WOTO 40
„Heepi te a hia sëmbë u de ko dë sëmbë di ta du soni a wan leti fasi”
„Dee sëmbë dee ta heepi te a hia sëmbë u de ko dë sëmbë di ta du soni a wan leti fasi, o ko dë kuma di limbo u dee teeja dee ta koti faja u nöömö, awa u teego.”—DAN. 12:3.
KANDA 151 A o kai de
WANTU SONI U DI WOTO *
1. Un gaan soni o pasa a di pisiten u di Dusu Jaa Tii?
A O DË wan gaan daka seei te sëmbë o bigi weki ko a libi baka a di pisiten u di Dusu Jaa Tii u Keesitu! Hii u tuu ta hangi u si dee sëmbë fuu dee lasi libi. Sö Jehovah ta fii tu (Jöpu 14:15). Pakisei luku fa sëmbë o wai te dee sëmbë u de weki ko a libi baka. Leti kumafa u bi si a di woto di pasa, nöö dee sëmbë „dee bi libi bunu a Masa Gadu wojo”, söseei dee në u de dë sikifisikifi a di Buku u Libi, „o weki ko a libi baka u de feni libi” (Tjab. 24:15; Joh. 5:29). A kan taa sömëni u dee sëmbë fuu dee lasi libi, o weki ko a libi baka kölö sö baka Amagedon. * Boiti di dë, dee sëmbë „dee an bi libi bunu”, u di de an bi feni wan bumbuu okasi u ko sabi Jehovah, nasö u dini ën ku hii de hati ufö de dëdë, „o weki ko a libi baka u de kuutu de”.
2-3. (a) Andi o dë di möön gaan peleikiwooko di sëmbë o du a goonliba, te u luku Jesaaja 11:9, 10? (b) Andi woo luku a di woto aki?
2 Hii dee sëmbë dee o weki ko a libi baka o abi u lei soni (Jes. 26:9; 61:11). Nöö fëën mbei woo abi u du di möön gaan peleikiwooko di sëmbë an bi du jeti. (Lesi Jesaaja 11:9, 10.) Faandi mbei? Wë wan u dee soni, hën da dee sëmbë dee an bi libi bunu, dee o weki ko a libi baka, o abi u lei soni u Jesosi Keesitu, u di Könuköndë u Gadu ku di lusupaima. A o dë fanöudu tu u de ko sabi unfa di në u Jehovah hei tjika, söseei faandi mbei hën wanwan fiti u tii hii soni. Dee sëmbë dee bi libi bunu a Gadu wojo seei o abi u ko sabi dee soni dee Jehovah lei u dee nama ku dee soni dee a abi a pakisei da di goonliba. So u dee sëmbë aki bi dëdë gaanduwe kaa ufö di Bëibel bi kaba sikifi. Dee sëmbë dee an bi libi bunu ku dee bi libi bunu tuu, o abi gaan hia soni u lei.
3 A di woto aki woo piki dee hakisi aki: Unfa woo du di gaan peleikiwooko a di ten di ta ko? Di wooko aki o mbei taa sëmbë në o sa sikifi u teego a di buku u Gadu ö, naa a o mbei taa so në feki puu nëën? Dee piki u dee hakisi aki musu dë wan fanöudu soni da u. Woo si taa so u dee tjabukama woto dee sikifi a di buku Daniëli ku di buku Akoalimbo, o heepi u fuu ko fusutan möön bunu andi o pasa te dee sëmbë dee dëdë, o weki ko a libi baka. Ma boo luku fosu andi di tjabukama woto u Daniëli 12:1, 2 ta taki.
„DEE DËDË SËMBË DEE DË TA DUUMI A GOONBASU, O WEKI KO A LIBI BAKA”
4-5. Andi Daniëli 12:1 ta lei u u di pisiten u di kaba?
4 Lesi Daniëli 12:1. Di buku u Daniëli ta lei u unfa soni o waka a di pisiten u di kaba. Daniëli 12:1 ta taki taa Mikaëli, nasö Jesosi Keesitu, „ta hopo du soni u heepi dee sëmbë [u Gadu]”. Di pisi u di tjabukama woto aki bigi pasa tuutuu a di jaa 1914, di Jesosi toon Könu u di Könuköndë u Gadu di dë a liba ala.
5 Ma de bi piki Daniëli tu taa Jesosi bi o „hopo du soni” a „wan taanga ten” di bi o ko. Nöö „sensi di ten di di fosu nasiön sëmbë bi ko dë, te dou di ten dë, nöiti sö wan fuka bi ko jeti”. Di „taanga ten” dë da di „gaan fuka” di Mateosi 24:21 ta taki soni fëën. Jesosi ta hopo du soni u heepi dee sëmbë u Gadu a kaba pisi u di taanga ten dë, hën da na Amagedon. Di buku Akoalimbo ta taki taa dee sëmbë aki dë wan gaan kulupu sëmbë di „pasa di gaan hogi sitaafu”.—Ako. 7:9, 14.
