MUISAMBO WA KULONGA 40
“Kukunkusha bantu be bungi mu kululama”
“Baaba abakunkusha bantu bebungi mu kululama, abakameekameeka bu nyenyenyi bua losoo.”—NDA. 12:3, NWT.
LOONO 151 Akayitamina
KI’ABAKUILA MUANKA *
1. Mmianda kinyi ikata y’atutengiela mu bipua kinunu bia kumunana?
ADIKEKADIKA efuku dibuwa bukile, nsaa ayikabanga kusanguka bafue pano pa nsenga mu bipua kununu bia kumunana kua Kidishitu. Baaba booso bashimishe bakuabo babadi bafule, be na muloo wa nkemonena nabo dingi. Bino ngi abipusha namu na Yehowa. (Yob. 14:15) Nka bu bi’atulongiele mu muisambo ushaale, “balulame” be na mashina aabo afundibue mu mukanda wa muwa, abakaluka dimo “basangukie bua muwa.” (Bik. 24:15; Yo. 5:29) Pangi bebungi ba ku bakuetu bafue, abakekala munkatshi mua baaba abakasanguka kapindi kapeela kunyima kua ngoshi ya Armagedone. * Kukatusha biabia, bantu “bashi-balulame” sunga’shi booso babaadi bafue kushi’bo kupeta mushindo wa kuuka Yehowa, na ku mufubila na lulamato kumpala kuabo kufua, abakasanguka naabo namu bua “lusangukilo lua kiimu.”
2-3. (a) Nka bu abilesha Yeeshaya 11:9, 10, mpango kinyi ikata ishakitshikile dingi kashaa mu nshalelo a bantu ayikakitshika? (b) Nkinyi ki’atukataluula mu uno muisambo?
2 Bano booso abakasanguka abitungu nkebalongiesha. (Yesh. 26:9; 61:11) Atukalombasha mpango ya kulongiesha bantu ishakitshikile dingi mu nsenga ishima. (Badika Yeeshaya 11:9, 10.) Buakinyi? Muanda ku lungi lupese bantu bashii balulame abakasanguka, abakekadika na lukalo lua kulonga bibungi pabitale Bufumu bu’Efile Mukulu, mulambu wa nkuulo ya Yesu, muulo w’eshina dia Yehowa na buakinyi nka penda aye ngi muikale mukunkushi mululame. Sunga bantu balulame abakekala na lukalo lua kulonga bibungi pabitale Yehowa, na kuuka mushindo wadi mulongieshe muilo waye pabitale mpango yaye bua nsenga ku kapeela kapeela. Bangi ba ku bafubi baasha lulamato, babafuile kumpala kuashi eyi dia Yehowa Bible difundibue dioso dishima. Bisaka bioso bibidi, kia balulame na kia bashi balulame abikekadika na bibungi bia kulonga.
3 Mu uno muisambo atukataluula ino nkonko ayilondo: Mmushindo kinyi aukakitshibua uno mudimo ukata wa kulongiesha? Bikitshino abikaleesha bantu ku uno mudimo wa kulongiesha, abikekala na bukitshishi ku mashina aabo, su ngalombene kufundibua mu mukanda wa muwa bua losoo sunga kukutua kufundibua muanka su? Ngaluulo ya ku ino nkonko i na muulo ukata kuatudi lelo uno. Nka bu bi’atukebimono, angi matemuki akata atupete mu mukanda wa Ndanyele na wa Kibafumbwilwe, aetukuasha bua kutokiesha mpushisho eetu bua akikakitshika nsaa ayikasanguka bafue. Kia kumpala, tutaluuleyi mianda ikata itababapuile kulesha mu butemuki bua Ndanyele 12:1, 2.
“BAABA BOOSO BALAALE MU LUFUFI LUA NSENGA . . . ABAKAPASUKA”
4-5. Nkinyi akilesha Ndanyele 12:1, pabitale mafuku a ku mfudiilo?
4 Badika Ndanyele 12:1. Mukanda wa Ndanyele aulesha mianda ikata ayikamueneka mu mafuku a ku mfudiilo. Bu kileshesho, Ndanyele 12:1, alesha’shi Mikaele, Yesu Kidishitu, “Akemana ku lupese lua muilo w’Efile Mukulu.” Kiakia kipindi kia butemuki, kibabangile kulombana mu 1914, nsaa ibabatudile Yesu bu Mfumu a Bufumu bu’Efile Mukulu muiyilu.
