomo. (Dj. 17:3) Ɔsɔ angoyala ‘ekfundwelo keleka wɔlɔ’ ndeka kɛ anto wakfundwisá l’etsho wemboheta. (Heb. 11:35) Lamo? Ladjikɛnde anto wa ntshamba djɛ djɔ wakfundwisá wasɔ wakalɔka mvɔ lonkina.
8. Lá wopo wɔkɔnge anto ankina yongokfundɔ ‘tá nsɔnyi la tá nyɔnyɔ kɛ lotshinda’?
8 Koko ape anto ankfumɔ wangokfundɔ́ ndeke longawola ndakanyema me Yehova. Prɔfɛsi kɛ Danyɛlɛ ntepelaka ante anto amɔtshi wangokfundɔ ‘tá nsɔnyi la tá nyɔnyɔ kɛ lotshinda.’ Ladjikɛnde wangoyala l’ikanyi y’ɔtɔmbɔkwɛlɔ, wiina wawɔ wapangofunama l’onkanda wɔ lowiko la wapangowa lowiko l’etshinda. Koko, wangowa ‘nyɔnyɔ kɛ lotshinda,’ ntepela ete etshitanelo. Djɛkondeke Danyɛlɛ 12:2 otepelande nde kɛnɛ kengokomela anto ankfumɔ wangokfundɔ́ lá nkilika akambo wa yonghonangha m’ɔkɔngɔ w’ekfundwelo kɛwɔ. * (Ndj. 20:12) Anto amɔtshi wangowa lowiko l’etshinda, koko ankina lako.
‘WAAKOMƐ ANTO EFULA LÁ SII’
9-10. Kɛkɔnge kenghonanghemá lonkina m’ɔkɔngɔ wɔ ndjolo k’ekekete, ko anto wakɔnge ‘wangɔpɛta nghayi nghayi etengo tɔɔtɔ tel’olongo’?
9 Wala Danyɛlɛ 12:3. Iya kɛkɔnge kenghonanghemá lonkina m’ɔkɔngɔ wɔ ‘winá wɔ ndjolo’ keyaye? Lá djiko djɛ Danyɛlɛ 12:2, vɛrse 3 ntepelaka nkambo djenghonanghemá m’ɔkɔngɔ wɔ ndjolo k’ekekete.
10 Anto wakɔnge ‘wangɔpɛtá nghayi nghayi etengo tɔɔtɔ tel’olongo’? Iso ntanaka ikanyi yɛ nkambo djɛsɔ l’etepela wɛ Yeso welekɔ́ lá Mateo 13:43: ‘Anto wa wɔlɔ wangɔpɛta etengo osase wɔ winá lá Onkfumi wɔ Papa kɛwɔ.’ Lá nkilika akambo wotepelawɔ má djiko la l’anse k’etepela wɛnɛ, Yeso atepelaki nkambo djɛ ‘wana w’Onkfumi,’ ntepela ente wananyɔ wande w’ankfutami y’avuta wangotokamba esanga lande l’Onkfumi wel’olongo. (Mat. 13:38) Djɛkondeke Danyɛlɛ 12:3 ndendanaka la ankfutami y’avuta edjinge l’olemo w’iyongotokamba lá Ɛlɔndjɛlɔ k’ɛnɔnyi kinunu.
Anto 144 000 wangokamba esanga la Yeso Kristo djɛ ndɔdjɛ olemo w’olakanyelo wonghonanghemá lá eleko k’ɛnɔnyi 1 000 (Lenda itenyi 11)
11-12. Olemo wɔkɔnge wongokambá anto 144 000 l’eleko k’ɛnɔnyi 1 000?