6. Andi o pasa te dee gaan hia sëmbë pasa di gaan fuka libilibi? (Söseei luku „Soni di dee lesima hakisi” di dë a Di Hei Wakitimawosu aki, di ta taki u di weki di sëmbë o weki ko a libi baka, u libi a goonliba aki.)
6 Lesi Daniëli 12:2. Andi o pasa baka te di gaan kulupu sëmbë pasa di taanga ten libilibi? Fosu u bi ta mëni taa Daniëli 12:2 bi ta taki u sëmbë di bi o weki ko a libi baka u go a liba ala, nasö taa a bi ta taki u di fasi fa di wooko fuu bi go a fesi, baka di dee sëmbë dee bi ta du ku u bi suku u tapa di peleikiwooko a di jaa 1918. * Ma nöunöu u ko fusutan taa a ta taki u di weki di dee sëmbë dee dëdë o weki ko a libi baka a di njunjun goonliba. Faandi mbei u taki sö? Di wöutu „goonbasu” sikifi a Jöpu 17:16 tu, nöö a kë taki „Geebi”. Fëën mbei u sa taki taa Daniëli 12:2 ta taki u di weki di sëmbë o weki ko a libi baka te dee lasiti daka kaba, söseei baka di feti u Amagedon.
7. (a) Na un futu so sëmbë o weki ko a libi baka „u libi u teego”? (b) Faandi mbei a o dë wan „möön bumbuu libi”?
7 Andi Daniëli 12:2 kë taki te a ta taki taa so sëmbë o weki ko a libi baka „u libi u teego”? Di soni aki kë taki taa dee sëmbë dee o weki ko a libi baka a di ten u di 1000 jaa, o lei soni u Jehovah ku Jesosi, nöö ee dee sëmbë aki ta lei soni u de go dou, ta piki de buka, nöö de o feni di libi u teego te u kaba fëën (Joh. 17:3). Di libi dë, o dë wan „möön bumbuu libi” möön di so sëmbë bi feni di de bi weki ko a libi baka a di ten di pasa (Heb. 11:35). Faandi mbei u taki sö? Wë u di dee sëmbë dë bi toona dëdë baka.
8. Na un futu so sëmbë o weki ko a libi baka „u kisi sen ku buuse u nöömö”?
8 Ma na hii dee sëmbë dee o weki ko a libi baka o kë lei soni u Jehovah. Di tjabukama woto u Daniëli ta taki taa so sëmbë o weki ko a libi baka „u kisi sen ku buuse u nöömö”. U di dee sëmbë aki an o kë saka deseei a Jehovah basu, mbei në u de an o sikifi a di Buku u Libi, söseei de an o feni di libi u teego tu. Ma de o feni „buuse u nöömö”. Di soni dë kë taki taa de o dëdë. Hën da Daniëli 12:2 ta taki andi o pasa ku dee sëmbë dee o weki ko a libi baka. Dee soni di dee sëmbë aki o du baka te de weki ko a libi baka, de o mbei de libi u teego nasö taa de lasi di libi u teego * (Ako. 20:12). So u de o feni di libi u teego, ma wotowan an o feni ën.
„HEEPI TE A HIA SËMBË U DE KO DË SËMBË DI TA DU SONI A WAN LETI FASI”
9-10. Un woto soni o pasa baka di gaan fuka, nöö ambë „o koti faja kuma di limbo a liba ala”?
9 Lesi Daniëli 12:3. Un woto soni o pasa baka di „taanga ten” di ta ko? Wë boiti Daniëli 12:2, vers 3 seei ta taki u wan soni di o pasa baka di gaan fuka.
10 Ambë „o koti faja kuma di limbo a liba ala”? Mateosi 13:43 ta heepi u fuu fusutan ambë dëën, te a ta taki taa: „A di ten dë, dee sëmbë dee Gadu feni bunu o koti faja kuma sonu a di Könuköndë u de Tata.” A di tëkisi aki, Jesosi bi ta taki soni u „dee sëmbë dee dë a di Njunjun Tii u Gadu dendu”. Hën da dee salufu baaa fëën dee o tii makandi ku ën a di Könuköndë di dë a liba ala (Mat. 13:38). Fëën mbei a musu u dë sö taa Daniëli 12:3 ta taki soni u dee salufuwan ku di wooko di de o du a pisiten u di Dusu Jaa Tii.