5 Ndanyele baadi mutemukie dingi’shi Yesu “akebwo” mu “enyi aa mafuku, a malwa akata ashyekele kwanka kashaa milo ya bantu yekala kwanka.” Aa “mafuku a malwa akata” nyi mafuku a “mpombo ikata” abadi baleshe mu Mateo 24:21. Yesu akemana sunga’shi akakaluila muilo w’Efile Mukulu ku mfudiilo kua kipungo kia kenyongoshi kakata, kuamba’shi ku Armagedone. Mukanda wa Kibafumbwilwe aulesha bano bantu bu kibumbu kikata kia “baaba abafiki ku mpombo ikata.”—Kibaf. 7:9, 14, Kilombeeno Kipya 2014.
6. Nkinyi akikakitshika kunyima kua kibumbu kikata kupanda ku mpombo ikata? Patuula. (Tala dingi mu kino Kitenta kia Mulami mu “Nkonko ya bantu ababadikaa” pabitale lusangukilo lua muwa pa nsenga.)
6 Badika Ndanyele 12:2. Nkinyi akikakitshika kunyima kua kibumbu kikata kupashibua ku mpombo ikata? Buno butemuki t’abulesha lusangukilo lua mu kifuanyi bua bafubi b’Efile Mukulu lua mu kikudi alumueka mu mafuku a ku mfudiilo bu bibatudi atupusha kumpala nya. * Ano mayi aalesha lusangukilo lua bantu bafue alukatshika mu nsenga ipia. Buakinyi atuakula biabia? Kishima “lufufi lua nsenga” mbekifubishe dingi mu Yoobo 17:16, na ki mumune na kishima “mashaama.” Uno muanda wi mu Ndanyele 12:2, aulesha lusangukilo lua binyibinyi alukakitshika kunyima kua ano mafuku a ku mfudiilo, na kunyima kua ngoshi ya Armagedone.
7. (a) Mmushindo kinyi aukasanguka bangi bua “muwa wa ikalayika?” (b) Luno “lusangukilo lui buwa” mushindo kinyi?
7 Nkinyi akilesha Ndanyele 12:2, nsaa yakula’shi bangi abakasanguka bua “muwa wa ikalayika”? Bino abilesha’shi baaba booso abakasanguka, abakalongo na abakatungunuka na kulonga na kukokiela Yehowa na Yesu munda mua bipua 1 000, ku mfudiilo a bioso abakatambula muwa wa ikalayika. (Yo. 17:3) Luno “lusangukilo” alukekala lui buwa bukile kukila ya bangi bantu booso babaadi basangukie kala. (Eb. 11:35) Buakinyi? Muanda bano bantu babaadi bakutue kupuidika na babafuile dingi.
8. Mmushindo kinyi aukasanguka bangi bua “buufu mu mpombo ya losoo”?
8 Ta mbooso abakasanguka abakakumiina kulongieshibua na Yehowa. Butemuki bua Ndanyele abuamba’shi bangi abasanguka bua “buufu mu mpombo ya losoo.” Muanda abakalesha kikudi ki’etombo, na mashina aabo t’aakafundibua mu mukanda wa muwa na t’abakapete muwa wa ikalayika nya. Anka kuilekeena na biabia, abakapete “mpombo ya ikalayika” sunga kubutudibua kua losoo. Biabia, Ndanyele 12:2, akula bua bipeta abikatuuku muyile bikitshino bia baaba booso abakasanguka, kunyima kua lusangukilo luabo. * (Kibaf. 20:12) Bangi abakapete muwa wa ikalayika, anka bangi namu tabakeupete nya.
“KUKUNKUSHA BANTU BEBUNGI MU KULULAMA”
9-10. Nkinyi dingi akikakitshika kunyima kua mpombo ikata, na mbatu kinyi “abakapenyapenya bu nguba”?
9 Badika Ndanyele 12:3. Nkinyi dingi akikakitshika kunyima kua “kipungo kia kenyongoshi kakata”? Bua kulombasha mayi e mu Ndanyele 12:2, verse 3 akula bua muanda kampanda aukakitshika kunyima kua mpombo ikata.
10 Mbantu kinyi “abakapenyapenya bu nguba”? Mateo 13:43, etukuasha buatudia kupeta kitunduilo nsaa yakula’shi: “Penipaapa balulame abakapenyapenya bu nguba mu Bufumu bua Nshabo.” Muyile akiakuila mayi a Yesu pano, Yesu baadi akula pabitale “baana ba Bufumu,” bakuabo bedibue muimu, abakamunana naye pamune mu Bufumu bua muiyilu. (Mat. 13:38, Kilombeeno Kipya 2014) Anka Ndanyele 12:3, akuila bua bedibue muimu na mudimo wabakakitshi mu kipungo kia bipua 1 000, bia kumunana kua Kidishitu.
Bedibue muimu 144 000, abakafubu pamune na Yesu Kidishitu bua kukunkusha mudimo wa kulongiesha awukakitshibua mu bipua 1 000 bia kumunana (Tala kikoso 11)
11-12. Bedibue muimu 144 000, abakakitshi mudimo kinyi mu bipua 1 000?