11 Wopo wɔkɔnge ankfutami y’avuta yongokomɛ ‘anto efula lá sii’? Ankfutami y’avuta wangokamba esanga la Yeso Kristo djɛ ndɔndjɛ nonghanyi k’olemo w’olakanyelo wongonanghemá lanɛ lá looko l’eleko k’ɛnɔnyi 1 000. Anto 144 000 wangɔlɔndjɛ etengo ankfumi la lonkina wangokamba etengo ankfundji. (Ndj. 1:6; 5:10; 20:6) Djɛkondeke, wangokotshɛ́ lá ‘ɔkɔnwɛlɔ w’ewila,’ ntepela ente wangotakotshɛ́ká anto ndambo ndambo dj’iwɔ nkoma djɔ. (Ndj. 22:1, 2; Ezk. 47:12) Ɔsɔngo osasa wongoyala l’ankfutami y’avuta!
12 Anto wakɔna wangoyala l’anteyi ‘k’anto efula wa yongokomɛ lá sii’? L’anteyi k’anto wasɔ ndeke longoyala edjinge anto wangokfundɔ́ la lonkina anto wangowika má Armagɛdɔ, esanga la wana wakoka ndowotshɔ l’andja wa bango. L’ekomo k’eleko k’ɛnɔnyi 1 000, anto ankfumɔ wangoyalá la lowiko lá looko wangoyala djɔ. Ya lá winá wɔkɔnge wiina wawɔ yongofunama lotshinda lotshinda l’onkanda wɔ lowiko la bikɛ koko ape la krɛyɔ?
OHEMBA W’EKOMO
13-14. Kɛkɔnge k’onto onkfumɔ wɔ djɔ wongoyala lanɛ lá looko oyɛnde ladjɛ nyɛnyɛ lá ntondo kɛ nde ndowa lowiko l’etshinda?
13 Iso ladjɛ mvungɔka ente ape onto amboyala djɔ, ko ente angowa ngo lowiko l’etshinda. Kokanela nkambo djɛ Adama nya Eva. Iwɔ wayalaki anto wa djɔ, koko wayalaka ladjɛ nyɛnyɛ dilɛmɛlɔ djɛwɔ te Yehova Ndjambe lá ntondo kɛ ndowa lowiko l’etshinda. Nkambo djɛ yɛnyi nde, iwɔ watalonga ndɔɔlɛmɛyɛ.—Ɔrɔ. 5:12.
14 Kɛkɔnge kengokomela anto wangoyala lá looko l’ekomo kɛ eleko k’ɛnɔnyi 1 000? Yankfumɔ wangokoma anto wa djɔ. Anto ankfumɔ wangoyalá djɔ wasɔ, wangokindjɛ nsuka ɛlɔndjɛlɔ kɛ Yehova lotshinda lotshinda? Ndo koko amɔtshi wangoyala etengo Adama nya Eva, waayisá ndotshutshɛ nkɔmano djɛwɔ kaanga yayalaka djɔ? Weepó wɛsɔ ladjɛ nkadjimwama, ya wopo wɔkɔnge?
15-16. a) Winá wɔkɔnge anto ankfumɔ yongowa mbamba kɛ nyɛnyɛ nkɔmano djɛwɔ te Yehova? b) Eposelo wɛkɔnge wengoposa m’ohemba w’ekomo wɔsɔ?
15 Satana angodjipama lá lokando ɛnɔnyi 1 000. Lá winá wɔsɔ, nde apangoyala l’akoka wa ndjimba kaanga onto ɔmɔ. Koko, l’ekomo k’ɛnɔnyi 1 000, Satana angotshungɔ má lokando. Masɔ nde angohona ndjimbola anto wa djɔ. Lá winá w’ohemba wɔsɔ, anto ankfumɔ wa djɔ wangoyalá lá looko wangowa mbamba kɛ nyɛnyɛ papoo ntsha iwɔ nɛmɛyɛka djiina djɛ Ndjambe la nsukaka lotshungɔ lɔnde lɔ ndɔndjɛ. (Ndj. 20:7-10) Kɛnɛ k’onto l’onto ndongonangha lá winá wɔsɔ, ndeke longoshikikɛ ntsha djiina djɛnde nkoka mfunama lotshinda l’onkanda wɔ lowiko.