Dee 144.000 sëmbë o wooko makandi ku Jesosi Keesitu u tii di gaan peleikiwooko di o du a goonliba aki a di pisiten u dee 1000 jaa (Luku palaklafu 11)
11-12. Un wooko dee 144.000 sëmbë o du a dee 1000 jaa?
11 Unfa dee salufuwan o heepi „te a hia sëmbë u de ko dë sëmbë di ta du soni a wan leti fasi”? Dee salufuwan o wooko makandi ku Jesosi u tii di gaan peleikiwooko di o du a goonliba aki a di pisiten u dee 1000 jaa. Dee 144.000 sëmbë an o tii kuma könu nöö a kaba, ma de o dë mindima tu (Ako. 1:6; 5:10; 20:6). A sö wan fasi de o heepi „kula hii nasiön u goonliba”, u di de o heepi libisëmbë pikipiki u de an ko abi zöndu möön (Ako. 22:1, 2; Eze. 47:12). Na piki piizii di soni dë o mbei dee salufuwan piizii!
12 Ambë da dee „te a hia sëmbë” di de o heepi u de ko dë sëmbë di ta du soni a wan leti fasi? Dee sëmbë aki da dee sëmbë dee o weki ko a libi baka, dee sëmbë dee o pasa Amagedon libilibi, ku kandë dee mii di de o pai a di njunjun goonliba. Te dee 1000 jaa dou, nöö na wan sëmbë u goonliba o abi zöndu möön. Wë nöö na un ten në u dee sëmbë aki o sikifi u nöömö a di Buku u Libi?
DI LASITI TESI
13-14. Andi hii dee sëmbë dee an o abi zöndu möön musu du u de sa feni di libi u teego?
13 U musu hoi a pakisei taa na te wan sëmbë an abi zöndu möön, nöö di soni dë wanwan tjika kaa faa feni di libi u teego. Pakisei Adam ku Eva. De an bi abi zöndu, ma tökuseei de bi musu piki Jehovah Gadu buka, sö taa de bi sa libi u teego. Ma a tjali taa de an piki hën buka.—Lom. 5:12.
14 Unfa soni o dë da dee sëmbë dee o dë a goonliba aki te dee 1000 jaa dou? Wë na wan sëmbë o abi zöndu möön. Ma hii sëmbë o saka deseei a di tii u Jehovah basu u nöömö u? Naa so sëmbë o lei taa de dë kuma Adam ku Eva, di an bi hoi deseei a Gadu, hii fa de an bi abi zöndu? A dë fanöudu fuu ko sabi dee soni aki. Ma unfa woo du ko sabi de?
15-16. (a) Na un ten hii sëmbë a goonliba o feni di okasi u lei taa de ta hoi deseei a Jehovah? (b) Unfa soni o waka baka di lasiti tesi dë?
15 De o söötö Saatan a di pisiten u dee 1000 jaa. An o sa ganjan na wan sëmbë a di pisiten dë möön. Ma te dee 1000 jaa dou, nöö dee o toona lusu Saatan baka. Nöö a o pooba u ganjan sëmbë, hii fa de an o abi zöndu möön. A di ten dë, hii sëmbë u goonliba o abi di okasi u lei gbelingbelin ee de ta lesipeki Gadu në, söseei ee de ta saka deseei a di tii fëën basu (Ako. 20:7-10). Dee soni di de o du a di ten dë, de o lei ee në u de o sikifi u nöömö a di Buku u Libi.
16 Di Bëibel ta piki u taa so sëmbë o du soni kuma Adam ku Eva. De an o saka deseei a di tii u Jehovah basu. Andi o pasa ku dee sëmbë dë? Akoalimbo 20:15 ta piki u taa: „Hiniwan sëmbë di në [fëën] an dë sikifisikifi a di Buku u Libi, nöö de o hiti ën tuwë go a di gaan faja kuma ze dë dendu.” Awa, de o poi dee sëmbë aki kaba a sösö fiaa. Ma gaansë u dee sëmbë dee o dë a goonliba o pasa di lasiti tesi dë. Në u de o sikifi u nöömö a di Buku u Libi.
„TE DI KABA JUU DOU”
17. Andi wan ëngëli bi piki Daniëli taa bi o pasa a di ten fuu aki? (Daniëli 12:4, 8-10)
17 A ta dë wan piizii soni seei te u pakisei dee soni dee o pasa a di ten di ta ko! Ma wan ëngëli bi piki Daniëli wanlö fanöudu soni di bi o pasa a di ten fuu aki tu. Dee soni aki bi o pasa „te di kaba juu dou”. (Lesi Daniëli 12:4, 8-10; 2 Tim. 3:1-5). Di ëngëli bi piki Daniëli taa: „Sëmbë o ko sabi di tuutuu lei gaanfa.” Awa, dee sëmbë u Gadu bi o ko ta fusutan dee tjabukama woto dee sikifi a di buku fëën möön gaanfa. Di ëngëli bi taki tu taa a di ten fuu aki „dee hogihati sëmbë [bi] o du dee hogi u de go dou”, nöö „na wan hogihati sëmbë [bi] o sa fusutan dee woto aki”.