11 Bedibue muimu abakakunkusha bantu “bebungi mu kululama” mushindo kinyi? Bedibue muimu abakafubu pamune na Yesu Kidishitu, bua kukunkusha mpango ya kulongiesha ayikakitshika pano pa nsenga munda mua bipua 1 000. Bano bantu 144 000, t’abakekala nka penda bu ba mfumu nya, abakafubu dingi bu ba tshite-muakuidi. (Kibaf. 1:6; 5:10; 20:6) Biabia, abakakuasha mu kupaasha kua bena maumbo. Ku kapeelakapeela, abakatuala bantu booso mu kupuidika. (Kibaf. 22:1, 2, Kilombeeno Kipya 2014; Es. 47:12) Bedibue muimu aabakekadika na muloo wi bungi!
12 Mba nnanyi abakekala munkatshi mua “bebungi” babakatuala mu kululama? Nyi mbaaba booso abasanguka, mpaa na baaba booso abapanda ku ngoshi ya Armagedone, pamune na baana bakinga abakatandikua mu nsenga ipia. Ku mfudiilo kua bipua 1 000, booso bashaale pa nsenga abakekala bapuidikie. Biabia nsaa kinyi ayikafundibua mashina aabo bua losoo na encre kushii kufundibua na crayon mu mukanda wa muwa?
KITOMPUANGA KIA MFUDIILO
13-14. Bantu booso bapuidikie abakekala na muwa pano pa nsenga, abitungu baleshe kinyi kumpala kuabo kupeta muwa wa ikalayika?
13 Abitungu tutentekieshe’shi kuikala bantu bapuidikie t’akulesha’shi muntu bapate muwa wa ikalayika musuusa umune nya. Tunangushene bua Adama na Eva, babaadi bapuidikie, anka bibaadi abitungu baleshe’shi mbakokiele Yehowa Efile Mukulu kumpala kua kupeta muwa wa ikalayika. Anka bi malua, muanda babakutshilue kumukokiela.—Lom. 5:12.
14 Nkinyi akikafikila baaba booso abakashaala pa nsenga ku mfudiilo kua bipua 1 000? Booso abakekala bapuidikie. Bano bantu booso bapuidikie, abakakumiina kukuatshishena bukunkushi bua Yehowa losoo su? Su bangi abakekala bibaadi Adama na Eva sunga bibaabadi bapuidikie ntabashaale na lulamato? Abitungu kualuula ino nkooko yooso, kadi mushindo kinyi?
15-16. (a) Nsaa kinyi ayikapete booso mushindo wa kulesha lulamato luabo kui Yehowa? (b) Nkinyi akikekala bu kipeta kia mfudiilo ku kino kitompuanga?
15 Abakeele Satana mu lukano munda a bipua 1 000. Munda mua kino kipungo kioso t’akekala na ngobesha ya kulubisha muntu su ngumune. Biabia, ku mfudiilo kua bipua 1 000, Satana akatushibua mu lukano. Akatompo dingi kulubisha bapuidikie. Mu kino kitompuanga, bantu booso bapuidikie be pa nsenga, abakapete mushindo wa kulesha patooka’shi abatumbisha eshina di’Efile Mukulu na kukuatshishena bukunkushi buaye. (Kibaf. 20:7-10) Kiakia ki’abakakitshi mu kiakia kipungo, ngi akikalesha su mashina aabo ngalombene kufundibua mu mukanda wa muwa bua losoo.
16 Bible etulungula’shi bangi bantu abakakutua lulamato nka bu Adama na Eva, basumbusheene bukunkushi bua Yehowa. Nkinyi akikebafikila? Kibafumbwilwe 20:15, etulungula’shi: “Su muntu tamusanganwe mufundwe [eshina] mu mukanda wa muwa, baadi mwedibue mwishiba dia kaalo. Kilombeeno Kipya 2014” Eyendo, baaba bantomboshi booso abakabutudibua bua losoo. Anka bantu bebungi bapuidikie abakakambila kino kitompuanga. Mashina aabo aakafundibua dingi bua losoo mu mukanda wa muwa.
MU “MAFUKU A KU MFUDIILO”
17. Nkinyi kibabalunguile Ndanyele kui muikeyilu akikakitshika ano mafuku eetu? (Ndanyele 12:4, 8-10)
17 Bi muloo ukata, p’atunangusheena pabitale mianda ikata ayikakitshika mu mafuku aafiki. Anka muikeyilu baadi muleshe Ndanyele ingi mianda i na muulo ukata itale ano mafuku eetu, “mafuku a ku mfudiilo.” (Badika Ndanyele 12:4, 8-10; 2 Tim. 3:1-5) Muikeyilu balunguile Ndanyele’shi: “Kiukilo kia biinyibiinyi akifimi, NWT.” Eyendo, mayi a butemuki e mu uno mukanda, babaadi balombene kuiapusha kalolo kui muilo w’Efile Mukulu. Muikeyilu baadi mukumbashe’shi, mu kiakia kipungo “babi abakakitshi nka bubi, mubi su ngumune t’akapusha, NWT.”