16 Lofulo l’anto amɔtshi lopewama kɔɔ, wangokola Adama nya Eva, ntepela ente wangotona ɛlɔndjɛlɔ kɛ Yehova. Kɛkɔnge kengakomela? Ndjiso 20:15 ntoshimelaka ante: ‘Onto onkfumɔ wɔ djiina djɛnde ntatanemá l’onkanda wɔ lowiko ahɔnywamaka tá odjiya w’iyɛ.’ Ee, antɔmbɔki wasɔ wangotshitana lotshinda lotshinda. Koko efula k’anto wa djɔ wangolonga l’ohemba w’ekomo wɔsɔ. Masɔ wiina wawɔ wangofunama lotshinda lotshinda l’onkanda wɔ lowiko.
LÁ ‘WINÁ W’EKOMO’
17. Akambo wakɔnge wa yashimela Danyɛlɛ wayalisá ladjɛ nanghema l’etsho wɛso wɛnɛ? (Danyɛlɛ 12:4, 8-10)
17 Nsɔsɔlɔ, alekɔ wɔlɔ efula nkanela lá akambo wasɔ wanghonanghemá l’etsho weyaye! Koko, ondjelo ashimelaka Danyɛlɛ akambo ankina wa djonyi walendana l’etsho wɛso wɛnɛ, ntepela ente ‘etsho w’ekomo.’ (Wala Danyɛlɛ 12:4, 8-10; 2 Ti. 3:1-5) Ondjelo ashimelaka Danyɛlɛ ante: ‘Balo dj’akambo wa nsɔsɔlɔ djengoyala lombombe.’ Ee, enkambi wɛ Ndjambe wayalaka ladjɛ nsipisoyɛ wɔlɔwɔlɔ etepela wɛ prɔfɛsi welekɔ́ l’onkanda wɔnde. Ondjelo akotshɛka ante l’etsho wɛsɔ ‘anto wapɔlɔ wanghonangha akambo wa nyɛtshi ko lako onto wɔpɔlɔ wongosipisoyɛ.’
18. Kɛkɔnge kɛkɔpa nkomela anto wapɔlɔ lako ilá?
18 Lɔɔko kɛnɛ, nkoka nyɛnama etengo anto wapɔlɔ wapawa tokakó má nanghedji djɛwɔ djɛ pɔlɔ. (Mal. 3:14, 15) Koko lako ilá Yeso angolomboyɛ anto walekɔ́ etengo ambodji ko angakakitola la anto walekɔ́ etengo ɛnkɔkɔ. (Mat. 25:31-33) Anto wapɔlɔ wasɔ wapangowika lá ndjolo k’ekekete, kaanga nkfundɔ djɛ ndowika l’andja wa bango. Wiina wawɔ wapangofunama ‘l’onkanda wɔ mvungo’ w’otepelawɔ l’onkanda wɔ Malaki 3:16.
19. Kɛkɔnge k’oyɛso ladjɛ nangha má winá wɔsɔ, ko lamo? (Malaki 3:16-18)
19 Ɔnɛ ndeke etena kɛ nyɛnyɛ má nanghedji djɛso ente tɔpɔshi opiko l’anteyi k’anto wapɔlɔ. (Wala Malaki 3:16-18.) Yehova atshumanyɛ anto w’ɔsande etengo ‘ekete ketshikitanyi,’ ntepela ente anto walekɔ́ la ntshina le nde. Iso nkombolaka nsɔsɔlɔ ndjala l’anteyi k’anto wasɔ.