18. Andi o pasa ku dee hogihati sëmbë abiti möön?
18 A di ten aki a sa ta djei kuma dee hogihati sëmbë an ta feni sitaafu u dee hogi di de ta du (Mal. 3:14, 15). Ma abiti möön Jesosi o kuutu dee sëmbë dee o dë kuma kaabita, nöö a o paati de puu a dee dë kuma sikapu dendu (Mat. 25:31-33). Dee hogihati sëmbë aki an o pasa di gaan fuka, söseei Gadu an o weki de ko a libi baka a di njunjun goonliba fëën tu. Në u de an o sikifi a di buku u Gadu, di Maleaki 3:16 ta taki soni fëën.
19. Andi u musu du nöunöu kaa, nöö faandi mbei u musu du ën? (Maleaki 3:16-18)
19 Nöunöu nëën u musu lei taa wa dë ku dee hogihati sëmbë a wan së. (Lesi Maleaki 3:16-18). Jehovah ta tja dee sëmbë dee a ta si kuma „wan apaiti gudu” fëën, ko a wan. An dë u taki taa u kë dë a dee sëmbë aki dendu tu.
Woo wai seei u si Daniëli, dee sëmbë fuu dee dëdë, ku woto sëmbë jeti, te de „weki ko a libi baka” u feni di paka u de a di njunjun goonliba! (Luku palaklafu 20)
20. Andi da di lasiti soni di Gadu bi paamusi Daniëli, nöö faandi mbei iseei ta wakiti u si fa di soni dë o pasa tuutuu?
20 U ta libi tuutuu a wan apaiti pisiten. Ma möön gaan soni o pasa jeti. Abiti möön woo si fa Gadu o puu hii hogilibi a goonliba. Baka di dë, woo si fa di soni di Jehovah bi paamusi Daniëli o pasa tuutuu, di a bi taki taa: „Joo weki ko a libi baka u feni di paka fii a kaba u dee daka” (Dan. 12:13). I ta hangi u si di daka ka Daniëli ku dee sëmbë fii dee dëdë o „weki ko a libi baka” u? Wë ee i kë si ën, nöö mbei hii möiti fii hoi iseei a Gadu, nöö joo dë seiki taa në fii o fika sikifisikifi a di buku u Jehovah.
KANDA 80 Dini Jehovah, nöö joo feni bunu
^ Di woto aki o taki unfa u ko ta fusutan di lei di woo lei sëmbë soni a di ten di ta ko, di Daniëli 12:2, 3 ta taki soni fëën. Woo luku tu na un ten di soni aki o pasa, söseei ambë o du di wooko aki. Boiti di dë, woo si unfa di lei di woo lei sëmbë soni a di ten dë, o seeka dee sëmbë dee o dë a goonliba aki da di lasiti tesi di o dë a kaba u di Dusu Jaa Tii u Keesitu.
^ A kan taa dee sëmbë dee bi hoi deseei a Gadu, dee bi lasi libi a dee lasiti daka fosu o weki ko a libi baka, nöö baka di dë dee sëmbë dee bi dëdë a de fesi o weki. Nöö a kan taa sö sëmbë o ta weki nango pikipiki te go miti dee avo avo fuu. Ee sö soni o pasa tuutuu, nöö hën da hiniwan sëmbë o abi di gaandi u wai ku dee sëmbë dee a bi sabi. Aluwasi unfa soni o pasa, di Wöutu u Gadu ta taki taa dee sëmbë dee o weki u go libi a liba ala abi wan „leti juu” di de o weki, nöö sö nöö u sa dë ku di mëni taa dee sëmbë dee o weki baka u libi a goonliba aki, abi wan juu di de o weki tu.—1 Kol. 14:33; 15:23
^ Di soni aki da di njunjun fasi fa u ko ta fusutan dee soni dee sikifi a woto 17 u di buku ¡Poti Prakseri na a Profeititori fu Danièl!, ku di Waktitoren u 1 u baimatu-liba u di jaa 1987, bld. 11-15.
^ Tjabukama 24:15 ta taki soni u ’sëmbë di bi libi bunu a Masa Gadu wojo ku dee an bi libi bunu tuu’. Johanisi 5:29 ta taki soni u „dee sëmbë dee bi libi bunu” ku „dee bi libi hogi”. Dee tu tëkisi aki tuu ta taki u soni di dee sëmbë dee o weki ko a libi baka bi du ufö de dëdë.