18. Nkinyi akikafikila bantu babi mu kapindi kapeela’mu?
18 Lelo uno abimueneka’shi bantu babi bakuete kunyishanga kukita bubi muiyile muikelo wabo wi bubi. (Mal. 3:14, 15) Mu kapindi kapeela’mu, Yesu akatshibila baaba be bu mbushi kiimu na kuibaabuula kui baaba be bu mikooko. (Mat. 25:31-33) Bano bantu babi t’abanapande ku mpombo ikata, na t’abana sangukie buashi batuele mu nsenga ipia nya. Mashina aabo taakafundibua mu “mukanda wa kitentekiesho” bu biabadi baleshe mu Malakii 3:16.
19. Kino ngi kipungo kiatudia kukita kinyi na buakinyi? (Malakii 3:16-18)
19 Binobino tui mu kipungo akitungu tuleshe mu muikeelo wetu’shi ta tui munkatshi mua bantu babi. (Badika Malakii 3:16-18.) Yehowa kuete abungu baaba bamono bu “bantu baye aye nabene” sunga baaba baadi muate na muulo. Abitungu tushinkamiishe’shi atumiina kuikala munkatshi muabo.
Atukekala na muloo wibungi wa kumona Ndanyele, bakuetu batudi bafule babafuile, na bangi be bungi “pabakebwo” bua kupeta efuto diabo mu nsenga ipia! (Tala kikoso 20)
20. Mmulayilo kinyi wa mfudiilo ubaabadi balungule Ndanyele na buakinyi okuete kutengiela na kinsukunsuku kioso kulombana kua uno mulayilo?
20 Mu biinyibiinyi, tui mu kipongo ki bukopo. Anka, kui ingi mianda ya kukaanya ayikiebe kukitshika binobino. Mu kapindi kapeela’mu atukamono kuluishibua kua bubi booso. Na dingi atukamono kulombana kua mulayilo wa Yehowa wi mu Ndanyele awamba’shi: “Okeebwo bwa kupeta bwobe bwedi ku mfudiilw’a mafuku.” (Nda. 12:13) Okuete kutengiela na kinsukunsuku kioso efuku “adikebwo” Ndanyele na baaba booso bodi mufule buabadia kuikala dimo na muwa su? Su mbiabia kita mobe mooso binobino bodia kushaala na lulamato, na we mulombene kushinkamisha’shi eshina diobe adikashaala difundibue mu mukanda wa muwa wa Yehowa.
LOONO 80 “Tompa omone’shi Yehowa e buwa”
^ Mu uno muisambo mubatuele kushintuluka kua mpushisho eetu pabitale mpango ikata ya mudimo wa kulongiesha wabadi baleeshe mu Ndanyele 12:2, 3. Atukataluula nsaa ayikakitshika uno mudimo, na benyi abakeukitshi. Atukamono dingi mushindo wi ino mpango ya kulongiesha bi’ayikalumbuula baaba booso be pa nsenga, bua kitompuanga kia mfudiilo mu bipua kinunu bia kumunana kua Kidishitu.
^ Pangi lusangukilo ndulombene kubanga na baaba babafuile na lulamato mu ano mafuku a mfudiilo, akupu lukelondeene mupunda bipungo na bipungo. Bino abileesha’shi kipungo kioso akikapete mushindo wa kukukila bantu babadi baukie kalolo. Sunga mbiabia, Bifundue abiakula bua kuilondena kua mianda mu “mulongo” pabitale lusangukilo lua muiyilu, na tuibalombene kuamba dingi’shi lusangukilo lua pa nsenga, alukakitshika mu kipaso ki buwa.—1 Kod. 14:33; 15:23, Kilombeeno Kipya 2014.
^ Uno nyi mpatuluilo a mpushisho mupia atupete mu mukanda wa Prêtons attention à la prophétie de Daniel ! shapitre 17, na mu Kitenta kia Mulami kia mu 1/7/1987, Esak. 21-25.
^ Mu kuilekeena na bishima “balulame” na “bashi-balulame” bi’atupete mu Bikitshino 24:15, na bishima “bakite bi buwa na bakite bi bubi” biatupete mu Yowano 5:29, abishimika kasele pa muikeelo wa bantu abakasanguka, ubaabadi nao kumpala kuabo kufua.