Ɔsɔngo osasa wongoyala laso, winá wɔ sɔnghɛna, Danyɛlɛ, anto waso wa ngandji wavwisá edjinge anto ankina lombombe ‘wambemala’ djɛ mba opiko wɔwɔ l’andja wa bango! (Lenda itenyi 20)
20. Daka dj’ekomo djɛkɔnge djɛ yapɛyɛ Danyɛlɛ, ko lamo okongelɛ ekotshamelo kɛ daka djɛsɔ l’oloko lukuluku?
20 Lá nsɔsɔlɔ, towika l’eleko kenanghema akambo wa nkamɔ efula. Koko lako ilá lonkina akambo waleká wɔlɔ wakɔpa nanghema. Lako ilá tɔkɔpa nyɛna etshitanelo k’anto ankfumɔ wapɔlɔ. Masɔ, tɔnghɛna ekotshamelo kɛ daka djɛ Yehova ndalake Danyɛlɛ ante: ‘Wɛ ongemala lá nkambo djɛ opiko wɔko l’etsho w’ekomo.’ (Dan. 12:13) Wɛ ongokongelake l’oloko lukuluku winá wɔ Danyɛlɛ la anto wako wa ngandji ‘yongowetshɔ’ lonkina? Ntsha oyɛwɔnde nghɔsɔ, mbɔ nangha la wolo djɛ ntshikala la nkɔmano má winá wɔsɔ ko okoka ndjala l’eshikikelo ente djiina djɛko ngofunama lotshinda l’onkanda wɔ lowiko wɔ Yehova.
YEEMBO 80 ‘Lɛta ko ɔnghɛna ente Yehova alekɔ wɔlɔ’ (lá Otetela)
^ Djamba djɛnɛ dekɔ la etshikitano lá looka lɔso lolendana la nonghanyi keleka ekekete k’olemo wɔ ndakanyɛ w’otepelawɔ lá Danyɛlɛ 12:2, 3. Tongoshishima winá wɔ olemo wɔsɔ yonghonanghema la anto wanghonanghá olemo wɔkɔ. Tɔngɛna lonkina wopo wɔ nonghanyi k’olakanyelo kɛsɔ yongokotshɛ́ anto wawika lá looko djɛ ndalɔngɔsɔla lá nkambo dj’ohemba w’ekomo wongoyala l’ekomo k’ɛlɔndjɛlɔ k’Ɛnɔnyi kinunu kɛ Kristo.
^ Ekfundwelo nkoka mbanga me anto wavwisá la nkɔmano l’etsho w’ekomo ko masɔ anto wavwisá lá ntondo kɛwɔ nkoka ndotateyɛ nkfundɔ, lɔsɔkɛ la lɔsɔkɛ. Ntsha nghɔsɔ ndeke yongoyala, mbɔ lɔsɔkɛ la lɔsɔkɛ wangoyala la mbamba kɛ nsangela anto w’ewawɔ. Ayale wopo wɔkɔnge yongoyala, Afunelo ntepelaka lá nkambo dj’ekfundwelo kɛ t’olongo ante, ‘onto l’onto lá winá wɔnde,’ djɛkondeke iso nkoka ndashikikɛ ente kaanga ekfundwelo kelá looko kenghonanghema l’ɔnɔnghɔ ipa l’ofutano.—1 Kɔ. 14:33; 15:23.
^ Nsakiso kɛnɛ kemboyakala otshikitano lá looka loyalaki laso ntondo lotanema l’onkanda He Dja Yimba lo Prɔfɛsiya ka Danyɛlɛ! shapitrɛ 17, edjinge lá Etange k’Olami kɛ Ngɔndɔ 1, 1987, nki. 21-25 (lá Falase).
^ Lá lɛdji lotshikitanyi, totepela tɔnɛ ‘anto wa wɔlɔ’ edjinge ‘anto wa pɔlɔ’ totanaso lá Elemo 24:15 la ‘anto wananghaki akambo wa wɔlɔ’ la ‘wananghaki akambo wa pɔlɔ’ totanaso lá Djɔanɛ 5:29 nyɛnyɛka nanghedji djeyalaki l’anto wangokfundɔ́ lá ntondo k’iwɔ mvɔ.
